الليلة دى قصص قصيرة للجيب
:)
القصة رقم (1)
ودى وخداها من كتاب
كل رجال الباشا - خالد فهمى
وكان يا ما كان قالك ايه يا سيدى
ان محمد على لما قرر ينطح ف السلطان
وينفصل بمصر عن الدولة العثمانية
بعت جيش بقيادة ابنه ابراهيم للشام
قوم الجيش المصرى قعد هناك مدة
بقواده وجنرالاته وعساكره
واللى يخصنا ف القصة واحد اسمه علاء الدين اغا
سى علاء الدين آغا دا كان اميرلاى
الآلآى التامن فى الجيش
والآلآى يعنى فيلق
ومحدش يسألنى يعنى ايه فيلق عشان هقوله
فيلق يعنى الآلآى ... معروفة !
ولحد كدا حلو؟
لا مش حلو
عشان يا كبدى هيجيله التهاب فى الكبد
ويرقد 7 شهور بحالهم
فى مستشفى عملها الجيش فى عكا
اثناء قعادهم وحصارهم لها
المهم الراجل قعد عيان شهور ولما حس بدنو الأجل
بعت لخادمه وقاله انده شهود
وقصاد الشهود منح علاء الدين .. خادمه
اللى كان عنده 18 سنة
الفلوس اللى معاه كلها فى الوقت دا
وكانت (2500) قرش وكتب حجة ومضاها الشهود
حلو ؟
لا مش حلو... !
عشان اول ما علاء الدين آغا هيقابل ربه
والخبر يوصل لديوان الجيش هيروحوا يجيبوا الخادم
ويقولوله هات الفلوس اللى معاك ياض !!
الواد هيسأل ببراءة ليه يا اخوننا دى فلوسى
ومعايا حجة مختومة بذلك وشهود وافلام ؟!
قالوله طالما الراجل مات عندنا
يبقى دى (اموال ميرى) وتبعنا
وهات الفلوس لأ انا معايا اثبات بيها
وهروح اشتكى للقاضى الشرعى فى المدينة
وطبعا الموضوع وسع
والواد استجرى وبيناطح ف السلطة وبتاع
القصد .. القاضى افتى ان تركة المتوفى
بيتم التصرف ف تلتها بس للغريب
ولازم الواد يرجع التلتين
وديوان الجيش معجبهموش الكلام دا طبعا
ولازم ياخد المبلغ كله
ومش بس كدا
دول جنب الفلوس
راحوا حاطين ايدهم على حصان الأميرالاى
واللى كان سايبه للخادم يركبه ويرجع بيه مصر
قالوله هاته يروح للجيش عندنا نقص ف الخيل !!
وانتا هتاكل مصر يعنى دا بدل ما تصبح عليها بجنيه ؟
الواد كان هيتجنن وكبرت ف نافوخه
ولازم اشتكيكم لأبراهيم باشا عشان ياخدلى حقى !
هيهيييىء جاك كسر حُقك
وبس راحوا جايبينه واستجوبوه
انتا عندك كام سنة؟
انتا متجندتش ليه؟
مش شايف ظروف البلد؟
لازم تتجند وتخدم وطنك يا كلب !
وجندوه فعلا
الواد قعد يصوت انا مليش دعوة
ومنيش عبد
انا معتوق ومعايا شهادة موثقة
ولما لقى مفيش فايدة قالهم خدوا كل حاجة طيب
ف داهية اياك تطفحوهم
بس ارجع لصغار سيدى اخدمهم كما وصانى !
وكتب شكوى لابراهيم باشا عشان يلحقه
وطبعا لا حياة لمن تنادى
ومكنش انعذر ولا باع جزر
ومحدش رد والواد مسمعناش عنه تانى
مع السلامة وتلاقيه يا نضرى اتجزر من اول مواجهة
اللى لا له لا ف حرب ولا قتال ولا تور ولا طحين ... !
مع السلامة وتلاقيه يا نضرى اتجزر من اول مواجهة
اللى لا له لا ف حرب ولا قتال ولا تور ولا طحين ... !
والقصة خلصت
ايه تعليقك يا شهرو ع الأحداث ؟
ايه تعليقك يا شهرو ع الأحداث ؟
والله تعليقى جايز ميعجبشى الناس
اللى دايما تردد ان محمد على ابو الجيش
والتحضر والنيلة والهباب
عشان محمد على بنى جيشه .. لنفسه ولمجده
وفتوحاته ولامبراطوريته صغرت ولا كبرت
بنى جيش له ولولاده من بعده
ولا كان هامه مصر واولادها وحالهم
كانوا مجرد متاع ومطايا ... لا اكثر
وهما وفلوسهم وخيلهم وخدمهم .. اموال ميرى
ودا الواقع الفعلى وقتها
اللى جايز اتغير حبة ف وقت عرابى
لكن رجع تانى لحاله بعد فشل الثورة العرابية
القصة رقم (2)
ودى من الزمن الحالى عن صحفى وأديب بحبه
فتحى غانم
وحوار ف احدى المجلات عن عالم الصحافة والادب
وبيسألوه وسط الكلام عن محمد حسنين هيكل
كظاهرة ف الصحافة
فرد بأنه هيكل اول ما قامت ثورة يوليو قابله
ودردش معاه وقاله
ان الحاكم لازم يكونله صحفى يعبر عنه
وانا هكون الصحفى دا
كان ساعتها نجيب لسه ف الحكم
بس بعد ما بزغ نجم عبدالناصر دخل ف زوراقه
ولبد زى القرادة ومطلعشى
ولما كان فتحى غانم قاله
ان الادب ابقى من السياسة واحسن
هيكل رد
براحتك انا كاتب الصفحة الاولى
وانتا كاتب الصفحة الاخيرة
:)
المهم ان هيكل ربط وجوده كصحفى الرئيس الاول
بزعامته فى عالم المهنة
وكل تلك النظريات اتكسرت واتدشدت على صخرة النكسة
زى ما بيشوف غانم
والنظرية دى اثبتت فشلها الذريع المريع
واللطيف انه فتحى غانم لما نشر روايته
" الرجل الذى فقد ظله"
غالبية القراء اسقطتها على هيكل
الناس ربطت بين
الصحفى عبدالحميد السويفى ف الراوية
الصحفى عبدالحميد السويفى ف الراوية
وبين هيكل رغم نفى فتحى غانم
ساعتها هيكل كان بينشر فصول
من كتابه عن عبدالناصر
من كتابه عن عبدالناصر
فى الاهرام وكمان فى مجلة النيويورك تايمز الامريكية
والمجلة كتبت ف التقدمة
بما فحوى نصه الآتى
ان هيكل من شهرته ف الوسط الصحفى
انكتبت عنه رواية .. لفتحى غانم
:)
غانم اندهش جدا لأنه لا سافر برا
ولا بيكتبلهم جابوها منين الفكرة دى ؟
لكن الحقيقة ان الصحفى محمد التابعى ف لحظة صفا
سأله انتا تقصد هيكل فى الرواية
وتقصدنى ف شخصية تانية ؟
رد غانم انه مش حقيقى
وكل الحكاية ان جو الرواية موحى
لكن هوه مقصدش ناس محددة
.. زى زينب والعرش كمان اللى تكاد شخصيتها
تشاور على ناس بعينها لكن مش هما !
المهم التابعى قاله
طب كلم هيكل عشان زعلان شوية!
طب كلم هيكل عشان زعلان شوية!
اللطيف بقى ان صاحب " الرجل الذى فقد ظله"
اول ما دخل على هيكل راح قايله بالانجليزى
اهلا بالـ " الرجل الذى فقد عقله"
وضحكوا الأتنين كتير
والمسالة انتهت عند هذا اللقاء
وفتحى غانم بيشيد بهيكل فى قصص العداوة دى
وانه كان يقدر يتعبه لكن العكس حصل
ورشحه لرئاسة تحرير الجمهورية كمان !
وبس خلصت الحكاية عند كدا
وتعليقك يا شهرو ؟
فتحى غانم من الناس المحترمة جدا
ف عالم الادب والصحافة
ونظريته هوه نجحت ونظرية هيكل فشلت فعلا
ولما مات هيكل خبطت ف تويتة بتهزأ
الـ مش مهاويس الأستاذ وبتعايرهم
آل انه قرى كتب عمرهم ما هيقدروا يقروها
وان مش من حقنا ننتقده وكدا ..
والصراحة عدد الكتب اللى قراه
والتجارب اللى عاشها على عينى وعلى راسى
واتابعها وكل حاجة
لكن دا مش معناه اوافق عليها وعلى رأيه وتوجهاته !
ومش مهم عدد الكتب اللى بيقراها البنى آدم
المهم عمل ايه بلى قراه
واتسبب ف أذى قد ايه او نفع قد ايه
وشكرا
القصة رقم (3)
ودى من مذكراته الشخصية
أقصد .. احمد باشا شفيق
أقصد .. احمد باشا شفيق
رئيس الديوان الخديوى
عن واقعة حصلت ايام الخديوى توفيق
قالك ايه يا سيدى ان أفندينا توفيق
شاف ف المنام شيخ من السويس اسمه (الغريب)
وبشره انه يوما ما هيوصل للعرش
مش بس كدا
دا قاله لما يحصل ذلك .. ابقى ابنى مسجد عند مقامى
عشان توفى النذر
واحمد شفيق بيقول
ان الخديوى بعته ف اوائل سنة 1880
بخمسميت جنيه دهب بحالهم
وسافر بيهم شفيق وسلمهم لمهندس مبانى هناك
عشان يبنى بيهم الجامع اللى انتهى سريعا
واتصلت اول جمعة فيه 18 نوفمبر 1880
جامع الغريب قعد صامد لحد اوائل الستينات
ينعمل فيه مولد وناس تروحله كل سنة
وصندوق نذور وشغلانة
وشوية بشوية محدش بقى عارف حكايته
وعانى من الاهمال
لدرجة ان الصحفيين لما حبوا يعرفوا عنه معلومات
من هيئة الاوقاف شخصيا
ومين الشيخ الغريب دا وايه حكايته
محدش دلهم على حاجة
وف النهاية صدر امر بهدم المسجد
زى ما اتهدم مسجد الأربعين بالسويس
واتبنى مكانهم مساجد جديدة
ومسجد الغريب الجديد شال الأسم برضو
وانتهت الحكاية على كدا
وايه رأيك يا شهرو ؟
الصراحة عندى سؤال واحد وحيد بس لابو شفيق
اللى مطلع الخديوى توفيق سكرة وفلة شمعة منورة
وبيقول ف المذكرات عن الواقعة دى
"فلما تحققت الرؤية اعتزم سموه
- وكان دينا كثير الاعتقاد-
ان ينفذ ما اوصى به الشيخ فى منامه "
ان ينفذ ما اوصى به الشيخ فى منامه "
لأ وعاوز يبين ان وصول توفيق للعرش
كانت برؤيا كمان
كانت برؤيا كمان
طب يا حبيبى مسألتش توفيق
هوه لما بعت يستنجد بالانجليز يحافظولوه ع على عرشه
من عرابى الويحش
مشفش ف المنام انهم هيحتلونا ؟!!
القصة رقم (4)
ودى من كتاب
شارع عماد الدين حكايات الفن والنجوم - الفريد فرج
والمؤلف بيدينا فكرة عن مهنة الملقن ف المسرح زمان
وازاى انه كان من اهل الكار وغالبا فشل ف الفن
"فسقط فى الكمبوشة"
والملقن اما ممثل منجحشى
أو مساعد مخرج او مساعد مدير خشبة المسرح
او من الكومبارس المغمورين قوى قوى
القصد نقول ان الملقن بيبقى فاهم ف الحكاية
وساعات الاندماج يغلبه فيبوظ الدنيا خااالص !
ودا حصل ف احد العروض على مسرح جورج أبيض
ويقال والعهدة على الراوى ان جورج أبيض
كان بيقدم عشر مسرحيات ف الموسم الواحد
واللى هوه كل يوم عرض مختلف
واحيانا يقدم مسرحيه ماتينيه
والتانية مختلفة عنها ف السواريه !
ومعرفش مين كان بيجرى وراهم وليه البهدلة دى ؟!!
بس الظاهر
المنافسة كانت رهيبة وقتها بين المسارح والفنانين
مش زى الأيام العيضة بتاعت دلوقتى
القصد الملقن وقتها كان حاجة مهمة جداااا
وضرورية لأن الممثلين مهما حفظوا
لازم اوقات ينسوا النصوص
الله يكون ف عونهم
دا اسمه تعذيب يا ثاااامح
المهم ف ليلة من ظات الليالى
والحاج جورج بيعمل عطيل لشكسيبر
وبيكلم ديدمونة ومندمج ع الآخر
وبعدين راح مقرب من الكمبوشة وقايل بهجته اللبنانية
" لقن ما تمثل"
عشان ينبه الملقن انه اندمج ف الدور وكدا
وبيخرجه هوه عن المود !!
وهما دقايق وجورج المفروض يقول
" المنديل الذى كان عزيزا على واهديته لك
انت اعطيته الى كاسيو
بحق السماء لقد رأيت منديلى فى يده "
ولسه هيقول .. منديلى فى يده
لقاها خرمت ودنه بصوت عالى
الله .. جاية منين الجملة دى لسه مقولتهاش !!؟؟؟
جاية م الكمبوشة يا كابتشن
احنا بنحب نهدى النفوس يعنى
:)
بس وجورج أبيض وشه قلب أسود لي لاه
وراح مادد ايده جايب الملقن من قفاه
طلعه على المسرح وقاله
"بدك تمثل
مثل للناس هادول وشوف شو راح يعملوا معك"
وطبعا الصالة ضجت بالضحك
وانقلبت المسرحية التراجيدية الغامقة لشكسبير
الى شكسبير بعضشى !
والملقن اترفد طبعا
ما كنا قعدنا مؤدبين م الاول
ما كنا قعدنا مؤدبين م الاول
:)
والحكاية خلصت على كدا
وتعليقك يا شهرو؟
ولا حاجة
بس كل ما افكر ازاى الناس دى زمان كانوا
بيعملوا مسرحيات بالعدد دا وفيها كل هذا الكم
من التحضير والحفظ والاجتهاد والاداء والتعب
والناس كانت بتبصلهم على انهم ارتيست ومشخصاتية
وملهمش قيمة ولا وزن ولا شهادة ف المحاكم
ولا وصاية على ولادهم .. وحاجة قرف
انتهت الحمدلله ومبقيناش زى زمان
بس للأسف
لسه ليومنا هذا ناس بتبص للفنان على انه حاجة هايفة
ومش محترمة
:(
آخر حدوتة بقى
ودى من كتاب
ودى من كتاب
ملف اليهود فى مصر الحديثة - عرفة عبده على
عن الأخ "فولفجانج لوتز"
الشهير بـ .. جاسوس الشمبانيا
وسى لوتز بقى مواليد 1921 من اب غير يهودي
بس امه يهودية
وبيقولوا انه لم يختتن
ودا ساعده ف نفى الديانة دى عنه ف المستقبل
المهمممم
الراجل طبقا للأصول كان لازم ينسب الى ديانة امه
لكن هوه وست الحاجة نينة اخفوا هويتهم
وقبل اندلاع الحرب العالمية التانية
كانوا مهاجرين على فلسطين
بعد شوية لما كبر وشنبه خط والحرب قامت
هينضم للقوات الانجليزية
ويشترك ف تهريب الاسلحة للعصابات الصهيونية
ويبقاله وضع وثقل ويتجند
الموساد جندوه عشان يستفيدوا من خدماته
والراجل قعد يدعى كراهيته لليهود
عشان يكسب ثقة الالمان وما شابه
القصد قامت الثورة ف مصر ولعلعت
وبعد شوية ف اطار حملات عبناصر الدعائية
هنعمل صواريخ بعيدة المدى وابصر ايه
النظام المصرى استعان بخبراء المان
للعمل بمشروعه واسرائيل عرفت طشبعن
وعاوزين بقى يفشلوا المخطط لأنهم اول ناس متضررة
وكان القرار هوه تخويف العلماء الالمان
وتطفيشهم من مصر
وقتلهم لو جت الفرصة بطرود ملغومة وغيره
القصد
قالوا نستفيد من الحاج (لوتز) والايد البطالة نجسة
وانزل يا لولو على مصر واستقر
وخليك خلايا نايمة واقعد ف كوزك لحد اما نعوزك
قال لوتز من عيونى وحاضر
والباشا تخفى ورا مظهر رجل ثرى بيحب الخيول
وفاتح مدرسة للفروسية
ومزرعة للخيل فى ضاحية الزمالك
وزباينه طبعا كانوا الطبقة الراقية
وناس من التقال قوى
وبقى نجم سهرات
وبيقولوا انه كان من عشاق الشمبانيا
وبيعزم منها على اصدقائه ببذخ
ومن هنا جت التسمية جاسوس الشمبانيا
ويقال كمان انه ف فترة الكمون
كانله علاقات مع علماء المان
بمؤسسات ابحاث الطيران والصواريخ
وعدد من ضباط الجيش المصرى
منهم رئيس الشرطة العسكرية ف هذا التوقيت
يوسف على غراب ... !!!
كان شاطر قوى واضح
القصد الحاج لوتز فضل كامن
لحد ما اتعرف على عالم آثار المانى
جاى ف بعثة تنقيب ومعاه مراته
وبدون دخول ف تفاصيل متشعبة وادوشكم
الست مراته - مرات الآثرى - طلعت جاسوسة
وف يوم تعرفت على زوجة احد العلماء الالمان
وغتت عليها عشان تروح معاها البيت
وراحت الست تكلم الشغالة ورجعت
لقت الضيفة ف مكتب جوزه
بتصور حاجات من مكتبه
واول ما انكشفت راحت هربانة
الزوج لما رجع كلم جوزها عالم الاثار
عالم الاثار اترعب وكلم لوتز
بيقوله ال ايه انا شاكك بس متأكد
يادى الحوسة
لتكون جاسوسة لليهود يا لوتز وانا معرفشى ؟!!
لازم ابلغ السلطات وبتاع
لوتز طبعا البرىء لم الليلة
وقاله استنى بس لما تلاقى دليل اكيد
وبعدين نبلغ السلطات !
وخرج من عنده كتب للموساد ان العميلة دى لو تبعكم
الحقوها وفعلا سحبوها
وسافرت بعد ايام
واتبعت لجاسوس الشمبانيا خطاب شكر من اسرائيل
وبس قعدنا كدا شوية لحد ما اتمسك جاسوس شهير
اسمه ايلى كوهين
وبعده بأربعين يوم اتمسك لوتز
وهوه بيبعت معلومات لاسرائيل
طبعا النظام انتهزها فرصة وطلعله ف التلفزيون
وعمل بروبجندا معتبرة ومسكنا جاثوث والقصص دى
زعلانة يا شهور ؟
لأ مش زعلانة .. انا هزعل ع اللى حصل بعد شوية
المهم قدموا المخفى للمحاكمة هوه ومراته
سنة 1965 الكلام دا
لما أصر لوتز انه المانى ومش اسرئيلى
ونفد بكدا من حبل الاعدام
لكن فضلت التهم الاخرى لابساه
مع انه أنكر كل حاجة
والجوابات مش بتاعتى والمتفجرات مش تبعى
والمخابرات دستها وانا غلبااااااااااااااااااااان
وف النهاية اخد أشغال شاقة مؤبدة بتهمة
" الاضرار البدنى برعايا أجانب يخدمون
حكومة الجمهورية العربية المتحدة"
ومراته اخدت 3 سنين
حلو ؟
لا مش حلو طبعا
عشان بعد 3 سنين من التجسس
وطرد ينفجر ف مكتب بريد المعادى
ومعلومات عن مصر راحة جاية
يعنى سنة 1968 هيفرجوا عنه
:(
ايوه
سنة 1968 هيفرجوا عنه مع روبرت داسا
سنة 1968 هيفرجوا عنه مع روبرت داسا
وليفى وناتا نسون ومارسيل ف اطار صفقة تبادلية
مع اسرى حرب 1967
كام يا شهرو ؟
يعنى الكلب دا واللى معاه
بدلوهم بكام جندى من جيشنا اتأسر ف 67 ؟؟
خمستلاف جندى
:((((
وابن الوارمة خرج من السجن على اسرائيل
قعد 3 سنين وبعدها راح اروبا يعيش حياته
ولا عزاء لأى حاجة
والحكاية خلصت
وتعليقك يا شهرو ؟؟
سؤال بس
هوه احنا محتاجين ناخد على قفانا كام الف مرة
عشان نفهم ان الانظمة الدعائية اللى صوتها
دايما بيبقى عالى ع الفاضى دى مبتشتغلش
الا لنفسها وبس .. ؟!
وان مهما كان كلامك كبير
ومجعلص عن الوطن وحب الوطن
ف النهاية انتا لو ضعيف فانتا مسطلح قفاك
وعدوك بيعرف ازاى يستفيد منك كل مرة
وعارف ازاى يجيبك لمس كتاف
ونقولهم جو التطبيل والشئون المعنوية
والنظم الشمولية السلطوية دا مبقاش يأكل عيش
وبيودى ف طوكر
يقولولنا اطلعوا م البلد يا خونة يا عملاء
لأ ... احنا مبنطلعش م البلد
اللى بيطلعوا هما الخونة العملاء فعلا
وانتوا اللى بتدوهم الإفراج كمان ... زمان .. والآن
وبس كدا خلصنا
تصبحوا على ألف خير
------------------------
بعتذر عشان بعض السطور بخط صغنن
حاولت اصلحها بترجع تبوظ .. مش مقصودة
#معلش
------------------------------------------
alaa Nabil@3ala2_nabil
الحقيقة إن ديه نقطة هايلة جدا
لأني شفت ناس كتيرة مثقفة و بتقرأ كتير جدا
و عندها علم احسن من أي حد
, لكنها في أفكارها وضيعة جدا
Ahmed Shawky@_a_shawky
الرجل الذي فقد ظله اتحذف منها كتير
ibrahim abdelmeguid @ibmeguid
طبعا لازم ينفي علشان تفضل فن
لكن كل شخصياتها يمكن اسقاطها علي احياء
كنت متابع زمان دلوقت نسيت
soheir_helmy @soheir_helmy
شخصية عبد الهادى النجار فى " زينب والعرش "
كانت شخصية مصطفى امين
وفتحى غانم رسم شخصيته بمثاليتها من وحهة نظره
" دور حسن يوسف "
مش استنتاج ولكن كلام شاهد عيان من الوسط
وكان صديقا لفتحى غانم
هيكل كان بعيد عن زينب والعرش
سعدية سليم @sa3deaselim
ماشاء الله كل اللي حكمونا جاين بتفويض إلهي
سعدية سليم @sa3deaselim
5000 جندي لامؤاخذه يا شوشو دي يتقال لها أحا
سقراط @so2rate
اعدام ايلي كوهين في سوريا
سقراط @so2rate
ويقال ان اللي كشفه رأفت الهجان ..
عموما هية عملية مشتركة مع سوريا
اصلا كان من ضمن المجموعة بتاعت فضيحة لافون
سعدية سليم @sa3deaselim
أيوه قالوا ان اللي وقعه ظابط مصري
سقراط @so2rate
اعلان الفيلم اللي اتعمل عنه
https://www.youtube.com/watch?
v=8uQca0W1LIw …
سقراط @so2rate
بيعتبروة من اهم ابطالهم
سعدية سليم @sa3deaselim
ولسه جثته موجوده في سوريا قبل الثورة كانوا الصهاينه بيطالبوا بيها
ولسه جثته موجوده في سوريا قبل الثورة كانوا الصهاينه بيطالبوا بيها
سقراط @so2rate
مارسيل نينو
سقراط @so2rate
ماكس بنيت
ஐHaпaп H❃ ЄʓʓαƬஐ @EgyChampagne
بتوع عمليه ليفون
ليست هناك تعليقات:
إرسال تعليق