الأربعاء، 1 فبراير، 2017

عمر بن أبى ربيعة : شاعر الـ فورتى فورتى


 
 


مساء الخير
كالحدوتة خارج سياق تاريخ مصر
عن الشعر وشعرائه التقال الحلوين المروقين
وقصص حبهم العجيبة الكئيبة ..
بس المرة دى شاعرنا دمااااغ
ولا بيهمه
Image result for ‫سك على بناتك‬‎ 
 
يبدأ الوصف بــ ..
مسرحية سك على بناتك
يدخل الأستاذ فتح الباب
عشان يدى البت سوسو الحصة
يبدأ بـصوت جهورى ...
... ماذا قال عمر بن ابى ربيعة ف وصف الثريا
 قائلاااا



غَصَبَتني مَجّاجَةُ المِسكِ نَفسي ..  فَسَلوهااااااااا 
 

ولسه هيكمل
راحت سوسو متسلبطة وعاملة بتعيط
وادتنا 3 آهااايهىء
آهايهىء
آهايهىء


 
فتح الباب مكملشى
ومقلناش سألوها عن ايه
ولا هيا ردت قالت ايه
يا دى النيلة
لأ عاوزين نعرف بقى !!




الليلة دى هنحكى عن
 الاخ عمر بن ابى ربيعة
اللى ادوله القاب فخيمة باعتباره احد اشهر
وابرع شعراء الغزل
وهنقول ليه وايه ومين الست ثريا
مصدر القصة الأساسى كتاب العقاد
وبعض المقالات
وما نشر على النت
وطبعا
ديوان الحاج عمر ... بذات سخصيته


 

قالت الكبرى : أتعرفن الفتى ؟
 قالت الوسطى : نعمْ ، هذا عمر
قالت الصغرى ، وقد تيمتها 
 قد عرفناهُ، وهل يخفى القمر!  
.....
الله
مين يا خويا سى عمر
 اللى بيقول على نفسه قمر دا
ولا يخفى .. ؟!



 
شاعرنا العزيز اتولد سنة 23 هـ
وف نفس السنة اللى مات فيها عمر بن الخطاب
فبعض الناس اتشائمت وقالوا :
 أي حق رِفَع ُ وأي باطل و ِضع
والواد ذنبه ايه متفهموش
المهم
انه كان اهله من سادة بني مخزوم
 ومن أكبر بيوتات قريش
 وحاجة مأصلة
وجده كان حاجة كبيرة وله حيثية
لدرجة انهم .. سموه العدل
لأنه كان بيكسى الكعبة سنة
وقريش تكسيها سنة
كان بيعدل قريش يعنى
واخد هذا اللقب
وكان محل ثقة للنبى (صلى الله عليه وسلم) 
وكان من الأثرياء  وهلمة كبيرة
الأبن ورث عنه كل حاجة
وف اغارة على احدى قبائل اليمن
واسمها عطارة مشهورة بالعطر وكدا
راح واخد احدهن
واخدها ف date بقى ولا هيفرجها حاجة
لأ حضرتك
دا هياخدها سبية
ويرجع بيها على بلده
يخلف منها ولد .. يسميه .. عمر


 
وبعدين الأب يهجر الام
فتركز ف تربية الولد
وتدلعه ايما دلع
هوه اللى ع الحجِر بقى
عمر يكبر وهوه اجمل شباب قبيلته
واغناهم
وأشطرهم شعراا



ويوصفوه اللى شافوه بإنه بين شباب بنى مخزوم
 «قد فرعهم طولا ً، وجهرهم جمالا
 وبهرهم شارة وعارضة وبيانً »
وانه جمع
 «غزل يمان ودل حجازي»



وعمر كان مال وجمال وموهبة
الظروف وقتها كانت اختلفت
 عن بداية عهد الاسلام
كان فيه تغيير جذرى
كان فيه انتقال للخلافة الى الأمويين
بحركة صياعة نقلوا مقر الحكم ودهاليزه للشام
وحيدوا الحجاز بما لها من نفوذ وعصبة ..
بمنتهى المعلمة
وعشان ميبقاش فيه صراع ومواجهة بين الفرقتين
اتهيأ للحجاز كل عوامل الراحة والدلع والاستهلاك
يعملوا كل ما بدالهم ا
بس لحد الحكم والتدخل ف السياسة
وستوب تعمل خط كشدا


عمر بن ابى ربيعة بقى
كان ينتمى لمدرسة الغزل الحضرى
اللى هما عاشوا ف الوسط المترف دا
الناعم
المخملى
واللى كانله موهبة كان بيلمع بالتبعية
وله سوق ومعجبين ومجالس شعر
المجتمع دا كان مليان غنا وجوارى ورقص وفلوس بالعبيط
وناس راحة جاية ف حج وتجارة
ونساء قويات ومفتريات
 ف اوساط كلها عز وفخفخة من وسع




عمر كما وصفه طه حسين
  .. زعيم الغزليين
من كتر ما كان شاطر وموهوب

 

العقاد كمان بيذكر فضله ونبوغه وافردله كتاب
وشوف انتا بقى !!
لما اتنين زى دول يتكلموا عنه ويبجلوه



لا خير فى الدنيا وبهجتها
ان لم توافق نفسها نفسى
لا تحرميه من الوصل واتخذى
أجرا فليس بذاك من بأس
ولقد خشيت بأن يكون به
من حبكم طرف من المس


 

وسى عمر كان شاعر غزير ف انتاجه
والجدع يقال عاش قرب الـ 80 عاما
ربنا يديه الصحة
وقول يا حوااااش
الآف الأبيات واكتر من 400 قصيدة


ليت هندا أنجزتنا ما تعد
وشفت أنفسنا ممـا تجـد
واستبدت مرة واحدة
 إنما العاجز من لا يستبد


والراجل ركز ف شعر الغزل
 ونادرا ما كتب ف غيره
حتى سليمان بن عبدالملك الخليفة ساله
 «ما يمنعك من مدحنا؟»
رد
«أنالا أمدح إلا النساء»


 


والواد حليوة وغنى وقويل
ومتربى ف وسط النغنغة
والعطور والحريم المتدلعة ايما دلع
رجالة ايه اللى يمدحهم
مش عاوزين وجع دماغ
بسبلاشكلامفارغ


العقاد بيقول :
" منقطعا لأحاديث الظريفات من بنات مكة والمدينة
وكان ينتظر أيام الحج؛ ليَلقى الحسان القادمات
   من العراق والشام واليمن 
أو يتعرض لهن في الطواف
 فيجبنه حينًا ويزجرنه حينًا مخافة التشهير"

شوف يختشى الراجل !
!

قالك كان يسمع عن جمال اى واحدة
فيروح يستناها
ف مرورها من الطريق ف موسم الحج ؟
 احنا ف ايه وانتا ف ايه ؟!



 

الحقيقة ان السلوك دا كان مستهجن قليلاااا
لكن شغال وبيعدى
ما قولنا مجتمع قطيفة احمر
ستاته كانوا بيبعتوا لعمر
عشان يقول فيهم شعر
 ويتباهين فيما بينهن وكدا



كمان من الواضح ان الدنيا زمان مكنتش مقفلة
 كما يشاع
الناس كانت رايقة
ومتوافقة مع الحكايات دى
وعادى ف المعادى



عمر كان شاعر الطبقة المترفة
ومحدش ضبطه مرة بينشد شعر ف بنت فقيرة
او على قد حالها
كان كمان زى ما تقولوا كدا
بيحب يقول شعر ف الحب
اكتر م الحب نفسه


 
وبما انه خبير ف النساء بحكم مخالطتهم والقرب منهم
العقاد بيقول ان ذوقه ف المرأة
كان زالفل واخر ابهة
ازاى ؟
الحكاية اختصرها كعب بن زهير
 ف بيت شعر واحد
 هيفاء مقبلة عجزاء مدبرة
 لا يشتكى قصر  منها ولا طول

يعنى بالبلدى ...
وسطها ولا وسط كمنجة
رشيقة
وطويلة
صدرها وأردافها مليانة
م الآخر ..
ست كـ .. هند رستم ومقاييسها
الصراحة
الراجل قولنا بيفهم


فوق دا كله كان بيحبها كسولة ..
 دلالة ع للترف
ولأنه كان ف وسط نساء جريئات
 كان بيحب الحياء ف المرأة
بس منين ان شاء الله ف الوسط دا
سورى يا اسمك ايه
منعطلكشى


تهيم الى نِعم فلا الشمل جامع
ولا الحبل موصول ولا القلب مقصر
ولا قرب نعِم دنت لك نافع
ولا نأْيُهَا يسلى ولا انت تصبر


والحقيقة ان شروطه ومواصفاته كانت موجودة
 ف النساء اللواتى احبهن ..
يطلعوا كام واحدة يا شوشو ؟؟



لأ مش كتير .. مش كتير قوى
يعنى نبدأ بــ
سلامة
رقية
زينب
هند
الثريا
عبدة
عائشة
...
خلاص ... ؟
لسه
سبيعة العراقية
سليمى
فاطمة
رباب
حُميدة
عفراء
...
خلاوييييص
لسسسسسه
سُكن
اسماء
عبلة
لُبابة
عثيمة
نِعم
خلاص يا شهرو الله يكرمك ..! ؟
 ان الله مع الصابريييييين يا اخواننا
عزة
ونخش على اللى واخدين القاب أو كنية
 ام بكر
ام عمرو
ام عبدالله
أم الليلة السودة دى ...
اعملك قفلة ياجدع !!!


الحقيقة ان عمره الطويل بجانب الظروف المحيطة
 هيئتله كل قصص الحب العجيبة دى
وطبعا كلهن اتقال فيهم شعر
وكتار منهن سعت لذلك
لدرجة انه ..
احدى العراقيات رمت نفسها ف سكته مخصوص
 وتهربت منه لما عاكسها
عشان يروح وراها بلدها
وطلعت متجوزة وعندها عيال
وطبعا صدته
بس بعد ما قال فيها شعر
وحققت المراد 
قوم لما رجع والمغنيات تناقلن شعره
 الحجازيات غاروا
واللى عزمته
واللى دلعته
 واللى غوته
عشان ميصحش وعيب انه
بنات العراق يعلموا علينا !!





الحقيقة من وسط الحريم اللى كان يعرفهم دول
كان اكتر واحدة اتعلق بيها قلبه فعلا 
 الثريا بنت على




والثريا ...
لأ مش دى



والثريا ... يوه برضو مش دى !!!


الثريا اللى اسمها على اسم نجمة ف السما
كانت بنت علي بن عبد الله بن الحارث
بن  ُأمية الأصغر بن عبد شمس
عيلة كبيرة
وكانت غنية قوى آووووى
قد فقرنا احنا تمام
قصة حبهم كانت مبهدلة الدنيا
طول وعرض وبالورب
كانت قوية الشخصية واضح
واتسببتله ف علامة
بقى يتعرف بيها  ف وشه
آه والله





بيقولك راح مرة يزورها
ومعاه صديق
دخلت عليه مش واخدة بالها
 ان معاه ضيف
اول ما شافته رجعت تانى
ندهها وقال ما معناه هتعملى بتنكسفى وكدا
ما كله معروف ومفضوح  !
والستات الغنيات زمان
 كانوا بيلبسوا خواتم ف صوابعهم العشرة يا ثااامح
طبعا لا بتغسل ولا تعجن
براحتها
القصد
اتغاظت من عمر
وراحت مدياله لوكمية
وقعتله سنتين من اللى قدام دول
وبقى منظره نيلة
 


خرشمته
يستاهل
عشان يلم روحه
ويعرف بيكلم مين
والضرب ف الوش مفيهوش معلش
زمن الخرشمة الجميل

 
من رسولى الى الثريا بأنى
ضقت ذرعا بهجرها والكتاب
ثم قالوا تحبها قلت بهرا
عدد النجم والحصى والتراب

....
حاهييييح



غَصَبَتني مَجّاجَةُ المِسكِ نَفسي
فَسَلوها ماذا أَحَلَّ اِغتِصابي

....
يا لهوى
الست كانت مبهدلاه



 
اغتصبت منه نفسه يا عينى




من رسولى الى الثريا فأنى
ضاقنى الهم واعترانى الغموم
يعلم الله اننى مستهام  ب
هواكم وأننى مرحوم
...
 كانت قصتهم مشعللة ايما شعللة
وكل شوية يتخانقوا ويتصالحوا
ويرجعوا يتخانقوا تانى
الناس اتدخلت ما بينهم
عشان يحلوا الخلاف
منهم ابن ابى عتيق
ودا من عيلة ابو بكر الصديق رضى الله عنه
قال ازاى الكلام دا
وحاول يصلح بينهم
عشان كانوا ناس سلسة
عقدهم مش بفيونكات وشراشيب



بس قصة الحب دى تحطمت اخيرا
والثريا نفضتله
واتجوزت واحد اسمه سهيل
عمر يسكت ؟؟؟
لأ طشبعن
هيسيحله .. العريس يعنى
وبالمرة العروسة



أيها المنكح الثريا سهيلا
عمرك كله كيف تلتقيان
هى شامية اذا ما استقلت
وسهيل اذا استقل يمان

..
اللى هوه ايش لم الشامى ع المغربى وكدا !



 
وطبعا قلبه منكسرش
اصله يصنف كزير نساء
وليس عاشق كما قال العقاد
دا شاعر غزل يتنقل من نحلة لنحلة ..
عادى ..
جتته منحسه يعنى
مبيزعلش
اللى تمشى تمشى .. هيلاقى غيرها
وست ستها



ثم انه ثبت علميا انه اتجوز مرتين
وذكر هذا ف الأثر
منهم قصة عرفنا تفاصيلها
من واحدة اسمها كلثم بنت سعد المخزومية
اتجوزته وشنكلته ازاى دى يا ترى ؟



بيقولوا ان عمر وقع ف غرام الأنسة كلثم
قعد يبعتلها ف مراسيل مراسيل نقول لسه
والحلو عيونه مش حاسة
مش حاسة ايه
دى كانت بتضربهم حضرتك
مراسيل الغرام بقوا يخافوا يروحلها لينضربوا
قام منقى عبدة حبشية من عنده
ووعدها بالعتق لو عرفت تدخل لكلثم
وتخليها تقرى شعره
والبنت نجحت فعلا
الدافع كان قوى
وحصل كلام وسلام ولقاء وعتاب وهيصة
وبيقولك العقاد ايه بقى ..
" فاعتذر لها ثم مكث عندها شهرا لا يدري أهلُه أين هو"
 



وجاى يمشى بقى راحت قايلاله
وحياة امك ؟!!

 

 لا طبعا مش هتقوله كدا
دى بنت ناس
والادب حلو
قالتله
 "بعد أن فضحتني!
 لا والله لا تخرج إلا بعد أن تتزوجني"
فأتجوزها الجدع فعلا



وخلفتله ولد
واتجوز تانى بعد موتها من واحدة
وخلفتله ولد تانى
يعنى عاش حياته محرمش نفسه من كافة شىء
آه والله
آه والله
آه والله


أتاني هواها قبل أن أعرف الهوى
 فصادف قلباً فارغاً فتمكّـنا




 

وفضل عمر بن ابى ربيعة على حالته دى
يقول الشعر ف الحلوين
والحلو يقوله يا حلو ف عيونه
ف كل موسم حج او غيره ...
ويندهوه علية القوم يقولوله تعالى جالسنا
يقولهم مش فاضى
..
إِنّي اِمرُؤٌ مولَعٌ بِالحُسنِ أَتبَعُهُ
لاحَظَ لي فيهِ إِلّا لَذَّةُ النَظَرِ



ويقول ف درر 



خانك من تهوى فلا تخنه
وكن وفيا إن سلوت عنه
واسلك سبيل وصله وصنه
ان كان غدارا فلا تكنه
عسى تباريح تجىء منه
فيرجع الوصل ولم تشنه

..
الله




وبيقولوا ان عمر لما كبر اتهد بقى
وتاب عن قول الشعر خالص
وناس مش مصدقة الحكاية دى
اكمن الزمار يموت وصوابعه تلعب
وديل الكلب مينعدلشى
الخ
وبيقولوا مرة شاب قريبه سأله
هل صحيح قصص الغرام الملتهبة دى كلها
قاله فيما معناه 
عمرى ما شفت حاجة حرام من ست عرفتها 

 
...
نعممممم !
انتا تبت اه لكن هتعمل فيها برىء
وتبربش لنا ف عينيك
عبط احنا يا عصام




لكن العقاد مصدق حوار التوبة دا جدا
وبيقول ليه لأ
دا من عيلة كانت تكسو الكعبة عام اه وعام لأ
مش بعيد ابدا النزعة دى
تدفعه عند الكبر للتوبة عن مسلكه اياه



مر بى سرب
رائحات من ظباء
زمرا نحو المصلى
مسرعات فى خلاء
فتعرضت وألقيت
جلابيب الحياء
وقديما كان عهدى
وفتونى بالنساء

....


وبعد ما كان الفتى المدلله
يندهوه بالمغير
وبابن الخطاب ..
دى زى حسن ما هو ابو على
واسماعيل ابو السباع الخ
وبعمر
 الذى لا يخفى كما القمر
بقى شيخ داخل ع التمانين بالمستريح
وبقى البركة بتاعنا
واتفضل يا حاج
وتعالى اقعد يا حاج
اييييييه
زمن




وبقى يعتق جواريه وعبيده
ويكثر من الخير
ورفض يقول شعره
وبقى ولاده اللى يقولوه عنه
وقيل
"  إنه عاش ثمانين ، فتك منها أربعين ونسك أربعين "




وعاش العمر الباقى ف هدوء
لحد ما توفى
قيل ف الـ 80
وناس تقول عمرّ للـ 100
وليه لأ
لا شال هم ولا تعب
وحب النساء الجميلات يطول العمر يا ولدى
المرة الوحيدة يمكن اللى عانى فيها
 كانت فترة خلافة عمر بن عبدالعزيز رضى الله عنه
اللى نفاه لجزيرة عقابا له
على معاكسة النساء ف موسم الحج
واصلا فترة خامس الخلفاء الراشدين كما لُقب ..
 خلصت سريعا
عمر بن ابى ربيعة رجع الحجاز تانى
يهلس ويعيش حياته




ولما مات خرجت عليه نساء كثيراااات
ف الجنازة بتاعته يبكوا
 ويعملوا الواجب والأصول
..
والحقيقة مكانته مكنتش عند هولاء وفقط
الجدع حصل على شهادات من شعراء كبار
ويقال ان قريش كانت شعرائها مش قوى زى غيرهم
 ومحدش يعترفلهم بالتمكن
حتى جاء عمر بن ابى ربيعة
وغير النظرة دى
الفرزدق قال عنه
" أنت والله يا أبا الخطاب أغزل الناس"
جرير قال
"إن هذا الذي كنا ندور عليه فأخطأناه وأصابه هذا القرشي"



هخلص حكاية شاعرنا الجميل
 ببيت من احب الابيات لقلبى
....
 أَلا حَبَّذا حَبَّذا حَبَّذا
 حَبيبٌ تَحَمَّلتُ مِنهُ الأَذى





وفاضل كام ملحوظة صغننة ف السريع 




1) اكتر من 40 سنة وانا فاكرة جملة
 "وهل يخفى القمر"
 دى
 اتقالت لواحدة ست
تطلع متقالة لراجل
ويطلع هوه اللى قايلها عن نفسه كمان ؟!
#ميصحش كدا


2) الناس زمان كانت فاكة كدا
ومعندهاش كلاكيع الزمن الوهابى الأغبر اللى احنا فيه
عشان كدا ازدهر عندهم الأدب والشعر
مش زى دلوقتى
فاشلين ف كله
حتى ف تذوق الشعر والفن
العقاد ف مقدمة الكتاب بيقول
فيما معناه ملكوش دعوة بتاريخ الراجل
 اهو لنفسه
خلينا ف شعره وجمالياته
وما اضافه لديوان العرب
والحلو اللى فضلنا منه
وكان ناقص يقول
يا غجر


3) ثم انه الجدع قسمها بالمظبوط 
عاش تقريبا 80 سنة 
40 طايح ف الدنيا 
و 40 لامم روحه 
يعنى عاشها .... فيفتى فيفتى 
وف هذه الحالة ... فورتى فورتى 
عداه العيب واهو نفعنا برضو 
لما نحب نقول الشعر ف الحلوين والمحبين



4) ابن عباس رضى الله عنه
وهو من هو
 كان بيلاقى عمر داخل المسجد
يندهه عشان يسمع منه بعض شعره
طب بذمتكم هل
هل
هل
هل فيه احلى من كدا ؟!!



5) ستات هذا الزمن كن مفتريات
بيضربوا باللوكمية يوقعوا السنان
وبعدين يتقال فيهن شعر عادى
احنا مبنضربش
ومحدش معبرنا
غلابة والنيعمة
عشان تقدرونا بقى



6) احد المقالات بيقولوا ان عمر بالمقارنة
 بشعراء العصر العباسى
يعتبر اقل مجونا وتحررا
ومكتبش ف الخمريات
يعنى الباقى اوكيه وعاتشى ... ؟
طيب



7) الفنون والآداب احدى علامات التحضر لأى أمة
كل ما يكون هناك موهوبين
كل ما المجتمع يتفتح ويشتغل وينتج
مش زى دلوقتى


واخيرا
عرفنا عمر بن ابى ربيعة
 كان عاوز الناس يسألوا الثريا عن ايه الحمدلله
...
خلصنا خلاص
شكرا للمتابعة والمديح
تصبحوا على ألف خير


----------------------------------
   

  1. Sherif Darwish @SheriffDarwish 
  2.   فتبسمت خجلاً وقالت يـا فتـى
     أفسدت حجك يا مُحـل المُحرمّـا
      هو غالباً كان كان المتحرش الرسمي بتاع الحرم،
     وكانت دي حاجة معروفة لدرجة ان عمر ابن عبدالعزيز 
    نفاه  في جزيرة عند إريتريا 
     
     
     
  3. Dalia Salem @MasryaGedan7 
  4.  قلبه مساكن شعبية

هناك تعليق واحد:

  1. معلومات قيمة وجميلة فاتيما
    ودائما معلوماتك ثرية
    تحياتى

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "