الخونة التلاتة

فاشهد يا وطنى ع اللى فينا يخون ..
ياللى انت ماسِك دفتر الخاينين ..
ومصر عارفه وشايفه وبتصبُر ..
لكنّها ف خَطْفِةْ زمن.. تُعْبُر..
وتستردّ الإسم والعناوين
 #عبد_الرحمن_الأبنودى




 نبتدى الحدوتة بقى
والنهاردة هتكون عن تلات اشخاص
يجمعهم زمن واحد وصفة واحدة

ونقدر نطلق علي ابطالها  ...
"الخونة التلاتة" لأنهم كانوا
عنوان للغدر الذى ابتليت بيه مصر ...
 بس دفعتهم التمن برضو غالى جزاء صنيعهم



وهحكى حكاية كل خاين م التلاتة ...
 بالترتيب كدا حسب اللى مات اولا
 وخلصت البلد من شره


طبعا كلنا فاكرين الجدع الطيب
طومان باى
وازاى اتشنق على باب زويلة
وانتهت بموته دولة المماليك ف مصر ...
فاكرين بقى ازاى العثمانيين مسكوه ..؟!!




اللى حصل ان طومان باى هرب للبحيرة
واستخبى عند واحد من العربان
يعد من اخلص معارفه اسمه حسن بن مرعى
 وحلفّه ع المصحف يصون سره
ويخبيه عنده ..
وكان الهدف يستخبى  لحد ما يلم شتاته
ويرجع يستعد لملاقاة سليم الاول من تانى ...


قوم اللئيم بن مرعى يستنهز الفرصة
ويسلمه لعسكر بنى عثمان
ويقبض المكافأة ..
ويتشنق طومان الغلبان ..
وتبقى مصر عثمانية بعد ما كانت مملوكية
ويولى سليم الاول واحد اسمه يونس شئونها
وبعدين يولى خاير بيك



وبما ان سليم الاول
 راجل ملهوش أمان وبيغدر
 فبعد شوية أمر بالقبض على حسن بن مرعى
فخاير بيك يمسكه
ويسجنه ف القلعة تمهيدا لشنقه ..
قوم حسن بن مرعى ابن ليل وصايييييع ...
 ينشر حديد الزنزانة ويرمى حبل
ويهرب من سجن القلعة

 وخاير بيك يسمعله كلمتين يسموا البدن من سيده سليم
على فكرة ... اللاب هنجّ ..
 وانا ابتديت أشك ف الحدوتة دى ..
طاه وحياة امهاتهن هما التلاتة ما هنام الليلة دى
 الا لما أجرسهم .. هه



وصلنا لحد سى مرعى افندى لما خد ديله ف سنانه
وهرب من السجن ...
وراح ع البحيرة مسقط راسه يتحامى بعشيرته وناسه ..
 الكلام دا سنة 1517 تقريبا


ويعيش حياته ويبقى شيخ منصر ..
 وأمير كان اسمه قايتباى يبعت تجريدة للبحيرة
 تجيبه من قفاه
 بعد ما بقى عزت حنفى تانى .
قوم يهرب منهم ويزوّغ



فيروح اخوه حماد للأمير قايتباى
يطلب منه الامان
 ويوعده ان حسن اخوه يسلم نفسه من غير أذى ..
 قايتباى يوافق ويطلع كله كلام فشنك
ويدور على مخرج


يظهر ف المشهد راجل افتكروا اسمه كويس جدااا
عشان انا سحصيا حبيته لله ف لله ..
كدا عشان هيعمل حاجتين مهمين جداااا الليلة دى .. ايه؟


الراجل دا اسمه " أينال السيفى "
وكان كاشف منطقة الغربية
والراجل دا هوه اللى يعفق حسن بن مرعى من قفاه
ويسلمه لخاير بيك مربوط ف الحديد


دى كانت الخطة ... انه يسلمه لخاير والى مصر ..
بس الحقيقة انه ملحقشى
 لأن المماليك سبقوه
وأغاروا ع الحبس اللى كان حاطه فيه
وقتلوه هما انتقاما



انتقاما لسيدهم طومان باى ..
اللى مرعى كان غدر بيه ...
وبيقولوا ف السيرة انهم مسكوه
 ودبحوه هوه وواحد من اخواته كان معاه
وركبوهم فرس طومان باى
ودخلوا بيهم على شواع القاهرة
ف تجريسة معتبرة تليق بمقام القتيل
ويستحقها القاتل ...
واتعلقت روسهم على باب النصر

وعلى طريقة حسن الهلالى
خلصنا من الوغد حسن بن مرعى ..
سنة 1519
ودا كان .. الأووووول



ندخل على تانى الخونة ... خاير بيك ..
اللى كان بيحكم حلب فى عهد قنصوه الغورى ..
وساعد العثمانيين فى الأستيلاء على الشام ودخول مصر بخيانته



كان عايش زى الفل ف حلب و مروق آخر روقان
بس كان طمعان ف ولاية مصر ..
وكانت نصب عينه م الأول
 عشان كدا ساعد سليم الاول لآخر نفس عنده


ولو تفتكروا ..
 وقت مرج دابق كان ف الميسرة
وف عز المعركة انسحب
فانكشف قنصوه الغورى من شماله
 بعد تخاذل الميمنة كمان ..
وحصلت الهزيمة الساحقة


و بعد دخول سليم الاول مصر ..
سماه الناس  "خاين"بك وكان سليم بينده
و بينطقها قدامه وهوه بيحتقره ...
وعّين واحد اسمه يونس الاول ف ولاية مصر
وبعدين عين خاير



وخاير الخاين .. كان قمة الخسة
 وفى أزهى حالات الوطيان ...
 أدان بالطاعة والولاء لسيده سليم
 ومشى البلد على حسب ما صاحب الحمار يقول ... بالحرف


كان راجل قاسى الطباع وشكاك ف كل اللى حواليه ..
وكان له طريقة بأسمه ف تعذيب الناس بالخازوق ..
وكان بيحطه ف ضلوع الضحية
ويسميها "شك البتنجان"


والمبالغ اللى يطلبها سليم تتحصل بأى شكل ..
واتغيرت لغة الدولة للتركية ومقلش لأ ..
ولما كان أى موظف يطلب أبرة كان يقوله استنى
 لما اسأل سليم !


وزى ما بيقولوا دلوقتى مصطلح "اخونة الدولة
" ايام خاير كانت مصر بيحصل فيها "عثمنة الدولة " بشكل ممنهج
ومنظم وهوه كان بيرعاه
وبجملة الخيانة بقى



وزى ما بييجى الحاكم من دول
يمشى على خط الحاكم اللى سبقه بأستيكة ..
عمل كدا آل عثمان ..
منعوا كل حاجة المماليك اتميزوا فيها
وكانت من سماتهم


العثمانلية كانوا عالم كئيبة ..
 منعوا خيال الضل والغنا فى الشوارع
و منعوا زفة العرسان بعد العشا
و منعوا فتح الاسواق بعد المغرب وعكننوا مزاج الناس بجد


ومنعوا كمان تفريق اللحمه فى عيد الأضحى
على الأمرا والعسكر والفقها والموظفين كما كانت العادة ايام حكم المماليك
 وكأنهم بيمحوا كل المباهج دى


ويموت سليم ويمسك بداله سليمان ..
 ومصر لا تزال تتعثمن وكل دا بمباركة ومساعدة كلبهم الوفى ..
 خاير خاين بك الجبان ...


لحد سنة 1522 ..
وكلب سليم تمسكه علة ملهاش علاج ...
ويتبهدل آخر بهدلة ويحتار الاطبة فيه ..
ويخاف على عمره ويحّل كيسه ويدى الفقرا والغلابة
ويقولهم ادعولى ..!



واكيد الناس دى كان فيها حاجة لله ودعت له من قلبها
 :)
 لأن حالتها فضلت تتدهور
ويخرج مساجين من الحبس
ويتصدق بمال ولا فيش فايدة ..
الموت يقرب !


ويحس بنهايته قربت
فيبعت لسنان باشا مساعده
ويسلمه خاتمه ويوصيه على مراته والعيال ..
 ويخرج سنان من عنده
ويدخل ملك الموت قرفان .. على خاير



ويقبض عزرائيل روح خاير الخاين ..
ف اوائل اكتوبر 1522 ف عمر الستين تقريبا ..
وسبحان الله كل الهرى دا
والخيانة عشان يحكم مصر 7 سنين ويغور !!!!


وربنا يورينا فيه آياته ..
وتعبير جرى الوحوش ينطبق عليه تماما ..
كل اللى عمله ف الدنيا ومتهناش ف الآخر
 ومصر لعنته بلعنتها وعاقبته أشد العقاب

وميفضلش من أثره غير جامع بناه سنة 1502
وكان لسه ف البدايات..
واما الزبد فيذهب جفاء
ويفضل اللى ينفع الناس وسبحان الله

ويتبقى خان خاير ف حلب
… واسم ف حديقة الازهر محدش يعرفه


ويتبقى الجامع اللى اتبنى بفلوس المصريين ...
 ينفعهم
و لعله يبقى عبرة
وخلصنا من خاين كمان

 و ادينى يا بنى لقطة مقربة
على وش حسن الهلالى
وهوه بيقول .... التاااااااااااااااانى



الجهاز بيهنج وبتكلم جد بس وحياة التالت دا تحديدا
 لازم أكمل عشان دا الزغلولة الكبيرة بقى
 :)
واولهم وآخرهم ف ذات الوقت ..
 اقصد .. الزينى بركات

ومش هرغى كتير ع الراجل دا لأن المسلسل اللى بإسمه
 تناول قصته بمنتهى الدقة والبراعة فعلا
ومتهيألى الكل شافه
واللى مأخوذ عن رواية
الاديب جمال الغيطانى
و اللى تتبع فيها سيرته
وتناول احداث بعينها مطابقة للحقيقة


 الملاحظ انه كان داهية
ومتفهموش ازى قدر زى الحواة
يتنقل من عصر لعصر ومن خدمة سيد للتانى
 ويحتفظ بكل الخيوط ف ايده وينجو من الهلاك مرات ..


بدايته كانت بسيطة حتة موظف خدام
 بيشتغل عند محتسب مصر يشبك الجمالى ..
ايام قايتباى ...وفضل يترقى ..
لحد ما مسك قنصوه الغورى بعد قايتباى ..


وكان عند قنصوه محتسب حرامى ابن جنية اسمه على ابو الجود
كان بياع حلويات بيعمل لقمة القاضى ف دكان ابوه ..
 وفضل يبرم لحد ما بقى محتسب !!!


دفع رشاوى طبعا وفلوس لحد ما وصل للمنصب دا ...
وبعد ما وصل للمنصب أتدور ع الناس والغلابة يلم اللى دفعه بقى !
 فالناس ضجت من ظلمه واشتكوه
واتراكم عليه فلوس ومدفعش ..
فاتغاظ منه قنصوه 
وقلب عليه ..
آه حاكم سلاطين المماليك دول
كانوا زى الكيميا كدا غدارين ..
وقلبتهم ويحشة وبالدم



فيطلع بركات بن موسى زى الخازوق كدا لقنصوه
 ويعرض ياخد منصب على ابو الجود بمبلغ وقدره
ويوعد السلطان يخلى على يقول حقى برقبتى
ويدفع اللى عليه


وقنصوه عادى يروح دا
وييجى دا بس الفلوس تنام ف حضنه ..
فيحكم لبركات ويبقى محتسب مصر
وينادوا ف الأسواق واسمع قالوا ايه ..


آل ايه ...
 " لما فيه من فضل وعفة، وأمانة وعلو همة وقوة وصرامة
 ووفور هيبة، وعدم محاباة أهل الدنيا وأرباب الجاه، ومراعاة الدين
... كما أنه لا يفرق في الحق بين الرفيع والحقير
لهذا أنعمنا عليه بلقب (الزيني) يقرن باسمه بقية عمره"

 ... اتقال كدا ...
وشوف ازاااااى ؟!!!


الزينى بركات بدهائه يعرف نقط ضعف قنصوه ويتك عليها ..
 الفلوس والمغنى والراحة والسفر والتنزه والحاجات دى ..
 فيعزم السلطان كل شوية وف أى مناسبة على حفلة
ويغرقه هدايا



والزينى يلم من ورا الشغلانة دى لمّ السنين
ويكفى نقول ان بركات بن موسى كان من سكان بركة الرطلى
 ودى كانت ف الخليج المصرى

ودا كان سكن الوجهاء والأعيان وقتها ..
وحاجة آخر أبهة وكان بيعزم قنصوه ينزل عنده
 ويقضى ليالى ع النيل بدل كتمة القلعة الكئيبة وكدهون ...


الزينى له احوال كتير يمكن اشدها لما قنصوه سافر ع الشام بالجيش
وسابله امور السلطنة الادارية
بينما ساب لطومان باى الأمور العسكرية والامن


وف هذا التوقيت تحديدا كان المحتسب الزينى بركات متصرف
ف عموم البلاد وسلطات كتير ف ايده ...
 لحد هزيمة قنصوه وموته وتولى طومان باى الحكم ..


ساعتها الامور اتغيرت ..
 وبركات مخدش باله لما حب يمارس مهام وظيفته
 ويطلع ترابنتين الناس كالعادة
 ودخل ف خصومة مع تاجر ف المدابغ اسمه الدمراوى
وحب يعمل معاه الدنيئة
 فالدمراوى راح جرى على الشيخ ابو السعود الجارحى .. فاكرينه ؟


كان شيخ صوفى له كرامات وله حظوة
ونفوذ ويحكم على الأمراء والسلطان نفسه ...
والدمراوى احتمى بيه وطلب مساعدته ف صد غى الزينى بركات ..


الزينى عرف ان الدمراوى مستخبى عند الشيخ ابو السعود
فراح برابطة المعلم وسط رجالته
ودخل ع الشيخ ابو السعود يقوله 
سلمنى التاجر اللى عندك يا شيخ
فطبعا .. يرفض الشيخ ابو السعود
ويطلع فيه يبعترله كرامته قائلا بالنص :
 يا كلب كم تظلم المسلمين ؟


الزينى ميعجبوش ازاى يتهزأ ..
 فيرد ع الشيخ ابو السعود رد مش اللى هوه
فينده شيخنا مريديه يقلعوا الزينى بركات عمامته
وينزلوا ضرب ف صلعته بالجزم


آه والنيعمة زى ما بقولكوا كدهون ...
ضربوه وبهدلوه وكان هيموت ..
وحبسوه ف مطرح ف كوم الجارح لحد ما بعتوا
لأحد مساعدين طومان باى ييجى يمسكه


راح الامير علان دودار طومان باى على دار ابو السعود ...
 وبلغه ان السلطان بيسأله ...
ماذا ترى ف شأن الزينى
 واللى تأمر بيه يحصل يا شيخنا


طومان باى كان بيحفظ للشيخ ابو السعود قدره
وكان مبيحبش الزينى وعارف مصايبه كلها من ايام عمه قنصوه
بس ظروف الحرب مكنتش مساعداه يفضاله ويرّوقه
وجت من عند ربنا ..
وعلى ايد الشيخ ابو السعود اللى طلب من طومان باى
 يشنق الزينى بركات على باب زويلة بعد ما يجرسه وسط الخلق ..
ويوافق طومان باى



والأمير علان اللى مفروض ينفذ فيه حكم الشنق ..
يطلع موالس مع الزينى ويوصل معاه لأتفاق
 بموجبه يروح لطومان باى يقنعه انه يأجل حكم الشنق شوية
والحجة ان الزينى ف عبه فلوس البلد
 ولو اتقتل الفلوس كلها هتروح
ومش هنعرف مكانها ابداااا
وبنقول يا مولانا نخليه لحد ما يتعرف بمكانها
 وبلاش شنق


ويا ربى ...
 الكلام دا سمعناه فيييييييييييين قبل كدا عن الفلوس
 اللى هتضيع ومشوها محاكمات وكدهون ... ؟!!!!
الزمن بيعيد نفسه والله ....
 بس احنا اللى مبنقراش ومبنتعلمش
وبنكرر الاخطاء ... للأســــف



المهم ... يتأجل حكم الشنق ..
 ويركن الزينى شوية ف الدرا 
ويسكت خالص
 لحد ما يشوف الريح اتجاهها فين
وينشغل طومان باى بالمعارك والكر والفر
ويدخل عسكر سليم الاول غزة ...
ويحتاج طومان باى للفلوس بعد ما خزنة البلد تبقى خاوية ..
ويبعت الزينى مرسال من السجن انه يقدر يدبر النفقة كلها



وتحت وطأة الحاجة واصل الأقتصاد هينهار
 والبلد هتضيع وشغل الإبتزاز اللى انتوا عارفينه وكلنا عايشينه دا
 يخرجه طومان باى م السجن ويرجعه شغله!
ويقوله دا مؤقتا لحد ما البلد تهدى والعثمانلية يرحلوا عن مصر
 وبعدين لينا حساب تانى ...
والزينى يظهر الطاعة ويقوله كتر خير مولانا اللى عفى عنى



محدش يقولها ...
 انا هقولها المرة دى عشان واقفة ف زورى ...
طومان باى دا ابن ناس ومتربى بجد ...
والبلد دى ساعات بتبقى عاوزة حاكم صايع فعلا



المهم .. طومان باى ينشغل ف صد المحتل العثمانى ويهرب ويرجع ..
 ويدخل سليم الأول القاهرة منتصرا ..
ويعين رجالته المخلصين
 فيكون فيهم مييييين ؟؟
الزينـــى بـركــــــات .... طبعا


ف لوكشة واحدة كدا مع خاير بك
وكل الكلاب اللى ساعدوه ف غزو مصر والشام من قبلها
 بس الزينى دا له كوم لوحده لأنه كان اخطرهم فعلا ...


لأنه بحكم منصبه متوغل فى كل نواحى الدولة
 ونجح بشكل وبآخر انه ينشر فيها الفساد
 ويدمرها تدريجيا لحد ما الدولة تفككت ..
زائد انه كان له مساعدين
بيستخدمهم يكونوا كلابه ..
 ينهشوا ف لحم الناس وسمعتهم ويمارسوا عليهم التعذيب
وكان مسخر جهاز البصاصين لخدمته ودول كانوا امن الدولة بتاع زمان


ويدخل سليم الاول مصر ويسيب فيها 5 الاف جندى ومئات من الموظفين ..
ويعين خاير بك والى ونائب لسلطان بنى عثمان ..
ويعين الزينى محتسبا .. ومتحدثا
ويتقبض على طومان باى بالغدر
 وسليم الاول يفكر جدياً انه ميقتلوش لأنه احترم شجاعته
وقارنه بالكلاب اللى قابلهم طول سكته لمصر ..
واستنكر الفكرة


بس مين اللى قلبه كان اسود غميق
ومنسيش لطومان باى انه وافق على حكم الشيخ ابو السعود بشنقه ..
وكاد يشنقه فعلا لولا الحيلة .. مييييين ؟!!


الزينى بركات طبعا ...
وراح ماسك ودن سليم وادى بقى ...
لازم نقتله عشان مماليكه تنهار ومتقومش ليهم قومة ..
لو نفيته برا مصر هيرجع تانى ...
دا كان مهزوم ومعرض للموت وبرضو وقفلك ..
 دا عنيد ودماغه مش هتنكسر الا بالخلاص منه ..
جوزك بيحب .. هيتجوز عليكى .. هنتشرد ف الشوارع .. الخ الخ


وفضل يقوّم ف سليم لحد ما أصدر امره بشنق طومان باى ..
 على باب زويلة ...
 وخدوا بالكو ..
 ان دا نفس البااااب اللى كان الزينى بركات هيتشنق عليه
 :(


ويتشنق الجدع على باب زويلة ..
وتفضل سيرته العطرة حاضرة بيننا ... لحد اليوم
ويمسك الزينى امور البلاد 
ويعاون خاير بك الوالى
 وما جمع الا وفق ...
ويتلم تنتون على تنتن



ويغور خاير بك ف يوم اسود على وشه 
وفى جهنم وبئس المصير ان شاء الله
 وييتعين والى جديد لمصر العثمانية
 اسمه مصطفى باشا ف سنة 1522


وطول ولاية خاير بك اللى قبل منه
 والبلد كان بيحصل فيها قلاقل ومشاكل من مماليك طومان باى وغيرهم
 اللى كانوا رافضين حكم العثمانلية للبلد ..
وكل شويتين كانوا يلموا روحهم لما يحسوا بالقوة
ويحاولوا يعملوا زى حالة استقلال بالمناطق بتاعتهم
 ويخلوها مملوكية خالصة بعيدة عن ايد بنى عثمان


خاير كان بيستعين بجند بنى عثمان اللى سابهم سليم ف مصر ..
وكان بيتفاوض مع المماليك المتمردة دول احيانا ..
 وما بين شد وجذب قرفوه ف عيشته المهم
وعايزة انتهز الفرصة التاريخيه دى واتشكرلهم الحقيقة ..
عشان أى حد يقرف الخونة دول انا احييه
واقفله احتراما


ويموت خاير الخاين ف اكتوبر وييجى ف نوفمبر سى مصطفى ..
 يلاقى المماليك عاملين قلق ...
ونختص بالذكر منهم اتنين بعينهم معرفش اخوات ولاّ قرايب !


قولنا اسم واحد فيهم قبل كدا :
إينال السيفى" كاشف الغربية ..
وهنضيف عليه "جانم السيفي" كاشف البهنسا
 والفيوم في مصر الوسطى .. و غالبا اخوات


الجوز دول اتلموا سوا على بعض
وقرروا ينتهزوا فرصة موت المخسوف خاير
 ويرجعوا البلد من العثمانلية وابتدوا كل نفر بمنطقته ..

وتدور حرب شوارع
بين جند بنى عثمان القاعدين ف مصر
وبين امراء المماليك دول ورجالاتهم الباقين من عهد طومان باى ...
وشوف قلة الذوق بقى بتاعتنا احنا المصريين



يعنى الحاج مصطفى باشا جاى يا كبدى يستلم البلد
ويحكمنا ويحط الجزمة فوق رقبتنا
وبدل ما نعمله حفل استقبال فيه شاى وجاتوه ييجى يلاقى بلد مولعة !
يعنى دا يصح ؟!!


الملخص الراجل جه قوم  نكدوا عليه باحوال البلد
 والمماليك الويحشين اللى مش كويسين دول ..
فكرامته نقحت عليه طبعا عشان مشربش شاى ولا كل جاتوه
وحلف مليون يمين ليربى المماليك  ويبعت تجريدة معتبرة تنسفهم ...
 فمين يشور عليه يستنى شوية ويلايم الامور
 ويمشيها مفاوضات الاول ...؟؟؟


الزينى بركات


اللى يطلب يكون رسول والى مصر لأمرا المماليك
عشان يقنعهم بوقف القتال والتفاوض .. وكدهون
ويوافق مصطفى ويروح الزينى بركات بمنتهى الثقة والخيلاء
واثق الخطى متصورا انه هينجح ف مهمته
ويجيب الديب من ديله ويبقى فرخة بكشك ف العهد الجديد
والغرور لما يركب البنى آدم بقى ويعميه ..
والطمع كمان انه يبقى رجل كل العصور ...



ويدخل خيمة إينال السيقى ويبتدى الحديث
ويحاول اقناعه وترغيبه
وبعدين الامور تفلت من ايده
ويطول لسانه ويهدد
 فيرفع اينال سيفه ويطير رقبة الزينى بركات ... ف لحظة !!

ويظهر حسن الهلالى لآخر مرة عشان يقول بكل ثقة
وهيصة وفرحة الدنيا ...
 .... التااااااااااالت

ويموت الزينى بركات ف اول 1523 مقتولا ومغدور به ..
ويبعتوا راسه للسلطان مصطفى اللى يتجنن
ويطلع اكتر من حملة تقبض ع الجدعان اينال وجانم السيفى
ومش مهم ان واحد يموت وهوه بيقاوم القبض عليه ..
ومش مهم التانى يتشنق على باب زويلة ..
لأن اذا كان من الموت بد .. فهم ماتوا اشجع موتة



وف أقل من عشر سنين ...
بعد الغزو العثمانى
مصر رمت الكلاب دول ف مزبلة التاريخ ..
ومحدش فيهم اتهنى
وعشان محدش يقول بعد كدا ...
الواطى لما بيعلى خلاص وقفنا على كدا ... مش حقيقى ..


والتاريخ بيقول
بس احنا نشوف آخرها ايه
وصحيح بنى عثمان قعدوا ف مصر كتيييير ...
بس غاروا ف النهاية زى غيرهم ..
وفضلنا احنا
ومن أعمالهم سُلطت عليهم ...  بصحيح 



ودى كانت نهاية الخونة التلاتة ..
حسن بن مرعى .. خاير بك .. الزينى بركات

سلامو عليكو

سلطان و شهيد .. يا طومان باى

كنا وقفنا امبارح 
عند مقتل السلطان قنصوه الغورى يا نضرى
 ف معركة مرج دابق بعد ما المماليك غدروا بيه
 واتشل ف الميدان واتنقط
 ومات وملقوش جتته


قوم سريعا وصلت الأخبار للقاهرة بموته ...
 وكان الدوادار اللى هوه نائب السلطنة وابن اخو الحاج قنصوه ... 
بيباشر اعماله كالعادة

 لما جاله الخبر
الحق يا عم طومان عمك الحاج مات ف المعركة ..
واتنا اللى عليك الدور يا حلو .. 
استلم مكانه بقى 
وهتبقى سلطاننا دلوقتى
 يا أطوما يا ابو السلاطين



قوم طومان باى يعمل زى عمه ...
طبق الأصل العلقة الاولانية لا قلم ناقص ولا قلم زايد ...
عيطّ وقال .. 
مليش دعوة ومحكمشى




الموظفين الكبار والوجهاء وباقى الامرا اللى كانوا لسه ف القاهرة
اتلموا عليه يحايلوه 
ولما رفض راحو للشيخ ابو السعود الجارحى
 وافتكروا الاسم دا



لأن هذا الرجل كان من شيوخ الصوفية
 وكانله شأن عظيم وكان الأمراء بيقفوا قصاده ركبهم تتخبط ..
وكانت الناس بتحترمه 
وله كرامات تعاظم شأنها ف عصرها


والعصور المظلمة اللى زى دى
 بيكتر فيها التعلق بالناس البركة
من كتر يأس الناس من الدنيا ورجالها ...
 والشيخ ابو السعود كان احدى البركات 





المهم الأمرا وقعوا ف عرضه ..
 الحقنا .. 
راح باعت لطومان باى واتكلم معاه 
وقاله طلباتك ايه ...
 طومان قال مفيش فلوس 
والامرا مبيسمعوش الكلام وكدا



ومهما عملت مش هيعجبهم ..
وسليم الاول هيفشخنا ... 
وهيغدروا بيا ويقتلونى ...
 قصره ...
 قاله مش عاوازها السلطنة دى 
يا شيخ ابو السعود والنبى ى ى



الشيخ ابو السعود لم الامرا وطومان باى
وخلاهم يحلفوا ع المصحف بأنهم يتبعوه 
ويسمعوا اومرا وميخرجوش عليه 
ومحدش فيهم يستحل دمه .. وأطاعوا الامر



واتسلطن طومان باى
وهوه ابن 38 يا كبدى ...
 والشعب المصرى استقبل الخبر براحة
 لأنه كان رجل خّير
 وكويس ومش بتاع أذى .. 
ودخل ع المعمعة علطوووول



والظاهر انها كانت عادة ولاّ ايه لأن كلهم بيعملوا كدا ..
راح طومان باى على سجن المقشرة 
وخرج اغلب مساجينه 
ووّسط بعض القتلة 
وخلى هناك نفر قليل



بت يا مارووو catheartmaro@ الجدع اللى كنتى بتسألى عليه امبارح ..
 طومان باى طلعه م المقشرة مع باقى المساجين
 اللى خدوا افراج آه والنيعمة :)



والبلد تتهز لما توصل اخبار موت الأمراء والجند اللى شاركوا ف القتال
وتيجى اخبار من الشام ان سليم الاول استولى على دمشق .. 
فالناس تتغم


ويحصل هرج وفوضى ف الداخل والعربان يغيروا على الشرقية
وينهبوها ويروح طومان يأدبهم .. 

والأمرا زى ريما 
ترجع لعادتها القديمة وتثور عليه ..
ويطلبوا فلوس ..
يعمل زى عمه ويقولهم منين ؟؟؟
 فأتلموا عليه يهينوه ويقولوله .. 
ما دام اتسلطنت علينا تعمل زى اللى قبلك 
ومتقولوش اعملكوا ايه !!



راح مبعتر كرامتهم بقى ..
وقايلهم عمى كان بيقبضكوا فوق الميت دينار 
ومحاربتوش وعملتوا عيشة ...
 اخرسوا بقى 
واللى مش عاجبه ادينى سابهالكو مخضرة



وساب المجلس وجه يمشى ...
مسكوا فيه وقالوا خلاص ... 
والواقعة دى بتبين ازاى كان شخصيته قوية وعنده عزة نفس 
وازاى بيعرف يعامل الأشكال دى كويس :)



المهم ننقل بقى على الناحية التانية ...
حيث لسه ميدان معركة مرج دابق لسه سخن وحى 
ومراسلنا هناك
 هيقولنا 
كيف الاحوال عندك يا خميس ابو العافية



وخميس ابوالعافية من امام دمشق
 بيقول ان سليم الأول لما دخلها
 قتل من امرائها 36 امير
 وهرب اللى يقدر يهرب متخفى
 وعاث جنود فسادا ف البلد كلها



واستضاف شاهد عيان اسمه ابو المحاسن ..
قال ان جند بنى عثمان كانوا فوق ال60 ألف مقاتل 
وان الحاج سليم الأول بينعزل عن جنده لأيام .. 
والأيام دى
العسكر بيعيثوا فيها فسادا من تحت دقنه يعنى 
وهوه بيطنشلهم ...
وانهم اهل فجور ومعاصى ومش بيصوموا ف رمضان
 وسليم مبيصليش الجمعة احيانا ...



وان الجنود لما دخلوا دمشق استوطنوا ميدانها
 اللى عدى منه موكب قنصوه الغورى الله يرحمه
 وحطوا خيامهم
وف النص ضربوا 3 خيااااام ... كانوا كالآتى

خيمة للبوظة ...
وخيمة للحشيش .. 
وخيمة للغلمان ...
 يعنى لامؤاخذة .. لامؤاخذتين .. تلات لامؤاخذات وحتة ...
 و طلعوا ناس طيبييييين قوى



والمخرج دلوقتى بيشد ف شعره 
وبيقول اقطعوا الهوا عن المراسل ...
 ايه المناظر اللى هوه جايبها تتكلم دى ؟ !!! 
عترفدونا الله يخربيتكو !!!



الملخص ان سليم الأول كان عازما وبشدة على التقدم لمصر
 خصوصا بعد ما خلص على قنصوه .. 
وحتة حتة بقت الشام ف عبه ..
 وفاضل على مصر دقة



ننتقل بقى إلى القاهرة ...
حيث طومان باى اللى محتاس حوسة ملهاش زى ... 
وبتوصله الاخبار بإنتصارات سليم غريمه .. 
ويوصله رسالة منه 
وفيها الآتى ..



 النص بالحرف صعب يتقال ... 
بس فيما معناه يعنى ...
 انتا حتة مملوك متباع وبيشتروك 
وانا سليل الملوك من جدود لجدود .. 
واحسنلك تسلملى مصر
وبلدك دلوقتى بقت بتاعتى رسمى ..
بعد ما قتلت قنصوه عمك .. 
وخراج مصر من حقى وافضلك تبعته بدون قلق 
بدل ما اجى ابهدلكم انتا وامرائك .. 
وكن نائبى
ولو ما سلمتشّ هدخل مصر
ومش هسيب حد آمن وهقتل رجالها وابقر بطون الحوامل
و اطلع أى جنين ابوه تركى .. 



و كلام كتير كدا تهديد ووعيد
 ورعب ازلى ..
خلى طومان باى من كتر الخوف وتخيل هول الموقف ...
يبكى ويخاف من حال البلد لو دخلها سليم 
ونفذ تهديده ..



هيسكت .. ؟
لأ .. ابتدى يجهز ف الجيش بأقصى سرعة ممكنة ..
وقال لمماليكه ..
 اخرجوا معايا حاربوا عشان بيتكم واولادكم وحريمكم ..
 انا معنديش فلوس ليكم ..



وصلت الاخبار بتحركات جيش سليم 
وانه دخل العريش ...
والعربان استجدعت وبقت تحاصر الكتايب 
وتقبض على الجنود بغتة وتدبحهم وتبعت راسهم لطومان باى
اللى كان بيكافئهم ...
وياخد الروس يعلقها على باب زويلة
عشان يثبت قلوب العامة 
ويشجع جنوده ويجمد قلبهم ... 


وبعت يطلب مدد من المغاربة ورفضوا
وقالوا احنا مبنحاربش مسلمين زينا
وبنحارب الفرنجة بس .. !


وسرت اشاعة ان حاكم جزيرة رودس
هيبعت مقاتلين من عنده للمساعدة .. 
وبعدين محصلش


ووصل سليم بجنوده عند الصالحية ..
والامرا شارت على طومان يروحوا يحاربوه هناك ... 
ورفض 
وقالهم لما يوصل الرايدانية احسن .. 
وأنسب لنا



والرايدانية دى يا عيال
 اللى هيا منطقة العباسية حاليا
ويبدو ان الحتة دى قُدر لها انها تكون ثكنات للعسكر 
واماكن نفوذهم زمان ولحد النهاردة ..



وفيه رايدنية تانية بس دى قرية ف المنصورة .. 
وملهاش دعوة بالمعركة خالص ... 
لأنها ف مكان بعيد عن موقع الحدث اكيد

 الناس والعامة وصلهم الخبر بقرب جيش العثمانين من القاهرة
فشاع الفزع وكله لمّ القماش والخزين 
 و منهم اللى استخبى ف التُرب والمقابر


وقبل وصول جيش سليم لبلبيس بعت طومان باى لناسه هناك
يحرقوا الشون والمؤن عشان العثمانلية 
ميلقوش اكل لحصانتهم 
ويبقوا منهكين 
ومش ف احسن حالاتهم



وطول السكة بقى ...
العربان ييصطادوا ف جنود بنى عثمان 
وبيعتوا الرؤؤس على القاهرة وتتعلق على أبواب المدينة .. 
وطومان باى يعد العدة والانفس
ويكون قوام جيشه من الامراء الباقين من معركة مرج دابق
واللى قعدوا ف القاهرة .. 
وجزء تانى من المصريين وعامة الشعب .. 
ووصل سليم لبركة الحاج



والبركة دى فى منطقة المرج ..
بتاعت المترو دى عارفينها ؟ ... 
يعنى خلاص بقوا قريبين جداااا ..
 قوم اغُلقت ابواب القاهرة كلها .. استنفارا للحدث


هاه ... نكمل ؟؟؟



طومان باى يرتب جنده ..
 اللى يقال انهم عدوا ال 20 الف من المماليك السلطانية
 ومماليك الامراء والعربان والعامة من الشعب 
وكان رجل عسكرى بحق


كان سنه صغير وملحقش يتلوث بالسلطة ..
وكان محبوب من الناس وقليل الأذى ..
 ولما تولى المهمة كان راجل وقدها .. 
رغم معرفته بالموقف المقندل للبلد
والناس تستشعر دا وتحسه ...
 فتقف جنبه بقلب رغم ان الحال يشير لهزيمة محققة ...
بس هزيمة بشرف
 وفى هذا المجد كله لو تعلمون

ويوصل طومان باى بجنده للرايدانية
ويحفروا خندق من الجبل الأحمر لغيطان المطرية 
ويقفوا وراه بالأسلحة والمدافع والجمال والعتاد وخزين تحسبا يعنى



طومان باى كان فاكر المعركة هتقعد ايام وكدهون ..
 لكن يا كبدى ملحقشى والليلة اتلمت علطول ...
 لما ابتدى القتال 
وجند بنى عثمان كانوا اكتر عددا
واشتدت المعركة
وبقت اشرس من مرج دابق بمراحل لأن مكنش فيها خيانات
 والكل استرجل وخلص علب البيريل كلها قبل ما يدخل ميدان المعركة :)




وانقتل من هنا وهناك
 قواد كبار ومحاربين اشداء
 وبيّن طومان باى ورجالة كرامة ولكن ..
 الكترة غلبت الشجاعة واتغلبوا 

واتكاتر العثمانلية على طومان باى
ولقى نفسه اوشك ع الهلاك راح لامم راية السلطان
 وطاويها قبل ما تسقط .. 
ويبقى معناها استسلام 
وهرب من المطرح وراح على نواحى طرة



اما عسكر بنى عثمان فبعد ما ظهرلهم النصرة ..
راحوا على كل حاجة يملكها جند مصر واستولوا عليها..
سلاح وعتاد وخزين وجمال وبقر و بارود
 وكله .. كله



وبعدها دخلوا القاهرة وفتحوا سجونها
وخرجوا جواسيسهم ونهبوا الأسواق وقصور الأمراء
وخطفوا العيال الصغيرة وبهدلوا الدنيا 



الكلام دا كان الخميس ..
على يوم الجمعة بقى كان دخول موكب الاسرى من عظماء القوم
 اللى أسرهم سليم الاول طول رحلته من مطرحه لحد مصر ...



واهم الكبار دول كان اخر خليفة عباسى ف سلالته 
هو المتوكل بأمر الله الثالث
اللى كان أسير عند سليم الاول 
ووقع تحت سطوته 
وتنازله عن الخلافة كرها



واللى بدخوله القاهرة بعد سقوطها فى ايد بنى عثمان ..
 بعت ف الأسواق يطالب الناس بالدعاء للملك المظفر سليم شاه بالنصر ... !!!
وقال ان دولة الظلم راحت خلاص والعدل آت وكله يأمن وميخفشى ..
وادعوا لسليم يا ولاد ... 



قوم المصريين صيع بقى ... 
محدش عبر مامته بالمرة :))
فأتغاظ العثمانلية وقالوا ايه المصريين الغتتة دول
طب لما نطلع ترابنتينهم بقى ..
ونزلوا نهب ف البلد 3 ايام 
وخلوا بيوت الامرا خاوية على عروشها



وبعتوا لشيوخ الجوامع تدعى ع المنابر للسلطان ابن السلطان
 كاسر الجيشين مالك البرين 
والبحرين خادم الحرمين الشريفين
الملك المظفر سليم شاه .. !


طب ما يكملوا ويقولوا ..
اسمالله عليه ... اسمالله عليه ... دا اللى كان ناقص



الشيوخ طبعا أوغاد اوغاد ...
دعت علطول ..
 اكمن مات الملك عاش الملك وكدهون ... 
ابتدى بقى سليم الاول يباشر مهام سلطته
ولنا .. هنا .. وقفة 
#عرفة_الشواف_ستايل



الحاج سليم الاول دا بقى ...
زى ما قال خليفة خلف الله خلف خلاف المحامى تماااام ..
يعنى انظروا إلى هذا الحمل الودييييع
بصوا ف صورته بجد هتلاقوها ملائكية وملامحه لتيفة خااالث ...
انما ف الحقيقة بقى كان راجل دموى
و ابن ستين ف مية خمسة واربعين ع الأقل ... !!

مكنلوش امان
ويحب يستفيد م الخونة زى خاير بك اللى ساعده ف دخول مصر
وكان يدى الامان للناس 
وبعدين يغدر وقتل اعداد غفيرة م الناس لا تعد ولا تحصى
وينسب اليه الفضل فى عمل اكوام من الجماجم على شكل هرم
ى وتعليق رؤؤس القتلى على البوابات عشان تتشمس 
وتاخد تان وكدهون ..
 الله يحرقه ف جهنم بقى



اول ما قعد ع الكرسى ..
 بعت رجالته يلموا الأامرا اللى هربوا على كل مطرح ..
وييجى الأمير من هنا ويندبح من هنا ويتعلق راسه على باب م الابواب


ولمّ الخونة حواليه ونخص بالذكر الزينى بركات بن موسى
 اللى غضب عليه طومان باى وعزله .. 
ورجعه محتسب تانى يذل أبدان الناس ولا عزاء للمخلصين



وسى سليم مرضيش يطلع القلعة وقعد على شط النيل
 لحد ما جهزوله موكب ضخم دخل بيه القاهرة من باب النصر
 وقصاده الأعيان و المحاسيب يدعوله بالنصر ويهللوا ..



وكل دا بيحصل ولا حدش سألنى عن الغلبان طومان باى
ولا كأنه حارب عشانكو
ولا اتبهدل واتمرمط وكدهون ... 
هذى آخرتها ؟؟؟ 
#القذافى_ستايل



طومان باى مكنش ساكت وراح يلم حاله
 ويجمع رجاله ومنهم العربان والامرا اللى هربوا 
ونجوا بروحهم من بنى عثمان اللى عسكروا ف بولاق
 وهوب لقوا مين ؟
لقوا طومان باى ورجالته هاجمين عليهم
وفين يوجعك والعركة استمرت للفجر 
واتشجع المماليك الجراكسة وبقوا يدخلوا ع العثمانلية ينهبوهم



وانقلب الحال
وبقى الغالب مغلوب
و الجند والعامة يقبضوا على أى عثمانى
 ويدبحوه ويبعتوا راسه لطومان باى
ويحصل كر وفر ويدخل طومان ع الصليبة 
ويقسم فرقه لأربعة


ويعتدى بعض العثمانلية على ضريح السيدة نفيسة
فيطلع عليهم جند اتراك يدبحوهم وتدور معارك شوارع بين الفئتين .. 
وتتراكم الجثث فى الأزقة والطرقات



وشوف الشياكة واخلاق الفرسان طومان باى يبعت منادى ف الناس
 يطالبهم بأن لو حد من العثمانلية طلب الامان
لما يقبضوا عليه ميقتلوهوش .. تخيلوا !!!
#يادى_سلمية _سلمية_اللى_جايبانا_ورا_من_بدرى



وتستمر المعارك من الأربع للسبت
 وسبحان الله ..
 الجمعة اللى فاتت يدعى على المنابر لسليم الاول .. 
والجمعة دى يرجع الشيوخ يدعوا لطومان باى .. !!



وتااانى .. الكترة تغلب
ويتكاتر على طومان باى العثمانين 
اللى زى الجراد 
ويقل الامرا من حواليه
 ويضطر يهرب للمرة التانية عشان يلم شتاته ويرجع


وجن جنون العثمانلية اللى قرروا يعاقبوا الناس اللى ساندت طومان باى
وحرقوا جامع الصليبة
وعذبوا شيخه
وبهدلوا أهل بولاق ومات وقتها 10 الاف انسان


وتتدهور الاحوال وتشح المؤن والغلال اللى نهب العثمانلية 
اغلبها بدخولهم القاهرة ..
 وسليم الأول تعمد يسيب الدولة تتحلل اكتر 
واهمل الادارة فيها
وكأنه بيفكرنى بمين يا ربى اللى برضو طلع بيننا
 عشان يكرهنا ف روحنا
 ويندمنا اننا عملنا ثورة فخلى البلد سويقة .. 
مين يا ترى ... ميييين ؟؟!!!



وينكل سليم الاول بكل امير مملوكى يقع تحت ايده
 وطومان باى ف مخبأه يعد العدة للرجوع
. والبلد تنهار وعسكر بنى عثمان يعيثوا فيها فسادا


ويفكر طومان باى ف التفاوض عشان تزول الغمة دى
 عن العوام اللى اتبهدلوا اشد بهدلة
 ويبعت لسليم مكاتيب بأنه موافق يكون نائبه 
ويحمله خراج مصر ..
ويدعى له ف الجمع وكل حاجة
 شريطة ان يخرج من مصر ويرحل بعساكره
 وميبقاش فيها عثمانلى واحد ..
عجبك على كدا ماشى مش عاجبك لاقينى والنصر لصاحبه


وفهمه ف نهاية الرسالة انه مش بيفاوضه عجزا
وان عنده من المقاتلين ولو قلة .. ما يكفى للنصر او الشهادة ان شاء الله ... 
والتوقيع .. طومان باى :)

وصراع الديوك بقى ...
وسليم يصمم يكسر مناخير الجدع ابو كرامة دا بأى شكل .. 
ويتلاقى عسكر طومان بعسكر بنى عثمان ف الجيزة
 وتدور رحى المعركة



وكالعااااادة .. طومان باى يلاقى العضم ف الكرشة ..
يبلى ف البداية بلاءا حسنا ثم تنقلب الآية بعد شوية
 وتتكاتر جنود بنى عثمان بمدد كل شوية
ويهرب طومان بااااااى ... 
ويروح باى ...
 للمرة الكام مش فاكرة بقى قولوا انتوا !!!



ويفرح سليم بالنصر ويقرر يزور الجيزة
ويتفرج ع الاهرامات ويركب الجمال والحصنة
 وبالمرة يشوف الصوت والضوء ويشترى جلابية للمدام من كرداسة 


ويدور طومان باى الغلبان على متوى يستخبى فيه
 فيلاقى بيت احد العربان يستقبله
 ويحلفله ع المصحف انه مش هيخونه ولا يسلمه لبنى عثمان..
والراجل يحلف
كان اسمه حسن بن مرعى 
وكان من اصحاب طومان باى ويدينله بالفضل ..



بس تقولوا ايه بقى ع الأصيل لما تبهدله الايام ... 
والأصيل يبقى طومان باى طبعا
اللى فجأة يلاقى عسكر بنى عثمان فوق دماغه
ويقبضوا عليه 
ويدخلوه بلبس العربان اللى متنكر فيه على الحاج سليم الاول 
اللى يقوله ...



كدا يا طومان تغلبنا 
وتدوخنا وراك السبع دوخات ؟!!
ويحبسه 17 يوم يفكر فيهم هيعمل فيه ايه 
وكان ناوى يبعته برا مصر وميقتلوش 
لولا زفت الطين بقى



وزفت الطين هنا يبقى المحتسب .. الزينى بركات
اللى يقّوم سليم الاول عليه 
ويقنعه يتخلص منه بالقتل عشان ينهى أى فرصة 
لظهور دولة المماليك من تانى


وعامة الشعب الطيب يستصعب فكرة ان طومان باى اتقبض عليه
ويرفضوا يصدقوا .. 
كانوا بيحبوه 
وقدروا اصراره ع القتال والدفاع عن مصر وكرامة اهلها ..


فيتحرق دم سليم الاول جدااا م الحكاية دى 
ويقرر يخلى طومان باى فرجة ...

وفعلا ف يوم مشهود يخرج موكب من بولاق
 مكون من 400 جندى عثمانى ...
يعدى سوق مرجوش ويشق القاهرة لحد باب زويلة ...
وطول الطريق ... 
كان طومان باى ف الحديد 
و على فرس والناس بتشاورله وتحيه وتدعيله بالنجاة



ولما يوصل الموكب لباب زويلة ...
يفهم طومان باى
 ان ساعة الرحيل أزفت
ينزلوه من ع الفرس ..
 ويقربوه من الباب ..
 فيبص طومان باى للجموع اللى احتشدت عشان تشوفه وتودعه ..
ويطلب منهم يقروله الفاتحة 3 مرات .. 
فيقروله

ويلفوا الحبل حوالين رقبته وينطق بالشهادة ..
ويشنقوه ويقع بالحبل مرة ..
فيرفعوه ويشنقوه تانى
 ويروح لربه ... مأسوفا عليه



ويموت الغلبان البائس دا
ويبقى آخر سلاطين المماليك فى مصر جمعاء ...
ويحكم يا دوب 3 شهور و14 يوم يشوف فيهم اهوال
 ويبقى قد الشيلة 
وينهزم بشرف


والشعب المصرى يكّرم ذكراه 
ويسموه ...
 السلطان الشهيد 
):
:)


ويحضرنى هنا هتاف الثوار للعسكر..
عيشوا بشرف جتكوا القرف..
وطومان باى كان من هولاء اللى الواحد
 يستشعر من سيرة حياتهم القصيرة
 بشرف الجندية بحق



وتوتة توتة خلصت حدوتة ...
 طومان باى


تصبحوا على ألف خير