حدوتة النهاردة تقليدية
بس هيا قصة كل زمن ووقت
وصراع السلطة الذى لا ينتهى أبدا
مسرح أحداثها الشام
لكن أبطالها يخصونا
وحدثت ف العصر الفاطمى
وفلاش باك للدولة الفاطمية اللى كانت ف عز مجدها
لما خرج المعز لدين الله من المغرب
ووصل مصر ف موكب مهيب
بعد ما فتحها جوهر الصقلى قائده الأثير
ولأن الشام هيا بوابة مصر الشرقية
والى عاوز يحافظ على مصر لازم يضم الشام
وبعت المعز لدين الله قائده جوهر لضمها
والشام كانت ف الوقت دا سويقة
سويقة حرفيا وبمعنى الكلمة
#ولا زالت يا كبدى
كانت الشام مسرح للصراع بين الروم من جهة
والحمدانيين من جهة و
أى حد معدى عاوز ياكل م التورتة حتة
الدولة العباسية كانت رخوة وبائسة
وف أضعف حالاتها فعلا
والخليفة كان منظر
وبس أى حد قوى عاوز يعدى من تحت مناخيره
ويقتطع حتة .. كان بيعمل كدا
اهل الشام لما جم الفاطميين ..
دخلوا معاهم ف عركة كبيرة محبهموش خالص ابدا
بسبب اختلاف المذهب دول سنة
ودول شيعة
والخلاف القديم اياه تحكم
الفاطميين حاولوا يسيطروا على ملكهم قدر الممكن
ف عدة مدن شامية
لكن اهل الشام اشتكوا منهم وقرفوا
وفيه مدن سلمت لاى حد غيرهم كرها في الفاطميين
وف اواخر حكم المعز لدين الله ..
ظهر خطر الروم متمثلا ف واحد اسمه تزيمسكيس
او أبو الشميشقيق كما سماه العرب
وقالك بيت المقدس دى بتاعتشى انااا
راح متحرك على بعلبك وحمص
و فيه مدن قاومته زى طرابلس وبيروت وصيدا وجبيل
فخربهم وسيطر عليهم
ومشى ناحية دمشق اللى كان لواليها راى أخر ...
وهنا هيبقى لنا وقفة .. عند دمشق
اللى كان واليها ف هذا التوقيت واحد أسمه أفتكين
يقال أفتكين
او هفتكين
او ألتبتكين
او الفتكين بن منصور التركى
الواد أفتكين بقى كان غاية ف الفتاكة ..
كان زى ما تقولوا كدا مرتزقة
بس على مستوى عالى من الأداء
كان غلام لاحد سلاطين الدولة البويهية ف فارس
البويهيين لما شوكتهم قويت الخليفة العباسى اعترف بيهم ومقدرش يوقف نفوذهم ف فارس وبغداد
المهم عشان منتوهش من بعض
افتكين كان احد فرسان بنى بويه
وبعدين حاربلهم سلف وكسب معارك
وبعد ما رجليه شالته قالك انا اشتغل عند غيرى ليه
ما أعمل لروحى منظر وبس
استغل الخناقات ف الشام بين الدول الكبرى
وراح داخل على دمشق ف الشام
وفاتحها لنفسه واخدها عنوة كدا
واهل دمشق اللى كانوا مش طايقين الفاطميين
ما صدقوا جالهم افتكين
ومسكوا فيه وتبتواّ
وقالوله تسلم الايادى
رد هوه انتوا نورعينينا ..
وراح أفتكين جايب اهله وعشيرته اللى هما (الديلم)
وقعدهم معاه وبنى لنفسه امبراطورية صغننة كدا
واكتفى بيها
وقعد ف حاله لحد ما جاله مين ؟؟؟
الجدع بتاع بيزنطة .. تزيمسكس
أو كما سماه العرب ... ابن الشميشقيق
كان هرس المناطق لحد ما وصل عند أبواب دمشق
أفتكين لاقاه هيدوس عليهم زى القطر
راح لامم روحه
وأبدى فروض الطاعة والولاء
وقاله أبيع يا باشا أبيع
واتهادن معاه
ولمله فلوس من الاهالى ودفعها
وتزيمسيكس قاله آشطة متفقين
وبس على كدا ..
كل الكلام دا حصل
والمعز لدين الله الفاطمى ف مصر قاعد بيحرك ويفرك
وبعدين متفهموش حصل ايه
الاخ بتاع بيزنطة بعد ما ستفلنا الاونطة
غار على بلاده
والمعز بعت لأفتكين يقوله أرجع للشوق .. قصدى لدولتنا
والا هبعتلك جوهر الصقلى
أفتكين برضو لّم التعابين
وقاله عينى آحاج بس كدا
ودعاله ع المنابر
لكن فضلت دمشق ولاية شبه مستقلة تحت حكم أفتكين
ومحدش بينافسه فيها لحد ما جه قضاء ربنا
ومات المعز لدين الله
ومن بعده ورثه العزيز بالله ابنه
العزيز بالله يا عينى هيلاقى فجأة بعد ما مسك الحكم
بدل ما يحتفلوا بيه
ويجيبوله تورتة ودى جيه
ونفافيخ وزمامير ويغنوله وبتاع
بقى كل وغد معدى عاوز يخطفله حتة من الورث !!
وقامت عليه ثورات من اهل الجنوب ف مصر
وف الحجاز
وطبعا ف الشام
ف كل مطرح كان فيه حد كدا طمعان
ف انه يستقل بمنطقته عن الدولة
ويبقى الآمر الناهى
أفتكين كان من العالم الوغدة دى
بعد العزيز بالله ما مسك
فرد قلوعه
ورفض أوامر العزيز بالله وقالك دمشق دى تعتى انا
وبس العزيز بالله اتغاظ جدا
بعتله يتفاهم معاه بالذوق الاول أفتكين غتت
وقاله بالمفتشر كدا انا خدت دمشق دى بحد السيف:
" وما ادين لأحد بطاعة ولا اقبل منه أمرا "
ومش يسكت بقى ويكتفى بدمشق
لأ دا هيطمع أكتر ويبتدى يتحرك بجنده
ناحية مدن تانية ف الشام ويضمها لنفسه
وبدأ ب صيدا يدخل على عكا لحد ما يوصل طبرية
طبعا رجالة العزيز بالله وقفوله
لكن الواد كان جّن وعرف يوصل لطبرية
ودخلها والاخبار وصلت للعزيز بالله اللى اتنكد قوى
قبل ما يخرج افتكين من دمشق أصلا
كانت نيته تكوين امبراطورية فعلا
وكتب لعضد الدولة بويه .. يطلب مساندته
الراجل صراحة كان ذوق ذوق ذوق
ورفض
وبعتله جملة بليغة كانت هى :
" غَرَّك عِزُّك
فصار قُصارى ذلك ذُلُّك
فاخْشَ فاحِشَ فِعلِك فلَعلَّك بهذا تهدأ "
بأختصار قاله #روّح عند امك
أفتكين بعد ما زهق من أى مدد خارجى ..
اعتمد على نفسه وعلى مساندة اهل دمشق له
زى ما قولنا كانوا كارهين الفاطميين
لأسباب دينية
تاريخية
والفاطميين ولاتهم
كانوا قساة على اهل الشام شوية متفهموش ليه !
المهم خد ف وشه الجدع
لحد ما راح طبرية
وساعتها العزيز بالله قرر ياخد موقف حاسم
اكمن الولا افتكين رخم
وقاله انا محدش له أمر عليا وبتاع قوم اييييه؟
يعقوب ابن كلس وزير العزيز بالله
وحبيبه
وروحه روحه روحه
وخليكوا فاكرين الاسم دى كيويس
هينصحه قائلا
كدا مينفعش آمعلمى الولا افتكين لازم يتربى
احنا نبعتله جوهر الصقلى قائدك الهمام
على رأس جيش يروح يبعترله كرامتشه دى ايما بعترة
العزيز لقى مفيش بد من ذلك
راح باعت جوهر فعلا
والمقريزى بيحكى
انه لأول مرة الفاطميين
يخرجوا جيش كبير للشام بالعدد دا
كان 20 ألف وقتها متسلحين
وف عز قوتهم وعتادهم
وعلى رأسهم جوهر
وصل جوهر "الرملة"
وبعدين بعت لأفتكين باللين والهوادة يفكره بعهد الامان
وان العزيز بالله مسامحه لو سلّم وروح على أمه
ويا دار ما دخلك شر وكدا
قام أفتكين رد عليه بمكر وليونة
بأنه مضطر أسفا لما يحدث
عشام آل أيه .. أهل دمشق معتمدين عليه
ومينفعشى يخذلهم
#يوغتى معرفناكش احنا كدا !!
بس جوهر بقى منظره ويحش ولازم يكمل بقى
راح متحرك بجيشه ناحية "الشماسية"
وجاله افتكين من الشمال
واتقابلوا عند هذا الموقع
والطحن أشتغل
قعدنا قد ايه نطشحن ف بعضينا كدا يا طمطومة ؟؟
شهرين 60 يوم بلياليهم
والقتل والسيوف بتهدر ف الدماء
والمؤرخين بيقولوا ان أفتكين بيّن كرامة
وصمد برجالته قصاد جيش جوهر الصقلى
اللى جاى مدجج باحدث عتاد
ولكن الكفة كانت مايلة ناحية الفاطميين
فأفتكين عرف ان صموده مؤقت
ولازم يشوف حل
قوم ولاد الحلاااااال شاروا عليه يستعين بالقرامطة
اللى كانوا كارهين الفاطميين
ولهم أطماع ف الشام
الناس صراحة متأخروش
وقالوله جايينلك آحاج
ف التوقيت دا كان جوهر خرج من الرملة
وراح طبرية
ومنها قرب على دمشق
اللى تمركز براها أفتكين وصمد
لحد ما القرامطة قربوا
القرامطة بزعامة حسن الاعصم بعتوا بجيش عظيم لأفتكين
قوم جوهر وصله الاخبار دى
خاف على جيشه ليتعجن بقى
راح متقهقر للوراء تانى
ورجع طبرية
حد يقولى جوهر بيستهبل كدا !
اقولكم ابضنننن الراجل عمل الصح
الشتا كان دخل والتلج ابتدى ينزل
وجوهر خاف على رجالته اللى الجو بهدلهم فعلا
وقال ينجو بيهم بدل ما يتربس ويقعد
ويأذيهم ويتأذى بيهم ومعاهم ونبقى خسرنا كل حاجة
افتكين عرف ان جوهر عاوز يمشى
راح باعتله شوية دواب ينقل عليهم حاجاته #تخيلوا !
المهم جوهر خدهم فعلا ونقل عليهم الماتع
ورجع لطبرية
افتكين يسكت ؟
لأ طشبعن
خد بعضه بجنده وراح ورا جيش الفاطميين
ف طبرية وصلت الأخبار
لجوهر ان افتكين والقرامطة جايين وراه
قوم يتقهقر تانى وينزل خطوة لتحت
ويروح يعسكر عند "الرملة"
ويبعت لأفتكين رسالة
نفس الرسالة الحمضانة اياها بتاعت العزيز بالله
بتاعت لمّ التعابين واحنا هنأمنك على نفسك
والعزيز بيحبك
بس انتا مدخل الشيطان ما بيننا #الخ
طبعا الكلام دا مكلش مع افتكين
اللى بمساعدة القرامطة نجح انه يرجع جوهر بعساكره
لحد عسقلان بصوا ف الخريطة كدا
ودخل جوهر عسقلان .. واحتمى بيها وقعد
أفتكين لحقه بالانصار بتوعه
وحاصره فيها حصار مزعج
واهل عسقلان استغلوا الظروف
وغلوّا على جوهر الأسعار جدا
ومبقاش جوهر لاقى قمح يعمل بيه عيش
لعساكره الغلابة
#قطشعت_قلبى_يا_غالى :))
وأفتكين محاصر المنطشقة بييجى 50 ألف من جنده
والقرامطة والأتباع
وخلاص كدا منظرى بقى ويحش قوى يا ثامح ..
لازم يشوف حل راح جوهر باعت لأفتكين
وقاله نعمل اجتماع على مستوى القمة ونتفاهم
أفتكين قاله اهلا تشّرف
اجتمع الأتنين وجوهر قاله نلم التعابين
والعزيز هيسامحك وكدا ..
أفتكين سليل التعابين
هيقوله كان على عينى والنيعمة
بس القرامطة اعمل فيهم ايه ؟
انا عاوز الصلح بس ..
نصا هيقول لجوهر :
"أنت حملتني على مداراته"
فجوهر قاله طيب .. خليك حلو
وبلاش تتقل ايدك ف الهزار
افتكين وعده خير
وجوهر كمان وعده خير
وقاله هشيلك الجميلة دى لوقت آخر تنفعك
#وقد_كان
المهم دلوقتى الوضع الميدانى ايه حضرتك ..؟
جوهر محاصر ف عسقلان
اهل عسقلان مطلعين عينه ومجوعينه هوه وجيشه
افتكين وأنصاره من القرامطة
والعرب محاصرين المنطشقة بجيش جرار
ومش باينلها أى حل غير
اما الحرب او .. الموت جوعا وعطشا
اللى زاد وغطى بقى
ان فريق ف جيش جوهر هما الكتاميين
عابوا على جوهر سوء تصرفه
وبقوا يقرفوه ف عيشته
وميسمعوش الكلام وحاجة كدا قرف
الاخبار دى وصلت لأفتكين
طبعا اللى قالك اعمل حركة جدعنة مع جوهر
وراح باعتله مرسال يقوله هسيبكم تخرجوا من عسقلان
احياء بشرط تدفعولى فلوس
وشرط تانى كمان أهم م الفلوس
انكم تخرجوا تحت سيفى
ورمح الحسن بن العصم القرمطى حفاة
وغامدين سيوفكم
آلهوى ع الذل .. !
وجوهر طبعا وافق
بتوع كتامة بهدلوه ازاى توافق وبتاع
قالهم هاتوا كل الفلوس اللى معاكو
يا تخرجوا تنقتلوا براحتكم
زى الكلاب طلعوا الصرر بتاعت الفلوس
طبعنننن وفدوا نفسهم
وسلموها لأفتكين اللى حط سيفه
ورمح زعيم القرامطة على باب مدينة عسقلان
ووطى جوهر بعساكره براسهم
وعدوا من البوابة تحت ذل الخصوم .. !
#آخراااشى
كل الفيلم دا بقى ..
من دخول جوهر الشام لحد خروجه لابس طرحة ..
مدته قد ايه ؟
17 شهر بحالهم
رجع بعدهم جوهر الصقلى مهزوما مكسور الوجدان
ودخل على العزيز بالله مكسوف وموطى
العزيز طبعا بهدله ازاى افتكين يعمل فيك كدا ؟؟
قعد يتحجج طبعا بالمدد اللى جه لأفتكين من القرامطة
وان التلج جاب للعيال استبحس
وانفلونزا الطيور والخنازير .. مع بعضشيهم
وان اهل الشام كانوا متؤاطين
وانه عمل كل اللى يقدر عليه
عشان يرجع بباقى العيال عايشين
لأنه لو كان كمل معاندة
فالقرامطة تحديدا كانوا هيفرموهم ويعملوا منهم كفتة .. !
#بينهم_مشاكل_معلش
العزيز بالله قاله خلاص تعالى اركن على جنب
وعزله من الوزارة شوية #مقموص_وكدا
وبعدين يعقوب بن كلس المستشار المفضل
واللى بقى المقرب عن جوهر
نصح العزيز بالله وقاله كدا مينفعش
انتا تخرج بنفسك للعالم دى
عشان لو عرشك ضاع ف الشام ..
هيتجرأ علينا كل الكلاب والكلام عجب الخليفة الفاطمى
وبس بقى قال للجيش كله يستنفر
ويلم اللى يقدروا عليهم من رجال وعتاد
وخرج على راس جيش مكون من 70 ألف جندى
ونهارك ازرق يا افتكين الطين !
اتحرك العزيز بالله بجيشه ووصل لحد الرملة
ومحدش نطق ولا فتح بوقه
وعسكر بالشوباب هناك
وقال استبق بالخير
فبعت لأفتكين
وقاله هااااااااااه .. تسّلم ولاّ ؟؟
أفتكين اللى كان واثق من نفسه ومعرفته بالشام ودروبها
ومسنود باتباعه مردش
واتقابل الجمعان ف الرملة
ودرات المعركة
والطحن اشتغل تانى
وأظهر أفتكين براعة وفروسية
الواد كان له شمخة برضو واضح يعنى
المهم العزيز بالله ف عز الضرب راح باعتله رسالة
نصها الآتى
"قد أزعجتنى من سرير ملكى وأخرجتنى لمباشرة الحرب
وأنا أسامحكم جميعا بذلك
ولك عهد الله بإنى اهب لك الشام بأسره ! "
هاه ايه رأيك ؟
محدش دمه يتحرق
اعصابكم ف تلااااااجة
حصل خير حصل خير
العزيز بيشوف ميته مجراش حاجة استهدوا بالله كدا
الولا أفتكين وصلته الرسالة
وكان على خط النار بقى
راح خارج من وسط صفوف عساكره
ونزل من على فرسه
وموطى بايس الأرض
ورد ع الرسالة برسال نصها الآتى :
"قل لمولانا لو تقدم القول لسارعت أما الآن ليس إلا ما ترى "
#صايع_صايع_والله
القصد أفتكين قاله على عينى
ف ضربة استباقية معمولة بحرفنة حقا
والعزيز اتغمّ غممان السنين ووشه قلب
وبيقولوا انه خد ركن كدا مع نفسه
وبعدين خرج من العزلة القصيرة دى
وكملوا القتال عادى
وانتهت المعركة
بإنتصار الفاطميين طبعااااااااا
وبيبصوا ف وسطيهم
القرامطة والديلم والاهالى .. ملقوش الخاتم !
قصدى ملقوش أفتكين
اللى خد ف وشه وهرب الوغد !!
وإتلم جيش العزيز بالله على جند أفتكين من الديلم
وحاصروهم فالعيال طلبت الامان وسلموا
والقرامطة زعيمهم انقتل
وطاردوا باقى الكبار ...
القصد
بيقولك مات ف العركة دى بتاع 20 الف مقاتل
من الطرفين
والعزيز بالله صرف فلوس بس على الخروجة دى لوحدها
بتاع ألف ألف دينار
وفوقهم 100 ألف
الميت ألف دول العزيز بالله رصدهم مكافأة
للى يقبضله على أفتكين ويجيبه ف شوال حى يرزق
وكانت الاخبار بتقول
ان فتاتيكو هرب ع القدس
طبعا المبلغ كان رهيب وقتها
بس الأكتر حماسة
ان كان فيه عالم كتير شايلة ومعبية من أفتكين
وكتير جريوا وراه عشان يعفقوه من رقبته
من هولاء كان واحد اسمه
وافتكروا اسمه كويس برضو ..
حسان بن علي بن مفرج ابن دغفل بن الجراح
اللى يظهر أفتكين كان مرخم عليه جامد اثناء المعارك
بن الجراح اصطاد أفتكين
وراح قالع العمامة بتاعته
وعاملها حبل عفق بيه أفتكين من رقبته
وسحبه وراه على الخيمة
وسقاه مية
ثم بلغ القيادة
انه تم الوصول إلى الهدف
ف التوقيت دا
كان العزيز بعت باقى الجيش على فوق لحد دمشق
وظبط الاحوال عشان ترجع الشام تحت امرة الفاطميين
وبعت بألأخبار على مصر انه انتصر
فأقيمت الأفراح
وسافر بعد ما رصد الجايزة زى ما قولنا
و ف وسط الطريق جاله خبر القبض على أفتكين
فقال للناس اكرموه ومحدش يتعرضله بسوء
وادوا لابن الجراح مكافأته
وبعت وفد من حاشيته يروحوا يجيبوا افتكين مقيدا
عشان يرجع معاه على مصر
ويأمنه العزيز بالله على روحه
ويدخلوا جميعا من باب النصر .. لمصر
وللى ميعرفشى باب النصر احد أبواب القاهرة الفاطمية
وسمى كدا عشان كان مخصص لدخول الجيوش المنتصرة منه وسط موكب وهوليلة
المهم ركبوا أفتكين جمل
وطافوا بيه ف الأسواق بعد الوصول
عشان الشعب يتفرج على خصم الخليفة منكسرا مهزوما
وقرر العزيز بالله يعفو عنه .. !!
واحد من رجالة العزيز بالله اسمه اسماعيل الرسى
هيتغاظ جداا
ويقولها بالمفتشر :
يا مولانا لقد استحق هذا الكافر كل عذاب
والعجب من الإحسان إليه
العزيز رد بهدوء فيما معناه .. انا روحتله ف عز قوتى
وعرضت عليه ينسحب ..
طلع راجل عسكر قصادى بخيامه ورجالته
ومهربش وكمل للآخر
وبعدين ...
ف عز المعمعة ..
دعيت ربنا انه ينصرنى عليه وكملت ..
ومفيش شوية واتجاب لحد عندى مربوط ومقيد
يبقى الواحد يحمد ربنا ولاّ .. ؟!!
" سجدت لله الكريم شكراً وسألته أن يفتح لي بالظفر به
فجيء به بعد ساعة أسيراً ترى يليق بي غير الوفاء ؟! "
#العزيز_بالله_قائلا
اتاريييه لما انعزل شوية وقت الضرب
كان بيصلى لربنا وبيطلبها منه .. !
اسماعيل الرسى لما سمع الكلام دا من الخليفة
ركع تحت رجليه
وقبلها
بصراحة العزيز بالله دا حكاية
الجميل بقى
انه بعد كل الهيصة دى حصل ايه ؟؟
بعد ما أفتكين ركب الجمل وطافوا بيه والناس خلاص عرفت الحكاية
العزيز بالله عفا عنه امرله بمال ودواب
وأمر رجالته يستقبلوه ف بيوتهم ويكرموه !
وبعدين بعتله يساله .. ايه رأيك ؟
افتكين اللى كان فاكر ان راسه طايرة ومكنش يحلم بالوضع دا
دان بالولاء للعزيز بالله وبقى من رجالته
اللطيف ان جوهر الصقلى قائد الجيوش وقتها
كان شايله جميلة انه خرجه من عسقلان حى ومغدرش بيه
فحنن قلب العزيز بالله عليه اكتر
#هوه_كان_حنين_خلقة
ومحصلش تنافس بين جوهر وأفتكين ولا حاجة
كما كان متوقعا
لكن الضربة جاتله من حتة تانية
من عند الوزير .. يعقوب بن كلس
اللى شال وعبى منه قوى
وراح حاططله سم ف الكفتة
أفتكين مات مقتولا مغدروا به
العزيز بالله زعل عليه قوى
وراح جاب يعقوب بن كلس
وغرمه نص مليون دينار
وسجنه شوية ..
وبعديييين بعد حبة كدا .. عفا عنه
وطلعه تانى
الظاهر كان العزيز محتاجله
قوى قوى قوى قوى
وخلاص كدا الحدوتة خلصت
الشام رجعت لينا تانى ومصر اليوم ف عيد
والعزيز بالله لمّ كل العالم الواغش دى ف عبه
ومشّى بيهم حكمه
لحد ما ورثه لأبنه
ودخل ف هدنة مع القرامطة ..
نظير مبلغ وقدره كل سنة
اما عسكر الديلم اللى جم مع أفتكين مصر
فسكنوا حارة ف القاهرة الفاطمية
واتسمت على اسمهم
وبعد فترة اتبنى ف الحارة دى سجن بعيد عنكم اسمه ..
حبس الديلم
كان مخصص لسحن رجالة الدولة
حاجة زى سجن المزرعة كدا واتهد بعدين ف عصر لاحق
و أقول الملاحظات بقى ... اللى اولها واهمها
1) شخصية العزيز بالله دى ملهمة جدا
ومش واخدة حقها ف تاريخنا مع انه راجل مش عادى
الجدع دا اخد الحكم عن ابوه
وكان مرفه نوعا ما ومش بتاع حرب
لكن مع ذلك
قدر بدهاء وحكمة يخرج من كل الفتن اللى قابلته
طمعا ف ملكه ونفوذه
نجح ف كدا بالقوة ..
وكمان بالرحمة
والمتتبع لتاريخه هيلاقيه كان متسامح فعلا عن حق
مش عن ضعف
يعنى عفوه عن أفتكين جه بعد النصر عليه مش العكس
وكل دا خلى مصر ف عهد العزيز بالله تبقى ف احسن حال
والناس كانت مبسوطة بشهادة الرحالة
ويكفى
يكفى ان الفاطميين كان بيتقال عليهم ف بعض المصادر
"دولة المصريين"
لأن من كتر امتزاجهم بالشعب .. خدوا اللقب دا !
فكرة أخلاق الملوك دى وعدم الفُجر ف الخصومة
كان ممكن يدبح افتكين
ومحدش يرده
لكن هوه اتصرف بحكمة
حقنا لدماء اكتر خصوصا انه ..
أفتكين بقى
ونأتى لرقم
2) أفتكين دا كان داهية هوه كمان ..
كل خطوة كان بيمشيها كان بيلعب ع الحبلين
زمان مع بتاع الروم
وبعدها مع جوهر وصولا للعزيز بالله
كل مفاوضات يتبعها قتال كان فيها حتة كدا للرجوع
بجد .. كان ذكى فعلا
وهذا يقودنا الى رقم
3) جوهر الصقلى بقى اللى راخر رغم الهزيمة عرف ينجو بعمره
وبالباقى من رجالته
املا ف الرجوع مرة اخرى
وقد كان
جوهر هيرجع يبقى قائد الجيوش
ويورثها لأبنه كمان من بعده
:)
القصد عاوزة اقول يعنى ..
بتوع الجيش اجدع ناس تسخن الجموع
لكن وقت الجد ..
مصلحتهم فوق الكل فوق الضحايا
والكرامة والوطن وكل الهتش دا
ولنا ف جوهر وأفتكين وغيرهم أسوة حسنة ..
الناس ولا فرق معاها حاجة فعلا
وقت ما لقوا نفسهم
ف خطر محدق
لموا التعابين فورااا
وإياكش أى حاجة تانى تولع
وهذا يقودنا الى
4) يختشى العشين ألف اللى ماتوا ف المعارك دول
نظامهم ايه ؟
يعنى عملتولهم معاش شهيد وكدا
ولا اللى راح راح يا قلبى شكوتك لله !
5) بن الجراح اللى قبض على أفتكين
وخد المكافأة ودان للعزيز بالله بالولاء
هيخرج على الحاكم بأمر الله بعد شوية
لما يمسك بعد ابوه العزيز
وهيحاول يستقل بـ "الرملة" ويبقى اميرها
بس الحاكم هيروحله ويبهدله والقصد يعنى كلهم متمردون ..
كله بتاع مصلحته
وبطلنا نصاحب عيال وكدا
6) الناس كانت بتعيب على العزيز بالله تسامحه الرهيب
لأن برضو واحد اسمه الحارثى ثار عليه ..
وبعدين العزيز سامحه
وخلاه من رجالته
o.O
يا اخوانا الراجل كان ذكى
عارف كل قرد فيهم وعارف لعبه
هما مكنوش بتوع وطنية ولا نيلة ..
دى شهوة سلطة وما ياتى من وراها من خير
اول ما لوح لهم بالخير .. نسيوا كل حاجة تانية !
وسياسة العزيز دى متنفعش مع أى حد بس
لو بتوع دلوقتى فكروا ينفذوها عينبهروا
ولا عم احمد التباع بمراحل
ف كم العائدين الى جلباب النظام !
7) الشام .. اهل الشام .. سوريا الاردن لبنان وفلسطين
خط دفاعنا الشرقى أى حد عاوز يدخلنا ويحتلنا
لازم يعدى عليهم الاول
وعالله الموجودين دلوقتى يعوا هذا
واخيرا
8) انا عاجبنى قوى حوار حططان السيف
والرمح ع البوابة بتاعت عسقلان
وجوهر وعساكره يعدوا من تحتها نظام
#اخشع_ياض وكدا
:)
وعاجبنى اكتر لعبهم سوا
أفتكين وجوهر بينهم دم ومعارك سابقة وقادمة ..
ومع ذلك بيتفاوضوا وشغل الحواة على أشده
#صراحة_اساتذة
بس ف النهاية على رأى " @Fatoma999 "
اللى اوحتلى بعنوان للحدوتة ...
كل افتكين ... فى الافتك منه
واهو مات مسموم من حد بعيد خالص بمكر ودهاء برضو
وكل صرصار
وله شبشب فعلا
وخلاص خلاويص ...
نرتوت المنشنات الحلوة
ونقول بعدها تصبحوا على ألف خير
-----------------------------
-Hany Zaky @Hany_Zaky
سلامة كبدك يا شهر
قولى الروم البيزنطيين علشان الناس ما تتلخبطش بينهم وبين روما القديمة
Ahmed Rageh @Ahmed_Rageh101
كبسة :)
طز BIG @Fatoma999
يااااااه,دول مش سياسيين ودواهى حروب,دا لسنهم بليغ......
وفرئلة الصراحة:))
-Ahmed Rageh @Ahmed_Rageh101
من يبني على الناس يبني على الطين
طز BIG @Fatoma999
كل افتكين ...فى الافتك منه:))
طز BIG @Fatoma999
يا نهار اسوح....ايه اللعب ده...
ولا البنالتى اللى فى نهائى كاس العالم,تشويق واثارة:)
طز BIG @Fatoma999
ده نزل قعر الخريطة:)
طز BIG @Fatoma999
مش جوهر الصقلى ده اللى دخل مصر!!!!
احنا طيبين بشكل!!
كله بالحضن :))
-9515samr salem @amrosalim2001
الناس دي بالها طويل اوووي
يجو يشوفو الداخليه بتاعتنا
بتفك القنابل بأديها في ون سكند
طز BIG @Fatoma999
افتكين سبع الرجال ,قال يا فكيك,,,#صدمة
طز BIG @Fatoma999
الحكايات دى مش بفهمها؟!!هما بيحربوا وبيفتحوا بلاد غرضها السلطة والحكم
حتى لو اريقت دماء!!
وبيستعينوا بالله وبيصدقوا انه بيعنهم؟!
Jass @Yasminemz
_مفيش منهم دول خﻻص #رجالة_الزمن_الجميل
طز BIG @Fatoma999
يعنى يتقاتلوا ويحصروا بعض وناس تحىى وناااااس تموت
ويتصالحوا فى الاخر كده!!!!
طلع فى الاخر ماتش حبى
:)
ليست هناك تعليقات:
إرسال تعليق