لغتنا العامية البزرميط خالص ... 2

 ولغتنا العامية وع الأصل دوّر 

رغى شهرزاد الليلة دى عن الكلمات العامية

 اللى لها أصول .. فصحى وتركي وفارسى وخلافه

بس اسمعوا دى الاول

يا دهوتىىىىىى

ليلى مراد بتقول ف الغنوة .. يا دهوتى

 ومعناها مشتق من كلمة دُهّل

 اللى بنقولها ع الشخص المبهدل ف تصرفاته

دهل ومدهول

دهل جاية من ذهل أى ذهب عقله

وراح ف الوبا بعيد عن السامعين

وناس بتقول ان الدهلة دى تبقى لفظة فارسية

 معناها ... الطبلة

 أى ان ..

لما تقول عن حد انه دهل يعنى البعيد زى الطبلة

حجمه كبير وله صوت بس فاضى وملوش قيمة

 ومن هنا جت كلمة يا دهوتى

 يعنى يا ضياع عقلى ويا خيبتى !

Rasha @neversaydiee 

انا بحسها دهوتي من دهوة تصغير داهية يعني

 ممكن يا روشا والله !

يا دلعدى .. يقال انها اصلا الدعا عالعدا

ولتسهيل نطقها المصريات بقت تقولها وهيا بتردح

 بس لازم يسبقها كلمة .. نعم!

 hayat ‏@hayatankh  

 ايوه فعلا بيسبقها نااااااعم يا دلعدى

 مع وضع اليد فى الخاصره او تحريك السبابه ع الجبهه

 هههه

Paeonia @paeonia1299 

 كنت افهمها يا دلوعي 

يا سنة سوخة يا ولاد

 سوخة أصلها فصحى

 ساخت الأرض أى هبطت وغاصت 

أطبش .. لما حد يقول لحد فتّح يا اطبش

 .. يبقى بيشتمه بالفصحى لأن معناها .. الضعيف الساذج 

وسمعونا سلام شحط محط

الشحط هوه الشخص الفارع الطول

 دى كلمة فصحى أصلى

لما تقول عن حد تنبل

 أصلها بالتركى .. طنبل

بمعنى اتحامق بعد تعاقل وهو البليد الأحمق

 فاكرين تنابلة مجلة سمير

 :)) 

جابرُ عثراتِ الكِرام @JaberAl3atharat 

 تنابلة الصبيان..

 وهنا يجوز أن نترحم على مبتكرهم حجازي

Cindy @CindyJanabi 

 في سوق خضار بدمشق اسمه سوق التنابل

 بتلاقي الكوسة والبيتنجان متنظف ومحفور

والخضروات جاهزة مقطعة ونظيفة

الواد دا روِشْ أصلها .. ورش

واحد معانيها بالفصحى

وَرَشاً : نَشِطَ و خفَّ

 واحنا قلبنا نطقها لتخفيفه ع اللسان 

أخص عليك !

 كلمة أخص جاية من خسأ وأخسأ وثكلتك أمك

 والحاجات الحلوة بتاعت الكفار دى

 :) 

جوزين عتاقى عند ام شوشو اخدناهم ودبحناهم

وأكلتهم حتتك بتتك

 واحدة قولتك استنى لما أقشرها أكلتها بريشها يا عبعال ..!

حتتك بتتك .. دى فرعونى على قديمو

 حات يعنى لحم

 بات يعنى عضم

 يعنى اكلت الحتة دى بلحمها وعضمها مسبتش حاجة

 وحات جت منها تسمية .. الحاتى

للى بنستعملها لحد دلوقتى 

 gomaa ismael ‏@khafaga73 
علي كده بقي لما قالها هاتي حته يابت كان قصده لحمه

طار ف الهوا شاشى .. يا جدع

بيقولوا ان جدع متاخدة من "جذع " الشجر أو الزرع

وبتتقال ع الشخص اللى فيه شباب وصحة وفتوة 

بلا خوتة أصلها فرعونى

 (خوت) كان جنى بيصيب رأس البنى آدم ويصدعه

 وبالفصحى الخوت هوه صوت تصدره الاجنحة

عند الانقضاض على الفريسة 

الجربوع هوه الفأر الكبير أو اليربوع

فأر الحقول بالتحديد

 والعامة بتقوله لما تستهين بمنظر شخص

 وبشكل لبسه المبهدل

هند @HendZayed 

 اليربوع حيوان من فصيلة الفئران

 يعيش في الصحراء، جسمه صغير وذيله طويل

 ولا يقرب الماء،يرتوي من النباتات فقط،

من هنا اشتقاق جربوع

 فالجربوع بالكناية هو شخص لا يقرب الماء

 خوف الموت، وينم عن الإهمال في النظافة الشخصية

 منهج جيولوجيا ثالثة ثانوي

:))

يبقى البتاع ف البتاع

 والناس صايبها ذهول

 وان قالوا لأ دا بتاع 

يقولوله مش معقول ... !

......... 

بتاع .. أصلها مبتاع لفلان

 أو ان حد اشترى الحاجة دى

وف قول آخر بتاع جاية من تبع ..

أى ان هذا الشىء تبع فلان .. وبقى تبعه أو بتاعه 

دا انا أبن بلد ومدقدق

 صيغة مبالغة ان هذا الشخص مدقق ف عمله

ومدقدق ... اى نشيط نبيه مجرب غير مغفل 

دردشة كلمة فارسية من درد يعنى .. الحزن

 وداش يعنى .. أكثر من فعل كذا

 يعنى الكلام ف الهم والحزن ننخله ونغربله وكدا

Cindy @CindyJanabi 

 بالعراقي نقول دردم

لسه 

والأصل انها للسَّاعة

يعني لحد هذه الساعة لم يحدث ما ننتظره

وخد عندك أشهر اللسات ... بعد خلاويص لييييسه 

ما  لسه بدرى يا سعادة البيه

لسه فاكر قلبى يديلك أمان يا حدوقة

وأصبروا  لسه أنيل يوم مجاشى 

والشىء يا عيال

 الكلمة دى ضميناها على اخواتها ف وسط الجملة

 لحد ما بقت كلمة واحدة

أى شىء المعنى بقت .. اشمعنى ؟

آه .. اشمعنى ؟

بلا شىء ... بقت .. بلاش

ما لى فيه شىء ... بقت .. مليش .. فيه
 الله يمسيه بكل الخيييييير شفيق يا رااااجل

ما أعرف شىء ... معرفشى
ما عليه شىء ... معلش
ما فيه شىء .. مفيش 
وهكذا

كع اللى ف جيبه .. مصرى أصلى قديم
 من .. كاع .. بمعنى أعطى

شوية .. تصغير .. شىء
 جنينة .. تصغير .. جنة أو بستان
شخر لفلان وخُش يا فتى .. دى كلمات عربية فصحى
 لو كتبتها مش غلط.. #آه والنيعمة

هروح أغسل  المواعين أصلها فصحى
 جمع ماعون .. بمعنى الوعاء أو القدر
 وبمعنى العطية والمنحة والزكاة وما شابه 

انتى فالد خنزقور ...
 الكلمة دى تحريف لشتيمة .. خنزير
التراكوة بقى وآل احنا ناقصين دلعهم المرىء 

ابن حنت متاخدة من (الحنث)
يعنى الناس اللى بتحلف يمين ومتعملش بيه
 يعنى يقولك مش عاوزين سلطة ولا رياسة
وبعدين يترشحوا ويمسكوا وكدا !

يا ختشى الاكادة انه .. كلمة اكادة جاية من (الكيد)
 وعلى رأى المثل ..
كيد النسا محدش قده لو مال على حيط .. هدّه

حرفوشه @elharafeesh 

 كنت فاكراها من التأكيد !!

ممكن .. بس متهيألى بتستعمل بالمعنى الشرير :)

أنتيكا .. دى بتاعتنا بقى
 يعنى الأجانب واخدينها منينا .. نقلا عن كلمة .. عتيقة
 يعنى قديمة قوى

كمان .. جاية من .. كما أن
وبرو عتب ..
جاية من الذى يبرأ نفسه من العتاب أو العتب عليه 

مبلم دى بيقولوا أصلها هندى
 أبلم .. يعنى سكت أو صمت
وعلمّ ف المبتلّم يصبح ناسى

باظ الشىء يعنى اختلف عن هيئته الاصلية 
ومبقاش نافع
 وجاية من كلمة ... بوظة
اللى هوه الشراب المسكر بتاع زمان
 اللى شوفناه ف الافلام القديمة فاكرينه ؟
وبوظة ف بعض بلاد الشام معناها آيس كريم 
:)

تّف على عمو يا حبيبى !
 تف جاية من .. تفل ... يعنى بصق ولا مؤاخذة 

هات بوسة 
 هات : عربية صرف
 بوسة : فارسية صرف

تنها قاعدة لحد ما ..
 يعنى استمرت ف القعود متمنية حدوث شىء ..
إلى أن غالبا محصلشى .. او حصل الله أعلم ! 

يبشبش الطوبة اللى تحت راسه
 دى من اجدادنا القدامى
 اللى كانوا بيحطوا مخدة تحت راس الميت
وبيعتقدوا انها مهمة وضرورية جداااا

كانت معمولة من الخشب او ورق البردى
أو من قماش معين وعليها كتابات وتعاويذ
 وبيظنوا انها هتعرف روح الميت طريق الجسد بتاعه
 لو فضلت مندية وطرية ومتنكسرش أو تتفتت

ولهذا المصريين كانوا بيدعوا ان الوسادة او الطوبة دى
 تبشبش دى قبطى .. بمعنى مندى أو مبلل بالماء

 يعنى تفضل طرية ومتنشفش
والا الروح مش هتوصل للجسد وبلاغ ف القسم
واعلان ف الجرايد ونداء انسانى و شغلانة بقى .. !

واخيرا .. حدوتة جاية من أحدوثة
 وحواديت جاية من أحاديث
وتوتة توتة ... خلصنا النهاردة
وموشكرين