حكاية النهاردة اساسى
اعتمدت فيها على مصدرين اساسين :
1) قصة الثروة فى مصر
لـ د. ياسر ثابت
2) الشخصية الوطنية المصرية : قراءة جديدة لتاريخ مصر
لـ د. طاهر عبدالحكيم
والحدوتة هتبدأ بعد رحيل الحملة الفرنسية بكام سنة
لما يبقى خورشيد باشا هوه الوالى الموفد
من قبل السلطان العثمانى عشان يحكم مصر
شوشو يا دوب قعد شوية
وف اول سنة من حكمه الدنيا اتخربطت
وعساكره عاثت فسادا ف البلاد وخلتها خّل قوى
فالشعب المصرى
اللى كان لسه كارش الاحتلال الفرنسى
وداخل ف فترة انتقالية زى الزفت
مبقاش قادر يتحمل ظلم اكتر وروحه ف مناخيره
قوم ايه ؟
الناس ضجت من الشكوى واتلموا جماعات جماعات
وراحوا للمشايخ
اكمن الازهر كان هوه النخبة السياسية وقتها
وجزء من المقاومة ضد الفرنساوية
وحدث الآتى
الناس قالوا لعمر مكرم تحديدا ..
ان عسكر الوالى (طايفة اسمها الدلاتية)
دخلوا علينا بيوتنا نهبونا
وخطفوا عيالنا
وهتكوا حريمنا
وشوفلنا صرفة يا شيخنا !
واحنا مش هنسكت ع الظلم اكتر
وكفاية غار الفرنساوية بقرفهم هيبقى كمان العثمانلية ؟
المهم من هنا لهنا عمر مكرم
وبعض مشايخ الازهر اتلموا وعملوا قعر مجلس
وقرروا يخرجوا من بيتهم لبيت محمد على
اللى كان وقتها سهّنة وعامل جدع وحريص ع البلد
وقومّ ثورة ضد البرديسى من شوية صغننة
لما عمم ضريبة هبلة كدا
ومحمد على سجّن عليه الجند
وبعدين وقفله وعمل شجيع السيما قصاد الشيعب
وقصره ...
اخيرا نجح يطفشه م السلطة
وبقى فرخة بكشك عند المصريين
ومحمد على اصلى بحبه قوى قوى قوى
وعملوله شكولاتة
وتسلم الايادى
ودا دكرررر
وانتا تشاور بس
والنجوم تحبل
ويبقى فاضل رجالة تطلع تقول
ازاى يا عزيزة ... دا راجل انا ذات نفسى استمناه
#عبفتاح _القصرى_استايل
المهم عمر مكرم واللى معاه والناس
تصوروا ان محمد على بنفوذه وفرقته
ممكن ينضملهم ف ثورتهم ولازم هيتحمس
ويساعدهم ف القضاء على خورشيد باشا
وفعلا هيروحوله
وحسبما يذكر الجبرتى هيقولوله وش كدا
احنا عاوزين نعزل خورشيد من الولاية كفاية عليه كدا !
فمحمد على سألهم
وتحطوا مين مكانه ؟
قالوله انتا !!
محمد سنكفوله هيعمل نفسه مخضوض ويقول لأه
ويتمنعن وهن العايزات
وبعدين يوافق ويقولهم ماشى ..
قشطات
بس روحوا للوالى بلغوه الخبر بنفسكم !
ستوب .. لثوانى
وانا هستوب كتير ف القصة دى
بس محمد على لما قالوله عاوزينك مكان خورشيد
قالوا نصاً
«لا نرضى إلا بك وتكون والياً علينا بشروطنا»
يعنى كانوا فاكرينه ابن ناس وهيسمع الكلام
فالداهية الألبانى وطى راسه
وقال حاضر ..
بس ف نفس الوقت عمل ترتيبات انه يهرب
لو جد ف الامور امور ..
المهمممم
هيروح عمر مكرم والشيخ الشرقاوى
هيطلعوا القلعة ويبلغوا خورشيد باشا بالحوار
فيقولهم انا معايا الشرعية والملوخية
وانا والى منتخف
وفاضلى 3 سنين ... الخ
وبصلهم بأحتقار وقالهم :
"إني مولي من طرف السلطان فلا أعزل بأمر الفلاحين
ولا أنزل من القلعة إلا بأمر من السلطنة"
م الآخر قالهم انتوا والشعب جرابيع
وانا اللى جايبنى ستكم وتاج راسكم امريكا
قصدى العثمانلية
وانتوا ملكوش وزن ولا استعناكم
وغوروا من وشى يلا ..
الجبرتى بيقول
ان خورشيد فعلا كان نايم ف العسل نوم
ومستهين بالناس ومعتمد على دعم العثمانلية وعساكره
اللى منهم بس 1500 بيحرسوا القلعة مقر الحكم !
ومهتمش بالفوضى اللى ملت الشوارع
والخناقات والفصايل المتناحرة
وان ازاى كل واحد نزل ضربله طلقتين ع الأقل
ف الفرح المنصوب
المهم بدل ما يلمها بهوقها
والناس طبعا دمها اتحرق
وساعتها عمر مكرم طلع فتوى
قال فيها
ان من حق ولاد البلد يعزلوا ولاتهم
"حتى الخليفة والسلطان اذا سار فيهم بالجور فأنهم يعزلونه ويخلعونه"
الكلام دا كان ف شهر مايو 1805
ولاد البلد بقى بعد تجاهل خورشيد لمطلبهم
ونداءات إرحل إرحل
وهوه مطنش
وبعد فتوى المشايخ بضرورة مقاومة الظلم
الجبرتى بيحكى ان العند ركبهم اكتر
واتلموا بالآلآف واللى قدر يشترى سلاح اشترى
وراحوا بالنباتيت والزاد والمية على القلعة وحاصروها
أد ايه تفتكروا ؟؟ 3 شهور يا ثاااامح
تلت تشهر قاعدينله ف ميدان الرميلة
ميدان تحرير زمانه واكلين شاربين متسلحين
وبيهتفوا
مش هنمشى هوه يمشى
والساعة سبعة هنخش عليه القلعة
ف التوقيت دا
كانت المقاومة شعبية من كل الطوايف
نخبة من مشايخ وكبار اصحاب الحرف
وصولا لولاد البلد الغلابة
وكمان اتسندوا عسكريا
من مين ؟؟
من محمد سنكفوله الشهير بمحمد على يا ويكا
اللى قالك بسسسسس
جاتلى ع الطبطاب اهى
ونخش بقلب جامد وبقى يساعد بعساكره
والراجل بصراحة عداه العيب
وقزح
شافها سهلة
وبتتدحرج وجاية حدف ف تقع حجره .. يقوم ويسيبها ؟؟
لأ ميصحش
دا حتى يا نضرى يا نضرى اتعرض لمحاولة اغتيال !
آه والنبى زمبقولكم كدا
شوية من عسكر خورشيد اتقبض عليهم من الناس
ف احد الشوارع
وبعد ما اتعملت السلمية سليمة والطحنة المتينة
سلموهم لمحمد على
واحد من العسكر دول طلب يشرب مية
فكوا ايده المربوطة راح هاجم فجأة
على محمد على وكاااااد ان يقتله
قوم اييييه
نهاره بقى اسود من الزفت والقطران
لأنهم قلعوه هوه واللى معاه كل هدومهم وضربوهم
وبعدين ندهوا جزار ..
ايه .. سنكفولة هيدبحلهم عجل وياكلهم يا طمطم .. صح ؟
بيوجب معاهم اكمنهم ضيوف وكدا ؟؟
لأ يا ضينايا انتا وهوه
دا هيخلى الجزار يسلخ راسهم احياااااء
وبعدين يدبحوهم
وبعدين يفرغوا الجسم من الأمعاء ويحشوهم تبن
ويعلقوا الروس على الحمير
ويمشوا يجرسوهم ف الشوارع
#فلكلور_مملوكى
وحنين قوى محمد على
من يومه الحقيقة
والموقف بقى كالآتى
الناس عند القلعة محاصرة الوالى خورشيد
ومحمد على بيدوس بشبشبه
على اعوان الخصم العنيد المتمرتس ف القلعة
والوقت بيعدى
ومفيش طرف عاوز يتعتع عنه موقفه
فيحصل ايه ؟؟
السلطان العثمانى يقرر يخضع لإرادة الناس
ويبعت لخورشيد يقوله خلاص بقى لم هلاهيلك وتعالى
وnow يعنى now
وهنعين محمد على مكانك لتهدئة الأمور !
وفعلا .. ينفذ خورشيد باشا الامر
وينزل بالهيلكوبتر من قلعة الرياسة
على شرم الشيخ تركيا
ويطلع محمد على مطرحه وسط فرحة عارمة
من الشعب البائس اللى قالك نجحنا
وخلصنا من الوالى الظالم
أستوب تانية ..
ليه بائس ؟
عشان اللى هيعمله محمد على فى الشعب المصرى
اللى اختاره ورفعه على الأعناق لحد القلعة
هيكون زى جزاء سنمار
وألعن
احنا دلوقتى ف اغسطس 1805
لما تولى سنكفوله الرياسة بتأييد شعبى
بعد ما اتمرقع ف الاول زى منتوا عارفين
وقال مش عاوزاها المسئولية تشى
وانا لن أطمع ف سلطة وبتاع
ماشى؟
كان ساعتها لسه ف اواخر الشباب عنده تقريبا 39 سنة
وكان قمر بصراحة ف شبابه
بس ميمنعش ان ربنا يجحمه
#وذوقى_ف_الرجالة_مشلفط_علش
المهم سى محمد ف البداية
كان نحنوح ولطيف وعسولة
وانتوا حبايبى
ونور عنيا ملقتوش اللى يحنوا عليكم
وانا جيييييت نورت البيت
وبعد كل هذا المُحن
لحد ما ابتدى يخطط
كيف يقضى على كل من وصله للسلطة نفر نفررر
ورتب الاولويات
كان عنده كذا حد شامم نفسه
وله نفوذ ع الرعية
واقصد ...
المشايخ والأعيان والمماليك
فقال يبتدى بالأخطر
وهم طبقة المشايخ والعلماء
ليه يا طمطومة ؟؟
المصادر بتقول ببساطة .. لأن هما دول
اللى كان الشعب بيستنجد بيهم وقت الخطر
وبيعتمد عليهم وبيصدقهم
فلازم لو مدخلوش الحظيرة برضاهم
نكسر شوكتهم
وابتدى بالشرقاوى واتنين من زمايله
وقبض عليهم
وضيق على زمايلهم اللى فاضلين وفيهم نفس يعترضوا
وبعدين لما قرر ضريبة
وعمر مكرم رفض يوقع عليها بالموافقة
بعترله كرامته
وعزله من منصبه وبعدين نفاه على دمياط
وهيقعده تحت الأقامة الجبرية يكلم الحيطة
وبعد كدا
إتدور على المشايخ نزع منهم الأراضى اللى تحت ايدهم
الاراضى دى كانت بتجيبلهم ريع كويس
وتعملهم هيبة ومنظر قصاد الناس
فلما اتنزعت منهم
بقى معاشهم على حكومة محمد على وبس
فكان بيسيطر عليهم بكدا !
الشيخ عمر مكرم كان رأس المقاومة
لما الناس شافته بيتبهدل كدا
اتخضوا
وقالوا اومال احنا هيتعمل فينا ايه ؟؟
غلابة يا كبدى
مكنوش شايفين اللى جاى
:(
عشان هما سنتين بكتيره
وهيصحوا م النوم
على خبط ورزع وضرب نار ف القلعة
ودم للركب وما فوق الركب
لما الاخ لاظ أوغلى هيخطط لمدبحة لأمراء المماليك
بمباركة الباشا الوالى
ويموت جواها وبراها ييجى الف ونص روح
بينما محمد على قعد بينفخ ف الدخان ويروق مزاجه !
طبعا مفيش داعى اقول
ان لتانى مرة المصريين هيشوفوا الدم مغرق الشوارع
والعنف سيد الموقف
والتصفية بتطال كل كبرات البلد
عسكر ومشايخ ومحدش عنده أى حصانة !
والناس اتخرعت
وبقت تضرب كف بكف
على الباشا اللى كان حتة سكرة
ماله توحش وبقى غدار ومؤذى ؟
بس الحقيقة السؤال مش هيقعد كتير محيرهم
وهما حبة صغننة وهيعرفوا الجواب بعينهم
لما محمد على يقرر بعد تخلصه من المماليك
انه يعيد ترتيب الامور بشكل واضح
مفيهوش أى تأويل ولا تخمينات ...
المصادر بتقول ان نابليون لما جه مصر
حاول ينقل معاه الفكر اللى كان سايد وقتها
وحاول يتعامل مع الطبقة الوسطى
وكان بالنسباله الوسيط المناسب للتعامل مع الناس
هما المشايخ
مش امراء المماليك مثلا
وكان عامل حصر للأراضى وتوزيعها وملاكها
وبيغازل الفلاحين انه هيردلهم الأراضى
لكن لما جه محمد على
كان له تصور تانى خااااااااالص ف الحكاية دى
وقرر يتخلص من طبقة هتقف قدام مشروعه حجر عثرة
الا وهى .. طبقة الرأسمالية
محمد على كان صايع قرارى
وداهس المنطقة كويس
عاش ف مصر بما يكفى انه يعرف كيف تدار الامور
خصوصا وقت الأزمات
ولاحظ ف حكاية عزل خورشيد دى
انه طبقة التجار والاعيان ال بيخافوا موت على أكل عيشهم
ولما البلد اضطربت والنهب والسلب بقى على آخره
خافوا اكتر وراس المال جبان
وبيمشى على الحبال ف اول القصة سكتوا وخرسوا
بس لما المشايخ سمعت كلام الناس وقامت الثورة
التجار انضمولها حفاظا على مصالحهم
وبقوا كتلة حرجة ومهمة
قوم ايه؟
محمد على بعد ما هرش قوتهم دى
وانهم ف أى وقت ممكن يقوموا مع الحرافيش ضده
هل بت ما هيسكتلهم بقى ؟؟
لأ طبعا
زى ما خلص من المشايخ والمماليك ..
فإيه؟
هيقرر يخلص منهم هما كمان
واهو بالمرة يلم الفلوس بتاعت البلد كلها ف عبه
ومحدش يقاسمه فيها
وقد كان ..
محمد على هيطبق نظام ( الاحتكار)
واللى بيه هينجح ف انه يدمر الصناعة الاهلية ف مصر
لعقود قادمة
ويخرب بيوت خلق ياما كبار وصغار
من كل شكل ولون
ف بداية عهد محمد على
كان فيه 64 حرفة منتشرة ف مصر ف الصعيد والدلتا
ولها مصانع بس اهلية ومنزلية على قد صحابها كدا
مش على كبير يعنى ..
و.. ستوب هنا عشان اقول اهم حاجة
كتب التاريخ المزيفة اللى كلت نافوخنا
بإن محمد على كان بانى مصر الحديثة ورائد المهلبية الخ
#معلش_عبوكو
لأنه البلد خربت واسمعوا الآتى
وبعدين قولولى الكلام دا كان بجد
ولو هتربطوا بينه وبين بتاع
#تحيا_مصر
يبقى عداكو العيب
الأتنين من توب بعض
مع الاعتذار لسنكفوله الأقوى .. الأدهى .. بمراحل
ليه بقول خراب ... ؟
عشان الصعيد كانت مركز للأوانى الفخارية
والحصير وعصر الزيوت و صناعة السكر
وف الفيوم تركزت صناعة النبيذ وماء الورد وغيرهم
اما الصناعة الاولى والأثيرة ف كل عموم مصر
كانت النسج والغزل اللى كانلها مصانع كبيرة وصغننة
حتى ف البيوت الستات كانت بتغزل على انوالها
الناس اللى اشتغلت ف الصناعة دى وغيرها
كان بيجيلهم التجار الكبار يتفقوا معاهم على كميات
ويدوهم الخامات والفلوس
وبعدين ياخدوا الحاجة يبيعوها
وكان احيانا بيتصدر منها لبرا كمان من شدة اتقانها
خصوصا القطن والكتان الخ
قوم ايه ؟
محمد على احتكر كل المراحل
الزراعة والصناعة والتحارة
يعنى مثلا ..
زراعة القطن كان بيبقى تحت اشراف حكومته
وجمع المحصول وبيعه وتصنيعه ف شكل خيوط
وما يليها من منسوجات وخلافه
شوف ازاى ؟؟؟
وفى سنة 1821 .. اصدر امر نصه الآتى :
"منع كافة الاهالى ممن تشغيل كافة انوال الغزل والدوبارة"
ومعاقبة كل من يمتلك أنوال أشد عقاب !
ومنع الفلاحين من صناعة الحصير
الا تحت اشراف الحكومة
وقفل كل مصانع السكر الأهلية
وبنى هوه مصانعه الخاصة للسكر
واحتكر السلعة لصالحه وبس
مش بس كدا
دا استولى على جميع مصانع الزيوت 1833
واللى زاد وغطى العكننة على المصريين
الجدع احتكر صناعة الدخان والنشوق
ولم كل عمال الدخان ف مصر
وحطهم ف وكالة واحدة .. تشتغل بامره هوه وبس
ولا حاجة تدخل ولا تخرج الا بإذنه
#بيحن_لأصله
والله يخربيتك يا واد يا نششقى يا بتاع النشووووق
وعمل عقوبات على اى حد بيبع الدخان خارج الوكالة
ولو حتى كمية صغيرة لأستهلاكه الشخصى !
#بيعد_عليهم_الانفااااس
وستوب هنا كمان
ونقول
مش عيب لما الجدع يخلى عينه على السوق
ويسيطر عليه لمنع الشرقة والاستغلال
لكن الحقيقة هوه معملش كدا لوجه الله والوطشن لامؤاخذة
لأنه ...
الهدف الأساسى من كل الحركات دى كانت
انه يلم الموارد كلها ف ايده
ومحدش يقاسمه ف مكاسبها
بس ياريتها جت على كدا
يعنى يلم هوه المحصول ويبيعه ..
كنا قولنا معلش ..
عسكرى مرتزقة بعيد عنكم
وشبعة من بعد جوعة
ونسيبه يطفح اللى يشبعه وخلاص
انما ابضننننن
دا الوغد كان بياخد الحاجة ويبيعها بعد كدا
قولوا بضعف تمنها ؟
ضعفين
تلاتة طيب ؟
ابضنننن
احيانا كان بيبيعها بخمس أضعاف سعرها الحقيقى ..
#اه_والله
وطبعا خرب بيت ناس كتيييير
والجبرتى بيوصف بدقة :
"كان اشنع البدع المحدثة
فان ضررها عم الغنى والفقير والجليل والحقير"
حد يقولى طب الناس تعتيرض وكدا
اقولكم الحاج محمد على الفرارجى
كان بيشنق علطوووول
وعمل عقوبة الشنق حتى على اتفه الأشياء
وف مرة شيخ طوايف الخضرية
الأخ حجاج الخضرى
اعترض على سعر سلعة ما
ورفض يبيعها بالتمن اللى قالت عليه الحاكومة
راحوا شانقينه
وكتبوا مناشير بالواقعة دى
واتوزعت ف الأسواق ومشى منادى بيها
عشان يفهم الناس عقوبة اللى يخرج على الوالى وأوامره
وكدهون
#ناس_طيبين_قوى
واللى زاد وغطى بقى ان سنكفوله كان بيرشق مخبرينه
ف الأسواق والوكالات عشان يعرفوله مين بينفذ الاوامر
ومين بيتمرد
قوم ايه يا عينى يحصل ايه؟
العمال والصنايعية يبقى ويلهم 3 ويلات
دفع الضريبة وتمن السلعة وكمان اتاوات المخبرين
عشان ميعملوش محاضر كيدية !!!
دا غير موظفين محمد على بقى وفسادهم
اللى عاوزله ليلة لوحده نحكى فيه
وازاى كانوا بيستغلوا نفوذهم
والفساد ف المحليات بقى للركب يا عزمى باشا
المأساة بقى ان الأحتكار امتد للتجارة
والتصدير اللى كان بيجيب مكاسب رهيبة لمحمد على
لدرجة انه ف مرة م المرات
غلب الحاكم بامر الله ... سنة 1816 الكلام دا لما أصدر أمر
بمنع الناس ف احد فصول السنة من اكل
" اكل الفول والحمص والحلبة والخضروات ... !
آه والنيعمة
وكان بيفرض على الفلاحين نوع المحصول
اللى هيزرعوه ايه
ويمشى رجالته تشرف على الزرعة
ومعاد حصادها وبعدين مشالها لمخازن الدولة .. !
وطبعا محمد على كان بيشتريها بأبخس تمن من الفلاح
اللى شوف ازاى إفترا الباشا بلغ بيه مداه
انه كان ممنوع ع الفلاح يمد ايده ياكل من محصوله
#تخيلوا وستوب كمان عندك يا بنى
محمد على بانى مصر الحديثة كان الفلاح ف عصره
لو زرع قمح او رز او طماطم وغيرها
ميقدرش ياخد من زرعته كبشة واحدة حتى
وازاى كان أسد علينا وعلى الاجانب نعامة
لما حب يمسك حد التجارة الخارجية
جاب واحد ارمنى اسمه يوسف بوغوص
وفكرونى مرة احيلكم عنه
المهم ان بوغوص دا سيطر ع الصادر والوارد
وادى االحقوق لبيوت التجارة الاجنبية
اللى ف نهايات عصر محمد على كانت هيا المسيطرة
على التجارة فعلا
وعشان كدا لما انهارت امبراطورية محمد على وجيشه
التجارة وقعت ف حجر الاجانب حدف
والصناعة الوطنية كانت ماتت بسبب افعاله
م الآخر كدا محمد على
كان كل اللى يهمه الجيش
وتكوين الامبراطورية وجيشه اللى كان يدعمها ويقويها
فكان أى صناعة يعملها او انشاء يبنيه
لخدمة الجيش ف نهاية الأمر
وبس
حتى البعثات اللى وداها برا فرنسا وايطاليا والمانيا
كل دا كان لخدمة الجيش
صناعات النسيج والزيوت والسكر وغيرها
كله بيخدم ع الجيش وبس والتصدير كان عشان يجيب فلوس لنفسه وعيلته
اللى بالمناسبة وزع عليها
العيلة يعنى والمحاسبب والقرايب ورجالة الجيش الخ
قولوا كام يا عيال ... ؟
حوالى مليون فدان يا ثااااامح
مليون متمثلة ف اراضى
تسمى الأبعدية والوسية واراضى المشايخ والعربان
كانت عزبة بابا فعلا
والمليون فدان دول مكنش عليهم أى ضرايب تندفع
عزبة بابا بقى قوم الضرايب كلها بقت تتحصل من الفلاحين
و.. بس
وطبعا بالذوق والأدب والشياكة
:)
انا هقولكو على حنية الراجل اللى كنت بتّخرررر .. ؟
عيب عليكو
طيب
هل تفتكروا المصريين
هيسكتوا على الوضع اللطيف المريح الخمس نجوم
اللى عيشهم فيه محمد على دا ؟؟
ولاّ هتصعب عليهم نفسيتهم والبهدلة ؟؟
بكرة نكمل
وهتعرفوا الإجابة ان شاء الله
:)
------------------------
تفائلوا بالخير @Fatoma999
بانى مصر الحديثة على مزاجو,ولمزاجو !!
بورسعيدي حر مستقل @AAbouomar
لم يبتدع مجمد علي هدا النظام
كان موجود مند الفتح الأسلامي
ولم تكن مصر تعرف ملكية الأرض حتي عهد سعيد باشا
Ahmed Rageh @Ahmed_Rageh101
انت عكننتي عليا والله بالحدوتة دي
:(
تفائلوا بالخير @Fatoma999
يا وسية,يا تكية,سرقوكى الحرامية
مصر دى وسية من يومها
:(
Mohammad Diab @som3amasrawy
هما كل اللى جايين من شرق أوروبا
تركيا و ألبانيا و روسيا و الحتت دى
ناس زى السكر و مسالمة جداً
إحـــكى يا شهـــرزاد @ro7albmama2
كلنا .. لست وحدك يا بنتى :)
تفائلوا بالخير @Fatoma999
تخن اهو عن اول صورة,من الهبر اللى هبره من الشعب
:))
amr salem @amrosalim2001
علي جمعه والطيب وحزب النور طلعو مش ساهلين برضه مذاكرين كويس ولاد الهرمه
أنا الدليل @Muh_Magdy
التاريخ في #مصر بيسف تخلع طاغية وتستبدلة بنحنوح
يقوم يفرمك
بس دله على الكرسي وهو هيقوم بالواجب وزيادة #مرار
amr salem @amrosalim2001
ههههههههههههههههههههههههههههههههههه
عارفها عارفها انا القصه دي
دي اتهرست في 7000فيلم قبل كده
ولسه بتتعمل والناس مصدقه
تفائلوا بالخير @Fatoma999
لم اكن انتوى,ولا الشطان فهلو
,انا اللى سهون واعرف من اين تؤكل الكتف:)
د. نورا المصريه2806 @drnoraelmasrya5
يخربيت التفويض وسنينه
تفائلوا بالخير @Fatoma999
يا عينى دايما فى الاول بنفرح !!!
htarek momen @tarekmomen
حاسس ان الحدوتة النهارد ده فيها اسقاط علي الحاضر...
يا خوفي يا بدران
تفائلوا بالخير @Fatoma999
ايه ده ,على طول كده
,طب يدوله فرصه يقول خطاب التنحى حتى:))!!!
تفائلوا بالخير @Fatoma999
الفريق محمد على :)
والله انت حفظتني القصه بالطريقه دي هههه كمان انا مبحبش اقرا القصص بس حبيتها
ردحذف