حــكــايـــات مصـــريـة ... 12

ميساء الخير يا حاج أبو حنان ... 
كمان شوية حكايات مصرية قصيرة ...
طيب نبتدى 

القصة رقم (1) 

وانتا يا نيلة ...
ولأ مستجريش أقولهالكم 
بس انتا يا نيلة يا منّيل ينيلك راااااجل 
هيا ايه حكايتها الكلمة دى 
وليه بيقولولها لما يحبوا يدلعوا حد بزيادة حبتيييين

بيقولك النيلة دى عبارة عن جنس
من النباتات المُحْولة من الفصيلة القرنيّة
بيعملوا بيها ايه ؟
ابدا بيستخرجوا منها صبغة
النبات دا موجود ف الاماكن المدارية والحارة
وكان عندنا ف مصر على حواف النيل من قرون متعدهاش 
قوم ايه .. ؟ 

ييجى المصريين يحصدوه
وبطريقة ما محترفة يحطوه ف فخار
ويكبسوه وشغلانة كدا
المهم يعملوه عجينة زى الخميرة
او يعملوه بودرة .. زى الحنة 

المهم العجينة او البودرة دى بتتحل ف المية
وتدينا لون أزرق فُللى ع الآخر

النيلة تبقى صبغة زرقا
استخدمها المصريين ف تلوين القطن والصوف
وف صناعة الحلى والرسم ع الحيطة

وانتوا عارفين ان الازرق من الالوان الاساسية بقى
فكان مفيش غنى عنه ف صناعة المنسوجات وغيرها
من صناعات
ويقال ان المصريات 
الحريم يعنى

ف فترة ما كانوا وقت الجنازات بيلغمطوا بيه وشهم
كدلالة على الحزن والنكد

وزمان لما عثمان البرديسى فرض ضرايب ظالمة
على المصريين
الستات وقفوله وخرجوا بغطيان الحلل
وقعدوا يضربوا عليها بالكبشات
وغطوا وشهم بالنيلة .. آل يعنى ايامك منيلة يا منيل
وبالمناسبة بقى لغويااا .. الكلمات دى صح

يعنى ف المعاجم هتلاقوا ان كلمة .. نيلة
يعنى "صِباغ أزرق يستخرج من ورق نبات النِّيل"
ونيّل ينيّل فهو متنيّلا ..
#آه_والله_زمبقولك_كدا
 وطبعا ممكن ببساطة نستنتج ليه سموها نيلة
ومش أى حاجة تانية ؟؟
أكيد عشان كانت مزروعة على ضفاف النيل
وبتدى لون ازرق زى لون ميته
#مش_عاوزة_فكاكة_دى
 وبيقولوا ان النيلة دى لحد دلوقتى
بتستعمل ف استخراج الصبغة الزرقا
وهيا اكتر مادة مستعملة فى تلوين البنطلونات الجينز
:)
وبناء عليه بقى



فتعليقى ع القصة دى هيا 
انه لما تيجى تقول لحد يا منيل
تبص كويس الاول هوه لابس جينز ولاّ مش لابس
عشان لو لابس تبقى انتا مبتغلطش فيه وهوه منيل فعلا !
اما لو لأ فمعلش ... معاك ربنا



وثانيا كدا نفهم 
تعبير متنيل بـ60  نيلة يبقى معناه ايه ؟؟
انه الشخص او الفعل منقوع ف الغلط
زى المصبوغ 60 مرة وبالتالى مفيش فايدة فيه 
و الله يرحمك يا ست مارى يا منيب 
يا أجدع واحدة نطقتيها 
فعلا 
النيلة متنفعش لا .. صنع فى مصر 
:)

القصة رقم (2) 

من محاضر جرد قصر عابدين تحديدا
وبس الاول نحكى عن الست ناريمان
وال اتجوزها فاروق
بعد ما طلق فريدة مراته الاولانية

والبت اتنشرت صورتها ف الجرايد 
وقت اعلان الخطوبة من هنا 
والنق مبطلش بقى ليل نهار يا ثااااامح من هنا 
ويا بختها هتشوف الهنا كله

وقعدوا ف الجرايد يحكوا التفاصيل
وتفاصيل التفاصيل
عن الفرح والمراسم
وفستان العروسة اللى قعدوا يخيطوا فيه ساعات طوال

 وقالك الفستان أصله كان مرصع بالجواهر
والمعرفش ايه
وقعدوا يشتغلوا فيه 4 الاف ساعة بحالهم
لحد ما خلصوه ولبسته المزمزايل نانا 

وطبعا كان حديث الجميع
خصوصا لما اتنشرت صورة العروسة الننوسة
والحسد شغااااال يونيفرسال
وقل أعوذ برب الفلق بقى ياختشى!
بس ونانا اتجوزت وانتوا عارفين الباقى .. 
يا دوب حملت وخلفت ولى العهد
وشوية وحصل حريق القاهرة
ثم قامت ثورة يوليو1952 
 واتحاصرت القصور كلها ويلا يا فاروق
انتا واسرتك على برا البلاد
وطلع قرار يسمح لأفراد الأسرة المالكة
ان كل واحد ياخد هدومه وجزء من مجوهراته ..

وقتها كانت ناريمان ف اسكندرية
مع فاروق ف قصر التين
وسريعا سريعا كان لازم حاجاتها تتلم
عشان تركب المحروسة مع فاروق 
ومكنش ينفع ترجع القاهرة
فلجنة الجرد بعتت لوالدة ناريمان .. الست أصيلة
تيجى تلم حاجة بنتها
وتمضى باستلامها فالست جت ولمت الحاجة
بس ايه ... !

 
المشكلة الكبيرة كانت فستان زفاف ناريمان
اللى كان وزنه تقيل وحجمه كمان كبير
لدرجة انهم احتاسوا فيه
 وف النهاية ...
جابوله عربية نقل مخصوص عشان تشيله
من قصر عابدين لحد مصر الجديدة
حيث بيت الست أصيلة حماة الملك فاروق
وبس خلاص كدا

وتعليقى ع الحكاية دى مبدئيا .. 
الشعب المصرى دا عينه ويحشة وتفلق الحجر
ويبص ف الجوازات يخربها
كت عملتلكوا ايه البت ؟!!

ثانيا .. الست مش بس اتخلع جوزها 
وابنها بالتبعية من ع العرش والعز راح
دى إتنفت معاه برا مصر
وبعدين اتطلقت ويعنى خلع وطلاق وخراب ديار فعلياااا



ثالثا ...
يا ترى يا هل ترى الفستان فين أراضيه دلوقتى ؟
يا ترى باعته عشان تعرف تعيش بعد كدا
ولا اتاخد منها لأى سبب 
ولا لسه موجود ف مكان ما ولا ايه ؟؟؟

  

رابعا .. اكبر درس مستفاد بقى 
هوه عإلى كل فيتاة
متتجوزيش ملك ولا امير ولا رئيس جمهورية
بيتخلعوا ياماما او يتقتلوا او يتسجنو
فاحسنلك ترفضى م الاول 
وتفكك م العالم دى .. اضمن

 القصة رقم (3) 

الناس اللى بتروح وسط البلد
وتعرف شارع طلعت حرب .. سليمان سابقا
وتعرف كويس سينما ميامى

على شمال السينما دى هتلاقى عمارة ... 
هيا عمارة يعقوبيان
واللى بناها عميد الجالية الارمنية الثرى
جاكوب يعقوبيان
والعمارة اتبنت سنة 1937
وكانت سكن للأجانب والوجهاء والصفوة
لحد ما قامت ثورة يوليو
فبيقولوا الضباط حطوا ايديهم على أغلب شققها
وسكنوها



وفكرة رواية يعقوبيان جت لعلاء الأسوانى
من احدى العمارات ف جاردن سيتى مكان عيادته
فكرة عمارة كبيرة عريقة
عدى عليها زمن بسكانها واحداثها
وقال يعمل رواية ف هذا السياق
واختار عمارة يعقوبيان 

واللطيف بقى انها لما جت تتحول لفيلم
صناعه راحوا عاينوا العمارة
لقوها تقليدية من براها وشكلها مش مغرى قوى ف التصوير
زى عمارات تانية ف وسط البلد
فغيروا موقع التصوير لعمارة الشوربجى
اللى ف قصر النيل
اللطيف اكتر ان عمارة يعقوبيان
كان من أشهر سكانها قولوا مين يا عيال ؟؟؟

زكى رستم يا ولاد
كان ساكن ف يعقوبيان وفضل فيها لحد ما مات
ف اوائل الستينات كدا



وايه تعليقى ع القصة دى؟

اولا ... 
 غريب قوى ان كان فيه صفات تتشابه 
مع شخصية عادل امام ف الفيلم 
وزكى رستم .. 
غير الأسم الاول
الجوز كانوا ابن باشا 
والأتنين اخدوا لقب عازب 
:))



ثانياً .. ابدا بس لما حد يقولك
- نهارك سعيد جنابك تعرف فين عمارة يعقوبيان ؟
تقوم ترد بكل ثقة
- شمال سينما ميامى يا حضرت
وانتا مطمن جدا 

القصة رقم (4)

عن محمد على وابنه ابراهيم
اللى قعدت كتيييير أحاول افهم
هما مالهم زعلانين من بعض ليه وبيكرهوا بعض كدا
لحد ما اخيرا عرفت !
والمصدر .. قصة الثروة فى مصر لياسر ثابت
اللى بيحكى بالتفصيل ازاى ان محمد على بعد 1805
لما وصل للحكم كان بينه وبين الباب العالى أزمة ثقة شديدة
اكمنه جايلهم عن طريق الشعب بقى
ومفروض عليهم وبسببه انطرد خورشيد باشا
رجلهم ف مصر .. وافلام كدا
قوم محمد على القرارى الصايع ماذا يفعل ؟؟

قالك احنا ممتنين لأمريكا .. قصدى للعثمانلية
وبينا علاقات زى الجواز كدا تمام
وانا ميخلصنيش أزعلكم
وبالنوسبة للخراج او الفلوس المطلوبة منى
فعينيا والعشرة دول هحّضرهم 
وخدوا ابنى ابراهيم عندكم كمان ..
عشان تضمنوا انى مش براوغ او اضحك عليكم
والختمة الشريفة هدفع 

وكدا ترهن ابنك يا ابو نسمة .. ! فعلا دا اللى حصل

سنة 1806 تحديدا 
يعنى بعد سنة من تولى محمد على الحكم
راح باعت ابنه ابراهيم استنابول رهينة
قد ايه يا طمطومة الواد قعد ؟؟
سنة بحالها
انااااشر شهر يا ثاااامح
ولكم ان تتخيلوا كان حالته عاملة ايه
وهوه ف يد اعداء ابوه اللى منتظرينله غلطة


قصره جت حملة فريزر
ومحمد على كان واقفلها قصاد التلاجة
وساعده الشعب الغلبان ف صدها
والباب العالى قالك محمد على دا حلو وآمور
فلنرجعله ابنه

بس وابراهيم رجع مصر ..  ومحمد على مكافأة له على حركة الدناءة اللى هوه عملها (الأب يعنى) قام معينه والى على الصعيد ولنا .. هنا .. وقفة

ابراهيم لما تولى الصعيد كان يادوب عشرين سنة كدا
وجاى بقى الغل ماليه
واهوج وأرعن وسماوى واسود القلب وفيه كل العبر
زائد قلة الخبرة !
 ورايح ع الصعايدة .. اللى هما رجالة قوى 
وميحبوش اللوع ولا الأذى ولا مس الكرامة
واللى يحكلهم على مناخيرهم يبقى نهاره فحلوقى
 ومفيش تفاهم ابراهيم طبعا ولا هامه !


 اصطدم بقى بالسكان ف الصعيد
ومكنش عنده دهاء ابوه ف السن الصغيرة دى
وابتدى يتعامل بغشومية ويفرض ضرايب وغرامات
ويقرف الناس لحد ما تمردوا عليه
فبقى يتعامل مع أى متمرد ..
بما يرضى الله والوطن والديموقراطيييييييية
قوم يعمل ايه بقى
والعهدة هنا على الجبرتى

"بلغنى والعهدة على الناقل انه ربط رجل ممدودا
على خشبة طويلة وامسك طرفيها بعض الرجال
وجعلوا يقلبونه على النار المضرمة مثل الكباب "
#يوغتى

ابن محمد على عمل الناس اسياخ كفتة وكباب يا سعااااد .. ! 
وكانت طريقته ف التفاهم هى الحرق والقتل والتعذيب 
وهتدفعوا الضرايب والغرامات برضو


 ويمكن لهذا السبب ... هنشوف بعدين
ان اغلب الثورات المسلحة اللى قامت ضد محمد على
كانت ف الصعيد
وممكن نخمن طبعا دلوقتى ليه
ومين السبب ؟؟؟


 اللطيف بقى وسط كل هذا الهراء والخرااااء
انهم بيقولوا ان سى محمد كان عامل رعب لابراهيم
والعكس صحيح
يعنى الباشا كان مسبب هسس لولاده جدا
 كان اول ما يقلب وشه او يتهمهم بأى تهمة
يبقوا عاوزين حمام قريب فوراااا عشان يدخلوه
والعكس كمان حصل 
وابراهيم كان ابوه بيخاف منه ليقتله عشان يورث الحكم !

وعشان كدا كان دايما يبعته ف سفريات
ويبعده قدر الممكن
لحسن يعمل عليه انكيلاب عسكرى ولا حاجة 
اكمن الجيش كان كله ف ايده
#جاب_منين_الافكار_الويحشة_تشى


والألطف والأفكه ان ابراهيم كان بيعمل حساب ابوه
لحد آخر لحظة ف حياته
وآل ايه آل اييييه كان مبيدخنش قصاده
احتراما ومهابة
#يوغتىىىىى




وتعليقى ايه ع القصة دى ؟
لأ ولا حاجة بس قبل ما أشرب السم 
وأطعن نفسى عشر طعنات
ثم اردينى قتيلة بخمآشر رصاصة ف نافوخى
بعدهم احب اقوووول

اولا .. 
 محمد على دا جنس ملته ايه ؟
بجد ؟
يعنى يودى ابنه استنابول رهن !
هوه غويشة ولاّ حلق مخرطة 
واول ما يرد الرهنية هياخده تانى عادى كدا ؟!!!
وافرض الواد جراله أى حاجة هناك 
ايه مش مهم ؟؟
اهو دا فعلا اللى ... أحبس نسمة ذات نفسيها !!



ثانيا
يعنى ابراهيم لحد آخر يوم ف حياته
مكنش ممكن يدخن ف حضور ابوه
لكن ممكن يعمل الناس كباب عادى
لأ بجد .. 
الادب فضلوه عن اللحمة !

 القصة رقم (5)

واما حد يتسرع ولا يترعش ولا يخاف
يقولوله اسم الله عليك .. ونجيبلك طاسة الخضة
ليه هيقلوا الخضضان زى البيض دول ولاّ ايه ؟؟؟
اتارى الموضوع بجد وفيه حاجة كدا فعلا
والناس زمان كانت على قدها قوى وبسيطة وطيبة
ومفيش كليات طب ومعامل تحاليل وبتاع
وكان عندهم اعتقاد
انهم لما يجيبوا الوعاء النحاس الصغنن دا
والمرسوم عليه رسومات وطلاسم
ويملوه مية ويحطوه طول الليل ف الطّل
وبعدين ينشرب منه
 فكدا ممكن يشفى التسمم ولسعة الحية والعقرب
والمغص والأمراض النفسية اللى اهمها طبعا الخضة !
 #الحقينى_يامه

والطاسة كانلها مواصفات معينة
وكتابات معينة
وعدد خروم ف النص معينة 
وتتملى مية او حليب
او حتى تمر مغموس ف لبن
ويتشرب منها مرة او مرات مختلفة
ومحدش قالنا كانت بتنفع فعلا الحكاية دى ولا ايه ؟؟

المهم انا تعليقى ع الحكاية كالآتى
فيه طاسة خضة لقوها تنتمى للعصر الأيوبى
وتحديدا العصر الأيوبى .. للسلطان عز الدين أيبك
معرفش تنتمى لعصره ولاّ بتاعته هوه شخصيا
عشان انا أرجح انها بتاعته لازم اكيد
ليه ؟؟
أصل معلش يعنى ..
اللى يتجوز واحدة زى تحية كاريوكا أو شجرة الدر
متفرقشى محتاجله مش طاسة 
دا عاوز طشت الخضة !

ثانيا 
ودا سؤال وجودى هما بيستعملوا الطاسة لمنع الخضة
طب ماذا لو الطاسة اتسرقت

هيعملوا ايه ف الخضة بتاعت سرقة طاسة الخضة ؟؟؟ 

  

القصة رقم (6)

 

ودى عن كلمة بنستعملها كتير ف بيوت الريف والصعيد
وحتى اسكندرية
:))
وتبدأ الحكاية من الفاطميين لما دخلوا مصر
وطبعوا عليها
طبعوا عليها بأعيادهم واكلاتهم
وبهجتهم وفخامتهم ودلعهم وكل حاجة ... حتى العمارة
ومن ضمن المبانى اللى مكنتش معروفة ف مصر قبلهم
المناظر
وتلقى دايما ف الكتب الجملة دى
وذهب الخليفة الى المنظرة الفلانية 
وحيا الجموع منها الخ الخ
فأيه حكايتها المنظرة دى ؟؟

المنظردى عبارة عن قلعة صغننة جدا
اشبه ببرج المراقبة كدا متزينة ومدلعة
ومجهزة لمراقبة الأعداء من بعيد
ولأغراض اخرى زى ايام الاحتفالات
وبيقولوا أقرب تخيل ليها هوه انك تبص على باب النصر 
ف برج من أبراجه كدا
وتقريبا دا شكل المنظرة بس فيها مكان للفرجة
زى منصة كدا او شباك واسع 

والخليفة الفاطمى كان بيطلعها ف المناسبات
يبص على الناس ويحييهم ويتفرج على الأحتفال
كانت دورها عامل زى المنصة
اللى اغتيل فيها السادات كدا

وبيقولوا ان اول منظرة اتبنت ف مصر
كانت ف منطقة ام دنين اللى هيا ميدان رمسيس دلوقتى
وبعدين هدها صلاح الدين الأيوبى
بس بنى مكانها قلعة صغيرة
وانتشرت بعد كدا ايام المماليك حكاية المنظرة دى
وف اوقات السلم ومفيش حروب
كانت بتستعمل كمتنزهات
واماكن للفسحة والاحتفال وغيره 
لحد ما اندثرت كبناء من حياتنا



اللطيف بقى ان الكلمة فضلت
بس المصريين حرفوها كالعادة
عشان يحطوا التاتش بتاعهم 
 وبما ان المنظرة حسب التعريف
هى : عبارة عن موضع مشرف ينظر منه
فالمصريين استعملوها لتسمية الغرف المطلة ع برا
وبدل منظرة
بقت منضرة
ثم مندرة

 وتعليقى ع الحكاية دى ايه ؟؟
مفيش غير انه شىء مبهج ان حد من اكتر من ألف سنة
ييجى يعمل حاجة ويمشى ويزول الأثر
وبعدين الكلمة تفضل
وانى من أشد المؤمنين بالآية دى ومعناها 
" فَأَمَّا الزَّبَدُ فَيَذْهَبُ جُفَاء
وَأَمَّا مَا يَنفَعُ النَّاسَ فَيَمْكُثُ فِي الأَرْضِ "

القصة رقم (7)

ودى حدوتة لوز وعنب ومانجة وبلح أبريمى كمان
من كتاب عن عالم الدعارة ف مصر 
كتاب ممتع بجد

وانتوا فاكرين لما قولنا ان الخديوى اسماعيل الله يكرمه
ويبشبش الطوبة اللى تحت دماغه جه سنة 1870
وألغى تجارة الرقيق
ومبقاش لا جوارى ولا عبيد
 طبعا الكلام دا كان الرسمى بتاع الحكومة
لكن ف الواقع البعيد عن القوانين والورق
كانت التجارة شغالة وزى الفل
بس ف الخباثة وتهريب وكدا ..

وكان البغاء مرخص كمهنة وله سوقه وبيوته
وعماله وزباينه وكله بالقانون
معاك رخصتك محدش يقدر يهوب ناحيتك آباشا

والعملية اتنظمت اكتر بعد دخول الانجليز مص
عشان حكومة الإيحتيلاااال
مخلصهاش ان العاهرات يمشوا كدا سوليطى موليطى
ويجيبوا المرض للجنود الانجليز
فقننوا الحكاية ف اماكن معينة
وليها شرطة مخصوص ورخص
ومستشفى ف السيدة زينب تكشف ع البنات
وتشوف العيانة م السليمة .. كدا


المهممم
 بطل القصة كان ابوه من كبار المهربين
الشغالين ف تجارة الرقيق ف بلد جنب أسوان
كان اسه الحاج الغربى
وسنة 1890 ابنه ابراهيم هياخد ف وشه
ويحط علينا زى الغراب المجهن ببومة
وطير جوارح من بتوع الافلام الاجنبى دول
وينزل القاهرة ويروح على بولاق
ويأجر بيت يشغله ف الدعارة بالقانون



الكلام دا كان سنة 1890 وهيا سنة واحدة بس
وابراهيم الغربى بعدها بقى مالك البيت ف بولاق
وبيمتلك كام ألف جنيه !
#بيكسبوا_جامد_الفتاحات_دول
وقالك الحمدلله ربنا كرمنا بالحرام
نوسع بقى ف التيجارة اكتر
وراح (الوسعة) اشهر اماكن البغاء ف الزمن دا
جنب الازبكية وراح مأجر بيت بقهوة تحت منه
وطبعا القهوة كانت بتستعمل 
لتقديم رقصات خليعة للرواد ولسحبهم للنشاط الأهم .. 
وهوه الدعارة
حلو ؟



محدش يقول حلو .. عشان على نوصل لسنة 1912
هيكون ابراهيم الغربى
بيمتلك 15 منزل للبغاء فى حى الأزبكية
ومشغل فيه 150 مومس يا ثاااامح #تخيلوا
 ونشاطه توسع واستفحل وبقى يتشاور عليه بأنه
(ملك الوسعة) وهوه المتحكم والمسيطر عليها
والآمر الناهى



وتوماس رسل باشا حكمدار القاهرة وقتها
عمل كتاب عن القاهرة واللى عاشه فيها من احداث
وحاجات وناس
وكتب فصل كامل عن العالم السرى الرهيب دا
ف القاهرة
ووصفلنا الاخ ابراهيم الغربى بالتفصيل

واليكم النص مفيهوش زيادة ولا نقصان 


"نوبى ضخم الجثة سمين كان يشاهد كل مساء
جالسا على مقعد خارج احد منازله بشارع عبدالخالق
واضعا ساق على ساق مرتديا ملابس النساء
ومنقب بنقاب أبيض كان هذا الفاسد الكريه
يجلس كالصنم الابنوسى صامتا
ويخرج ف العادة يدا مغطاة بالمجوهرات
ليقبلها احد المارة من عبيد امبراطوريته
او يقول أمر لحد من الاتباع والخدم  " 

وسمعونى واحدة  اسكندرانى  معتبرة
دا طلع ست قصدى راجل عامل ست !
#اخراشى
المؤسف بقى ان الحاجة دا
قصدى الحاج دى .. يوووووووووه
الهىء مىء شخاليل دا كان مركز قوى ومصيبة
 كان عنده شبكة منظمة وفيها كل العناصر اللازمة
لحماية المومسات اللى بيشغلهم بالغصب والبلطجة
وكان عنده كمان زباين من علية القوم ف عالم السياسة
والمجتمع الراقى وكانوا بيسندوه وقت الجد
زى فيلم درب الهوى كدا بالمللى
 وكان بيحط تسعيرة للبنت من اياهم
ف بيعها وشراها واستخدامها 
ومحدش كان يقدر يناقشه

وفضلنا كدا ابراهيم الغربى يتوحش ويتغول
لحد سنة 1914

الحرب العالمية الاولى بدأت وعلى آخر السنة
كان عساكر الأنجليز مرطرطين ف شوراع القاهرة
قوم حكمدار شرطة العاصمة وقتها
(هارفى باشا) هيخاف جدا
ويقولك جنودنا ف خطر وميرضيناش يتعرضوا للمرض
واصدر اوامره بلم كل المومسات
والغلمان اللى بيشتغلوا برا بيوت الدعارة
ليه بقىىىىىى ؟؟
قالك عشان اللى شغالين رسمى فهمى نظمى
ومعاهم رخص بينكشف عليهم دوريا
والمريض يتعزل
اما اللى شغالين من برا برا دول 
فخيطيرن على ولادنا ولازم يتلموا 
آه ميصحش فعلا !



المهم .. رسل باشا
صاحب المذكرات والحكمدار السابق
بيحكى ان هارفى باشا حكمدار شرطة العاصمة الحالى 
كان راجل حمش وشديد وجامد
اصدر الامر
وفعلا خلال يومين عكشوا 100 منهم

وكانوا عاملين معتقل ف الحلمية
يضم المقبوض عليهم ف الحكاية دى
فالمهم رسل باشا فضولا منه راح يبص ع اللى هناك
وملقاش بينهم ابراهيم الغربى طبعا
وحب كدا يستفز هارفى باشا
فقاله هيمة برا الحسابات يا باشا مش كدا ؟؟
فأكتشف ان هارفى ميعرفش حاجة عن الغربى
ولا عمره سمع اسمه .. #نعممم؟



القصد
الراجل وشه اتنفخ واحمّر وراح قايل هاتولى الغربى هالاااا
وهيا ساعة ورسل باشا اللى بيقول بنفسه
وبيوصف اللى شافه ...
" وبعد ساعة وصل ضابط يقود بيده ما بدا لى
مثل زنجية سوداء مكتسية بالحرير الأبيض الثقيل
ترن اساورها وخلاخيلها الذهبية وهى تخطر فى الممر "



 والحاج هارفى اول ما شافها .. قصدى شافه
راح مزعق وقالهم قلعوه الحاجات دى
وخدوه فورا على معتقل الحليمة مع زملائه
وسط الاخوة المخنثون وكدا !
 وطبعا علموا حراسة على بيوته اللى يملكها وفتشوها
لقوا الاف الجنيهات
ويقال ان ابراهيم الغربى قعد ف معتقل الحلمية سنة
وبعدين رجعوه بلده !!


هاه ... 
سنة واحدة ورجعتوه بلده !!
#انتا_شديد_قوى مع المتهمين بتوعك يا سيد بيه !
واضح انه الغربى كان مسنود قوى قوى قوى
تفتكروا كدا خلصت ؟؟
لأ طبعا
 سنة 1922 هيمسكوا بنت بتشتغل لامؤاخذة

وبالتحقيق معاها
هيكتشفوا انها كانت هربانة من بيت اهلها
واتعرفت على ست ف ميدان السيدة زينب اغوتها
 وقالتلها تعالى اجوزك ابنى
ولما روحت معاها البيت شربتها حاجة اصفرة بمخدر
البنت صحيت زى اغلب مشاهد افلام حسن الامام
فاقدة اعز ما تملك
وزى جو بيت القاصرات كدا تمام 
خدوها بيت للدعارة ف زينهم اشتغلت فيه
وبعدين باعوها لبيت تانى بـ 17 جنيه
واتباعت لبيت تالت



 والبنت حكت بالتفصيل الممل
واعترفت على اللى شافته
واكتشفوا انه تنظيم عصابى على اوسع نطاق
وان فيه 400 بنت اتباعت بالمنظر دا قبلها وبعدها !!
واتجرجر 37 راجل وست كمنظمين للعمليات الحقيرة دى
وبالتحقيق والسؤال طرطش اسم ابراهيم الغربى 
اكتر من مرة ف وسط الكلام لحد ما اتعرفت كل حاجة
الباشا كان بيدير عملية بيع الرقيق دى
من اسنا ف الجنوب لحد اسكندرية ف الشمال
وصدر امر بالقبض عليه تااااانى
وتفتيش كل بيوته!
وبالتفتيش لقوا كمبيلات بالهبل ماضية عليها البنات
عشان يفضلوا مكبلينهم بالشغل
او يبيعوهم بالديون دى لبيوت تانية
واكتشفوا ايه كمان ؟؟

 اكتشفوا ان الغربى
كان شارى اكتر من 50 بيت للدعارة
ف باب الشعرية وغيرها
اتمنوا بحوالى 50 ألف جنيه
وانه يمتلك 156 اسورة دهب وزمرد وماس
وتاج مرصع كان الهانم بيلبسه فوق نافوخه
ف الحفلات اياها #استغفر_الله_العظيم
بكام ؟
بـ 3 الف جنيه غير كسوة للتشريفة والحفلات
بمبلغ 500 جنيه
دا معناه انه كان بيحضر حفلات علية القوم بنفسه 
مش مورد وبس .. 
:(
 ويا دوب عشرتلاف جنيه يتيمة .. فكة وبس 
الراجل كان عوصامى وموكافح برضو 


 اللطيف بقى انه طلع البيه كان مربط
مع دكاترة ف الحوض المرصود
اللى عليهم الكشف عن البنات
ومربط مع  الكاتب المختص فى الحوض المرصود
واللى شغلته انه لازم يبلغ 
وطلع مربط برضو 
مع البكباشى جون فيليب مساعد الحكمدار بفرقة أ 
التابعة للأزبكية
ومربط كمان مع اليوزباشى جوليانو سانتى
الضابط المختص بأعمال نظام العاهرات ف شرطة القاهرة
غير جيش العصبجية والبلطجية والناضورجية وغيرهم
اللى كانوا بيساعدوه ف تجارته
يعنى م الآخر كان مافيا حقيقية
بمعناها الدارج
مافيا ف تجارة البشر



المهم بعد كل البلاوى الزرقا دى
ابراهيم الغربى اتعكش من قفاه سنة 1924
واتحاكم قولوا
خد كام سنة يا عيال أبهرونى يلا
:)))


" @azebiy " جاوبت صح ..
الأخت هىء مىء الغربى بعد اتهامه ب8 جرايم
من تسهيل دعارة والاغواء والبلطجة الخ 
اترزع 5 سنين مع الأشغال الشاقة !
#يا بلااااش 

وطبعا انتوا عارفين ان السجن للجدعان بس 
فابراهيم الغربى مستحملش العيشة دى
ومات بعد سنتين يعنى 1926 
ومعنديش أى تعليق ع القصة دى غير
انى اتمنى ولا يكتر على الله
انه يكون ابراهيم الغربى متهنى ف النار وسعيرها
على قد ما خرب بيوت
ودمر ف بشر
بس

القصة رقم (8) 

دى بقى من الجامع الازهر
اول المساجد الفاطمية ف مصر
وبعد ما ييجوا الايوبيين والمماليك
هنسمع اسم الامير طيبرس



طيبرس على غير عادة امراء المماليك 

كان راجل كويس
والظاهر كان مكشوف عنه الحجاب
وبيجيله منامات كمان 
وشاف مرة رؤية للمنصور لاجين
 اللى كان نائب الشام 
وطيبرس قاله 

انتا هتبقى سلطان مصر
وبعدين رجع لاجين مصر
والسلطان غضب عليه فهرب
واستخبى ف جامع ابن طولون ف مئذنته 
وافلام بوليسية كدا



المهم تروح يا زمان وتيجى يا زمان

ولاجين يبقى السلطان فيقرب منه الامير طيبرس
ويمسكه نقابة الجيوش
وبيقولوا انه كان راجل كويس
وبيقولوا كمان انه كان عف

مبيقبلش رشاوى 
وكان ايده نضيفة وبيخاف ع الحرمات 
يعنى راجل جيش مملوكى عكس المعتاد بالمررررة 
المهم ؟؟


 طيبرس عشان نضافته ربنا باركله ف رزقه
والأقطاعات اللى اخدها من السلطان لاجين واللى قبله
كانت كفاية يستثمر فيها
ويكبرها ويبقى معاه ثروة

كان كريم وموسر وحنين ع الفقرا 

ولما ربنا وسعها عليه اكتر قرر يبنى مدرسة 
تجاوز الازهر
ويتدرس فيها المذهب الشافعى

وبيقولوا ان زخارفها من أروع ما يكون
وانه صرف عليها مبالغ كتير متتعدش
وبيحكوا بقى

ازاى لما المدرسة خلصت
واتمم بناها وجم المباشرين بتوعها 
عشان يحاسبهم على المصاريف

وحطوا قصاده الدفاتر بالأرقام  
 فالامير طيبرس ابتسم
وقالهم هاتولى طشت واملوه ميه



فعملوا كدا فعلا وحطوا قصاده الطشت بالمية
راح رامى فيه الدفاتر لحد ما الحبر راح منها وبقت فاضية !

ولما الواقفين استعجبوا من العملة دى وسألوه
رد عليهم بجملة واحدة :
 " شيء خرجنا عنه لله تعالى لا نحاسب عليه "

وبس كدا



وتعليقى على القصة دى تعليق واحد وحيد 

مفيش غيره 
شفتوش شياكة وجمال واخلاق زى كدا ؟؟؟!! #اللهى_تتهنى_ف_الجنة_ونعيمها_ياشيخ



لأ استنوا فيه تعليق تانى كمان

الراجل دا راح الجيش ازاى .. دى غلطة
احنا بتوع الجيش بيلهفوا خيرنا آحاج مش بيدونا
انتا فهمت شغلتك غلط شيكلك !
:))



وبس كدا توتة توتة ... 
خلصت الحدوتة

--------------------------

nevein fathy @NeveinF 
طاسة الخضه زمان كانت بتلف من بيت لبيت
يعنى بتبقى موجوده عند حد فى الحته
واللى يعوزها يستلفها ويرجعها تانى لانها غاليه جدا



m. hasan @tantalos2 
كويس إنك حكيتي الحكاية دي…
لما قريت مذكرات نوبار الذي صاحب ابراهيم
في أواخر أعوامه أنا جاللي رعب
من رعب وخوف ابراهيم م أبوه

تفائلوا بالخير @Fatoma999 
اهو ده اللى تنطبق عليه النكته
فتح اسنا على اسكندرية وبقوا شقة واحده:))

amr salem @amrosalim2001 
علي فكره الحوار ده كان موجود في تونس
لحد ايام علي بن علي وفعلا كان تبع الداخليه
ومعاهم كرنيهات وبيتكشف عليهم بشكل دوري


الكبيرة قوي @TheBlackFairy_
ده الحرام طلع بيكسب زمان اكتر من دلوقت ... 
زمن الدعارة الجميل

z @azebiy
 5 سنوات

tarek momen @tarekmomen 
150 سنة اعدام




الكبيرة قوي @TheBlackFairy_ 
طالما الدعاره مرخصه ممكن ياخد حكم محفف
بس هيلهفوا فلوسه



amr salem @amrosalim2001 
ما كنش لابس ساعه اوميجا ساعتها
يبقي المنام بتاعه ده فيشنك 
اي حد يحكيلك منام لازم يبقي لابس ساعه اوميجا
غير كده مش هاصدق اه



تفائلوا بالخير @Fatoma999 
المدرسة الطيبرسية
:)


تمام يا توما كويس انك فكرتنى نسيت اقولها :)))



تفائلوا بالخير @Fatoma999 
لاجين استخبى فى مأذنة الجامع الحلزونية 
وكان فى كرب شديد وندر لو ربنا نجاه
من ايد السلطان هيجدد الجامع
وليه محراب باسمه فيه

Mohammad Diab @som3amasrawy 
الأدب فضلوه عن الكفتة

بلاش الكفتة عشان فيها اهانة للجيش
متودناش ف داهية 
:))

sally soliman @sasosall
انا اول مره اعرف معلومة ان طاسة الخضه دي 
كانت بتتسلف !!!! 
وكانت غاليه ليه ده طبق نحاس



nevein fathy @NeveinF
بس الرسوم
والكلام اللى عليها ماكانش اى حد يقدر يعملها
وفى وقت صناعه انقرضوا
فغلى تمنها جدا دى

تفائلوا بالخير @Fatoma999 
بتتسلف زى مخرطة الملوخية..الجيران لبعضيها:))

z @azebiy 
 ايوة هى نحاس فيها دواير كده زى الشخلاليل
ولو بتستلفيها تسيبى عند صاحبتها حاجه دهب
علشان تضمن ترجعيها # تحفه

sally soliman @sasosall 
مش كلهم يا فطوم فى منهم مسمط

nevein fathy @NeveinF والله فكره
وانا اشاركك واهى تنفع للخضايض اللى هانشوفها
فعهد السيسى هانكسب دهب يافطوم

الهي تنشك في معاميعك @loulouibrahim 
اه عندنا واحدة فضة
وماما بتقولي انها كانت بتتسلف من بيت لبيت فعلا

 SAYED AGHA@SAYEDAGHA

 اللى عندكم دى تبقى طاسة الفضه :)))

sally soliman @sasosall 
انا حاعمل طشت الخضه
عشان احنا حنتمخمض مع مستر اكس



الهى تنشك فى معاميك@loulouibrahim

هههههه غني فاحش بقي :)