الأقصـــر فى باريـــس : رحـــــلة المســــلة ...... (1)

حكاية النهاردة عن حتة أثر
من الحجر
سافر من مصر لفرنسا

والليلة هنقول كل حاجة عن الرحلة دى
اللى كتبها روبرت سوليه 

ف كتابه الممتع 
الرحلة الكبرى للمسلة

 ترجمة : زينب الكردى
و من الهيئة المصرية العامة للكتاب
بـ 13 جنيه بس ويا بلاااش ! 

الكتاب مليان تفاصيل يا عيال ولا اجمع وأشمل
 هحاول اختصرها قدر الممكن
لكن الحدوتة هتكون طويلة من جزءين

واقروا الكتاب .. هتنبسطوا 

عم سوليه يبدأ سرده
بإنه ازاى الفرنساوية والأنجليز والغرب عموما
بدأ يهتم بالمصريات بعد
كتاب وصف مصر
اللى بيّن الكنوز المركونة لمئات السنين

وشرح ازاى كمان بعد رحيل الحملة عن مصر
 بقى فيه تنافس بين الخصمين اللدودين
 فرنسا وانجلترا على نهب أثار مصر
وبإستماتة
هتستمر لعقود جاية 

وازاى بقى فيه هوس بمصر وأثار مصر
 ورغبة ف ضم اثارها لمتاحفهم وبأى شكل
سواء كان شرعى او من تحت ستار
قوم ايه ؟ 

من ضمن الآثار.. المسلة
وبدون خوض ف تفاصيل لغوية كتيييير
الناس العالمين بالآثار
بيوصفوها بإنها
عبارة عن منشور من قطعة واحدة من الحجر

تميل الى الضيق قليلا
من القاعدة الى القمة
وينتهى اعلاها المربع بـ "هُريم"
تصغير الهرم يعنى

وبيقولوا ان اسمها اشتق من الكلمة اليونانية
 OBELOS بمعنى سيخ
 OBELISKOS يعنى سيخ صغير لشى اللحم
دا اللفظ بتاع الاسكندرانية 
اللى اطلقوه ع المسلة زمان !

طب أحجامها يا شهرو ؟؟
والله تتراوح ف الطول والارتفاع
من كام متر لحد ما توصل لقرب الـ 30 احيانا
قطع كبيرة وضخمة يعنى
طاه بيعملوا بيها ايه المسلات دى 
يا شهروزة ؟؟
والله يا ولاد
 اختلفت الاقاويل والتفاسير
فيه اللى بيقول دا مجرد حجر جنائزى
تكريم يعنى للموتى العظام

وفيه ناس بتقول حجر تقربى للآله
عشان كدا كان قرب المعابد
وناس شطحت وقالت دا رمز لامؤاخذة جنسى
وناس راحت منها خالص
 وقالت دى رمز لاخذ الطاقة !

يعنى آل ايه المسلة بأرتفاعها ورأسها المدبب
بتاخد الطاقة من الشمس وتحفظها
وبعدين ترجعها تانى للمريض صباع كفتة
يتغذى عليه ... حاجة زى كدا

أى كان يعنى
أهو المسلة أى كان وظيفتها والغرض منها
فكانت بتتنحت من قطعة واحدة صد رد كدا
مش لسه هنحط قطع صغننة فوق بعضها وبتاع
ليه ؟؟

قالولك يا سيدى عشان اجدادنا 
كانوا ناس كُمل ومحترمين والله
ميحبوش يحطوا أيدهم ف شغل تافه
كانوا بيحبوا الاحجام الكبيرة 
ومولعين دايما بالتحدى والتفوق على روحهم

فكانوا عادة بيختاروا نوع حجر
 وغالبا من الجرانيت وهوه نايم ع الأرض
 ينحتوا المسلة لحد ما تبقى
وكأنها ف حوض كدا
حلو ؟

بعدين تتزحزح وتترفع من مطرحها 
بروافع من الخشب 
وتتسحب على أرض زلقة
مليانة طين لحد النيل
وتتحط ع المركب لمطرح ما ناويين يحطوها

اما اقامتها منتصبة ع الأرض
فكان بيتم بطريقة مخزن الرمال
 زى ما مبين ف الصورة اعلاه

واللطيف ان البعض زمان 
كان بيخلط بين المسلة والهرم 

يعنى ف بعض الرسومات 
تلاقى الأهرامات مدببة وشبه المسلة كدا 
بينما ف الحقيقة هى ليست كذلك بالمرة .. ! 

القصد .. 
بطلة حكاية الليلة هى مسلة الأقصر
 اللى سابت مكانها على يمين المعبد
اللى بناه رمسيس التانى زماااااااااان قوى

وآل الحاج رمسو بنى المعبد
على شرف باباه آمون رع
وحط المسلتين دول ف المدخل
من ييجى بتاع 30 قرن مضت كدا

وقعدوا المسلتين
 اخوات واصحاب وحبايب
 قرون وقرون لحد ماجه المخسوف بونابرته
وغزا مصر
وبعدين مشيت الحملة بعد 3 سنين

والحملة اصلا ماشية من مصر شايلة ومحمّلة
لكن تعملوا ايه ف الطمع
بيقولوا نابليون ملحقش
ياخد كل اللى نفسه فيه #يانضرى

أصلهم اخدوا علقة موت
من الاسطول العنجليزى ف معركة ابو قير
قوم المراكب مأسعفتهمش ف النهب كفاية يعنى
 يا حرااام 
بيتعبوا المحتلين دول والنيعمة

القصد
نابليون كان ف نيته ياخد مسلة واحدة معاه
 ع الأقل
 وكماااان كان عاوز ياخد عامود السوارى .. !
 بس الظروف منعته 

لكن فضل الحلم يرواده أل
عشان كان عاوز رمز لأنتصارته
زى ما قيصر عمل
 وكان عاوز يحط الرمز دا كنصب تذكارى
يمجد البطولة والانتصار الخ الخ

وقال نصاً 
" ان المسلات وعمود بومبى
سوف تتبعنى الى عاصمة اروبا الثقافية 
ليبلغوها اننى كنت فى هذا المكان
الذى سبق ان تواجد فيها الأسكندر والقيصر"

بس مؤقتا هيتعمل تمثال
وجنبه مسلة عبيطة كدا
والحلم يتوارى مؤقتا نظرا للأضطرابات
 اللى كانت ف فرنسا وقعدت شوية 

بعد زمن .. هييجى شامبليون مصر
المولع بيها وبآثارها من قبل مايشوفها
واللى هيفك رموز هيروغليفيتها
بعد مدة بسيطة

شيمبو لما يشوف الآثار اللى كان بيتفرج
عليها ف رسومات وصف مصر .. ع الطبيعة 
هينبهر ويتجدد حلم الحصول على مسلة
واقامتها ف باريس 

وقال بالنص

خصوصا بعد ما شاف الأقصر ومسلتيها
 "من الشرف القومى
الحصول على احدى مسلتى الأقصر " 

هوه الحقيقة ان الخطة كانت الحصول
على مسلة كليوباترا ف اسكندرية الشهيرة
بـ"ابر كليوباترا" لكن لما راح الأقصر غير رأيه 

لأنه شاف حالة مسلة اسكندرية بعافية
ونقوشتها أقل وكدا
وبعت لأخوه عشان يشوفوا الحكومة الفرنسية
 تتحرك ازاى عشان تجيب الآثر دا 
من مصر لفرنسا قبل ما حد تانى ياخده
نعممممم 
ايه الكلام دا
هيا المسلات دى أى حد معدى ياخدها
ولا ايه ... ؟؟؟

الحقيقة ان وقتها كان سنكفولة
هوه والى مصر
وانتوا عارفينه واطى واطى واطى
من هنا لآخر البلوجر ما يخلص مدوناته 

والراجل يا خويا
 كان مرشق مساعديه ورجالته
 ف كل حتت الآثار منعا لنهبها
بيحافظ عليها يا شوشو اهو ؟؟
متظليمهوش ؟!
لا دا كان بيحافظ عليها لحسن حد تانى
ينهبها غيره !

قوم حد كدا من آخر توتير يزعق
ويسألنى
 يا شهرو
 ازاى شامبيلون عالم الآثار المحترم
 يشجع على نهب آثر من بلد تانى ؟؟
اقولك اللى حصل كانله مبرراته

محمد على كان بيمرمط الآثار مرمطة
لا حد لها وكان بيفكك منها اجزاء
عشان يبنى مصانع له او قصور
بدل ما يتكلف ويمشى شوية لأقرب محجر !!!

زائد الاتجاه العام السائد والاعتقادات المتخلفة 
اللى بتعتبر الآثار دى مخلفات الكفرة 
وأصنام وتحطيمها مفيهوش ضرر .. وبالعكس

شيمبو بقى بدافع وطنى اولا
كان عاوز الآثار لبلاده
ثانيا كان عاوز يحافظ عليها من الاندثار
يعنى مسلتى كليوباترا واحدة فيهم
كانت متهدمة تماما

الراجل قالك ناخد بتوع المسلات
بدل ما يهدوها او يكسروها
وتنباع خردة ..
احنا اولى ناخدها نحافظ عليها ف متاحفنا
ويبقوا يقاااااابلونى لو اخدوها تانى 
#هع

شامبليون رغم انه اشتغل
 ونقّب تحت عين وموافقة محمد على
الا ان رأيه فيه كان حاجة مفخرة الصراحة
كان شايفه رجل عظييييم
ملوش هدف غير حلب مصر

وانهاكها من الصباح الى المساء
استعداد لذبحها يوما ما ... !
 اه دا كان رأيه
 قوم سى محمد هيستغل الفرصة
لما يجيله عرض من الحكومة الفرنسية 
وطلب بيقول .... 

يا عمو محمد بعد اذنك
فرنسا عاوزة مسلتى الأقصر
وأبرة كليوباترا اللى ف اسكنكرية
منكن ؟ 

و ف ابريل عام 1830 هيستقبل محمد على
رسول من فرنسا
وسنكفولة يقوله موافق على طلبكم
و3 مسلات وماله هيا كانت آثار أبونا ! 

وف زيارة المبعوث الفرنسى
قدم هدايا لمحمد على
عبارة اسلحة وادوات من الصينى السيفر
 ونسخة من وصف مصر
مهو عارفه دنِى ويبيع ابوه بأى حاجة 

بس اسلحة وصينى ونسخة من وصف مصر
مقابل 3 مسلات !
دى بيعة ابهة خالص
يا بلاش والله 

الانجليز لما يعرفوا بالصفقة دى
هيدخلوا ع الخط
ويحاولوا ياخدوا مسلتى الأقصر
 قنصل فرنسا يعرف
فيجرى على محمد على 
ويقوله اتفاقنا يا حااااج

سنكفولة يقوله متخافش
طعمة ليك يا باز افندى
بس احنا كنا عاوزين خشب للصوارى
بتاع السفن وياريت تبعتولنا شوية !!! 

قصره ...
هيحصل شوية قلق
 والملك هيضطر يتنازل عن العرش
وتتحول فرنسا من الملكية السابقة
الى الملكية الدستورية
 ويتجدد طلب المسلة بعد تهدئة الامور

محمد على يطمن القنصل بأن المسلة
اللى هتتاخد كانت لفرنسا وليس للملك
وخلى وزير خارجيته بوغوص يوسفيان
يكتب خطاب ما معناه
ما المسلات موجودة 
تعالوا شيلوها وخلصونا !!

شامبيلون وضح وبشدة ان المسلة
اللى عليها العين لأحضارها اولا
هى 
"تلك التى على اليمين عند دخول القصر"
 لأنها الاحسن حالا فنيا 

وبما انها شافها وعارفها
فرأيه هوه اللى هيتاخد بيه
بينما المسلة التانية
نبقى بعدين نشوف ايه حكايتها

وانتقلنا الى المرحلة التانية وهى

ازاى هنشيل وهننقل كتلة توزن 230 طن تقريبا
 من الاقصر لباريس
 من غير ما يجرالها حاجة ... ؟
المشكل الاول كان مهمة هندسية بحتة
 اما التانى فيخص النقل

طبعا شيمبو رفض اى اقتراح
 بتقطيع المسلة لقطع عشان يسهل نقلها
وقال ما الرومان زمان نقلوا عندهم مسلة
احنا نقدر نعملها
 ليه لأ ؟

وانتقلنا لشق الرحلة ..
وقرروا بناء سفينة او عوامة
او زى ما يشبه الصندل كدا
مهمتها التحرك بحمولة تعدى ال230 طن
 ف البحر والنهر

عرضها بالأشرعة لا يتعدى ال9 متر
مع الاخذ ف الاعتبار 
عرض اضيق اقواس الكبارى ف نهر السين
وطول الاشرعة لا يزيد بالمركبة عن 43 متر
عشان متغطسش

وبدأ صناعتها ف ترسانة ميناء طولون
وسموها الأقصر
وتم اختيار طاقم البحارة والقبطان وكل حاجة ...
مع تحديد ميزانية 

وقبطان السفينة اسمه ... فرينيناك
ولحماية الطاقم والحملة 
اتحط 2 منجنيق فوق مرصد مخصص 
لهذا الغرض على سطح السفينة
واضيف 50 بندقية و20 مسدس و30 سيف
 مع كمية ذخيرة
وهما صحيح هيبقوا ف حماية محمد على 
لكن برضو الاحتياط واجب  

اما مهندس العملية
فكان جان باتيست ابولينير لوبا
 APOLLINAIRE LEBAS 
ودا هنجيب سيرته كتييير قوى قدام

واللى هيختار الطاقم المسافر معاه
وعددهم : 121 نفر
اغلبهم بحارة من جنوب فرنسا
وحبة عسكريين على ما قسم مش كتير يعنى
 هيا مهمة فنية بحتة

والحكومة حطت ميزانية 300 الف فرانك
 واقر مجلس النواب مبلغ 200 الف اضافية
 بعد بناء الباخرة الأقصر
 اللى بلعت جزء من المبلغ الأول 

بس وتتحرك المركبة .. الأقصر
 من ميناء طولون ف فرنسا ف ابريل 1831
وتعدى البحر وتتبل
وتوصل لميناء الاسكندرية ف مايو
ف السريع سريع كدا 
وتقف شوية ف انتظار اوامر محمد على 
بالنزول للجنوب 

الجالية الفرنسية ف اسكندرية
 هتنشكح بوصول الأقصر وطاقهما
ويعملوا حفلات بالعبيط
استقبالا واحتفالا واستهبالا .. الخ الخ
وفجأتنننن يظهر براهيم

هيمة ابن محمد على اللى هيقرر يزور السفينة 
ويقابل قائدها ويسأله ف غلاسة
الا الجندى ف فرنسا بيكلفكم كام ؟؟
فيرنيناك يرد 

كل جندى يتكلف 500 فرنك
يعنى 5 مليون لجيش عدده 100 ألف
ابراهيم يقوله آه
احنا برضو الجندى بيكلف والدى نفس الرقم !
 #مش_هتكلم_بقى

و يمعن ابراهيم ف الغتاتة
ويقولهم انكم مش هتقدروا تزحزحوا المسلة دى
 من مطرحها وهتفشلوا
وتنتهى الليلة




ولوبا خلاص كدا 
عاوز يسافر الصعيد قبل الفيضان

ف يونيو تغادر الباخرة الاقصر اسكندرية
اللى كان انطباعات البحارة عنها مش حلوة
من ناحية النضافة والأبنية والسلوكيات
وكملوا الرحلة لرشيد

لوبا اخد شوية من الطاقم
 وسافر ع الأقصر
 عشان يعاين الآثر ويكسب وقت

تتحرك الباخرة لرشيد
واللى رأى البحارة فيها هيكون حلو
هيحبوها عن اسكندرية
هيعجبوا بالنوارس والبجع والجو الرومانتيكى 

ودلوقتى الرحلة انقسمت نصين
جزء قاعد بالباخرة ف رشيد
وجزء بيسافر للأقصر

الجزء المسافر هيوصل بولاق
ويعجبه المينا جدا

ويذهلوا من كم السفن والبضايع
والحركة بين بولاق والقاهرة
وكم القصور المبنية لمحمد على ورجاله !

 وطبعا عجبتهم الازبكية 
وقالوا فعلا دى فينيسيا الشرق

وحكوا ازاى واحد من اثرياء الأرمن ف بولاق 
عملهم حفلة
وبدأت المزيكا تشتغل
وفجأة ظهرت الرقاصات الفاتنات !!

وكانوا مبينين صدورهم بشكل ملفت
 والمشكلة مش ف كدا
 المشكلة انهم اول ما رقصوا
عملوا حركات متهتكة
خضت الفرنساوية بذات نفسهم جداااا !!

خصوصا لما بدأت رقصة النحلة

ودى بقى عبارة عن استكش راقص كدا
بين بنت وحبيبها
وفجأة آل ايه تدخل هدومها نحلة !
فالبنت المسكينة تعمل ايه ؟؟

تقعد تقلع ف هدومها حتة حتة
وتديها لحبيبها .. عشان تخرج النحلة
لحد ما يبقى تقريبا مش عليها أى حاجة تنلبس
 فن هادف 
اهو حد يعترض بقى !!!

القصد الناس هتاخد خضتها من الرقص وخلافه
 وبعدين يقابلوا مين يا شوشو ؟؟
سليمان الفرنساوى
 اكبر راس ف الجيش وقتها 

الراجل كان بيستقبل بلدياته ويكرمهم
وخدهم كمان يتفرجوا على شوية تدريبات للجيش
وابراهيم باشا يحضر حفلة على شرفهم
ويشرب شربانيا كمان
ويبطل غلاسة زى المرة اللى فاتت 

بعدين لوبا هيقابل محمد على ف القلعة 
وهناك هيتريقأ سنكفولة عليه 
اكمنه قصير والمسلة طويلة 
#بيقلش الخفيف
ويديله التمام ويقوله نصاً:
" اننى مهتم بذلك كما لو كان التنفيذ
يتم بأسمى ولمجدى 
وقد اعطيت الاوامر المشددة
حتى لا يرفض أى شىء للمساعدة
 ف تنفيذ هذا العمل الهائل "

ووعدهم بأن هيرافقهم حماية من رجالته

على مدار رحلتهم ف كل حتة يروحوها

مكون من 3 من المشاة بالجيش  

وخلاص هزرنا واحتفلنا وروقنا 
وخدنا الاوكيه من الراجل الكبير
نبتدى شغل بقى !!!
توصل الباخرة من رشيد لبولاق للقاهرة
ويضم نصين الطاقم على بعض 
وتتحرك نحو الجنوب يا ثاااامح 

وتعدى ع اهرامات الجيزة - ابو صير - سقارة
  دهشور - ميدوم

ويحاول البحارة يشتروا حاجات من الناس
 فالناس ترفض !!
 ليه يا ولاد كدا ؟؟

قالك عشان رجالة الوالى لو عرفوا
هياخدوا الفلوس مننا ويدفعونا ضرايب زيادة
فبلاش خالص احسن !!! 

ولوبا المهندس بيقول بنفسه :
"حال الزنوج فى مستعمراتنا أفضل بكثير
من مصير العرب المحبوسين فى الوادى الغنى 

الذى يرويه النيل 
والصحراء التى تحيط بهم
من الشرق والغرب تمثل بمثابة سجن كبير "
 بس كدا شكراااااا
دحنا صعبنا ع المحتل اللى جاى يسرقنا .. !!

وتكمل الأقصر ف سيرها الى أطفيح
 بنى سويف - جرجا
والنيل يبدأ يعرضّ زيادة
وعند المنيا تظهر مناظر جميلة كانت
 تستحق الرسم كما يصف لوبا

وف أسيوط يعملوا مناورات
عشان يعدوا الحتة دى بأقل مشاكل ممكنة
وبيحكوا انهم قابلوا والى مصر العليا
 شريف باشا
وكان قريب لمحمد على 
اللى اخدوله معاهم ف الزيارة ازازة نبيذ هدية

والراجل هيعملهم حفلة ابهة
وبعد ما يروحوا ع السفينة يطلع عليهم حرامية
 ينهبوهم وياخدوا كل النبيذ اللى ف المخزن
صدفة 
لأ صدفة شيكلها
اكيد مش مقصودة يا ولاد 
هع 
#شهروزة_الظنانة

لوبا بعد الحادثة دى هيبعت لفرنسا يقولوهم
 عاوزين فلوس عشان اتقلّبنا ف البلد دى
وتتحرك السفينة
وعند دندرة يصطادوا تمساح ويحنطوه

وخلاص قربنا ع الأقصر
وفاضل بتاع 20 كيلو والريح تعاكس
والباخرة مش نافع تتحرك يعملوا ايه ؟؟

 حد قال اقتراح مهبب 

قالك احنا نجر الباخرة بالدراع ..!
آه والله زى مبقولك كدا
وفعلا رجالة الوالى لموا الفلاحين بالكرابيج 
وربطوهم بالحبال حوالين وسطهم ..

وقفوهم صفوف حوالين الباخرة ف المية
ومع اشارة البدء يشدوا الحبال لقدام
كام نفر يا شهرو ؟؟
كانوا فوق الـ 300 واكتر
وقعدوا قد ايه ؟
 10 أيام 
:(

10 ايام عشان يعدوا 12 كيلو
 ولوبا بيحكى ازاى ان الفلاحين
كانوا لما بيطلبوا الراحة بينضربوا بالكرابيج
وبيقول ايه بسلامته كمان ...

"لا استطيع ان أروى كل ما تحملوه
من الاتراك الذين كانوا يحركونهم
فقلوبنا كانت تدمى من ذلك "
آحبيبى حونّين قوى... 

قصره .. وصلنا أخيرا الأقصر
حيث تقبع المسلة من 30 قرن
وحضر خاطفيها لأتمام المهمة
ولوبا بيوصف الأقصر بقى بالتفصيل الممل
.. المبكى

مبكى ليه يا شهر ؟
عشان وهوه بيقول عدد سكانها
دعيت ع الاتراك والعثمانلية الاوغاد
اللى خربوا مصر لحد ما بقت اطلال مدن
 الأقصر كانت منها

الأقصر وقتها كان عدد سكانها (800) نسمة ! 
يحكمهم 6 اتراك
وسكانها ف حالة فقر وبؤس ملحوظ
 ثياب رثة وعرايا .. كما تم وصفهم حرفيا

اهلها بيناموا مكدسين فى اكواخ سيئة
لازقين ف بعضهم من ضيق المطرح
ومختلطين بالحيوانات المنزلية
والبيت ارتفاعه 10 قدم 
بيدخله ضوء ضعيف

البيوت قليلة النوافذ والتهوية
ومبينة بجريد النخل والطوب اللبن
وسقفها مدهون بالصلصال اللين
والشوراع ضيقة ومليئة بالقمامة 
حاجة فقر ومرض وقرف القرف

والسكان كانوا منتشرين
حوالين المعابد والأطلال
 وكان طريق الكباش
هوه الشارع الرئيسى للأقصر وقتها 

ولفت انتباه الطاقم حاجات بقى
 اولا ان كان فيه فرن للتفريخ الصناعى
تبع محمد على بينتج 10 الاف بيضة ف المرة
وان التجنيد كان مطفش الرجالة 
لقرى مجاروة 
وان السخرة كانت هيا القانون

والسخرة دى كانت ع الكل
حتى الستات والأطفال
كلهم يتاخدوا لحفر الأرض
وتطهير الترع والقنوات
ومن غير ما ياخدوا فلوس ولا اكل

ولما كان الفرنساوية بيشتروا منهم حاجة
كانوا بيخبوا الفلوس فورا
خوفا من العقاب الأليم بتاع التراكوة
 واللى الطاقم شافه بعينه ف السوق و غيره

واهل الأقصر مكنوش مستوعبين
يعنى ايه الناس دى جاية تشيل مسلة وتمشى !!
وواخدينها هزار
 بس الحكاية هتقلب جد
وهيستوعبو الموضوع بالصورة الأليمة
 والموجعة

لما يعرفوا ان الفرنساوية اللطاف الحلوين
 بتوع الأنسانية قرروا يهدوا 30 بيت
عشان يفسحوا مجال
ويعملوا طريق فاضى
عشان يجروا عليه المسلة للنيل

وطبعا الأهالى رفضت !
 قوم لوبا عرض عليهم فلوس فرفضوا تانى
فراح للوالى اللى قاله بسيطة .. نضربهم !
لوبا قاله لأ ندفعلهم تعويضات طيب !

الوالى هيقوله ماشى وياخد الفلوس
وبعدييييين يكتشف لوبا ان التعويضات
 كانت مبالغ فيها
وانه انضحك عليه !
 آحبيبى تانى 
انتا هتزعل معانا كتير 

المهم افراد الباخرة الأقصر
هيقعدوا سنة تقريبا ف المكان
خلال السنة دى هيبنوا لنفسهم مساكن خاصة
قرب المعبد

المساكن كانت للبحارة جزء
وللأونباشية والرقباء جزء
وبنوا فرن ومطبخ ومطحن ومخبز
ومخزن اسلحة للبارود والمتفجرات
ومستشفى يضم 30 سرير كمان

المستشفى كان ضرورى
 لأن اثناء وجودهم ظهرت الكوليرا
ومات بسببها عدد كبير من السكان
 آل يعنى هما كانوا ناقصين
يقلوا كمان عن 800 يالهوى !!

الطاقم اتعرض لحاجات كتير 
منهم توهان احد افراده ف الصحرا 
ومرجعشى طبعا 
تعرضهم لمحاولات سرقة من البدو 
مرض الافراد بأمراض مختلفة 
بسبب انهم ناس فافى ف بيئة قاسية 
وحوادث اثناء زحزحة المسلة 
وحاجات كتير كدا 

الملخص 
بعد مناورات ومحاولات
 وشغلانة وتفاصيل مش هشغلكم بيها
تم اسقاط مسلة الأقصر الغربية
بنجاح وبراعة ميكانيكية 

تباهى بيها 
فيرنيناك قائد الأقصر اللى بعت لشامبليون 
يقول :
"إبتهج معنا يا سيدى المواطن العظيم
لقد غادرتنا الكوليرا
وخضعت المسلة الغربية بالأقصر
 امام أبسط الوسائل الميكانيكية الحديثة 
فقد امسكنا بها اخيرا 
ومن المؤكد اننا سنحضر هذا الصرح
 الذى لابد وانه سيزودكم بمادة لدروسكم
الممتعة وسيحوز على اعجاب العاصمة 
وستشهد فرنسا ما صنعته حضارة قديمة 
من أجل صيانة التاريخ فى ظل انعدام مطبعة 
وسترى ان فنوننا مدهشة 
فأن شعوبا اخرى 
صنعت فنونا قبلنا بازمان طويلة
 لا تزال نتائجها المدهشة تذهلنا حتى اليوم"

والمسلة كانت بعيد عن ساحل النيل
بييجى 260 متر
فجابوا 400 عامل 
يسحبها لحد الباخرة الأقصر

ولأن طولها 22 متر
هيتقطع مخصوص عشانها مقدمة السفينة
عشان تدخل

والمسلة تتشال من قاعدتها ف اكتوبر
وتوصل للباخرة ف ديسمبر
فيبلغوا شامبليون بكدا
ولازم يستنوا الفيضان
عشان المركب تمشى بسلاسة ف النيل
 قوم ايه ؟

يوصلهم خبر موت شامبليون ف مارس 1832
 ويموت صاحب الأقتراح
وهوه مطمن على ان
نص المهمة تم تأديته بنجاح 

من مارس لأغسطس وقت الفيضان
ينحبس الطاقم رغما عنه ف الأقصر
 فيضيعوا الوقت ف الصيد
 وقنص الحيوانات والحشرات وتحنيطها
والسفارى وكدهون

وبعد الفيضان تتحرك الأقصر شايلة المسلة
بعد ما سابت اختها وحيدة حتى اليوم
 ف معبد الأقصر

وسيرى يا نورماندى ف النيل كما جئتى
وهتوصل لحد رشيد وتعيط
ليه يا شهرو
قالوا مشاكل فنية وحاجات كدا
بسبب الوزن والرياح الخ 
قوم هيبعتوا لفرنسا يطلبوا باخرة تقطرهم

وهينبعتلهم السفينة "ابو الهول"
اللى هتروح تسحبهم من رشيد لحد فرنسا
يا ثاااااامح ف بحر غضبان مزعبب هادر

والمسلة ف رحلة الإياب هتطول مسافتها
عن رحلة الذهاب
لأنها هتخرج من اسكندرية لرودس
ثم لميناء طولون 
وهناك يتحجزوا ف الحجر الصحى
خوفا من نقلهم للكوليرا 
وبعدين يسيبوهم 
وتعدى الأقصر بالحمولة مضيق جبل طارق
 ثم مدينة روان
ثم تدخل مصب نهر السين
ثم تصعد النهر فتوصل باريس 
سنة كام آشهرو ؟؟؟

قالك يا سيدى
ان الباخرة الاقصر
اتحركت من طولون : ابريل 1831
وصلت باريس : ديسمبر 1835 
واحسبوها انتوا بقى

وبس اخيرااااا
وصلنا بالبوضاعة سليمة يا معنمى
صحيح قابلتنا اخطار ف البحر والبر
وناس ماتت 
واكتر من نص مليون فرنك إتصرفت  
لكن وصلنا خلاص

ونستعد لآخر شق ف الحكاية
وهو
كيف ستصل مسلتنا المصرية العتيقة
الى ساحة الكونكورد حيث مقرها الحالى
اللى قرب على 200 سنة ... ؟؟؟

البوست الجاى
 نكمل ان شاء الله 
 تصبحوا على ألف خير


--------------------------

الكبيرة قوي @__Marwa____ 

 انا سمعت انهم كانوا بيعرفوا بيه الوقت من الظل




ibmeguid ibrahim@  abdelmeguid
مش دايما وانا رايح لاسوان مرة شفت في الجبل مسلة
 تم نحتها من اعلي واسفل
 ولم يتم نحتها من الخلف ولازالت متصلة بالجبل



Essam Saad ‏@saad_essam   
 وصف رقصة النحلة من الأهرام
هنا


 سقراط ‏@so2rate 

 سعدية سليم ‏@sa3deaselim   
 يعني عاوزه النحلة تفضل تقرص فيها


 dr. ibrahembadr ‏@DIbrahembadr   
 في رساله دكتوراه عن المسلات
 بدءا من كيفية نحتها والغرض منها
 تطبيقا علي المسله الناقصة في أسوان 
المؤلف د.هشام عباس-جيولوجي مرمم