الصـــالـح طــلائـــع أومـــيــجـــا

حدوتة الليلة دى

من العصر الفاطمى

وتأتيكم برعاية عبفتاح أوميجا

الحكاية مصادرها كتاب حسن عبدالوهاب

والعمدة المقريزى طبعا

وعم ابن تغرى بردى

وآخرين

وانتوا عارفين الفاطميين
 بدأ حكمهم لمصر من المعز لدين الله

وانتهت خلافتهم بالعاضد

وكان الحكم وراثى من اب لأبنه .. الخ

لكننننننننن

هنيجى عند الخليفة الآمر .. 
والموضوع يختلف شوية

ابنه هيكون لسه ف المهد

الحاشية هتختار ابن عمه يكون وصى

الجدع بعد شوية يطمع فيها

الرضيع هيموت فى ظروف "غامضة" 
ويتنصب الوصى خليفة
 ويسمى .. الحافظ لدين الله

اللهمقوىايمااااانك آحاج

يعيش ويحكم قد ما يحكم 
ثم لازمن ولابد هيموت ابو الحفافيظ

ويمسك مكانه ابنه

الظافر

...

وانتوا عارفين بقى

الفاطميين من بعد الشدة المستنصرية

وظهور نجم بدر الدين الجمالى فى سماء البلد

والدولة المصرية يحكمها الوزير 
فيما يسمى عصر الوزراء العظام

وشهروزة تسميه عصرالوزراء اللئام

المهممم

الظافر كان الخليفة

ومناظر طبعا اكتر منه قصة

والوزراء المتتالين يتعاقبوا عليه 
وهما اللى بيحكموا فعليا

لحد ما هنوصل للوزير عباس

هىء هىء

عباس الوزير كان داهية

لكن ربنا ابتلاه بإبن 
هيكون سبب هلاكهما معا

انا حكيت القصة دى قبل كدا

بس نقولها تانى

لأنها حجز زاوية ف قصة الليلة

عباس كان عنده ولد اسمه .. نصر

الواد كان حليوة بزيادة الظاهر متعرفوش

المهم ان الخليفة الظاهر كان مصاحبه
 وبينهم حاجات وعلاقات وهكذا

ابن تغرى بردى اللى بيقول اهو :

"إن الظافر كان قد أحب نصر بن عباس
 حباً شديداً، وبقي لا يفارقه ليلاً ولا نهاراً "

الناس لامت على الوزير عباس 
وقالوله فيما معناه ما تلم ابنك 
سمعتكم بقت زفت 
الخ

الراجل خاف على منصبه

والعلاقة دى اللى ممكن تبوظ كل مكاسبه

ومتفهموش بقى

 بعت لابنه

وشوف يا خويا الراجل بدل ما يعقله 
ويقوله ابعد سافر اعمل اى نيلة

راح متفق معاه يقتلوا الخليفة ... !

الله .... ايه يا جماعة مالكوا ؟

المهم عشان منطولش ف الاحداث دى

الأبن استدرج الظافر اللى رايح لا بيه ولا عليه 
يا كبدى
 عشان يقضى
 🎶 ليلة حووووب حيلووووة🎶

على رأى الست

بعد العشا والهزار والفرفشة 
هينقض عليه نصر وعباس ورجالتهم

ويقتلوه🗡️

هوه و2 من حرسه كانوا معاه

ويدفنوهم ف ارض الدار زى ريا وسكينة

وتانى يوم يروح الوزير عباس 
بكل قلب بارد على القصر

يسالوه فين الخليفة

يستهبل

يسالوه تانى

يستعبط

يقولوله اسأل المحروس ابنك

يقع ف حيص بيص

وف حركة
 من بتوع "خدوهم بالصوت ليغلبكوا" دى
يروح لامم اخوات الظافر

يتهمهم بقتل الخليفة

يقتلهم ف قاعة الحكم

وينصب ابن الظافر خليفة

#آحالولى

ويسموه "الفائز"

الولد يقال ان كان عمره سنتين 
وف مصادر اخرى 5 سنين

المهم الواد شاف الدم مغرق المكان  
اتسرع 
وجاله حالة صرع لازمته لحد مماته

والوزير عباس قتل اخوات الخليفة لانهم كبار
 وممكن يقرفوه 
ويقولوا احنا نبقى وصيين على ابن اخونا

وهوه عاوزها خالصة مخلصة

وتصور انه نجح بقتلهم وارتاح

وقتلت الرجالة يا خويا

اهو هيطلعلك الحريم

وما ادراك ما الحريم

خصوصا نساء القصر الفاطمى

قابل بقى 

 

اخوات القتيل والأخوة المقتولين بعده

وربنا يكفيكوا شر غضب الحريم 

هيفضحوا اللى عمله عباس فى كل حتة

الخبر هينتشر

والمصريين يعرفوا

وتبقى هيصة 

عباس بقى يمشى ف الشارع الناس تجرسه

وياريتها جت بس ع الجُرسة

دى هتحدفه بلى فيه النصيب

آه والله

"وصار الناس  تسمعه المكروه في الطرقات
 من كل فج، حتى إنه رمي من طاق
 ببعض الشوارع وهو جائز بهاون نحاس،
 وفي يوم آخر بقدر مملوءة ماء حاراً"

بيحدفوه بهون نحاس 
من اللى بنشيله بالعافية دا !!

خخخخخخ

" فقال العباس : ما بقي  بعد هذا شيء
 فصار يدبر كيف يخرج وأين يسلك"





واخوات الخليفة المقتول 
 وعمات الخليفة الجديد يسكتوا .. ؟

لأ طبعا 

دول هيعملوا خطوة أكثر قوة 

لزحزحة عباس والانتقام منه

ولنا 

هنا

وقفة

فلاش باك بقى 

30 سنة الى الوراء 

ف العراق 

حيث مشهد الامام على (رضى الله عنه ) بالنجف

الرواية دى قالها المقريزى وتغرى بردى 
وغيرهم 

لكن بما انى شهرو 

هاخدها بعين شكاكة

وويشاطرنى من بدرى 
حمدى ابو جليل ف كتابه عن مساجد مصر  
الشك مش ف الناقل 
وانما ف الرواية نفسها 

لأنه يقال فيما يقال انها روجت
 عشان تعمل شرعية لصاحبها فيما بعد
 ف اللى ناوى يهببه وكدا



 
قالك ايه يا سيدى 

ان جماعة من الفقراء الشيعة الامامية 
كانوا ف زيارة لمشهد الامام على 

قام سادن المشهد الامام ابن معصوم 

نام وقام برؤية

ولما صحى نده على احد اللى كانوا بايتين 
ف المشهد اسمه .. طلائع

وقاله ايه ؟

سيدنا الحسين دعانى 

لأ مش دى 

الساعة الاوميجا والسيف 

يوه مش دى !!

المقريزى بيقول اهو :

"فرأى ابن معصوم فى منامه الامام على بن أبى  طالب رضى الله عنه وهو يقول له قد ورد عليك الليلة أربعون فقيرا من جملتهم رجل
 يقال له طلائع بن رزيك من أكبر محبينا 

  قل له إذهب فقد وليناك مصر"

آحبيبتى يا مصر 

فقالك ايه بقى 

الاخ طلائع قرر يمشى ورا الرؤية 
وراح مسافر على مصر 

وفيها التحق بخدمة الفاطميين 

ايام الآمر 

وقد يترقى لحد ما مسك الاشمونين

وناس بتقول منية ابن الخصيب 
اللى هيا المنيا دلوقتى 

المهم الراجل تمركز ف البلد

وعمل جهده 

منتظرا الوقت المناسب للوثوب ع السلطة

وبعد 30 سنة تقريبا 
من صراعات القصر الفاطمى 

هذه اللحظة حانت يا عيال 

لما انقتل الظافر

واظهر وقتها كل عبده مشتاق حزنه
 واستعداده للثأر

ابرزهم كان طلائع بن زريك 

اللى نساء القصر الفاطمى بعتوله ضفايرهم مقصوصة مع خطابات تطلب مساعدته لنجدتهم 

والثأر للخليفة المغدور 

قوم اييييه

طلائع هيمسك ف الفرصة بإيده وسنانه 

ويلم اتباعه وجنده 

ويحط الضفاير على آسنة الرماح 

ويسير زاحفا الى القاهرة 

عباس سمع بهذا ركبه خبطت ف بعض

واثناء تفاديه للهون والمية المغلية :

" فأشار عليه بعض أصحابه  بتحريق القاهرة قبل خروجه منها فلم يفعل،وقال: يكفي ما جرى" 

#أصيل يا ابو سامية

وعباس خد ابنه نصر 
وجررررى على الشام هربا من طلائع
 اللى دخل القاهرة منتصرا من غير قتال 

ف وسط موكب وزغاريد وصواريخ 
وليزر وفضائيات تتابع الخ

طلائع هيجيب حرس الوزير الهارب 

يقررهم 

يقولوا الخليفة المقتول فين 

يروح طلائع البيت 

 "وأخرج جسد الظافر من البئر 
التي كان رمي فيها بعد قتله

وجعله في تابوت ومشى بين يديه حافياً مكشوف الرأس، وفعل الناس كذلك،وكثر الضجيج والبكاء والعويل في ذلك  اليوم"

وينصب طلائع وزير للخليفة الفائز

  



"وجلس في دست  الوزارة،
 وتلقب بالملك الصالح "

وبقى 

" الملك الصالح طلائع بن رزيك، 
وكنيته أبو الغارات "
واللى كان أرمني الأصل

كما قال المقريزى
.... 
طول عمرهم شاطرين الجماعة دول


 



طب عباس وابنه ؟؟

"وأما عباس ومن معه
 فإن أخت الظافر كاتبت الفرنج  الذين بعسقلان
 الذين استولوا عليها من مديدة يسيرة،

   وشرطت لهم مالاً جزيلاً
إذا خرجوا عليه وأخفوه
فخرجوا عليه فواقعهم فقتل عباس 
وأخذت الفرنج  أمواله "

طاه 

البومبناية الملبساية نصر ؟

لا .... دا اتقبض عليه 

واتبعت ف قفص للقاهرة

وهيجرالك ايه يا أنص ؟؟

"ثم خلعت أخت الظافر يد نصر 
وضرب ضرباً مهلكاً وقرض جسمه
 بالمقاريض .. "

ايه المقاريض دى يا شوشو ؟؟ 

حاجة زى اللى ف الصورة دى بس على أبشع

 "ثم صلب على باب زويلة حياً 

ثم مات"

خلاص كدا ؟

لسه

"وبقي مصلوباً إلى يوم عاشوراء 
سنة إحدى وخمسين"

يعنى علقوه ميت ... سنة كاملة

 "ثم أنزل وأحرقت عظامه"
 .... 
 

بس يا سيدى 

" وتكفل الصالح طلائع بن رزيك بأمر الصبي 
أعني الفائز وساس الأمور
 وتلقب بالملك الصالح "

😁

ونركز يا عيال

احنا دلوقتى سنة 1154 م

الخليفة الفاطمى هو الفائز

الوزير بتاعه هوه الملك الصالح طلائع

والخليفة عيل

ووزيره بيلعب بيه زى الشخشيخة

ونخلينا فاكرين كويس

العسكر اللى ف الاول بيبقوا زى السكر 

ثم يطفح علينا المرار بعدين 

ف القصة دى 

صورة طبق الاصل علقة كل مرة 

يعنى
الراجل يا خويا دخل علينا دخلة البطل
 اللى جاى ياخد بثأر الخليفة 

واخد تبجيل مأخدوش امير الجيوش بدر الجمالى
على سن ورمح

#التطبيل كان على ودنه على ودنه

لم محاسيبه واهله 
واولهم ابنه .. زريك
مخابرات حربية ورقابة ادارية وكدا ...

وحارب منافسيه 

وقتل منهم عدد مش وحش عشان يخلص منهم 

واحكم قبضته على كل شىء

 "وعظم أمر الصالح طلائع"

بن تغرى بردى بيحكى :

"ولما  استفحل أمر الصالح طلائع 
أخذ في جمع المال؛
 فإنه كان شرهاً حريصاً على  التحصيل"

..

لبن اطفال وسكر وأدوية ..مخلاش ف نِفسه

ونفى بعض الامراء للصعيد 

والبعض التانى خصوصا اقوى 2 فيهم

" فتكاثر عليهما الأجناد فقتلا
 ونهبت دورهما بأطماع الصالح 
طلائع  بن رزيك في ذلك"
 





تغرى بردى كان مش حابه واضح 

المقريزى بقى واضح انه كان معجب بيه شوية 

لكن مع ذلك مقدرش 
ميقولش على عيوبه الفادحة 

"ولما ولى الوزارة 
مال على المستخدمين بالدولة وعلى الأمراء 
، وأظهر مذهب الإمامية وهو مخالف لمذهب القوم ،

 وباع ولايات الأعمال للأمراء بأسعار مقرّرة
وجعل مدة كلّ متولى ستة أشهر ، 
فتضرّر الناس من كثرة تردّد الولاة على البلاد ، 
وتعبوا من ذلك"

ما هذا .... ؟
بتتربح من وظيفتك مستغلا نفوذك يا طلعوئة ؟؟

إخص



 

وقالك كان عنده مجلس أدب وكان بيقول اشعار 

وناس شككت ف ذلك 
وان كانله ندماء شعراء هما اللى بيصلحوله 
الحوار الحمضان دا .... !!

...

كان عنده سنة جنون عظمة واضح





 
والشعب المصرى هيئن من الغلاء

لكن بما انه اتهبب فرح بيه ف الأول 
والسلطة ف عبه والقوة الخ

فخلاص هيسكت 

ويدعو الى الله زوال الغمة 

لكنننننن
كل ظالم رجله بتوديه لمصيره الاسود 

الخليفةاللى كان طلائع كابس على انفاسه
 " وكان الفائز معه كالمحجور عليه "

هيموت سنة 1160 م

فطلائع جررررى يكرر عملة عباس

ويجيب ابن عم الفائز .. 
كان عيل ابن 10 حداشر سنة 

وينصبه خليفة 

مدعيا ان الفائز اللى اوصى بكدا 

الفائز العيييييل قال كدا .... ؟!

طيب

والخليفة الجديد .. العاضد 

طبعا هيسيب كل حاجة لوزيره 

اللى هيجوزه بنته 

بنت طلائع يعنى 

عشان يسيطر ع الامور تماما بزيجة السلطة د

ويغلط الغلطة اللى هتجيب داغه 

لما 

"وضايق القصر طمعاً في صغر سن الخليفة،
 فتعب  الناس معه"

وتااااانى 

تظهرالنساء ف الصورة من تانى

واحدى عمات الخليفة السابق " الفائز" 
هتكرى على الوزير طلائع

وتبعتله فرقتين واحدة عند القصر

واحدة تانية عند  مكان خروجه من عمله

وينقتل عند القصر الفاطمى بليل
"فوقف له رجال بدهاليز القصر 
وضربوه حتى سقط على الأرض على وجهه 
،وحمل جريحا لا يعي إلى داره"

ومات اللى قيل عنه ف توقيت ما

"فعند ذلك خلت القاهرة 
لطلائع بن رزيك من مماثل" 

وعلى رأى #الفاجومى 

جاب حرس بالبتاع 

وبرضو مات مقتول



 
اللى حصل بعد كدا ؟؟؟

متكرر ومتعاد 

وكله درس لمن يعتبر 

بس نقول لمين ؟؟؟


 
يعنى 

بعد الوزير طلائع بن زريك ما مات 

ابنه قفز على السلطة فورا 

زريك بن طلائع افندى ابو دبورة زى بابا 

الجدع يقال انه كان متسامح عن ابوه
يعنى سامح ف دم ابوه 
ومنتقمش من العمة اللى كرت عليه 

لكن 

بعد شوية 

العاضد 

الخليفة الجديد كان كبر سنة 

وقرر يتخلص من نفوذ زريك 

فبعت لشاور





شاور هينجح ف قتل زريك 

ويتوز هوه 

وكانت دخلته زفت 

وآل جبتك يا عبدالمعين ..

" فعامل العاضد  بأفعال قبيحة  
وأساء السيرة في الرعية"






فيظهر فجأة .. أبو الأشبال ضرغام بن عامر 
من الصعيد

اللى هيطمع ف اليغمة دى 

فييجى يحارب شاور 

اللى ابنه هينقتل ف المعركة

ويهرب شاور ع الشام



وف الشام هيلجأ للسلطان نور الدين زنكى 
ويقوله تعالى خد مصر 

ويا واد خد سوسو
خد سوسو 

نور الدين عجبته الفكرة 

وبعت اسد الدين شيركوه

اللى هيدخل مصر

ويموت شاور وضرغام وكل الهلمة دى 

ويموت كمان اسد الدين شيركوه 

عشان يفضل ابن اخوه 

صلاح الدين الأيوبى 

اللى هيعينه الخليفة العاضد وزيراااا له
وطبق الأصل العلقة اياها 

وانتوا عارفين 

ماذا فعل صلاح الدين بالعاضد

لما حبسه ف قصره وخلاه شرابة خرج

لحد الواد ما اتحسر

ومات بسن الـ21 مقهور
ولا طال بلح الشام ولا عنب اليمن

وبموت العاضد تقف الخلافة الفاطمية بمصر
 لحد كدا

ودى كانت نهاية فرقة عكاشة المسرحية




وتبدأ حقبة زمنية جديدة 

دولة ايوبية 

بصراعات 

وخناقات 

وتوريث 

وحروب طاحنة

وظلم 

وخراب

وقرف 

وهم ما يتلم

وانا خلاص خلصت 

فاضل الملاحظااااااااات

1) قبل أى حاجة .. 
حريم القصر الفاطمى دول يتفاتلهم بلاااد 
وقارات

ايه المؤامرات دى

والقسوة دى

والانتقام دا

الله يخربيت اللى يزعلهم يا شيخ

2) بخصوص حوار الظافر ونصر وكدا
يا ولاد انا متفهمة
ان العصر له ظروف مختلفة
بس خليفة وسلسال الامام على (كما يقال) 
يصح يصدر منه هذوها الافعال
خصوصا انها أثرت اهى على وضعه 
وخلته يخسر حياته 
ويدخل البلد ف دوامة وتبقى نهيبة ؟

3) حوار الرؤية الى روجت 
عن طلائع بن زريك
وروح قد وليناك مصر دى
ايه يا خويا البلد اللى كل شوية حد يطلعلنا 
يقول حلمت بيها وهمسكها 
وبعدين يطلع البلا على جتتنا دا ...  ؟؟؟




4) يا شهروزة انتى مبتحبيش العسكر ليه ؟
عشان اسم الله على مقامك
كلهم صنف واحد
يبتدى متعففا
ف صورة المنقذ
ثم بعد ذلك يقبض تمن ذلك فادحااا


 
يعنى الراجل معملش حاجة عدلة خالص ؟؟؟
لأ
عمل طبعا
بنى مسجد عند باب زويلة
ومرة هنحكى عنه لما نقول ازاى رأس الحسين الشريفة جت عندنا
 



5) المقريزى بيقول ان طلائع قبل موته كان قلبه حاسس
وفيه رواية انه نطق بإسم الوزيرعباس
 قبل مماته
الظاهر ضميره كان واجعه من ناحية عباس 
 واصل الطينةم العجينة 
وكلهم اشكال متغيرة لشخص واحد 

6) العاضد دا وش فقر وبوزه ناشف
كل اللى جم ف عهده خربوها
وهوه كمان كانت نيته سوّ 
على صغر سنه ... 
سبحان الله ... 
أقدار ومفروضة !


7) القصة دى مليانة اسماء بالهبل 
طمعت ف الكرسى
 وجريت عليه جرى الوحوش
ولم تلتفت للمصير الملاصق للمنصب
زى ما بيرفعك لفوق قادر يخسفك بثانية!

8) وفى سياق متصل ..
 انا عاجبنى قوى حوار رمى الهون 
والمية المغلية من البيوت دا
والنبى احنا شعب عسل ..
ورايق كدا
ويغلبونا .. مبنغلبش

وبس خلاص خلصنا
موشكرين لكل اللى قال كلام حلو
..
كان معكم
شهرزاد ابو العااااافية
 من زمن الفاطميين
الكااااااهرة
..
تصبحوا على ألف خير 


--------------------------