الجمعة، 7 أكتوبر، 2016

شــموس أكتـــوبـر

 



حكايات الليلة دى عن اكتوبر 
وعن الناس اللى تستاهل نفتكرها بجد
بما ان ذكرى اكتوبر السنة دى لمت 
واغش مبارك والسادات وافتكروا ان ليهم اهمية وقيمة
فنحب بقى نفكرهم بلى دفعوا التمن حقيقى

واللى لهم قيمة حقا






والحكايات من كتاب
العسكرية المصرية فوق سيناء
حمدى لطفى
دار الهلال
1974
ومحدش يدور عليه عشان مش هتلاقوه 
 لا منشور ولا pdf .. للأسف
حمدى لطفى كان من اقدم المحررين العسكريين 
وعاصر الهزايم والانتصار
كان من اصدقاء والدى
ولحسن حظى لسه الكتاب ف مكتبتى

 

" زوجته وضعت ابنهما بعد استشهاد أبيه بأسابيع 
وأسموه كريماً "
" لقد اصبحت حسودا
 اننى أحسد الآن من نال شرف الشهادة قبلى ! "
" انه لم يكون يقبل بأقل من الشهادة "
" لكما ان تفخروا بابيكما وخالكما وعمكما من قبل 
 قد اختار الله لهم أشرف النهايات "
" لم تكن معجزة من الله
نعم كنا نشعر انه معنا لكن كان يطالبنا بالكفاءة أيضا "

 

صبحى الشيخ
من اسكندرية من ام نوبية أصيلة 
مواليد سنة 1950
قدم ف الكلية الجوية والبحرية 
واتقبل ف اختبارات الاتنين .. فاختار الجوية
اتخرج من الكلية الجوية سنة 69

وبعد شهور أسقط 3 طيارات .. !
كان مشهودله بالكفاءة والروح القتالية العالية
وكان بيستميت ع الشهادة
شارك ف حرب الاستنزاف وف مناورات سنة 1970 
لحد وقف اطلاق النار
كل مرة يرجع لأمه اللى كان ابنها الوحيد زعلان 
عشان بيرجع وزمايل له بيستشهدوا !
تقوله بقى عاوز تسبنى لوحدى وانا مليش غيرك ؟
يرد بأنها فقدت زوجها وهيا ف عز شبابها 
وقعدت تربيه وتتعب عشانه 
وقصة كفاحها دى ربنا هيكمل لها للآخر
بأكرم ما يكون
لحد ما بدأت الحرب واسمه اتردد ف كل القواعد الجوية
 ف الايام الاولى
بسبب الخساير اللى كبدها لطيارات العدو
قبل ما يدخل بطيارته فيهم ويفجرهم




اسماعيل امام
مواليد فاقوس شرقية سنة 1946
من عيلة موسرة وابوه كان عنده مصنع لانتاج البلاط
شارك ف مناورات سنة 70 واسقط طيارتين للعدو
ف 73 أسقط 6 طيارات فانتوم وميراج
استشهد بعد 11 يوم من بدء المعركة
وساب ولاده داليا ومحمد
والنصر

 
 


عمر عبدالعزيز
مقدم طيار ... مواليد 1947
من صغره عنده ولع بالطيارات اللى بتعدى ف السما 
ويحلم يركب واحدة زيها
كان جايب مجموع يدخله طب او هندسة
 لكنه اختار يكون طيار
اتخرج سنة 66 وشارك ف 67
رغم انه داق مر الهزيمة

لكن برضو اسقط طيارتين ف النكسة دى
خلال سنوات حرب الاستنزاف

اشتهر بلقب .. بطل القنص الحر
القنص الحر دا يا عيال 
يعنى الطيارة تدخل سماء العدو
 تضرب اهداف من غير تغطية من جيشها
فكانت تعتبر نوع من العمليات الفدائية كدا 
وعمر كان من ابطالها
اشتهر بقنص طيارات الميراج والفانتوم وسكاى هوك
ف 6 اكتوبر كان طالع بسرب  6 طلعات
تانى يوم طلع بسرب 5 طلعات
كان بيحسد زمايله اللى بيستشهدوا
لحد ما تالت يوم ... حصّلهم ع الجنة



طيار زكريا كمال
 من مواليد 1935
اتخرج من معهد دراسات الحرب الجوية 1970
كان زى ما تقولوا كدا .. طيار برنجى
 درجة اولى ممتاز قيادة ليلا ونهارا 
ومعاه شهادات ف قيادة السوخوى والميج
اول دفعته
وعنده مواهب اخرى
كان الألفة ف الطيران والرياضة زى سباحة الغوص
 والمراكب الشراعية
ويهوى التصوير الملون والصيد ف الصحراء 
وكان غاوى قراية وجمع للكتب القيمة
زى ما تقولوا كدا كان سبع صنايع
 
 


الطيار البرنجى بقى كان ف كتيبة عاطف السادات
 اخو الريس ومن رجالته
ولما قامت الحرب كانلهم مهمة محددة

 

 
كانت المهمة ضرب مطار المليز اللى اسرائيل 
عملته بعد 90 كيلو شرق القناة
فالولاد طلعوا بطياراتهم لمهاجمة الموقع 
وضرب الردار هناك ومراكزالتشويش
زكريا كمال وعاطف السادات وزميل تالت اسمه طاهر

ادوا المهمة كما يجب
وطبعا طلع طيران العدو ف سرب من 12 طيارة
واشتبكوا ف قتال عنيف
ونجحوا يسقطوا 5 طيارات من الـ 12

بس حصلهم اصابات جسيمة
رفضوا يقفزوا بالمظلات ليتاخدوا اسرى
 وفضلوا يغامروا بالرجوع بالطيارات وهيا متصابة
لكن ارادة الله كانت الحاكمة
 
 
وسقطوا بطياراتهم هما التلاتة
زكريا وعاطف وطاهر يوم 6 اكتوبر 
بعد اتمام المهمة اللى طلبت منهم بالمللى
الطيار زكريا كمال 
كان عنده بنت ف ابتدائى اسمها .. ايمان
ومراته اللى كانت حامل .. 
ولدت بعد استشهاد زوجها بأسابيع ولد .. سموه ..  كريم

 
 
 
اللى فاتوا كانوا من سلاح الطيران
اما الجايين فمن سلاح المهندسين

اللى قام بدور عظيم ف هذه المعركة 
من اتمام الكبارى وغيرها




مهندس ابو زيد
من ابو كبير شرقية
كان مقضى ليلة 7 اكتوبر هوه وزمايل له تحت الجسر

 اللى ع الشط بيصلح ف عطل ما
قرب الفجر اتقصف موقعه بقنابل فانتوم
استشهد ف لحظتها





مهندس نبيه جرجس
من مغاغة
كانت مهمته جنب حمل السلاح 
ف منطقة جنوب البحيرات واستطلاع الشاطىء
انه يحدد اماكن الثغرات ف الساتر الترابى
وكمان العمل مع وحدة الالغام والمتفجرات

 وتجريف الساتر الترابى بالطلمبات التوربينية
وتركيب كوبرى بقى بعد كل الهوليلة دى
فحدث الآتى ...
اثناء عمله ف الجزء الشرقى م الكوبرى
 العدو هرش الحكاية واطلق نيرانه بكثافة 
على شرق وغرب الكوبرى
بدل نبيه ما ينط ف الملجا القريب
سحب سلاحه
ورد ع النيران المنهمرة عليه برشاشه

لحد ما أرتقى شهيدااااا





المهندس فتحى الصواف بقى
من قرية برما بطنطا اتعرض لنفس الموقف

بتفاصيل مختلفة شوية ف القنطرة شرق
لما كان بمعداته على الكوبرى اللى بيركبه هناك
وفلتت دبابة اسرائيلية من الالغام 
ووجهت نيرانها على الكوبرى
 وتلقى المهندس الصواف الاصابة مباشرة
واستشهد جنب الكوبرى بالقنطرة شرق
لكن
زمايله رجعوا بعد شوية ونسفوا الدبابة اياها

وكملوا الكوبرى واطلقوا عليه اسم .. كوبرى الصواف
تكريما للشهيد


كان فيه بطولات من نوع اخر اسمه .. رص الألغام
دا بقى يا ولاد كان حاجة برضو مفتخرة

يتميز بها الناس الحلوة اللى هوه ايه ان شاء الله ؟؟؟
 


 
رص الالغام
يعنى واحد عنده قلب ميت وقلب جرىء
يعن مصطفى قمر و شريف منير سوا
يطلع قصاد الدبابة او المدرعة ويرمى لغم او اتنين 
ويجرى
لو لحق يجرى
الحكاية دى كانت محيرة جدا للعدو
ليشع وسمحون وابو جودة ميفهموش طبعا 
يعنى ايه واحد يغامر بروحه بالشكل دا
عندنا بقى كان فيه ناس زى




المهندس التميمي والمهندس البحيرى
اللى رصوا الغام قصاد دبابات ف منطقة 
متكملش 2 كيلو وسط النيران المتساقطة عليهم
 من كل حدب وصوب
ونجحوا ف انهم يمنعوا عن دبابات العدو

 أى امدادات من جيشهم بعد ما زرعوا صف الغام معتبر
واستشهدوا بعد اتمام المهمة



الشهيد الجاى ... من سلاح المشاة



لواء .. شفيق مترى سدراك
مواليد 1931 قرية المطيعى - مركز أسيوط
خدم ف السودان سنتين
واشتغل مدرس ف الكلية الحربية
شارك ف حرب 67 وخرج بكتبيته بأقل الخساير الممكنة

واترقى ترقية استثنائية لمهارته
واشترك ف حرب الاستنزاف
 ف اعوام 68 و69 وما بعدهم
بعد 6 اكتوبر كانت مهمته التقدم بكتبية المشاة

اللى قائدها إلى القطاع الاوسط فى سيناء
ولمسافة كيلو متر ف العمق 
ودى بيقولوا عليها ف مجال الحرب والميدان
 مسافة متميزة
شفيق توغل كما طلب منه
ويوم 9 اكتوبر استشهد وهوه بيحارب فلول العدو



 
الشهيد الجاى .. من سلاح المظلات
السلاح اللى عمله الفريق سعد الشاذلى ... العظيم
دا واحد من ابنائه


 

المقدم صلاح عبدالسلام حواش
كان من ابناء سلاح المظلات النابهين
حارب ف الاستنزاف
ف بورتوفيق وجنوب غرب القنال
ف المعارك الدايرة ف شمال شرق القناة 
بعد بدء المعركة
استبسل حواش ف القتال لحد ما لاقى ربه
بعد ما كبد العدو خساير وصلت لـتدمير 67 دبابة !!
وبتشجيع من سعد الشاذلى القائد والأب
صلاح حواش انتسب لكلية اصول الدين
 وكان ف اخر سنة فيها ....
لما استشهد طلعت النتيجة ونجح
البوسطجى كان جايب خبر النجاح وبيديه لمرات صلاح 
و بيقولها عاوز الحلاوة
بس انكتم من المفاجأة لما عرف ان الناجح 
بقى من شهداء النصر العظيم

 


من الناس اللى محدش يعرفهم رغم ان لهم جهد كبير
قائد سلاح  المدفعية المصرية ف حرب اكتوبر
اللواء الماحى
اللى هوه #يخربيت الاسم لوحده يعنى !

اسرائيل استغلت وقف اطلاق النار سنة 70 وما بعدها
 لبناء خط بارليف وتحصينه بشدة
على الجانب المصرى
كان لازم يبقى فيه حل للحكاية العويصة دى
فقرروا يعملوا نقاط مصرية تفوق نقاط العدو 
من حيث القوة والمناعة والتحصين 
والاسلاك والالغام الخ
والتدرب على اقتحامها او ازالتها ازاى وكدا
المسألة كانت مكلفة جدا لكن مكنش فيه حلول تانية
وكان القرار هوه الاستعانة بسلاح المدفعية
وكانت مهمته اطلاق النيران الكثيفة واديله مترحموش!


 
اللواء الماحى بيقول ان المدفعية المصرية 
كثفت نيرانها لمدة 53 دقيقة متواصلة 
قبل الساعة 2 العصر يوم 6اكتوبر
وبعد ما عدوا الـ 53 دقيقة

ضرب ضرب مفيش شتيمة دول
ابتدت القوات تعبر و الطيارات تعملها تغطية 
وتكمل مهامها
قولولى كانوا كام مدفع على خط القناة ؟



 
قالك 4 الآف مدفع كانوا على خط القناة 
بواقع 175 قنبلة بتنضرب على ولاد الكلب .. كل ثانية
استمرت القصف فالدقايق الاولى من التمهيد للنيران
 


الضرب المكثف 
مش بس كان عنصر مفاجأة للخصم
لكن كمان ساهم ف فتح ثغرات ف حقول الالغام والاسلاك
عشان الجنود المصريين يقتحموا حصون العدو

 

سلاح تانى كان دوره مهم جدا 
بالتعاون مع سلاح المهندسين ... الأخوة ف الصاعقة
والتعامل مع نابالم العدو
الاسرائيلين كانوا عاملين خزانات نابالم 
ومواد متفجرة تحت المية 
عشان لو حد هوب ناحية الضفة الشرقية
يولعوا ف النابالم فالمية تتحول لجحيم مستعر
واى بشر او قوراب ف الحتة دى طبعا ف الباى باى
تم استطلاع الحكاية
واكتشفوا ان الخزانات دى مدفونة تحت سطح الأرض
 وصعب نيران المدفعية تطولها !
لكن لقوا انها متوصلة بمواسير 
بترفع النابالم دا للسطح وقت الضرب
فكان القرار كالـى
سباب حلو من الصاعقة معاهم بعض المهندسين
 واغطسلى يا بنى
ويوم 5 اكتوبر هيسدوا بعض المواسير دى بالأسمنت
ويقطعوا وصلات البعض الآخر
وف طريقهم للرجوع هيلاقوا مهندس اسرائيلى 
آل رايح يصلح عطل .. فيأسروه
ويوم 6 اكتوبر ييجى الاسرائيلين
 عشان يشغلوا الخزانات دى ... متشتغلش !
غريبة فعلاااا
:)

 


وبس خلصنا اللى كنا عاوزين نقوله
 أصل الناس دى عاملة زى الشمس
دول كلهم شموس ... صحيح بعيدة 
لكن جليلة ... عظيمة
لما تطلع ... بتنور العتمة وتدفى م البرد 
ويكبر الزرع  ويرفرف الطير
وتحيى تانى كل الأمال ف القلوب
كل سنة .... لازم نفتكرهم
هما والناس الطيبة اللى زيهم ومنعرفش أساميهم 



 
ونفتكر معاهم الشهيد عبدالمنعم رياض
اللى استشهد على الجبهة 1969

 


ومعاهم كمان .. الشهيد ابراهيم الرفاعى
اللى استشهد يوم 19 اكتوبر
بعد تاريخ مشرف وناصع ومهيب 


 


ومعاهم الراجل الجميل دا .. الفريق سعد الشاذلى
اللى هندس لنصر اكتوبر
ودفع تمن ثباته على المبدأ والكرامة




وغصب عنى أتحسر على جيشنا زمان
 اللى كان كله ابطال وفيه ناس بالعظمة دى
لدرجة انها تقول ..  بحسد الشهدا وانا عاوز اموت
مش يقول .... انا عاوز الفلوس دى !!



جيشنا لما كان فيه ناس عفيفة
 
 

محدش فيهم جرى على منصب ولا جاه
 و لا حد باع النصر لسلام يمحيه 
ولا حد ربض على قلبنا 30 سنة يفقرنا 
ويوطى مكانتنا بين الأمم 

 

ولا حد باع الارض اللى الدم الغالى سال عشانها


جيشنا اللى كان فيه مقاتلين بينكسفوا يقولوا احنا ابطال
و الشعب هوه البطل اللى جاع ووقف ف طوابير
 عشان احنا نحارب بمعدات حديثة ونتدرب كويس
والحمدلله انهم استشهدوا قبل ما يشوفوا المناظر الوصخة
 بتاعت دلوقتى اللى خلت الجندى المصرى
 يقف يبيع ف مكرونة ومخلل ولبن اطفال 
ويفتح بيوتى سنتر
وتتقل قيمة البدلة اللى كان بيلبسها أعز الرجال !


وبمناسبة البدل بقى 
الواحد الصراحة حازز ف نفسه حاجات كتير
بس اكتر حاجة مزعلانى
كل ما اشوف صورة للفريق سعد الشاذلى
هوه او غيره الحقيقة من هذا الزمن الجميل
قوم ايه ؟
أقول لروحى يختشى الضباط زمان كانوا قمر 
والبدلة محلياهم
فماذا فعلنا نحن عشان ربنا يعاقبنا بعسكر
 ما اللى بيرفعوا البنطلون لحد كتفهم دول ... ؟!!




احنا بنتكدر جامد والنيعمة
واللى عمل فينا أى عملة سوخة
 عشان ينزل علينا هذا العقاب الشنيع 
 يقول يا عيال ... ويخلصنا ... !!! 
#الصول سميح بيكدرنى 


 


ثم انه ازاى الأشكال الضالة دى 
دخلت الكلية دى اشاسا ؟!!
واسطة
لأ ..  إيش واسطة
احنا جيشنا بتوع واسطة وحاجات من دى؟!!
#ميصحش_كده


 
وتصبحوا على ألف خير


------------------------





بيتسابقوا علي الشهادة مش عاملين شركات اراضي 
ويلموا كارتة من علي الطرق وسوبر ماركت و ونوادي .ويتنازلوا عن تيران وصنافير 


 الماحي بتاع شعار المدفعية الحالي "ومارميت اذ رميت ولكن الله رمي" 
عامة كل سلاح له دور مهم لايقل عن التاني وعمل المطلوب منه






هناك تعليق واحد:

  1. معلومات قيمة وجميلة بجد
    أحيك على البوست الرائع
    وأتمنى تكونى بخير
    مودتى وإحترامى

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "