مساء الخير عليكم ...
حكاية النهاردة تأتيكم برعاية خالتشى نوسة
اللى امبارح فتحت الشوباك عشام يدخل شوية هوا
قوم سمعت جاى من بعيد ...
هيصة هيصة هيصة
كان فيه حاجة إن شاء الله ؟؟!!
أيوه حضرتك ...
الخديوى اسماعيل كان بيجوز العيال عقبال عندك
وعندكم جميعا
حكاية الليلة دى هتكون عن أفراح الأنجال
وقبل ما نحكى عن فرح الأنجال
لازم نحكى الاول هما جم إزاى ؟!!
قالك الخديوى سماعين ربنا يديه الصحة
كان عنده زوجات ومستولدات بتاع 14 واحدية
قوم الراجل اكمن عنده مسئوليات
ولازم يضطلع بيها ازاء الوطن والشعب
فقام بواجبه الوطنى على اكمل وجه
وخلف من 12 واحدة فيهم من كل نفراية .. عيل
كل واحدة ف الإتناشر جبتله عيل
بينما هناك اتنين مخلفوش ..
وللصدفة .. كل ولاد اسماعيل مكنوش شقايق ..
كل واحد من أم مختلفة
المهممممم
اللى يخصنا النهاردة
أربعة من اولاد اسماعيل على التوالى
1) توفيق ابن شفق نور هانم
2) حسين ابن فلك هانم
3) حسن ابن ملك هانم
4) فاطمة بنت فزا هانم
دول ولاد الخديوى اسماعيل اللى هيقرر يجوزهم
من 4 من أبناء العيلة المالكة
ولاد اخوه احمد رفعت
وعمامه محمد على الصغير وعباس حلمى الاول
والوالى سعيد اللى سبقوه ف الحكم ..
وقالك عشان الفلوس والأرض بتاعت العيلة
متخرجش برا بقى
وبالمرة ألم الجوازات الاربعة دى كلها مرة واحدة ..
آل عشان يوفر وكدا آل !
القصد زمان الجواز كان بيتم بمعرفة الاهل
واختيارهم وتدبيرهم التام
قوم انا حاولت أرسم كدا العلاقات ف شجرة العيلة
ومحدش يقول مش فاهم
عشان هينضرب
وسهلة جدا جدا وواضحة
يعنى الست دى تبقى مرات الراجل دا
والراجل دا هيتجوز الست دى ..
وام الست دى هتبقى حماة الراجل دا ... الخ الخ
لأ ركزوا معايا عشان عندنا 4 عرسان
بـ 4عرايس
(1)
الامير توفيق ابن اسماعيل
وامينة بنت الأمير الهامى ابن عباس حلمى الاول
(2)
الامير حسين كامل ابن اسماعيل
و عين الحياة بنت احمد رفعت بن ابراهيم
(3)
الامير حسن ابن اسماعيل
و خديجة بنت الامير محمد على الصغير بن محمد على
(4)
الأميرة فاطمة بنت اسماعيل
الامير طوسون بن محمد سعيد بن محمد على الكبير
وكدا يبقى أربعة من ولاد اسماعيل :
توفيق - حسين - حسن - فاطمة
هيتجوزوا من : امينة - عين الحياة - خديجة - طوسون
أولاد العم
خلاص قولنا مين العريس والعروسة ..
ندخل بقى ع المعاد
واللى حدده افندينا بأوائل سنة 1873
وتحديدا شهر يناير
فاضل نعرف فين الفرح هيتم ؟
احنا عارفين ان اسماعيل كان عنده تخطيط
للخروج من القلعة بأعتبارها مقر حكم ابوه وجده
ومن كان قبلهم من حكام مصر لقرون طويلة
وقرر يبنى سرايات
اهمها كانت سراي عابدين
عشان تكون مقر للحكم
وسراى الجزيرة اللى بناها على شرف الست اوجينى
اللى كان هايم ف حبها ..الخ
وسرايات لولاده
المهم ان ف الوقت دا
كانت سراى عابدين والجزيرة لسه مخلصوش تماما ...
وكان اسماعيل بولاده قاعد ف القصر العالى
المشهور بقصر الوالدة باشا
القصر العالى كان ملك إبراهيم باشا
(ابو اسماعيل )
بناه 1835 وسكنه
وبعد شوية بنى جنبه قصر لإبنه البكرى احمد رفعت
احمد رفعت دا هيبقى بعد شوية ولى للعهد
ويموت ف حادثة قطر ف كفر الزيات
فيوصل اسماعيل للعرش فجأة
من غير ما يكون مرتب نفسه لكدا ابدااا
قوم ايه ؟
بعد وفاة احمد رفعت يروح القصر للورثة
مراته وولاده
فاسماعيل يعرض عليهم يشتريه
وبعد ما ياخده يديه للوالدة باشا
الوالدة باشا دى كانت حدوتة لوحدها
وشخصية مميزة وليها وضعها ونفوذها عند اسماعيل
اللى كان ابنها الوحيد وبتدلعه ويدلعها ..
عاشت ف القصر العالى
واسماعيل نفسه عاش معاها فيه بعد ما اتجوز
وخلف توفيق اللى هيبقى الخديوى التالى
ف نفس القصر دا
وبما انه الاكثر جهوزية
فالخديوى قرر يعمل فرح العيال كلهم هناك ..
ف القصر العالى اللى كان موقعه ع النيل
(جاردن سيتى حاليا)
والقصر دا هيفضل لحد ما يتباع 1906
بتلتربع مليون جنيه
ويتباع محتوياته حتة حتة
ثم تتقسم الأراضى هناك وتبقى جاردن سيتى
اللى نعرفها حاليا
كدا اتحدد المكان والمعاد
والعيال جاهزين يدبسوا يتجوزوا ..
نحكى عن جهاز العروسين بقى
وعبرحيم عمرو بتاع زماااااان كان شكله ايه يا ترى ؟؟
فيه مقالة ف الاهرام عن الحكاية دى لطيفة جدا
بتحكى عن محل مشهور اصحابه مصريين
نال شرف الحصول على المناقصة
مناقصة ايه
هما هيجوزوا العيال ولاّ هيحفروا وهيردموا عليهم .. ؟؟
لأ أصل الخديوى كان عنده 4 جوزات
يعنى شوف انتا كانوا محتاجين كام ملاية سرير
وكام فوطة
وكام ستارة
وكام سجادة
وكام طقم حلل وكام نجفة ... آلهوى دا هّم ما يتّلم !!
.JPG)
فالراجل أصدر اوامره للديوان الخديوى
يعملوا اعلان عن مناقصة لأقل سعر
يوردلهم الحاجات المطلوبة لجهاز العرايس
وكمان مستلزمات الفرح كلها
قوم العطا رسى على محل فرنساوى أسعاره ممتازة
والأقل
اسماعيل لما عرف الموضوع إستغرب
وقال مفيش محل مصرى ؟؟
قالوله فيه
بس اسعاره زيادة بـ 25 % وعشان كدا تم استبعاده
اسماعيل قالهم
لأ اتفقوا معاهم
ولو محلات المصريين مستنفعتش ف فرح عيالى
اومال مين اللى يستفيد ؟!
#حونين_ونزٌهى_برضو
والمقالة بتقول ان المؤرخين اختلفوا ف الرواية دى
ناس منفسنة .. قالت اسماعيل بيستهبل
وآل يعنى عامل قلبه ع الشعب
وناس معجبة بيه .. قالت انه كان وطنى يا جماعة
اهو وبيشجع اهل بلده
أى كان بقى كل واحد حكم من زاويته
المهم ان "محلات مدكور " المذكور
قامت بالواجب وزيادة 25%
وخلاص
ووردت كل حاجة موبيليا ومفروشات
وصينى وقماش ونحاس كله
وخلاص كدا الحاجة جهزت واترتبت
ويلا نقيم الأفراح والليالى الملاح
واطلع يا بنى بموال
الليلة عيد والعريس بيتجوز
والعريس متين والعروسة متينة
و ع الأصل دور
احنا دلوقتى ف القصر العالى .. مقر الوالدة باشا
وقاعة الفرح ف نفس الوقت
ف سلاملك القصر
هيتجمع افراد الأسرة وكبارها
وهيتعزم العلماء وكبار الاعيان و النظار (الوزراء يعنى)
عشان يحضروا كتب الكتاب
واللى هيكون ف استقبالهم .. خليل أغا
خليل أغا كان كبير الأغوات بتاع الوالدة باشا
كان مقرب منها ومصدر ثقتها
وله مكانته عند الخديوى اسماعيل
لدرجة ان الكل كان بيتملحسله عشان المصلحة
خليل كان له نفوذه ف الحكومة
وبالتالى كان الجميع بيعمله حساب
ولدرجة ان ناس كان بتوطى تبوس ايده .. !
#اخص_الله_يخيبكم
المهم سيادة الأغا كان بصفته
وموقعه ف صدارة حفل كتب الكتاب
وكانت مهمته استقبال الضيوف الكبار دول
استعدادا لأتمام مراسم العقد
وبعد القعدة
وشرب القهوة والذى منه ..
يبعت المأذون الشهود للعروسة
فياخدهم صغار الأغوات على الحرملك
اللى فيه العروسة وصاحبتها والقريبات
ومن وراء حجاب يسالوا العروسة اللى جوا
- تقبلى بفلان زوجا ليكى ؟
فالأنسة العروسة متردش
يسألوها تانى متردش
تالت مرة تجاوب
وتقول .. نعم
نظام آل يعنى مكسوفة وبتاع
وميصحش تندلق من اول مرة وتقول أيوه ..
#ناس_طيبة_والله
الاميرة أمينة إلهامى
ويرجعوا للمأذون اللى يكتب الكتاب بقى
ويتوزع الشربات ف (اقداح مذهبة)
ويوزعوا الشيلان ع المعازيم
ايه الشيلان دى ..؟
دى عبارة عن شال كشمير مطرز حسب الحالة المادية
وبيتوزع هدية
حاجة كدا بدل البوبنيرة بتاعت السبوع
او كتب الكتاب بتاع الأيام دى
وطبعا العرسان الملوكى دول
كانت مطرزة اساميهم على الشال الأبهة
وخلاص كتبنا الكتاب .. تبدأ الأفراح بقى
والهيصة تشتغل
احنا قولنا القصر كان ف منطقة جاردن سيتى حاليا
ع النيل
اما واجهته التانية فكان قصادها منطقة واااااسعة
وفااااضية
سنة 1873 كان لسه شارع قصر العينى على قده
والحتة دى رايقة من السكان
كلها جناين وأرض فضا حوالين القصر
قوم اييييه ؟
اسماعيل هيقرر يستغل المساحة دى قدر الممكن
ويعمل فيها سرادقات منتشرة
كل واحد فيهم لغرض
سرادق للأكل التانى لسماع الموسيقى التالت للألعاب الخ
والاربع عرسان وعرايس هيتعملهم كل جوز فرح
يستمر 10 أيام
واحسب عندك يا محترم
10 × 4 = 40 ليلة بحالهم
والغناء لا ينقطع من امام القصر العالى
وجواه
و ما حوله
الحتة دى كلها كانت بتشغى ..
وطبعا غير المعازيم العاديين المقربين من الاسرة
والحكومة الخ
الشعب كمان كان معزوم
واسماعيل خلى الدعوة عامة
احمد شفيق رئيس الديوان الخديوى
ف عهد عباس حلمى التانى
بيحكى ف مذكراته عن الأيام دى
لما كان ف المعية الخديوية
ومقرب من المشهد جدا ..
وبيقول ان اسماعيل ادى اجازة لكل المدارس وقتها
وعزم طلابها كلهم
ييجوا ياكلوا ويتفرجوا ع الألعاب والمناظر
ويسمعوا الغنا وينبسطوا
دا غير الناس العادية من عامة الشعب
اللى كانوا بيدخلوا عادى ياكلوا ويتفرجوا
وبيحكى ان كانت بتتقدم اللحمة والعيش الفتة يعنى
للفقرا والمحتاجين
وللبعض الاخر فى اماكن مخصوصة اللحوم
والديكة الرومية والدجاج والعيش والحلوى وغيرها
وكان بيتقدم للكل رز فى أطباق نحاس مخصوص
معمول بشكل متميز واشتهر بأسم
(ارز اسماعيل )
عشان كان من مطبخ الخديوى
وبإيد طباخينه الخصوصى
وبيحكى كمان ازاى جت فرق من كل حتة
جوقات عربى وغربى
وفرق رقص واكروبات والعاب
وبيحكى بإنبهار عن واحدة امها (ام الشعور)
وام الشعور دى
تبقى ست عجوزة عجيبة كدا
بتمشى ع الحبل
ومش بس كدا دى هتمشى عليه وتقف
تمسك معزاية صغيرة وتروح دابحها
وهيا واقفة ع الحبل ولا كأن فيه حاجة !!!
وبيحكى عن الحواة والعروض الأفرنجية
وازاى واحد جه وعمل منظر للقمر
وكان القمر دا بينور بشكل مبهر
ومكنتش الكهربا معروفة وقتها
فالكل انزهل جدا من المشهد المتقن البديع
وبيحكى كمان ان السواريخ
كانت بتنضرب ف جنينة الازبكية
فنشوف انوارها من بعيد حلوة وخلابة
#معلش الصور صغيرة ملقتش اكبر
كل دا برا القصر
حيث المعازيم ..
طب جوا القصر بقى ازاى الحال ؟؟
جوا هنلاقى جهاز العرايس كلهن مترصص
ف 3 أوض واسعة
ومترتب للعرض فيه
ايه العرض ومحتواه ؟؟؟؟
"انواع من الحلى المختلفة الأشكال المرصعة بالجواهر
والماس عدا الأوانى الذهبية والفضية والمرايا
وفناجين القهوة باظرفها الذهبية المحلاة بالجواهر "
وأى هدايا بقى جت للعرايس ...
لازم بتتحط للعرض برضو
عشان الضيوف يشوفوها ..
جهاز العرايس زمان كانوا بيقولوا عليه (شوار)
والشوار بتاع العرايس كان بيتحط على عربيات
تحت حراسة الجنود
اللى بيغطوا الحاجة كلها بدانتيل خفيف
عشان تبقى متشافة كويس
ويمسكوها من الاربع أطراف
ويلفوا بيها ف الشوارع لحد بيت العريس
عشان الكل يتفرج
وطبعا كانت بتبقى احلى فرجة للناس
ف الطرق والشبابيك والبلكونات
دلوقتى الرجالة المعازيم ف السلاملك
وخارج القصر ف الكرنفال اللى عامله سماعين
الحريم بقى
بيحتفلوا ازاى بالمناسبة السعيدة دى يا ترى ؟؟
اول ما توصل المدعوات للقصر
كان بيستقبلهم الاغوات
ويدخلوهم جوا الحرملك
بعد الخطوة دى بيلاقوا القلفوات
دول (وصيفات بدرجة رئيسات الجوارى)
وبيتكلموا بلغات مختلفة ..
ولابسين على سنجة عشرة ولا الاميرات
بياخدوا من المدعوات البالطو لو اجنبيه
واليشمك لو مصرية
وبيرشدوهم لأماكنهم هيقعدوا فين
تدخل المعزومات على المكان المخصص للاحتفال
وهوه قعدة كبييييرة
وفيها فرقة عازفات عمالة تعزف
وبنات بترقص وجو من الفرفشة كدا
وبعدين نبتدى الهلس
آه معلش أصل الحريم زمان كانوا حاجة فُللى قوى
قالك الستات بعد ما بتدخل القاعة دى
بتدخل الوالدة باشا فبيقوموا يحييوها
ويبوسوا ايديها
ويباركوا
وبعد التهانى والمجاملات
بتيجى المشروبات ثم سجاير وشيشة وقهوة #آه_والنيعمة_زمبقولكم_كدا
وتخلص فقرة التدخين دى
فيروحوا على قاعة الاكل
القاعة دى فيها ترابيزة أكل كبييييييييييرة
وف السقف نجفة معتبرة كدا
وعلى الاربع جوانب من الاوضة 4 نخلات من البلور
ف أعلاهم قنديل ..
ليه ؟؟
قالك عشان لما النور بينزل على البلور ..
بتلاقى الالوان زغللت وظهرت ولعلعت
وانتشرت ف المكان
وعملت اتموسفير حلو قوى ورومانتيكى ودلع
#آخراشى
خلاص خلصنا أكل
ندخل ع البحلقة
الهوانم بيرجعوا تانى للقاعة الاولى
وتعزف المزيكا لتسليتهم
وتبدأ وصلة تدخين تانية شيشة وسجاير وقهوة .. ! #طب_انشالله_يجيلكم_ربو_
أمينة هانم الهامى
والراوى بيحكى ازاى ان الهوانم دول
كانوا بيلبسوا فساتين على آخر موضة جاية من أوربا
والخياطات ف مصر بتخليهم (الفساتين)
يناسبوا الجسم الشرقى وكدا
فتلاقى القاعة مليانة بعرض أزياء على أعلى مستوى
وبعدين ينتقل الجميع لصالون ف الدور الأول
وتقعد فيه الوالدة باشا ف الصدارة
وكل واحدة تيجى تهنى وتبارك
وتقدم الهدية او النقوط
وبعدين تبدأ الفقرة الفنية لحفلة الليلة ..
برقصات من كل الانواع والأشكال
وأهم حاجة
الرقاصة تكون حابة المهنة
مش حابة الرغى
#الفرح
دوس ع الصورة أعلاه لتفاصيل أكتر
بيحكوا ان كان فيه رقصات تركى وافرنجى
اسمها مازوركه وبولكه
زائد الرقص بالسيوف
و كان فيه عروض تمثيلية اسماعيل كان جايبها
للترفيه عن المدعوين
وكان عامل مسرح ف البهو
وفاصله بشيش عشان الحريم تقدر تتفرج من وراه
ع العروض من غير الرجالة ما تكشفهم
وشفيق بيحكى ان الممثلين بتوع الفرق المسرحية دول
بين الفقرات كانوا بياخدوهم يعزموهم ع الأكل يعنى
بس ف مكان مخصص ليهم قوم ايه ؟
بيربطوا عيونهم
قالك عشان الاغوات كانوا بياخدوهم لمكان الاكل
ف الحرملك
لأنه كان اقرب مطرح
فكانوا بيغموا عيونهم اثناء المرور من المكان
وبعدين لما يرجعوا يشيلوا الغمامة !
وتفضل الهيصة والغنا
والرقص والتفاريح شغالة
لحد الساعة 10 ليلاً
وبعدها تبدأ العروسة تتزف بقى
فتمشى بين صفين من الاغوات
و ماسكين شمعدانات منورة
والعروسة بتكون مغطية وشها
بطرحة تل مطرزة بالدهب
ولابسة اكبر قدر ممكن من المجوهرات
وبيسندوها ف المشى 2 اغا لتقع يا نضرى
ويبدروا عليها القلفوات البدرة
البدرة دى يعنى قطع النقدية الصغننة
اللى بيبدروها على العروسة ...
و العادة دى طلعت من زمااااان اهى :)
وتمشى العروسة لحد الصالون
عند الوالدة باشا
وتقعد ف النص بين الوالدة باشا
وبين امها (ام العروسة يعنى )
وتبقى دى الكوشة
وتيجى المدعوات تسلم عليها
وتبارك وتتفرج ع الجواهر
ويبدروا عليها بدرة دهبية المرة دى مش فضة
وتحضر العروسة شوية رقص ومغنى وفرحة
ولاّ ملهاش نفس يعنى .. ؟!!
وبعدين تقوم على أوضتها مع القريبات
والصديقات المقربات
وتستعد للرحيل بقى على بيت زوج المستقبل
فاطمة هانم اسماعيل
بتاعت الاميرة فاطمة بنت الخديوى
قائلا:
"وجلست العروس وعلى رأسها تاج من الماس
ثمنه أربعون ألف جنيه
وكان لباسها من الحرير الأبيض الفرنساوى الأغلى ثمناً
كله مرصع بأنفس أنواع اللؤلؤ والماس
وله ذيل طوله 15 متر رفعته الجوارى وراءها
وهن راكعات"
وتانى يوم الضهر ..
تستعد العروسة للموكب اللى هيوديها لبيت عريسها
واللى ف أوله
هتمشى فرقة السراى تعزف المزيكا
وقدام منها فرقة مشاة لإستعراض الأبهة والفخامة
بعد المشاة وفرقة الموسيقى
تيجى عربيات البرنسيسات والقريبات
ثم تيجى عربية العروسة نفسها
وطبعا العربية مدهبة بيجرها 6 من احسن الخيول
وعليها 2 سواقين راكبين حصانين
وقصادهم كام واحد فرنساوية بلبس أبيض جميل
وحوالين الموكب كله صفين من الاغوات
لابسين الشيلان المطرزة اياها
راكبين حصنة ويعملوا تشريفة وجو
واهو حراسة برضو مفيش مانع
ويتحرك الموكب قدما
ويمشى وراه عربيات المدعوين من الرجالة ..
والناس ف الشوارع والبلكونات تحيى العروسة
وتزغرررررط ويتبدر الفضة
لحد ما نوصل بيت العريس
واحد من اللى كتبوا برضو عن الأيام دى
بيوصف الموكب بتاع أمينة الهامى
وشوارها رايح على بيت عريسها توفيق
ف قصر القبة وبيقول :
" فسير به الى قصر القبة تخفره صفوف الفرسان
بزى عربى بديع وآلاى بيادة بأسره بملابس بيضاء
ناصعة كالثلج تتقدمه جوقة موسيقية
من أمهر العازفين
وكانت الهدايا موضوعة فى أسبتة مكشوفة
فوق عربات مكسوة بالقصب على مخدات
من القطيفة المزركشة بالذهب والماس
يغطيها شاش فاخر يمسك
بأطرافه أربعة عساكر فى كل عربة
ويتبعهم ضباط بملابسهم الرسمية
والسيوف مشهرة فى أيديهم
وكانت تلك الهدايا عبارة عن مجوهرات سنية
وقلائد ماس ساطعة من النوع المعروف عامة
باسم البرلنتى ومناطق من الذهب الخالص
وأقمشة مطرزة باللؤلؤ العديم المثيل
وزمرد فى حجم البيض وملابس بيضاء مطرز عليها
رقم الأميرة باللالئ والحجارة الكريمة
وآنية متنوعة من الفضة الصب الخالصة ب
كمية عظيمة وثمن ذلك كله يفوق الحصر والعد "
الله ... ايه الرسميات والبواخة دى
يعنى مش هنقول لبتاع الربع نقل
ما تعلّّى الكاسيت يا أسطاااااا
ونقعد نصقف ونرقص والعربية ماشية
والسواق يبص ف المراية
ميركزش قوم يلبس ف اللعربية اللى قدامه
ونقضى اليوم ف عنبر الكسور ... ؟
اخص عليكو دا حتى #البلدى_يوكل
وبس اول ما العروسة توصل عتبة سراى العريس
ينزل يستقبلها وتندبح الدبايح
وتنزل العروسة من العربية
ويرفع العريس عنها الطرحة التل المخبية وشها
وكدا نبقى اخيرا وصلنا لأخر الليلة السودة دى
وهنبوس
واشمعنى الاستاذ يوسف شعبان بيبوس
وألف مبروك يا جماعة
فوزية هتغسل هدمتين حنفى
وتصلى التراويح وتنام هتعمل ايه ...
ويلا كله يروح
ومش هتروقونا شوية
معلش أصل عندنا غسيل
:)
طبعا مفيش داعى أذكر ان الفيلم الازرق دا
اتكرر 4 مرات بأربع عرايس وعرسان
بأربع كل حاجة
وطبعا كل دى مصاريف
ويحكى ان على هامش الأفراح اتعمل سباق خيل
ف منطقة العباسية
ويقال ان عدد المعازيم على مدار الأربعين يوم
وصلوا لـ 5 الاف نفر يا سماعين يا مفترررررى
ووقع تحت ايدى مقالة واحد
بينتقد فيها اسراف سمعة جدااا
وبتقول ان اسماعيل صرف على أفراح الأنجال
مبلغ وقدره
10 ملايين جنيه و573 و743 قرشا فضة
وانا الحقيقة الرقم دا مش داخل دماغى بالمرة .. بتاتا
بس حتى لو فرضنا انه صرف نصه او ربعه ...
او حتى عشره .. مليون واحد حتى
فليه يعنى ان شاء الله
دا لو جوّز الشعب كله مش هيصرف المبلغ دا .. !
بس اللطيف بقى
ان الحتة اللى قصاد القصر العالى دى
قعدت منورة 40 ليلة
فالناس اطلقت ع المكان دا اسم .. المنيرة
واتعرف الحى دا بهذا الأسم حتى اليوم
ومش بس كدا ف نفس المنطقة كان فيه شارع
متسمى بالحدث "شارع أفراح الأنجال "
لحد ما غيروه بعدين عشان مجلة روز اليوسف
وتكريما للست فاطمة اليوسف المؤسسة ليها
أفراح الأنجال اشترك فيها مطربين كتير
اللى غنى مجاملة واللى غنى بفلوس
وكان اشهر المغنواتية وقتها عبده الحامولى
وخلاص احنا اتعكينا ف الجوزات دى
والخديوى استبدل معاش وبقى عليه اقساط
بسبب المصاريف فلازم نطمن بقى راحوا فين
التمانية دول بعد كدا ؟
#آه_بفلوسى_يا_كناب
اول جوز عصافير كان الثنائى ...
توفيق وأمينة
هيفضلوا سوا ويخلفوا 5 عيال
وتوفيق ميتجوزش غيرها لحد ما يموت
وتوفيق هييجى بعد ضغوط اوربية بعزل اسماعيل
وهيبقى الخديوى التانى
ويحكم
وبعدين ييجى ابنه (عباس حلمى التانى)
يورثه من بعده
ويبقى الخديوى التالت
وبعدين توفيق هيموت سنة 1892
وامينة هتقعد بعده عايشة لحد .. 1931
ولأعمالها الخيرية الكتيرة اللى مسمعة
تتسمى ام المحسنين
الثنائى التانى ..
حسين كامل وعين الحياة
هيخلفوا 3 عيال بس
عين الحياة ربنا هيفتكرها
فيتجوز من بعدها .. واحدة تانية
لكن عين الحياة .. هيتحسبلها بصراحة
انها خلفت الامير كمال الدين حسين
اللى لما ابوه السلطان مات
وبقى هوه وريثه
راح رامى كرسى السلطنة المتغمس بذل الأنجليز ف وشهم
وقالهم على شبشبى العرش دا مش عاوزه .. !
حسين كامل اصلا وصل ف غفلة من الزمن
وبزقة كبيرة م الانجليز ... لعرش مصر
و هيبقى السلطان
وتبقى مراته التانية ملقبة ... بالسلطانة ملك
ويخلف منها 3 بنات
هوه (حسين) هيعيش لحد سنة ... 1917
وهيا (ملك) هتعيش كتير بقى
وفيه اخبار منشورة عنها
لحد سنة 1948 .. يعنى عمّرت
الثنائى التالت ....
الأمير حسن وخديجة
_-_TIMEA.jpg)
حسن لأنه كان بعيد عن ولاية العهد
وعاش ف الضل منعرفش عنه كتير
يعنى اولاده وكدا
بس اللى نعرفه انه مات 1889
بينما الاميرة خديجة فضلت عايشة من بعده
لحد سنة 1915 حسبما تقول المصادر
رابع ثنائى ...
فاطمة وطوسون
دول بقى اللى وجعوا قلبى قوى
عشان الامير طوسون هيموت ف عز شبابه سنة 1876
بعد ما تخلف منه فاطمة .. ولدين
اشهرهم عمر طوسون
وفاطمة إسماعيل
هتتبرع بمجواهراتها لأنشاء الجامعة المصرية
اول ما تعرف ان اصحاب الفكرة مزنوقين ف فلوس
ويبقالها هذا الفضل
اللى هينسحب على كل واحد دخل المكان دا واتعلم
ينكتبلها ف ميزان الحسنات ان شاء الله
#موشكرين_يا_ست
ومحدش جاب سيرة انها اتجوزت تانى ولا حاجة
بس يمكن يكون حصل منعرفشى
لكن اللى نعرفه انها لقت ربها سنة 1920
..jpg)
و ان ابنها عمر طوسون
كان من اغنى اغنياء مصر
وكان راجل عظيم فعلا مرة نبقى نحكى عنه
وانا خلصت خلاص حكاية الانجال
وأفراحهم ..
وفاضلى الملاحظات
1) زى منتوا شايفين كدا اسماعيل كان شقى
وبيخلف من كل واحدة عيل للتذكار
قوم ف مرة ف لحظة طيش
غلط مع واحدة من مستولداته اسمها ... شفق نور
قوم الست شفق هتحمل وتخلفله توفيق
وبعدين بالحسابات ينعرف انه هيكون ولى العهد القادم
فالسلطان العثمانى يقول لسماعين على جنب كدا
اكتب ع البنية وعيب
ميصحش ام الخديوى القادم تكون مش زوجة لك رسميا
فاسماعيل اتجوزها
_-_TIMEA.jpg)
وطبعا القصة انعرفت
فشاع بين زوجاته ال3 الباقيات
الحكاية ... فالعيال كمان عرفت
وبيقولوا ان توفيق منذ كان طفلا
وهوه منبوذ بين اخواته
لأنه جه غلطة وبتاع
ويشاء السميع العليم انه يبقى الكل ف الكل بعد كدا
قوم ايييييه ؟؟
تيفة اللى بقى ع الحجر بقى الخديوى
وامه اللى كانت تريقة الزوجات الباقيات بقت
هيا ام الخديوى
ونتعلم من كدا اننا منتريقش على حد
عشان التريقة ع الناس وحشة وبتجيب تسلخات
اللى ف الصورة اعلاه دى شفق هانم .. ام توفيق
وأظن كدا عرفنا خلاص
اسماعيل مكنش عاوز يتجوزها ليه
... :))
2) مليون ولا 5 ولا عشرة ..
اسماعيل ليه مسمعمش عن حكاية خمارويه
لما جوز بنته قطر الندى بأفراح اسطورية برضو
فجابت المناسبة دى داغه ف الآخر ؟!!
#ليه_محدش_بيقرى_بجد؟
3) انا عندى مشكلة ف الرقم ...
بتوع الفراشة والدى جى اشتغلوا اسماعيل قوى
مش كان يقف يفاصل معاهم بدل ما يضحكوا ع الراجل
10 ملايين جنيه و573 و743 قرشا فضة
#عاااااااا
انا ميهمنيش ال10 مليون والـ 573 ألف على فكرة
عاوزة افهم بس الـ 743 قرش دول
أتصرفوا ف إييييييييه يا كفرة ؟!!!!
ثم إن كل الفلوس دى راحت ف الأرض
آه .. يعنى يا سمعة عاجبك تقعد
تدفع ف اقساط الجمعيات ويعزلوك
ويخلوك تكمل اللى عليك ف اوربا وتغسل بيهم اطباق ؟
4) 40 ليلة ... ليه
ايه الفضا اللى كنتم فيه زمان دا ؟
طب كنت تقولنا بدل المصاريف دى كلها
كنا نجيبلك صافيناز وهيا فقرة واحدة وهتخلصلك الليلة
وتخلص ع المعازيم بالمرة
ولا تدفع ولا تكّلف ...
5) الناس اللى بدلت اسم الشارع من افراح الأنجال
لأى حاجة تانية والست رزوا على عينى وراسى
... تعالولى هنا
انا مش هضربكم هعرفكم غلطكم بس
.jpg)
ليه ؟ لييه؟ لييييه؟
الله يخربيت ام الأنقلابات ع العسكر
اللى التاريخ عاملهم هسس ف نافوخهم
وبيخليهم يمشوا على كل ما سبق بأستيكة ويمسحوه ..
ويمسحوا حتة من الماضى بتاعنا
#جاتكم_القرف_مليتوا_البلد
6) بس حوار تسمية حى المنيرة
بسبب النور اللى غرق المنطقة دى 40 ليلة
والنبى المصريين حلوين وجمال وملافظهم سعد
لما بينبسطوا
وكلامهم دبش لما بيحبوا يغتتوا
:))
7) طول منا بجمع تفاصيل عن الحكاية دى
مش قادر يبعد عن ذهنى لحظة واحدة
هذا الأب المصرى الجميل
حسين
ف أم العروسة
وطبعا سايبنى عمالة أحكى واشد ف شعرى
وانتوا بتاكلوا لحد ما خلصتوا ع البوفيه
ماشى ماشى
مردودالكم
وعقبال أفراح أنجالكم
لما تفلسوا برضو
ونحكى عنكم
ويبقى كله
تصبحوا على ألف خير
-----------------------------
مِـيرْڤَـتْ @frikeko
خير اشّاء الله :D
Ahmed Rageh @Ahmed_Rageh101
يعني مفيش حد هينزل ينقي ويتشرط
ولا ام العروسة تنزل تجيبلها جهازها ولا حاجة
مِـيرْڤَـتْ @frikeko
ماهو فرح بن العمدة بقي
NëzäR MähmöuD @NezarMahmoud
هيا السهرة دي مافيهاش رقص ولا ايه
سها المنياوي @morgana00m
والنبي فيه الخير مش ديموقراطي بس فيه الخير
Ahmed Rageh @Ahmed_Rageh101
هي البلد فلست في عهد اسماعيل من شوية
Ahmed Rageh @Ahmed_Rageh101
الخديوي ده كان غلبان ده في ناس بتعمل فلوس من الافراح
مش بتصرف عليها
إحـــكى يا شهـــرزاد @ro7albmama2
@morgana00m لأ التخن وقتها مكنش مشكلة
ويناسب الذوق العام
بس ملامحها قاسية شكلها كانت ست عنيفة
وعلى فكرة لما اسماعيل اتنفى برا مصر
هيا رفضت تسافرمعاه
إحـــكى يا شهـــرزاد @ro7albmama2
@EgyChampagne المذكرات لأحمد شفيق عنوانها :
مذكراتى فى نصف قرن
اللى عندى طبعة مكتبة الاسرة 1999
معرفش فين تلاقيها دلوقتى للأسف
ليست هناك تعليقات:
إرسال تعليق