مساء شريف
نبتدى يا ولاد وحكاية النهاردة عن شخصية
محدش بيجيب سيرتها كتير ولا بيحكى عنها
مع انها محورية
بسببها اتغيرت حاجات ف خط سير
حكم مصر
والقصة لازم نبتديها
وركزوا معاياااااااا متسرحوش
من عند الجد
الزغلولة الكبيرة
الحاج الأسطى الاونكل عزت
محمد على باشا الله يرحممممه
كنا قولنا زمان ان هذا الفتى اتولد
بعد معاناة من امه وابوه
واخواته اللى قبل منه وكانوا دستة ..
كل ما يتولد عيل يموت لحد ما شرفّ سعادته
قوم لما ربنا فتح عليه واتجوز مراته الاولانية
ثم جه مصر وحكمها
وبقى معاه فلوس بالعبيط وسلطة
اتجوز تانى وجاب مستولدات وجوارى ..
وهيصة
والمصادر بتقول انه اتجوز مرتين
وكان عنده 27 مستولدة يا ثاااااامح
فربنا يديه الصحة خلف من الفرقة الأصلية دى والاحتياطى
30 عيل ف عين العدو
والعين فقلت الحجر بقى قولوا ماشاء الله
أكبر عياله واول فرحته كان ابراهيم
اللى بعض المصادر بتقول انه مش ابنه
وانه ابن مراته امينة مصرلى وبتاع
لكن الكلام دا مش حقيقى
ابراهيم ابنه البكرى
لولاش بس هيوه العلاقات كانت زفت بينهم شويتين
فمشيت الاشاعة دى مش اكتر
المهممم برهومة هيتجوز ..لازم الا ينحيرف بقى
وطبعا ابوه كان بيبعته يحارب
فالجدع مكنش فاضى للجواز والخلفة بهمة
ونشاط زى ابوه
القصد اتجوز
وكان عنده مستولدات عدد بائس كدا بالمقارنة
فجاب 3 عيال وبس
وكانوا اولاد ابراهيم من 3 امهات مختلفات بالترتيب كدا
ومن الاكبر للأصغر :
1) الامير احمد رفعت
2) الامير اسماعيل
3) الامير مصطفى فاضل
محمد على دخل ف صراع مع الدولة العثمانية
واوربا كلها عشان يستقل بمصر والشام
وبعدين الجوز طحنوه لحد ما ف النهاية رضخ
وقبل بولاية مصر له ولولاده
وطلع فرمان من الباب العالى بأن الولاية
تبقى لمحمد على وابنه من بعده
ومكنش عرش بقى
لأن القاعد عليه مش سلطان
فسموه " الأريكة المصرية" كنبة يعنى
:))
ونظام الأريكة دا كان بأختصار
انه بعد موت اللى قاعد ع الكرسى
يمسك من بعده أكبر أعضاء اسرته سنا من الذكور طبعا
كان ابن او حفيد
متفرقشى
المهم يكون الكبير بتاع القعدة دى
ابراهيم باشا لما ابوه طعن ف السن
كان مستنيه يموت عشان يورث ويحكم
قوم محمد على تبتّ ف الدنيا وغتت
برهومة سافر اوربا يستعجل التوريث
ورجع فعلا من هناك بفرمان توليته الحكم ف حياة ابوه
لكن القدر كان أسبق
وابراهيم يموت بعد أسابيع
والحكم يخرج من ايده يروح للى بعده
مين اللى بعده ؟؟
ف الطبيعى يكون حد من اخواته .. سعيد او غيره
ماهم ماشاء الله كتيييير
لكن افتكروا الأريكة بتقول اللى يقعد عليا مين؟؟؟
أينعم .. اكبر أعضاء الأسرة سنا
وكان ف التوقيت دا
أكبر واحد ف العيلة هوه
عباس حلمى
ابن طوسون .. بن محمد على
الحفيد يعنى
الأخ عباس حلمى بقى بعيد عنكو
كان واد مؤذى ومزعج ومتغطرس وشكاك
وفيه كل العبر
بيقولوا امه من عرب الحجاز
واتربى هناك
فزى ما تقولوا كدا
جمع بين خشونة طبع اهل الصحراء من ناحية أمه
وبين لطشة نافوخ التراكوة من ناحية ابوه
القصد محمد على حاول كتير يهذب اخلاقه
بس الولا كان مصمم ع الغتاتة
وجده بيحضره للحكم
الكلام وصل لابراهيم باشا
الابن اتغاظ جدا طبعا
وبقى يخش ف صدامات مع عباس
ويطقشوا ف بعض
لحد محمد على ما خاف على عباس الحفيد
من ابراهيم
راح قايله سافر الحجاز عند اهل امك
لحد ما ربنا يحلها
وابعد عن وش عمك هيمة الساعة دى
عباس فعلا سافر الحجاز
وفضل هناك لحد ما عمه ابراهيم مات
والعيلة وجده محمد على بعتله يستلم الحكم
وجه الاخ واستلم
ومات الجد بعدها بكام شهر
نسيب عباس حلمى شوية
ونرجع فلاش باك لورا حبة كدا ... لأولاد ابراهيم باشا
وتحديدا الامير أحمد رفعت
صاحب حكاية الليلة
أحمد رفعت
ودا اسمه المركب كعادة هذه الأيام
لما الأباء بيختاروا اسامى لولادهم
كان نجل ابراهيم باشا الاول البكرى بقى
وابوه بيحضره لوراثته كما كان يحلم
قوم كان حريص انه يقربه منه ف كل خطوة وتفصيلة
عشان يتعلم ويكونله سند لما يجد ف الأمور أمور
ولما يمسك من بعده كمان
اهو يبقى فاهم كل حاجة
القصد
اول مرة هنسمع عن مجلس للشورى في مصر
هيكون تحت اسم "مجلس المشورة"
وهيكون برئاسة إبراهيم باشا
واللى ابتدى فعليا شغله في سبتمبر 1829
اولى جلساته كانت ف القصر العالى
والمجلس ضم 156عضو
من العلماء والأعيان والموظفين ومأموري الأقاليم
وكان وسطهم الأمير أحمد رفعت بن إبراهيم
نظام الحاج ابراهيم وولده كدا
والولد خد خبرة نوعا ما ف شئون الإدارة
فإذا بمحمد على الجد هيقرر يبعت بعثات لبلاد برا
عشان يتعلموا احدث حاجة ف كل حاجة
ويرجعوا ينهضوا بالبلد
وهتتوالى البعثات لحد ما نوصل للبعثة الخامسة
وكانت سنة 1844
وعلى مبارك اللى كان ضمن افرادها
هيحكيلنا عنها بدقة
كانت اسمها "بعثة الانجال" لأن فيها 4 أمراء
2 من أبناء محمد علي :
الأمير عبد الحليم والأمير حسين
2 من أبناء إبراهيم :
أحمد رفعت وإسماعيل باشا
البعثة دى تحديدا بسبب اهمية افرادها
بعثة الأنجال وكدا
اختار اولادها سليمان باشا شخصيا
الرجل العسكرى الاول المحبب لمحمد على
والوجهة على فين ...
رايحين فرنسا اشاء الله
كان عدد الشباب 70 نفر وزاد عددهم بعد كدا
زى ما بيقول على مبارك
وقعدوا 5 سنين يدرسوا علوم مختلفة
لكن الأمراء والأنجال درسوا العلوم العسكرية بصفة خاصة
والامير حسين ابن محمد على مات ف فرنسا مريضا
لكن الباقيين كلهم كملوا لحد ما محمد على مات 1849
راحوا راجعين كلهم مصر
بأمر من عباس حلمى الاول
عباس حلمى الاول زى ما قولنا كان برّواى ونفرى
ومش طايق حد
كان كمان بينه وبين ابراهيم باشا عداء خاص وكراهية
قام كاره كل حد من طرفه بالمرة !!
مش بس كره ابراهيم وولاده
كره العيلة كلها الحقيقة وقعد يناكف فيهم ويقرفهم
لحد ما طفشهم كلهم من حواليه
واللى سافر اسكندرية واللى هرب على تركيا
عباس حلمى كان عاوز يورث الحكم لأبنه الهامى
ويتخطى شرط الأكبر سنا دى بتاعت الأريكة والفرمان
بس نفوذ اسرته كان اكبر منه ف ترميا
فكرههم جدااا عشان وقفوله فيها
وبعدين عمه سعيد كان طيب
وولاد عمه ابراهيم اسماعيل واحمد رفعت كبروا دماغهم
والكل تحاشاه وبعد عنه خوفا من بطشه
اللى وقفتله بقى
كانت عمته نازلى أو نظلى
وربنا يكفيكوا بقى شر الحريم إذا غضب
نظلى دى كانت زى ابوها محمد على كدا
شديدة وقوية ومفترية
عباس حلمى طفشها على تركيا قامت سافرت فعلا
بس بعد ما فضت الشنط
ونزلت الجونينة تشرب القهوة وتشيش ف الطراوة
هتقعد ساكتة كدا ؟؟
لأ طبعا قررت تنتقم من ابن اخوها الوغد
القابع على عرش مصر دا
وفيه رواية شبه اكيدة انها كرت عليه
اتنين من المماليك عشان يقتلوه
وفعلا دا اللى حصل
هنا
دلوقتى ركزوا كويس
عشان الموقف كالآتى
عباس حلمى والى مصر .. انقتل ف قصره فى بنها
الذى يليه ف الولاية هوه عمه .. سعيد باشا بن محمد على
العم .. سعيد يعنى كان قاعد وقتها ف اسكندرية
بيشرف ع الأسطول هناك وبيغور من وش عباس
قوم مماليك وحاشية عباس حلمى
برئاسة الألفى ابراهيم بك .. يعملوا ايه دلوقتى ؟؟؟
طبعا هما منيلين الدنيا زى سيدهم عباس
والكل كارههم
الطبيعى يبقوا عاوزين الولاية
متخرجش من سلسال عباس
راحوا متفقين انهم يبعتوا لألهامى ابن عباس ف لندن
الامير الهامى كان ف بلاد برا
الحاشية قالوا يبعتوله ييجى ياخد الحكم عنوة واغتصاب
بس كمان عملوا حاجة تانية
سعيد الوالى الشرعى التالى ف القايمة
كان ف اسكندرية قوم مماليك عباس
بعتوا لمحافظ اسكنكرية وقتها كان اسمه اسماعيل سليم
قالوله بص بقى
مولانا عباس مات وانتا تتكتم ع الخبر
ومتقولش لسعيد باشا واحنا هنشوفك
ونروقك اول ما يوصل الهامى علطول ويحكم وكدا
اسماعيل سليم تظاهر بالموافقة
بس كان أذكى من انه يوافق فعليا
وراح جرى على القبارى
مكان ما سعيد قاعد وبلغه بالخبر
انتا بقيت الوالى يا باشا
والموقف كذا كذا
وبس خلاص
سعيد باشا طبعا زغرط م الفرحة
وجرى على قصر راس التين
فتحله ييجى عشين ازازة شربانيا
وطلقات رصاص حتى الصباح الباكر يا معلم
وأمر واقع وكدا
والخبر وصل سريعا لولاد العم ..
احمد رفعت واسماعيل ومصطفى فاضل ولاد ابراهيم
الكل ركب من اسكندرية على القاهرة
عشان يخشوا القلعة
مقر الحكم
وبس دخلوا الأربعة بربطة المعلم كدا
وعلى باب القلعة وقفهم الاميرالاى محمد شكيب
وقالهم رايحين فين مش عاوزين النهاردة !
شكيب (جد جد ميمى وزوزو شكيب يا عيال فاكرين)
كان متعشم أل يمنع سعيد من الدخول
ويمنعه من الحكم لحد الهامى ما يرجع
راح سعيد وشه قلب
وقايله
وكان الامر ينذر بمعركة دامية هتبدأ
بين سلاح المشاة الرابض جو القلعة
وبين سعيد والامراء اللى معاه بحراسهم
والموقف اتكهرب
قوم يحصل ايه ؟؟
يخرج من بين الجمع اللطيف دا الامير احمد رفعت
ويقولهم كله يخشع
وياخد محمد شكيب على جنب
ويقعد يفهمه براحة كدا ان المعاندة ملهاش لزوم
وكدا كدا هناخد الولاية
وافضلك تبقى معانا مش علينا
وباللين والهوادة شمال يمين
الاخ شكيب جاب خطوة لورا
ووطى على ايد سعيد يطلب رضاه
ومسامحته
واتلمت الليلة ف ساعته وتاريخه
ويحضرنى بهذه المناسبة
اقولكم نص البرقية اللى بعتوها للواد الهامى ف اروبا
هلكتنى م الضحك والله لما قريتها
"انه فى فى 23 شوال 1270 هـ إرادة لألهامى باشا :
كما هو معلوم لذاتكم البهية
ان هذه الدنيا لا بقاء لها فنحيطكم علما
ان والدكم عباس باشا قد انتقل من دار الفناء
الى دار البقاء فى ليلة الجمعة
المصادفة لليوم التاسع من شهر شوال سنة 1270هـ
وبناء عليه يجب ترجيح عودتكم على السياحة
لوضع اليد على املاك وعقار والدكم المرحوم
ولتسوية أمور واشغال أسرتكم وادارتها
وغنى عن البيان انه غير موجود عندنا
احواض صالحة لتنظيف الوابورالمسمى
(فيض جهار) المخصص لركوبكم
فكما تقرر قبلا بادروا بأدخاله احد الاحواض ف لوندرة
لتطهير اسفله ودهانه باللون الاحمرعلى قديم حاله
واهتموا بالرجوع راكبين عليه
وقد حررنا لكم لأجراء الأيجاب "
وبس
o.O
اول ملحوظة استوقفتنى كانت
ان عباس مات يوم 9 شوال
والجواب بتاريخ 23 يعنى مدة كافية
على ما ضبطوا التظابيط
تانى حاجة مقالوش للجدع ابوك انقتل
تالت حاجة ايه حوار كوهين ينعى ولده ويصلح ساعات دا
مش قادرين تعملوا برقية بخبر الموت لوحده
وبرقية تانية بموضوع تصليح الوابور لوحده !
#المرحوم_كان_مبهدلهم_واضح
يلا ..
المهم انه سعيد دخل القلعة
وبقى الوالى واتعلم من الدرس بقى
وجمع حواليه عيلته
واستعان بيهم ف كل امور الدولة
ومزعلش حد عشان مينقتلشى
:)
واسماء امراء الأسرة
اللى اختفت من دواوين الدولة ايام عباس
هترجع تملى الدفاتر
والامير احمد رفعت هيبقاله وضع مختلف تماما
قولولى ليه ؟؟
عشان احمد رفعت حسب فرمان الأريكة اياه
هيبقى هوه اكبر أفراد الاسرة سنا بعد سعيد
وهيبقى ولى العهد رسمياااا
وف سنة 1854 سعيد هيعينه (كتخدا)
ودا زى نائب الوالى الرجل التانى ف الدولة
وكأنه بيعده لتولى الأمور من بعده
وبعد شوية ..
سعيد هيلاقى ان فيه بعض الداووين مهامها كترت
ومحتاجة تكبر اكتر وتبقى نظارات
اللى هيا وزارت بمصطلح العصر الحالى
قوم يقرر يعمل تغييرات جذرية
و ف فبراير1857هيأمر برفع ثلاثة دواوين
إلي مستوى النظارة
وهي ( الداخلية –الجهادية – المالية )
ويعين ناظر لكل نظارة منهم
ويختار الامير احمد رفعت عشان يبقى
أول ناظر (وزير) داخلية لمصر .. 1857
ونظارة الداخلية وقتها حسب المرسوم الجديد
كانت اختصاصتها كالآتى :
إجراء مضابط مجلس الإحكام
أمور الصحة
الهندسة العمومية
ديوان المحافظة
أشغال قناة السويس
إدارة إسطبل شبرا
المطبعة الأميرية
المكاتب الملكية اللى هيا المدارس المدنية
المستشفى الملكي
كل ما سبق شغلة الداخلية !
طب سؤال على جنب
مش عاوزينه بالمرة يجيلكوا كل خميس وجمعة
يسيقلكم القلعة وينفض السجاجيد
ويغسل الهدوم والمواعين
ويفلى العيال ويحميهم ... ايه يا ختشى الإفترا دا ؟!!
وعشان نكمل الباقى
سعيد اختار لنظارة المالية .. الامير مصطفى فاضل
ولنظارة الجهادية .. حليم باشا
واوكل لأسماعيل شئون مجلس الاحكام ..
الملخص
استعان بأفراد اسرته
ومنهم احمد رفعت
واللى بينّ كرامة ف نظارة الداخلية
وكان نشيط وبيفهم ف الناس
واللى يقرى الاوامر الصادرة له من عمه
يلاقى سعيد دايما كان بيثنى على اختياراته للأشخاص
اللى بيطلب تعيينهم ف مناصب هامة
وزى ما قريت من كذا مصدر
يبدو ان احمد رفعت كان أقرب واحد ف الطباع لابوه
يمكن لأنه الابن البكرى
وعاش قرب ابراهيم باشا اكتر واحد .. يمكن ؟
بس حسبما ذكر انه كان حاسم
وناشف شوية
على عكس اخوه اسماعيل الناعم الدبلوماسى
ف اسلوبه
دلوقتى الدنيا حلوة
والوالى سعيد مروق مع عيلة بابا
وبيدرب ولى العهد على ادارة شئون الحكم
وكلنا حلوين مبسوطين مروقين
نسيب دا شوية
ونرجع فلاش باك سريعا لعهد محمد كدا
لما هييجى ظابط انجليزى اسلم
وانضم للجيش المصرى
ويقنع محمد على باهمية السكة الحديد والقطارات
كان لسه اختراع القطر جديد لانج
وبيدورله على ناس تتحمسله
وكان محمد على من الناس دى
وفعلا تعاقد مع شركة انجليزية بمبلغ وقدره
وابتدوا الشغل
والشركة جت ف حتة كدا
وعملت مخرن كبيييير حطت فيه القضبان والمعدات
وقفلت عليها باب كبييير
اتعرف بين الناس بسبب ما خلفه .. بـ باب الحديد
المشروع تعثر شوية
لكن ف عهد عباس حلمى الاول
الشركة الانجليزية هترجع تزن تانى
فالراجل حسب العقد قالهم خلاص كملوا
واتعمل اول خط ف عهده
بدايات الخط أقصد
والشركة اشتغلت فيه بألاف العمال
وخلصت الخط بحيث يكون خط سيره بيعدى
كالأتى:
الإسكندرية كفر الدوار أبو حمص دمنهور
إيتاي البارود كفر الزيات طنطا بركة السبع
بنها طوخ قليوب القاهرة
التواريخ مختلفة من مصدر للتانى
بس المختصر انهم قعدوا من 1852 لحد 1856
يمدوا ف الخط وعملوا حفلة ف النهاية
وعزموا الأكابر وفيلم
يخصنا ايه ؟
يخصنا ف الحوار دا
ان القطر كان بيشق الدلتا والأراضى
وبيمشى على القضبان لحد ما يوصل للنيل
ووقتها مكنتش لسه الكبارى انشئت عليه
فكانوا بيعدوا القطر ف معدية
يعنى القطر يوصل لحد شط النيل .. يقف
ينزل ركابه او يقعدوا براحتهم
تيجى معدية يزقوا القطر عليها
تمشى لحد الشط التانى ويكمل القطر طريقه !
آه هكذا كانت البدايات ومتنسوش
احنا اول بلد ف افريقيا
وتانى بلد ف العالم بعد انجلترا .. ركبنا قطارات
:))
نرجع بقى لحكاياتنا
الوالى سعيد .. كان ف اسكندرية بيروق الدماغ
قام طقت ف دماغه فجأة
يعمل حفلة ووليمة
وراح عازم الامراء ورجال دولته
وفعلا لبى الدعوة الأمير احمد رفعت والامير عبدالحليم
واسماعيل اعتذر
عشان كان عنده (وعكة) صحية وكدا ..
وبس اكل الضيوف واتعشوا واتمشوا
وخدوا بعضهم وركبوا القطر الملكى
عشان يرجعوا الكااااهرة
قوم ايه ؟؟
وصل القطر عند كفر الزيات والنيل
فالخطوة الطبيعية ان الركاب ينزلوا
ويقعدوا ساعة كدا يعيشوا حياتهم
لحد ما القطر يعدى بالمعدية الشط التانى
يقال .. ان الاميران احمد رفعت وعبدالحليم قالوا لأ
خلينا قاعدين ف العربية وخلاص
ونعدى بالمعدية وبلاش وجع قلب ونزول وبتاع
وياريتهم ما قالوا
الا العمال بتوع السكة الحديد
حبوا يعملوا حركات جدعنة
وندهوا للاهالى يزقوا معاهم عربيات القطر بسرعة
عشان ميقعدوش الأمرا وقت طويل ف الانتظار .. !
وزق يا بنى انتا وهوه
الظاهر الناس زقت بزيادة قوى وبذمة
وهووووووب راحت العربية منحرفة
واقعة ف النيل بلى جواها .. !
الخبر الرسمى بيقول ان الامير عبدالحليم
بسبب رشاقته عرف يخرج من شباك القطر الصغير
اما الأمير احمد رفعت فيا كبدى معرفشى
فمات غريق ... !
ومات دولة الأمير أحمد رفعت
ولى عهد الاريكة المصرية ... غريقاً سنة 1858
فيما عرف حينها بحادث كفر الزيات
وبعدين هتطلع اشاعات ان الحادث كان مدبر
وان اسماعيل الأخ الاصغر هوه اللى خطط له
بمباركة الوالى سعيد
إكمن اسماعيل كان عليه الدور بعد اخوه
وبأختفاء الكبير يصعد اللى يليه للقلعة
لكن مفيش أى ادلة على كدا
والموضوع اعتبر حادثا عاديا بيحصل فى أحسن القطرات
ونوبار باشا اللى كان وقتها شغال ف السكك الحديد
أكد دا ف مذكراته
انت حادثة عادية ولا مقصودة ولا نيلة
وكون ان الوالى سعيد كان بيحب اسماعيل اكتر
وبيقربه منه وبيسندله امور كتير مش معناه التآمر
والمهم اللى يخصنا ان الجدع أحمد رفعت
بموته هيعمل حالة انحراف شديدة ف مسار تاريخ مصر
لأنه بوفاته انتقلت ولاية العهد
لأسماعيل اللى هيبقى الوالى
ثم يسعى عند الاتراك ويبقى الخديوى
ثم يرسم على وراثة العرش فياخدها لعياله من بعده
لحد ما توصل لفاروق
واكيد لو كان احمد رفعت عاش ومسكها
كان المنظر هيتغير
بس "لو" كلمة متشعلقة ف الجو
وقبل ما نطوى صفحة صاحب حكاية الليلة
نقول حبة حاجات
فرع الامير احمد رفعت هيكون محظوظ على فكرة
مؤقتا يعنى كلهم هيتشنيروا ف النهاية
بس بقول مؤقتا لأنه ببعده عن الحكم .. رفعت يعنى
هيحتفظ افراد عيلته بفلوسهم واملاكهم
بعيد عن شنب اسماعيل واسرافه
والفرع دا م العيلة هتفضل فلوسه تكبر
وتكتر لحد ما ف سنة من السنين
قايمة اغنى اغنياء مصر
هتضم اتنين من احفاده هما
احمد سيف الدين
والامير يوسف كمال
بس دا لا يمنع انهم هيشوفوا مآسى برضو
لما احمد فؤاد ابن اسماعيل
هيتجوز حفيدة احمد رفعت .. الأميرة شويكار
ويوريها الويل وسواد الليل
هيا واخوها .. احمد سيف الدين
المليونير الحافى اللى متهناش بفلوسه
هتلاقوا قصتهم هنا
من سلسال احمد رفعت .. ابنه احمد كمال
اللى هيخلف .. يوسف كمال
هذا البرنس العظيم اللى تنازل عن لقبه
وقصته هنا
احمد رفعت هيخلف 3 اولاد وبنت
واحفادهم كما ذكرنا كل واحد وله حكاية
بس المؤكد ان اسماعيل لما مسك الحكم
حاول يكون كويس قدر الممكن مع ذرية اخوه
وهيجوز بنت احمد رفعت .. عين الحياة
لأبنه .. الامير حسين كامل
واهو برضو فلوس اخونا متخرجش من ايدنا
وهيراعى أرملة احمد رفعت
ويشترى قصرها المجاور للقصر العالى
ف المنيرة وما حولها .. بمبلغ كويس
ويتاخد القصر العالى بتاع ابراهيم باشا
وتسكن فيه ام اسماعيل ويتولد فيه توفيق ابنه
ثم يتهد قصر احمد رفعت
المواجه للقصر العالى
وبعدييين
المطرح دا كله بعد كدا هيتعرف بــ جاردن سيتى
وميفضلش من سيرة احمد رفعت الا شارع بأسمه
ف المنطقة دى
وخبر الحادثة ف الجرايد القديمة
وصورة واحدة يتيمة له مفيش غيرها
وبس
ولما اسماعيل سعى للخديوية وولاية العرش لاولاده
فإستمرار لمسلسل التكويش
اشترى املاك اخوه الأصغر مصطفى فاضل
وطفشه على برا
عشان ميقرفش الورثة بعدين ف أى وقت
ويطلعلهم زى الخازوق ويقول شرعية ومهلبية وبتاع !
وانتهت سيرة الأمير أحمد رفعت
وتوتة توتة نقول الملاحظات
ومهياش كتيرة يعنى ...
1) زمان ايام الفاطميين كان كرسى الحكم
اسمه سرير الملك
وبقى كرسى العرش مع المماليك
فلما جم العثمانلية خلوه اريكة ...
قال آل عشان محمد على والى مش سلطان
وقالك العيال قعدت تتضايق من بعض
وتشيل ف نفسوياتها
عشان كل واحد عاوز يقعد قبل أخوه
ومعلش يد القدر قومتك يا رفعت يا ويكا
من ع الأريكة
وانتا مكنتش لسه قعدت اصلاااا
2) احمد رفعت
فيه شبه من الأوزأز يوسف شعبان
وهوه شاب الوش الميطول والشنب والمناخير وكله
ولا انا بخطرف من قلة النوم ؟؟
3) بعض الناس شككت ف اسماعيل
وقالت انه اتحجج بوعكة صحية
عشان ميروحش وليمة اسكندرية وانكتبله عمر وعرش
من حيث لا يدرى .. !
بس أى كان صح ولا مش
فالدرس المستفاد من الواقعة دى هوه
انكم تتوعكوا يا عيال ... مش عيب
الوعكات بتجيب عروش اهى
:)
4) آه وبلاش طفاسة ف العزومات
محدش يبقى يتقل ف الاكل عشان
يعرف ينط من شباك القطر
وينجو بعمره
ماشى؟
5)عارفين المثل اياه بتاع .. إحذر مما تتمناه
اهو اسماعيل جرى جرى الوحوش
عشان ياخد الحكم لولاده من بعده
وكان لا يعلم انه مش هيتهنى بيه
لا هوه ولا الأنجال وكل خرابة هيطلع فيها عفريت واكتر
وهيخشوا ف سلسلة من الكوارث
بدءا من فلسه هوه شخصيا ونفيه
ومن بعده توفيق اللة تحتل مصر ف عهده
وتبدأ عقود من الهوان على مصر
لحد ما توصل لحد فاروق
اللى بعد ضعف الأمبراطورية الانجليزية
هيطلعله خازوق ف الجيش المصرى
يشيله هوه وولى عهده اللى استناه بفارغ صبر .. !
وعاوزة تقولى ايه يا فطمطم ؟؟
ولا حاجة بس العيلة دى من جدرها
متمثلا ف محمد على
سفك دم وظلم بشدة
وكل هذا دفعت تمنه عيلته ابن وحفيد وحفيد حفيد
لعل الناس تتعظ بقى وتتلم من اول نقطة دم تراق ...
وسبحان الله الناس اللى بعدت عن نجاسة العرش
ف العيلة دى
هما اللى سيرتهم فضلت طيبة
زى عمر طوسون ويوسف كمال وعباس حليم
واميرات زى الأميرة فاطمة اسماعيل
وغيرها ...
ومعلش بتحصل
ولا يهمك
يبقى العرش ف بطنك .. ويقسم لغيرك
#عادى
----------------------------
-8825sمِـيرْڤَـتْ @frikeko
واللي يخاااااف يطلاااع برة
-Molly Samir @mollyz80
ليه كده يعني يدعي عليه العمر كله
-Mohammad Diab @som3amasrawy
و السودان ؟
إحـــكى يا شهـــرزاد @ro7albmama2
تمام والسودان يا محمد
معلش انا مركزة دايما على مصر :)
-Mohammad Diab @som3amasrawy
مش مشكلة اهنا و السودان واهد :D
-Ahmed Rageh @Ahmed_Rageh101
هو ده جواب لأمير ولا جواب لمدير صيانة
طز BIG @Fatoma999
يعنى ابوه مات,ومش هيحكم من بعده
,وكمان هيصلح الوابور على حسابه
تلاقيه ما رجعش,بركة يا جامع
:)
-Middle of Nowhere... @WIZARD_Mohamed
زكريا الدرديري.... مدرس رياضيات و فرنساوي
عقبال ما يجيبو مدرس فرنساوي...!!
-Ahmed Rageh @Ahmed_Rageh101
ماهو عشان كده بتوع الداخلية عندهم عقد
-Middle of Nowhere... @WIZARD_Mohamed
سواق النيل هو الي غلطان....!!
-amr salem @amrosalim2001
ومن يومها يااوختشي
واحنا ماشيين بالقطارات اللي محمد علي عملها
لحد النهارده
ومش عارفين هانوصل لقطارات اسبانيا دي امتي
احنا مش عندنا قطر اسمه القطر الاسبانى .. كفاية
وبطلوا افترا بقى !
ممكن اسال عن السبيل كتاب اللي متسمب باسم احمد رفعت باشا بجوار الحسين تعرفي عنة حاجة ولا لا
ردحذف