مساء الخير ..
النهاردة حدوتة عن رجل فعلا
والرجال قليل
والاول نقول .. انه صاحبنا يبقى برج الحمل
وبرج الحمل يا اخوان ف عُرف العالمين
ببواطن الابراج يبقى من اكثر الأشخاص تهورا
ولأنه فجائى مهروش
وبتطق ف نافوخه الحاجة فجأة فيعملها
فقلبه جامد وقادر ف نفس الوقت
يتحمل المسئولية
وهو وبرج العقرب اكتر الأبراج
اصحابها كانوا قادة عسكريين وزعماء
وخد عندك
تيمورلنك ومحمد الفاتح وبسمارك
واحمد عرابى وخروتشوف والملك فؤاد
وهيلموت كول والشاذلى بن جديد
وبعيد عنكم وعن السامعين .. هتلر !!
ومميزاته هى الحنية وتحمل المسئولية
والتضحية لما تتشكرلوه دايما
والرومانسية والقيادة وعنده قلب الطفل
اللى ممكن تصالحه بشكولاتاية لو هوه عايز
اما عيوبه فهى التهور والعصبية والعناد
ومبيعترفش بغلطه الا متأخر
ومبيعترفش بغلطه الا متأخر
وغيور جداااا وبيحاسبك حساب الملكين
لو غلطت يبقى نهارك ازرق
وشكاى لما يزهقك
قصره .. الحمل لما يبقى حلو ولطيف
وكويس بيبقى راجل والرجال قليل
يعتمد عليه وحنون ومش ممل اطلاقا
وحاجة لوز اللوز
نعود بقى لصاحب الحدوتة
ف 1 ابريل سنة 1922 بقرية شبراتنا
بمركز بسيون محافظة الغربية
هينولد للحاج الحسينى الشاذلى
ولد زى الورد والفل والياسمين
وسألوه هتسميه ايه يا حاج ؟؟؟
قالهم طبعا هسميه سعد
على اسم الزعيم اللى كانت ثورته موقفة البلد
على رجل مبقالهاش شوية
عيلة الشاذلى ضاربة بجذورها ف النسب
لأبو الحسن الشاذلى اللى جه من المغرب
مطرود ومتهم بالزندقة
وعاش ف مصر معزز مكرم
وكان من أجل شيوخ الصوفية
والظاهر ان الحفيد
مش هياخد من حظ الجد الاكبر من المرمطة
والمجد وبس
دا هياخد كمان من رجالة العيلة
اللى بيقال ان بعضهم حارب مع عرابى زماااان
بيقولوا ان من اسرته اللى حارب ف السوادن
وفيه اللى حارب ف التل الكبير
وبعد انكسار الثورة العرابية
انقطعت صلتهم بالجندية وبس خلاص كدا
ومش بس الشق العسكرى من عيلة الشاذلى
كان فيه كبرات واعيان
ومنهم مدير مديرية البحيرة
واللى ف زمانه انشئت دار الأوبرا ف دمنهور
والأسرة هتاخد سعد بعد ما ياخد الابتدائية
ومعاه اخواته ويسافروا على القاهرة
ويقعدوا فيها
وسنة 1939 يخلص حضرته دراسته
وعاوز تدخل كلية ايه يا سعد ؟
قالهم الحربية
وقد كان
بعد معاهدة 1936 كانت مصر بتغلى
وعرق الوطنية ناقح
خصوصا ع الشوباب الصغنن زى سعد
بالاضافة الى انه من صغره
وهوه متشرب بحكايات الاجداد عن الجهاد
والحرب ضد المحتل ومصر محتاجلك يا رآفت والقصص دى
ايام ما كان العدو محدد ومعروف شكله ولغته
ايام ما كان العدو محدد ومعروف شكله ولغته
القصد .. هيخش سعد الحربية
ونظام الدراسة زمان كان مختلف حبتين
تحت ادارة الانجليز بقى وشغل زى الهباب
بيطلسقوا العيال سريع سريع
عشان ميلحقوش يفهموا ولا يتعلموا حاجة
وبيقولوا ان سعد دخل الكلية ف 39
اتخرج سنة 40 وبسرعة مورناش وقت
واصلنا ايدنا خفيفة وشفت ادينالك الحقنة
ولا حسيت بحاجة .. !
وقعد الفتى ملازم أول 3 سنين
على ما اختاروه للحرس الملكى
و كدا بقى بيشتغل مع الملك فاروق سخصيااا
واتنقل نقلة تانية
ولما اتسئل الشاذلى عن الفترة دى
وفساد الملك وخلافه
قال انه الموضوع كان فيه مبالغات كتير
وان الملك مكنش زفت قوى
وقال كمان انه كان مرتاح ومحدش ضايقه
وانه كان بغض النظر عن أى حاجة
بيعتبر حماية الجالس على عرش مصر واجب
وان الانجليز العدو ومينفعش نخلط
وعشان الراجل مرضيش يقول كلمتين وحشين
ف حق فاروق بعدييييين
اتهموه انه من الحرس الحديدى
بس محدش جاب دليل
وطلع كله كلام فشنك وطق حنك
واحنا دلوقتى سنة 1948
وسعد يسمع الاخبار ف فلسطين
فيدخل من نفسه كدا على القائد بتاعه
ويطلب التطوع عشان يسافر يحارب
القائد يجيله ذهول
فلسطين ايه يا بنى اللى عاوز تروحلها دى
دا الناس بتهرب من الموت
تروحله انتا برجليك
سعد صمم القائد قاله طيب لما نشوف
بعد شوية اصدر فاروق امر
بأن شوية من الحرس الخاص بيه
يسافر بأمر شخصى منه
وكان اسم الشاذلى ف القايمة
وجت لوحدها كدا من عند ربنا وترتيبه!
ويسافر سعد وتمر الحرب
ويتجرع العرب مرارة الهزيمة
ويخرج بطلنا بدروس وعبر
اهمهما ان جيشنا فاسكونيا ولا له ف البتنجان
ولا تدريب ولا نيلة
وبص بقى عشان تعرفوا الناس الزبالة
م الناس النضيفة
قصة الاسلحة الفاسدة
والطنطنة اللى هرونا بيها الضباط الاحرار
عن فاروق .. الخ
سعد فندها
وبعين الجندى اللى حضر ف الميدان
قال ان الجيش مكنش متدرب على أى حاجة
ومكناش عارفين نستخدم الأسلحة والذخاير
ولهذا كنا نضرب قنبلة مثلااا
على اساس انها هتنفجر بعد 7 ثوانى
بينما هيا هتنفجر بعد 3 ثوانى بس
فتنفجر فينا احنا ... !!!
يعنى كان العيب فينا وف قلة تدريبنا
والحكاية دى خلت سعد يحفر ف دماغه
الدرس دا .. التدريب والأستعداد اهم حاجة
لأى معركة وبلاش شغل استسهال وعك
ومش بس كدا
حاجة تانية كانت مهمة
وهى سلاح الطيران اللى بتفوقه
مسح الجيوش العربية ومرمطها
ومكنتش اسرائيل كانت طيارات الدول الصديقة
وتالت حاجة اكتشفها بخصوص العدو
وموطن قوته انه الصهاينة بيحاربوا
بأسلوب العصابات وعشان كدا انتصروا
وان كنا عاوزين نغلبهم يبقى لازم نحاربهم
بنفس الطريقة عشان نحطمهم !!
وسبحان الله .. حاليا مفيش حاجة بتعرف
تبهدل اسرائيل غير الحرب بالطريقة دى ... !
#الله_يرحمك
راجل فاهم والله
المهم .. كام سنة وينقلب الضباط الاحرار
ع الملك ويساندهم الشعب فتبقى ثورة
ويقال ان الشاذلى كان من الاحرار ف الظل
وقالوا ان السبب انه كان من الحرس الملكى
ومحدش حب يأذيه يعنى
ومحدش حب يأذيه يعنى
فمحطوش اسمه ف كشوف المشاركين
بس أى كان يعنى
سعد كانت علاقته كويسة بجمال عبناصر
رغم الفرق ما بينهم ف السن والرتب
لكن كانوا جيران ف العباسية
وبينهم علاقات اسرية
وكان الشاذلى بيحبه وبيقدره
وسعد كان شايف عبدالناصر بعين المحبة
وانه سياسيا كانت اخطائه كتير
اما عسكريا فعيبه الحقيقى
اعتماده على ذوى الحظوة فقط
وكان شايف ان اعتماد عبناصر على عبدالحكيم
هوه نقطة هلاكه
وان يتحسب لناصر انه اعترف بهذا الخطأ
بينما ما تلوه لأ
يعنى السادات ومبارك الكلب محدش فيهم
اعترف ابدا انه غلطان ف أى حاجة
بينما ع الأقل عبدالناصر اعترف بخطئه
وقصاد الجميع بعد النكسة
قصره .. سعد هيتفائل بالثورة
واهدافها المعلنة
ويعجبه قرارتها اللى ف البدايات
واللى اهتمت بالفلاح والطبقات الغلبانة
ولحد ما اتشال محمد نجيب
وبيقولوا انه اتعرض عليه يمسك المخابرات .. !
سعد رفض بشدة وقالهم انا راجل
بتاع جيش وحروب
ومليش ف شغل اللوع واللف والخباثة دى
:))
ويبدأ عبدالناصر ف عمل تغييرات ف الجيش
ويبعت الشاذلى وغيره
عشان يدرسوا الحاجات على اصولها
ويرجع سعد عشان يعمل الآتى
انشاء وحدة المظلات ودى كانت اول مرة
والجيش مكنش فيه الحكاية دى قبل كدا
والناس العرافين ببواطن الجيوش
بيقولوا انه
ان اللى بيعمل سلاح ف أى جيش يكفيه فخرا
انه كان الرائد
ولو معملش حاجة تانية وقعد ف بيتهم
فيتكرم طول عمره ويتشال ع الراس
بس الراجل مكنش بيدور ع المجد ولا حاجة
كان همه يطور ف الجيش
وكان مؤمن بأننا نستاهل
احسن من اللى كنا فيه
المهم سلاح المظلات يبدأ تدريبات
ويبقى زالفل وحلو وهوب وتتأمم القناة
وهوب تقوم الحرب
وهوب تقوم الحرب
والعدوان الثلاثى على مصر
والشاذلى يقول للقيادات ان فرقته جاهزة
للنزول بالمظلات خلف خطوط العدو
عبناصر يرفض متعرفوش ليه !!
الشاهد ان كان فيه خطة فعلا
وكاد ناصر يقول اوكيه بس حد تدخل
ف اخر لحظة ولغاها منعرفهوش احنا
المهمممم خلصت الحرب
وسعد بيدون ملاحظاته كالعادة
ويترقى سعد لرتبة عقيد
وعبناصر يبعته ف مهمة الى الكونغو
وعبناصر يبعته ف مهمة الى الكونغو
وقصتها طويلة الحكاية دى مش هدوشكم
لكن الشاذلى بين كرامة هناك
كانت مهمته دبلوماسية وسياسية
جنب الجانب العسكرى
وبيقول ان اهل الكونغو استقبلوا الكتيبة المصرية
بأعلام الجمهورية العربية المتحدة
#انذاك
خرج سعد بمكاسب كتير من المهمة دى
اولها انه استوعب دور مصر الحقيقى
وخوف الدول المهيمنة من تصاعد قوتها
افريقيا وعربيا
لكن خرج كمان بخسارة
لما كسب عداء واحد من رجالات الجيش الكبار
هنعرفه بأسم ... المشير احمد اسماعيل
اللى بعدين هيبقى رئيسه
ويصطدموا ببعض وافلام كدا
ويرجع بطلنا الهمام من الكونغو
عشان المرة دى يبعتوها من افريقيا
على آسيا عشان يتجرع المرار مع زمايله
ف حرب اليمن اللى قال انها اسوأ تجاربه
وافشل تجارب الجيش المصرى على الاطلاق
وقال ان جغرافية اليمن ووعورتها
وعدم الاستعداد الكافى
كانوا اهم اسباب الهزيمة
لكنننن
ف نفس الوقت
اعتبر ان المكاسب السياسية اللى وصلها
عبدالناصر هناك كانت مهمة برضو
وغطت الخساير نوعا ما
كان بيحبه واضح
:))
طيب خلاص حبيناه وقعدنا نبلعله ف الزلط
لحد ما جت حرب 67 حضرتك
وطبعا الشاذلى كان جزء منها
وكان له كتيبة معروفة باسمه
كان اسمها " مجموعة الشاذلى "
وكان فيها كتايب صاعقة ومشاة ودبابات
وسعد اللى بيحكى بقى
ازاى ان كان فيه تخبط رهيب ف ادارة
كل حاجة
وبيحكى ازاى ان جاله اوامر الاول بالتقدم
فى القطاع الجنوبى
وبعدين اتلغت بعد شوية وأمروه بالتقدم
للقطاع الشمالى
وبس يا شهرو كدا العيال تعبت ؟؟
لأ تعبت دا ايه
دى الاوامر اتلغت تالت
وقالوله جاله التكليف بالتمركز
فى جنوب المحور الاوسط
على بعد 20 كيلو من الحدود الدولية
#ياليهوى
تانى .. تانى ايه تالت بقى
العيال اتحركت وبالمركبات والدبابات حوالى
ييجى الف كيلو متر
وطبعا كفاءة الحاجة انخفضت
زائد كم الاجهاد الرهيب اللى كانوا فيه
#يهدك_يا_عامر
وبعد الفيلم الهندى دا كله جالهم اوامر
اخيرة بالرجوع
فسعد بيقول انه فهم طبعا اننا اتهزمنا
وكان بيشوف الطيران الاسرائيلى فوقيهم
بالكوم بينما مفيش طيارة مصرية واحدة
توحد ربنا
#انضربوا ع الأرض
وانتا متعلمشى يا حبيبى
المهم الراجل حسبها كويس لقى الرجوع
محاولة انتحارية
ولو عملوا خلفا در طيارات العدو
هتلعب فيهم النيشان وتجزرهم
ومش هيرجع نفر واحد .. !
طب وبعدين
ومن هنا تأتى مهارات برج الحمل
اللى قولنا عليها
الشاذلى هيفكر برا الصندوق
وبدل ما يرجع للخلف هيتقدم للامام !
ايوالله زى مبقولكم كدهون
كتيبة الشاذلى كانت متمركزة
عند مضيق لصان
الحتة دى قرب الحسنة ف شمال سينا دلوقتى
وتحت العريش بشوية
المهم كان بينهم وبين حدود العدو وقواته
ييجى 5 كيلو كدا بالكتير
قوم ايه تأتى حكمة الست شادية الخالدة
ف ريا وسكينة
الحرامى الشاطر يستخبى ف الكراكون
وعلى نفس المنوال
المهزوم الشاطر يستخبى ف بيت خصمه !!
الشاذلى كان بيسمع اذاعة العدو
مش صوت العرب وهباب
فيعرف اخبار ان الصهاينة دخلوا العريش
وبيطالبوا سكانها بالاستسلام
والا ضربوا عليهم النار
وكدا خلصت أخد القرار
واتحرك برجالته والمركبات لقدام
حوالى 20 كيلو معتمدا على خريطة
كانت معاه وبقوا جوا الحدود الأسرائيلية
وطبعا محدش هيضرب نار على حد
ف الحتة دى!!!
وعند بير مية وتمركزوا وقعدوا واستخبوا
تانى يوم 6 يونيه بعت واحد من رجالته
يستطلع والجدع مرجعش
وقعدوا يومين لحد 8 يونيه
لما عرف أى اخبار
كان فيه محاولات للاتصال بالقيادة
ونجح اخيرا يوصلهم
وقالوله
بهدوءءءءء
اتهزمنا
انسحب
ارجع من عندك لو قدرت
#نقطة
واستنوا لما الليل جه
وف غمرة الافراح والليالى الملاح
اللى عملوها ولاد الوارمة ف اسرائيل
كان الشاذلى برجالته بيرجعوا بشويش بشويش
وطول الطريق على مدد الشوف
كانت جثث العساكر والظباط مرمية
والدبابات مضروبة ومحطمة
كانت الهزيمة بتتجسد ف كل خطوة
ورغم حرصه الشديد برضو انكشفوا
وانضربت الكتيبة بتاعته
لكن رجعوا اخيرا بخساير قدرت بـ 20%
ودا رقم معجزة الحقيقة
وبس وصل المعابر
واشار عليه المهندسين بتوعه انه يدمرها
عشان يمنع عبور اى حد م الناحية التانية
وقعد فعلا يخلص ف المهمة دى
الا وهى
منع العدو من الوصول لغرب القناة
وتكسر النكسة ضهر الكل
ويخرج الشاذلى بدروس كل مرة
مضافا اليها اشياء اخرى
اول الدروس
1) التخطيط الجيد للمعارك
والتدريب يا غجر
2) العك ف السياسة ميدخلش الجيش
ف متاهات افصلوا الحاجات عن بعضها
3) اصحاب الخبرة والكفاءة الاولى
مش اصحابنا على دكة الحربية
4) سلاح الطيران هوه اهم حاجة
ولازم يتقوى اكتر
5) توقيت ومكان المعركة كان غلطة
واخيرااا بطلوا اعلام مضلل
ومغازلة للناس بحاجات مش حقيقية
ويا بيخت من بكانى وبكى عليا .... !!
الشهادة لله عبناصر طلع ع الشاشات
وقّر بغلطته
وقرر يعمل حركة تغيير شاملة ف الجيش
بدأت بعزل عبحكيم عامر
وبيقولوا ان الشاذلى كان مقتنع بقصة
انتحار عبدالحكيم عامر وان شخصيته كدا فعلا
وقت الهزيمة ووقعها مكنش سهل فعلا
خصوصا على شخص بوضعه ونفوذه
وفى 11 يونيو يتم اختيار الشاذلى
قائد للقوات الخاصة
ويقرر يدمج فرقة المظلات مع الصاعقة
ويندهوه بــ مينا موحد القطرين
:)
وتبدأ حرب الاستنزاف
ويقال ان فرقة الشاذلى الجديدة دى كانلها
صولات وجولات وعملت شغل كويس
ومزيد من العمل والتدريب
وسنة 1969 يستشهد عبدالمنعم رياض
وهوه بيتفقد احوال ضباطه وعساكره
على احدى النقاط
ويفضى منصب رئيس الاركان فجأة
عبالناصر يجيب احمد اسماعيل
ويمكسه المنصب
سعد يسمع الحكاية دى يفتكر خناقاتهم
ايام الكونغو وحديد وبعيييييد
يقول ابضنننننن منيش قاعد
ويقدم استقالته !
عبناصر يبعتله اشرف مروان يسترضيه
ويفهمه ان احمد اسماعيل هيشيل ايده
ومش هيقرفه ف حاجة
فيتراجع
ويرقوه لقائد عام منطقة البحر الاحمر
عشان يبعد عن الصراع والمناكفة
الحتة دى كانت هادية نسبيا
وادت فرصة للشاذلى يدرب ولاده اكتر واكتر
ولنا ... هنا .. وقفة
عشان الشاذلى مكنش مجرد قائد
بدماغ متكلفة عسكريا وتدريبا مميز
كان اولا وقبل كل شىء انسان مميز
واضح انه كان شخصية جميلة
وعنده كاريزما العساكر والضباط
كانوا بيحبوه وبيعبدوه عبادة
وكانوا بيطيعوا اوامره وينفذوها
عن احترام ومحبة خالصة
وكان جد وخشن وبرنس ف نفسه كدا
وهاتوا أى حوار له واسمعوه بيتكلم
هتلاقوا رجل جيش محنك وناشف
ورصين وراسى
مش مسهوك ومتقمصلى روح عبدالحليم
على حكيم ف حلاوة روح .... !
الشاهد ان ولاده كانوا بيثبتوا كفاءة
وسنة 1970 هيعملوا عملية
يقتلوا فيها 35 اسرئيليى ويأسرو شخصين
وعملية تانية بعدها
ينقتل فيها 13 اسرائيلى ويأسروا واحد
وتكلف القوات بتدمير اللواء 135 مشاة
احد احصن نقاط خط بارليف
وتيجى الغرابة جولدا مائير تعيط لنيكسون
ونسمع عن مبادرة روجرز
لوقف اطلاق النار 1970
الملخص المفيد
الشاذلى كان عمهم وحابس دمهم
وبيعلم عليهم
ويصقل ف قواته
وفضلنا كدا لحد ما مات عبناصر
وجه السادات رئيساً
الحقيقة ان العلاقة بينهم .. ف البداية
كانت زى الفل
السادات كان داخل ف حرب تكسير عظام
بينه وبين ما سمى بمراكز القوى
وف لحظة شجاعة وحرق دم مقصودة
راح معين الشاذلى .. رئيس اركان
متخطيا بذلك اكتر من 30 شخص قبله
ف الاقدمية
وبعد ثورة التصحيح بتاعته خد ف وشه
رؤوس كتير قد اينعت وحان موعد قطافها
ومنهم محمد فوزى
واللى مسك بداله محمد صادق وزير حربية
والعارفين بشخصية السادات
الكائن الأنوى وحيد الخلية
انه مكنش عاوز شخصيات تناطحه ف السلطة
وتقعد تقرفه كل شوية !
كان عاوز واحد يبقى همه الجيش
وتطويره والمعارك والانتصار فيها
ولا يجرى ورا أى نفوذ
والشاذلى كان الرجل المناسب لهذا
وياخد السادات قرار الحرب
ويتخوف وزير حربيته من الموضوع
ويقول السادات ناوى يودى البلد ف داهية
ويروح للشاذلى ويقوله لازم نوقفه
ولو اضطرينا ننقلب عليه!
الشاذلى يعتبرها لحظة غضب وطيش
ويرفض حتى يذكرها بعدين ف كتابه
ليتحاكم عليها وزير الحربية
اللى برضو هيصطدم بالسادات
فيقيله عادى خاااالص
ويجيب بداله مييييين ؟؟
ايوه احمد اسماعيل عدو الشاذلى اللدود
واللى بيطلعله ف كل خرابة زى العفريت
الشاذلى كان شايف اسماعيل ضعيف وخانع
وانه لأنه كان مريض بالسرطان
فمعندوش رغبة ف التناطح على سلطة
فالسادات مسكه المنصب لهذا السبب وبس
لكن برج الحمل بقى لما بيقفل من حد
ويغضب عليه مبيشوفش أى نقطة بيضا
اسماعيل كانله شعبية ف الجيش ومحبوب
.jpg)
القصد اللحظة كانت حاسمة
فاتفق الاتنين على تنحية الخلافات
وركزوا ف المهمة الخطيرة القادمة
والشاذلى بيقول ان اسماعيل قاله
بالفم المليان والصريح
لو انهزمنا هنشيلها احنا بس
ولو انتصرنا محدش هيشكرنا !
الراجل كان هارش السادات باينه
واللى مربى قرد عارف لعبه
وكان عارف انه هينسب النصر له وحده
وهيرميها عليهم لو انهزمت مصر
ف الحرب دى
وقامت الحرب يا عيال... عبرنا
وانتصرنا .. عشان الإرادة والتخطيط
وحرص شخصية زى الشاذلى
اللىاتعلم من كل الحروب السابقة
وحط حلول لكل المعضلات والمشاكل ا
للى كانت بتقابلهم ف كل مواجهة
يعنى مثلا ... خد عندك
الصهاينة كانوا حاطين خزانات وقود
بيولعوا فيها فورا اول ما يعدى حد
من الجانب المصرى
قوم الشاذلى بعت رجالته سدوا الخزانات
دى بالأسمنت
:))
مشكلة الساتر الترابى اللى هده بالمتفجرات
كان صعب جدااا وهيسبب خساير بشرية
حلها مهندس مصرى ألمعى
كان شغال ف السد العالى
وابتكر فكرة الهد بالمية !
الكبارى اللى كانت بتتعمل حت قصف النيران
واللى كانت ضرورية لعبور المركبات
والدبابات للناحية التانية والتقدم
حلها الشاذلى بتعيين فرق مشاة مخصوصة
كل مهمتها تأمين هذه الكبارى بعد بناها
وبالتالى الدبابات تعبر وتساعد ف الاقتحامات
بأقل خساير ممكنة
واهم حاجة عنده كانت جنوده وصمودهم
فصمم عربية خفيفة للمشاة ياخدوها
وفيها كل حاجاتهم من المية والاكل وخلافه
وحرصا على أرواحهم
اللى كانت المدفعية المضادة
هتصطادها كمالعصافير بعد عبورهم
اصدر امر للمدفعية المصرية تغطى
على دخولهم وتضرب نار هيا كمان
لزوم الغلوشة وكدا
الراجل الصراحة مسبش حاجة
لدرجة انه عمل كتيب مخصوص للجندى
يعلمه ازاى ييربط فيه بيادته
وازاى يستحمى بنص زمزمية مية
وكتبله فيها تفاصيل كتييير تخليه
ازاى يختصر الوقت
ويستفيد بكل المتاح حواليه ف الطبيعة
وطّعم الكتيب بأيات قرآنية واحاديث وحكم
تحث على الجهاد والقتال
وماهى كرامة الشهيد
عشان يرفع الروح القتالية اذا انخفضت
عند البعض ولاّ حاجة
ومعرفش الحقيقة دى ولا ايه
بس يقال يقال ان صيحة الله اكبر وقت العبور
كانت فكرته هوه .. !!
أصل الشاذلى كان عنده نزعة دينية
واللى متأثر فيها بجده الكبير
ابو الحسن الشاذلى فبانت ف طباعه واخلاقه
وحتى ف تسميته لخطة "المآذن العالية"
ف اكتوبر وغيرها
و تبدأ المعركة فى السبت 6 اكتوبر 1973
و ع الأحد 7 اكتوبر تكون القوات المصرية
عدت القناة وحطمت خط بارليف
فى 18 ساعة
وعلى رأى الحاج أنور
افقدت العدو توازنه ف سيت ساعااااات
وبيقولوا ان الخساير
مكمتلش الـ 3% من الطيارات
والدبابات و المعدات
ونص فى الـ % من الرجال والارواح
والعالم كله شهد بالنصر
واخيرا يا عيال شفنا يوم عِدل
وتعترف الصحف العالمية بالشاذلى
كعقل مدبر لهجوم مصر
زى التايم واللومند ودير شبيجل الألمانية
اللى تسميه .. روميل العرب
ويا ترى بعد النصر المبين دا
وانبهار العالم
السادات هيسيبك تتقدم الى الامام يا روميل
ولا هيجد ف الامور أمور ؟!
%2B(1).jpg)
المرة الجاية نكمل يا ولاد
وقبل ما اقولكم سلام
انوه بأن المصدر الاساسى لهذه الحدوتة
جنب المواقع المختلفة ع النت
هو ... كتاب العسكرى الابيض لمصطفى عبيد
-----------------------------------------
Angels & Demons @KhShalaby
بالمناسبة الكلية الحربية لحد الخمسينات
كانت سنتين فقط دراسة
يعنى لو شفتى جمال عبدالناصر هتلاقية
خدها فى سنتين فقط مش زى دلوقتى
هند @HendZayed
مش حبا في فاروق،بس الشهادات الموضوعية
دي بتفرح قلب الواحد انه ممكن يصدق حد
بدل ما مش قادرين نصدق ان الألف ألف
وكوز الذرة كوز
طاحــون @Tahoun71
عشان كده الاخيرين اخدوا ما يستحقونه
والاول نعته كل الدنيا حتي اعداءه
mayada el_awady @MayadaEl_awady
علي فكرة بقي ثورة يوليو شوهت فاروق
بشكل مبالغ فيه لان محمد نجيب في مذكراته
قال نفس الكلام
:)
Heba @HappyGeddan
كل اللي عاشروا ناصر من قريب حبوه
واضح ان كان عنده كاريزما فعلا
ويمكن كان صادق و ليحب البلد
مين احنا علشان نحكم ..الله اعلم
mayada el_awady @MayadaEl_awady
أعلام مضلل احنا ورثينه مع النحاس
والصيني حضرتك
:)
Hema Abdella @hema_abdella
طب ابقى جيبي سيرة المحاكمات الكرتونة
للقيادات الجيش ساعتها
و المظاهرات اللى حصلت بعدها
المرحوم طومان باي @toumanbay
حضرت جنازته في جامع الصديق
كان الشباب الصغير بيسألونا مين سعد الشاذلي
و كان الضباط الكبار بيعيطوا
معلوماتي المتواضعة ان الشاذلي فعلا كان ايقونة
انا شفت الضباط بيعيطوا عليه بعيني في الجنازة
Mohamed Emam @memam8
وكانوا بيعملوا كمين ع طريق الغردقة قنا
ويفتشوا الناس وياخدوا أسرى
, عريدة في عمق مصر كما ينبغي يعني
والشاذلي اللي منع ده
Mohamed Emam @memam8
تاريخه كان السبب الأول في اختياره
والحقيقة الروس لعبوا دور
في إعادة هيكلة الجيش بعد النكسة
إن العبرة فالترقية تبقى للكفاءة فقط
Essam Saad @saad_essam
الكبارى التى استخدمت كانت هى نفسها
التى استخدمت فى الحرب العالمية الثانية
ولم تحصل مصر وقتها على الكبارى الحديثة
تبع اللي تبعه @manshee
معروف كمان انه عمل كتيبات للجنود فيها ارشادات لكل انواع المواقف حاجه جده زي
survival guide
Moussa @moussiav
مش كتاب واحد ده كذا كتيب كلها ارشادات
حتي لو وقعوا في الأسر يتصرفوا ازاي
Abdallah Higazy @Abdalah_Higazy
كان أسمنت مخلوط بغراء ينشف تحت الماية
من إبتكار المركز القومي للبحوث!
Ahmed @ahmedjo74
ضابط مهندس قبطي مصري
المقدم باقي ذكي
Mahmoud Taha @eng_M_taha
ع ما قريت البحر اﻷحمر كان ارض مفتوحة
مش عارفين يأمنوها
وحصل فيها هجمات خطيرة علشان كدة
اختاروا الشاذلى ونجح فيها بفكرة بسيطة
القوات اﻷسرائيلية عملت اكتر من فضيحة
لمصر فيها بأنزال بحرى او جوى
والقبض ع عساكر ومدنيين بالليل
فالشاذلى قرر وقف الحركة ليلا
وكمان لغى خدمات الحراسة الليلية
وبكدة اسرائيل ما لقتش اهداف تهاجمها فالمنطقة
فكانوا بيعملوا انزال
ويرجعوا بدون دوشة
:)
Abdallah Higazy @Abdalah_Higazy
إختراع روسي.
ومع الأسف كنا المفروض نتعلم ونطوره
ونفكر في وسائل فورية للبناء للمدنيين
زي ما بقية الدول بتعمل!
Mohamed Emam @memam8
دي مواسير نابالم تحت القناة
بعتوا ضفادع بشرية تسدها
Moussa @moussiav
ده لدرجة ان درس وزن الحاجات
اللي ممكن يشيلها الجنود وهما علي الجبهه
علشان يتحركوا بسرعة
ويكون معاهم تموين وذخيرة تكفيهم
لؤي عمران @loaiomran
"وقامت الحرب يا عيال وانتصرنا "
إنتصرنا في اﻷول بس ﻷن محادثات
"الكيلو 101" كانت المسافة من القاهرة
Tarik Salama @tariksalama
المسافة جرافيآ من خط أقصى تقدم
كان ٦٠ كيلو تقريبآ
والعلامة ١٠١ تم ازالتها وإعادة الترقيم
ليست هناك تعليقات:
إرسال تعليق