حــكـايـات مصـــريــة ...... 10

نبتدى بس نقول الاول ..
كل سنة وانتوا طيبين يا جماعة 
وشم نسيم سعيد علينا جميعا
 #يارب



النهاردة حكايات مصرية قصيرة 
مع التعليق عليها 
ونبتدى 

القصة رقم (1) 

بسؤال 
وهو 
هل تعلم عزيزى المستمع
 أنه كان للبيادة تلاميذ واساتذة وفصول ؟




أيوالله زمبقولكم كدا 
الحاج محمد على بعد ما دبحله ييجى الف نفر ونص 
ف مدبحة القلعة
 قرر يبدأ على نضيف 
ويصلح حال البلد دى عشان يعرف يحلبها كويس
قوم اييييه ؟؟ 
قرر يفتح مدارس ف كل تخصص يفيد مشروعه
 وبعت بعثات تتعلم برا
 وترجع تنفع الوطشن 
 وكانت المدارس كالآتى ..
 مدرسة للطب البشرى
 مدرسة الصيدلة
 مدرسة الولادة 
مدرسة للطب البيطرى
 دا غير المدارس الزراعية .. 
والمدارس الهندسية .. 
والمدارس الصناعية
 وركز ع المدارس الحربية والبحرية
 وف زمنه (محمد على يعنى) اتعمل 5 مدارس : 
مدرسة اسوان 
 مدرسة اركان الحرب 
 مدرسة السوارى 
مدرسة الطوبجية 
 و..

مدرسة البيادة 
ودى انشئت سنة 1832 فى منطقة الخانكة #اخدلى_بالك_يا_حاج_محمد 
وكان بيديرها ضابط اسمه (بولونينى)
ودا كان ضابط فرنساوى رجع من فرنسا لمصر 
بدعوة من سليمان باشا الفرنساوى الفرنسى
 الذى أسلم وبقى الراعى الرسمى لجيش محمد على 
ف هذا التوقيت


المهم ان الطلبة ف المدرسة دى 
كانوا بيتعلموا فنون الحرب
 بس جنبها كان بيجيلهم مدرسين من خريجى الألسن
 وكانوا بيدرسوا تركى وطليانى وفرنساوى !

 

والمدرسة دى ف البداية كانت ف الخانكة
 ثم انتقلت لدمياط شوية 
ثم رجعت القاهرة 
 ورموها ف أبو زعبل ف الطراوة مع نفسها 
لحد ما مات محمد على 1848

ومن بعد محمد على مسك حفيده ..
 عباس حلمى الأول اللى كان براوى ومزعج 
قام قافل مدارس كتير ف عهده منهم مدرسة البيادة





وبالدعبسة ف معنى (البيادة)
 فالمتعارف عليه ان أصلها تركى 
وأغلب المصطلحات العسكرية ف جيشنا 
متاخدة من الاتراك 
ومعنى البيادة حذاء جندى الجيش
 وفيه ناس بتربط بينها وبين الفصحى 
وان بيادة جاية من .. يبيد والإبادة 
 أو من البيداء .. يعنى الصحراء والطبيعة القاسية 
 وكله يمشى برضو 
 لكن
 الأكيد ان المقصود من البيادة وقتها 
ان مدرسة البيادة يعنى مدرسة جند المشاة 
وسبحان الله دلوقتى بقالها معنى تانى خاااااااالص

ونعم قصدك ايه يا فطمطم م الحكاية دى ؟!! 
لا ولا حاجة بس قبل المرساوية 
ما يسخروا من اخوانهم السيساوية 
ياريت يفتكروا انهم الأسبق ف لعق البيادة
وما أسخم من سيدى الا ستى بقى

القصة رقم (2) 

عن مشكلة كانت تؤرقنى وانا صغيرة جداااا 
لما كنت بحضر فرح
 واتفرج على كتب الكتاب 
واشوف المأذون بيستميت ف لطش المنديل
من على ايدين العريس وحماه ...  بعد العقد
 وكنت عبيطة بقى وهبلة 
ومتخيلة ان المأذين دول ناس عاتشيفية 
 وبتاخد المناديل عشان تحتفظ بيها 
ويتهيألى بكل رومانصية انى لو روحت زورتهم
هلاقى عندهم مناديل العرايس أكوام اكوام ف الفسحة 
 قوم ايه لما كبرت اكتشفت 
ان المأذون بياخد المناديل دى يبيعها وبتاع .. ! 
#اخراشى



اللطيف بقى 
ان عادة خطف المنديل بعد اتمام العقد فورا دى
 طلعت ليها جذور من زماااان قوى
 حيث ان المصريين 
كانوا بيحطوا جوا منديل الجواز فلوس

  

كانوا بيخيطوا ف طرفة حلقة 
ويحطوا جواها عملة فضة 

حسب المقدرة بقى بتاعت كل عريس 
فكان المأذون اول ما يخلص .. يروح خاطف المنديل
 لأن جواه أجرته



وشوية بشوية العادة دى بطلت
 وبقوا يدوا المأذون فلوسه ف ايده 
او ف ظرف 
أو ع القهوة عشان المعازيم متهرش المبلغ كام كدا 
 :) 
المهم فضلت العادة 
لكن مع بعض التعديل 

 
وبس كدا خلصت 
ملحوظتى الوحيدة 
ان آخر كتب كتاب حضرته قيل قدامى وانا قاعدة كدا 
وعدى قصادى منديل العروسة 
بحسن نية ابدى اعجابى واقول 
- الله دا حلو قوى 
قالولى
-  دا تمنه 200 
وعملوا منه اتنين 
 - ليه يا جماعة ؟؟

قالوا واحد للمأذون وواحد لينا للذكرى
 ف كان هيغمن عليا الصراحة بس تماسكت 
 منديل بـ 200 جنيه ؟
 #شالله_محد_اتجوز!

القصة رقم (3) 

عن الفيل مرزوق 
 ودى حصلت ف زمن المماليك 
لما ف يوم أغبر مسك فرج بن برقوق بعد باباه ما مات
 وبعدين اثناء حكمه 
جه تيمورلنك

وتيمورلنك دا زى مانتوا شايفين ف الصورة 
هذا الحمل الودييييع كان قاعد فاضى 
قال يسلى نفسه
 وراح داخل على كام بلد كدا
 الشاب بدأ م العراق بعد ما خربها 
ثم زحف على الشام وف حلب وحمص واللاذقية ودمشق 
كل البلاد دى استباحها لعساكره 
وقالهم عيشوا حياتكم نهب وقتل وانبسطوا يا عياااال 



 وكل دا بيحصل وسى فرج بن برقوق قاعد ف مصر 
بيشب شاى ومروق ولا الهوا 
والمصريين متغاظين منه قوى 
وعاوزينه يروح ينجد اهل الشام 
وهوه برضو 
ولا الهوا

وامراء الشام يبعتوله الحقنا 
وهوه يبعتلهم ف نصايح 
 وهوه قاعد ع الشلتة ودمتم
لحد ما ربنا حلها من عنده وتيمورلنك مرض



وراح لامم عساكره بالغنايم ومنسحب م الشام
 بعد ما خلاها خرابة 
قوم سى فرج يتشملل بقى 
ويقرر يعقد صلح مع تيمور 
ويروحله ف موكب شايل أغصان الزيتون
 ويعملوا اتفاقية عدم اعتداء سنة 1401 
وتيمورلنك يقرر يهادى السلطان فرج بــ .. فيل 
 واسمه مرزوق اللى هيدخل القاهرة
 وطبعا اهل مصر متعودين ع المناظر دى 
من ايام الفراعنة كان الحكام مولعين بتربية الفهود 
واقتناء الزراف والأسود وحاجات كتير كدا 
كمان خمارويه ابن طولون شرحه
والفاطميين كمان كانوا بيقتنوا حيوانات من افريقيا
 وغيرها 

 القصد ان المصريين كانوا متعودين ع الجو دا 
بس اللى غاظهم 
ان الفيل مرزوق كان رمز الأنبطاح
ونموذج حى لتخاذل السلطان عن نصرة اهل الشام 
 واللى زاد وغطى بقى ان مرزوق بقى بيستخدم للترهيب 
لأى حد مش عاجبهم 
يقوموا يحطوا راسه تحت قدم الفيل تهديدا
 وحراسه كانوا عالم وثخة زى سلطانهم 
 كانوا بيمشوا بيه ف الطرق يفسحوه 
ويخطفوا م الناس فلوسهم وحاجاتهم
 واللى يعترض قدم مرزوق تترفع فوراااا

وبس ف مرة واخدين زقزوقة يفسحوه 
ويحموه ف النيل
ماشيين ف السكة لقوا شيخ من المتصوفة معدى
 الظاهر برطم بكلام مش اللى هوه
عن الظلم والظالم 
 حراس مرزوق اتغاظوا منه 
وراحوا شايلين الشال اللى لابسه 
وبعتروا كرامته راح رافع ايده للسما 
وداعى على الفيل وصاحبه 


الكلام دا كان ناحية بولاق
 المهم سابوه ف الشارع مشيوا يضحكوا ويقهقوا 
وبيعدوا بمرزوق (قنطرة الفخر) ف بولاق
 راح الفيل واقع
 وآه يا واد يا ويلعة

ومرزوق نزل الترعة وغاص فيها لحد ما اتغطى 
وطبعا حاول الحراس يطلعوه 
أبضنننن 
ويندهوا ع المارة يساعدوهم ان حد يعبرهم 
 أبضنننننننن
 وفضلوا كدا يعافروا ان الفيل يتنجد 
أبضنننننننننننن
 وماتت رابعة قصدى مرزوق بدعوة من قلب مؤمن
 ورجع حراسه للسلطان 
واتروقوا روقان السنين 


اللطيف بقى
ان واحد زجال مجهول اسمه للأسف 
شاف المنظر وتتبعه لحد نهايته 
 فكتب شعر ومشي يتغنى بيه ف الأسواق
 والناس فورا اتلمت عشان تشوف مرزوق ف القنطرة
 وكانت الشماتة على آخرها 
 وقال :

 تعا اسمعوا يا ناس ع اللي جرى
الفيل وقع يوم الاثنين في القنطرة

لما أفلسوا غلمان الفيل راموا الجزاف
خدوه وراحوا صوب بولاق يجبوا المطاف
رأوا شيخ من أهل الله ما فيه خلاف
جو ياخدوا شاشو منو بالزنطرة
دعا على الفيل اتقنطر في القنطرة

قالوا بانوا في البجمون مغروس يصيح
قلت حتى أروح ابصر إن كان صحيح
آجي ألاقي الفيل ميت ملقى طريح
والناس تطلع فوق ظهره مستظهرة
لما وقع يوم الاثنين في القنطرة

واولاد ديار مصر السادة حولو زمر
يتعجبوا من هذا الفيل اللي انحصر
رأوا دموع عينو تجري مثل المطر
ولو جعير والعالم دول متفكرة
لما وقع يوم الاثنين في القنطرة

فقلت لو يافيل مرزوق يا اسود دغوش
أين حرمتك بين العالم وأنت تهوش
وكنت يا فيل السلطان زين الوحوش
وكنت بالاعجاب تزهو في المخطرة
وقد بقيت اليوم مطروح في القنطرة

والفيل لسان حال للناس يقول
كم كنت أدور في الزفة فوقي طبول
وكنت أدور في المحمل ولي قبول
كني عروسة حين تجلي في المنظرة
واليوم كان آخر مشيي في القنطرة

وقالت الفيلة مراتو من لي معين
سهم الفراق قد صاب قلبي يا مسلمين
ونا غريبة هندية قلبي حزين
وكان هذا الفيل زوجي لا معيرة
اليوم كان آخر عمرو في القنطرة

وعيطت حتى أبكت جيرانها
من كتر ما ناحت ناحوا لأحزانها
من نارها صارت تلطم بودانها
حتى الزرافة جاءت متأخرة
تبكي علي الفيل اللي مات في القنطرة

لما ظهر دا في شعبان آخر رجب
لاحت لنا فيه نجمة لها ذنب
فقالت العالم أجمع دا لو سبب
وايش دلايل ذي الكوكب يا من درى
دلت على الفيل اللي مات في القنطرة

يا ناصر الدين من عمري ادر الدخول
والناس تقول إني قيم صاحب قبول
لما هلك ذا الفيل مرزوق فصرت أقول
تعا اسمعوا يا ناس ع اللي جرى
الفيل وقع يوم الاثنين في القنطرة


 
وأعلق بإيه ع القصة دى ؟؟ 

1) الظلم ظلمات 
ودعوة المظلوم مفيش بينها وبين ربها أى حجاب 
بس تُقبل

2) زقزوقة ذنبه ايده ف الحوار دا 
انا نفسى أعرف
انا صعبان عليا الفيل بصراحة ملوش ذنب يا جماعة
و زعلانين م السلطان ما ذنب الحيوانات طيب  ؟؟
وصفوا نفسياتكم شوية الله يكرمكم
مش كدا !!

القصة رقم (4) 

 
عن المثل الشعبى الشهير
"على سنجة عشرة "

 والسنجة أو الصنجة لفظة فارسية 
معناها الثقل الذى يوضع ف الميزان
 وزمان كان البياعين بيمشوا بالميزان اللى ف الصورة
 وكانت كفته بتشيل
 أقصى حمل ليها .. 10 كيلوجرامات

فالناس بقت تستعمل التعبير دا 
للدلالة على ان الشىء وصل لآخره
 يعنى الواحدة لما تبقى على سنجة عشرة 
تبقى كدا  آخر آخر آخر شياكة ومفيش بعد كدا

القصة رقم (5)

من زمن الفاطميين ودلعهم 
حكاها الرحالة العربى البغدادى لما جه مصر 
ف زيارة اثناء حكمهم 
وقعد يحكى عن عاداتهم 
وطريقة عيشتهم
 وبيحكى بقى عن أكلة عجيبة شافها 
وعمره ما شاف زيها ف أى مطرح راحه



 قالك ايه الخلفاء والامراء وعلية القوم ف مصر 
كانوا لما بيخرجوا فسحة
 كانوا بياخدوا معاهم أكلة مشهورة اسمها
 (رغيف الصينية) 
وحد يقولى دا حواوشى مثلا 
او سندوتشات جبنة رومى 
بسطرمة 
 قشطة أى حاجة من تشى ؟؟؟
 أقولكم انتوا غلااااابة والنيعمة 
وتعالوا أعرفكم على طريقة عمل (رغيف الصينية) 
صفحة الأكلات الفاطمية ف كتاب أبلة نظيرة 
كانوا بيعملوه ازاى يا ترى ؟؟




قالك بيجيبوا الدقيق العادى ويخلطوه بعجين الكحك
 ويعجنوه بالسمن واللبن 
وبعدين يجيبوا صينية نحاس مقاس أربع اشبار كدا 
 ويقسموا العجين نصين 
ماشى؟



يفردوا اول نص ف قعر الصينية 
وبعدين يجيبوا ايييه ؟ 
3 خرفان مشوية محشية من جوا 
بلحم مفروم وفستق مهروس 
ثم هل هيسيبوا الخرفان دى لوحدها كدا ؟؟؟
 لأ طشبعن هيحطوا ما بينهم 20 فرخة 
و20 جوز حمام شوية مشوى 
والباقى محشى بالبيض 
 أو محشى لحمة 
أو محشى بالليمون #خفيف_خالث_اهو



ثم .. لو حابب تحط شرايح خروف متقطعة ماشى 
مش حابب وعاوزه خفيف على كيفك يعنى 
 ثم يتحط كام حتة جبنة مقلية 
 ثم يترش كل دا بمية ورد ونقط من المسك



وخلاص كدا يتجاب النص التانى م العجين
 ويتفرد ع الحشوة الخفيفة تشى 
ويدخلوه الفرن عشان يستوى العجين يتخبز يعنى
 وبعد ما يطلع يرشوه بمية ورد ومسك
 والبغدادى بيقولك بالنص بقى .. 
( أن الخليفة الفاطمي كان يخرج إلى الصيد 
وكان يحمل معه طعاماً خفيفاً يطلق عليه
 "رغيف الصينية ) 
#آه_والله


وقال 

( وهذا الصنيع لا يصلح أن يحمل إلا مع الملوك 
وأرباب الترف إلى متنزهاتهم )
 بينما الغلابة يا كبدى
 ( أما عوامهم فلا يعرفون شيئاً من ذلك )

وبس ملاحظاتشى ان العالم دى
 كان لازم اكلها يبقى كدا 
 اومال كانوا يقوموا بواجبهم الوطنى نحو الجوارى
 والزوجات ازاى ؟ 

ثانيا
 البغدادى وهوه بيحكى 
يعنى مجبش سيرة البيبسى ولاّ دوا الحموضة 
كمصاحب للوجبة 
واتاريهم كانوا بيموتوا يا عينى 
#م_التخمة

 ثالثا 
 البذخ والإفترا والترف الرهيب دا كانله تمن بعدين
 لما جه احد الخلفاء 
 وهو المستنصر بالله 
ومسك الحكم
 وحصلت ف زمنه مجاعة رهيبة
وبقت الناس من الجوع بتاكل الكلاب والقطط 
وبعدين بقوا ياكلوا بعضهم 
وبقى الرغيف يتباع بتمن رهيب
 ولدرجة انه فيه حارة ف القاهرة الفاطمية 
 اشتهرت بأسم (حارة طبق) 
لأن ف الشدة المستنصرية بقى كل دور فيها يتباع بكام ؟
 بطبق فيه عيش 
الحارة بيوتها كلها اتباعت بأطباق عيش 
وبس 
تخيلوا ؟؟
 

 

القصة رقم (6) 

 

 

 

 

ودى من وحى أغنية الست نانسى عجرم

 الله يمسيها بالخير ... 

عن .. إبن الأرندلى

 

 

 

والاخوة التراكوة لما دخلوا بلادنا
وعكروا مزاجنا وحطوا التاتش بتاعهم ف لهجتنا 
كان من ضمن القواعد النحوية بتاعتهم 
 انك تنسب الشخص لبلد بـ "لى"
 يعنى من طرف الدولة العثمانية يبقى عثمانلى
 استنابول .. يبقى استنابولى
من عنتيب يبقى عنتيبلى
من مصر يبقى مصرلى
ومن أرندة يبقى ... أرندلى

وأرندة تبقى حتة قرية غلبانة على قدها كدا 
ف شمال سوريا 
بصوا ع الحتة اللى ف الدايرة فوق حلب دى

الحتة دى اسمها (عفرين) 
ولو بصينا فيها كويس هنلاقى أرندة
 والسهم  مشاور عليها
  


واللى يبص للقرية دى من فوق كدا 
يستغرب قوى
ويسأل يا ترى مين منها جه زمان لمصر 
وعكنن على اهلها 
لدرجة ان يبقى نسبه مش نسب لبلدة بسيطة 
على طرف حدود الشام 
وانما تبقى شتيمة 
ومعنى لواحد نصاب حلنجى وابن أردنلى ؟ #يا_ترى_ايه_حكايته_الجدع_دا
 معرفش بجد 
O.o

 وآه محدش يبصلى 
معرفش حكايته فعلا .. لحد دلوقتى 
بس حبيت أقولكم أصل التسمية 
عشان لو حد سألكم تبقوا عارفين 
 :)

القصة رقم (7)

 ف زمن المماليك الشيك الرومانتيك ...
 قالك بعد الست شجر الدر ما بقت تبعت كسوة للكعبة 
ف محمل وموكب وفيلم 
 قوم ايه ؟؟
السلاطين اللى بعدها موقفوش العادة دى 
وكان كل سنة بيطلع المحمل
 ف موكب شايل كسوة الكعبة
وكان بيبقى يوم عيد


الناس تخرج فيه تتفرج 
وتتبرك بلمس الجمل والمحمل فوقه 
وضرب بالطبول وانشاد وهيصة 

قوم بعد مدة الممثليين الهزليين بقوا 
يمشوا ف اول الزفة دى
 كانوا مهرجين بالمعنى الحرفى 
 بيلبسوا لبس غريب ويحطوا الوان على وشهم 
ونظام هما يركبوا دقن وأروح لأبوكى ..
 ويمشوا ف أول الموكب يهللوا
 ويعملوا حركات مضحكة 
والناس تنبسط فيرموا عليهم حتت الفضة

لحد ما ف سنة من السنين شوية مماليك اوباش 
 طمعوا ف الفلوس اللى بتترمى ع المهرجين دى 
فقالوا ناخدها احنا 
راحوا رايحين ملونين وشهم
 ولابسين مبهدل ووقفوا قصاد الموكب 
وقعدوا يهرتلوا طبعا 
ويعملوا حركات هبل 
فالناس هرشتهم ومحدش رضى يطلع سحتوت من جيبه
 قوم ايييه ؟؟


المماليك يسكتوا ؟؟ 
لأ طبعا راحوا مدورين الضرب ف الممثلين الهزليين 
والناس اللى واقفة 
وسرقوا الفلوس من اللى قدروا يسرقوا منه
 وكان معجنة !!
 وطبعا قلبت بغمّ والخبر وصل للسلطان
 اللى راح لاممهم وقالهم كّخ  يا ولاد 
متعملوش كدا تانى 
وعيب أيصحش وبتاع 
وخلاص كدت مع السلامة باباى


 وجت طلعة المحمل ف السنة اللى بعدها 
وطبعا أتكرر الموقف تانى 
وبصوا الناس لقيوا مماليك لابسين زى المهرجين
 وطالعين زى الخازوق كدا 
 قاموا سموهم عفاريت المحمل



وخلاص بقى بقت معروفة .. كل سنة 
 اول ما يظهر "عفاريت المحمل" 
الناس تركب عجلللل ف رجلها 
وتمشى بأدبها من سكات 
 لحد ما واحد م السلاطين اختشى
 وبقى يشدد ف حراسة المحمل 
 وتبعه بعد ذلك الحكام اللى بعده 
لأن خروح المحمل
 كان من أعظم المناسبات ف مصر فعلا 

وف زمن محمد على واسرته 
بقاله تشريفة وحرس شرف وطلقات تحية وقت خروجه 
وقعدنا كدا لحد ما انقطعت العادة 
ف زمن عبناصر
والسعودية بقت تعمل الكسوة عندها 
وقالت لمصر مش عاوزين منكو حاجة 
بعد قرون من كسوة الكعبة بأيد المصريين وقماشهم !
يلا 



وبس خلاويص كدا 
خلصنا حكايات الليلة .. 
معلش طوّلنا عليكم
 كل سنة وانتوا طيبين
 :)

-------------------------------- 

amr salem @amrosalim2001
ده الاسطوره محمد علي باشا الله يخرب بيت امه 
مطرح مهو قاعد 
هو اول من اسس النظام الخرا
 اللي احنا مش عارفين نخلص منه ده

tarek momen @tarekmomen 
 اصلا ايه الاصل اللغوي لكلمة بيادة....


طز BIG @Fatoma999 
 خانكة ,,وبيادة ..بتلمحى لايه بالظبط
 :))

Captain Haddock @hassan19211
 اعتقد معناها مدرسة المشاه..
وحاليا كل الجيوش فيها كتائب مشاه تعتمد عليها 
فى احتلال الارض(الطيران والبحريه للانهاك فقط)


amr salem @amrosalim2001
يسقط كل من خان ...اه والنبي .عسكر .. فلول .. اخوان



 tarek momen ‏@tarekmomen 

 مالك و مال رابعة بقي ؟؟؟؟؟؟

مِـيرْڤَـتْ @frikeko 
 يبيعها ؟ 
O.o 
هو محتاج اللهم صلي ع النبي دا بيتجوز ببلاش :D

طز BIG @Fatoma999
 طب داانتى ارحم,,
انا كنت فكرة انهم مش كل شوية هيشترولهم مناديل 
,هيكفوا الافراح منين
 :)) 
#سذاجة


 
مِـيرْڤَـتْ @frikeko 
 لول و انا اللي كنت فاكرة ع اساس ان اللي يخطفه الاول 
يتجوز الاول
 :D

Eman El Sayed @Eman_amey 
 و طبعا ده مات بتصلب الشرايين

amr salem @amrosalim2001 
عندك حق العالم دي كانت بتشقي برضه




Ahmed Rageh @Ahmed_Rageh101 
حاجة مسح زور كده



المشير بصباعه لبعيد @General_Pikachu 
ده ابو لهب كان اخره طبق فاكهة ..
 اتاري ابو لهب صحابي
 و احنا منعرفش


 
Captain Haddock @hassan19211
 الاكل ده لو ادوه لحد م دول العالم الاول ممكن يموت! 
محمود السعدنى له كتاب عن الطواجن 
بيتكلم عن الحاجات دى
 والمعده تعود م الصغر

Ahmed Rageh @Ahmed_Rageh101 
امال التقيل شكله ايه هياكلوا ديناصورات محشية عجول