نشرة أخبار زمان

الليلة دى رغى شهرزادى 
ونم على الناس

ونشرة اخبار من بتاعت زمان 

تأتيكم برعاية شهرزاد والحكمة القديمة الرائعة

" ستأتى أيام يكون فيها التأمل فى الماضى

 عملاً لاجل المستقبل "

هنقول الخبر ويتبعه سؤال للمشاهدين 

1 ديسمبر 1941

"علمنا ان المصريين الذين كانوا مقيمين فى فرنسا

غير المحتلة قد غادروها جميعا

وانهم الآن فى طريقهم الى مصر "

انتهى الخبر والسؤال هو :

عزيزى المشاهد اذا حذفنا كلمة من الخبر

وحطينا مكانها كلمة اخرى

 فهيبقى ولا كأن فات فوق ال60 سنة ولا حاجة

فما هى هذه الكلمة ؟

محدش جاوب .. ماشاء الله كله

بيلعب ف الموبايل وبيكلم الحتة بتاعته
 ومحدش مركز

 مااااااااااشى 
الاجابة شيل فرنسا وحط ليبيا مكانها 

لأ برافو فيه ناس مركزة :)

يونيو 1948 

" شوهد منذ أيام فى حديقة الازبكية بالقاهرة

ثعلب يجوب أركانها وقد تنبه له بعض زوار الحديقة

والقائمين بالأمر فكمنوا له واصطادوه يوم السبت الماضى

بعد ان قضى بالرصاص

وقد ارسلت حديقة الحيوانات فى طلب جثته لتحنيطها 

.ومما يذكر بهذه المناسبة ان هذا الثعلب

يسكن بالحديقة منذ 12 عاما "

وانتهى الخبر على هنا

انتهى الخبر والسؤال هو 

متوسط عمر التعالب بيقولوا انه حوالى 15 سنة

 يعنى الجدع قاعد ف الجونينة كافى خيره شره

لحد ما كان قرب يودع

 قتلتوه ليه يا كفرة ... ؟!!!

 دا اولا

ثانيا 

مزعلكوش ف شبابه الراجل والقائمين بالامر

 كانوا عارفينه وسابوه فإيه اللى جد بعد 12 سنة يعنى ؟

 ثالثا

ليه مفكرتوش تصطادوه وتحطوه ف قفص

ويتفرج عليه البشر بدل ما يروح جنينة الحيوانات

 متحنط ... ليه ليييييه ليييييه؟؟؟ 

#بصوت_ميدو

وسؤال اخير

 أذكر ما هو وجه الشبه بين مسئولين زمان

ومسئولين دلوقتى ... غير غلظة القلب ؟

الاجابة هى : الغباااااااء

 ظِل ‏@ahmed__saeed 

وليه يصطادوه اصلا ؟!! الناس واخده فكره عنه

 انه كائن شرس وخطر , وهو مش كده خالص

غباء .. ف سنه دا المفروض يكون مش قادر

 يقوم من مطرحه ومش مصدر خطر اساسا

غالبا دا السبب انه ابتدى يبان للعيان

ظِل @ahmed__saeed 

العقليه الشعبيه المصريه بتخلط دايما بين الثعلب

 وبين الذئب , بيفتكروا الاتنين واحد ,

علشان كده لاحظت ان البسطاء بيخافوا منه جدا

        هو مش خطر عموما , ولا وهو كبير ولا وهو صغير

, وبيتجنب البشر تماما

23 ابريل 1939

 "كتبت بعض شركات الأسلحة الامريكية

 التى تشرف عليها الحكومة هناك الى الحكومة المصرية

 تعرض عليها ان تورد للجيش المصرى

الأسلحة اللازمة له

 والتى لا يتسع وقت المصانع البريطانية لتوريدها اليه

 بسبب برنامج التسلح البريطانى " 

الخبرانتهى والسؤال هو

ودلوقتى بعد 75 سنة اختر مما يلى 

 ما هى نسبة مساهمة شركات الأسلحة الأمريكية

ف تسليح الجيش المصرى ... هل هى  :

 - 100 %

- 100 %

- 100 %

moustafa abdel aziz ‏@moustafa_aziz

 رقم

farida ‏@faridaallam 

200%

بيان وتحذير

" تعلن السيدة منيرة المهدية انها قد فصلت زكى فؤاد

 زوج نعمات فؤاد من الخدمة فى صالتها "

انتهى الخبر والسؤال هو 

ماذا فعل زكى فؤاد ف الست منيرة 
عشان تشردله كدا ف الجرانين

ثم اذكر ما الهدف من ذكر نعمات زكى 
مرات زكى ف الخبر

هيا نعمات كمان زعلت الست منيرة 
وانحازت لزكى وقالت مش غلطان يا ست 

ولا الموضوع كيد نسا وما خفى كان أعظم وكدا ؟
واخيرا .. حد برضو يستجرى يزعل منيرة المهدية 
ويدوسلها على طرف .. انتوا بتهرجوا يا جماعة .. !!!

1 فبراير 1931

" وافق دولة وزير الداخلية نهائيا على

مشروع الحاق حملة الليسانس بوظائف البوليس

 بعد تدريبهم على الاعمال العسكرية " 

انتهى الخبر والسؤال هو

علل لما يعتبر وزير الداخلية دا فاشل وقوى كمان ؟

- عشان مخدش بتوع الأعدادية

- عشان مخدش اللى معاهم ابتدائية

- عشان مخدش خريجى الكى جى تو
- عشان مسموش محمد ابراهيم

- كل ما سبق 

31 اكتوبر 1932

" تلقت وزارة المالية اخيرا من دار الضرب بلندن

 300 قطعة ذهبية من ذات الخمسة جنيهات 

وهذه القطعة مزينة بصورة حضرة الجلالة مولانا الملك

وتباع القطعة بمبلغ 740 قرش "

انتهى الخبروالسؤال ينقسم الى أ و ب

أ) كما قال محمد صبحى ف الجوكر

انا راضية ذمتكو 
دى صور تحطوها على علب أطفاااااال

 أطفال ف عمر البراءة والصبا !!

ب) ثم اشمعنى 7 جنيه واربعين قرش

مش وخمسين مثلااااا

ثم دول دهب دهب بجد ولا بيسرحوا بينا ... ؟

farida ‏@faridaallam

 والنبي طعم كده وواكل وشبعان

ظِل @ahmed__saeed 

 دهب عيار 24 صافى , حتى نهاية الثلاثينيات

, كان سعر الجنيه الدهب أقل من تسعين قرش

, يعنى الجنيه الورقى قيمته أعلى من نظيره الذهب

7 يونيه 1931

اسوان

" اتصل برجال الاختصاص 
ان صمويل فلتؤوس افندى

 معاون محطة الجعافرة يشتغل بالسياسة لحزب معين

فصدر الأمر بفصله من وظيفته "

والسؤال اللى مش محتاج اجابة ...

طبعا فلتؤوس افندى اكيد اخوان #معروفة

hoda mahmoud ‏@hodaelsorogy 

 غالبا كان وفدي و الله اعلم

يونيو 1930

" عثر بوليس الجمالية على المدعو عبداللطيف محمد

وهو رجل لا صناعة له منتحرا بمنزله بالمبيضة

وتبين انه انتحر لضيق ذات يده "

انتهى الخبر والسؤال بقى
 ليه انتحر عبداللطيف ف منزله مش ف حتة تانية ؟

- عشان خاف حد يمنعه

- عشان الجوع اصابه بالهزالمقدرش يخرج

- عشان مكنش فيه اياميها اعلانات ع الطرق

ديسمبر 1929

" سينما متروبول هذا المساء دوجلاس فيربانكس

فى اول فيلم ناطق سينمائى فيلم القناع الحديدى؟

انتهى الخبر والسؤال هو

هذا الفيلم الذى له علاقة بفيلم الواد القمرة

 ليوناردو دى كابريو

لأنه مأخوذ عن نفس الراوية كان امريكانى

 فاذكر اول فيلم عربى ناطق يا كابتشن؟

الاجابة هى : اولاد الذوات

لـ يوسف وهبى وامينة رزق وعرض سنة 1932 

الخبر الجاى 
مسخررررررررررررررة

6 مايو 1940

" اصدر معالى اللواء محمد صالح حرب باشا

 وزير الدفاع الوطنى قرار يقضى بحظر الزواج

على ضباط الجيش الذين هم فى رتبة الملازم الثانى

والمفهوم ان الغرض من هذا القرار عدم ارهاق الظباط

حتى يتفرغوا فى مستهل حياتهم العسكرية

للقيام بالأعمال الملقاة عليهم

فلا تشغلهم عنها أعباء المسئولية العائلية بعد الزواج

 ومما يذكر ان معالى الوزير يدرس الآن مشروع

يرمى الى الزام الملازمين الثانيين

الاقامة فى ثكناتهم على ان يستثنى الظباط

الذين يرخص لهم قائد الوحدة بالاقامة خارج الثكنات

لأسباب خاصة "

 وانتهى الخبر والأسئلة هى 

1) الملازمين التانيين كانوا مزعلين وزير الدفاع قوى

كدا ف ايه .. الراجل بيكدرهم بيكدرهم يعنى
 #الصول_ثميح_بيكدرنى

2) الاخ اللى صاغ الخبر ملقاش جملة تانية غير

 (عدم ارهاق الضباط) دى

ايه قصدكم ان الجواز اللى هوه نص الدين مرهق

 ووحش 

انتوا هتكفروا بقى ؟!

3) وزير الدفاع دا رقِم وخبيث وابليس يقوله يا عمى

 قالك منعت الجواز اه

بس العيال لو خرجت اجازة هتنيحرف وتنبسط برضو

ففكر يطلع القرار يحبسهم ف الثكنات 

يا ليهوى ع السواد ... !

4) ما تشوفولنا الدفعة اللى اتحبست دى 
اساميهم ايه يا عيال

 اكيد منهم ناس اتعقدت

وبعدين طلعت عقدها علينا لما اترقوا ف الرتب وكدا

 اه 
 مش بعيد والله

 الكبيرة قوي ‏@__Marwa____  
 الكتمه وحشه بتكمكم وتلم حشرات #معروفه

-sH. @_HishamFikry 

انا بحثت و دورت.. جيمى و السادات
و عبحكيم اتخرجوا سنة ٣٨ و ٣٩ 

 لأ هما بيتكلموا عن ملازم تانى
متهيألى كانوا عدو الرتبة دى .. عموما كلهم عاااااااهات

-H. @_HishamFikry 

لأ.. ما الرتبة بتقعد ٣ سنين عشان يترقى للرتبة اللى بعدها
يعنى شكلهم هم اللى عليهم العين و النية 

ابريل 1931

"المنطاد جراف زبلن الالمانى الذى طاف فى نزهة جوية

 من فلسطين عائدا الى مصر

اجرة المنطاد 97 جنيه دهاب واياب من المانيا الى مصر

 و27 جنيه ونصف ذهاب واياب من مصر الى فلسطين " 

انتهى الخبر والسؤال هو

ليه 97 جنية ومش 95 أو 100 وخلصنا

وانا عاوزة اعرف دلوقتى الرحلة لفلسطين بـ 27 ونص

اشمعنى النص يعنى اللى مزعلهم كدا !!!

يناير 1944

 فرصة نادرة مزدوجة الاستاذ نجيب الريحانى وفرقته

والانسة ام كلثوم بانغامها الساحرة

18 يناير الحالى بدار الاوبرا الملكية

تطلب التذاكر من الشباك

 ت : 59091 

انتهى الخبر والسؤال هو ..

كام ليلة متتعوضش زى دى عاشها هذا المبنى الجميل

 العريق اللى ملوش زى

وكيف تجرأ الاوغاد انهم يسيبوه يتحرق ... ! 

Ahmed Shawky ‏@_a_shawky  
 انا كده عرفت هو ولع ليه !!!

مارس 1931

"علمنا ان حضرة صاحب العزة حسين سرى بك

 وكيل وزارة الأشغال يتفاوض مع شركة الغاز

لتخفيض اسعار النور نظرا لهبوط اسعار جميع الحاجيات

 ولا شك فى ان الشركة وان كان يقوم نظامها على الأحتكار

 الا ان مراعاة الحالة العامة من النقط الهامة

المقررة فى العقد المبرم بين الشركة وبين الحكومة "

وانتهى الخبر والسؤال هو

ممكن حد يخترعلنا آلة الزمن

ويروح يجيب الراجل السكرة دا من زمانه

الا شكله قلبه حونين وطيب

دا بيقولك تخفيض اسعار 

ومراعاة وحاجات خيال علمى كدا .. !!

يوليو 1939

" يعرض حاليا بسينما رويال فيلم العصر الحديث

 وسيعرض للمرة الثانية والاخيرة 

فانتهزوا الفرصة 

فيلم لشارلى شابلن ستضحك منه كثيرا "

 انتهى الخبر ومفيش سؤال

هنطلعلهم لساننا بس

ونقولهم

 احنا بقى شوفنا الفيلم تانى وتالت وعاشر 
وبنشوفه دايما وانتوا لأأأه

 27 سبتمبر 1930

الاسكندرية
" انتحر السير جون نورتون جريفث

 المقاول الانجليزى الكبير 

الذى تعاقد مع الحكومة المصرية

على القيام بعملية تعلية خزان اسوان

 وتوقف العمل فيه بعد هذه الواقعة

 وكان السير جون نورتون جريفث نازلا

فى فندق سان استيفانو (الغرفة رقم 99)

وفى الساعة السادسة من صباح اليوم

خرج من غرفته للاستحمام فى البحر

وقد ذهب الى حمام الكازينو 

وهناك استخدم فلوكة صغيرة واخذ يسير مبتعدا

عن الشاطىء حتى اجتاز ميلا كاملا

ولما صارعلى هذا البعد تناول مسدسا كان معه

واطلقه على صدره فقتل فى الحال

وكان بعض الاشخاص قد لاحظوا توغله فى البحر

وكان بين المشاهدين شرطى اسمه عبدالله

فلما وقع الحادث ظهر سبب هذا التوغل

وقد انطلق عمال الانقاذ الى موقع الحادث

وعادوا بالسير جريفث جثة هامدة

وقد ترك السير جون نورتون جريفث الذى مات منتحرا

 فى مصر ثروة تقدر ب 5392 جنيها

ولم يترك أى منقولات"

 انتهى الخبر والسؤال هو

 الراجل دا انتحر ليه ؟

ناس بيقولوا انه كان ماسك عملية تعلية الخزان

ورأس المال اكتر من 3 مليون جنيه

 وكان بيشتكى من المهندسين المصريين

وعاوز يفلفص من العملية بعد ما عك الدنيا

ودا سبب انتحاره .. لكن اللى يعرفوه من زمان

قالوا عليه مغامر وخاض عمليات كتير ف الحرب وبراها

وانه سمسار حروب ومقتنص فرص اللى هوه
فتحليلك ايه يا شهرزاد وانتى تحت البطانية كدا

 اقولكم الصراحة 
مقدرش أظلم حد

بس شكله عبدالله الشرطى اللى كتبوا اسمه ف الخبر

هوه اللى قتله الداخلية طول عمرها بلطجية .. !

دا تحليلى ف القضية الصراحة 

وبمناسبة الانتحار بقى .. خبر تانى اهو

30 ديسمبر 1929

عين الدكتور على ابراهيم عميدا لكلية الطب

ووكيلا للجامعة ويعد بذلك اول عميدا مصريا

يشغل هذا المنصب

وكان يشغل منصب العمادة الدكتور مادن الذى انتحر

فى ابريل الماضى " 

 انتهى الخبر والسؤالين هما ...

1) الاجانب كانت بتنتحر عندنا ليه عيبة ف حقنا

 ف وشنا الحكاية دى

  2) كان لازم يعنى ينتحرلكم الأجنبى

عشان تمسكوها لواحد مصرى .. يا اوغاد ؟

26 مايو 1941

" اعلان : فيلا بحديقة 813 متر ش عكاشة بالجيزة

الثمن أساسى 1400

والبيع جبرى ضد روبيرت بيانكردى بالمحكمة المختلطة "

انتهى الخبر والسؤال هو ..

اذكر ما اذا كان شارع عكاشة دا بيبص ع النيل

ولا ف شارع جانبى ؟

ثم اذكر سعر المتر دلوقتى يسوى كام ف الحتة دى

 وقولنا

-Sahar Ahmed @ahmed5_1 

لا مش على النيل دلوقتي تقريبا 35000 الف

اكتئاب ما بعد الثورة @MahometusUsama 

 ﻻ شارع عكاشة شارع جانبى المفروض إﻻ لو ساعتها

 كان مكمل للنيل مثلا D:

16 سبتمبر 1921

" كان مراد بك قنصل مصر فى باريس

يتلقى دروس فى مدرسة الغزل والنسيج العليا

فى ميلهون لمدة عامين 

وقد نجح فى الحصول على لقب مهندس فى صناعة النسيج وحصل على الدبلوم الأول فى الغزل

 والدبلوم الاول فى النسيج 

وقد نشرت نشرة تلامذة هذه المدرسة القدماء

 صورة مراد بك ونص الخطاب الذى القاه بأسم الطلبة

ردا على خطاب رئيس مجلس ادارة المدرسة

ونوه فيه بنبوغ مراد كامل بك

وقال انه مع بلوغ سن الخمسين

 فقد تلقى دروس هذه المدرسة بنجاح وكان طالبا نابغا

عظيم الذكاء والنشاط " 

انتهى الخبروالسؤال هو :

 اذكر بالتحديد كم الفراغ اللى كان عايش فيه
 قناصلة مصر ف الخارج لدرجة انهم يدرسوا نسيج

واذكر ايضا نوع الجاتوه الذى احتوى عليه البوفيه 

ف حفلة المضرسة

12 ديسمبر 1943

" افتتح امس نادى السينما بالقاهرة وحضر افتتاحه كثير

 من الكبراء والأدباء والصحفيين

 ولفيف من المشتغلين بالسينما

وقد بدأ الأحتفال بكلمة من الأستاذ عبدالحليم محمود

رئيس النادى رحب فيها بالمدعوين

ثم تحدث عن هذه الصناعة الناجحة

انها مهددة بالتعطل لقلة ورود الفيلم الخام

ثم ألقت الأنسة ثريا حلمى مونولوج 

وشاهد الحاضرون رقصا شرقيا من الراقصة المعروفة

 حورية محمد 

ثم قام الأستاذ يوسف وهبى ومعه الانسة امينة رزق

والسيدة علوية جميل بتمثيل قطعة مسرحية

والقى الاستاذ انور وجدى منولوجين طريفين

واختتمت الحفلة بقطعة غنائية عنوانها كليوباترة

 للأستاذ محمد عبدالوهاب

انتهى الخبر والسؤال هو

ليه كل الافتتاحات متبقاش فُللى كدا 

واخر تفانين وبهججة .. ؟!!!

1 فبراير 1931

" وصل مستر هوارد كارتر قادما من الأقصر

 وقد ذكر لمندوبنا انه انتهى من حزم التوابيت الأربعة

 التى كانت فى مقبرة توت عنخ امون

وارسالها للمتحف ولم يعد فى المقبرة الآن شىء

غير انه لا تزال فى المعمل بالأقصر عدة اشياء متخلفة

تقتضى علاجا

وحلها ثانوى

ولكن بينها كرسى جميل الصنع 

وسيعود مستر كارتر الى الأقصر غدا

لمعالجة تلك المخلفات وارسالها الى المتحف المصرى 

.. وقد ذكر لنا انه لم يقرر شيئا فى صدد ما يعمله

بعد ان ينتهى من عمله "

 انتهى الخبر والسؤال هو

أذكر ماذا يا ترى لو الحاج كارتر عايش الآن

وشاف اللى حصل لدقن توت 
كان هــ .. ؟

- يلطم

 - يتجنن 

- يقطع شرايينه 

- كل ما سبق

-kojake alex ® @kojakebess 

 كل ما سبق بعد ما يولع فى اللى امل كدا

وفى وزير الاثار وفى المتحف وكل البلد 

عشان سابت دا يحصل

Heba ‏@HappyGeddan  

 ايام ما كان بدقن

اغسطس 1965

" فاتن حمامة ستزور الولايات المتحدة الامريكية

بدعوة من زوجها عمر الشريف 

ستحضر معه حفلات العرض الاول لفيلمه الجديد

 (دكتور زيفاجو) 

نادية ذو الفقار وطارق الشريف يعودان من اسبانيا

الى القاهرة خلال الشهر القادم للالتحاق بمداراسهم 

.. وتبقى فاتن مع عمر وتذهب معه الى لندن ثم امريكا

وتعود قبل نهاية ديسمبر القادم

وهذه اول مرة تزور فيها فاتن امريكا "

انتهى الخبر والسؤال هو

قصص الحب الجميلة دايما تنتهى بــ :

- ميتجوزوش

- يتجوزوا ويتطلقوا

- جتهم نيلة اللى عاوزين جواز

- كل ما سبق

اخر خبر بقى عشان المرارة 

28 سبتمبر 1930

" عجوز معمر يدعى احمد مصطفى عمره 137 سنة 

خدم فى الجيش المصرى بوظيفة ترزى

من عهد محمد على باشا الكبير

الى عهد جلالة الملك فؤاد الاول ثم اعتزل المهنة

و يعيش الآن فى مدينة شربين ولا يزال مالكا لقواه العقلية

وقد تزوج من 7 نساء لا تزال احداهن تعيش معه

 وهو يرجو ان يعيش 30 سنة اخرى "

انتهى الخبر والسؤال هو

علل لماذا يريد عم احماااا ان يعيش 30 سنة كمان :

- عشان لسه صغار وملحقش يشوف الدنيا

- عشان يحصل الملك فاروق ويكمل المجموعة

- عشان يشلنا ويجيبلنا الفالج

وبس يا بنى انزل بالتتر

خلصنا

 نشوفكوا الحكاية الجاية وشكرا ع المتابعة

تصبحوا على ألف خير 

-------------------------