الحدوتة النهاردة تأتيكم برعاية الحكمة القائلة
"يا نحلة لا تقرصينى ولا عاوز عسل منك "
وأبطالها الحقيقيين الطمع والأستهتار
اما ضحاياها كالعادة فـ .. ناس مننا
من المصريين الغلابة يعنى
اللى لا عرفوا راحوا ليه ولا ماتوا ليه
ومختاروش اولها ولا آخرها
ويحكى ان الخديوى سماعين
قرر ف ليلة انبساط انه يفتح اراضى جديدة
ف السوادن ويضمها لمصر
ويتوسع اكتر ما كان جده عامل
وانتوا عارفين طبعا
ان الحاج محمد على سنكفولة ضم السودان لمصر
مع الشام وغيرها
وبعد ما زعل اروبا وتركيا قصقصوله ريشه
وقعدوا يزحزحوه يزحزحوه لحد ما لموه
ف حدود بعينها وقالوله استوب
انتا واولادك واحفادك على كدا
لحد ما جه اسماعيل افندى
وغير المعادلة قليلا
لأن الجدع عرف من أين تؤكل الكتف
وازاى يرضى اسياده ف الاستانة
وف اروبا
وطقت ف دماغه يتوسع ف السودان
وفعلا هيضم مناطق اكتر من اللى كانت من قبل
وبعدين هيقرر ياخد الصومال بالمرة
وفعلا يبعت جيشه ويستولى عليها
بموائمات مع الطامعين فيها
لكن يفضله حد مش موافق
مين اللى مش عاجبه يا شهرو ؟؟
اثيوبيا حضرتك
الجماعة ف الحبشة مكنوش موافقين
بالمرة وكانوا مضايقين من توسعات
الخديوى اسماعيل خصوصا لما حضرته
ضم سواكن ومصوع لمصر
واخد حتة اسمها سنهيت ف اقليم البوغوس
وملك الحبشة تيودورس اتشال واتهبد
وقال حديد وبعيد
سنهيت دى تبعنا احنا
وبيقولوا ان تيودورس
اعلن بشكل واضح رفضه
والعلاقات توترت بين مصر والحبشة
وزاد وغطى لما الخديوى اسماعيل
ساعد الانجليز
وسمح لقواتهم بالتوغل ف اراضى السودان
عشان يوصلوا للحبشة
ويأدبوا سى تيودورس اللى زعل ناس
من رعاياهم واعتدى على قوافلهم
افلام كدا
المهم وبالمختصر ابو توفيق غلط
ودخل نفسه ف عركة بين دولتين
ووقال ينول رضا الأروبيين والتراكوة
وبالمرة اهو يكيد ملك اثيوبيا ف السكة كدا
#غياظ من يومه
القصد .. العركة خلصت بفوز الانجليز طبعا
وانقتل تيودورس
ومسك مكانه خصمه اللدود .. يوحنا
وبيكتبوها ساعات يوحناس
او يوحنس او يوهانس
وأى كان اسمه بيتنطق ولا بيتكتب ازاى
فاحنا لنا ... هنا ... وقفففففة
عشان الجدع دا له حيثية وشخصية
وهيعلم علينا تعليمة محترمة يا ثااااامح
الحاج يوحنا او يوحناس او يوحنس
او يوهانس .. الخ
حكم اثيوبيا من 1872 لحد 1889
وكان بالنسبة لشعبه بطل
وكان من القابه على سبيل المثال لا الحصر
أسد يهوذا المنتصر
ملك صهيون
ملك ملوك إثيوبيا
ومختار الرب
وملك ملوك اثيوبيا بقى سى يوحناس
هيمسك العرش من هنا
ويبتدى يظهر العداء الواضح لمصر
وحكومتها وخديويها من هنا
ولا هامه حاجة
أسد بقى
بينما على مسرح الاحداث هتظهر شخصية
من الشخصيات اللى بيقول المؤرخين
انها غرقت الخديوى وعملتله البحر طحينة
ومين بتاع الطحينة دا يا شهرو ؟؟
دا اللى اسمه منزنجر باشا
منزنجر اصلا كان سويسرى
ومتفهموش ازاى بقى قنصل فرنسا ف مصوع
واتجوز واحدة حبشية من اقليم البوغوس
وكان بيساعد الانجليز ف حربهم ضد الاحباش
وبيساندهم ف أى توسعات عاوزينها .. !
وبعد شوية حِلى ف عين الخديوى اسماعيل
راح معينه محافظ لمدينة مصوع !
قصره .. الواد كان طموح
وعارف ازاى يوصل لأعلى مركز بأقل وقت
القصد
سى منزنجر اكل ودان الخديوى واداها بقى
دخل الحبشة
ضمها لمصر
ناخد سنهيت واللى حواليها
احنا اولى من أى حد
هنربى يوحناس ونعرفه مقامه
الخ
سماعين سمع كلامه
وبعته على راس حملة
مكونة من 1500 نفر
وفتحوا سنهيت وحطوا العلم المصرى
وكملوا على حتت تانية لحد هرر
يوحنا شاف المنظر معجبوش طبعا
والظاهر قال كلام مش تمام
واسماعيل كان مستنى أى حاجة
عشان يتلكك ويقوم الحرب دى
وهوه اللى جابه لنفسه
دبور وزن على خراب عشه
سنة 1875 هتقوم حملتين عسكريتين
على الحبشة
واحدة برياسة كولونيل ارندوب من مصوع
والتانية برياسة منزنجر من تاجورة
الحملة الاولى واللى اتعرفت باسم
حملة ارندوب
اتحركت الاول برياسة الكولونيل الدنمراكى
اللى انضم للجيش المصرى
وعاوزاكم تركزوا معايا ف الأسامى
الله يكرمكوا عشان الحكاية دى هتكرر كتير
ضباط وجنرالات باسماء اجنبية
ف اعلى رتب ف الجيش وسلملى ع المترو
المهم .. ارندوب الدنمراكى
هياخد قوة مكونة من 3200 عسكرى
وضابط من الجيش المصرى
ويعدى حدود الحبشة وياخد قرية بعد سنهيت
ويكمل على جونديت
الصراحة الراجل لم يلق أى مقاومة تذكر
لحد ما قرب يدخل على جونديت
وساعتها كانت الاخبار وصلت ليوحناس
تفتكروا هيسكت ؟؟!!!
لأ طشبعن
الراجل هيتحرك بجيش من 30 ألف مقاتل
م اللى بياكلوا الخروف صاحى دول
الخبر وصل لأرندوب
الراجل اتخرع !
طبعا اصول يتخرع 3200 قصاد 30 ألف
نعمممم !!
ارندوب حط واطى علطول
وبعت ليوحناس يطلب منه
وبعت ليوحناس يطلب منه
ان نهر اسمه الجاش يبقى حد فاصل
بين ممتلكات مصر وبين اراضى الحبش
ونلم الخناقة قبل ما تبدأ .. !!
يوحناس قرى الرسالة وكاد يشكرله
وببساطة حبس الرسولين
اللى حملوا الرسالة ومردش
وطبعا كان واضح ان المعركة اوشكت
ع الحدوث
وارندوب بدل ما يرجع ورا
راح متقدم آل عشان يبقاله ضربة البداية
وانتا اللى جبته لنفسك يا روحى
ومترجعش تعيط بقى
والحقيقة هوه مش هيلحق حتى يعيط ...!
وف نوفمبر 1875 هتبدأ معركة جونديت
والتقى الجمعان وعينك ما تشوف الا النور
والجيش المصرى اخد علقة
والجيش المصرى اخد علقة
مأخدهاش حمار ف مطلع ولا منزل
وانتهت الليلة بانتصار الاحباش
انتصار ساحق ماحق
وكانت الهزيمة مروعة
العيال انقتلت كلها تقريبا
ومرجعش الا زى ما بيقول الرافعى
"ولم ينج منهم الا النزر اليسير"
اللى زاد وغطى بقى
ان أرندوب قائد الحملة بذات سخصيته
انقتل
ومات معاه أراكيل بك نوبار محافظ مصوع
وكان قريب نوبار باشا
يعنى الحملة الاولى اتشنيرت
وراحت ف الوبا
وكما قال سلطان السُكرى بقت ...
وكما قال سلطان السُكرى بقت ...
طب اخبار الحملة التانية ايه يا ولاد
بتاعت منزنجر
شوفولنا فين اراضيها .. ؟؟
شوفولنا فين اراضيها .. ؟؟
الحاج منزنجر راح على تاجورة
ومعاه 3 بلوكات
جنود البلوك زمان مكنش عدد كبير يعنى
ويبدو انه كان ناوى يزود القوات دى
والجدع يا نضرى خد بعضه هوه ومراته
مع شوية عساكر للحماية
ونزل عند بحيرة اوسا
عند امير الاقليم هناك
واللى عمل نفسه مع مصر
بينما كان اللى ف القلب ف القلب
بينما كان اللى ف القلب ف القلب
ومصاء الخير يا جماعة
اهلا وسهلا يا حاج منزنجر
قاصدكم ف عشا وبيات وكدهون
يا خبر اتفضشل بيتك ومطرحك
ودخل الأخ ينام ومعاه المودام
ف كوخه على شط البحيرة اوسا
والقمر ف السما والنجوم حواليه
والجو شاعرى
والجو شاعرى
ومطرة خفيفة وفشك فشك
وهووووب رجالة الأمير
دخلوا على منزنجر الكوخ
وجزروه هوه مراته ورجالته #أى
وبيقولوا ان واحد بس اللى نجى م الفيلم دا
كان بكباشى واسمه محمد افندى عزت
سى محمد جرى على تاجورة
ولم باقى الحملة ورجعوا مصوع !!
بس ومنظرك بقى وحش قوى
يا حاج ابو توفيق !
معركة ارندوب مات قائدها واغلب افرادها
فوق ال3000 نفر
والأحباش اخدوا اكتر من 2200 بندقية
واستولوا ع المدافع اللى عددها 16
وبيقولوا انهم حطوا مدفعين
ف اكبر ميدان بالعاصمة الحبشية انذاك
كتفاخر يعنى وفشخرة
اما الحملة التانية فاتوكست روخرا !!
ومنزنجر مات 15 نوفمبر
يعنى بعد هزيمة الجيش المصرى
بقيادة ارندوب ف 11 نوفمبر
يعنى الحملتين اتشبحوا ف 5 ايام بس
انا مكسوفالك جداااا
طبعا اخبار الهزايم وصلت مصر
اسماعيل انقهر يا نضرى وزعل جدا
وبيقولوا انه راح لمشايخ الازهر
وطلب منهم الدعاء
شيخ الازهر والعلماء اتجمعوا
وقعدوا يقروا ويدعوا لعل وعسى
واسماعيل قرر يرد ع اللى حصل دا
بسرعة وبحسم
الا منظره بين الامم اتهز
وكرامته اتبعترت وبرستيجه بقى عيضة
ولازم يرد ع الهزيمة دى
بعدين يوحناس يستغلها فرصة
ويدخل على ممتلكات مصر ف السودان
والآية تنقلب !!
بعدين يوحناس يستغلها فرصة
ويدخل على ممتلكات مصر ف السودان
والآية تنقلب !!
وبدل ما حد ابن حلال يهمس ف ودنه
ويقوله لم التعابين يا سمعة
العيال بتموت
الظاهر هوه مكنش مقسومله الخير
وانكتبله شر جديد تانى
والراجل يا خويا بدل ما يصلح غلطته
بالاعتماد ع الاجانب ف قيادة الجيش
برضو راح يدور على قائد
بس لا دنمراكى ولا سويسرى
المرة دى امريكانى
الأخ الجنرال لورنج وارد الحرب الاهلية ف امريكا
وخرج منها يدور على سبوبة
وخرج منها يدور على سبوبة
فطبعا ملقاش انسب من خديوى مصر
يشتغله .... ويشتغل عنده
واداه الباشوية
وامره بتكوين رئاسة اركان ف جيش مصر
وطبعا سى لورنج جاب تحت ايده امريكان بالعبيط
يقال انهم وصلوا ف مرحلة ما لـ 55 ظابط !
واداه الباشوية
وامره بتكوين رئاسة اركان ف جيش مصر
وطبعا سى لورنج جاب تحت ايده امريكان بالعبيط
يقال انهم وصلوا ف مرحلة ما لـ 55 ظابط !
الخديوى اسماعيل اصدر امر
بأعداد حملة جديدة
عددها النوبة دى 15 ألف نفر يا ثامح
بس فيه وسطهم حاجة جديدة
انه هيبعت ابنه حسن
وحسن ابو على سرقة المعزة
كان لسه يا دوب راجع من المانيا
بعد ما درس شوية علوم عسكرية
على ما قسم
والواد يا خويا لا حارب ولا اتنيل قبل كدا
انما عادى نبعته
طالما معاه الجنرال لورنج
اللى اكيد عارف كل حاجة #اوماااال
والخبر اهو ف الوقائع المصرية
بيقول
"علم مما سبق ان امة الحبشة
صدرت منها أفعال وحشية
وتجاوزوا حد الاخلال بالامنية فى الحدود
المصرية فجبرت الحكومة الجليلة الخديوية
على ارسال فرقة عسكرية الى الحدود الحبشية
وقد تعين فيها بمأمورية أركان الحرب
حضرة دولتلو حسن باشا ثالث الأنجال
السمية الخديوية المأذون فى الحضور الى هنا
من المانيا المشتغل فيها منذ مدة
بالفنون الحربية وحيث تأهب للسفر
كان الله معه مدت فى يوم السبت
من الأسبوع الماضى بسراية عابدين السنية
مائدة من حضرة جناب الخديوى الأفخم
دعى اليها كل من حضرات أعضاء عائلته
الكريمة وأعاظم الامراء
والمأمورين الملكية وأكارم ضباط الجهادية "
الى اخر الخبر
وانه سى حسن ركب القطر
بعد ما باس ايد بابا الخديوى
وسافر على السويس
ومن السويس ركب المحروسة شخصياااااا
وراح على مصوع عشان يحارب !
والمثير ان سجلات عابدين
متكلمتش كتير عن الحملة دى
ولا اللى قبلها ولا اتكلمت عن النتايج
وكأنهم تعمدوا تجاهل الهزيمة المرة
بس احنا هنعرف تفاصيلها من الخصوم
ومن المؤرخين اللى مباعوش ضميرهم
وكمان هنعرف تفاصيل الحملة التالتة دى
تحديداااا من احد محاربينها الثقات
الحاج احمد عرابى سخصياااااا
اللى حضرها بنفسه
وزى ما قولنا قبل كدا
الخديوى اسند قيادة الحملة التالتة دى
لجنرال امريكى اسمه لورنج
ولحسن ابنه
ولشخص تالت اسمه راتب باشا
وواضح ان حسن كان شرابة خرج
وكيس جوافة لقلة خبرته
ورايح منظر
بس لكن الحل والعقد كان ف ايد الامريكانى
ومعاه الباشا الشركسى راتب
اللى كان زفت
ولورنج زفتين
والتنين جعدوا يتخانجوا
ويشتتوا القوات بالقرارت
غير الندالة اللى تجلت ف اروع صورها
وحصلت مهازل بيحكيها عرابى بنفسه
ف مذكراته عن الحملة الزرقة دى قائلاااا
" لما سارت حملة الجيش المصرى إلى
الحبشة كنت أنا العبد الفقير إلى الله
مأمورا لهذه الحملة فى عهدتى عشرة آلاف
حيوان من الجمال والخيل والبغال
وأغلبها أخذته الحكومة من المصريين غصبا
وبلا ثمن، هى وعلفها من الفول والشعير
والذرة والتبن، الذى أخذته الحكومة أيضا
من الأهالى بلا عوض
وكان الخديوى إسماعيل قد أسند قيادة الحملة
إلى راتب باشا سردار العساكر المصرية
وأمره بصفته قائد عموم الحملة
بأن يكون مقيدا برأى خواجة أمريكى
هو الجنرال لورنج رئيس أركان حرب
العساكر المصرية
كما كان معظم رجال أركان الحرب معه
من بنى جلدته "الأمريكية"
أما جميع الآلايات -أى الكتائب-فمن الأمراء
والباشاوات والجركس إلا واحدا فقط
يدعى محمد بك جبر، لا وزن لرأيه معهم
ولا اعتناء "
وكل دا لحد دلوقتى طبيعى وعادى
من عهد جدهم محمد على
والجيش كبراته هما الاغراب والأتراك
والمصريين لا ليهم وزن ولا قيمة ..
الغير طبيعى هوه اللى حصل
لما ابتدت المعركة
ويوحناس قرر يواجه الحملة التالتة
اللى بعتها الخديوى
واللى بعد ما وصلت مصوع
اتحركت ناحية الحبشة
المرة دى سماعين باعتلكم خمآشر ألف
يا حبشيين
قوم يوحناس هيطلع أصيع منه
ويحضرله 20 ألف مقاتل
يا ليهوى يانا يامه
وطبعا خناقات داخلية بين القواد
ودهس ف بلاد ميعرفوش اولها من اخرها
على ما اتحركوا برا مصوع
ووصلوا لحتة اسمها قورع
وعسكروا
يوحناس مش هيستناهم بقى
راح زاحف برجالته على قورع
ويوم 7 مارس 1876
كانت المعركة الحاسمة والاخيرة
حد من بعييييد يسالنى
اكيد اننا اتعلمنا م الهزايم السابقة
اكيد اننا اتعلمنا م الهزايم السابقة
وشدينا حيلنا النوبة دى
وانتصرنا يا شهرو .. صح ؟؟
محدش يسألنى
اتعلمنا ايه دحنا اتعلم علينا !
وطبق الأصل العلقتين الاولانيين
لا قلم نقص ولا قلم زاد
اتعمل فينا الجلاشة والكنافة
والقطايف بالنوتيلا يا باشا
والخساير البشرية كانت بالهبل
وبيقولك اتاخد 250 أسير
دول اللى فضلوا عايشين الظاهر !
والوكسة الواد حسن ابن اسماعيل
ماله ؟
بيقولوا حسن وراتب باشا ولورنج باشا
هربوا بأعجوبة من موت محقق
ولاذوا بالفرار ... !
يا زين ما خلفتى يا زينب
ويا زين ما اخترتى لرياسة حملتك
:)
لحسن حظنا ان عرابى كان هناك عشان
يحكى اللى مقلهوش الناس التانية من بؤس
ومرار طافح شربناه هناك
البهوات كانوا عاملين حسابهم
وحاطين خطة للهروب وقت المدعكة
واياكش الباقيين يولعوا
عرابى بيقول اهو نصا
" وفى هذه الأثناء، أى أثناء الثلاثة أشهر
التى عسكر جنود الحملة فى بلدة مصوع
قبل بدء القتال كان أحد المبشرين
الفرنساويين فى بلاد الأحباش،
يتردد كل يوم على الجنرال الأمريكى لورنج
رئيس الأركان فى الحملة المصري
أما السبب فقد ظل خفيا علينا،
إلى أن اتضح جليا حينما فوجئنا
عند بدء القتال يوم13 سبتمبر 1876
بجميع الضباط الأوربيين والأمريكان
يلقون طرابيشهم الرسمية على أرض القتال
ويرتدون القبعات الإفرنجية
ويربطون حول أعناقهم مناديل بيضاء
كإشارة خفية كإشارة خفية تميزهم عن غيرهم
من العساكر المصرية،
وتحفظهم من الحراب الحبشية عند التلاحمات القتالية
حيث أخذ عساكر يوحنا ملك الحبشة
يضربون حرابهم المدببة فى عسكرنا المتعبة
إلا من كان منا على رأسه قبعة
أو حول عنقه منديلا أبيض
أما من أسرع يركض بجواده للهرب
فكان مثل راتب باشا قائد عموم الحملة المصرية
وهو جركسى الجنسية،
أو مثل حسن باشا ابن الخديوى الذى هرب
هو الآخر على فرسه كالرهوان
مع الجنرال الأمريكى رئيس الأركان
بعد أن تسبب بخيانته لنا فى الهزيمة والخذلان"
وخلصت الشهادة بتاعت عرابى عن هولاء الاوغاد
طيب
ادينا انهزمنا شر هزيمة
ادينا انهزمنا شر هزيمة
ومات الاف الرجال وهرب القيادات الكبيرة
ماذا بعد ؟؟
الحقيقة ان يوحنا احتفظ بالاسرى
عشان يتطنط ع الخديوى اسماعيل !
وقال هستناه لحد ما يجيلى راكع
ويطلب الصفح والغفران وكدا
اسماعيل وصتله الأخبار المنيلة بنيلة
قوم مش يراجع نفسه ويقول انا غلطت !!
ابضنننن
دا المدهول على عينه ركب الكارتة
وراح ع الأزهر تانى قال عشان يبستف المشايخ
ويقولهم ازاى دعواتكم مجبتش نتيجة
ازاى ؟!!
شيخ الازهر سكت تأدبا
لما لقى اسماعيل شايط ومدخن
لكن من اخر المجلس سمع صوت بيقوله
انتا السبب يا افندينا !!!
بيبص كدا لقاه الشيخ البشتى
احد شيوخ الازهر المعروفين بالجرأة وقولة الحق
واللى مستناش لما الخديوى يسأله
انا السبب ازاى
وكمل الاجابة متطوعا
قائلا : "إنا روينا عن النبي (ص)
إنه قال: لتأمرون بالمعروف ولتنهون عن المنكر
أو ليسلطن الله عليكم شراركم
فيدعوا خياركم فلا يستجاب لهم’’
اسماعيل طلب يشوفه لوحده
الشيخ راح ع السراية
وزملائه قالوا دا خلاص مش راجع تانى
:)
الخديوى سأله ليه قولت كدا ؟؟؟
البشتى رد عليه بمنتهى البساطة
لان مصر ف عهده ترتكب فيها المحرمات
زى الزنا وشرب الخمرة وغيرها
من تقاليع فاسماعيل قاله احنا بننقل المدنية
من اروبا ودى من مشتملاتها !
الشيخ قاله خلاص
يبقى متقولش ان الازهر والمشايخ والدعاء
مجبوش نتيجة .. !!!
وانتا السبب يا أفندينا !!!
الحقيقة افندينا كان السبب فعلا
بسوء التدبير والطمع
والاستهتار بحياة افراد الجيش
والحقيقة كمان ان الوضع كان نيلة
ف الحبشة
بس لحسن الحظ وتدابير ربنا
الأسرى عند الملك يوحناس كان من منهم
واحد مصرى اسمه محمد بك رفعت
الجدع كان رئيس القلم التركى
ف ديوان الجهادية
والظاهر كان ربنا كارمه ومديله طولة بال
ودأب وسماحة فالجدع دخل دماغ يوحناس
واقنعه بالصلح مع مصر
وكانت شروط المنتصر كالآتى
انسحاب أى جندى مصرى من الحبشة
ورجوع الأسرى لمصر
وفتح طريق بين مصوع والحبشة للناجين
وبقاء سنهيت تحت الحكم المصرى
وملكوش دعوة بالحبشة يا مصريين
وبعتوا للخديوى بالشروط دى
ابو توفيق وطى راسه ودلدلها
وقال موافق
هيقول حاجة غيرها .. ؟!!!
وكويس انه مبعتش حملة رابعة
ينقنق فيها الاحباش شوية بعد الضهر
ويلعبوا ف ارواح عيالها النشان
ورجع الأسرى والناجين لمصوع
ومنها للسويس
وبس كدا
شكرا
وكنا روحنا ليه من اصله .. ؟!!
النتايج بقى بتاعت حملة الحبشة
ولا أى زفت وهباب الا الخساير وفقط
مصر خسرت ف الوكسة دى
بتاع 8500 روح
وربنا ياخدك يا سمعة كمان وكمان
الخساير المادية بقى
فبيقولوا ان الحكومة المصرية تكبدت
ف هذه الحرب ما يقارب الـ 3 مليون جنيه
يا ثامح !!
فوق كل دا الجيش المصرى
اتعلم عليه تعليمة السنين
لدرجة ان معركة جوندت اتعمل باسمها
وسام يعتبر هو أعلى وسام عسكرى
ف اثيوبيا من تاريخها وحتى هذه اللحظة .. !!
#اخص
الجيش المصرى بسبب سياسات اسماعيل
الفُللى كان مقصد لمرتزقة بالهبل
من كل مكان ف العالم
وبسببهم انحدر الحال بالجيش
وانهزم انهزامات موجعة
وكأنه بإيده جاب السوس ينخر ف عضمنا
ودفعلهم فلوس كمان .. !!!
وهوه دا اللى خلى عرابى ورفاقه يعمل ثورة
بعد سنوات عشان ياخدوا حقوقهم
ويلحقوا باقى الجيش من سفك الدماء المتكرر
ببلاش ف كل حتة ف الأرض
ارضاء للتراكوة
وعلى ايد مصاصين الدماء المرتزقة
المزقوقين علينا من كل حتة
والمضحك المبكى ان الموكوس راتب باشا
اللى هرب زى النعجة من معركة قورع
بعد سنتين من رجوعه
هيمسك نظارة الجهادية ف وزارة نوبار
1878 وكأنه بيكافئ على خيابته !!
وهيخش ف صراع مع عرابى وغيره
من رفاقه اللى شافت مدى وضاعته وخيانته
حسن باشا ابن الخديوى بعد رجوعه
من السفرية دى
بابا عمله مأدبة تانية
وبعد الحفلة والهيصة والهوليلة
عشان نفسوياته متتأنسرشى
وتهيئة خفيفة كدا لأنه يبعته ف حرب البلقان
سنة 1876 بناء على طلب الباب العالى
اسماعيل نفسه انتوا عارفين
هيقعد ف الحكم يبعتر ف فلوسنا
ويعمل ف غلطات وسقطات
ويحفر قبره بإيده لحد ما يتعزل بفرمان
سنة 1879 ويمسكوا ابنه توفيق مكانه
ويخرج الخديوى من معشوقته مصر
ويموت ف الغربة
وهوه بيتنشق على هواها وترابها
ميدخلهاش الا جثمان ف صندوق
عرابى برضو انتوا عارفين اللى جراله
بعد رجوعه من حرب الحبشة دى وما تلاها
من احداث هيعمل الثورة
بعد ما يسخنوه الرفاق
ويناطح ف الخديوى توفيق
اللى هيستقوى بالانجليز على الفلاحين
الرعاع اللى عاوزين يشيلوه من عرش بابا
وجدو اللى سايبنهوله
وهيفضلوا ناقر ونقير
والمحتل يستغل الفرصة
لحد ما يدخلوا مصر 1882 بالمكر
والخديعة ومعاونة توفيقة
كما كان الساخرين يسمونه وقتها
ويتحاكم عرابى ويتنفى خارج مصر
لسنوات طوال ويرجع تانى يعيش ف الظل
وبعد موته بسنوات بسيطة
هتقوم ثورة 1919
واخيرا خلصنا
ومليش أى ملاحظات غير حاجة واحدة بس
الجيش دا معمول لحماية ارض بلاده
معمول لحماية اهل البلاد دى
ولاده شغلتهم معروفة ومحددة
وارواحهم ف رعاية الله
ومسئولية اولى الامر فيهم
قوم اسماعيل ف عز عزه بعت العيال تتشرد
ف كل حتة عشان خاطر اوامر الباب العالى
فالعيال ماتت والجيش ضعف
والفلوس راحت ف جيوب المنتفعين
وهوه نفسه - الخديوى- اتنطر من على كرسيه
يعنى خسارة على كل الجبهات
فمعلش يعنى ...
احنا ايه اللى حشرنا ف الحبشة
ولا اليمن ولا ليبيا
ولا غيرها
ما كل واحد يخليه ف بلده وحاله
ومحتاله وبس .. !
ايه اللى يخلينا نودى ولادنا تموت
ف اراضى غريبة ملناش فيها لا ناقة
ولا جمل
ولا آه نسيت
بيقولوا احنا لينا فيها رز شكاير شكاير
لأ كدا شغال
روحوا موتوا يا ولاد ... !!
وتوتة توتة خلصنا حدوتة وكسة الحبشة
وخشبة حبشى
اللى اخدنا بيها فوق نافوخنا
اللى اخدنا بيها فوق نافوخنا
تصبحوا على ألف خير
----------------
حكاية النهاردة والصور من مواقع مختلفة ع النت
تقويم النيل - الجزء الخامس : أمين سامى
عصر اسماعيل : عبدالرحمن الرافعى
---------------
سعدية سليم @sa3deaselim
دي مصر واضح ان طول عمرها ملطشة
للكبير والصغير
Tricksy @Tricksy4
و أخيرا توضيح لأسباب الثورة العرابية
بدون كلام مدغم .. شكرا
Tricksy @Tricksy4
ده كان كود خيانة جماعي مش كده ؟؟
WTHend @HendZayed
ارنوب ومازنجر،
انت جى تهرج ولا جاى تعزى!
Arminuis @amrsaleh88
الرجالة دي مش لابسة بنطلونات ليه يا وديع
أم 4 وأربعين @daliaref3at
شبه حملة المكسيك
طول عمر عساكرنا غلابة
انا أخواني @alemabada
خير اجناد الارض لا يهزمون ابدآ
في الكتب الدراسية
human1 @human1being
مصر ف الوقت ده كانت مثل دبي
وأطلق عليها سوق ناشئة للاستثمار
ووجود بيوت الهوى فيها لانها كانت ممنوعة
في أوروبا
ليست هناك تعليقات:
إرسال تعليق