جـــزيــرة فــــاروس ( 2 ) : قـلعــــة قــايــتــبـــاى

قبل ما أكمل حكاية الجزيرة 
و المنارة بعد ما مال بيها الزمن
احب بس أتوقف لدقيقة اتذكر فيها
وبكل فخرووون وإعتيزازززز 
سيدتى الجميلة شويكار
 ف مسرحية أنا فين وانتى فين
لما وقفت رافعة مناخيرها لفوق متر
وسألت فؤاد المهندس السؤال الملحمى اياه 

أبوك ..... كان كائد طابية ؟
والست والدتك .. .. كات كائد طابية ؟
لأ 
تبقى مش من مستوايااااااااا



عشان بس نفهم احنا داخلين على إيه
وان الطابية دى مش أى كلام يعنى
وكنا وقفنا امبارح عند السلطان قايتباى
لما راح ف زيارة تفقدية لأسكندرية
ولما شاف المنارة بحالتها المبهدلة 
فقال نعمل مكانها برج

الكلام دا كان سنة 1477 م الموافق 882هـ
حسبما تفيد اليافطة
بس البناء فعلا .. هياخدله سنتين عشان يتم 
ويخلص ع الآخر



ابن اياس ف بدائع الزهور بيقول
ان البرج او الطابية او القلعة 
اتكلفت حضرتك كدا شاكب راكب
بتاع من 90 إلى مائة ألف دينار
 #يا_بلااااش

وحد يسألنى ويقولى يا كابتشن لطيف ..
بقى معقولة القلعة دى اتكلفت المبلغ القليل دا
علما بإن المماليك ف اخر عهدهم 
كانت البلد حالها زى دلوقتى ؟!
اقتصاد واقع والنهب على ودنه وكدا 
أقولكم اينعم متكلفتش كتير فعلا لسببين


 1) الحاج قايتباى كان مفترى وايده ناشفة
وموظفينه بيخافوا منه 
ومن بطشه زائد انه كان مهووس بالعمارة
كان غاوى يبنى ف منشئات
وكان عنده خبرة فعلا ف التكاليف والفلوس
2) القلعة لما اتبنت
كان عنصرها الاساسى موجود فعلا .. 
واللى بقى فقط عملية التشييد

يعنى اغلب المصادر بتقول
إن القلعة اتبنت من أحجار المنار
أو بمعنى ادق اللى فضل من المنار 
 (معلش معرفتش أصورها أوضح )

وسريعا عشان مصدعكوش القلعة
عبارة عن 3 طوابق
اول دور فيه الجامع

 واللى وقعت مئذنته 1882 
مع ضرب الانجليز لأسكندرية 

والدور التانى فيه حجرات وممرات ..
والدور التالت مقعد للسلطان
وطاحونة ومخبز للعيش وممرات

والقلعة بأربع أبراج ومتحاوظة بسورين
واحد جوا التانى وافلام كدا
زائد خزان مية وكان مخفى عن العيون 
عشان يبقى بعيد عن الأعداء ومحدش يسمهم وكدا 

واللى يهمنى دلوقتى انها اتبنت خلاص
وهيروح الحاج قايتباى بذات سخصيته عشان يفتتحها
ويقص الشريط وحدث هذا بالفعل
وبيقول الراوى
ان السلطان راح يعاين برج رشيد 
ورجع على برج اسكندرية

" ثم كشف عن البرج الذى انشأه بثغر الاسكندرية
مكان المنار القديم فجاء من محاسن الزمان
 ومن أعظم الابنية وأجمل الآثار الحسن
وجعل حول هذا البرج كواحل معمرة بالمدافع ليلا ونهارا
لئلا تطرق الأفرنج الثغر على حين غفلة
وجعل به جماعة من المجاهدين قاطنين به دائما ..
واجرى عليهم الجوامك والرواتب كل شهر
 وجعل شادا من خواصه وهوه باش عليهم .. "

يعنى الراجل عمل اللى عليه روق البرج
أو الطابية أو القلعة
 وكتر الف خيره
وبيقولوا انه يوم ما زارها طلع للدور التالت
 ف مقعد السلطان وقعد فيه شوية يبص ع المراكب
اللى ظهرت على مسيرة يوم 




وبس كدا موشكرين يا حاج
 .. الجدع عمل اللى عليه فعلا 
وحصّن ثغر اسكندرية
وبعدين مات
وجه من بعده قنصوه الغورى
 #ربنا_ياخده_كمان_وكمان هه
ليه بدعى على قنصوى ؟
لأسباب عديدة اولها انه سلطان هزوء
ثانيها انه عمل مش عاوز السلطة
وبعدين مسك فيها وبهدل البلد معاه لحد ما ضاعت ف الوبا

سى قنصوى زى منتوا عارفين البلد ف عهده
كانت ف أسوأ حال لدرجة خلت العثمانيين
يفكروا ف غزوها حالا بالا 
وياكلوها حتتك بتتك 



قنصوى الغورى اول مرة فكّر يسافر اسكندرية
كان سنة 1510 م بس اللى منعه عن المراوح
كان الفيضان 
واكتفى بعرض عملهوله المهندس حسن بن الصياد

الهندزة حسن بن الصياد عمله ماكيت بالجبس فيه
"و خط له بالجبس فى الارض مدينة الثغر
وعدد ابراجها وابوابها وهيئة سورها .. "

والبرج بتاع قايتباى طبعا كان ف الحسبان
وسى قنصوى كل اللى عمله انه نزل من القلعة
بص ف الماكيت دا وبعدين روّح لأمه
وخلصنا على كدا #جررررر
متغاظة معلش



وطبعا بسلامته انشغل بالجوارى والاكل 
ولم الفلوس
والتدبيح ف الخلق والكيد ف المماليك
لحد ما سليم الاول دخل الشام 
وقرب على مصر 
وابتدى مناوشاته

قام قنصوى قالك أختشى على دمى بقى
واروح الثغر اشوف التحصينات وأطمن
واعمل سلطان وزفت
 وراح اللى ما يوعى على اسكندرية فعلا
سنة 1515 م الكلام دا

والراوى يقول ان السلطان ومن معه
فضلوا يمشوا ف المدينة كتير
وهيا ساكتة كدا وحالها كرب
والاكادة ان نايبها استغل غفلة قنصوى عنها 
وزود ف الضرايب ع التجار
فالتجار طفشوا خالص منها 
 "طلب الخبز بها فلم يوجد ولا الأكل
ووجد بعض الدكاكين مفتحة والبقية خراب لم تفتح
وكانت الأسكندرية من أجل مدائن الدنيا "
تخيلوا .. ؟


المدينة اللى لما دخلها عمرو بن العاص
كان فيها 4 الاف قصر وحمام
و400 مسرح
و1200 بياع خضار حالها بقى كدا ف زمن المماليك
:(((

القصد .. الوغد قنصوى راح على برج قايتباى ..
عشان يعاينه ومعاه الامراء
وهناك هيعملوا زى عرض عسكرى كدا صغنن على ما قُسم 
ومينساش قبل ما يمشى انه يطلع مرسوم
بمقتضاه محدش يدخل ولا يخرج حاجة من السلاح
من مخزن البرج الا بامر منه .
 #عامل _ابن_صايعة_قوى_يا_خويا ؟
طيب
كلها شوية وتتشال هوبا يا هوبا 

وبس ياخد بعضه ويروح راجع ع القاهرة
 الزيارة دى كانت ف يناير .. هما الكام شهر
والعلاقات بين مصر والعثمانلية اتدهورت
وقنصوى بعت رسول لبنى عثمان
السلطان سليم الاول طبعنننن استقبل الرسول دا
أحسن استقباااااال وعمل معاه الجلاشة
وكان هيقتله فعلا لولاش الناس اتوسطتله
وراح باعته لقنصوى تانى
اللى هرش ان الادب والهدايا والمحلسة مش نافعين
وانه لازم يجب يضطر اذ لابد يحاول يسترجل بقى
ويحارب زى السلاطين المحترمة
 #تستاهل_يا_روح_امك

ويسافر قنصوى على اسكندرية سفريته الأخييييييرة
ف اكتوبر 1515 عشان يتفقد الاحوال
ويشوف البرج كيفما صار وكدا 
ويتفقد بالمرة برج رشيد هوه كمان
وتيجى الاخبار ان سليم الاول جاى بعساكره من الشام
بينما ييجى 400 مركب جاية م البحر على اسكندرية


وخلاص بقى
انتوا عارفين الباقى ...
دخل العثمانيين مصر وبقت ولاية تبعهم
وبالتالى أصبحت اسكندرية كذلك
 وهيتعينلها والى مخصوص منفصل تماما عن القاهرة

وهيبقى وضعها مستقل عشان يبقى فيه نوع من التفريق والإنفصال كدا غير مرئى
والبرج بتاع قايتباى هيتم الأهتمام بيه فقط
عشان موقعه واهميته المعروفة

العثمانلية هيهتموا بالأبراج والتحصينات وسور المدينة
لكن اسكندرية نفسها واللى كانت خرابة قبل مجييهم
هتفضل حالتها فقر زى ما هيا 
خصوصا  بعد اكتشاف رأس الرجاء الصالح
واصلا اصلا اخر ايام المماليك كان التجار
طفشانين من وش ولاتها عشان الضرايب
يعنى من الاخر بقى غزو وخراب ديار
 #غلبانة_يا_اسكندرية

 


وبس قعدنا كدا عشرات السنين
العثمانلية يحلبوا ف مصر وينهبوا أى خير فيها
ويهمشوا ف دورها .. 
لحد ما تلك الأيام نداولها بين الناس
 #الزمن
وتروح عليك يا زوزو
وتطمع فرنسا ف مصر
وتفكر تدهس فيها هيا كمان واشمعنى انتوا ؟!!

وقبل ما ندخل ع الحقبة دى عاوز اقول ان العثمانلية كانوا ..
مسمين برج قايتباى او القلعة بتاعته دى .. قلعة الركن
ف اوراقهم الرسمية كانت كدا
أل عشان ميجيبوش سيرة سلطان مملوكى وكدا ..
 #كيادين_قوى
#جاتكوا_خيبة_ف_اساميكو

المهمممم احد الرسامين الفرنسيين
وكان اسمه (سافارى) زار مصر
وكتب عن قلعة الركن دى ف مذكراته الجملة الآتية
 "لا تقوى على صد بارجة واحدة"
وقنصل فرنسا ف مصر كتب لحكومته
لم يكن بها سوى 4 مدافع صالحة للضرب
وليس فيها رماة يحسنون الرمى بالقنابل 
وحاميتها المكونة من 500 من الانكشارية
هبط عددهم الى النصف

وكتب ان القلعة فخمة ف مظهرها بس
لكن هيا بائسة ف تحصيناتها ..
و كمان
"تكاد تخلوا من الذخائر والمدفعية
والمدافع الباقية فيها لا تصلح للضرب
ولا تستعمل إلا فى الأعياد "
#بس_شكرا_آحاج 

ونابليون كدا اطمن ولم مراكبه
ودخل علينا هجم كدا
واسكندرية استقبلته بكل ود وترحااااااااب
وكنت حكيت القصة 
هنا 

بس الملخص ان القلعة ملحقتش تعمل أى منظر
بس محمد كريم واهل اسكندرية عملوا اللى يقدروا عليه
واحتل عسكر جيش الشرق القلاع والحصون كلها 
وصلحوا المتخرب فيها وحطوا مدافعهم 
وهما الـ 3 سنين ومشيوا الفرنساوية

مشى الفرنسيس 1801
وقعدت البلد ف اضطرابات كام سنة
لحد ما وصل محمد على للحكم 1805
وطبعا كان عسكرى قرارى فأهتم بأسكندرية وبالقلعة معاها

وحرص محمد على على تحديث النظم الدفاعية
عشان تمشى مع الزمن والعصر وقوى أسوار القلعة
وجدد ف مبانيها وحط مدافع كتير
وبنى كذا برج على طول شط اسكندرية
وحصنهم وحط فيهم مدافع

والراجل بصراحة كان شاطر وبيفهم ف شغله
وسلم التركة لولاده واحفاده ... 
اللى منهم حاول يعمل أى منظر 
واللى منهم كان كيس جوافة ومنظر فعلا 
لحد ايييييه؟

لحد ما وصلنا لزمن سى توفيق افندى نكّسنا العلم
توفيق اللى بضعفه وصراعه مع احمد عرابى
شجع الانجليز على احتلال مصر 
وحكينا قبل كدا برضو الحكاية
هنا 
وقولنا ازاى اسكندرية سقطت تحت الاحتلال
ف لحظة غدر
ومش هكرر تفاصيل بقى
بس هقول من كتاب للأمير عمر طوسون حاجات

الكتاب عنوانه
( يوم ١١ ﻳﻮﻟﻴﻪ ﺳﻨﺔ ١٨٨٢)
دا يوم سقوط المدينة 
 .. بس عمر طوسون حكى بأدق التفاصيل والأرقام
عن صمود الطوابى والحصون

وحكى كمان بدقة عن اعداد المدافع والاهوان
والجنود والضرب ابتدى امتى والخساير الخ الخ 
واللى يعنينى ما ذكره عن طابية قايتباى
وقال ان كان فيها بالضبط بالضبط
عدد 20 ﻣﺪﻓﻊ
و عدد 12 أﻫﻮان
الهون دا يعنى مدفع بيتشال ع الكتف
وسهل الحمل مش تقيل زى التقليدى اللى ف الصورة



وبيصنف طابية قايتباى انها كانت واقعة
ف المنطقة الثانية - شمال المدينة
مع كل من ﺣﺼﻦ اﻟﻬﻼﻟﻴﺔ 
واﻷﻃﺔ
 واﻻﺳﺒﺘﺎﻟﻴﺔ 
ورأس اﻟﺘني 
واﻟﻔﻨﺎر

وبيقول كمان ان بالحسابات العسكرية بقى
فطلع ان قوة ﺣﺼﻦ ﻗﺎﻳﺘﺒﺎي ﺑﺎﻟﻨﺴﺒﺔ ﻟﻸﺳﻄﻮل اﻟﺬي ﻫﺎﺟﻤﻪ
نسبتها طلعت
4 : 33 
تخيلوا .. !!!!



وبيحكى طوسون ازاى ان الأدميرال سيمور
أصدر أوامره بضرب اسكندرية
وصوب فوهات مدافعه ناحية قايتباى
وغيرها من الحصون .. وتم الرد عليهم
وازاى ان قلعة قايتباى خرج منها قذيفة
ونجحت ف اصابة مدرعة كبيرة ف البحر
فاضطرت الانجليز لرفع العلم الابيض عليها
وطلب هدنة 10 ساعات

وبعدين طبعا انتوا عارفين الباقى ..
الصمود مكنش كفاية لأبعاد المحتل وخلاص
ووقعت اسكندرية ف الأسر
وطابية قايتباى نالها من الخساير الكتير قوى ...

القلعة اتهدمت منها اجزاء
خصوصا اللى كانت ف الواجهة وبتتصدى لسفن المحتل
 ووقعت ف قلبها كمان مقذوفات
ومنارة المسجد اللى كانت فيها وقعت وانهارت

المئذنة دى هتلاقوها ف الرسومات شامخة وجميلة ..
للأسف وقعت وانهارت تماما


وحاول عرابى يعمل أى منظر وفشل
وراح مسّلم نفسه وانهزم .. رسمى
والخديوى توفيق بقى كيس الجوافة .. فهمى
ومصر وقعت تحت الاحتلال الأنجليزى ... نظمى




واترفعت الاعلام البيضا
على قلعة قايتباى والآطة وغيرها ...
واستلمها الانجليز
كانت قلعة قايتباى ف حالة يرسم لها 
ومحدش جه جنبها وطنشوا
سنة اتنين عشرة يا فطمطم .. صح ؟
أقولكم ابضنننن
اكتر من كدا وحياتكم .. قعدنا كدا لحد سنة 1904
لما اييييه

لما الراجل الطيب الأخلاق دا
واسمه "ماكس هرتز باشا"
هيكتشف ان قوات خفر السواحل بتهد ف قلعة قايتباى
 ليه يا جماعة كدا بتوقعوها ليه هيا زعلتكم ف حاجة ؟؟
قالوا منعرفش اسألوا القائد

قوم هرتز واللى كان مدير لمتحف الفن الأسلامى
 ثم بقى المعماري الرئيسي بلجنة حفظ الآثار العربية
راح وسأل قائد خفر النيلة
فالقائد قاله لأ دحنا بنعمل شوية تصليحات وبتاع ..
هرتز قاله انتوا كدا هتجيبوها الارض
ودى أثر
الملخص عشان مصدعكوش 
برضو الباشا هينقذ القلعة فعلا
والتفاصيل كلها هنا عند صاحب المدونة الممتعة دى 

القصد قلعة قايتباى هتتلحق من الهدم تماما 
ويتعاد ترميمها وارجاعها لشبه شكلها القديم ..
كما كانت
بس من غير مئذنة جامع المرة دى :)

وبعد كدا يصدر امر بنقلها من طابية
او قلعة أو حصن او أى حاجة ليها علاقة بالحراسة
والامن والعسكرية
لأنها تبقى مجرد أثر 
وتبقى مزار وبس مش اكتر




وانا تقريبا كدا خلصت وبقى الملاحظات 


1)
أقروا 
تاريخ مدينة الاسكندرية فى العصر الاسلامى
جمال الدين الشيال
 #كتاب _صغير_موجز_شامل_هايل

2) القلعة .. 
معتقدش ان فيه حد فينا ملوش ذكريات معاه
مظنش
مظنش حد ملوش صورة فيها 
ولا اشترى هدية صدف من على رصيفها
ومكلش آيس كريم من عند عزة 
:)

لكن برضو مظنش ان حد وهوه واقف فيها
او بيتمشى جواها او بيشوفها حتى من بعيد أو ف الصور
بيفتكر ان الحتة دى 
البقعة دى تحديدا قيمتها عالية قوى
الحتة دى عدى عليها اسامى
سواء عظماء او غزاة او رحالة او علماء .. بالهبلللل
وأغلبهم انبهر بإسكندرية وبكنوزها
ومشى ف الآخر 
وساب حتة من روحه

بداية بالأسكندر - يوليوس قيصر - مارك انتونى - نابليون
وغيرهم وغيرهم
وطبعا الأسامى الكبيرة اللى عاشت ف اسكندرية
واتعلمت وعلمّت وبنت وكتبت وغنت وقالت شعر
وكلهم بدّعوا 

2) المنارة  اللى كانت أعجوبة ف زمانها
وحتى بعد ما اندثرت لسه مصدر فخر
وعاوزة اعفق ف رقبة كل اللى محفظشى عليها
وخلاها تصمد رغم انها حاولت على قد ما قدرت

3) الناس اللى بتسأل عن المئذنة .. وايه اهميتها
بيتهيألى ان المئذنة دى 
كانلها دور ف المراقبة
 .. اكيد يعنى الارتفاع كان بفايدة 




4) زى ما انكتب ف المقالة فعلا
وسط كل الهدر لتراثنا وآثارنا من ناس مصريين زينا 
نلاقى .. راجل مجرى يهودى هوه اللى زمان
كان حريص على التراث الإسلامى والمصرى
من الهدم والتدمير 
والسؤال بقى
 #شفت_حلاوة_اكتر_من_كدا

5) بمناسبة ما سبق .. 
بيقولوا ف مقالات على بعض المواقع الاخبارية
 ان فيه مياه جوفية والقلعة مهددة بالانهيار
لو محدش لحقها 
واتحرك .. 
طاه الكلام دا بجد والمسئولين هنا هيتصرفوا 
ولاّ نروح نطلع الراجل المجرى من تربته ونخلص ؟!!

6) زمان لما كنت بسمع المثل بتاع
 "ايه اللى جاب القلعة جنب البحر ؟"
كنت بستغرب قوى
وأرد عليهم 
واقول ماهى اسكندرية فيها قلعة جنب بحر وعادى !
لحد ما جدتى قالتلى انهم يقصدوا قلعة صلاح الدين 
بالمثل دا
مش قلعة قايتباى .. يا لمضة ! 



7) دى جولة للى عاوز يتفسح جواها افتراضيا وكدهون
دوس هنا 

واخيرا .. لو لم أكن مصرية لوددت أن اكون إسكندرانية
ولو بإيدى .. اسكن اسكندرية لحد ما أموت فيها 
هكون سعيدة حقا
وطولنا عليكم
 #تصبحوا_على_الف_خير

---------------------------

-Ahmed Rageh @Ahmed_Rageh101 
ربنا كان مبارك اكيد



-Ahmed Rageh @Ahmed_Rageh101 
امال فين مخازن السلاح



-Yasser @Yasserigo 
باوربيونت بريزنتشن مملوكي




™الدبدوب ® @mazforever 
عسكر بقى .. قصدي مماليك يعني ماتودوناش في داهية



-tarek momen @tarekmomen 
معلهش ..عايز شرح منفصل لتفسير اصطلاح الجلاشة ده


-Ahmed Rageh @Ahmed_Rageh101 
 حد يعمل مئذنة في وسط حصن حربي ماهي لازم تنهار


-Hany Zaky @Hany_Zaky 
رأس الرجاء اكتشف أيام المماليك
وكان سبب فى ضعف اقتصادهم


-Yasser @Yasserigo 
@Hany_Zaky @ro7albmama2
وهجمات البرتغاليين في بحر العرب



 @ro7albmama2 
@Yasserigo @Hany_Zaky حاضر هصححها وانا بنقل القصة ف المدونة #موشكرين_يا_اخوانا :))