الأربعاء، 18 مايو 2016

مظــــاهــرة عــابديــن الكــــبـرى









النهاردة هنحكى عن يوم من أيام الكرامة 
يوم حلو كدا ويفتح النفِس ع الدنيا 
بيفكرنى بأيام التحرير والجمع بتاعته
اياااااام ....









 
والقصة مصادرها
مذكرات احمد عرابى
مذكرات محمد عبده
مذكرات احمد شفيق باشا
مذكرات اللورد كرومر
وكلهم هيحكوا عن واقعة حصلت ..
كل بطريقته ونظرته








لكن الاول فلاش باااااك
ف ليلة سودة 
غالباااااا الشمع خلص ف سرايا خوشيار هانم
   
وخوشيار اللى هتلقب (لاحقاً) بالوالدة باشا أم اسماعيل
 اللى هيلقب بالخديوى(لاحقاً)
مش هتعرف ان ابنها اللى كان عيان بالرمد ف صغره
هيعمل مصيبة  
    مصيبة ايه يا شوشو 
كفى الله الشر تفى من بوقك
ياريت والله
بس اصلكم متعرفوش الأمير ف الليلة الزرقا دى
الظاهر م الزهق
 .. فقرر يعك مع احدى الجوارى وكان اسمها شفق نور
 والدنيا ضلمة كُحل بقى
وحصل اللى حصل


 



و الست هانم حِملت وبعد 9 شهور
جاء الى هذه الحياة كى يفسدها ... توفيق بن اسماعيل




   
 




وانتوا هارشين ... شهروزة مبتحبش توفيق
ومعزته عندى تيجى بعد معزة محمد على .. كدا تمام
يليهم احمد فؤاد





   
ومكدبش عليكو حاولت افهم كيف تأتى
لأبو السباع
وهوه ابيضانى وقمروالمٌزز حواليه بالأكوام 
انه يخلف
م الست اللى هربانة من التجنيد دى
و كيف يتأتى من الخيار آتة فعلا 
.... مقدرتش استوعب الصراحة




    


 صحيح ذوقه اتعدل بعدين
وزوجاته ومحظياته الآخريات 
كانوا حاجة حلوة
لكنننننننننننننننننن


 



 بس كان خلاص الغلط حصل
وتيفة كان الكبير ف وسط الاولاد
يعنى أصبح ..... ولى العهد






   
 


والست شفق اللى كانت مجرد محظية
بعد فرمان الباب العالى بالتوريث
قرر اسماعيل يتجوزها
عشان متبقاش ام الخديوى القادم مجرد مستولدة




 




وبعد الوقعة السوخة دى
مش هوه لوحده اللى لبس 
لبسنا احنا كلنا معاه ...
كل ما نتج عن الجوازة السودة دى
ومصر كلها معانا يا ثااااامح








   
وروح يا زمان وتعالى يا زمان
وتوفيق هيبقى بمعزل هوه وامه عن القصر واهله
لأنه كان مكروه
ومحدش طايقه لا هوه ولا مامى شفق  
والحقيقة الواد طلع أوسخ ما يمكن
وساهم بشكل ما فى زحزحة ابوه من على الكرسى
والقعاد مكانه
ضاربا بكل مشاعر الابوة والبنوة عرض الحائط






       
بس التركة كانت تقيلة والتوب كان واسع
والكرسى كان أكبر من ان واد فسلة زى دا يقعد عليه
 ... ويملاه
عشان شوية بسيطة يقعدهم 

وف وسط ما بيقعد يسترضى الاجانب
اللى قعدوه ف غفلة عين ع الأريكة 
 على حياة عين ابوه
قوم هيطلعله زى الخازوق احمد عرابى
عشان ينغص عليه ايامه واحلامه
ويظهره كحاكم زبالة
ميسواش تلات بصلة 






وعرابى زى ما كلنا عارفين من الشرقية
ابوه كان عمدة ابن عز يعنى
الوالى سعيد اصدر قرار ان ولاد العمد والمشايخ
يدخلوا الجيش
ايه ؟
 أصل سعيد كان عنده نزعة وطنية تجاه المصريين

 وبيعتبر نفسه منهم كان بيقول على روحه كدا 
والنزعة دى عرابى جسدها
لأنه اترقى 4 مرات ف حياة سعيد







بينما اثناء حكم اسماعيل اللى كان اطول ...
مترقاش مرة واحدة
وبالعكس
اترفد م الجيش ورجع بواسطة .. وبالعافية
وحضر حرب الحبشة اللى الجيش المصرى

 انهزم فيها هزيمة ساحقة ماحقة
ورجع قلبه بيغلى من نفوذ الجراكسة
وغباوتهم وانحياز القصر ليهم مهما عملوا
    
وتعاظم نفوذ الاجانب واتخلع سماعين
و بقى توفيق ابنه الخديوى


 
و احنا دلوقتى سن1881
وعثمان رفقى هوه ناظر الجهادية
وعثمان بقى زى منتو شايفين شنبه 
كان رزل وعصبى وزى الديك الشركسى تمااااااام
رخم ع الضباط المصريين ف الجيش
واصدر قوانين تضرهم
  
منها قانون بيلتف بيه عليهم بحيث انهم ميترقوش

والمناصب العليا تبقى للتراكوة وبنى جنسه فقط
وقتها عرابى كان جايب اخره
فأجتمع بزمايله المصريين ف الجيش
وكتبوا عريضة لرئيس النظار رياض باشا

بمطالب محددة ومضوا عليها
وراحوله عابدين يقدموها
فيها ايه العريضة دى آشهرو ؟؟





فيها الآتى      
عزل ناظر الجهادية
تعيين واحد وطنى بداله
البدء بتأليف مجلس للنواب
رفع عدد الجيش لـ 18 ألف
وتعديل القوانين العسكرية للمساواة بين الجميع




 




 وطبعا سى رياض مستوعبش الهبة دى
وحاول يتاجهلها ..  لاقهم مصرين 
طلب مهلة
ثم بعد العرض ع الخديوى
تم اصدار امر بالقبض عليهم
بس بالحيلة طبعا



  




استدرجوهم لثكنات قصر النيل
بحجة عمل ترتيبات لفرح احدى الاميرات
ثم دخولهم السجن
بس عرابى كان عامل حسابه
وجم زمايل له خرجوه هوه وزميليه من الثكنات
 معزز مكرم
بعد ما عًرف بــ حادث قصر النيل
دا عرابى كعبه عِلى ع الخديوى
واتشال عثمان رفقى




 
 


واتعين مكانه .. محمود سامى البارودى
شاعر السيف والقلم
وبعد هذه الواقعة
فضل اللى ف القلب ف القلب
بين الخديوى وعرابى وابتدت المؤامرت
بين الطرفين
واللعب على تقيل و ...








عرابى Vs توفيق
   
أبو عرب تصور انه نجح ف مسعاه
وفرض التغيير المطلوب
لكن الخديوى شالها ف نفسه
وبعد تعيين الباردوى بشوية
وراح عازله ومعين مكانه داود باشا يكن
وابتدى شغل التراكوة القذر يبان ف شكل دسائس
ويبعتوا ناس تحاول تقتل
عبدالعال حلمى
ويقلبوا الضباط على بعضيهم
عرابى اللى بيحكى ف مذكراته




   
 

وبيقول ان بعد كل دا
الخديوى طلبهم قبل سفره للمصيف
#صيفت عليك نفسك يا بعيد
وطلب منهم يروحوا للقناصل يطمنوهم وكدا
   
عرابى كان شامم ريحة مش كويسة ابضنننننن
فقرر يجارى الخديوى
وبعت لآلآيات
البيادة والسوارى والطوبجية 
وفروع الجهادية والبحرية يقولهم هدوا اللعب
   
وسافر المخفى يصيف .. ولما رجع
امر ناظر الجهادية الجديد بتغييرات
مختصرها
الآى اسكندرية ييجى القاهرة 
والآى التالت بيادة يسافر اسكندرية






   
وكدا عرابى واللى معاه جابوا اخرهم
الخديوى مش ناوى يجيبها لبر
واحنا ساكتينله
محايلة واستكفينا
وقرروا الآتى .....
   
احنا لا هنكتب عرايض
ولا هنوديها
ونستنى الرد
ناظر جهادية
احنا الوزارة كلها هنشيلها
ومبنتفاوضشى
ولا ندلعش
والفاتحة مش حافظينها





  
وانه نحن عرابى ورفاقه
قد قررنا التوجه بافراد الجيش المصرى
الى ساحة قصر عابدين لعرض مطالب الامة
يا روح أمك
   
والمرة دى مش توفيق
اللى هيأمر
عرابى لوحده اللى هيلعب بصياعة
ويبعت لقناصل الدول يقولهم ع الوقفة دى
وانهم يطمنوا على ممتلكاتهم وارواحهم
   
والناس كانت بتتريقأ على يناير
وتقولك هوه فيه حد قبل ما يثور بيقول
هعمل كدا ؟!
اهو
عرابى عملها من زمان اهو
وعابدين كانت البداية كما التحرير









   
ونخلى بالنا من اللى جاى يا عيال
عشان يوم 9-9-1881 دا
هيكون مباراة تاريخية هنشوفها بأربع عيون
عرابى القصر الانجليز وشهروزة
:)
عرابى بيحكى ان سبب مظاهرة عابدين
كان مماطلة الخديوى ف تنفيذ طلبات
الضباط المصريين بالجيش
وحركة نقل الآلايات دى روخروا اللى عملت ربكة
 " أضطرب ضباط الآلاى الثالث  
وذهبت بهم الظنون والشكوك كل المذاهب
وقالوا ان الحكومة لم تقصد من هذا الاجراء
  سوى الانتقام منهم "
ثم كان القرار بأنه
 " قمت بمخاطبة جميع الآلايات البيادة 
والسوارى والطوبجية الموجودة فى القاهرة
بواسطة فن الاشارة العسكرية للأستعداد 
للحضور الى ميدان عابدين الساعة العاشرة عربى
 من يوم 9 سبتمبر 1881 لعرض طلباتنا العادلة
إلى الحضرة الخديوية "





 



طب دا عرابى
احمد شفيق باشا بقى اللى منقوع ف الديوان الخديوى
وبيدين بكل الولاء لتوفيق
قال ايه بسلامته ؟
 
طبعا بادىء ذى بدء
كلامه كله ان توفيق نسمة ومسالم وعسولة
وان عرابى والعرابيين اشرار وملاوعين
وطول الوقت كان بيلمع ف صورة ولى نعمته
   
وابتدى الكلام عن مظاهرة عابدين
بأن العرابيين شوكتهم قويت وقعدوا يوزعوا
منشورات ف كل البلادضد الخديوى
ولموا توكيلات لعرابى عددها 1600 تقريبا
لأ وخد الحتة دى
"زعماء الحركة قرروا القيام بمظاهرة بعابدين
وافهموا صغارالجند والضباط ان المقصود بها 
استعراض عام للجيش امام الخديوى"
آحبيبى 
       
يعنى هما جرجروا الهلمة دى كلها
من ثكناتها بالخداع ومكنوش عارفين
 وانهم مقصدوش يخرجوا على الخديوى الكيوت الطيب 
#يوغتى مصدقينك خااااالص





       
وبعدين شفيق بيقول ان عرابى

بعت لقناصل الدول ومنهم قنصل انجلترا 
عشان يطمنه هوه تحديدا ومش لله الرواية دى

 قنصل انجلترا تحديدا أقصد وقاله 
"إنه بالنظر لحدوث دسائس عدة موعز بها 
من الخديو وحاشيته ضد الزعماء
فخوفا على حياتهم يطلبون من جناب
الخديو طلبات تحميهم من هذه الدسائس "
 
وانه بعت - عرابى- لنظارة الجهادية

 يعلمهم بالمظاهرة ومعادها وانه "
ويعلمها ايضا انه اذا اريد منع اجتماع العساكر
 فانها لا تطيع الامر " .. 






 



وانه الخديوى حاول وفشل يوأد المظاهرة
"ولكن سموه استمال على بك فهمى
حكمدار الاى الحرس حتى وزع جنوده 
على ابواب السراى " استعدادا للدفاع عمن فيها
وطبعا ابو الشفاشيق مقلش كل التفاصيل
يعنى مقلش الخديوى استعان بمين
عشان يحاول يلم الليلة السودة دى على دماغه
ميجرؤش يقول طبعا
لكن احنا عرفنا
من مذكرات اللورد كرومر المعتمد البريطانى
 فى مصر من 1883 وحتى 1907
واللى محضرش الحكاية
لكن المراقب المالى الأنجليزى فى مصر ساعتها 
حضر وقاله كل حاجة يا ثااااامح 




السير كولفن اوكلاند .. المراقب المالى
اللى هيحكيلنا المستخبى كله
 
وكولفن بيقول ان القنصليات الأجنبية وصلها منشور 

من عرابى يطمنهم 
التظاهر قصاد قصر عابدين شأن داخلى
والاجانب ملهمش دعوة بيه ويطمنوا خالص 





 

 

وبيحكى كمان ازاى ان واحد شكله مش مريح
راح عند بيت عرابى وطلب مقابلته
فلما رفضوا يدخلوه
مشى 
وبمراقبته لقوه دخل القسم
      

       
 

 

عرابى بعت لزميليه يحذرهم
 لقاهم هما كمان جالهم زائر مشابه
وفهموا ان الخديوى مستعد يعمل اى حاجة
عشان اليوم دا ميحصلش





           
 

الكلام دا كان قبل المظاهرة بيوم
 ويوم 9-9-1881 كولفن بيحكى
ان توفيق كان بايت ف سرايا الاسماعيلية
ميدان الاسماعيلية سابقا - التحرير حاليا 
 وان تيفة بعتله (يستشيره) يعمل ايه
 ف الليلة السودة دى ؟
 والمراقب المالى 
 اشار عليه بأن يلم افراد الشرطة المسلحين
 ويقف على راسهم
 ثم اول ما يظهر عرابى ورفاقه
 يلقى القبض عليهم علطول 
و طول عمرها #الداخليييييية_بلطجيييييية
 من يومهم والله
بيستعينوا بيهم ف الوساخة
 ومتعوووودة دااااايمن






طبعا كولفن دا ابن محتلة اساسا
وتجربتهم ف الهند ان الشعوب تقهر بالقوة
 الغاشمة طبيعى ينصح النصيحة دى
 اللطيف بقى  ان الخديوى خاف
وقاله مينفعشى ...   ليه يا حبيبى  ..؟
 قالك أصل المدفعية والسوارى مع عرابى
وممكن يضربوا علينا نار ف أى لحظة !
#يابن الجبانة 
لأمواخذة يا ست شفق
         




  
 


كولفن سخنه وحذره قائلا انه
 " اذ كانت لديه شجاعة على البروز بنفسه
وابتدر خصمه بالعمل
 فأغلب الظن انه سينجح فى قهر
 العصاة ولا فهو ضائع بلا محالة .. "
 كوكسن القنصل الانجليزى أيد الفكرة
 وستون باشا الامريكانى
  الله ...  دا لامم الأمم
وبيشهدهم على عرابى بقى !!!

           
           



 

المهم بعد كل الرغى دا
خرج الخديوى ومعاه الصحبة الحيلوة دى
وركبوا العربيات وتوجه الى قشلاق عابدين الاول
 
ومساء الخير يا حاج ابو حنان
اوعوا يا ولاد تخرجوا عليا وتقفوا مع عرابى الويحش
 اللى ف القشلاق هتفوا بحياته
 فخرج مطمن 




 


وراح ع القلعة وكولفن بيقول
"ثم استأنفنا السير الى القلعة
حيث رحب بنا الآلاى الموجود بها ترحاب عابدين "




           
 


وبعدين قرر الخديوى يروح قشلاق العباسية
 اللى تبع عرابى
كولفن اتغاظ منه جدااااا
" وبما ان الساعة كانت قد قاربت 3 ونصف
 بعد الظهر فقد الححت على الخديو
 بالعودة الى القصر مصطحبا الاى القلعة
 ويرأس هذه القوة
بعد ضم الاى الحرس والبوليس الحربى
 ولكنه سار قدمت الى العباسية حتى بلغناها
 فى الرابعة مساء"
 بيسوح ف الوقت ابن الخايفة
عرابى قالك عشرة تروحله المغرب ! !
 الظاهر  كان مستنيهم
 يزهقوا لوحدهم ويروحوا ولا ايه ... ؟





كولفن بيقول عرفنا ف العباسية
 ان عرابى خرج بالآى بتاعه
وانهم دلوقتى عند القصر
 فخرجنا على عابدين ودخلنا من باب باريز
احنا لحد دلوقتى مجيناش جنب القصر
وشوفنا بيحصل ايه عنده !
عرابى دلوقتى اللى بيحكى




"كان اول من حضر الى ميدان عابدين
الاى السوارى بقيادة احمد بك عبدالغفار
 ثم حضرت بالاى العباسية
ومعى الآى الطوبجية يقوده اسماعيل بك صبرى
  وكانت بطاريات المدافع تتخلل اورطة البيادة اثناء المسير 
وكان ذلك يوم الجمعة الواقع فى 15 شوال 1298
 9 سبتمبر 1881 "
#جمع ومليونيات زمان اهى


 
 

 
وبيكمل :
 "وهناك اخبرنى بعض الضباط
 ان آلاى الحرس الخديوى (حكمدارية على بك فهمى)
وزع داخل السراى
وهو على استعداد للدفاع عنها ذا مست الحاجة
 
ومعه كمية وافرة من الجباخانة

 فلما كمل اجتماع الجيش ف عابدين
كان الميدان غاصا بجماهير المتفرجين من الوطنيين 
والاجانب ونوافذ البيوت المجاورة للسراى 
واسطحتها ملىء بالمتفرجين والمتفرجات"
 وخلاص التجريسة على وسعهاااا يا توفيق
 وملكشى مهرب




 
 


احمد شفيق بقى بيقول الآتى :
 "فنزلنا فى الميعاد الى جناح التشريفات المطل
على الميدان 
ورأينا الجيش قادما من جهة شارع عابدين  
وقد اصطفت الجنود البيادة والسوارى والطوبجية 
فى اماكن بالميدان كانت كأنها مخصصة 
لكل سلاح من الأسلحة"
ماشى يا حيلتها
كولفن بقى بيقول ايه ؟؟؟







                  بيقول انه نصح الخديوى بالخروج وانه
"اذ وفد عليك عرابى فأطلب منه سيفه
ومر من معه بالتفرق والانصراف
ثم در حول الساحة وكلف كل الاى على حدة
بالانصراف" 
 استرجل يعنى وخلى عند أمك شخصية .. !
 قصره
اخيرااااا توفيق نزل للساحة 
وهيتمخطر اهو بالراحة





     

ونخلى بالنا بقى لأن الجاى 
هوه الماستر سين بتاع الحدث  ... واللى فيه
 اوغاد بيقولوا انه محصلشى بالشكل دا
ومحصلش خالص !
#اه والله
 
عرابى اللى بيحكى دلوقتى
 انه لما الخديوى نزل للساحة
 "فتوجهت اليه لأعرض مطالب الامة
وكنت راكبا جوادى وسيفى فى يدى
ومن خلفى نحو ثلاثون ضابطا

 فلما دنوت منه صاح بى ان ترجل واغمد سيفك
 ففعلت
 ثم صاح بمن خلفى ان اغمدوا سيوفكم
وعودوا الى بكلكاتكم
 وظلوا وقوفا خلفى
ودم الوطنية يغلى فى مراجل قلوبهم
 والغضب ملء جوارحهم "
 بس وعاوز ايه يا عم عرابى
 وايه اللى
 جابك قاله جاى بمطالب الامة سعادتك





 

" فسأل وما هى هذه الطلبات فقلت :
 اسقاط الوزارة المستبدة
 وتأليف مجلس
 نواب على النسق الأوروبى
وابلاغ الجيش الى العدد المعين فى الفرمانات
الفرمانات السلطانية
والتصديق على القوانين العسكرية التى أمرتم
 بوضعها
 



 


فقال : كل هذه الطلبات لا حق لكم فيها
 
وانا ورثت ملك هذه البلاد عن ابائى واجدادى
وما انتم الا عبيد احساناتنا "
دا كلام الخديوى حسبما أفاد
عرابى مراسلنا ف الميدان
واللى رد عليه بعدها بالجملة الشهيرة ...
" فقلت لقد خلقنا الله احرارا ولم يخلقنا تراثا او عقارا 
 فوالله الذى لا اله الا هو اننا سوف لا نورث
 ولا نستعبد بعد اليوم "







 
فيه ناس بتقول ان الجملة دى
متقالتش وعرابى ألفها وحطها ف مذكراته فقط لحفظ
 ماء وجهه اللى اتبعتر لترات لترات بعدين
 لكن قبل الكلام شوف المتكلم

  

 

عشان مش على آخر الزمن هناخد التاريخ 
من شاهد الزور المخنث واكل ناسه
 البجم ابو حمالات دا كمان .. دا اللى ناقص
وكمان بيستشهد بمذكرات الامام محمد عبده
 اللى مكنش حاضر اليوم 
وسماه "حادثة قصر عابدين" 
ومكنش كمان بالع
 عرابى قوى واضطر بعدين يسانده مضطرا




وياريت جت على كدا 
داابو حمالات بيقولك محصلتش الواقعة اساسا
 #مامى حلوة 
 طب احمد شفيق بيقول 
ان حكاية ركوب عرابى للحصان حصلت يا بيه
ولبيوم نفسه بما فيه ... 
 اقرى بس واتعب
روحك شوية قبل ما تطرش ع الناس
أى كلام
 وانتا اجهل جهول





    
 

أهو
 " فنصح المراقب الانجليزى سموه الثبات
 وان لا ينسى انه مليك البلاد 
 وتقدم عرابى راكبا جواده شاهرا سيفه 
وخلفه بعض الضباط "
شوف الجاية دى 
  ""فنزل اليه الخديو من قصره غير مكترث 
لما قد يتعرض له من الاخطار"
 لا والنبى !!
 ابن الخوافة دا كان غير مكترث ... ريلى !!!









 
نكمل
 "وكان معه السير اوكلاند كلفن المراقب
والمستر كوكسن قنصل انجلترا فى الاسكندرية
النائب عن معتمد انجلترا
ولم يتبعه سوى اثنين من حرسه الخصوصى
 احدهما حسن صادق
وكان ضخم الجثة فلما رأى عرابة شاهرا
 سيفه صاح به اغمد سيفك وانزل عن جوادك
فامتثل ثم خاطبه الخديوى " 
 وكمل شفيق انه عرابى عرض عليه المطالب 
 الخديوى قاله قدموها للحكومة 
وبعدين
 كوكسن قال للخديوى بالانجليزى
ارجع قصرك لخطورة الموقف !
 اللى هوه ايه ؟
مقالشى غير
 "وبقى هوه يناقش عرابى وينصح بالأنسحاب
 حتى يتيسر النظر فى
 مطالبه بما يجب من روية وتفكير
فلم يسمع عرابى له قولا ولم يقبل له نصحا "




           
 


ومقالش كمان ان عرابى اكيد
 قال للخديوى كلام جامد والا مكنش المحاوطين له
 نصحوه بالرجوع للقصر !
 شفيق كان بيحافظ على الشكل العام لسموه طبعااا
كولفن بقى بيحكى المشهد من زاويته
 وازاى زق الخديوى عشان يكون راجل
ومنفعشى


 


وبيقول لما عرابى قرب عليه حصل الآتـى
 " فأمره الخديوى بالترجل
 حيث ترجل وتقدم لتادية التحية العسكرية من خلفه
 عدد من الضباط وحارس شرع حربة على بندقيته
وفى تلك الاونة همست فى ذن الخديو 

هذه لحظتك
 فاجاب نحن بين اربعة نيران
فقلت له تشجع
 ولكنه مال على ضابط وطنى على يساره ليأخذ رأيه
 ثم اذ به يكرر عبارته السابقة قائلا
 ماذا يمكننى عمله نحن بين اربع نيران
 واشك اننا مقتولون.
ثم التفت الخديو الى عرابى
 وطلب اليه اغماد سيفه
 
وسأله الخديو عن معنى حركته .. "
 وكمل كولفن بالحوار والمطالب لكن مقالش
 جملة عرابى الاخيرة
بتاعت لقد خلقنا الله احرارا دى
بس الظاهر والاكيد لأى حد بيفهم 
ان عرابى هزأه جامد 
لما تيفة قاله امشى 
واللى حوالين الخديوى نصحوه يرجع قصره
ويتوقف النقاش حتى لا يحدث ما لا يحمد عقباه 
يبقى ايه ان شاء الله 
كان بيكلمه بهدوء وعادى ومردش رد عنيف 
وعاوزينا نصدق كدا ...
 لأ ....

 

 

كولفن بيكمل .... 
"فأجاب عرابى بأن الجيش جاء الى
 الساحة باسم الشعب الذى يمثله
ويصر على تحقيق مطالب لن ينصرف قبل تنفيذها
 
وعندها تحول الىّ الامير قائلا
هل سمعت ما يقول فنصحته بالعدول عن مناقشة
 مثل هذه المسائل مع قائمقامات فى جيشه
واقترحت عليه ان يرجع الى القصر
  ويتركنى لمعالجة الموقف فرضخ لرأيى "
 رضخ بس ... ؟ 
 دا ما صدق 
اشباه رجال
واشباه حكام والله ...






 القصد الأجانب اتفاهموا مع عرابى
 وحاولوا يقنعوه بتنفيذ المطالب بالتدريج
    لكن الجدع من موقف القوة
والتجربة كمان هرش انهم بيستهبلوا
 ونيتهم زفت زى وشهم
فأصر ان المطالب كلها تتنفذ وسريعا
وف نهاية اليوم رضخ القصر وكلابه





شفيق بيحكى ان كولفن بعد مباحثات ونقاشات 

"فعاد هو وزميله المستر كوكسن إلى الخديو
يشيران عليه بإجابة هذه المطالب
 لأنه لا حول له ولا قوة "اما 
عرابى بقى ... بيقول  :
 "بعدها صدر الأمر الخديو باجابة مطالبنا
 توجهت اليه
وشكرت له ارضاءه ضمير الأمة
فاقسم انه مرتاح لما فعله ..
وانه وافق على هذه الطلبات بنية صافية
 فكررت له الشكر والدعاء"
#ياحالولى





 

طب السؤال .... اليوم نجح ؟
 الحقيقة جداااااااااا



 

 
وزارة رياض باشا انحلت
 ومسك مكانها شريف باشا 
المرضى عنه من العرابيين ف نفس الشهر 
سبتمبر يعنى
 وزارة شريف باشا
قدمت القوانين الاصلاحات العسكرية
وبعدها بشهر .. اكتوبر يعنى
صدر الامر ببدء انتخاب النواب
 
فى 26 ديسمبر بعدها بشهرين
 كان افتتاح مجلس النواب اللى حضره الخديو
 ورأسه محمد باشا سلطان "ابو هدى شعرواى"
وكدا المطالب اتحققت
 لكننننننننن

             

كلنا عارفين ان الرضوخ دا كان مؤقت
 وان عرابى دخل ف صراعات ياما
حتى تكالبت عليه الخصوم
 وبقى قصاد الصدام الحتمى وش 
و قامت الثورة العرابية 
وقامت عليها ثورة مضادة
 انتهت بالاحتلال الانجليزى




 


عرابى اتحاكم واخد اعدام
 ثم خفف الحكم للسجن
والقصر لو يطول كانوا حطوه ع الخازوق
 لولا الانجليز لعبوها صح
 
موته كان هيخليه اسطورة
 اكتفوا بنفيه
 واطلقوا الاوباش تشوه ف صورته وافعاله







لحد ما رجع م المنفى محدش فاكره
 
والراجل النفى حطمه تماما
وخلاه يستعطف الانجليز والخديوى
 انه يرجع وطنه





 
ولما مسك عباس حلمى التانى .. سمح برجوعه
1901
وقوبل مجييه بالهجوم والأستهجان 
من الشخصيات العامة
واحمد شوقى مثلا ... قال
صغار في الذهاب والإياب ... أهذا كل شأنك ياعرابي




    

وعاش ف الضل .. محدش مقدر قيمته وفعله
وفاكرينله بس الغلطات ...
 لحد ما مات 1911
 ملحقش ثورة 1919 اللى سعد زغلول كان مفجرها 



                 
 
سعد زغلول اللى كان من الشباب 
اللى ناصر الثورة العرابية لما قامت
 واتقبض عليه بعدها
 :)
     
 


 

 
وحد يقولى يا شهرو .. بتحكيلنا ليه الكلام دا 
ما الهزيمة لحقت بالراجل
 ومات بحسرتها .. اخد ايه من دا كله ؟!!
 اقولكم ابضننننن
 ابسلوتلى





 
سماعين اللى كان هيبييييييض 
عشان يورث الحكم لأولاده فقط
هوه كان اول الضحايا  لهذه الرغبة
توفيق هيردهاله بإنه يخش ف صفقة مبطنة 
مع الباب العالى انه يوافق على خلع ابوه
ويقعد مطرحه ويسكت ويبوس القدم
واسماعيل ف المنفى هيتعذب ويشوف الويل 
وهيبعت لتوفيق طول فترة حكمه
 يطلب منه انه يرجع عشان يموت ف مصر 
وتوفيق الكلب ميرضاش 
خوفا على كرسيه والعلاقات مع الدولة العثمانية
وسبحان الله 
يموت هوه الاول 
ويندفن قبل ابوه ... بسنة
ويرجع اسماعيل يندفن ف مصر .. كما تمنى




 
توفيق بقى اللى حشد كل امكاناته وعلاقاته 

وجاب المحتلين للبلاد عشان يحافظوله على كرسيه 
 متهناش بحكمها
وكانت نقطة سودة ف تاريخه وتاريخ مصر
ومحدش بيفتكره بالخير
وسبحان اللى خاف على عرشه من جيش
 فجاله الانجليز بجيشهم
 وقعدوا على قلبه وقلب ابنه
 وقلب باقى العيلة المالكة لحد ما جيش تانى
 انقلب عليهم برضو
 :)


 
 

 

عرابى بقى اللى البرادعى بيفكرنى بيه شوية
 كان راجل اصلاحى غلطته انه
 طلب حقوق فردية
فأتحولت لجماعية بتأييد شعبى وثورة
 مكنش مستعدلها كفاية
 
فجأة الطلبات اتطورت
وفجأة الحماس زاد
وفجأة العداء مع السلطة زاد
وفجأة اتلم حواليه اوغاد ومنتفعين وخونة
رغم انفه
 بقى زعيم
 وفجأة تكالبت عليه اعتى الدول
كتر خيره والله على كل اللى شافه






   واهو الزمن عدى
 وعرابى اللى طلع الخديوى منشور بعصيانه ..
 ثم هزيمته
 ومحاكمته ونفيه الخ
  بقى ايقونة من ايقونات الوطنية ... والكرامة 





 

  
وتوفيق لما حتى جم يرسموه على لوحة
 لمظاهرة عابدين الكبرى 
كما يحلو لأن يسميها البعض 
 
رسموا واحد شبه ابوه اسماعيل
لكن هوه ملامحه خفتت عند الناس

ومحدش بيميزه قوى 
 أصلها قِرف واعتاب ... آه والله
               


انا خلاص خلصت .. فاضل الملاحظات








(1)
 9-9-1881
هذا اليوم الجليل بعدها بسنة
اُعلن عصيان عرابى ف نفس اليوم
 9-9-1882 
 عشان يحطموا الصورة الحلوة
 قوم ايه بقى .... ؟!
 تمر الأيام  ويوم تسعة تسعة
يصبح عيدا قوميا لمحافظة الشرقية
اللى بينتمى اليها احمد عرابى 
شوف الجمال







(2)
المنفى المسكين 
واللى عانى ف البعاد ثم الرجوع 
 فى كل حتة ف مصر 
هيتعمله شوارع
 بأسمه
 وتماثيل فى الشرقية 







 
وفى المنفى



 


 وتتعلق صوره ف المتاحف





(3)
على ذكر التماثيل
احمد فؤاد كانله تمثال اتنصب
 فى ساحة عابدين واتغطىمؤقتا 
لحين نصب تمثال الخديوى اسماعيل ف صينية 
ميدان الأسماعيلية - التحرير حاليا 
لكن يشاء ربنا انه يتشال لأن ثورة يوليو
 قامت بعدها بشهور
  

 

 
وتقرر ان تمثال عرابى يتحط مكانه
 لكن فجأة قرروا يودوه الشرقية 
ومعرفش ليه
    مش قصر عابدين كان أولى...؟!!!





خصوصا وهوه متبهدل هناك
والمحافظات عموما بتعانى مش تماثيلها بس


 
ومتحف وميدان ومحطة مترو كمان




(4)
وعلى ذكر محطة المترو
مكنتش محطة (محمد نجيب) اللى مجاورة لعابدين
 دى الأفضلية ف التسمية ؟









 (5)

اموت واعرف ليه تمثال ابراهيم باشا
 ومحمد على يتعاملوا المعاملة الكويسة دى
وميتشالوش من الميادين دونا عن غيرهم 
كتابعين للأسرة العلوية 
وكقادة جيش بينما .... عرابى لأ ... ليه ؟





(6)
فيه ناس وصخة بتعمل تقارب بين عرابى
وبين السيسى اذ ان الأتنين عملوا
 ثورة وباركها الشعب وكدا ..؟!
 دول بياكلوا بيبىّ ملناش دعوة بيهم



   
انتوا لو بتدوروا على حد ف قزحته
وكرامته وتهوروه الجميل 






يبقى الراجل الجميل دا أولى 
...  سعد الشاذلى الله يرحمه








  (7)
فى توقيت ما ..  عرابى اتعرض عليه العرش
ورفضه 
امراء واميرات من الأسرة المالكة كانوا بيساندوه
منهم مثلا ام الخديوى اسماعيل
توفيق كان مكروه حرفيااا
   
بس رغم كل هذا .... عرابى
مكنش بيسعى للحكم ولا نيلة 
كان عنده مطالب محددة
 لرفع مكانة الضباط المصريين ف جيشهم لا اكثر ... 
لا قال سلطة ولا خيار ولا بتنجان
الراجل كان زى تونس كدا لما
 الجيش لقى سلطة موطاش ياخدها 
 ولاّ  زى ... سوار الدهب بتاع السودان 
اللى انقلب ع النميرى 
وبعدين قال مليش ف الحكم والسياسة 
..... يختشى فين الناس الكومل دول دلوقتى !
  # هاحيييييح







(8)
ابو عرب عمل رِجل لقصر عابدين والله 





الساحة بتاعته شهدت احداث كبيرة بعدين




 
 ... ما بين احتفالات






واستقبالات 



 

ومحاصرات


 



واحداث خاصة بثورة يوليو 



 

 
وافلام هندى كتير كدا
 



 
 لدرجة ان عبدالناصر كان معتبره - القصر - شؤم 
على كل من سكنوه 
لغاية محمد نجيب اخر المطردوين منه 
وقرر عبناصر يمشى منه ... خوفا من الفال الويحش 
:))







 (9)
 عابدين .. الحى نفسه 
كانله شنة ورنة 
 وكان سكن الوجهاء والكبارات 
بسبب مجاورتهم للخديوى
وربنا ابتلانا بالمواطنين الشورفاء من عابدين
ومش دول لوحدهم ....
ما كل حى له شورفاااائه المأجورين 
بس اكمن عابدين كانت اقرب مكان للتحرير ومحمد محمود 
السبق كان ليها 
:)






وأحب اقولكم ان عرابى كان من سكان عابدين
يعنى ابن حتتشى ومنطقتشى 
يعنى ساكن جنب شهروزة 
يعنى نحن والقمر كنا جيران 
فلذا ... محدش يغلط ف عابدين تانى 
أنا بحذركم اهو  







(10)
ياخويا البهوات اللى نزلوا تقطيع ف عرابى
 حيا وميتا ...واتهم
 صباح الفل ياحبايبى 
يعنى عرابى الخاين الكُخ
واللى جاب الانجليز بحماقاته 
بينما توفيق اللى كان بيناقشهم ف أدق امور الحكم 
واللى استعان بأسطولهم عشان يهزم عرابى 
هوه  الدح والحلو واللى زالفل .. ؟!!!
ريلى .. ؟
مصدقين روحكو وبالعينها ...  ؟!!
  
 


 

(11)
عرابى واللى جراله مجرد صفحة ف كتاب النضال
هوه ابتدى وأثر ف غيره 
اللى كمل بعده ... سعد زغلول
 ثم انكرت البكرة ... بلا نهاية
لهذا بعتبر يناير بداية 
اخفاقها الحالى .. مؤقت
مجرد عثرة .. مطب .. حفرة هنطلع منها
ولكنها لم تفشل زى ما شايف البعض
وإلا كانت هوجة عرابى فضلت هوجة
وكان عرابى نفسه فضل عاصى
ومكناش بعد كل هذا التشنيع والتشويه لشخصه
والعمر الفاصل بينا وبين زمنه
اللى عدى قرن من الزمان 
و نبصله بكل هذه الأجلال والتكريم ... ولا إيه ؟
فعلا .. 
الزبد بيذهب جفاء .. والحق بيبقى





واخيرااااا 
انا زعلانة قوى من الحاج ابو توفيق 
دى عملة يعملها فينا 
هوه صحيح دفع تمنها غاليا 
لكن برضو .... انا شايلة منه ف قلبى راقات راقات
ثم دى تبقى شفق نور ازاى ؟
دا مش بس وجودها ف حياة الخديوى اللى غلط 
دا اسمها كمان غلط × غلط





وعرابى لما قام بثورة 
كان عنده حق 
دا كفاية توفيق ابن شفق وأمه
كسبب لقيام أى ثورة يعنى ....
 احنا معاك آعرااااابى ودايسين يا معلم ف الليلة دى

 





وتوتة توتة ...

تصبحوا على ألف خير



-----------------------





دي كانت عقده توفيق اللي اتحكمت به طيله حياته 

انه امه كانت محظية نظر له الاخرين نظره دونيه
ده سبب له شعور بالنقص
توفيق بشكل ما كان ضحيه النظره الدونيه من جانب اسرته
توفيق لم يدفن مع باقى أسرته انما دفن لوحده بناء على وصيته





 
والله دا مقياس جيد لاى حد يمسك سلطة,كان فى حد طايقه
ولا مكنش فى حد طايقه!
مثلا اللى كان بيضرب منصحابه وهو صغير,مكنش حد طايقه:)




@لام
هو مش جديد معظم المعاتيه اللي حكمو
ا كان عندهم أمراض نفسية وسلوكية في الطفولة




 

احمد شفيق اكيد قال ..





 
عارف الوغد ابو حملات اللي شكك في كده علشان مَش داخل دماغه انه يعمل كده




 
آفة حارتنا النسيان ،،شعب غلبان غلبه مكر أعداءه ،





 
نظام يوليو!..  
محمد علي مؤسس الجيش المصري وإبراهيم باشا صاحب أعظم انتصارات



مفيش فترة من فترات البلد دى,يبينوا فيها كرامة,ويرفضوا الادوار القذرة دى!
العاهرة بيجى عليها يوم ونفسها تتوب!!




 
العاهرة لما توب بتشتغل قوادة 😂






 
حفيد عرابى طلع الاهطل

وخرج بيأيد بيصى ولابس لابس جده وقعد يرقص
عشان كدة ربطوا بينهم


هناك تعليق واحد:

  1. ليه توقفتى عن المواضيع التاريخيه الشهيه ؟ راجعيين بموضوع جديد امتى انشاء الله ؟

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "