الخميس، 31 يوليو 2014

عثمان سقا ... الألفــة


 


حكاية النهاردة عن واحد من رجالة محمد على 
كان كويس يا شهر الراجل دا ولا ويحش ؟
انا هحكى حكايته واقول رأيى ف الآخر
وانتوا تحكموا

 

والحقيقة ان الجدع دا اتظلم لفترة طويلة
وذكره سقط عمدا من كتب التاريخ المعاصرة
لأواخر محمد على وما بعده
وهنعرف ليه
بس نبتدى الاول بفلاش باك
لسنة 1805 لما محمد على صعد إلى القلعة

وبقى نايب السلطان العثمانى فى مصر
بزقة من الشعب
وزقتين من المشايخ
و3 زقات من ذكائه ودهائه
بعد ما وصل للكرسى
ابتدى بقى يتخلص من كل من وصلوه
او ساعده ف النعمة اللى بقى فيها
فتخلص من المشايخ المزعجين زى عمر مكرم وغيره
وعين بدالهم 



 
اتخلص كمان من المماليك
والمنافسين له عسكريا ف مذبحة القلعة
ثم اتدور اخيرا ع الشعب الغلبان
وابتدى ينهب ف فلوسه وصحته ويركعه سنة سنة
محمد على زيه أى حاكم جه لمصر
كان شخص طموح
ومعاه قوة وعسكر وقبل منه اتسلح بالدهاء
بس كان عارف ان الوصول للعرش حمادة
والبقاء فيه حمادة تانى خالص


وبقائه على كرسى العرش تطلب انه يكون قوى
ويمد نفوذه للشام والسودان
وكل حتة تخليه مرعب لأعدائه والخصوم
وكل دا يتطلب جيش قوى ...
وهنا بقى مربط الفرس
واللى هختلف فيه مع ناس كتير كانت بتقول
ان محمد على بانى مصر الحديثة
لأنه ف رأيى بنى كل حاجة عشان مصر
بس مصر محمد على
كل اللى عمله من انشاءات وتحديثات ف الأقتصاد
والمجال العلمى والصناعات وغيره
كان بيصب ف النهاية ف صالح الجيش
اللى بيه عمل فتوحاته وانتصاراته

 

محمد على لما حكم مصر
كان واخداها تقريبا خرابة لا بنية اساسية
ولا اقتصاد متين ولا نيلة
ولهذا لما اتخلص م المماليك
وحب يؤسس جيش جديد احتاس
واكتشف انه لازم يعمل كل حاجة من اولها
وعلى جديده
ومن هنا قرر يستعين بالاجانب
لكن برضو الديب اللى جواه قاله متأمنش للغرباء تماما
وتبقى تحت امرهم دايما ... 
ومن هنا
جت فكرة ارسال البعثات العلمية للخارج
عشان العيال تسافر تتعلم اصول كل علم والصناعة
وترجعله تنفذ اللى اتعلمته
وتبقى طوع امره ..
سفرهم فرنسا وانجلترا وايطاليا والنمسا
والكتب لحد وقت مش بعيد كانت بتقول
البعثات العلمية عددها كذا وعدد طلابها كذا
واولها كان ف فرنسا
واسماء الطلاب كمان واتعلموا ايه الخ الخ
واللى حابب يقرى باستفاضة
هيلاقى الكلام كله 
 


واسماء اغلب اللى سافروا ف البعثات دى

اتعرفت بعد كدا وبقوا اعلام ورواد ف مجالاتهم
لكن من وسطهم اتغفل ذكر اسم واحد
واسمه عثمان نور الدين
وعثمان دا بقى هيكون بطل حكايتنا النهاردة
عشان بسلامته تم تطنيشه
مع انه زى ما بيقولوا كدا يعتبر الألفة وسط اخواته
 يعنى اول واحد سافر يتعلم برا ..!


 
وحكايته زى ما حكاها جمال الدين الشيال
ف رسالة الماجستير بتاعته
واللى اتنشرت ف كتاب ممتع
اشتروه يا ولاد ولن تندموا



والقصة تبدأ من رسايل متبادلة بين اتنين
من موظفى القنصلية الأيطالية ف مصر
وف وسط الكلام بيجيبوا سيرة شاب
من رجالة محمد على
واسمه عثمان
وبيشيدوا بذكائه وبراعته
وانه كان من التلامذة النجباء ف التوقيت الفلانى 
اللى هوه امتى يا شهروزة ؟
حضرتك الفترة من 1813 لحد 1816
وكانت ف ايطاليا
وبالتدقيق والتمحيص من مؤلف الكتاب
قالك انه الحكاية طلعت قبل التاريخ دا كمان
وان اول بعثة سافرت من مصر لأوربا 
عشان اولادها يتعلموا كانت 1809
ومين كان فيها بقى ؟
ولدنا عثمان سقه باشى زادة
ايه حكايته هذا الفتى ؟
هنقول اهو
وبالتفصيل



عثمان مواليد تركيا ف مدينة اسمها مدللى
عيلته لمت خلجاتها وجت على مصر
اواخر العصر العثمانى
وحضروا مجى نابليون ومشيان الفرنساوية
ثم ..
جه محمد على بعد اربع سنين وحكم مصر
وكان ف قصره والد عثمان 
واللى اسمه يوحيلك انه كان سقا مثلا ؟
انما لاااااا دا مش أى حاجة يعنى
باشى دى او احيانا تنقال بشه 
يعنى ضابط 
رتبة بسيطة كدا ف الجيش
وابو عثمان الحاج نور الدين يعنى
كان زى ما تقولوا كدا ظابط موظف ف وزارة الرى
الباشى سقا حسب ما قريت ف احد المصادر
 كان بيحضر قياس منسوب النيل
ويسجله ف جو احتفالات ورسميات وكدا
قصره ابو عثمان كان حاجة كويسة



الأب بحكم موقعه دخل عثمان ابنه ف قصر محمد على
وخلاه تحت عينه وانتوا عارفين بقى
الحاج محمد سنكفولة ومش هقولكم عليه


محمد على بحكم ذكائه ومعرفته ف الرجال
وممكن ازاى يوظفهم لصالحه
لما وقعت عينه على عثمان توسم فيه النباهة والذكاء
وبيقولوا انه قرر يسفره برا
الكلام دا كان سنة 1809 يا ولاد
ونركز قوى ف التاريخ دا عشان بسببه
عثمان نور الدين هيبقى صاحب اول طلعة جوية
فتحت باب الحرية وكدهون ..



حد يقولى عثمان سافر ايطاليا
هيه هنتعلم فنون بقى ونحت ورسم
والحاجات الحلوة دى صح ؟
اقولكم ياختشىىى عليكو
انتوا ناس طيبين قوى بجد .. !
لأ طبعا بقى محمد على بتاع المسخرة دى
فن وجمال وبتاع
دا سفره عشان يدرس
"العلوم الحربية والبحرية وفنون السياسة وادرة الحكم "
مكتوب كدا نصا



عثمان شاد الرحال على ايطاليا
وقعد فيها كام سنة
وبعدين راح على فرنسا وراجع مصر سنة 1817
واول ما رجع محمد على عينه (كاشف)
فى الحرس الحربى
ايه كاشف دى يا فاتيما شكلها وظيفة هزوء كدا
اقولكم ولا تعرفوا حاجة
الكاشف دا بعيد عنكم زى مامور الضرايب 
والمراقب والمفتش والخازوق كدا
والفسفوسة ف القفا والكالو ف جزمة ضيقة 
حاجة قرف القرف يعنى


ومحمد على قصد يحطه مخصوص
 ف الحرس الحربى
دا زى الحرس الجمهورى بتاع الأيام دى
عشان يطلع ترابنتين االعيال هناك
ويسيطر عليهم وقد كان



عثمان كان راجع بعلم ف دماغه ونظام وترتيب
وحاجات مستحدثة من اخر حاجة ف اوربا
اللى علومها الحربية ف اعلى درجاتها
وبعد شوية محمد على ..
هيلاقيه جاب معاه كتب كتير من برا

فيقوله لمهوملى ف مكان واحد ونظمهم
وفعلا عثمان هيعمل كدا
وتظهر ف مصر اول مكتبة متخصصة
ف زمن محمد على
المكتبة دى هيكون مقرها جزء من قصر ابراهيم باشا
ابن محمد على ف بولاق

 
 
عثمان هيجمع فيها كل الكتب اللى رجع بيها
من ايطاليا وفرنسا وبعد شوية هيجيب مدرسين
ويدخل فيها طلبة تم اختيارهم ع الفرازة عشان يتعلموا
المكتبة دى بعد التغيرات اللى حصلت دى
هتتحول الى "مدرسة بولاق"
اول مدرسة نظامية ف عهد محمد على
بعد ما كان التعليم ازهرى وف الكتاتيب وبس




المدرسة دى زارها احد الرحالة الطلاينة سنة 1822
والجدع كان اسمه بروكى
بروكى بقى حكى عن الزيارة بإنبهار ع اللى شافه فيها
وقال بالتفصيل
مبدئيا قال ان
عثمان نور الدين كان ناظر المدرسة دى
وكان بيدرس فيها الهندسة واللغة الفرنسية
يعنى جو زكريا الديردى وكدا




بس بروكى بقى انزهل ليه ؟
عشان جنب كتب الفنون الحرب والزراعة
والرياضيات و القانون والتشريع والادب
ولقى الكوميديا الالهية بتاعت دانتى
وايه كمان ؟



لقى كمان كتب لفولتير و روسو
والكتاب المقدس وكل دا كان منطقى يعنى على فكرة
لأن المدرسة كان فيها 3 مدرسين طلاينة
وعادى
 لكنننننننن
اللى مكنش عادى ابدا انه لقى كتب كتير ومجلدات
فايه بقى ؟
ف النظم الدستورية للحكومات الاوربية
وابدى اندهاش من وجود حاجات زى دى ف بلد زى مصر

- الله 
- ايه ..
- ايه ؟
 - قصده ايه الراجل دا ... ؟
- ماله ؟
 - يكونشى بيلقح على محمد على واحنا ايش واخدين بالنا
- لأ اكيد مش قاصد يا شهر ..
- مش قاصد  بجد ؟
- أه اكيد 
- طشييييب


 
هوه الصراحة
الراجل جنب كل حاجة شافها
واتعجب الا انه ابدى كل العجب العجااااب
من انه اكتشف ان المكتبة دى مفيهاش أى حاجة
عن تاريخ مصر
تخيلوا!
وقال ازاى الكلام دا
فين الكتب اللى بتحكى عن تاريخ هذا البلد العظييييم ..؟!!
يا عم صباح الخير انتا جاى ف زمن محمد على
طيبين قوى الطلاينة دول

 
قصره ..
المدرسة كانت حاجة شيك وفُللى
وناظرها راجل علامة دارس ف بلاد برا
وعنده العلم العظيم
وبيعلموا العيال لحد ما بقى شغلهم الشاغل الترجمة
بيترجموا ايه يا طمطومة ؟

بيترجموا كل الكتب اللى محمد على شاف
انها ضرورة للوطشن ورفعته
وكما قيل كدا 
"كتب الفنون الحربية وسائر الصنائع""
وجنب الكتب دى عملوا بالمرة
وهما قاعدين قاموس "الأيطاليانى العربى"
وطبعوه ف مطبعة بولاق



الحقيقة ان البلد ف التوقيت دا كانت تقريبا شغالة كلها
عشان جيش محمد على
ولهذا كانت مهمة عثمان ترجمة الكتب الحربية المختلفة
فى نظم وقوانين الجيش وتعاليمه 
وكل ما كان معروف وقتها
ف احدث النظم الأوربية
وكانت الترجمة بتتم من الفرنسية الى التركية 
وخلوا بالكم م النقطة دى



المهم عثمان بعد شوية خرج من نطاق العلم النظرى
وابتدى يخش ف الجانب التطبيقى
ودا حصل سنة 1822 لما محمد على قرر يعمل 
اول فرقة مشاة
واختارلها اسوان كمقر للتدريبات
واهو فرصة يبعدهم عن القاهرة ليقرفوه
ويثوروا عليه
ومن ناحية تانية لو فشلوا
اهو يبقوا بعيد عن النظر والشماتة



 
ف السنة دى تحديدا اتعملت لجنة مكونة من 3 تنفار
سليمان الفرنساوى
واحمد افندى المهندس
وعثمان اللى سافر معاهم لأسوان
محمد على ساعتها سافر اسوان بنفسه
عشان يشوف الفرقة دى طبقا للنظام الجديد
اللى رجع بيه عثمان من بلاد برا

 
 
 
ورغم ان الفرقة دى طلعت عين سليمان باشا الفرنساوى
وعملوا قلق وقرف انما اظهروا تحسن
بس مكملتش بسبب الامراض وعوامل اخرى
والموضوع فشل مؤقتا
لكن محمد على عاود الكرة بعساكر من اهل مصر
لأن بتوع اسوان كانوا من السودان
وطلب من عثمان يطبق كل ما تعلمه
والمرة دى فلح واثبت جدارة
وإتعين (سر عسكر)
ودى حسبما بحثت يعنى قائد عام للجيوش
معرفش دلوقتى توازى ايه ف ايامنا 
قائد اركان ولا ايه
اللى عارف يعرفنا والنبى ..


 
المهمممم
سار عسكر الجيش المصرى
واللى اخد لقب بك .. عثمان نور الدين
هيكمل المسيرة ف الجانب النظرى جنب التطبيقى
وبأمر من محمد على هيترجم قوانين
ونظم البحرية الانجليزية للغة التركية
ويشرف على البحرية المصرية
اللى كانت ف مرحلة تجديد شاملة



محمد على كان مدى عملية تطوير البحرية دى
للظابط " ليتلييه "
وخلى عثمان يبقى الرجل التانى بعده
والصراحة عثمان بين كرامة
ولما الأسطول المصرى اتشنيرررر ف موقعة نفارين
عثمان اقترح على محمد يبنى دار صناعة
ويعملوا اسطول جديد على احدث طراز
وطبعا محمد على استكيف
وادله صلاحيات كبيرة ف الحكاية دى





وخلاه عينه على البحرية المصرية
واللى بيها ابراهيم باشا عمل شغل عالى ف الشام
ويقال ان عثمان كانله دور كبير
ف فتح عكا اللى استعصت قبل كدا على نابليون
بجلالة قدره عثمان فتحها بخطة وشغل عالى
الجدع كان له قدره عند محمد على اللى كان بيعزه زى ابن
ومكنش بينده الا بـ "ولدى عثمان"
يا ختشى ع الحنية
وبيقولوا انه جوزه احدى جوارى قصره الأثيرات



 
وانه بناله بيت كبير قرب قصر التين ف اسكندرية
عشان يكون جنب الأسطول ومش كدا
وبس دا عينه سنة 1827 قائد عام للأسطول
بعد محرم بك
ولهذا راح مع ابراهيم باشا ف الشام




بالعين الفاحصة كدا ..
نقدر نقول وفق ما سبق ان عثمان 
أقصد ولدى عثمان كان الرجل التالت تقريبا ف الجيش
بعد محمد على
وبعد ابنه ابراهيم



والجدع كان له رجل ف الجيش ورجل ف البحرية
وكانله دور ف الناحية الادارية وف الميدان 
يعنى حاجة كدا تقلق وانتوا عارفين الناس 
 بتقلقنى ف مصايرها






المهم انه سنة 1835 محمد على
هيقرر يحول قصر العينى لمدرسة
وتكون متخصصة ف الطب
ومعالجة أمراض العساكر اولا
والشعب ف اوقات الفراغ
التاريخ بيقولنا ان مدرسة قصر العينى
 كانت تحت اشراف كلوت بيه 
وكلنا عارفين تقريبا قصته لكن اللى منعرفوش بقى انه 
محمد على بعد ما عثمان اظهر براعة
ف ادارة مدرسة بولاق
قرر يخليه يشرف على قصر العينى
وخلى كلوت بيه يرفع تقاريره لعثمان الاول
قبل ما توصله


 
وبيقولوا كمان ان عثمان نور الدين
كان هوه السبب الأساسى ف اختيار فرنسا
لأرسال البعثة الشهيرة اياها سنة 1826
وبسبب علاقته بمسيو جومار
جومار دا كان احد العلماء اللى جم مع الحملة الفرنسية
وطبعا بعد رحيلهم كانت العلاقات متوترة مع مصر
فعثمان لما سافر درس عندهم
اتعرف على جومار
والعلاقات دى ادت لأنه يقنع محمد على
بسفر البعثة دى على هناك
واذابة الجليد
م الاخر الجدع كانله وضع ومقام عالى ونفوذ واضح
ايه يا ترى ..
اللى جرى ..
وخلاه فجأة ينمحى من كتب التاريح لعشرات السنين
 الواد كان حلو وجميل
وبيسمع الكلام وشاطر ونبيه
ومحمد على مبيقلعوش من رجله
وبيقول عليه ولدى وحبيبى
ايه اللى حصل يا عيال ؟؟



الحكاية انه زمااان شوية صغننة كدا

الناس ف اليونان عملت ثورة على السلطان العثمانى
قوم هوه اتقمص وشال ف نفيسوياته
وبعت لمحمد على يساعده بجيش
قوم الحاج محمد مكدبش خبر
ولم العسكر بتوعه وطلع بيهم ع اليونان
وقمع ف الثورة دى لحد ما جاب اجلها
فالسلطان انشكح منه ايما انشكاح
وبعدين حاب يهاديه فأداله جزيرة كريت 
حاجة كدا على ما قسم صغننة محمد يمزمز فيها
وينبسط شوية والنبى قبل الهدية


 
 
محمد على طبعا انبسط وخد الجزيرة تحت باطه
وحط فيها حامية من رجالته
وقعد يمص ف دمها زى ما بيمص ف دم أى حاجة
تقع تحت ايده
حلو الكلام ؟


سنة 1833 محمد على ركب اللنش
وراح يبص ع الجزيرة ويرتب شوية امور فيها
كان لسه اصلا مطلع قانون احتكارات تجارية جديد
قوم ايه ؟؟
قالك اما اروح اطبقه هناك
وبالمرة افرض عليهم مادة تكتيب العسكرية
يعنى بالبلدى كدا هيجندهم ف الجيش
وراح محمد ومعاه عثمان حبيبه
وقعد يؤمر وينهى ويقوله تعمل كذا ومتعملش كذا
وتجندلى الفلاحين وتفرض مش عارف ايه
المهم قاله عاوزك تطلعى ميتين ام الجزيرة
وبعدين سافر على مصر
وعثمان قعد عشان ينفذ الاوامر
وبعدين الخبر اتسرب لأهل الجزيرة
فالكريتين اتجننوا يعنى ايه يجندنا ف الجيش
ونموت عشان مين وكمان ضرايب الخ الخ
راحوا الفلاحين لامين السلاح اللى يقدروا عليه

من كل حتة وفجأة الحامية المصرية ف كريت
لقت ييجى 6 الاف فلاح مسلح جايين عليهم 
#البسسسس


حاكم الجزيرة المتعين من قبل السلطان العثمانى
كان اسمه مصطفى باشا الأرناؤطى
لما لقى الدنيا ولعت بعت لعثمان يقوله الحقنى
عثمان فعلا لحقه
وراح بجند من الاسطول بتاعه
وكانت الحامية المصرية قاعدة جوا الثكنات
ومخرجتش منعا للأشتباك بينهم وبين اهل كريت الثايرين
عثمان تدخل ف النص
ونجح ف اخماد الثورة وقعد يتكلم مع قيادات الثوار
اللى بتاع 30 منهم كانوا بالفعل وقعوا تحت الأسر
واتقبض عليهم من الجانب التانى 
قوم ايييه
الموقف كدا هدى نسيبا وبقينا ف هدنة
وفيه مطالب من طرف اللى هوه اهل الجزيرة
بأن المقبوض عليهم يخرجوا 
مقابل التفاهم مع السلطة الحاكمة


ونشوف ايه نظام التجنيد والضرايب وخلافه
عثمان قال قشطة
والثوار المقبوض عليهم دول ف رقبتى ومتخافوش
وراح باعت لمحمد على مرسال بما حدث 
طبعا الناس اللى متابعنى مفيش داعى اسالهم السؤال دا
اللى هوه تفتكروا يا ولاد محمد على كان رده ايه 
على عثمان لما سأله
هل نعفى عن الثوار وكدا !


-Ahmed Rageh @Ahmed_Rageh101
 فراح محمد علي قاله انفخهملي كلهم



زى ما راجح قال بالحرف ... كدا
قال انفخهمولى كلهم ومتسيبش حد صاحى
عشان الاوغاد ميجرؤش يعملوها تانى
راجح شطورة ومذاكر
:))



طبعا عثمان معجبوش الكلام دا .. !
وقاله ياباشا انا بعد اذنك اديتهم كلمة
وكدا هتطلعنى عيل وميرضكش وعشام خاطرى
والقصص دى
وطبعا محمد على نفضله


وأصر الباشا على رأيه وقاله تقتلهم 
فما كان من عثمان الا انه عمل حركة معلمة الصراحة
وشابوه عليها جداااااا
ايه بقى ؟
انتوا عارفين ومش هقولكم اللى زى محمد على دا
مينفعش يتقاله لأ
ولا يتوقف ف وشه كدا
عثمان طبعا مرضيش يبقى عيل
وصعب عليه محمد على ينزل كلامه


 
ف التوقيت دا محمد على اصلا
كان ابتدى يتجنن فعليا
واعلن استقلال مصر عن الدولة العثمانية
وكان بيناطح ف الباب العالى
والظاهر عثمان فهم التيتة



وكان عارف انه رغم ضعف العثمانلية
الا انهم هيعرفوا يطرموا انياب محمد على ف النهاية
وينزعوا عنه كل سمه
قوم ايه الواد مرجعشى مصر طبعا
وكمان منفذشى كلام محمد على 
وبليل وتحت جناح الظلام خد بعضه
وسافر ع القسطنطينية
ودخل ف معية الباب العالى
ومن هنااااااااااك 



 
بعت جواب ... لمحمد على ؟
لأ انقح
دا بعت جواب لبوغوص باشا
ودا كان زى وزير خارجية مصر وقتها 
وقاله انا استعفيت من الوظيفة عند الباشا
وببلغك انتا بذلك وشكرا 
وهوبا اتهزأت يا محمد يا سنكفولة
الواد مستعناش يبعبرك ويبعتلك انتا
هع هع
مش بس كدا
الصراحة هوه لعبها بالأصول
مش محمد على خلى مصر مستقلة
اهو الجدع بعت لوزير خارجيتك بصفته مواطن
تبع دولة تانية وعداه العيب وقزح 
وبس كدا




حد يقولى لازم محمد على بعد ما جاله نوبة استبحس
 وقعد ياكل ف مشابك الغسيل
قرر ينتقم من عثمان وباعتله حد يقتله وكدا .. ؟
اقولكم لأ محصلشى
اللى حصل ان عثمان بعد ما رجع تركيا
هيا سنة واحدة ومرض بالطاعون 
ومات وكدا حكايته خلصت 
لكن محمد على السوسة منتهاش من انتقامه 



واصدر قرار شفهى كدا بمنع ذكر اسمه من كل حاجة
ولحد وقت مش بعيد قوى
اسمه كان لا يذكر الا ف الحديث عن معارك الشام
وحروب ابراهيم باشا وبقلة اكتراث 
رغم انه كان ادميرال كبير 



اما جهوده العلمية بقى فالمؤلف (جمال الدين الشيال)
بيقول ان اغلب الكتب الحربية محدش لقاها
وكأنها فص ملح وداب
وبس عناوينها اللى فضلت




وفيه كتب انكتبت
ومفيش جنبها اسم مؤلفها ولا مترجمها
وهوه بيرجح ان دى كتب عثمان نور الدين
بس اتشال اسمه عمدا
ومع سبق الإرصدة والترصدة !


وفيه ناس بتقول ان عثمان نور الدين عمل خطأ
 ف احدى المعارك وخاف من عقاب محمد على
وانتهز فرصة الخلاف بتاع كريت وفلسع
ودى بجملة التشهير بيه
لأنه لو غلط وخايف الراجل خده معاه كريت 
ولاجاش ناحيته وعادى فين الغضب دا ؟



وفيه ناس تانية بتقول ان عثمان كان ذكى كفاية
عشان يعرف ان محمد على ابتدى يخرف
ويقف قصاد الريح وان النهاية وشيكة
فقرر ينط م المركب وسخصيا انى ارجح هذا



ف النهاية الراجل أى كانت افعاله وصفاته
هوه الألفة
ومينفعش لا نذكر جهده واسمه ومكانه 
وحتى لو كان مش عاجبنا عمل ايه
وحد يسالنى يا فطومة ايه رأيك فيه ؟



الصراحة رأيى يمكن يبقى متحيز
بس انا عموما عندى قدرة رهيبة
ف عدم التعاطف مع أى حد مش مصرى احتلنا 
وبشوفهم جميعا احتلال بس بدرجات واشكال يعنى
الا من رحم ربى وحكمنا بقلب سليم
انما محمد على معملش حاجة عشان يعلى مكانة مصر
قد ما عمل عشان يعلى مكانته هوه وبس
مصر دى جت ف السكة كدا 
عثمان نفس الحكاية عمل ما عمله عشان سيده


وانا صعب عليا اتعاطف مع حد بيتصرف صح
عشان حاجة غلط .. مهما كان بتاع علم او مبادىء
يعنى ببساطة كل انجازات عثمان لتحسين حالة الجيش
كلها صبت ف نهر انتصارات اغلبها كان غلط
يعنى عسكر محمد على
كانوا بيخمدوا الثورات ف مصر
بالقتل والدبح
ووضع الفلاحين ف فوهات المدافع احيانا !!
لذا هذا الجيش اللى كان بيقتل ف اهل بلدى
بحجة الاستقرار والامن ميلزمنيش
واللى طوره وحدثه وخلاه يتفرعن علي اهل بلدى
برضو ميلزمنيش



انما دايما احتكم للآية الجميلة
اللى بتقول ان الزبد يذهب جفاء
واللى بينفع فقط هو ما يمكث ف الأرض
وكل حد عمل حاجة كويسة للبلد دى قعدت 
اما الشر فرحل بعيدا معاه
ودى احدى
لأ دى يمكن اكتر حاجة جميلة ف البلد دى ...


اقول الملاحظات


 1) وقبل كل حاجة دى اول مرة
اشوف حد يحرق دم محمد على
وبحركة تفنن انا استكيفت منه قوى قوى قوى


2) قالك الكتب الحربية كانت بتترجم للتركية
غير باقى العلوم ودا لييييه ؟
عشان طبعا العلم دا
كان محظور ع المصريين الفلاهين ادب سيس
واحنا ولاد البطة السودة بقى
منتعلمش الحاجات الويحشة دى
وتفضل بس ف ايد الرتب الكبيرة التركية الحلوة
اللى مبتزعلناش دى وتهج ع القسطنطينية
وتخلي قفانا يطلع صهد وكدا 
 :))




3) الكتاب ممتع جدا يا جماعة

وفيه جزء خاص بطريقة الترجمة
وازاى كانوا بيختاروا عناوين للكتب فيها سجع
عشان سلو بلدنا كان كدا زى

القول الصريح فى علم التشريح
الروضة الزهرية فى الهندسة الوصفية
رمز السر المصون فى تطبيق الهندسة على الفنون
منتهى الاغراض فى علم الامراض
......
مسخرة والله

 :))




4) لما شفت الصورة دى بعد ما قريت 
حكاية الراجل دا فكرت كدا 
سليمان الفرنساوى واقف اهو 
جنب محمد على علطول 
طب ... مش يمكن عثمان 
يكون واحد من اللى واقفين دول 
واحنا بس عشان منعرفوش ... 
مع انه ساعتها اكيد كان مشهور آآآآآآآآوى



واخيرا ..
عثمان نور الدين كان الألفة
رغم أى حاجة وكل حاجة
ودايما افتكروا النصيحة دى
ولا تنسوهاش يا جماعة
محدش يفكر يزعل محمد على ابدا
الا لو كان برا البلد ومعاة تذكرة لتركيا ... وشكرا 
وتوتة توتة خلصنا الحدوتة
وتصبحوا على ألف خير
 
 
--------------------------------


-HeBa SalaH @HeBa_S88
طول الحكاية مستغربة ازاى مهم كدة
وماسمعناش عنه قبل كدة

 
 الكبيرة قوي @__Marwa____
الدم التركي يحن


-Mohamed Ali @AliJunior16
محمد على ضرب المنوفيه بالمدافع



-Ahmed Rageh @Ahmed_Rageh101

 اللغة العربية وماتبصليش بعين ردية بص للي اندفع فيا


-Cindy @CindyJanabi
 هي الزقات اللي مضيعتنا


-Mohamed Ali @AliJunior16
الراجل كان بيظبط البلد لنفسه
كان نزيه عايز يعد فى حاجه نضيفه


-Ahmed Rageh @Ahmed_Rageh101
 شغال وزير خارجية اهو كمان على كده
كان بياخد اوفر تايم ولا لا

-shayat @hayatankh
 ايوه الكتب كلها بتجمع ع كده ان السوادانيين
الى شافهم محمد على اقوياء مش بيبقوا بنفس القوه
لما غيروا المناخ بتاعهم وجم مصر



بيكاتشو الناجي @General_Pikachu
 صدقي صبحي

 
محمد قنديل @M_Qandeil
 زي وزير الدفاع حالياً لأنه معاه
منصب القائد العام للقوات المسلحة




الثلاثاء، 29 يوليو 2014

أبو نواس : الحب - استغفر الله - و أشياء أخرى








طيب بادىء ذى بدء وحشتونى جداااااا دا اولا 
ثانيا بما انها عودة بعد انقطاع
فـ هنبدأ بحدوتة خفيفة كدا كلها هلس وتهريج
ومش تاريخ تقيل يعنى

 

حكاية النهاردة قصة من قصص الحب الكئيبة 
.. بين شاعر مدهول كالعادة وحبيبته 
بس النوبة دى غير كل مرة 
يعنى جرت العادة انه .. الحبيب والحبيبة 
اما بيموتوا قهرا او حد فيهم
الفراق بيعذبه 
انما المرة دى مفيش فيها موت ولا قهرة ولا حاجة 
زائد انها فوق تمآشر
يعنى البنات تودى وشها الناحية التانية لما اقول 
والولاد يختشوا وبلاش أسئلة دقيقة ف المحتوى
الجانبى المنبثق عن معاميق المواضيع والنبى


 

حدوتة النهاردة عن واحد من اشهر شعراء العربية
وتأتيكم برعاية العرب
والرجولة والنخوة والتقاليد  

والمذكور اتولد ف مدينة اسمها الاهواز ف إيران 
من أب دمشقى وام فارسية
وكان اسمه الأصلى "الحسن بن هانىء"
لكن احنا هنعرفه بعدييييين 
بأسم أبو نواس وبيقولوا ان هوه بنفسه
الشاعر يعنى
اللى اختار لنفسه الأسم دا

 


ومع ان اسمه الاصلى احلى
انما ابو نواس الأشهر وهناديه بيه بقى طول القصة
المهم أبو النواويس ... ابوه مات
وهوه ابن 7 تمن سنين كدا وامه احتاست فيه
واتنقلوا من الاهواز للبصرة ف العراق 
عشان يعرفوا يعيشوا
وف البصرة ابو نواس نزل اشتغل ف السوق
عند واحد عطار يساعده ف البيع والشرا
الكلام دا ايام الدولة العباسية يا عيال
والبصرة والكوفة وبغداد وكل ما حولها
كانت هيا المدن اللافتة ف العلم والتجارة وغيرها 
قوم ايه ؟


 
ابو نواس من صغره حفظ القرآن
واتعلم على ايد شيوخ وناس كبار
وحفظ من الحديث واتفقه وزاد عليهم حبه للشعر
واللى برع فيه وف حفظ كلاسكياته
واتنقل من البصرة للكوفة وبعدها راح على بغداد
وعلى سن الـ 30 كان من أبرع شعراء عصره
زائد المواهب الآخرى لدرجة ان الناس قالت عنه 
ومش أى ناس
دا الامام الشافعى شخصيا هوه اللى بيقول :
" لولا مجون أبي نواس لأخذت العلم عنه .. "
وشعراء زى البحترى اشادوا بيه
وقالوا انه ابرع شعراء زمنه 
وناس كتير من الأسماء الكبيرة اللى حفظتله مقامه
وقدره وبراعته وموهبته الخ الخ
بس
يا خوساااااااارة الحلو ميكملشى
وقولولى ليه يا شوشو أقولكم عشان
الباشا كان زى ما قال الشافعى كدا ف وصفه له
ماجن يعنى بالبلدى كدا
منيحرف

ومش أى انيحراف .. يعنى لو  ماشى شمال بس
كنا نقول معلشى ابننا
وربنا يهديه وبكرة نجوزه ونلمه 
انما دا كان ماشى شمال الشمال من اقصى الخريطة
وحاجة مسخرة ع الآخر يا ثامح

 
حد يقول بتاع يكونش بتاع بنات ؟
او بتاع خمرة وكوباية ؟
او بتاع كفر
وزندقة والعياذ بالله ؟
طب ايه ؟؟
طب ماله الولا ؟؟
الحقيقة انه كان تقريبا كل ما سبق 
بس زودوا عليه
انه كان بتاع حاجة ولامؤاخذة م اللى لما بيطلبها
حد من حد 
بيتقاله




حد يقولى دى وزة شيطان ولا الناس بتطلع عليه اشاعات
يا شهر متبقيش ويحشة وضميرك اسود
اقولكو كان على عينى والنبى مش انا اللى بقول
دا هوه
هوه اللى بذات نفسيته اللى كان بيتفشخر بهذا
قولا وشعرا وفعلا .. وعادى كدا
ومحدش لا ضغط عليه
ولا قاله أى نيلة ف أى نيلة
طب حد يسألنى بقى
الا درسولنا زمان ف العربى والتاريخ والذى منه
ان العرب كانوا اهل نخوة وشهامة وتقاليد وابصر ايه
فهل كان اهل ابو نواس موافقين ع المسخرة دى ؟؟
أرد واقولكم الصراحة .. رجالة العيلة عنده
لما عرفوا بالنصيبة دى جوزوه
والواد بعد الجواز بكام يوم ساب عروسته وطفش
وراح للمؤاخذة الأصدقاااء
وبعدين طلق البنية البائسة
وعاث فسادا براحته
وبسبب موهبته وخفة دمه واشعاره ذاع صيته
لحد ما وصل لبلاط الخلافة العباسية شخصياااا



الجاحظ بيوصفه قائلا : 
"كان نحيفاً، في حلقه بحّة لا تفارقه
وكان إذا دخل حلقة الدرس، التفت القوم إلى حسنه
وحداثة سنّة وذكائه وقوة تحصيله"


وابو الفرج الاصفهانى بينقل وصف هيئته وشكله
قائلاً : 
أبو نواس حسنَ الوجه، رقيق اللون، أبيض،
حلو الشمائل
حسن الجسم وكان ألثغ بالرّاء
قصره الواد كان روش والدغ وخفيف الدم 

وبأختصار قمر .. 
يعنى شبه حسين فهمى وخلصونا
هه


 

المهم ان ابو نواس اللى كان شاطر ف كل حاجة
علما ودراية وشعر وخفة دم وشكل وكله
كان بيتفاخر بمجونه واخلاقه النيلة
وبتوع الأدب والشعر ..
بيقولوا عليه من اقوى شعراء العرب
وقصايده اللى قربت ع الف
كانت قوية وبليغة وفصيحة .. وكمان فضيحة
لأن سعادته زى باقى الشعراء لما كانوا
بيحبوا 
وينفعلوا يروحوا رازعينا القصيدة اللى هيه 
وطبعا ابو نواس مخلاش ف نفسه أى حاجة
الا وكتبها لغاية ما اشتهرت قصايده ف الخمر
بالـ "الخمريات"


دع المساجد للعباد تسكنها 
وطف بنا حول خمار ليسقينا
ما قال ربك ويل للذين سكروا 
ولكن قال ويل للمصلينا 



اما قصايده ف حب الغلمان والشباب
فحرصااااااا على البنات اللى قاعدة
مش هغّوط قوى ف الفضايح 
و بس هحكى حكاية صغنونة كدا
عن شاب جميل شافه ابو نواس
واندلق

الشاب كان اسمه (جمال) وآل يعنى كانت ناقصة
المهم الولا كان جميل اسما وشكلا
وابو نواس شافه انغرم فيه
وراح باعتله شعر وغزل وحاجات كدا قلة حيا


جمال اول ما جاله المرسال بالأبيات
راح وكأنما عقربة قرصته والكهربا اشتغلت
وقعد يصرخ
ويهدد بالويل والثبور وعظائم الأمور
وقال للمرسال الآتى ..

"يا دعي يا شارب الخمر
والله لينزعنك نفسك يا ابن الزانية "

 احم احم طب
مجراش حاجة الجدع بيقولك لم نفسك
وملكش دعوة بيا وبيسلم ف السكة على ماما وكدا!


ابو نواس وصله الرد وراح رادد

قد يخضع الحر للغلام فما 
ينقص ذاك الخضوع من شرفه
فسب ما شئت سيدي أبدا 
هذا خضوعي له على سرفه


طيب .. ابو نواس مدلوق ع الآخر
والمرسال راح لجمال وقاله
سيدى باعتلك البيتين دولا .. فما هو ردك ؟
الصراحة .. جمال كان ذوق ذوق ذوق
راح رادد بـ وقال للغلام :


قل له : أترى خنجري هذا؟
وأخرجه من كمه..أبلغه عني أني والله قاتله به


ورجع المرسال لابو نواس بالرسالة الحادة دى 
قولا ونصلا قوم ابو النواويس يرد يقول ايه تفتكروا ؟؟؟
كلام ايه 
دا هيشعر يا عيال
ويقوووول


أوعدتني بالقتل من غير ما ... جرم وقلبي رهن كفيكا
يا مودعي بالقتل قد حالف ... الخنجر في قتلي يمينكا
يا من دعا قلبي إلى حبه ...... فقلت لبيك وسعديكا
ماخنجر تسلب روحي به .... أقتل من تفتير عينيكا


وبس كدا .. !
 

محدش ينفعل ويزعل ولا يحرق دمه ولا حااااجة
الحقيقة ان جمال كان هتجيله جلطة
وفضح ابو نواس ف كل حتة 
والموضوع وصل للخليفة العباسى
وهارون الرشيد وقتها لما سمع الأبيات
كان هيجيله الفالج هوه كمان
وامر بالقبض على ابو نواس واحضاره حيا او ميتاً
وطبعا ابو نواس فص ملح وداب


وهرب لحد ما الموضوع هدى وهمد
والرشيد عفا عنه بتوصيات ومحلسة من المحبين
وما اكثرهم
والظاهر المسألة وقتها كانت سبهللة ع الآخر .. !!!


بس حد يقولى العالم دى كانت متسابة كدا
وهيا بتجاهر بالمجون والمساخر دى
عادى .. ؟
اقولكم لأ وآه ف ذات الوقت
لأن ابو نواس اتسجن كام مرة
بس اسباب دخوله السجن كانت اسباب سياسية
ف المقام الاول
يعنى اتسجن بتهمة الشعوبية والزندقة
ولأنه زعل خليفة ومدخ اخوه .. حاجات عبيطة كدا
البرامكة كانت ليهم سلطة ونفوذ ف البلاط العباسى
وابو نواس بسبب اصوله الفارسية من ناحية الأم
كان ميال ليهم وبيمدح ف رجالهم
قوم اييييه ؟؟
لما الحال مال بيهم وحصلت نكبة البرامكة 
وزالت سطوتهم 
بقى أى حد تبعهم مغضوب
عليه خصوصا لو جهر بأعجابه بيهم
وزى دلوقتى لما تقول انك اخوان مثلا
تلاقى الفلول هجموا عليك وافترسوك
حتى لو كنت معملتش حاجة
ولا ليك أى حاجة بس كدا طالما مولانا الذى ف القصر
غضبان عليك يبقى خلاص

 

القصد ان ابو نواس طفش على مصر فترة
وجالنا هنا يا عيال وقعد شوية
وكان قريب من نايب الخليفة وقتها
وكان اسمه الخصيب
وبعدين الراجل مات
فرجع ابو نواس تانى ع العراق 
وفضل بقى عايش حياته وانحرافه واشعاره
النيلة ف الخمر والشوباب
لحد ما جت غزالة عربية وقلبتلنا الليلة
حد يقولى ازاى كدا .. ؟
اقولكم وماله مهو الجدع ف بداية حياته اتجوز
وخلف من مراته اللى هجرها وطلقها دى .. بنت
وعادى يعنى ..
بس لولاش المزاج هوه اللى انحرف
وراح ناحية الغلمان .. 
وعادى عاش حياته كدا
لحد ما قابل الموزموزيل جنان
.. مين دى يا شهر وايه حكايتها اللى قلبتله كيانه
او بمعنى أدق عدلتله كيانه ... ؟!!


الآنسة جنان كانت جارية بس مش أى جارية
دى جارية فرز أول
وحاجة سبيشال كدا من على وش القفص
جارية خمس نجوم
كما قال عنها الأصفهانى ف كتاب الأغانى

"كانت جنان حلوة، جميلة المنظر، بديعة الحسن
 أديبة عاقلة ظريفة، تعرف الأخبار وتروي الأشعار
وكانت مقدودة حسنة القوام "

دا عم فرج بيقول

 

وكانت من بيت احد العلماء من عيلة كبيرة وشغلانة 
يعنى كانت جارية صحيح
لكن كانت بصفات الحرة
المهم ابو نواس كان مرة بيتسنكح مع (اصحابه)
وبعدين الظاهر المزمزايل كانت بتعدل ف خمارها
وبتشيل الطرحة من على وشها فبان كله
وكانت زى القمر
وابو نواس لأول مرة من زمن 
يتشعلق ف جمال انثوى !!



بس وعنها يا معلم والواد حب على روحه
وقعد يقول ف أشعار وحكايته وصلت لكل حتة
وبقوا يضربوا كف على كف
بس مستغربوش قوى لأن جنان كانت تستاهل
زائد جمالها الشكلى
وموهبتها وبلاغتها وعقلها
والبيت الأصيل اللى عايشة
فيه كانت كمان ورعة ومتدينة واخلاقها مشهود لها
يعنى كانت ست البنات فعلا
والظاهر انها فعلا كان سرها باتع
لأنها لما قررت تروح تحج
وابو نواس سمع بالحكاية دى قرر يسافر هوه كمان يحج
عشان يبقى معاها ف مكان واحد !!!


الناس طبعا صابها ذهول
ازاى الماجن الزنديق اللى مبيركعاش
واخلاقه الهباب عاوز يروح يحج ؟
والأصفهانى بيقول نصا :
إن أبا نواس لم يصدق في حب امرأة غيرها
 


وبس دخلنا ف حوار غادة عادل ف الباشا تلميذ
ويا بسيونى دنا اتغيرت عشانك
المهم ان كل الروايات والأشعار والحب المدلدق
كان واضح من ناحية ابو نواس
طب البنية بقى ايه نظامها ؟؟
يعنى ردت ع المحبة بمحبة
ولا بقُلة على نافوخ الأفندى الواقف تحت المشربية
وبيعاكس يوماتى دا ومش عاوز ينكشح .. ؟!!!

الحقيقة ان جنان زى ما قولنا كانت متدينة
واخلاقها فوق الشبهات
وابو نواس سمعته كانت طين وهباب
زائد انى أرجح ودا الاكيد بقى انه محبتوش ..
يعنى لو كانت حبته كانت هتتغاضى
ولو ف الاول عن كل عيوبه
عشان القصة دى تكمل
لكن البت م الاول كانت قرفانة منه
وكرفته كرفة الكلاااااب
وهوه يقول ف أشعار ويتشحتف
وهيا تطنشه وف مرة حاول يكلمها وصدته
فصديقة ليها اتدخلت وقالتله ابقى مرسال بينكم
فجنان بعترت كرامتها
وقالتلها نصا كدا : مثل هذا الكلب تطمعينه في !
أىىىىىىىى
انتا اتهزأت قوى يا ابو النواويس مينفعش الكلام دا
البت كارهاك كارهاك يعنى !


الملخص وكعادة كل الشعراء
اول ما تجليهم لطشة الحب بتمسك الحمى ف جتتهم
لحد ما تاخد وقتها وتروح
او هما اللى يروحوا بسببها
قوم ايه ؟
قعد يحب فيها ويشعرررررر 
ويتقرب لسيدها ومعارفها يمكن يقدر يوصلها
وهيا تصده وتهزأ اللى جابوه واللى جايبين مراسيل منه
وترفض اى محاولات


حامِلُ الهَوى تَعِبُ ...... يَستَخِفُّهُ الطَرَبُ
إِن بَكى يُحَقُّ لَهُ ......... لَيسَ ما بِهِ لَعِبُ
تَضحَكينَ لاهِيَةً ......... وَالمُحِبُّ يَنتَحِبُ
تَعجَبينَ مِن سَقَمي .. صِحَّتي هِيَ العَجَبُ
كُلَّما اِنقَضى سَبَبٌ ... مِنكِ عادَ لي سَبَبُ

الأبيات دى غنتها فيروز يا عيال
:))
المهممممم
قعدنا كدا شوية هوه يحب وهيا تهزأ
لحد ما الموضوع استفحل
وسيدها صعب عليه ابو نواس وعذابه


وبعدين سألها تتجوزيه يا بنتى قالت لأ مش عاوزاه
راح مسفرها على بلد تانية بعيدة عشان يبعدها
عن ابو نواس اللى اتجنن زيادة
وحالته ساءت جدا
وبقى يمشى يسأل كل الناس عنها
ويتطقس عن مكانها واخبارها
لما العملية بقت ف النملية خالص
راح الحاج رايح لجاريته
وقالها اتجوزيه ليتجنن يا جنان 
ريحيه وخلصى أمنا



أيا مُلينَ الحديد لعبده داود
ألن فؤاد جنان لعاشق معمود
قد صارت النّفسُ منه بين الحشا والوريد
جنان جودي وإن غزّكِ الهوى أن تجودي


ومتفهموش ايه اللى حصل وجنان قلبها فعلا لان ..
وقررت توافق تتجوز ابو نواس لكن بشرط
طبعا كلنا عارفينه .. !
قالتله يبعد عن المشى البطال بتاعه
وملوش دعوة بالشباب ويوعدها انه هيكون
مخلص ليها والحاجات بتاعت زمان دى ينساها
دا كان شرطها الوحيد


طاه اهو كدا قشطة البت وافقت وقالت شرطها
وهتريح المهووس بيها اخيرا
بعد عذاب حد بقى يسألنى ويقولى
هل ابو نواس وافق ع الشرط ولا موافقشى ؟؟



هقولكم انا سعيدة انكم سألتونى السؤال دا
عشان المخسوف على عينه
وسنينه .. موافقشى طبعا 
وليه كدا ... ؟!!
عشان المثل المصرى الدارج اياه اللى بيقول
نهيتك ما انتهيتك والطبع فيك غالب
وديل الكلب لم ينعدل ولو علقوا فيه قالب
و.... مشوها ديل الكلب

وبس خلصت القصة عند كدا
الأنسة جنان متجوزتوش طبعا
والباشا كمل ف عبثه ومجونه
والجرى ورا الغلمان والخمرة لحد اواخر عمره
وبعدين يقال انه تاب واناب
والناس لقوا ف بيته اشعار فيه توبة 
وطلب مغفرة من ربنا عن كل ذنوبه
والجدع مات قبل ما يتم الستين
ولم يتزوج طبعا .. 
وكويس انه مات موتة ربنا يعنى
لأن واحد زميله برضو ف الشعر حكينا عنه زمان 
بشار بن برد
فاكرينه ؟
اتهموه بالشعوبية راخر والراجل اعترف
وقتلوه رجالة الخليفة وقتها


اللطيف بقى ان فيه بعض الباحثين بيقولوا
ان ابو نواس مكنش منحيرف ولا حاجة
وكل دى اوشاعات وكلام ملهوش عندك اثبات 
وآل هوه كان بيعمل كدا عشان يبعد عنه تهمة الشعوبية
وانه يعنى حب يوصل عن نفسه فكرة
انه بتاع كوباية وغلمان
وانه شخصية عابثة
وملهاش ف الكلام الكبير وبتاع
انما على مين الكلام دا ؟؟
دا الحاج كاتب قصايد بخط ايده وبأعترافاتهم يا ماما
كل حاجة بتفاصيل التفاصيل
والفاظ رهيبة الواد كان بايظ بايظ يعنى !


وكدا خلصت حكاية ابو نواس
 بس قبل ما أقول الملاحظات سريعا
يكفينى بس ان الاخ دا كتب بيت
من اجمل أبيات الشعر العربى ... بجد


دَعْ عَنْكَ لَوْمي فإنّ اللّوْمَ إغْرَاءُ 
ودَاوني بالّتي كانَتْ هيَ الدّاءُ 



والجدع من نوادره وخفة دمه
كان مرة ف بلاط الخليفة
والرشيد شافه ماسك ف ايده ازازة خمرة
فسأله بغضب ايه اللى ف ايدك دا .. ؟
رد ابو نواس بسرعة .. دى ازازة لبن يا مولانا !
الرشيد قاله .. هوه اللبن لونه احمر ؟
رد ابو نواس .. مهو لما شافك انكسف !


الرشيد قعد يضحك وعفا عنه
وفيه مواقف كتير مشابهة واضح انه كان بيفلت
من اغلبها منتصرا
وخرج من بعضها سجينا لسنة
او كام شهر ويعود لسيرته القديمة


واخيرا بقى الملااااااااااااحظات
 
1)
القصة دى اساسها فصل من كتاب . الحب
فى صدر الاسلام .. لأقبال بركة
والباقى من بعض المواقع ع النت


2)
العرب دول حاجة فشيخة قوى قوى
عندهم كم تناقضات اخلاقية رهيييب
يعنى الخلفاء بيتشدقوا بالدين وكدا
ومع ذلك بيقربوا منهم ناس منحرفة سلوكيا عادى !

3)
الناس نفسها كمان ..
يعنى ابو نواس كان ممكن قوى يوعد جنان
انه هيبطل بصبصة للغلمان
وبعد الجواز مينفذش وتضرب دماغها ف الحيط
لكن هوه مكدبشى عليها

4)
ابو نواس دا لوحده حكاية يعنى حفظه للقرآن
واللى وصله من علوم لدرجة
ان الشافعى يشيد بيه .
ومع ذلك كل دا مأثرش ف سلوكه ولا منعه من العبث

5)
ويختشى يعنى شايفين المجتمع كان منفتشح قوى زمان 
وعايشين والراجل داهس بيوت الكبرات
والخلفاء وبيتقدم للبنات وكدا
اومال مجتمع محافظ ايه ونيلة ايه بقى !

6)
الشعراء بتوع زمان مالهم مرضى نفسيين كدا
يعنى يفضل يجرى ورا البنت
اللى رفضاه لحد ما تنخ وتقبل 
وبعدين هوه اللى يهرب ويرفضها
انه صنف .. أوغااااااااد
7)
البت جنان دى زعقلها نبى
 وربنا نور بصيرتها عشان الواد دا كان هيسرق
شبكتها وعفشها وتدوخ ف المحاكم على ما تتطلق منه
فبركة انها متجوزوتش




8)
التمثال دا لأبو نواس ف حديقة قرب نهر دجلة 
ف العراق وممسكينه قدح الخمر
وكويس انهم محطوش جنبه تمثال لولد صغير 
عشان منقعدش نشرح البلاوى بقى 
واهو قضا أخف من قضا
واحنا خلصنا الحكاية
ونرجو الا نكون قد خدشنا حياء أى حد متابعنا وكدا
وشكراااا


---------------------------------

 
k@hassan19211
ابو نواس ايام الجامعه استعرت كتاب عنه
م مكتبة جامعة القاهره بصعوبه
لانه اعتبروه اباحى وللدراسات
ليه شعر غناه محمد فوزى "يقال" وجدوه تحت المخده
يعلن توبته..عموما فعلا كان من اعظم شعراء عصره




مرحب يا سي عيد!! @nohabakla
  نخوة و شهامة إيه بقى؟
ما أحنا متفقين من زمان انه ده كله
كان نخع و شغل تحلية بضاعة منيلة بنيلة


الكبيرة قوي @__Marwa____
احيه دي هبله..ماكنش عندهم ثقافه جنسيه زمان 
:-D ..ده ماينفعش :-D


  1.   HODA EL MASRY@ELMASRYHODA 
     في ناس اتهموا أحمد شوقي بالانحراف برضه لمجرد انه كان مسمي. بيته كرمة ابن هانئ

-shayat @hayatankh
  هى الكسبانه


مرحب يا سي عيد!! @nohabakla
يمكن دي الميزة الوحيدة اللي فيه في قصته معاهإ
مغشهاش... بس للأسف كانت أمانته في حاجة
متنفعش أصلا... يا ريته كان وعد يحاول


-Ahmed Rageh @Ahmed_Rageh101
محافظ الجيزة

الشعوبية دى تهمة التحيز لكل ما هو غير عربى
 زى التفاخر بالفرس وحضارتهم
وتحقير شأن وشخصيات تنتمى للحضارة العربية ..
كانت تهمة منتشرة وقتها


جَرّ شَكَّلْ ♊️ @Hameess
لا ده كان عادى جدا وقتها وكان فى سوق العبيد
اى حد يشترى
غلام لمزاجه قشطه جدا


وانا بدور ف اشعار ابو النواس اكتشفت اسماء
لشعراء كبار برضو فيهم الخصلة المهببة دى
حاجة عجيبة قوى !!
وشهرزاد مزبهلة زبهللة التنين
فيه قصص كتير لما بحضرلها واجى احكيها
بقول الحمدلله اننا
اتولدنا ف الأيام دى بجد

@neversaydiee 
اه يا روشا شفتى البراءة اللى احنا فيها دحنا ملايكة
والنبى جنب العالم دى ... !

-Rasha @neversaydiee
دي اول حاجة جات في دماغي
شاف البنية في الشارع عادي
وبيبعتوا مراسيل لبعض و الحياة زبادي خلاط :))

@__Marwa____ @Hameess 
ايوه انا ف الحاجات دى بالذات عنصرية وافتخر :)

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "