الاثنين، 6 فبراير، 2017

قــطـط العـــام الفــائـت : الثـــورة جـايــــة








قليل من كثير
والجميل  @ibmeguid 
عن الثورة 
عن ناسها واللى ضدهم
عن عام يتكرر 
عن الأمل 
عن بكرة




 

عن رواية ... قطط العام الفائت





منيش ناقدة ولا بفهم ف قواعد النقد الادبى
واكيد مش انا اللى هقول رأى ف رواية 
لأديب جميل زى استاذنا 
لكنى قارئة من نوعية عيسوى العيسوى كدا
 يعنى اقرأ ما يحلو لى
 واقول ما يحلو لى 
زى ما حسيت المكتوب 
وقد ايه دخل قلبى ..وعقلى
والكتابة اولا واخيرا
روح 
اما تكون حية متوهجة واما ميتة
والرواية قبل ما اشتريها وعارفة انها عن الثورة 
فاستعديت نفسيا من اول صفحة
 انى أستقبل نفحات يناير 
رغم مقولة المؤلف دى


 وشوف السطرين ونص دول يا دوب خلصوا 
ودخلنا من اول صفحة 
على الضرب ضرب مفيش شتيمة 
من اول مشهد ف الراوية 
وصورة مبارك ف قلب المشهد 
يتلاعب بالبلاد والعباد 
كيفما يتراءى له خياله المريض
والمقالات اللى قريتها على النت بتقول رأيها 
استخدمت ألفاظ فخيمة زى متيافيريقا وأساطير 
وحاجات من هذا القبيل 
لأن الرواية فعلا مليانة غرائب
 من اول اسم البلد
 لحد الشخصيات 
لحد الأحداث 
لحد الأماكن .. كل حاجة 
فيها مسحة خيال اكتر من الواقع 
لكن الصراحة 
حسيت العكس



 الأيام الاولى من الثورة 
وحتى فبراير والتنحى 
كانت أيام عجيبة على كل من عاشها 
كل ما يتهيألك ان فيه حاجات هتحصل 
تقول لأ 
تحصل 
تستعجب ازاى !
 كمية المتناقضات ف مشهد واحد 
وكمية العبث
 وكمية الارتباك الذى جاء ف صالح الثورة 
تخيلك احيانا تتصور وتسأل روحك 
هل  احنا عشنا هذه الأيام فعلا .. ؟!





ولاوند
كما اختار استاذنا ان يسميها 
على اسم فرقة كانوا يدافعوان عن الثغور
التاريخ بيقول انهم كانوا عثمانلية وما شابه 
وكانوا اشداء 
 واللفظة جت من كلمة ايطالية ( لافندينو) او لافنتينو
 اطلقها الطليان على البحارة العثمانيين من هذه الطايفة
ولغتهم بقت اللاوندية 
فاكرين اللفظة
 لما حد زمان كان يتكلم بطريقة مش مفهومة
 يقولوله انتا بتتكلم لاوندى ؟!!
من هنا جت التسمية
المثير للدهشة كمان بقى معناها اللغوى
 انه لافونتينو ..
 ولافونتين جنب معانى انه ينبوع ماء ونافورة الخ 
معناها الشباب والفتوة 
وكأنها لابسة على هذا البلد اللى هتقوم فيه ثورة !
"تصحيح لغوى آخر البوست"




 مش هحرق القصة 
وهتستمتعوا بقرايتها اكتر ألف مرة 
لاوند اللى هتقوم فيه ثورة 
بكل مفرداتها بقى 



حاكم تمانينى متشبث بالسلطة 
مع زوجة قاسية متسلطة




وهذا الحاكم امير ابو العساكر 
اللى له ابن يطمح للسلطة بتشجيع من الام
 معهم
السر عسكر ناظر الحربية
مدير المحن والازمات .. مز
ومدير الامن والامان  ... مم
وباقى رجالهم القابضين على سلطة 
اوشكت تهرب كالماء من اصابعهم





كان مفروضاااا 
انه يكون على الجانب المواجه بقى 
الثوار على اختلافهم 
ومعاهم الاخوان .. مثلا 
لكن المؤلف حطهم ف مكان كدا ..
 هوه الادق والاصوب





والقصة ببساطة ان الشباب فى لاوند 
ومن فى حكمهم قلبا وروحا 
هيعملوا ثورة 
فبطانة الحاكم تتوصل لحل 
بالقاء غاز يخدرهم يومين 
لحد ما يتم التفاوض مع اخرين
 وطبعا كلنا عارفين مين .. كانوا مين هما الأخرين !






بتاع الداخلية يقول نقتلهم كلهم
بتاع الحربية هيقترح الغاز المنوم
اما الحاكم فيطلع باقتراح يعلى بيه على كل رجالته
 وبسبب قدرة خارقة يملكها
 يقرر أنه يعيد الثوار كلهم عام واحد الى الوراء 
ولأنه وبالتجربة عاد بالبلد الى الوراء ألف مرة 
فعادى 
قادر ويعملها
 واثناء التفاوض مع فريق الشيخ شمعدان
يلقى الحاكم بالثوار ف الصحراء
وكما للشر قوى خارقة
هيظهر فى المقابل قوى للخير
ولنا 
هنا 
وقفة




عشان استاذنا متهيألى ف وسط ما دور 
على حاجة جميلة مبهجة خفيفة 
وآتية كمخلوقة اسطورية 
ورمز للجمال 
فملقاش الطف والا احلى 
من سعاد حسنى
 وسعاد ف القصة مجرد شكل 
لروح لفتاة بريئة جميلة نوارنية تأتى من الشام 
عشان تقبل الثورة قبلة الحياة 
ويقوم الثوار من نومهم على خيالاتها







ومش هحرق باقى التفاصيل الكتييييرة
 اللى مليانة بيها الرواية 
بس اوعدك انه ف كل صفحة 
هتلاقى نفسك بتقول 
ايوه 
صح 
انا فاكر 
دا اللى حصل
يا لهوى 
كدا  
الخ 
 و الصراع هيفضل داير بين معسكرين 
طرف قابض على السلطة بكل طرق خسة ممكنة
وطرف ثاير على الظلم بكل طرق براءة ممكنة





هقول انطباعاتى كقارئة متواضعة 
عجبها حاجات كتير 
منهم 
ذكر سعاد .. آية الجمال وخفة الروح
أى حد تانى غيرها الصراحة 
كان هيفقدنى الحماسة والتصديق والذهول 




حوار القطط دا كمان 
ملهم جدااا 
الثوارفى لحظات ما ...  اتحولوا الى قطط 
وهربوا من المعتقلات
 اشمعنى القطة طاه ... ؟
ليه مش كلاب مثلا وهما الاوفى والأنقى 
لكن فكرت شوية لقيت الكلب وفى بغباوة
 ولو كان مالكه شيطان 
هيسمع كلامه عميانى 
لا مينفعش 
عاوزين مخلوق متمرد
 يكره القيود ويجيلك بمزاجه
 وعنده كبرياء كدا 





وقراية سريعة لمكانة القطة 
عند المصريين القدماء 
هتلاقيها كانت آله
وقت الغضب يتحول الى أسد 
حاجة ابهة يعنى



 مشهد كينج كونج فى الميدان 
وكأنه اشارة للمواجهة بين الثورة ف عنفوان غضبها 
وبين ديناصور قديم زى مبارك ونظامه





الشيخ شمعدان 
واختيار فُللى ولا أبدع للأسم 
كبير جمعية النصيحة والهدى 
والمواقف الانتهازية على طول الخط




اسماء الثوار 
اللى غصب عنك هتفتكر اصحابها ف الحقيقة 
نورهان - ماهيتاب - شهيرة - شيماء 
 مصطفى - نزار - احمد خشبة 
وغيرهم






و حتى  .. اسم فاضل سعيد وذكراه 
يفكرك بتلك الأياااام 



حتى الأماكن 
العاصمة لاوندة - فاروس - أبيدوس 
 الميدان الكبير 
غير الشخصيات 
مسئول الأمن والست هالة أورجازم 
مكالمات الفضائيات 
الهاشتاجات
 حركة " هنكسر قُلة" 
رمى المعارضين ف الصحراء
دفن الجثث فى مقرات امن الدولة 
خطف البنات عشان شبه سعاد حسنى 
ثم رميهم ف الصحراء ... !



 


موقف جماعة شمعدان من الثورة 
وكل من على شاكلتهم 
وازاى وافقوا الحكام ف اخفاء حقيقة 
ان عاما عاد للوراء


 

ثم اضاعوا الوقت ف الخلافات والتناطح 
لحد ما يوصلوا لمآربهم 
بالتخديم على رجالة النظام القديم  
ورمى الثورة للقتلة 
وخروج قلة من شبابهم عن السرب 
بسبب اكتشافهم الخيانة





العساكر الحاكم اللى عاوز 
يرجع كل حاجة لورا
مسؤل الأزمات اللى له دراعين 
بيتحولوا الى تعابين 
الحصان بالجناحات اللى بتركبه سعاد
 والمذهل انه .. الرواية بتحكى واقع 
مستعينة بالخيال 
ثم من الخيال تأتى بشخصيات تانية من الخيال 
اللى هوه خيال الخيال 
وانتا ف وسطه بقى 
تخيل !




 وغصب عنك ف هذا النوع من الادب 
هتلاقى نفسك عندك فضول قااااتل 
يقصد ايه بأيه 
ومين دول ف الواقع 
وتدور على شخصيات بعينها تعرفها 
او بتخمنها 
تلاقيها او متلاقيهاش 




وما بين فكرة النظام انه يرجع الثورة سنة لورا
والثوار اللى عارفين الخدعة
 ومصرين يكملوا لقدام ويعيدوا الثورة 
وفى قمة عبثية اللحظة 
اللى هوه الآتى :
 انتا فاكر ان الرجوع للخلف هيحل المشكلة 
بينما دا مينفعش 
ولا هينفع 
مفيش حاجة بترجع 
زى ما قتلت الورد وزينة شباب البلد ومرجعوش





مش هينفع تخلص على كل الناس 
موتا 
او سجنا 
او احباطا
 والحقيقة انه انتا اللى رجعت لورا 
وبقيت عتيق وخردة ومتنفعش تستنى 
ومفيهاش فصال دى .. 




 فيه ناس هتحس
 ان نهاية الرواية فيه احباط 
او بمعنى ادق النهاية اللى تبدو وكأننا عايشنها دلوقتى 
اللى هوه مفيش فايدة 
وخلصت كدا 
واحنا بنهاتى ف خرااااء
وانسى يا عمرو 
واللهم هجرة




 لكن استاذنا على لسان سعاد الكائن الجميل 
هيرمى الحمل على نون نسوة الثورة 
ومش تحيز لجنسى ولا حاجة 
لكن ثبت بالدليل 
وسنوات مضت يعنى ..
 بنات ونساء الثورة 
اللى بيجروا ورا حقهم 
وحقوق شهدائهم 





والمعتقلين




والمختفين قسريا 



لسه مكملين 
واللى لو الرجالة تعبت وزهقت وانقهرت 
هن يسندوهن




 ومن اجمل ما يكون بقى 
انه آخر كلمة ف الرواية 
هيا
 ...
إنزل





 والثورة كل ما يحاولوا يرجعوها 
وينجحوا مؤقتا وشكليا 
ترجع تانى تعافر وتتقدم من تانى 
مدفوع فيها الغالى اصله
والغالى عمره ما يرخص 
ربنا يرحم كل الشهدا 
اللى نعرفهم واللى منعرفهموش 
.....
وفاضل مقتطفات من الرواية 
من كتر جمالها لازم اقولها




" الشباب الذين يتجمعون ضدك فى الميدان صاروا متجمدين كتماثيل من حجر"



 " لا اجلس على مقعد اخر قد يكون هذا المقعد ممسوسا
 لا احد يدرى ما الذى يحدث فى البلاد "




" قلت لك دعنى ألقيهم جميعا هناك فيأتوا على مهل ويستغرقوا عاما ليصلوا الينا من جديد "



 - هل صحيح 
هتف الشباب الجيش والشعب أيد واحدة ؟
- صحيح يا افندم 
- مؤدبون جدا !



" لا تشغل بالك يا مولاى هم عبيد البيادة حتى اذا انتصروا سيكون من السهل الضحك عليهم
 وسيكون ك املهم العيش فى ظل حمايتنا لنشر افكارهم متلازمة استكهولم يا افندم 
ما أكثر ما عذبنا رؤساءهم "



" لم سلاحك سلاحى اجمل لا يترك خلفه اثارا اى انسان ستلدغه ويموت ستكون له جثة"


"وشفتاها هما أقرب ما يجعلها لتشبه سعاد حسنى 
ما ان ترى وجهها حتى تشعر بالسكر والشهد
 ينسكبان من شفتيها وتتمنى لو قبلتهما"




" فالشمعدان انواع منها الكبير والصغير يحمل الشموع تضىء المكان
 لكنه ايضا تحمله الراقصات 
وفيه الشمع يرقصن به فى المواخير الفقيرة "





 " الاربعة فى حركة "هنكسر قلة " التى تطالب برحيل الحاكم وتغيير النظام"



" عيشوا حياتكم 
ستضحكون فى النهاية ستكونون فى يناير القادم
 فى الميدان الكبير "


 


" يا مرجع الأيام ورا بكرا عيشتك تبقى خرا"




"لماذا تريدينه أن يحكم ولما يريد هو الحكم ؟ 
هذا بلد مقرف
 لماذا لا يعيش حياته 
وينهد يقعد ساكت "




"انا منذ اخذنا قرار قتل القطط 
وعارف ان البلد ستخرب "





" العيال المتأجرين من فيسبوتشا رجعوا للثورة ؟"



"قذفت الشباب سنة ورا انت رجعتنا الآف السنين 
ولا تدرى لذلك ظهرت الديناصورات"


" أسجن أرفد احسن من الموت 
 اتركنى 
اثبت مكانك يا عسكرى لما يقرب اضرب رصاص"

 

"يا جماعة من اين تأتى هذه الموسيقى ؟"


 

"هولاء الذين اتفق معهم النظام الحاكم
 ان يطلق ايدهم وسط الشعب
 ليأخذوا الناس الى الاخرة 
وينهب ابو العساكر ورجاله الدنيا"



"ولا بأس فشباب الوطن اكثر من ستين فى المائة 
من الشعب
 ولا سبيل لمحونا الا بمحو الوطن كله "



 "كان  عليه ان يزودهم بقائمة اتهامات
 جديدة على رأسها الاتصال بسعاد حسنى
 فى العالم الآخر 
وتشجيعها على استخدام قوة الآلهة
 فى معارضة الحكم"




سعاد حسنى ماتت يا جدعان !




 "هذه  البلاد  لاوند منذورة للسرقة 
منذ دخلها الاجنبى 
وحتى بعد ذلك حين خلصت لاولادها
 راح حكامها يسرقونها
 تحدثوا كثيرا عن ظلم الاجنبى 
وتفوقوا عليه فى  السلب والنهب 
وليتهم يعرفون درس التاريخ"



" هوه لسه فيه 25 يناير تانى ؟"




"لاوند ام الدنيا وزينة البلاد"



"نحن النساء سنعيد الثورة من جديد"





 
"كل رجال ابو العساكر عساكر"




وخلاص خلصنا 
و بتمنى لو فيلم يتعمل عن الثورة
فالرواية دى أجمل حاجة تعبر عنه وعننا
بس فيلم الله يكرمكم 
مش مسلسل .. وتزهقونا ف عيشتنا
 500 حلقة وكدا
الله يكرمكم 




واخيرا
 واولا .. 
وكل وقت  
أسعد الله أيامك يا أستاذنا 
 @ibmeguid





 وتصبحوا على ألف خير

-------------------------------------

  

  1. ومالهاش علاقة بمعنى الينبوع/النافورة.. دي كلمة تانية Fontana/Fontanella


  2. . كلمة "لاوندي" جاية من اللاتينية (وكمان موجودة في الإيطالية) Levante ومعناها "المشرق، والاسم لسة بيطلق على بلاد الشام لحد دلوقتي

ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "