برج القاهرة : ومصر محتاجالك يا رأفت

أغلب الصور من موقع البرج على الفيس

والباقى من النت 

العواف عليكم ...

حدوتة النهاردة عن مكان اتبنى بحكاية عجيبة غريبة
وغامضة وانا سخصيا مش مصدقاها
 اكمن الواحد خلاص اتلسع م الشوربة 
وبقى ينفخ ف الزبادى
انما نظرااااااا لأن محيلتناش غير مصادر
اغلبها بيؤيد ويصرّ ع القصة دى فخلاااص 
 يبقى امرنا الى الله
ونحكيها وكأنها الحقيقة فعلا 
مش عشان حاجة وانما لأنه المطرح دا
بقى زى كل حاجة تقريبا ف مصر الغلبانة
بدأ بطريقة عجيبة ومنسوب لحاكم او زعيم او أى نيلة
وبعدين ف النهاية بيرجعلنا
احنا ولاد الكلب الشعب 
وكدا

حدوتة الليلة دى هتكون عن .... برج القاهرة 

والموضوع هيبدأ لما جزء من الجيش هيعمل انقلاب
ويسموه حركة ثم يباركه قطاع كبير م الشيعب
فيسموه ثورة
وكان محمد نجيب اول ريس
وبعدين الظاهر الراجل الطيب
هيخرج عن الدور المرسوم له ويتمريس بجد
قوم عبناصر هياخده مقص حرامية ويعزله
ويمسكها هوه

وبس هما ضبابيط ف بعضشيهم
 ينقلبوا على بعضشيهم براحتهم ملناش دعوة احنا
ويبقى عبالناصر الزعيم والملهم والمخطط والمنقذ
وبابا وماما وأنور وجدى ..
وقبل الثورة كان فيه حاجة اسمها القلم السياسى
وكان زى منتوا هارشيين معمول
عشان يدى اقلام لبتوع السياسة اللى ضد النظام والانجليز وكدهون



قوم بعد الثورة بقى مش هيفضل امن الدولة أمن دولة
 نخليه أمن قومى عشان يبقى تغيير وحاجة حلوة
بس نكبس على انفاس الناس برضك 
ونراقبهم 
قوم ايه
عبناصر هيصدر امر 
بتكوين جهاز المخابرات العااااااامة
اللى كان منوط بيه حماية البلاد من الاخطار الداهمة
ومعرفة كل كبيرة وصغيرة 
 .. حلو

ف 1954 هيطلع القرار الجمهورى
ويرأس الجهاز الاخ زكريا محيى الدين
ويختار معاه شوية ناس
وبعدين ينضملهم سامى شرف وصلاح نصر وغيرهم 
لكن يهمنا من وسط الرعيل الاول للمخابرات
اسم .. حسن التهامى
ولنا .. هنا .. وقفةةةةةةةة
 عشان الراجل دا كان شخصية عجيبة جدا

حسن التهامى 
من مواليد استغفر الله العظييييم .. المنوفية
واتخرج م الحربية
وبيقولوا انه مكنش م الضباط الاحرار
وانما اوكلوا له دور ومعملوش لسبب ما 
زى السادات كدا لما راح السينما يوميها   ... !
المهممم ...  الحاج التهامى
متفهموش ايه كانت امكانياته الرهيبة يعنى
فكان داخل دماغ عبناصر قوى فرقاه 
وقربه منه





ناس بتقول عشان انه كان من الفدائيين
اللى حاربوا مع كمال رفعت وغيره
وكانوا شوكة ف ضهر الاحتلال
خصوصا ف منطقة الهرم بيخطفوا انجليز
او عملائهم ويغتالوهم 
وتحيا مصر ومصر هتفضل غالية عليا 
ويعيش الوطن واحنا مش مهم 

القصد
بعد تولى عبناصر الحكم بعد نجيب
التهامى بقى مدير مكتب معلوماته ومستشار خاص له
 وكانوا بيحكوا عنه انه مدروش وخومينى صغير
ليه يا شهر ؟؟؟ 
قالك اصله كان مهروش شوية
ازاى ؟؟
يعنى يبقوا قاعدين ف اجتماع وبيتكلموا
ومواضيع خطيرة ومهمة وبتاع
وفجأة يلاقوه قال ..
وعليكم السلاااام ورحمة الله وبركااااته 
فيسألوه .. بتكلم مين ؟
فيقولهم الخضر عليه السلام كان معدى .. !!



بعض المقربين منه اثناء فترات عمله قالوا انه
كان بيدعى الدروشة 
عشان يهرب من العقاب 
لأنه كان سايق الهبل ع الشيطنة وبيعك كتير
 وبيدعى معرفة اشياء
والحقيقة ان عبدالناصر كان كلفه ف فترة ما
بالتجسس على بعض الشخصيات اللى بيشك فيهم
فكان عارف حاجات فعلا ... والناس تستغرب !
بس الحكاية وصلت لدرجة انه اتجسس على عبناصر
 شخصيا فراح ناقله .. ومحبش يأذيه جامد واتقى شره
وهنعرف بعدين التخمينات الأخرى
 وليه
والمهمممممم خلينا ف البرج

احنا دلوقتى ف 1955
عبناصر ف عز تحديه للقوى العظمى
وبيساعد الثورة الجزائرية وبيلم حواليه الشعب
وبشرة خير شغالة الله ينور وعاملة خرم للناس
المهم حسن التهامى
كان وقتها مستشار الرئيس وف امريكا ف مهمة رسمية
 الامريكان قالوله اننا عاوزين نتعاون مع مصر
 والكلام الدبلوماصى الحيلو دا 
الراجل قالهم قشطة
وخد بعضه وركب الطيارة ورجع على مصر
 بلغ الرسالة لعبناصر ان الامريكان عاوزين علاقات
قال لما نشوف وخليكم معاهم 

وبعد ايام جت للتهامى دعوة رسمية
واتعزم ف السفارة الامريكية بالقاهرة
فالأخ حضر واتفاجى بضابط مخابرات امريكى كبير
 اسمه مايلز كوبلاند بيقيم معاه حيوار 
عن العلاقات الثنائية بين البلدين 
ومصر وامريكا لازم امسكتوا سوا سوا
علايقات عاتيفيات حارات
وسيبكم م الثورات والتحررات
والحاجات الويحشات دى يا راااجل 
التهامى سكت 
وخلص الحوار عند هذا الحد 
وبعد ايام لقى مكالمة تليفون من الاخ الامريكانى 

بيعزمه عنده ف سميراميس للتشاور



التهامى اخد الاذن من الرياسة وراح ف المعاد
وطلع لمايلز اوضته
واهلا اتفضل وتشرب ايه
المهم قعدوا واتكلموا وبعدين التهامى ( حسب روايته)
 فؤجى بمايلز بيدخل اوضة وبيخرج منها
ومعاه شنطة وبيسلمهاله لكن ..
فتحها الاول قصاده عشان يوريه محتوياتها
اللى كان عبارة عن اوارق نقدية خضراااااء
دولارات متتعدش وطلب من التهامى استلامها 
مع التاكيد ع الآتى
ان امريكا بتقدم الدعم دا لمصر وعبدالناصر
ف اطار تحسين العلاقات
 زائد استعدادها لمزيد من (الدعم) ف المستقبل 
وشكراااا

حد يسالنى حسن التهامى ياخد الشنطة
بمناسبة ايه يا شهروزة وايه اللى وداه اصلااا ؟
الرد بقى من احد ضباط المخنبرات القدامى 
واللى بيفسر المسألة انه
التهامى الظاهر افتكر ان الأخ الامريكانى
هيقوله على انقلاب وشيك او أى معلومة مفيدة
 فراح بدافع الفضول
 بس المحير فعلا .. هوه اخد الشنطة ليه ؟


انا كشهرزاد اعتقد انه اخدها 
عشان تبقى أول مهمة لجهاز المخابرات المتكون جديد 
والناس عداهم العيب وقزح
اللى هوه عاوزين نشتغل ونعمل جو ونشاط وحركات 
ومصر محتاجلك يا رأفت 
وادى الفرصة جت 
نسيبها .. ؟ #ايصحش




عموما مش هنسأل كتير .. لكن اللى حصل وقتها
ان الاخ التهامى كان على معاد تانى يوم
علطول مع عبناصر عشان يبلغه بتفاصيل المقابلة
وكان هيقوله كل حاجة
وطبعااا واضح ان ساعتها مكنش حد يقدر يتصرف
 من دماغه ويزعل البيج بوس الا زعله بيبقى ويحش
الظاهر 
القصد .. روح تهامى بيته 
ومنمشى من القلق
تانى يوم الصبح كان ف مكتب عبناصر
وبيحط الشنطة قصاده وقصاد على صبرى 
عبدالناصر ضحك لما شافها وسأله دى قنبلة لاغتيالى ؟
فضحك كل الحاضرين ف المكتب وقتها 
رد التهامى .. لأ دى شنطة فيها مليون دولار يا فندم !
 ساعتها عبدالناصر رد بانها قنبلة لأغتياله معنويا
وتدمير سمعته وانها رشوة امريكانى

واللطيف انه سأله انتا عديت الفلوس دى
فرد التهامى أيوه عديتها وكانوا مليون
ناقصين 25 دولار
 #يا_سلاااااااا_ع_الدقة 
عبناصر 
قاله خليهم عندك
وهتقعد مع زكريا محيى الدين رئيس المخابرات
وعاوزاكم تمخمخوا ف فكرة نستعمل فيها الفلوس دى
للرد على الوقاحة الامريكانية 
ونديهم درس لا ينسوه




التحليلات كلها وقتها صبت ف اتجاه واحد
ان الامريكان كانوا عاوزين مصر تشيل ايديها
من ثورة الجزاير ومتساعدهمش 
وكان الفلوس زغللة عين
عبناصر خدها على كرامته وقرر يديهم الدرس المتين
 وف خلال اسبوعين مش اكتر
كان عاوز رد المخابرات واقتراحاتهم
وهيحصل ايه بالفلوس دى  
وكدا




بس وتنفس التهامى الصعداء عشان فلت من العقاب
 وخرج على رئيس المخابرات عشان يتفقوا
زكريا محيى الدين قاله هوصلك بيسرى
وهنا هنسمع اسم كمان .. للأسف ملوش صورة ع النت
 مع انه كانله دور مهم
الا وهو الضابط اللى بعدين هيبقى
اللواء احمد يسرى مصطفى الجزار

الراجل دا .. 
هوه اللى هيتسلم الشنطة من التهامى
وبيقولوا انه ف البداية مكنش يعرف محتواها
وكان فاكر انها اوراق مهمة ومطلوب حفظها وفقط
 لكن بعد أسابيع الشك كان هيقتله ايه اللى جواها
ففتحها واكتشف انها مليانة دولارات بالهبل
اترعب وكلم التهامى
وازاى سعادتك متقولوليش ع المصيبة دى !!
وبيقول انه اترعب بشدة لتكون هتستخدم ف انقلاب ولا نيلة
وهوه شايلها ومش عارف وهاااار اسود
ولا يمكن 
المهم التهامى هداه وقاله يومين وافهمك كل حاجة





وفعلا بعد يومين كان ف اجتماع مغلق
مع زكريا محى الدين رئيس المخابرات
ومع حسن التهامى مستشار الرئيس للعلاقات الخارجية
وبيبلغوه الآتى ..
يا يسرى .. عبناصر عاوز يتعمل حاجة بالفلوس دى
تخلد لحظة رفض مصر لشراء ذمتها من الأمريكان
وانتا موكل بالمهمة الخطيرة دى 
ومصر محتاجالك يا رأفت




الحقيقة ان كان فيه شوية اقتراحات لصرف المبلغ
انهم مثلا يعملوا كام مدرسة
او يصلحوا شوية كبارى
او يعملوا توسعات ف طريق مصر اسكندرية الصحراوى
 الخ
وبعدين بعد كل المناقشات اتفق الحاضرين
 على انه يتعمل مبنى ف قلب القاهرة يكون عالى
رمز السمو والشموخ يعنى 
ويكون معلم سياحى تشوفه كل الدنيا
وبما ان امريكا الشيكا بيكا بتاعت ناطحات السحاب
 والأبراج العالية فاحنا كمان نعمل برج
ويبقى سياحى وعالى اشمعنى هما 
وطبق طبقكوا طبق ف طبقنا 
يعرف طبقكوا يطبق طبقنا 
زى طبقنا ما طبق طبقكوا ... وكدا 
وكمان قالوا نستخدمه لأغراض الاتصالات 
والاسلكى والبث ... بمناسبة الارتفاع يعنى



وبس كدا اتحددت المهمة وتم اسنادها ليسرى الجزار
اللى حس انها حاجة اكبر من امكانياته
 خصوصا حكاية العمارة والبنا 
فقال استعين بصديق
كان له صديق مسئول ف تشجير الحدايق
 بمنطة الزمالك فراحله يستشيره
الصديق قاله هتبنوه فين ؟
يسرى رد معرفش 
.. نبنيه عند الاهرامات او النيل او القلعة
الصديق اللى للأسف محدش ذكر اسمه ..
عشان نعرفه مين
قاله ليه كل دا ماتبنوه هنا ف الزمالك ف قلب القاهرة
وع النيل وقرب الفنادق وف وسط البلد 
وكل حاجة فل الفل !
وفعلا كان فيه مكان .. قرب قصر النبيل عباس حليم
يسرى الجزار طار بالفكرة طيران
وراح على رئيس المخابرات اللى بلغها لعبناصر
اللى وافق فورا وقالهم دوسوا بنزين




وبس تم اختيار الأرض .. ف جزيرة الزمالك
دخلنا ع الخطوة التالية وهيا التصميم والبناء 
وطبعا اساتذة كلية الهندسة بجامعة القاهرة 
كانوا الاولى
لما يسرى راحلهم عملوا دراساتهم المستفيضة
وف النهاية قالوله مينفعشى الارض هناك طبيعيتها
 لن تسمح ومش هتتحمل المبنى المرتفع دا
 ابضننننننن





الراجل اتصدم بس خرج من عندهم
 على أساتذة العمارة والإنشاءات فى جامعة الإسكندرية
 فقالوله نفس الكلام الارض رسوبية
وطبيعتها متتحملشى 
ومينفعشى 
ومنعطلكشى
بس والاحباط بقى دوبل
والمشروع توقف وبعدين بقى .. ؟

 ف مرة كان الجزار ف وسط البلد بيتمشى
وتحديدا ف باب اللوق 
قوم ايه ؟
شاف عمارة تحت الانشاء وكانت ملفتة
 وعالية عن كل العمارات جنبها 
ومتفهموش ايه اللى خلاله فورا كدا 
يسأل الحارس بتاعها
عن المهندس اللى بناها واسمه ومكتبه 
وبييجى امتى الخ
وهنسمع تالت اسم ف حكاية البرج المهندس
نعوم شبيب
اللى يسرى الجزار لما عرف ان مكتبه ف وسط البلد
راح رايحاله طوالى

نعوم شبيب كان من أنبه المهندسين المصريين
وكانله حاجة اتعرفت بأسمه بعدين اسمها
 اقواس شبيب
 وكان فكره مختلف عن مهندسى عصره 
وحاجة حلوة وفللى ع الآخر 
وبيقولوا ان جذوره لبنانية
 لكنه اتولد ف مصر فبقى مصرى أصلى 
المهم 
نعوم استقبل يسرى وفهم منه ايه المطلوب
برج عالى يشوف القاهرة من كل الجهات
وفيه مطعم وتراس
ويبقى تحفة فنية يتحلف بيها





شبيب سكت لثوانى 
وبعدين قاله المكان .. آهم حاجة المكان
يسرى قاله ع الموقع اللى ف الجزيرة
قرب قصر عباس حليم 
وان المتخصصين قالوا مينفعشى
بس انا نفسى يحصل عشان الوطن وكرامته 
ومصر محتاجلك يا رأفت 

نعوم قال طب استنى كدا !
وبعت الساعى بتاعه يجيبله حاجات من المخزن
صلصال وصندوق
 وبعدين اخد الصندوق
وحط فيه كتلة الصلصال وفردها
وبعدين رشق ف وسطها قلم رصاص
بعد شوية القلم مال على احد الجوانب
قام نعوم زود كمية الصلصال ف ناحية
بعد شوية مال برضو قعد يزود
ويظبط ويصحح 
لحد ما القلم ثبت على وضعه !

لحظتها بص بيسرى وقاله .. خلاص اتفقنا
انا هبنيلك االبرج دا زى منتا عاوز
وف الحتة دى
ولنا .. هنا .... وقفففففففة تانية
عشان نعوم شبيب دا راجل سُكرة
قبل ما يعرف ان المبنى المطلوب برج
كان فاكره مجرد مبنى عادى سياحى
فسأل يسرى عاوزه على شكل هرم مثلا ... !
 دا اولا

قوم لما عرف انه برج سأله عن التصميم بتاعه
يسرى رد معرفش مفيش حاجة محددة ف دماغى
 نعوم قاله يبقى نعمله على شكل زهرة اللوتس
 دا ثانيا
ثالثا بقى لما جم يتفقوا ع الاتعاب
 نعوم شبيب قاله اجور العاملين معايا هكتبلك بيها بيان
لكن انا مش هاخد ولا مليم منكم 
شفتوا الحلاوة والجمال
!!!!

وبس كدا الدنيا اتحلت الارض
وموجودة المهندس
والشركة اللى هتبنى والتصميم موجودين
والفلوس كمان موجودة 
قشطات و هيا بنا نبنى يا ولاد برج القاهرة
والشق الفنى اكتمل والشق الادارى كمان
وابتدت الخطوات الفعلية



نعوم شبيب قال ان البرج هياخد 4 سنين بنا
وهيستخدم خامتين ملهمش تالت
احجار الجرانيت وخلطة الأسمنت والرمل وبس
واشمعنى الجرانيت يا شهروزة
قالك لأن اجدادنا استخدموه وصمد قصاد الزمن
وهوه انسب حاجة 




طبعا توريد الاسمنت والرمل ماشى
ولو بكميات مهولة يعنى على مدار 4 سنين
 لكن الجرانيت سعادتك دا مبيجيش الا من اسوان 
يا ليهووووى !
نعوم كمان قالهم مش هتعاقد معاكم وامضى العقد
الا لما تجيبولى عينات من هناك
ونضمن توافر كمياتها والا مش هشتغل
يا خراشى ع الناس النضيفة !
واحد تانى من بتوع الايام دى كان مضى العقد
ولهف العربون ولطع اسمه ع يافطة المشروع
وعمل على حسها صفقات
وابتدى من ع الوش
وبعدين تعاقد من الباطن مع كام شركة
وهوه قعد يقبض وملوش دعوة والأفلام دى

المهمممم
الموضوع داخل فيه المخابرات
وعبناصر سخصيا مهتم
قوم الامكانات كلها تحت امرهم قالوله خلاص
هنخصصلك قطر مخصوص يجيب الحاجة يوميا 
من اسوان
وسافر نعوم يشوف بنفسه مصدر الجرانيت
والنوعية واتعاقدت الحكومة مع مصانع بعينها
تورد الأسمنت وتخصص انتاجها للبرج وفقط 
وبس سوروا الموقع
وبدأ الشغل ف برج القاهرة

وبيقولوا انه ف خلال شهور اول ادواره ظهرت
واتعملت الأساسات على عمق كبير
وامتداد 100 متر ف كل الاتجاهات ف شكل حجرات
مربعات تحت الأرض ... لضمان ثباته
والدنيا شغالة وحلوة وفؤجى الناس بالاخ حسن التهامى
جاى بفريقه وملفاته وحاجاته 
واحتل الدور الاول من البرج
وعمله كما القلعة بتحصينات 
وممنوع حد يدخل وحاجات غريبة 
محدش طبعا جه جنبه ولا كلمه .. موشتشار الريس بقى

وفضل العمل مشى على قدم وساق
والبرج شغااااال يونيفرسال الى أن ..
جه عبناصر ف يوليو 1956 وبحركة معلمة معلمة
قام قايل ديليسبس وأمم القنال
عشان ترجع تحت الادارة المصرية بعد سنوات
من الاحتلال والقهر

طبعا كلنا هارشين ان الحركة دى
هل بت ما زعلت القوى العظمى منينا
وقاموا علينا قومة وحشة
انتهت بعد التهديدات لعدوان ثلاثى
1956
وانجلترا وفرنسا واسرائيل اتلموا علينا
وقرفونا ف عيشتنا
وطبعا ف هذوها الاثناء توقف العمل ف البرج
والاهتمام كله كان منصب على صد العدوان واثاره

وصدر قرار مجلس الإيمن وتوقفت هجمات انجلترا
وفرنسا وانسحبت سخامة اسرائيل من سينا
والدنيا هديت 
وبيقولوا عبناصر عمل بعض تغييرات 
 زى
انه بعت على صبرى للمخابرات
فالراجل أول ما راح اصدر امر بنقل حسن التهامى
من الجهاز لحتة تانية 
وبيقولوا
مين يا شهروزة اللى بيقول ... ؟

عبد الفتاح أبو الفضل نائب رئيس المخابرات وقتها
اللى بيحكى ان حسن التهامى كان محتل الدور الأول
من برج القاهرة اللى تحت الانشاء 
ومحصنه ومتمرتس 
بعتوله يبلغوه بقرار نقله قالهم مش ماشى من هنا
البرج دا تاعى اناااااااااا 

آه بيقولوا قال كدا فعلا
 ليه آحبيبى اشااااء الله ؟ 
قالك عشان آل ايه .. فلوسه هوه اللى جايبها 
وهوه صاحب الفضل 
إذ ان لولا حنكته ف التعامل مع الظابط الامريكى
وتسلمه الفلوس وتسليمها لعبناصر
مكنش البرج دا هيتبنى ولا يشوف النور 
شوف ازااااى ؟!!

القصد قالوله اطلع من عندك
لأ مش طالع
 اطلع مش طالع
هنزعلك اطلع مش طالع
راحوا باعتينله قوة مسلحة من جهاز المخنبرات
عشان يطلعه بالذوق والانسانية
 :)
واكتشفوا بعد خروجه وثائق كتير 
فيها معلومات استخبارية عن روسيا 
وعن غيرها 
وعن رجالات الثورة واتصالاتهم 
وعن جمال عبدالناصر شخصياااااا 

ونرجع تانى للبرج .. اللى اعمال البناء فيه
كملت 
وبسبب العدوان الثلاثى اتاخر سنة
وبدل ما يتبنى ف 4 بقوا خمسة 
لكن مش مشكلة
لأنه البرج هيوصل بإرتفاعه لــ 187 متر
قالوا وبكدا يعدى طول هرم خوفو
ويعلى عنه بزيادة 43 متر

وهيتكون من 16 دور
وتوصل تكلفة بناه لحوالى 6 مليون جنيه مصرى

ويشارك فيه اكتر من 500 مهندس
 وعامل مصرى صرف
اجانب نو
صناعة مصرية صميمة 

 دوس ع الصورة للتكبير



ومفيش داعى اقول انه فيه مطعم 
والمشهد من فوق بانورامى 360 درجة 

 
وفيه منظار تشوف منه ومن غيره حتى 
لحد الاهرامات ف الجيزة 
والقصص دى انتوا اكيد عارفينها اكتر منى 

وخلاص يا فندم خلصنا البرج 
وتعالوا افتتحوه
 

وهيحصل فعلا سنة 1961
ف أبريل تحديدا
هنا 

هيروح كمال الدين حسين
رئيس الاقليم الحنوبى
وصلاح نصر
 ورشاد مراد مدير مصلحة السياحة
اللى قال كلام كبير من نوعية 
" «إن البرج رمز للانطلاق والتحرر
 اللذين عما الجمهورية العربية المتحدة منذ قيامها "
ويقصوا الشريط الحرير 







طب رئيس الأقليم الجنوبى ماشى 
بتاع السياحة ماشى
 وصلاح زفت نصر ماشى برضو
 اهو المخابرات راشقة
انما الحاج عبناصر مرحش يفتتحه بنفسه ليه
خافوا عليه م الأغتيال ولا ايه ؟!!

القصد ان من يومها 
والبرج واقف كدا وقفة معتبرة
ف قلب القاهرة عشان يبقى جزء يومى من حياة سكانها
وذكرى لكل زوار مصر والقاهرة
عرب وأجانب 

طبعا مش محتاجة اتكلم عن برج القاهرة
واهميته بتاعت الكرامة والرد ع الامريكان 
والقصص دى
انا هتكلم من زاوية تانية خالص
 هحكى عن البرج
اللى هوه ذكرياتى والمناظر اللى شفتها من فوقه
ولا يمكن انساها
مصر الجميلة المبهرة على مدد الشوف

البرج بالنسبالى مشهد بشوفه كتير
من كوبرى قصر النيل ايام المسيرات
 او ف التحرير 

او انا رايحة شغلى او قاعدة ف الاوبرا
وغيرها ... ويحسس عينى بالمهابة والألفة

البرج يعنى مهابة منظر النسر اللى فوق مدخله
كنت بخاف منه
 وانا صغننة جداااااعلى فكرة
:))

واللى عمله الفنان أحمد عثمان 
هنا 

البرج يعنى شجرة ام الشعور 
اللى ف الطريق له وشكلها كان بيريحنى نفسيا 
وبحس انها بتحضننى
والحنطور وصوت خطوات الحصنة 
ورنة الاجراس بتاعها ف ودنى 
اياااااااام

 

البرج عندى يعنى اتنين حبيبة 
أو مخطوبين أو متجوزين وعندهم عيال 
ورايحين يفسحوهم ويفرجوهم على مصر من فوق

البرج عندى كان اتفاق بين اتنين زمااان
على شاشة السينما ف موعد ف البرج
وانا مقهورة انهم متقابلوش
رغم الحب والدنيا فرقتهم
وانا عمالة اقول لصلاح ذو الفقار
سعاد مبتشوفشى ..
حصلها حادثة
 ارجعلها بتحبك 
يخربييييت كدا !!!
واللى بالمناسبة متمصر عن فيلم اجنبى 
عن اتنين اتفقوا يغيروا حياتهم 
ويتقابلوا ف برج ايفل بعد شهور 
وشحتفوا قلبنا برضو على ما رجعوا لبعض تانى 

البرج عندى الأستاذ فرجانى
ف اخر الرجال المحترمين بعد ما لقى البنت اخيرا
وقعد على سلالم البرج ف مشهد الفينالة
وهوه بيبص لبكرة المنيل بستين نيلة 

وكأنه بيقولنا كل حاجة بايظة 
ولسه هتبوظ أكتر .. !

وفكرة بطلة الفيلم الام الحزينة اللى فقدت بنتها
فخطفت بنت تانية وخدتها تطير بالونات من فوق البرج
واوحتلى بحاجة
نويت اعملها لما ابنى يرجعلى والحمدلله رجع
وجارى الترتيب لهذه الزيارة
ان شاء الله

وقبل ما نقول"  تمت " ف حكاية البرج
اللى سموه "شوكة عبدالناصر" 
و "وقف روزفلت" 
وأطول كلمة "لا" ف زمانها 
المهم بقى ... شخصيات اللى ارتبط اسمها بإسم البرج
راحت فين يا ترى ؟؟؟

حسن التهامى
بيقولوا كان له وضعه عند عبدالناصر
 وحتى بعد ما ثبتله انه بيتجسس على مكالماته
ماعاقبوش كما ينبغى ونقله بس وحدد نشاطه
وبعدين هوه اتدروش قوى
وناس فسرت الدروشة دى استهبال ..

المهم ان الرجل رقدلهم ف الدرة لحد ما جه السادات
وبقى له دور مهم معاه خصوصا ف محادثات السلام !!!
وبعض المحللين بيفسروا مصدر قوة حسن التهامى
بأنه كان مسنود من الامريكان بشكل حقيقى
وانه استفاد من دوره اثناء عبدالناصر 
واستخدمه السادات برضو 
عشان ميزعلش اولاد العم سام ..
(انظر الصورة اعلاه أقصى اليسار تلاقوه واقف)






 

والتهامى اخد لقب (فريق) شرفيا
وقال ف احاديث له شوية حاجات عجيبة
 زى انه دخل على عبدالناصر وعبحكيم عامر
ف مرة وكتفهم مع شوية من رجالته
ليه ؟
قال عشان كانوا هيعملوا سلسلة من التغييرات
بعد عزل محمد نجيب وهوه رفض كدا
وراحلهم بربط المعلم وكتفهم وهددهم
وهما استجابوا وعبدالناصر قاله فكنى .. 
وافلام عجيبة كدا
وبيقول كمان ان عبدالناصر ف اواخر ايامه
كان خايف من الاغتيال وطلب حمايته
وقاله متسبنيش يا تهامى



بيقولوا بعد ما حط ايده ف ايد الأسرائيلين
بعدين جه ف زيارة لدولة عربية كدا
وراح مهاجم التعامل مع العدو الصهيونى ... !
قوم السادات اتغاظ منه 
وركنه ع الرف 
فرجع تانى يتهمش ويعيش ف الضل 





القصد الراجل تقريبا هوه اللى عمل الثورة
 وعمل الهزيمة وعمل النصر وهادن العدو 
ثم هاجمه وعمل كل حاجة
واحنا اللى كنا مسافرين كلنا قيادة وشعب
قصره ... اهو قعد محدش فاهمله 
لحد ما ربنا افتكره سنة 2007
واندفن ف مسقط رأسه بالمنوفية 

يسرى الجزار 
واللى شال على عاتقه مهمات كتير
 لحد ما البرج وصل لمرحلته النهائية
الراجل دا اتكرف كرفة وحشة قوى 
الظاهر مكنش مرضى عنه !
بيقولوا انه حتى متعزمش ف افتتاح البرج
 وتابع الاحتفاء بيه زيه زى اى مواطن عادى
لكن كان فخور بما صنعه وكفى 
الله يرحمه

عبدالناصر بقى راح البرج زائر
واتصور طبعا 

\

وبص م البتاعة دى زينا كلنا لما بصينا
ووقف ف الطابور كمان
 اكيد يعنى مش كوسة هيا !!!

اما صلاح نصر وغيره من رجال المخنبرات
 الحقيقة ربنا يباااااااااركلهم
 ادونا دروس وعبر
 تخلينا كل ما حد م المخابرات يتكلم 
الواحد يبتدى يهرش !!
ومش بتوع زمان بس بتوع دلوقتى
 اللى ماليين الفضائيات
 الحقيقية بيبهرونا بالإداء والنباهة واللباقة
 والمفهموية بشكل خلانى ...
لما وقع كتاب عن برج القاهرة وعرفت ان المؤلف
كان ف المخابرات توجست
 الا الواحد اتصدم ف الاوستاذ يوسف شعبان
خصوصا بعد الاعلان الاخير بتاع الإريهاب
ربنا ما يوريكم ف عيالكم يارب 

المؤسف بقى ان البرج ف فترة سابقة 
اتعمله صيانة 
 واعيد افتتاحه

 لكن لما بشوفه بليل
كنت اكاد أبكى من المنظر المهبب 
اللى كان عليه !
معرفش مين قاله يلبسوه بدلة رقص شفتشى كدا
واللى ناقصه يتحزم ويرقصوه عشرة بلدى
 اذواق زفت ونيلة وقطررررران

لمض وكهارب وعلى وسطها تنور
على كتفها تنور 
 مأسااااااااااة

والحمدلله ان نعوم شبيب مات قبل ما يشوف برجه
 بيتقلب غازية

وبالمناسبة نعوم قعد يفنن ويهندس ويبنى منشأت
 زى على سبيل المثال لا الحصر

مبنى جريدة الاهرام 

سينما على بابا

كنيسة سانت كاترين ف مصر الجديدة
ويقال ان ف عهد السادات طفشوه
طبعا .. أذواق انحطت وشغل غرف وتهليب 
حد زيه هيشتغل ازاى 
الجدع خد ف وشه 
وهج على كندا مهاجراااا 
ومات هناك واندفن 
:(

وانا تقريبا خلصت
اقول الملاحظات بسرعة قبل ما تتهوروا
وترمونا من فوق البرج :))

1) مش مصدقة حاجات كتير ف قصة بدايات 
انشاء البرج  وفلوسه خالص
 لأن المقدمات المتشابهة تؤدى للنتايج المتشابهة
وبتوع مخابرات زمان شبه بتوع دلوقتى
وبالتالى 
فشل وهجص زمان الذى ادى الى الهزيمة
كما يؤدى فشل وهجص دلوقتى
الى ان البلد هتروح ف طوكر 
فأى تعظيم وتفخيم وتهليل
ولا يخش ذمتى بنكلة !!
يعنى جو احنا فشخناهم وضحكنا عليهم 
وعلمنا على قفاهم 
والقصص دى .. مبقتش ابلعها 
ولمبة ف الدماغ تنور وتقولى .. خدى بالك 

2) لكننننننن
لو سلمنا جدلا بالوقايع دا واعتبرناها حقيقة
 الفلوس دى اتقبلت ليه ؟
معلشى مش قادرة استوعبها
واللى فاكرها فكاكة وشطارة وضربة معلم
انا شيفاها مش كدا خالص !!

3) حسن التهامى دا اخر صهللة والنبى
واضح ان بتوع ثورة يوليو والمحسوبين عليها
كان مزاجهم عالى قوى ومروقين القنانى طول الوقت
واللى ف نفسهم بيعملوه 
عشان ميجليهمش ضغط ومرارة وفتاء وكدا 
#بواسيرك_يا_سيد

حد يقولى عيببببببب يا شهر 
ايصحش
دى ناس حاربت مع طه السماحى ومصطفى رفعت
وكمال خلة ف ليالى الحلمية
وعيب تغلطى ف التراث
 اقولكم طيب خلاص عشان خاطركم بس
هسكت
بس فيه ناس كتير عدت علينا ف الحقبة دى 
ومصر مكنتش محتاجلهم يا رأفت خالص الصراحة !

4) التهامى طلع م المنوفية
ريلى ... لأ بجد 
شوفولنا حل الله يكرمكو
 ف ام المحافظة دى .. مبهزرش !

5) الحاج حسن قال ان عد المليون لقاهم ناقصين
25 دولار 
طب انا دلوقتى عاوزة اعرف
ليه متشكلتش لجنة تقصى حقائق
لمعرفة مصير المبلغ ..؟
يعنى ازاى نقبل رشوة .... ناقصة
مش أصول
 محدش شايف شغله
هوه احنا انهزمنا من شوية ...  !

6) تصرفات رجال عبناصر بيفكرنى
بحوار ان المؤسسة العسكرية عارفة بتعمل ايه
والناس هناك مبتغلطشى الخ
ومحدش استوعب لحد النهاردة ان عدم المحاسبة
هوه اللى وصلنا ل67
وامتى هنتعلم ان مفيش حد فوق المحاسبة

7) الرشوة كانت مليون دولار
 بس محدش قالنا الدولار ساعتها كان يعمل قد ايه
يعنى المليون دول كانوا كام بالمصرى 
عشان نشوف
المخابرات الامريكانية قيمت ذمة عبناصر 
وذمة مصرعموما  بالتالى ف نظرهم كانت 
تعمل كام  .. ؟!!

8) وسؤال للأخوة بتوع الحلال والحرام بالمرة
يقولولنا الفلوس دى رشوة وحرام قول فصل
ولاّ غنيمة من الأعدااااااء وحلالون حلالون حلااااال
ونطلع البرج عاتشى
 ولا كل طلعة هنلم ذنوب ؟!!
#الفضول يقتلونى

9) بعد فيلم موعد فى البرج 
و فجر يوم جديد
واخر الرجال المحترمين مبقاش حد
بيجيب البرج ف السيما #تقريبا

وانا بهذه الموناسبة بقترح ع السبكى يعمل فيلم
من وحى كينج كونج ويجيبه مصر
ويطلعه فوق برج الكاهرة
 ويخلوا البطلة غادة عبرازق

هيعمل شغل عالى ومش بعيد يجيب ايرادات
 تخلى الست ناعومى تعتزل التمثيل 
والسينما الامريكانى تبطل خالص 

 
اخيرااااا

الكتاب ... المصدر الأساسى للقصة 

و القفوا اللينك
موقع برج القاهرة ع الفيس

دا موقع عن نعوم شبيب مهندس برج القاهرة
 اللى مخدش ولا مليم 
وعمله على أكمل واجمل وجه 
واللى كله كوم 
وحوار زهرة اللوتس دا كوم لوحده .. !

اسماعيل ياسين ف البرج 

طابع عيد ميلاد البرج الخمسين 
كعادة زمن مبارك القبيح 
الطابع مفيهوش أى ابتكار ولا ذوق 

والصور طبعا 
وباقى المعلومات من المواقع 
واعذرونا يا ولاد لو فيه اخطاء
 قولنا شهرزاد مش الجبرتى ولا المقريزى
 فتيكت ايزى يا عزيزى
 :)

وتوتة توتة تصبحوا على ألف خير



---------------------------


 ʎqɐɹɥƃɐɯ-lɐ ɯɐɥʇʎɐɥ @H_Almaghraby 
طيب عرفنا غادة عبد الرزاق في دور كينج كونج
 مين بقي الممثلة اللي هتطلع قدامها 
:)

 Lobna @lobna__
نسيتى أريد خلعا 😄

Moussa @moussiav 
 ٥٠ او ٨٠ قرش لحد الستينات

1 Azza Hussein @AzzaHusseinT 
 دايماً كاسفنا قدام العالم مفيش ذوق خالص




 DecHeba @HappyGeddan
دلوقتي بقة فية ترترررر


مصري كريم العنصرين @mohamed59681442 
بالاضافة الي شئ اخر ... 
انه تم استخدام هذا الارتفاع من قبل المخابرات 
في وضع ايريال لاجهزة الاتصال اللاسلكية اعلي البرج


 Hany Salama @hnsalama 
 اﻷسبوع اللي فات :)

 d5a5ni @A_eldakhakhny 
 لأ انتى كنتى ماشية تمام 
انما 100متر دى كبيرة اوى
 :D



Yasser ʿAbd Allāh @Yasserigo
 فين كنيسة سانت كاترين في مصر الجديدة؟ 

 Yasser ʿAbd Allāh @Yasserigo 
 دي في تريومف ورا مسجد الإمام علي،

 وجنبها نادي الغابة بس مش عارف اسم سانت كاترين

Ahmed @bahgaga99 
مابين صلاح الدين والكوربة