حروب محمد على والوهابية والسجادة والتفاحة ... 1

 
تنويه اولى كدا ...
أطراف حكاية الليلة كلهم ف قلب بعضهم 

منقوعين ف ف نهر الوساخة

لكن كل حى ف هيئة وشكل مختلف

قصة الليلة عن ... محمد على ومصر والسعودية 

والحروب الوهابية

والقصة هتبتدى عندنا لما محمد على 

هيبقى والى مصر غصب عن الباب العالى 

اللى هيضطر آسفا يطلع فرمان بتوليته حكم مصر 

وعزل الوالى خورشيد بتاعهم

والسلطان العثمانى يتشال ويتهبد من الغيظ 

وايه الراجل الرزل دا اللى بيقعد ع الكرسى

 بأمر من الشعب المصرى وشيوخه ورجالاته الخ

وميعرفش انه الشعب المصرى بعد قليل 

هيندم وهيبقى عاوز يضرب نفسه 30 ألف جزمة

 بس مش هيعرف يا كبدى

 عشان محمد على هيكون لم الجزم حتى وأخدهم .. ! 

المهم ..

هيتولى محمد على سنكفولة والباب العالى يرضخ 

لكن يفضل اللى ف القلب ف القلب

وكل طرف حذر من الآخر

وبيتحين فرصة لمحق التانى

قوم ايه ؟

 


يشاء السميع العليم 
ان سنكفولة ف لحظة فارقة 
من عمر الأمبراطورية العثمانية

يبقى هوه الفرخة بكشك

والمنقذ

والغاااالى

عشان السلطان العثمانى هيستنجد بيه 

ويطلب منه مرة واتنين والتالتة تابتة

انه يروح يخلصه من وش الوهابيين

 اللى عاملين قلق ف الحجاز وشبة الجزيرة

وايه يا شهروزة حكاية شبه الجزيرة والوهابية دى

 واللى بيتشددلها  ؟

شهروزة هتقول اهو

 



وانتوا عارفين ان سخامة السلطان سليم هباب الاول

 - مبحبوش معلش-

 غزا مصر

 وأخدها من اخر سلاطين مماليكها .. طومان باى

بعدها بشوية صغيرين 
وف اطار الأمبرالية التوسعية

 بتاعت العثمانلية

دخلوا ع شبة الجزيرة لما لها من ثقل دينى وروحانى 

.. المدينة ومكة وكدا

منذ هذا التاريخ وشبه الجزيرة تحت الهيمنة العثمانية

وفضلنا كدا لحد ما ظات ليلة

اتولد سى محمد بن عبوهاب ف العيينة 1703

وسى عبده كان ابوه قاضى

يعنى ابن ناس لهم مكانة وحصانة والذى منه

ومن بيت علم برضو ف ذات الوقت

تلقى دراسته وسافر للمدينة المنورة

قعد فيها شهرين ومعجبوش الحال من تبرك الناس 

بقبر الرسول (ص) ورجع بلده

واتعلم اصول الفقه على مذهب الامام احمد بن حنبل

يعنى كان حنبلى 

وبعدين سافر كذا مكان .. البصرة .. والحجاز 

 ويلف ف كل الاماكن ما بينهما

ومكنش عاجبه أى حاجة

وازاى فيه بدع وحاجات مهياش من الدين منتشرة

وبما انه حنبلى فعقيدته قايمة على التشدد والمغالاة 

ومفيش شتيمة كله ضرب ضرب

وابتدى يمشى على منهاج ابن تيمية المتشدد الأعظم

#البيض الممشش بيتدحرج على بعضه
  والناس المعتدلين بيقولوا ..

ان دعوة محمد بن عبدالوهاب ف حد ذاتها .. كفكرة
مش وحشة ولا كانت غلط

لولا ما شابها من بشاعات ف التنفيذ والتطبيق
واللى زود ف الحكاية ان الدعوة دى جذبت ليها الاوباش والمتعصبين شأنها شأن أى فكرة متشددة

فالعالم الواغش دى شوهت المضمون مش اكتر

مش بس كدا ...

مشكلة الدعوة الوهابية الاكبر كانت ف حكاية التكفير

يعنى أى حد مكنش بيتبع تعاليمهم كما يرونها
بيعتبروه مشرك بالله ويكفروه

ودى كانت مصيبة

مصيبة ليه يا شهرو ؟؟

عشان هما مكنوش بيكتفوا بالنصح 
واعلان ان الآخر مشرك وبس

دول كانوا بيحاربوه

ويقيموا عليه الحد حضرتك .... !

وطبعا انتا جاى ف أرض يسكنها بدو واعراب

يعنى العالم دى عندها من القسوة والعنف
ما يكفى لاراقة بحور دماء 
سواء من طرف الداعى او المدعو ..

ومفكرين كثر بيقولوا وشهروزة تتفق معاهم جدااااا

ان دعوة بن عبد الوهاب دى لاقت رواج ف شبه الجزيرة
 بسبب المجتمع القبلى والعصبية وسمات اهل البدو
واللعب على وتر المغانم والسبايا وفرض القوة 
والجو اللطيف دا

بينما فشلت ف التمدد ف بلاد الحضر

ودا اللى خلى اهل الشام يستنكروا الدعوة دى
ويرفضوا اهلها ما قربوا منهم وحاربوهم 
وسالت الدماء برضو ..

 

القصد والمختصر

الدعوة الوهابية كالداعشية كدا

انتا لو مش معانا وعلى منهجنا تبقى ضدنا ونحاربك
 يا مشرك يا كافر يا زنديق يا رعديد يا معرفش ايه 

والموضوع كان ممكن يعدى ...
دعوة وتخلص بموت صاحبها مثلا

لولا انه اتلم الفكر المتعصب مع السلاح والقوة

بتحكى عن مين  يا شوشو ؟!

بحكى اسم الله على مقامك عن الاخ .. 
محمد بن سعود

أمير الدرعية

اللى استقبل بن عبدالوهاب ودعوته بالاحضان

والمصالح تتصالح

عبوهاب احتمى بنفوذ بن سعود وسلاحه ورجاله

وفى المقابل .. بن سعود يعلن الدرعية عقر دار الوهابية
ويبقى هوه سيد العرب بشبه الجزيرة
وشيلنى وأشيلك

سنة 1744 الكلام دا

وبس بقى والأتنين عاشوا الدور قوى

عبوهاب يكتب الرسايل يدعو فيها القبايل
 للدخول تحت لواء الدعوة

وبن سعود يسانده بكامل قوته

وطبعا القبايل اللى مكنتش بتسلم بالذوق
وتنضوى تحت الراية الوهابية

كانت بتتشنير حرفيا

وتراق دماء وسبايا بقى وغنايم 
ودمار لكل مظاهر المكان وجو داعش الحلو دا 

والحاج الكبير مات .. محمد بن سعود يعنى
سنة 1765

ومسك مكانه الأبن

الامير عبد العزيز بن سعود

واللى كان شارب الوهابية حتى الثمالة يا ثااااامح

والواد كان غير ابوه خاااالص

كان عينيف عينيف يعنى

دايرة تطلعاته وسعت لحد ما خرج من نجد والحجاز
وراح على اطراف العراق

وكله بالسيف طبعا

والحاج محمد بن عبوهاب مؤسس الدعوة بذات سخصيته
مات سنة1792م

لكن عبدالعزيز بن سعود هيكمل المسيرة
وفكرة التوسع مماتتش ف دماغه
وهيكمل لحد ما يدخل البصرة

ثم يزحف على كربلاء

سنة 1801م الكلام دا لما دخلوا كربلاء

وطبعا مفيش داعى نقول انها معقل شيعى هام واساسى

ومفيش داعى كمان نقول ان البلد اتمرمطت مرمطة السنين

واتهدم مسجد الحسين فيها واتنهبت نفائسه
غير الموت والمهانة للى عاش .. وقرف كدا
وحكينا كمان انهم راحوا على اطراف الشام
وحصلت مناوشات بينهم وبين اهلها

القصد

العالم ضجت منهم الواهبية دول 
 وقالت جاااااااااااااى

وحد يقولى بقى آشوشو ..

هيوه مش البلاد دى كلها واقعة تحت حكم العثمانلية ؟؟

امش فيه شبع البرمبة الكبير اسمه السلطان ؟؟
ومال مش سامعينله حس يعنى ؟؟

اقولكم لأ

الصراحة الناس بعتت كذا حد يقاوم الوهابيين

لكنننن

عندنا مثل ف مصر بيقول

"راحت تجيب تار أبوها رجعت حِبلة"

دا اللى كان بيحصل بأختصااااار
كل ما الباب العالى يبعت حد يحارب الوهابيين ... !

وبيدى لا بيد عمرو... 

الشيعة اللى دمهم اتحرق مما حدث من فظائع  كربلاء
ومن هدم  لمسجد الحسين (رضى الله عنه) .. الخ

واحد منهم جه متنكر

ودخل لمسجد الدرعية سنة 1803

وانتهز فرصة سجود الامير عبعزيز بن سعود 

وراح غازه ومرّيحه

وقت صلاة العصر يا ثاااامح

وبعدين ؟

جه بعد عبعزيز ابنه .. سعود 

الواد كان زى ابوه كدا 

وخد ف وشه وراح ع الطائف ثم مكة 
وامعانا ف ترسيخ وضعه قعد يتشرط

واتحكم ف مين يحج ومين ميحجش ... !!!

وبعت للسلطان العثمانى يقوله مفيش محمل ييجى
لا من مصر ولا الشام 

واللى ييجى ييجى بشروطى وان كان عاجبكم

الاستيلاء على مكة كان سنة 1802
وبعدها بسنتين دخلوا المدينة المنورة 

واستولوا على الكنوز والنفائس اللى هناك 

والجبرتى بيحكى عنها ويتحاكى ياما

 
الباب العالى قرر ف سنة تالية
انه يتحدى الوهابيين 
وخرج المحمل الشريف من الشام بالحجيج 

الوهابيين قطعوا عليهم الطريق قاتلوهم ونهبوا القافلة

ومنظرك بقى زفت يا سلطان يا عثمانلى .

طب وبعدين ؟؟!!!

المفروض البهوات ليهم هيبة وسطوة ونفوذ
على الاماكن المقدسة دى 

ازاى يتمرمطوا بالمنظر دا 

أضف الى ذلك ... اهم حاجة

الفلوس ... يا مونشيرى 

طرق التجارة والمكاسب اللى كانت بتعود على الباب العالى 

كلها انقطعت وخيرها راح للوهابيين 

دى اكبر خسارة لهم

والفلوس راحت 

والهيبة راحت 

والباب العالى لقى نفسه محووج لمحمد على
وان كانلك عند الكلبببب حااااااااجة 
قوله الحقنى يا سى محمد !

سنكفولة كان قالق الباب العالى برغباته الواضحة
ف الأستقلال بمصر
كذا مرة يبعت يطالب بصنعة لطافة 
ان مصر يبقالها وضع خاص وامتيازات 
والباب العالى يرفض بدبلوماسية 

كان باينلهم انه راجل مش سهل 

وهما مش طايقين يبصوا ف وشه 

بس نعمل ايه للزمن اللى حوجهم لقفاه ؟؟

الجدع كان مناسب لهم بسبب الموقع 

منه للحجاز مسافة السكة على رأى #المخسوف 
ربنا ياخده

زائد انهم طلعوا حملات من اليمن والشام
 ومنفعتش ببصلة !

سنكفولة راخر قديم وقرارى ..
فاهم انهم مستعدين يضحوا بيه ف حرب ضروس

الشهادة لله هوه اتهرب مرتين من طلب السلطان 

1807 قال بحارب الانجليز

1808 قال اصل عندى كالوا ف ف صوابع رجلى

وبعدين سنة 1810 مقدرش يتحجج بحاجة بقى 

وقرر يوافق لغرض ف نفس يعقوب

ومحدش ف الأطراف التلاتة كان بيعمل حاجة لله
عشان نبقى على بينة من الاول 

كل طرف كان عاوز نفوذ اكتر

عاوز سلطة اكتر 

عاوز فلوس اكتر

#نقطة

والتلاتة اتمحكوا ف الدين وحماية المقدسات 

والتلاتة اراقوا الدماء واستباحوا الأرواح

والتلاتة ولاد وسخة من الآخر


 

طب الباب العالى والوهابيين وعرفنا غرضهم 

محمد على كان عاوز ايه من الحرب اللى شكلها
 من قبل ما تبدأ صعبة وقاسية ومكلفة دى ؟!!

الحقيقة سنكفولة كان عنده اكتر من سبب 

اولهم 
انه لما يكسب الحرب دى يبقاله مكانة عند الباب العالى

ثانيا 
عاوز يجرب جيشه اللى كونه ودربه 

ثالثا
عاوز يوطد سلطانه خارج مصر
خصوصا طرق التجارة عشان ميبقاش تحت رحمة حد

رابعا 
يخلص من الأرناؤوط اللى كانوا عاملينه صداع ف نافوخه

والأرناؤوط دول اخر سلسال الكتيبة الألبانية
اللى جت معاه من بلده وقت الحملة الفرنسية 

وكانوا عصيين على الترويض

قال اوديهم هناك يمكن يموتوا واخلص منهم !!

القصد  

سنكفولة هيوافق على طلب الباب العالى
 بتجريد حملة الى شبه الجزيرة للقضاء على الوهابيين 

ويبدأ ف اعداد الجيش المناسب 
رجالا وعتادا واسلحة وكدا

والرافعى اللى بيقول ف كتابه "عصر محمد على" 

"واخذت الحكومة تجهزها بالرجال والعتاد
وقطعت في ذلك ستة اشهر ونيفا
الى ان صارت على اهبة الرحيل

 وبلغ عدد رجالها  8000 مقاتل
منهم ستة آلاف من المشاة وألفان من الفرسان
بينهم الكثير من  البدو "

ومين يا شوشو هيكون قائد الحملة دى ؟؟

الامير طوسون ... ابن محمد على 

كان وقتها عنده 17 سنة بس
 وسنكفولة قرر يبعته على راس الحملة 

كان بيحبه اكتر من ابراهيم ..
اللى كان الاكبر سنا واشطر واكثر خبرة 

وبيقولوا انه كان بيفضله - طوسون- على ابراهيم
اللى مكنش فيه بينهم عمار قوى ..

وكان بيعد طوسون لأنه يخلفه على العرش 

بعد حين يعنى 

المهممممم ... 
بقى طوسون القائد

وقبل ما تتحرك الحملة نعمل الأول مدبحة القلعة 
على ما قُسم كدا 

عشان ربنا يباركلنا ف الخروجة 

ولا ايه ؟!!



 

ومحمد على قرر ينتهزها فرصة لجمع المماليك
 ودبحهم زى الفراخ عشان يأمن ضهره
لو ساب البلد فجأة ف أى وقت

يلحق بإبنه ... ويجد ف الامور أمور

بس وبعد المدبحة بشوية صغننة
اتحركت الحملة برا وبحرا بأشراف من محمد على 
لحد السويس 

ثم كمل طوسون الى ينبع

وخلوا بالكم .. 

احنا دلوقتى هندخل ف الجد 

وهتسمعوا كتييييييييير طول الحرب دى
عن الجبال والوعورة والمشقة واللمرض والعطش
والكر والفر والخيانة وحاجات كتير

ف الاول طوسون هيحتل ميناء ينبع

وبعدين يتجه لبدر ويحتلها روخرا .. سنة 1811 

حلو ؟

لا مش حلو
 

 


عشان اول ما يدخل على وادى الصفراء

هياخد علقة موت هوه وعساكره
 لدرجة انه ينقتل منهم كام الف جندى ف نوبة واحدة

ماتوا من القتال يا شهرو ؟

لأ حضرتك دول وهما راجعين لميناء ينبع
هيتوهوا ف الصحرا ويموتوا عطشا 

مش بس كدا 

دا العدد هيزيد ف السكة عن كدا

و يبقوا اربعة خمسة ستة سبعة .. الاف
وميوصلش ينبع الا 3 الاف مقاتل فقط 
من الجيش المصرى 

#ياحلولى

روخر محمد على كانت هتجيله نقطة !

بس على مين ؟

اللى ماتوا يغوروا ونجيب غيرهم عادى 

اللطيف انه انشكح فقط
لأنه خلص من الألبان اللى كانوا قارفينه
ودى كانت الحسنة الوحيدة للهزيمة

ومحمد على قال لطوسون كِّن بقى ف مطرحك
 لحد ما ابعتلك مدد 

لكن نصحه النصيحة اللى بتنفع ف كل زمان ومكان
مع العالم اللى زى كدا

حكمة سقراط الشهيرة ..
 لما قالك الفليوس الفليوس كل شىء ييجى بالفيلوس

وسنكفولة قاله ابدر المال يمين وشمال
عشان تشترى ولاء القبايل ف المنطقة !

 
ولو منفعش سيف المعز هادى بدهبه

والنصيحة دى 
هتجدى نفعا ف الخطوات القادمة كلها الحقيقة 

الجبرتى بيقول :

"في 24 رمضان سنة 1227 (أول أكتوبر  سنة 1812)
وردت هجانة  مبشرون باستيلاء الاتراك
على عقبة الصفراء والجديدة  من غير حرب

بل بالمخادعة والمصالحة مع العرب
وتدبير شريف مكة (الشريف  غالب)،
ولم يجدوا بها أحدا من الوهابيين،
فعندما وصلت هذه البشائر ضربوا  مدافع كثيرة
تلك الليلة من القلعة"

وسقطت الصفراء ف ايدى طوسون 

وكمل السير لحد المدينة ...
وبعد حصار بسيط واحداث ثغرة ف سورها دخلوها

وبعد المدينة .. دخلوا الحناكية 

ثم اتجهت الحملة الى مكة 1813 الكلام دا يا ولاد

بس قبل مكة رجعوا ينبع تانى 
ومنها الى جدة ثم مكة 

 

وكدا المقدسات بقت تحت ايد محمد على
 والعثمانلية من تانى 

وبقت هيصة

الجبرتي بيقول :

"وفي يوم الثلاثاء 7 صفر سنة 1228
(9 فبراير سنة 1813) وردت بشائر من البلاد الحجازية
 باستيلاء العساكر على جدة ومكة من غير حرب

فضربوا مدافع كثير، ونودي في صبح بزينة المدينة
ومصر وبولاق، فزينت خمسة  أيام أولها الأربعاء 
وآخرها الأحد"

ناخد بالنا ... من غير حرب 

وبمساعدة الشريف غالب

الشريف غالب دا كان من الد اعداء الوهابيين
 لأنهم قلصوا نفوذه ومنعوا عنه الخير
اللى كان بيجيله من التجارة وقوافل الحجيج

فتحالف مع محمد على طبعا

بمنطق عدو عدوى يبقى صاحبى 

القصد 

محمد على انتهز الفرصة وبعت ابنه اسماعيل كامل
 ومعاه لطيف بك على استنابول بمفاتيح مكة والمدينة

والاتنين ادتلعوا ايما دلع هناك 

بس لطيف بك لما يرجع هيشوف ايام سودة 

حكينا حكايته هنـــــــا  يا عيال

كل دا ولحد دلوقتى 
مسمعناش اسم سعود بن عبعزيز
 خااااالص 

كان نايم يا ولاد ولا كان مسافر ولا ايه ؟!!

لأ

ابضننننننننن

الراجل كان مرقدلهم حرفيا

استنى يراقب تحركاتهم وقدراتهم ونقاط ضعفهم 

وبعدين راح مديها بقى 

جهز جيشين بقيادته وقيادة ابنه .. فيصل 

وطلعوا ع الجيش المصرى فى "تربة"

وجيش بيحارب ف تربة 

والتانى بيضرب ف الحناكية 

وفين يوجعك 

طوسون واللى معاه انهزموا 
وخرجوا من المواقع دى هربانين

وزاد الطين بلة بعد الهزيمة
تردى الحالة الصحية للجند والاعياء والعطش 
والاصابات الخ 

والرافعى بيقول :

" ففتكت بهم الامراض  فتكا ذريعا

وقد أصاب الجيش من المعارك والأمراض خسائرفادحة
بلغت من بدء القتال نحو ثمانية آلاف قتيل

وفقد الجيش من مؤونته نحوخمسة 
وعشرين ألف رأس من الماشية

وتكلفت الحملة الى ذلك الحين 35000 كيس
أي 175.000 جنيه "

من فلوسنا دى يا ابو سامية 

كل دا من فلوسنا يا حبيبى اومال من جيبك انتا ؟!!

وبس  طوسون لقى نفسه محتاس 

رجع يتحصن بما حصل عليه سابقا 
 مكة والمدينة وجدة وينبع

وبعت لسنكفولة

يقوله انا انضربت يا بابا وابعتلى مدد !

سنكفولة طبعا مش هيعجبه الاخبار دى 

وهيقرر انه يبعت المدد فعلا 

بس هوه كمان هيروح بنفسه يشوف ايه الحكاية دى !

 


ويا وهابيين 
خبوا عيالكم ... محمد على جالكم 

وماذا سيحدث لما هيطأ بقدمه شبه الجزيرة 

بكرة نكمل يا عيال الحدوتة 

تصبحوا على ألف خير

----------------------------------