وردة وبليغ وحبك جننا يا اسمك إيه

عشان حكاية النهاردة طويلة

ومينفعش اختصرها فمعلش اتحملوا 

 لأنها عن اتنين من احب الناس على قلبى

 واعتقد على قلوب كتير منكم كمان 

 ♫ ♪ وبحبك قوى يا عيونى بحبك مهما لامونى  ♫ ♪

هنا

حكاية النهاردة عن اتنين مجانين جمعهم الشغف

 اللى بين راجل وست

وجمعهم كمان حب المزيكا والبهجة

 عن وردة وبليغ .. نتحدث 

ف باريس

 بلد النور والنار والغناء والبهجات كلها

 ف اواخر شهر 7 سنة 1939 هتنولد الست وردة

 من أب جزائرى وام لبنانية

اسمها الحقيقى هوه نفسه اسمها الاصلى

 وردة فتوكى
والشهرة بعد كدا .. وردة الجزائرية

والأب مهاجر جزايرى عاش ف فرنسا

 مع مراته واولاده الأربعة اللى كانت وردة أصغرهم

الحاج فتوكى كان عنده ملهى ليلى ف باريس

 جنب الأكلات الشرقية بيقدم طرب

 والظاهر كان راجل شاطر

عرف يعمل لنفسه سمعة كويسة لدرجة انه

ناس كبار قوى كانوا بيسهروا عنده

 على سبيل المثال وليس الحصر .. الملك فاروق سخصيا

 ويوسف وهبى وناس كتير 

وكان المطربين الكبار بيغنوا عنده

ويحضروا سهرات الملهى

وردة الطفلة الصغننة اللى كانت بتعشق الغنا

كانت بتروح توقف معاهم وتقلدهم

وغنت مع فريد الاطرش اغنية يا جميل يا جميل 

صوتها وادائها بهر الحاضرين لدرجة خلت باباها

 يخصصلها فقرة على سبيل التفاريح كدا

لحد ما ف ليلة اتمسك الاب بتهمة اخفاء اسلحة ف ملهاه .. !

- الاسلحة دى بتاعت مقاومين من بلدك

- ولا اعرف عنها حاجة

- هتقول بالذوق

- معرفش حاجة

 - خلاص .. فسحوه 

وبس يا مؤمن الراجل اتمرمط حرفيا

وخرج من الأزمة دى منهار

والام جالها سكر ورقدت ف السرير بتعانى

 وقتها وردة لاول مرة تتخلى عن الدلع والطفولة

وتبقى مسئولة وتحترف الغناء 

عشان الأسرة راس مالها ميضعش 

ومورد رزقها ميتهددش بالقفل والأفلاس  

كانت بتتعرض لمضايقات ورخامة

واخواتها الولاد كانوا محاوطينها عشان ميجرلهاش حاجة

وكبرت وردة ف الجو دا

بتقول ف حوار انها كانت زى الشاويش

ناشفة مع أى حد يقربلها عشان تحافظ على نفسها

 لحد ما قررت الام ترجع على لبنان بلدها الأصلى 

وطبعا الأسرة كلها رجعت سوا

 وف لبنان اشتغلت وردة ف ملهى شهير اسمه طانيوس

وبقالها معجبين وسميعة ليلاتى 

ونسيبها وننزل مصر 

تحديدا على حى شبرا المجدع حيث يسكن

 الدكتور سعد الدين حمدى احد اساتذة الفيزياء

 بجامعة فؤاد الاول - جامعة القاهرة الآن

 واسرته المكونة من زوجة و4 أبناء

3 اولاد وبنت

الدكتور سعد كان زيه زى كل الناس

 ف طبقته الاجتماعية والعلمية وقتها

 كان راجل كومل واخلاق

 والثقافة ف بيته بزيادة عن أى بيت عادى

وكانت المزيكا احدى اشكال هذه الثقافة

 ومراته كانت بتعزف ودارسة للموسيقى

 وعندهم بيانو ف الصالون

مش بيفرشوا عليه ويتغدوا لأ بيعزفوا يا عيال !

ف وسط العيلة الحلوة دى هيتولد بليغ

 ويبقى التالت ف الترتيب بعد اخ واخت .. ثم اخ بعده

 وخلاص كدا تمشى الحياة حلوة ولطيفة 

وبليغ هيحب المزيكا

ويلزق لمامته وهيا بتعزف

 ويبقى عاوز يتعلم ويخلوه يدرس موسيقى ف الاجازة

وف سن الـ 12 أبو بليغ هيتعب

وصحته تتطور للأسوأ ويموت بعد شوية صغيرة

الاخ الاكبر والبكرى .. مرسى سعد الدين

هيرجع عشان يتحمل المسئولية مع أمه

ويكبر الأخوات ف هدوء

 ومن غير مشاكل لحد ما يقرر بليغ يخش الحقوق !!

آه والنيعمة زمبقولكم كدا

 تخيلوا ان بليغ حمدى دخل كلية الحقوق

 وقعد فيها لحد سنة تالتة يا ثاااااااامح ومقلش أى .. !! 

ف نفس الوقت اللى كان بيعزف مزيكا ويلحن

 وهوه ف الكلية وحفلاتها

بس مقدرش يتحمل اكتر من كدا

 وقرر يحترف الموسيقى وساب الحقوق تماماااا

أه  .. اهو كدا بقى منطقى جدا ... 

وقدم الشاب  ف معهد الموسيقى العربية

 وكمل هناك المشوار ومنه للاذاعة

 وتلحين الاسكتشات ف ساعة لقلبك وغيرها

 ودخل ف جو تانى خالص غير التقليدى بتاع عيلته

وحسب روايات الاخ الأكبر د.مرسى

 ان العيلة معملتش هوليلة ان بليغ اختار السكة دى

لأنه من صغره لما كانوا بيسالوه 

كان بيقول عاوز اطلع مزيكاتى !

ومشى بليغ ف الطريق على خطى سريعة

 وبيقولوا لحن للست فايدة كامل وغنوته سمعّت قوى

وبيقولوا كمان انه قابل محمد فوزى حبيبى 

ولنا .. هنا .. وقفة

عشان بس الناس اللى وشها سمح دى

 ربنا بيخيلها كدا مش من فراغ

 فوزى اتحمس جدا لبليغ لما سمع الحانه

 واتعاقد معاه كمان ف شركة اسطواناته الشهيرة

مش كدا بس دا كمان لما بليغ يلحن لعبد الحليم اغنية تخونوه

 ف فيلم الوسادة الخالية

 فوزى هياخده بعدين من ايده يوديه لأم كلثوم

 كدا حتة واحدة

والقصة حصلت تحديدا سنة 1960

لما يلحن بليغ لأم كلثوم اغنية .. حب إيه

 بعد ما تسمع منه اول كوبليه لحنه

 وهوه مربع ع الارض فتنزل تربع جنبه وتتسلطن

وتتفق معاه يكملها لأخرها 

ساعتها ثومة عرفت انها قصاد موهبة مش عادية

 كان عنده 27 سنة

ونافس وقتها اعتى الفنانين واكبرهم

وبعد الغنوة دى عملت معاه اجمل الاغانى

وبقاله اسم وابتدى مشواره تألقه مع عبدالحليم حافظ

 اللى كان مؤمن بيه 
ومتشعلق ف موهبته بشكل كبير

 وعملوا سوا أحلى الأغانى 

ونسيب بليغ ونرجع لوردة 

وردة كانت كبرت واحلوت وصوتها بقى اكثر لمعانا

 وصقلا وشطارة وخبرة وكله

جالها عروض بنزول القاهرة والغناء فيها 

نزلت وردة مصر .. وعبوهاب كان متحمسلها

لأنه سمعها قبل كدا ف باريس ف احدى سفرياته

وبيقولوا بيقولوا ان عبناصر سخصيا

ماله يا شوشو ؟؟

 بيقولوا انه اتحمسلها لدرجة انه طلب يتعملها كوبلية

 ف الأوبريت بتاع الوطن الأكبر

تحية للجزاير وكدا 

وفعلا غنت وردة 
ف عز ما الثورة مشتعلة ف بلدها

 والناس عرفتها اكتر

 وانهالت عليها الحفلات والعروض والسفريات

 والاخرانية دى اه يانى منها تحديدا

ليه ؟

 عشان يقال والعهدة برضو ع الراوى ان وردة

ف احدى سفرياتها لسوريا أيام الوحدة مع مصر

 كانت بتغنى هناك واتعطلت عربيتها ع الطريق

 وقفلها ناس

مكنوش ناس عادية كانوا ناس ذوى حيثية

 واكتشفت بعد ما ركبت ان العربية دى

بتاعت المشير عبحكيم عامر

 المهم وصلوها بسلام

والست وردة حبت ترد التحية والشكر

لسعادت الموشيه بنفسها وراحتله الاستراحة

 والإشاعات اتنتورت ان فيه علاقة ما بينهم !

ولاد الحلال قالوا كان فيه علاقة

وناس تانية قالت لأ محصلشى وان وردة كبرتها

وحبت تستغل الاشاعة دى عشان تعمل لنفسها وجود

ونفوذ ف الوسط الغنائى ومحدش يأذيها ..

كله كلام ومحدش مسك حاجة ملموسة لا عليها

لا ع الموشيه عبحكيم

 مع انه واضح انه كانت عينه زايغة الراجل دا فعلا

المهم ان الكلام وصل لجمال عبدالناصر

وبعد ما كان راضى عنها

 وموصى عليها ف الأوبرييييت

اصدر امر شفوى بترحيلها ومتقعدشى

قالك عشان بتغلوش على الجيش

 واكبر راس فيه ومستقبل الوطن وتحيا مصر وكدا 

كان غلبان والنبى ومكنش عارف بقى

ان هتطلعله واحدة تانية .. هيا برلنتى عبحميد

المهم ان وردة خدت ف وشها 

ورجعت الجزاير مع اخواتها الولاد 

وشكرا لحد كدا 

ف هذا التوقيت كانت الجزاير استقلت

سنة 1962 الكلام دا

 وكانت اول مرة وردة تدوس برجلها على ارض الوطن

 اللى شايلة جنسيته وعمرها ما شافته !!

ولحد الموجة ما تهدى عليها شوية واسرتها

كانوا خايفين عليها م الشوشرة وعشان سمعتها

صعايدة شكلهم ولا ايه

 :)

 المهم هتفضل شوية لحد ما يجيلها عرض 

العرض المرة دى من احد المنتجين الكبار

 اللى قرر يعمل قصة حياة ألمظ وعبده الحامولى

 وهوه والمخرج اختاروا وردة لدور أست ألمظ

ف هذا التوقيت كان بليغ حمدى عمله اسم وجو

 ف الوسط الغنائى وعشان النصيب بقى

كلفوه يلحن غنوة ف فيلم ألمظ

بتاعت ..  يا نخلتين ف العلالى 

ودى كانت اول مرة بليغ ووردة يتقابلوا ف الواقع

لكن قبل كدا

 كان هوه بيسمع اغانيها ويشوف صورها وبس

وهيا تسمع الحانه وتشوف صوره وبس

♫ ♪  روحى وروحك حبايب 
من قبل دا العالم والله ♫ ♪  

 
وردة قالت ف حوار ليها انها لما سمعت غنوة تخونوه

 لأول مرة ف السينما مبطلتش تدندنها

واتمنت تعرف اللى ملحنها وتتجوزه يوما ما 

تخيلوا !! 

وسبحان الله

 الاتنين اتقابلوا والأعجاب كان متبادل

 بس بليغ واللى كان مشهور بعلاقاته وغرامياته

وصولاته وجولاته معرفش يستفرد بالبنية خالص

ليه يا شهروزة ؟

 قالك عشان البت اخواتها الرجالة

مكنوش بيسيبوها ابضنننن مع أى حد

 ولازم يقعدوا معاهم حماية ليها من اى وغدنة وكدا

وتصوروا مع سمعة بليغ اللى سبقاه ..

كانوا مش بس هيقعدوا 

دول هيقعدوا ويجيبوا ناس يقعدوا .. !

وبعدين هنعرف من وردة ان الموضوع

اتاريه كانله له اصل وسبب .. اكبر من بليغ 

واخطر من أى حاجة

 لأن بعد ما اتعرض الفيلم ووردة حبها الناس اكتر

 اتفاجئت بمكالمة من حد

 ف مكتب صلاح نصر سخصيا

وطبعا انتوا عارفين الراجل ... كان عاوزها ليه .. ؟

 عشان تمضيله على اتوجراف

 للمدام والاولاد ف البيت طشبعن

دماغكوا راحت فيييين يا غجر !!

بس بقى واول ما إتنطق الاسم 
وردة واخواتها والعيلة

 خدت ف وشها وطفشت على الجزاير

وقالوا نقعد هناك ارحملنا

 ومش عاوزين غنا ولا نيلة

وملناش دعوة بمصر والعالم اللى هناك دول

صلاح نصر كان مطفش نص البلد على لبنان وغيرها

 جت على وردة يعنى

 المهم راحت بلدها وقعدت شوية

بليغ بقى .. هل بت ما هيقعد ساكت كدا ؟!!

 ابضننننن
 الراجل الصراحة كان بيحب على روحه

 ومبيزعلش نفسه 

اخوه بيقول انه اتجوز بنت عجبته بسرعة 

بسرعة يعنى شافها حبها راح لأهلها

وف نفس ليلة ما اتقدملها بعتوا صحوا المأذون

 وكتب كتابه وروحوا ع البيت !!! 

كانت اسمها أمينة

العروسة يعنى

وطبعا كانت جوازة هوائية وسربعة ف سربعة

وبعد شوية بسيطة الجدع زهق وطلقها

 وبيقولوا البنت ماتت من الزعل بعد الطلاق بشوية 

 :((

ساعتها هوه استوعب انه ملوش ف جواز واستقرار

وقرر يقضيها صعلكة

ويركز ف التلحين

 

وف هذوها الأثناء كان نجمه طالع

 وعامل شغل عالى مع عبدالحليم وشادية 
وفايزة أحمد ومحمد رشدى وغيرهم 

 وكما النار ف الهشيم ف الأذاعة والأفلام 

 ومبيبطلش يحب كل ما تيجى فرصة ...  !

من ضمن غرامياته كانت سامية جمال

اخو بليغ اللى بيقول 
بيحكى انه خده معاه وراحوا طلبوا ايدها

سامية سألته عاوز تتجوزنى ليه؟

قالها عشان الحب

ردت عليه "حب إيه اللى انتا جاى تقول عليه"

وضحكت

 :)

 #سمسم_بتقلش

كانت الغنوة مكسرة الدنيا ساعتها

 وقالتله طيب نشوف واتفقوا 

وبعد ايام فسخت الاتفاق والخطوبة

 لما عرفت انه مش جد وانه بيبعد عن كل واحدة تعرفه

 وتتعلق بيه ويعذبها 

وبعدها بشوية فاز بيها رشدى اباظة 

زى ما كلنا عارفين .. والله يا واد وعرفت تنقى 

والله يا واد خدت الأمورة 

وعلى جنب .. 
بليغ كان عنده نظر وبيفهم ف الحريم والله

 صحيح كانت اكبر منه

وكانت اكبر من رشدى اباظة كمان بكام سنة 

بس البت غزال

 سامية جمال دى موزة السنين

القصد .. الأخ بليغ قعد يحب ويسيب

 ويحب ويتساب ووردة ف باله

اما وردة نفسها فأهلها ف الجزاير

 دبسوها ف جوازة تقليدية سخيفة كدا .. ملهاش طعم

العريس كان ضابط وبعد استقلال الجزاير

 اخد منصب ف الحكومة وبقى وكيل وزارة الأقتصاد

كان اتقدملها زمان وابوها وافق  

كان عارف الأسرة  من ايام باريس

 والمقاومة والقصص دى وطلبها للجواز

 لكن هيا كانت متشعلقة بالغنا ونزول مصر

 والموضوع اتفشكل

 وبرجوعها اتجدد الطلب تانى

واتجوزت وردة الاخ جمال قصيرى

واشترط عليها مفيش غنا وتبقى زوجة وام وبس

وافقت ورضيت وسكتت وعاشت 

 وخلفت ولد وبنت 

رياض ... اللى سمته على اسم رياض السنباطى

 اللى كانت بتحب الحانه جدا وتعشقه

والبنت سمتها وداد

واستمرت الحياة بينها وبين جوزها بين شد وجذب

وممنوع الغنا .. ليه ؟

عشان البيه رجل من رجال الدولة وميصحش

وعدت سنيييين وهيا راضية وساكتة

 لحد ما جينا سنة 1972

 والجزاير بتحتفل ب10 سنين ع الأستقلال

وساعتها الرئيس هوارى بومدين

وكان من عشاق صوت وردة

 اللى اتحشر ف الحكاية وقال لوردة لازم ترجعى تغنى

والاحتفال دا احسن توقيت

قوم  جوزها اتزربن !!

وهوارى صمم واقنعه 
أو بمعنى ادق .. زنقه

 واجبره بالذوق والادب وقاله دى مناسبة وطنية 

وقالهم بعد الأحتفال هنشوف هينفع تكملوا كدا

 ولاّ وردة تبطل غنا تانى ... !

الراجل الصراحة بحركة صياعة وادب

واحب اتشكرله لأنه خدمنا خدمة العمر

ورجع وردة مش بس للغنا

رجعها للدنيا الحلوة كلها وللحب وللبهجة

رجعها لنفسها

لأن ف التوقيت دا وف اطار الاستعدادت للحفلات

 بعتوا لرياض السنباطى ييجى

ويشارك بالحان ف الليلة المبهوقة دى

فإعتذرلهم بشياكة 

وقالهم هبعتلكم حد على ضمانتى 

حد مش عادى حد موهوب

 وكلنا ف مصر ف الوسط الغنائى بنعتبره

 سيد درويش تانى

هوه بليغ حمدى 

وسافر بيبو على الجزاير ف المهمة الوطنية اياها

وهناك هيتقابلو العصفورين للمرة التانية

 والحنين هيتحرك ف قلبهم لبعض

وهيتحرك اكتر ف قلب وردة

 اللى هتتمرد ع الوضع الحالى

وبعد انتهاء المناسبة  هتقول عاوزة ارجع للغنا علطول

جوزها هيرفض

وهيتفقوا الا يتفقوا وينفصلوا عن بعض بشياكة

وتلم وردة عزالها وترجع على مصر

وتتردلها روحها .. وروح قلبها 

الكلام دى سنة كام يا شهروزة ؟

 1972 

وبعد وصول وردة لمصر

 هتبدأ تشتغل وتقابل بليغ كتير

ولهاليب الغراااام تقيد ف جتتهم هما الجوز

 والموضوع يوسع

وقتها بليغ كان ف عز لمعانه وتوهجه

 وشغال تلحين لأم كلثوم وعبحليم

والمشاعر مشتعلة لدرجة انه ام كلثوم ف يوم قفشته

 وقالتله انتا عاملنى كوبرى ومرسال غرام

عشان كان بيلحن الكلمات 
ويوصلولها ان الكلام إلك يا وردة

كانوا بيحبوا بعض

 وقصتهم عمالة تتطور

ولنا ... هنا .... وقفةةةةةةةة 

الا كل الناس وقتها كانت عارفة بليغ

وهارشة طباعه اللى زى النيلة

من جهة انه  كان حبيّب أه حبّيب مأ انكرناشى

بس كان مزاجى بدرجة رهيبة

وكما وصفته وردة ف حوار .. كان بوهيمى 

وفوضوى ومع نفسه وكدا

يعنى انا عيسوى العيسوى فنان بوهيمى

افعل ما يحلو لى وقت ما يحلو لى ومحدش يحاسبنى

 قوم ايه كان سعادته كان بيخش ف علاقات جانبية

اثناء علاقته بوردة

اللى  كانت عارفة انه مهروش ودماغه لاسعة

 بس الحب بقى وأمره وسلطانه 
طبعا كانت عاوزة الجواز

 وملهاش ف أى علاقات هوائية

 المهممم

بطولة البال اللى تهد الجبال فضلت وردة صابرةعليه

 لحد ما اتحدد معاد الخطوبة

 وبيدوروا عليه ليلتها لقوه مسافر 

وف لبنان بيخلص شغل

اتارى الباشا نسى !!

نسى بجد مش قاصد وطبعا كان يوم فحلوقى

 ولما رجع كانت قفشت

 حاول يصالحها وطبعا نجح بعد شوية

وبلفها واكل عقلها وقلبها بكلمتين واتخطبوا

 وثوانى بقى

عشان هما اتخطبوا قبل انا ما اتولد

ولو كانت وردة سألتنى ساعتها

كنت هلخصلها القصة دى ف جملة واحدة واقولها

 ان بليغ حمدى برج الميزان

#نقطة

يعنى ايه ؟

 يعنى لامؤاخذة مجنون وعاقل قوى 

 وذكى لماح وغبى جدا 

 وطيب ورقيق وعنيف وفيه قسوة رهيبة

 ومتهور وفوضوى لكن دقيق ونمكى بغباء

هليلهى ومبيعديش غلطة 
بالمختصر مخلوق عجيب 

وفيه كل التناقضات

 وحبيه زى ماهوه كدا واما تخديه بعبله 
واستحملى البلااااء

ياإما تمشى وتنفضى 

وتشوفى حالك يا بنت الحلال 

المشكلة الحقيقية انى كنت هنصحها 

وانا عارفة ان النصيحة ف الهواء 

لأن رغم كل العيوب الا ان 

 ان برج الميزان هيكسب 
لأنه بيتحب رغم كل ما فيه ومهما عمل

عشان كدا وردة هتكمل وهتحبه اكتر 

وتفضل عندها امل ف حكايتهم ويتصالحوا

وف ليلة مش مترتبة ولا بمعاد واتفاق

 كان احمد فؤاد حسن عامل حفلة ف بيته 
وبيجوز نجوى فؤاد لمصمم الرقصات كما نعيم

وعاملين عزومة وهيصة ووردة وبليغ حاضرين

فجأة طقت ف نافوخ الميزانى حبيبنا

 وقال لوردة المأذون اهو تعالى نتجوز !

 تفتكروا هتقوله ايه غير أيوه ..

وافقت طبعا دى ما صدقت يا ليهوى !

والمأذون اللى جوز نجوى ونعيم
 جوّز وردة وبليغ بعدهم

 ف وسط اندهاشة الحاضرين كلهم وفرحتهم

وتوجسهم كمان ... وعندهم حق !

ما هم عارفين اللى فيها وان بليغ هوائى ومهروش

 ومش بتاع استقرار وهيجنن وردة

خصوصا انها سرطانية 

وست السرطان دى يعنى 

الأنوثة آه 

والدلال والشطارة 

لكن نص غيرة الكون بتجتمع فيها 

يعنى الحب بالهبل صحيح هتغرقك حب

 بس مطلوب يترد ع الحب دا مش يتطنش

 يعنى ليالى سهر وقلق عليك واهتمام 

بس برضو نار بتولع لو بصيت لغيرها 

 او حست انه فيه واحدة تانية ف حياتك غيرها 

 قصص كدا هندى كلها دراما 

المهم ان الأتنين اتجوزوا اخيرااااا 

اتلم شملهم على بعض 

 وغرقوا ف العسل شوية حلوين

 وعملوا ثنائى ف الغنا ناجح ومتألق

 الحب كان قبل الموهبة سبب ف نجاحه 

وتميزه وخلالهم بصمة لوحدهم 

ماركة مسجلة اسمها بليغ ووردة 

مش هقعد أرصلكم ف اغانى

 انتوا اكيد عارفين كتير منها وبتحبوها وتحسوها

 وتقدروها وكأنها منسوجة من خيط محبة وخيط موهبة 

حكايتهم كانت مبهجة بكل تفاصيلها

 صاخبة بكل لحظاتها

 وموثقة بكل غنوة وفتة وصورة 
 وكأنهم اتخلقوا عشان يولفوا على بعض

 حياتيا وفنيا وميبقوش شبه حد 

ولا حد شبههم 
هما لوحدهم حالة 
تؤام روح زى باقى حكايات الحب عند شهرزاد 

هيا كانت بتعشقه وبتقدر موهبته
 وبتدوب ف كل تفاصيله
 وهوه كان بيحبها وبيغير عليها
 ولما عملت فيلم حكايتى مع الزمان 
رفض انها تتباس ف مشهد
 :)

وكان عنده حنين يكون أب
 بس وردة اتعرضت للإجهاض كذا مرة
والخبثاء بيقولوا انها تعمدت هذا
 آل عشان طباع بليغ الصعبة #عبث

والست طلعت بنفسها تنفى ذلك
 وتقول بمنتهى البساطة
 فيه ست ف الدنيا ممكن ترفض تخلف طفل
 من الراجل اللى بتحبه ؟!
 #ازاى 

وف تدوينة عذبة .. هنا 
 قريت ملحوظة ذكية
عن مشهد لوردة ف احدى حفلاتها
 وازاى وقفت غنوتها وراحت تبوس بليغ

وبتقول ان كان بقالها شهر ما شافتوش ووحشها
 لفت نتباهى ازاى باسته وازاى كمان هوه حضنها
 كدا ع المسرح 
:)
#هاحيييييح

واضح انه كان حنين ورقيق مختلفناش
 لكن الحلو ميكملشى والحنية دى مش هتبقالها لوحده
 وهيفضل يجننها بعلاقاته
والغيرة تشعلل اكتر 





الظاهر الأخ بليغ كان من الفنانين بتوع الألهام 
العالم بتاعت الهام دول بتبقى متصورة 
 انها لازم تحب مع كل لوحة او قصيدة او غنوة 
عشان الوحى ييجى ويعرفوا يبدعوا .. 
احتمال 
دا تحليلى للقضية الحقيقة .. 
جنب انه ميزان طبعا ودى طبعا مأساة ف حد ذاتها
لو كنتم تعلمون ماذا أقصد  

المهم ان الجدع كان  متألق فنياً وبيلحن للكل
 وزى الفل
  يلحن لمطربين ماشى
 الستات بقى كانوا المشكلة وسبب القلق الدائم

مش كلهم هيقعوا ف غرامه ولا يشاغلوه طبعا
ولا هوه كمان يشاغلهم وينجرف
لكن من وسط الاسماء فيه نفراية هتقرفنا ف عيشتنا
 وتبقى سبب ف الخلاف الكبير

والحقيقة المطربة دى اصلا من اول ما نزلت مصر
 وهيا عاملة مشاكل حتى مرات عبوهاب
 كانت بتعزها وبتحبها آآآآآآوى لدرجة 
انها كانت عاوزة ترحلها برا حدود البلاد 
وفيه اشاعات بتقول انه حصل فعلا لفترة ما !

القصد .. ف هذوها الاثناء وردة ابتدت تشتغل
من الحان ناس تانية
طبعا عبدالوهاب كان الأسطى

 والخبثاء تاااانى بيقولوا ان دا سبب مشكلة لبليغ !

ليه يا ولاد ؟
 قالك عشان عبوهاب كان مبيحبوش بسبب المنافسة
 وبسبب حاجة كمان اول مرة اعرفه
ان بليغ اتقدم لبنت عبدالوهاب وطلب ايدها
 واترفض والبنت اكتئبت وتعبت وحاجات كدا .. !

ومعرفش انا صحة الحكاية دى
 بس القصد ان وردة كانت عارفة القصة
وعارفة التوتر اللى بينهم وبيتدارى بالدبلوماسية
 ومع ذلك

اشتغلت معاه وبليغ متكلمش بس حصل بينهم فتور
وملل 

ونعالج الملل بإيه يا ولاد
هل بت ما  نلعب رياضة
 نسافر
نخش سينما 
نقزقز لب  
ناكل شكولاتة
 ايه ؟
 نعمل علاقة بقى ونحب
#اومال

ف الوقت اللى كان شغل بليغ حمدى مع ميادة الحناوى
 مشعلل قلب وردة غيرة
وخلى عينيها ف قلب راسها 
قوم اييييه 

 دخلت سميرة سعيد
 المطربة الصاعدة ع الخط
 وهاصت بقى
اخو بليغ بيقول ان كان فيه علاقة حب بينهم فعلا
وبليغ حبها فعلا 
وكاد يرتبط بيها بعد طلاقه من وردة
بس الموضوع اتفشكل برضو ... !

لكن سميرة انكرت اى علاقة 
وردة نفسها كمان قالت سميرة ش سبب طلاقى 
ولمحت بصنعة لطافة ان ميادة السبب 
والخناقة بدأت بغنوة .. مش عوايدك 
وبعدها ابتدى العد التنازلى ف علاقتهم ....

والصراحة الله يكون ف عون وردة
 هتلاقيها من مين ولاّ من مين ؟!!
 المشاكل بدأت تزيد وتتصاعد
 والست السرطان لما بتزعل اوعى وشك
 واتدارى ف أى ركن يا بنى أحسنلك 

راخر الباشا بتاعنا ميزان ولا بيهمه
ويشوف هوه مفروض عليه ايه 
وما هو التصرف المطلوب فيروح  ... 
 عامل العكس طوالى
غتاتة كدا 
وبغض النظر عن العواقب 
واياكش تولع !! 

برنس الليالى داس بنزين ف الشغل والعلاقات
 زائد اهماله لمشاعر وردة اللى كانت بتغلى
 كل ما يجيلها خبر كدا ولا كدا
 زائد  برضو ان فيه ناس فرّاسة
 كانت متعمدة الاذى وبتوصلها الاخبار
عشان يهدوا العش الجميل والشراكة الاجمل 

وردة كانت بتفوت كتير عشان الحب اللى بينهم
 وهوه يحاول يصالحها وينجح ويفشل
 وتتكرر الحكاية كل شوية مع واحدة جديدة
لحد ما دخلت وردة تعمل عملية

بس قبل العملية كان بليغ مسافر 

كان بيسجل حلقات ف احدى دول الخليج
 وبقية الوقت بيقضيه سهرات وحفلات ولقاءات
 ومطربات ودلع والذى منه
الجدع سجل حلقة مع ليلى مراد 
وبعدين سهر مع فنانة مقالوش هيا مين دى 
ولما وردة كلمته تجاهل يجيب السيرة خالص 
لكن وردة عرفت من طريق تانى 
والنار ولعت اكتر واكتر 

كلمته عن طريق وسيط وفهمته
 انها مش هتقبل التصرفات دى وكرامتها والكلام دا
 حاول ينكر ويخبى ان فيه علاقة بأى واحدة
لكن على مين .. انكشفت يا باشا

وردة حالتها ساءت ودخلت تعمل الزايدة
 وف عز ضعفها استنت ييجى ويعتذر كالعادة
 لكن بليغ عمل العكس
وخاف من الملامة 

وزى أى ميزانى أصيييييل 
 بيستعيل وقت المحاسبة 
ويطفش
 يمكن اللى قصاده ينسى
 راح الباشا على بيت اخته أول ما نزل مصر
 ومروحش على عش الزوجية

خاف لينضرب بقى  
:)

 وبس يا مؤمن 
بدل ما يستذوق ويجيب بوكيه ورد
ويروح المستشفى يزورها ويصالحها 
اهى مراته برضو وخليه هوه الكبير .. 
الأخ اختفى تماماااااا




♫ ♪ وجرحتنى
 من بعد كل الحب دا 
وهجرتنى 
وكان العشم فيك غير كدا ♫ ♪ 

بعد يومين وردة شافت صورته على غلاف مجلة
مع مطربة بيحتفل بعيد ميلادها

وكانت اللحظة دى هيا الفاصلة 
وبعدها  وردة أصرت ع الطلاق رغم تمسك بليغ بيها
 واللى هوه فوتيلى
منتى بقالك سنين كدا ايه اللى جد .. ؟!!

لكن كان وقت التفويت .. فات
واصرت وردة ع الانفصال
تعبت ومبقتش متحملة 
مين يقدر اصلا يحب وميغرش على حبيبه 
ويتحمل يشوفه مع غيره ... مين ؟!!!
واتطلقوا ف 1979 بعد ست سنين نجاح فنى
 وقصة حب مش عادية
 ولا بتتكررشى
وسط صدمة من كل الناس اللى بيحبوهم 
وتصوروا ان وردة عرفت تروض بليغ 
وهيكملوا لآخر العمر .. 
لكن محصلش 

وردة وبليغ بعد الطلاق ... استمروا ف المسيرة الفنية
 بليغ لحنلها بس مش بنفس الكترة 
والقوة زى الأول
وهيا كمان حظها وقعها ف غنوة لسيد مكاوى

كان عاملها لام كلثوم وماتت قبل ما تغنيها
اوقاتى بتحلو
 اخدتها وردة وداست بنزين مع باقى الملحنين
 ونجحت معاهم وبيهم

كانت فترة نشاط للأتنين سوا وبعيد عن بعض
 ف السينما والمسرح والإذاعة

وبليغ استمر ف حياته ونظامها الملعبك  

وجنب الاغنيات والأفلام والمسرحيات والمسلسلات
كان فيه استمرار ف السفريات والسهرات
 والحفلات والموززات
 ولحد سنة 1984

وانا فاكرة الحكاية دى كويس جداااا
 لأنى كنت على عتبة المراهقة
 والمجلات كانت عاملة اياميها 
عرض حى ناهش للأعراض والأخلاق لا يوصف
بكم ومدى بشاعته

فاكرة جدااا

لما خرجت مانشتيات بفضيحة وجريمة قتل
 ف شقة الملحن بليغ حمدى
 وازاى ان البيت كان ماخور وبنت انقتلت او انتحرت
 وانها كانت حامل وبليغ السبب
 وقصص كدا

والموضوع كان باختصار ان بليغ
كان عامل  سهرة ف بيته كالعادة وما اكتر سهراته
 وكان مرهق ودخل ينام وساب ضيوفه ف البيت
 بعد شوية بيصحوه
 فيه مصيبة حصلت

احدى المطربات الصاعدات من المغرب
 واسمها سميرة مليان كانت موجودة ف السهرة دى
 ولقوا جثتها عارية ف جنينة البيت
 وانها انتحرت او اترمت
 منعرفش

البواب لقى الجثة مرمية كلم البوليس وجم
وبقت فضيحة
 والمجلات جرست بليغ ومسحت بيه الأسفلت 
 رغم ان مكنش حد عارف لسه .. ايه الحقيقة
 قالوا ان البنت كانت حامل منه

وبعد شوية قالوا لأ .. كانت حامل من حد تانى غيره
 وانها انتحرت عشان الفضيحة
 وناس قالت كانت جاية مع ثرى عربى واتخانقوا
 ورمت نفسها م الزعل !
وناس قالت الخمرة لعبت بدماغهم وهزار قلب جد 
البنت اختل توازنها ووقعت 

وناس #وسخة وفاكرهم رسموا كاريكتير
 ان اسمها سميرة مليان (اسمها كدا فعلا)
 وانها كانت فعلا مليان اشارة للحمل
وغير الحمل  
كانت قذارة ما بعدها قذارة الصراحة 



 الملخص بليغ اتدبح وحفّلوا عليه للصبح 

 دا شقته وكر للعربدة والخمور والعهر
دا منحل ومستهتر ومتعود داااايما الخ 
 واخيرا بعد كل هذه المرمطات
النيابة وجهتله تهمة .. تسهيل شقته للدعارة
 ووصله خبر ان فيه ضبط واحضار
 وهيتحبس وبهدلة السنين بقى 

قبل ما يقبضوا عليه كان طفش م البلد وحبايبه هربوه
من ضمن الأسامى دى ... الفنانة  شادية
كانوا عشرة عمر واغانى حلوة ولسه مخلصين سوا 
اغانى مسرحية ريا وسكينة 
واسماء تانية من المشهورين كانوا عارفين انه برىء
 فاستخدموا نفوذهم عشان يجنبوه المرمطة 
لحين اظهار براءته 

اخو بليغ بيقول ان مسئول كبير كان ورا الواقعة دى
بتحريض من احد الاثرياء 
اللى كان متغاظ من بليغ بسبب ست 
كانت بتعشق بليغ ... فحب ينتقم منه 
ويلبسله الجريمة وامعن ف الانتقام 
افلام غريبة كدا 
وكله كووووووم وادعاء احدهم ان عبوهاب 
هوه كان ورا الحكاية كوم تانى 
العالم دى بتتعاطى خراء والله ... !



تحليلك ايه يا شهرزاد ف القضية دى 
انا بقول من منظرها كدا 
والوساخة اللى حصلت وقتها 
دى بصمات موافى ابو شنب سكسكة دا 
مفيش غيره بيعمل الحاجات دى 
وطبعا اكيد كان فيه سبب وهدف 
زى شغل الناس مؤقتا للتغطية على حاجة تانية 
وابتزاز البعض ف وسط المعمعة .. ميضرش
ودهس البعض تحت الأقدام  برضو .. ميضرش

اللى يهمنا ان وردة ف التوقيت دا
راحت مكتب وزير الداخلية
 وهددت ان بليغ لو اتقبض عليه 
هتضرب عن الاكل  لحد ما تموت !

لكن المشكلة اتحلت حزئيا لما بليغ هرب
 واتنقل من مكان لمكان لحد ما استقر ف لندن
 وطبعا السبب معروف اشمعنى لندن 

وللناس اللى هتسأل اشمعنى لندن 
 عشان مفيش اتفاقية تسليم مجرمين متبادلة بينا وبينهم
 اومال اشرف السعد وممدوح بتاع العبارة
 وكل الحرامية بيقعدوا هناك ليه تفتكروا .. ؟

وقعد هناك يا ولاد كام سنة
كان بيموت فيهم
 ومتخيلين الراجل اللى كانت حياته صاخب
ومليانة سهر وناس وبيدوب ف مصر وتفاصيلها
 لما يتغرب عنها !
قعد يتجرع المرارة ... دوبل 

المهممممم
خلاص اطمنا ان بليغ نفد من السنة سجن
 وكان عنده فلوس كفاية تعيشه مستور
 وردة ف القاهرة كانت بتكمل شغلها وبتغنى 
وتمتعنا بصوتها لسه 

بليغ هيقعد ف لندن وطبعا لا سهر ولا ستات
 خلاص بقى بينفخ ف الأيس كريم مش الزبادى بس
 واللى زود الأسى انه تعب وهاجمته امراض ف الكبد

ولما رجع مصر بعد خمس سنين
اخد براءة ف النقض والتهمة انمحت لكن بعد ايه !
بعد ما انكسر 
ومبقاش نافع يرجع زى الاول 

 كان زى ما وصفته وردة مرة ف حوار
"بليغ  رجع نصه"
كان محطم وبائس
 وزى ما يكون روحه انطفت

حاول يرجع للتلحين
 ويشتغل بس فاكرله غنوة
 انا م البلد دىىىىىىىىىى
 كانت غنوة بلاستيك كدا من بتوع الأعلام الموجه 
 حاجة صايصة وأى كلام

وناس حلوة فكرتنى ببوابة الحلوانى 
دى كانت حلوة .. صح 
بس مش حاجات بليغ الحلوة بتاعت زمان 
عشان الزمان مبقاش زى زمان 

كان عامل غنوة لوردة عشان تغنيها 
غنوة ....  بودعك
واللى غنتها فعلا بعد تردد
 واعتقد كلنا عارفينها كأنها بتلخص حكايتهم سوا

والناس افتكرتهم هيرجعوا لبعض .. 
لكن مرجعوش 

♫ ♪ أكدب عليك لو قلت بحبك لسه 
أكدب عليه ♫ ♪
♫ ♪ وأكدب عليك لو قلت نسيتك همسة 
أكدب عليك ♫ ♪

وف سنة 1993 المتنفس موهبة هيزهد ف الدنيا وما فيها
 ويرحل ف هدوء تاركا ميراثه من الغناء
 ويرحل اللى قال عليه عبدالحليم حافظ يوما 
 انه امل الموسيقى ف مصر

وطبعا لا حب ولا اتجوز بعد طلاقه من وردة .. !
 اللى انهارت بعد وفاته
ودخلت المستشفى بعد صدمة عصبية
وحالة حزن على رفيق 6 سنين كانوا بالعمر كله

وردة اختفت شوية كدا ورجعت تانى بلوك جديد
 وبقت اكثرشبابا  وحيوية
 واشتغلت مع جيل مختلف
 وعملت اغانى كنا شباب العشرينات والاصغر 
بنسمعها وتعجبنا
وقلدها بعدين ميادة الحناوى ورشدى وعدوية
وغيرهم 
لما لقوها مخافتش وخاضت المغامرة 
ونجحت تقرب لجيل صغير معرفهاش قوى ف البدايات 

من اول بتونس بيك وحرمت احبك وما بعدهم
 انا تقريبا مفوتش شريط ليها
 كانت اجمل واصغر حتى عن الاول 

 هن كدا نساء السرطان

مبهجات ومتعرفش غير انها تنشر السعادة والفرحة
 بس لو دوستلها على طرف تستاهل
 واوعى القطر يدوسك
 كانت جميلة ف كل احوالها

هيا بتقول .. وردة يعنى
 انها متجوزتش تانى بعد بليغ
 رغم ان مشاعرها تحركت لحد
 لكن رفضت الجواز شكلا ومضمونا
 لأنها فشلت فيه مرتين
 لكننننننن

فيه طراطيش كلام من الأخ مستفيد فورى
 ان وردة اتجوزت الصحفى والناقد الفنى عصام بصيلة
 جوازة ف السوكتيم منعا للمشاكل ف محيط اسرته

والكلام كان ان  عصام كان بيغير من علاقة وردة ببليغ
 ولما غنت بودعك هوه اتزرز
 وحصل خلاف كبير واتطلقوا بعده
 وكدا مستفيد طبعا حاول يعمل شغل ويتصيت

راح داخل عليه ف الخط الملحن الكابيررر كابوسى فقر
 وقال آه صح .. ومكنتش عاوز اقول بس هقول
 وردة اتجوزت بعد بليغ وف السر
 هه 
#قرف_يقرفكوا

الست ف كل حوارتها قالت متجوزتش تانى
 يبقى خلاص اسكتوا 
انتوا ليه طيور جوارح كدا ..!

 المهم وردة اختيارتها مش دايما كانت ناجحة
ف التمثيل اقصد اكتر 
ف السينما عملت فيلم ف التسعينات مكن حلو
وبنفس درجة افلامها القديمة 
 ورغم ان مسلسلها اوراق الورد كان ناجح جدا

جت ف الألفينات 
 وعملت مسلسل حمضان كدا اسمه آن الأوان
 تقريبا محدش شافه الا اللى شغالين فيه وقرايبهم 
يعنى مش مهم فيلم ولا مسلسل 
اغانيها الحلوة ف النهاية هيا الأبقى 

وردة اتعرضت لأزمة صحية
 كادت تودى بحياتها بسبب مشاكل ف الكبد
 برضو .. زى بليغ سبحان الله
 راحت عملت عملية زرع ورجعت لنشاطها
 وعملت اغنيات جديدة 

لحد ما اتعرضت لأزمة صحية كانت هيا الاخيرة
 بعدها قالت للى معاها رجعونى الجزاير
 عشان اموت هناك
وماتت ف مايو 2012
وطلع جثمانها من مسجد صلاح الدين بالمنيل

بو تفليقة بعت طيارة تاخدها
 واتدفنت ف مقبرة اسمها "العالية"
 شايفين الفال الحلو
 :)
 ودبلت الوردة لكن عبيرها لسه فواح 
وهيفضل دايما 

وردة نصيبنا فيها كمصريين كان نصيب الأسد
عاشت هنا اكتر ما عاشت ف بلدها الأول
 اتجوزت من عندنا
صحيح طلع عينيها 
لكن كان حب حياتها وعشقها
وردة دى بتاعتنا 
وردة الجزائرية دى بستغربه لما بيقولوه عليها 
دى وردة بلدى احمر من جنينتنا 
وبتاعتنا احنا ولو شالت الف جنسية تانية 

كانلها ازمة شهيرة ايام مبارك 
وناس كتير تفتكرها
 لما طلعت ف حفلة ع الهوا ف احتفالات اكتوبر 
 وكانت مونونة حبتين

انا فاكرة كويس جدا انها قعدت تهزر
 وتضحك بشكل مبالغ فيه
وتكلم مبارك وكانت واخدة راحتها ع الآخر 
وبابا قالى يومها .. نهارها مش هيعدى
 ليه آحاج طيب ... مرضيش يرد

بعدين عرفت انها زودتها

 وكان ممكن مبارك يعديها ويفوتها 
 لكن الغلاوية السماوية اللى قاعدة جنبه معدتهاش
ووردة اتعرضت لمضايقات
ومكنتش اول نوبة

 السادات كمان

ف فترة خلافاته مع القذافى
وردة راحت غنت ف حفلة ف ليبيا
 السادات اتقمص ومنعها من دخول مصر
 وقال دى قرصة ودن
ماشى ماهم  مطربين ابوه أصلهم 
صحيح الراجل كان غاوى طرب ومغنى وسميع 
ويعرف وردة وبليغ من قبل ما يتمريس
وصحيح القذافى دا محدش يغنيله دا ينحدف بالجزم
لكن برضو ... انتا مالك يا انور ومال أى حد 
يغنى لمين ولا يروح لمين 
تمنع الست ترجع بلد جوزها .. ليه ؟؟؟

يعنى الملخص ان الست اتهزأت وإتقل مقامها
من عبناصر والسادات ومبارك
وكويس انها ماتت قبل المرسى وعدلى مهصور والبيصى
 مش طالبة تلطيش كمان وكمان 

واخيرا ف سياق متصل لا ينفصل
 فيه ناس كتير عمالة تتخانق كل شوية 
عشان تعمل قصة حياة وردة مسلسل
 وقصة حياة بليغ حمدى مسلسل 
وانا برجوهم بلاش ارحمونا يرحمكم الله

اللى يحبوا وردة وبليغ يغنولهم .. يحكوا عنهم
 بلاش يقلدوهم ويمسخوهم ويشوهوا حياتهم بأعمال
 أى كلام لمجرد التجارة ولم الفلوس
 وشكرا

نهايته 

كل غنوه عالفرح كانت 
ع الجرح كانت  
ع الصبر كانت 
ع الحب كانت
 كتبتها وقلتها كانت عشانك

آه يانى 

فاضل الملاحظات ... مفيش كتير 
غير انه 
 وردة وبليغ دول بهجة الدنيا
اغانيهم ليها ذكريات عندى واعتقد عند كل حد فيكم 
ابويا الله يرحمه كان بيعشقها 
كنت دايما اسمع اغانيها ف البيت وف كاسيت العربية
واشوف صورها عنده ف اوراقه 
وانا صغيرة ... اتعلقت بمسلسل اوراق الورد 
عشان اغانى الأطفال اللى فيه 
ومكنتش اعرف انه بعد سنييييين 
هييجى يوم ويكون قصة حياتى 
واغانيه كلها هتلمسنى وكأنه انا اللى بغنيها 
مش وردة 

ودول مجرد مثال لكن لها اغانى كتير بتقتلنى 
بتقولى وتفرحنى وتدبحنى ...
بوسة ع الخد دا 
تعيش وتفتكرنى
واغانى مسلسل اوراق الورد كلها تقريبا  
بعمرى كله حبيتك 
لعبة الأيام 
إسمعونى 
لولا الملامة 
ومالى وانا مالى 
روحى وروحك حبايب 
حكايتى مع الزمان 
اغانى افلامها .. كلها تقريبا 
اغانيها ف التسعينات برضو كلها تقريبا
اخر غنوة .. دى ابتوجع قلبى قوى 
أيام وبنعدها 
يووووه هقول ايه ولا ايه ... ؟

اما بليغ فتقريبا مفيش غنوة هتلاقوا نفسكم 
بتغنوها وتحبوها لحد الا وهوه عاملها
سواء لوردة او حليم أو شادية او ميادة
وعفاف راضى ومحمد رشدى وغيرهم 
كان عبقرى .. ملوش زى 
وردة لها حق تعشقه وتدوب فيه 
وتفضل تتكلم عنه كل لقاء او حوار
 لحد ما مشيت هيا كمان م الدنيا 
لأنه مكنش فيه غيره يستحق 
وصحيح اهو دا اللى يتقاله 
... حبك جننا يا اسمك ايه !!!



 

ملحوظة كمان واقفة ف زروى 
ميادة الحناوى لها ذكريات 
عشان امى بتحبها ف .. الحب اللى كان
 وحبينا واتحبينا 
لكن هيا كشخصية نكدة وغلاوية ولا بطيق وشها 
ولما بسمعها بتتكلم بغير المحطة 
 عشان الضغط ميعلاش
دا بغض النظر عن أى حاجة 
انما وردة .. بحب اسمعها تحكى 
لذيدة وشقية ومرحة .. كل ما تكبر تحلى 
وتصبى وتبقى انقى وأشف 
الناس الحلوة كدا .. لما العمر بيعدى 
وشكلها بتحب القطط .. يبقى غلاوتها زاااادت 
اكتر واكتر 
:)

اخر ملحوظة بقى 
خصيمكم النبى
تكلمولنا بتوع الأبراج توصوهم علينا يشوفولنا حل
مع برج الميزان 
قولولهم احنا معترفين
بإنه برج جميل وزى العسل 
بس زى ما هو حلو قوى
متعب قوى ومبلطج علينا ومش عارفينله حال 
ومحيّر معاه الحداشر برج الباقيين  
فيعنى هاه .. وبعدين 
هتتصرفوا ولا نسيبله احنا السما 
ونهج م المجرة  ولا ايه   .... ؟!
وتفضلوا بقبول وافر الاحترام 
مقدمته لسيادتكم 
شهرزاد - حى عابدين - القااااااااااهرة 

واخيرااااا 
كل واحد يشارك ف التدوينة دى
 بتويتة يقولى فيها احب اغنيات وردة لقلبه 
وهكتبها بعد المنشنات الحلوة بتاعتكم .. تحت 

 التدوينة دى اهداء لواحدة بتحب وردة بشكل مرعب
 اكتر من أى حد قابلته ف حياتى
 دودو عاشقة الرومانسية
 هيا هناك اهى وبترفع ايدها
 :-*
تعالى خدى الحدوتة بتاعتك يا ست

طولنا عليكم معلش
 بس وردة وبليغ يستاهلوا الف حكاية
على قد ما فرحونا ولسه هيفرحونا كتير

كنا رجعنا احباب فرقناهم
 كنا صالحنا اصحاب زعلناهم
كنا سامحنا يلي جارحنا
.... 
كملوها هنا 
وتصبحوا على الف خير

-----------------------------------


 عروسه البحور ‏@ashketromancya  
ورده ؟ انا باعشق اى كلمه تطلع منها
و على سبيل المثال لا الحصر .. بودعك
.. طبعا احباب .. العيون السود .. ليالينا .. يتبع
 نكمل .. اغانى مسلسل اوراق الورد
والمسلسل نفسه علشان بيفكرنى بواحده بحبها ;)
.. اغانى فيلم صوت الحب جمعاء .. يتبع
من الاخر ورده لو قالت ريان يافجل
هاسمعها واقول كماااااااااااااااان

 عروسه البحور ‏@ashketromancya  
 الموقف والصوره حلوين حلاوه مش طبيعيه ♥


Mahmoud Abdou ‏@m7moud_3abdou 
 مفيد فوزي أكتر واحد يعرف الجوازات السوكتيم
تقوليش شغال مأذون !!


 E ‏@lollita91  
 دى كان بيغنيها سامح يسرى تقريبا
على الحجار كان قال ان أخر لحن عمله بليغ 
كان بوابة الحلوانى


 Zeinab ‏@ZeinabSamir
واشتغل بوابة الحلواني .. عظيمة


 saso ‏@_samah__
هو ده الحب اللى بجد هي سابته عشان كرامتها
لكن اللى في القلب زي ما هو


 Heba ‏@HappyGeddan  
 تحبه حتى الثماله


Moussa ‏@moussiav 
كان عليها رقبة غريبه


 Cindy ‏@CindyJanabi 
حقها الواد يتحب يا رمضان بوهيمي وطير حر 



 Mahmoud Abdou ‏@m7moud_3abdou 
 انا دمعت .. أول مرة أشوف الفيديو ده  :((


 Azza EL Shinawy ‏@Azza_ElShinawy
 هو الميزان كده حقيقى رجالته عيال قووووى



 Moussa ‏@moussiav 
علشان هي صوت ميتعوضش ده الوحيدة اللي  
نزلت ألبومات في التسعينات و كسرت الدنيا ،
 ام كلثوم لو كانت عايشة متعملهاش


 الچنرال بيكاتشوالأول ‏@General_Pikachu 
عمري ما قبلت ميادة الحناوي بنت المعلم الحناوي
اكبر كبرات وكالة البلح دي 
و لا نزلتلي من زور


. ‏@_HishamFikry  
 طول عمرهم بتوع برج الميزان كده 



 ثورة الكرامة قادمة ‏@AMINSAAD12  El Gharbia 
احلى اغانى لوردة كانت فى الفترة دى


 محمود عبدالمنعم ‏@great_leopard 
امجانبين



Heba ‏@HappyGeddan  
ههههه و ح يتقابلوا النخلتين في العلالي



 الصبح قرب ‏@Fatoma999  
ماهو لو كان عرف يستفرد مكنش جت رجله 
واتجوز :))
وردة  انثى ذكية بردوا :)


 مصطفى النحاس ‏@mostafa_na7as 
أنا ميزان و إحنا زي الفل و الله
طيبين و غلابة و كل الناس بتحبنا 



 Ahmed ‏@bahgaga99  
وقالت كمان انة زوج فاشل


 Heba ‏@HappyGeddan 
ما هو ابو رياض لا يطاق شكلا و لا موضوعا

 الچنرال بيكاتشوالأول ‏@General_Pikachu
 ويجيبوا متحت سالح في دور بليغ
و رانيا فريد شوقي في وردة .. و ننتحر بدون ندم


 عروسه البحور ‏@ashketromancya  
أهو انا دلوقتى بس عرفت اخرة رؤساء مصر
 كلهم سودا ليه .. اللى اتقتل واللى اتحبس
علشان بيجوا على الست الغلبانه دى
 :D


 Moussa ‏@moussiav  
اه ومبارك في الحفلة كان فاكر نفسة المشير عبحكيم
وعمال يهز ويتنطط علي الكرسي


 عنواني 25 يناير ‏@AShohdy67  
واسمحيلي اهديها لعاشق وردة .. صديقى العزيز @ahmedkhalilabdo



 Samar Samir ‏@Samarsamir74  
علي فكرة أنا كنت في ليبيا الوقت ده
وهي غلطت في مصر في التلفزيون الليبي
مجاملة للقذافي


أغانى وردة المفضلة عند متابعين شهرزاد 
ف يوم وليلة - حنين - بتونس بيك - ليالينا
أه لو قابلتك من زمان - يا اهل الهوى - على عينى 
لعبة الأيام - روحى وروحك حبايب - أكدب عليك
حكايتى مع الزمان - العيون السود - لولا الملامة 
بودعك - معقول احب تانى - شعورى ناحيتك 
قال إيه بيسالونى - مالى وأنا مالى