بادىء ذى بدء حكاية النهاردة
عن سخصية من العصر الحديث
ومتعتبرش حكاية انما هيا فضفضة
و زى ما تقولوا كدا ... وصلة غرام وهيام وعشق
وصلة غرام ف مين يا طمطومة ؟!
أقولكم ف حب راجل بجد
مش فالصو
مش فالصو
ورجالة توتير تجيلى على جنب شوية كدا
والحريم اللى بتفهم ... يحضرن
عشان يقروا حكاية الراجل دا
واللى بحكى عنه جوزائى بحت
اتولد ف ليلة 7 من شهر يونيو سنة 1923
من أب كان يوما نقيب للمحامين
يعنى من عيلة ارستقراطية صِرف ..
إتولد الفتى وبعد كام سنة كتب عليه
انه يحضر طلاق الأب والام وهوه لسه صغير
واصبح وجوده مشكلة للطرفين
بسبب جواز كل حد فيهم
بعد شوية ...
فقرر الأب يبعته على مدرسة داخلية
واهو الولد يتربى تربية حازمة وكويسة
وفعلا الحقه بالمدرسة الأيطالية ف اسكندرية
وف سجلات المدرسة وقف خجلا يرد عليهم
وهما بيسألوه و بيكتبوا بياناته
- اسمك ايه يا بنى ؟
- اسمى ... محمود ... مرسى
والفتى محمود الخجول
اللى كان عنده أزمة نفسية نوعا ما بسبب ظروفه العائلية
اتعلم يلاحظ ويراقب ويحلل صمتا ما حوله
وبعض الطليان ف مدرسته زهقوه
كانت فيه روح فاشية متفشية بين المدرسين والطلبة الطلاينة
خلت محمود يحتقر العنصرية
ويتجه لفكرة الانسان والقيم والفلسفة
لدرجة انه يقرر يدرسها
وفعلا يخش كلية الأدآب قسم الفلسفة
ويتعمق ف النفس البشرية
وانتوا عارفين اللى يعيش ف اسكندرية
ويجاور بحرها
وازاى الفن يسكنه من غير ما يحس
محمود مرسى اللى بيعشق السينما
والادب والمزيكا والفنون عموما
هيقرر يدرس الفن وتحديدا فن الإخراج
لكن ظروفه المادية والاجتماعية هتمنعه مؤقتا للأسف
فيقرر يشتغل ف التدريس ويدّرس الفلسفة
لحد ما القدر يتدخل
ووالده يصاب بجلطة ويبقى قعيد الفراش
وبعدين ربنا يسترد وديعته
ويورث محمود ف ابوه
واخيرا تحرر من أى ارتباط بوالد ومسئوليات وتدريس
وياخد الفلوس اللى ورثها
ويروح على فرنسا بلد الفن والنور والجمال
ويدرس ف معهد هناك .. فن الاخراج السينمائى
والفلوس تخلص والعيشة غالية
فيدور على شغل
ويلاقى شغلانة فعلا ف القسم العربى بالإذاعة الفرنسية
والدنيا حلوة وزى الفل وتمام
قوم ييجى عبناصر ويأمم القنال فجأة
فالأذاعة الفرنسية تطرد محمود
وتقوله أوروفواااار .. وسلا.. فى .. آمونامور
محمود مرسى ولا يهمه
راح شادد الرحال على بلاد الأنجليز
وهناك يدور على شغل فيشتغل ف الـ B B C
والدنيا تبقى حلوة وفل
واشتغل محمود ف القسم العربى
بهيئة الاذاعة البريطانية
و هما 7 شهور يا دوب
وقام العدوان الثلاثى على مصر 1956
ومش هيستنى لما يقولوله جودباى ماى ديير
ثم هوه اصلا استنكر
انه يقبض مرتب من اعداء بيحاربوا بلاده
راح مقدم استقالته
وراجع على مصر طوالى
عبدالناصر لما عرف بتصرف محمود مرسى
اتكيف قوى
وأمر انهم يشغلوه ف الإذاعة المصرية تقديرا لموقفه
وغيرته على الوطن
وربك قطع من هنا ووصل من هنا
واشتغل محمود ف البرنامج الثقافى بالإذاعة المصرية
واخرج برامج كتير
وأعمال من الأدب العالمى
وعمل شغل حلو
وترجع تانى نداهة السينما وسحرها .. تندهه
فيقرر يسافر المرة دى على ايطاليا
بلد التاريخ والحضارة
ويدرس الاخراج فيها
الدراسة مكنتش خالصة قوى لأن التلفزيون المصرى
كان تم انشائه وكانوا محتاجين كوادر تعرف تشغله
وتعمل اعمال فنية
جنب بث الاخبار
وعرض الأفلام والبرامج
وفيما يبدو ان استديوهات روما ف هذا التوقيت
كانت هيا القبلة
والراجل سافر ورجع ع التلفزيون المصرى
واخرج كام حاجة اغلبهم كان مؤيد لفكر الدولة
والاشتراكية وحاجات موجهة وكدا
وفضل حلم الأخراج السينمائى ف خياله
ويقال ان يوسف شاهين عرض عليه فيلم باب الحديد
بدور فريد شوقى طبعا
:)
مرسى وقتها رفض بذوق وقاله انا مخرج وبس
وبعد رجوعه من ايطاليا واستقراره ف مصر بشكل نهائى
عرضوا عليه يدرس ف معهد السينما
ومعهد الفنون المسرحية
والراجل مشكورا وافق
وابتدى المحاضرات فعلا
وهنا هيبتدى القدر يخططله ف اتجاه تانى خالص
محمود كان مكتفى بالتدريس
وصقل امكانياته بالعلم وبس
وكان جنب دا شخصية جذابة وساحرة ومجنن البنات
يعنى كان الواد التقيل .. الراسى
المثقف .. الذكى .. الخجول
قصره البنات ف المعهد كانوا بيرسموا عليه
وكل واحد تستمنى رضاه
ومن ضمنهم واحدة
هيا سميحة أيوب اللى كانت
الممثلة الواعدة وقتها وبتشتغل ف اعمال
وتدرس ف نفس التوقيت
واللى يعرف الست دى او يراقبها وهيا بتمثل
هيعرف ازاى انها صنف مختلف
كانت شخصيتها قوية
وطموحة
وواثقة ف نفسها
وجريئة لفتت نظر محمود مرسى بذكائها وتفردها
وبعد محاضرة من المحاضرات ما انتهت
وكانوا ف زيارة لزميل
وهما خارجين عرض عليها يوصلها ..
كان بينهم مناقشات عامة قبل كدا كتير
ف اطار الدراسة
وهوه كان معروف عنه انه راهب الفن
ومبيفكرش ف الجواز اطلاقاااااااااا
وبيقول مش ممكن أتجوز
وعلى رأى محمد صبحى بقى
مبتفكرش ف الجواز ليه يا بابا ؟
معندكش شقة
معندكش شغل
معندكش فلوس
اومال معندكش ايه يا مدحت .. ؟!!
المهم الجدع اندلق وحبها
بس الجوزائى التقيل بقى
اللى بيفكر ألف مرة ف القرار
ومرة بيوصلها
وبيحكوا ف أى كلام
وبعدين فجأة قالها
- أنا عاوز اقولك ان انا مبتجوزش ..!
راحت سميحة بمنتهى التلقائية
وخفة الدم
قعدت تتلفت حواليها شمال ويمين
وبعدين قالتله
- ومين هنا فتح بوقه وقال انه عاوز أو جاب سيرة جواز .. !
طبعا كسفته كسفة محترمة
وقعدت تتكلم ف مواضيع تانية عاااادى خالص
ونزلت عند بيتها
ولا كأن فيه حاجة بالمرة
ومع السلامة باى باى ...
وتانى يوم كلمها واعتذر
وبعدها طلب إيدها وراح لأهلها واخدها لأهله
وبعد مدة اتجوزوا
كانت سميحة ف الوقت دا عندها طموح
تبقى نجمة سينمائية
وكتير عرضت على محمود يمثل وهوه يرفض
لحد ما جه فيلم
واتحدته لو يقدر يمثل دور فيه
وقبل
كان فيلم اسمه انا الهارب
ومحدش يسالنى عنه
عشان انا مش فاكرك ياض
عشان انا مش فاكرك ياض
وتقريبا شوفته مرة
ووقع من دماغى
المهم مرسى عمله
واجاد
لدرجة انه بعد عرض الفيلم
انهالت عليه العروض من كل حتة
ولفت انتباه الست فاتن حمامة
اللى عرضت عليه دور ف الباب المفتوح
وبعدين مثل معاها ف دور اكبر
ف فيلم الليلة الاخيرة
وابتدى المشوار بقى يكر افلام
واعمال متميزة ومختلفة
ولنا هنا وقفة لثوانى ...
عايزة أعترفلكم ان انا دخلتى مع محمود مرسى
كانت غلط من البداية
ومش غلطتى الصراحة
يعنى من وانا عيلة التلافزيون مكنش بيعرضله
غير افلام بعينها
قوم انا فتحت عينى على محمود مرسى
وهوه شغال مع الانجليز ف ثمن الحرية
وبيعذب احرار ومساجين
وبيجوز واحدة غصب زى شادية
ومبهدل فاتن حمامة وبيضرب نادية لطفى .. !
وانا عيلة كانت فاتن حمامة دى محدش ييجى جنبها
دى الملاك البرىء بتاعى
فييجى هوه يهينها ويزغرلها ف الباب المفتوح
وييجى يسرق عمرها ف الليلة الاخيرة !
دا غير شغل الرعب اللى كان عامله ف شىء من الخوف
والاستبداد ف ليل وقضبان
ولا الزغلولة الكبيرة بقى
اللى هيا بتاعت كل مولد نبى
وراس سنة هجرية
وفيلم فجر الاسلام والكوابيس بتاعت بليل
ثم ان شادية أو فؤادة
وعرفت توقفله ف شىء م الخو
لكن لما التلفزيون عرض فيلم السمان والخريف
وحضرت مشهد ضربه لنادية لطفى
دى كانت الضربة القاصمة
لأنى كنت ف اوائل المراهقة
والهرمونات والفيمينست كانوا ف اعلى معدلاتهم
واصلا بحب نادية لطفى
وهيا غلبانة قوى
ازاى يضربها ...؟!!
وقررت يومها انى أقاطع الراجل الشيرس دا
ومتفرجش عليه
وروح يا زمان وتعالى يا زمان
وسافرت الامارات
وعرضوله هناك مسلسل
على الحجار ومحمود الجندى وكام اسم بحبه
وكمان انور عكاشة اللى عامل الشهد والدموع
فقولت طب أبص بصة كدا وامشى
ومشتريش حاجة
:)
وبصيت
وكانت البصة ..
فجأة كدا لقيت راجل تانى خالص
بملامح تانية خالص من اللى بحبها
وبتمناها ف الراجل
حنية وطيبة ومثالية
بأختصار خطف قلبى
ووقعت ف غرامه من يومها
وبقيت اتفرج على كل أعماله القديمة والجديدة
اغلب الجديد كان مسلسلات
وكانت غالبيتها على مستوى راقى
ومختلفة عن السرب
يعنى مثلا مسلسل زينب والعرش
من احب الاعمال واقيمها
واللى عاوز يطلع على تطور الصحافة ف مصر
من نشاتها لحد اخر الستينات
يشوف العمل دا
اللى كان مباراة بين عمالقة تمثيل
ومليان اسقاطات وجمال
ودور عبدالهادى الجزار اللى عمله مرسى
كان نموذج عبقرى لهذا الصحفى الانتهازى
لكن الصنايعى الشاطر
اللى بيعرف ازاى يكون رجل كل العصور
واللى احتجز زينب (الصحافة) رهينة طمعه لفترة
وبعدين هربت منه للى حبها واخلص لها بجد
الصحفى النقى اللى افرظته الثورة وما بعدها
وجسده حسن يوسف
مسلسل كمان اسمه الرجل والحصان
عن موظف ميرى رافض ينضرب حصانه بالنار
لمجرد انه خرج م الخدمة
وبياخده يهرب بيه
ويتحمل كل المتاعب اللى حصلتله مقابل دا
كان حاجة انسانية قوى
وصحيح نصوص أسامة انور عكاشة
تعلى أى فنان
تعلى أى فنان
لكن مش قادرة اتخيل أى حد لو كان عمل دور
عمدة الحلوانية
كان هيبقى بالجمال دا
صقر الحلوانى اللى بيجسد انور السادات وعصره
واللى مسك بعد صادق اخوه .. عبدالناصر
الدور كان مكتوب حلو قوى
لكن اداء محمود مرسى كان مبهر حقا
دوره كمان ف االثلاثية
واللى قرى نص نجيب محفوظ
هيتاكد ان المسلسل كان مشابه للراوية
ويكاد يطابقها مقارنة بالفيلم
مع احترامى ليحيى شاهين
اداء محمود مرسى ف المسلسل
هوه السيد احمد عبدالجواد حقا
بهزله وجديته وحنانه وانسانيته
بينما ركز الفيلم على الجزء الهلاس ف شخصيته
فقط للأسف
من العبث انى اتكلم عند دوره ف اغنية على الممر
لكن مثلا شخصيته ف فيلم امير الدهاء
استوقفتنى لأنه ف مقارنة برضو
سراج منير كان ممتاز ف امير الانتقام بتاع انور وجدى لكن مرسى ف امير الدهاء
كان لايق عليه شخصية الشرطى الذى لا يخدع
كان هوه اكتر واحد ف شخصيات الفيلم
اللى تحسه واخدها جد كدا
ومش سهل النظرات
والملامح الجامدة اللى متعرفش تقراها
محمود مرسى بقى وجماله
دور كمان بحبهوله قوى .. قوى
فيلم سعد اليتيم واللى من وجهة نظرى الغلبانة
أغلب الممثلين فيه كان لازم يمثلوه
ناقصين 15 او 20 سنة من عمرهم !!
يعنى دور الفتوات بتاع فريد شوقى
ومحمود مرسى
ونجلاء فتحى
واحمد زكى كان لازم يعملوه بدرى عن كدا
بس غالبا مكنش ينفع
لأنه مكنش هيبقى بالقوة والاداء دا ..
المشاهد اللى بتجمع بين الفتوتين .. بتعجبنى
بحس ان فعلا فتوات الزمن الغابر بالقسوة والجبروت
مش هيكونوا غير كدا ؟!!
هوه الحقيقة عمل أدوار حلوة كتير مختلفة ومتميزة
حتى لو مكنش بطل العمل
زى فيلم امواج بلا شاطىء اللى كان فيلم عجيب قوى
وواضح انه منقول عن قصة اجنبية او فيلم
لأنه مش مصرى خالص ف حاجات كتير
وفيلم الشحات اللى استعان فيه
بخبرته ف دراسة الفلسفة
واللى بالصدفة هيا نفس دراسة نجيب محفوظ
أدى دور المصاب بالإكتئاب
وجسد ببراعة ازاى البنى آدم
ممكن بعد ما بقى عنده كل حاجة يتمرد على النعم
وينزوى جواه ويتحول بمرور الوقت
لشحات بيتسول معنى الحياة ولا يجده
وزوجتى والكلب مع سعاد حسنى
و مسلسل العائلة
وغيرهم من اعمال تنتمى لمدرسة الأداء الطبيعى
اللى فيه الفنان بيمثل ومبيمثلش
ودوره ف حد السيف
وكيل الوزارة اللى بيشتغل قانونجى
ورا رقاصة ف الملاهى الليلية
عشان يعرف يصرف على ولاده
وعاشق وغاوى المزيكا
وطبعا دوره ف ابو العلا البشرى
اللى بيبهرنى كل مرة اتابعه
هذا الفارس الدونكيشوتى
اللى جاى ف زمن غلط يحارب عشان الصح
وشوف يا مؤمن
شوف يا مؤمن
الزمن وعمايله
محمود مرسى اللى كنت اما اشوفه معدى ع الشاشة
اتخرع واقلب القناة
بقيت احبه واموت فيه
وبقى عادى بقى ..
يعنى ايه حصل لما حبس فؤادة
و ايه يعنى شخط ف فاتن حمامة ولا اتجوزها بخدعة
وايه كمان لما نكد على نادية لطفى عيشتها
لحد ما خانته
ويعنى ما فؤادة رخمت عليه وهوه بيحبها
وفاتن كان لازم تعرف انه عاوز مصلحتها
ونادية لطفى خانته
ثم انه ف السمان والخريف لما طردها اداها هدومها
يعنى مش وهوه بيرميها ع السلالم
رمى الهدوم والجزمة ف وشها
كان ممكن يطردها بس
وميدهياش حاجة
الراجل اداها بيبى .. والهدوم فوق البيعة
كتر خيره يعنى
#فاتيما_لما_تبلعلك_الزلط
واصلا الحريم مستفزة .. بتزعلوووووه ليه
بقى بالذمة دا راجل حد يزعله
بالذمة ؟!!
ونرجع لحكايته كراجل بقى ..
الست سميحة أيوب ركزت ف الشغل
والمسرح والفن عموما
وبقت الحياة بينهم صعبة فقرروا يتطلقوا
وكانوا خلفوا ولد اسمه علاء .. طبيب نفسى
وحاول يجرب حظه ف التمثيل بكام عمل
بس معلمش مع الناس
والموهبة لا تورث
سميحة أيوب كانت متجوزة قبل محمود مرسى
من محسن سرحان يا عيال
وكان عندها ولد منه
وبتحكى انه محمود مرسى كان بيعامله
احسن ما بيعامل علاء
#الناس_الكّومل
وبعد طلاقها من محمود مرسى
اتجوزت سعد الدين وهبة الكاتب المسرحى المعروف
وقعدت معاه لحد ما مات
ودى كانت أخر جوازتها
اما محمود مرسى بقى
فبعد الطلاق قرر ميعدش التجربة دى تانى
وقعد راهب فعلا
الجوازئيين بقى لما نيفسهم تتسد
وقعد كدا مركز ف الفن والأعمال الدرامية
المسلسلات يعنى
ابو العلا البشرى 2
لما التعلب فات
بنات افكارى
ولحد ما ربنا استرده سنة 2004
وهوه بيشتغل ف مسلسل بيتصور ف اسكندرية
يعنى مات
وهوه بيّفن
:)
وقبل ما اقول توتة توتة
والملاحظات
والملاحظات
هحكيلكم عن حكاية حصلتلى معاه
إحم إحم مش معاه قوى
بس معاه برضك
المهمممم هقول اهو
ف فترة ثانوى ..
يعنى ف العصور الوسطى
ما قبل الديناصورات بشارعين كدا
طبعا كنت شوفت ابو العلا البشرى
ووقعت ف غرام محمود مرسى وخلِصنا
قوم خالة أمى اشترت شقة
الشقة كانت ف وسط البلد
وكانت ف الأصل شركة انتاج
قوم انا وماما كنا بنروك نرتب الشقة مع قريبتنا
عشان ست كبيرة وكدا
وف مرة داخلين عليها ..
قالتلنا اسكتووووو
مش محمود مرسى اتكلم من شوية ؟!
طبعا انا سمعت الإسم قلبى كان ف ركبى
ف طريقه نزولا الى قاع القدم
محمود مورسى يا طنط ؟!!!
قالتلى آه الراجل اتكلم يسأل عن حد
فطبعا عرفته من صوته علطول
وقولتله الشقة اتباعت
وفرصة سعيدة وكدهون
طبعا مش عاوزة أقولكم
انى خليت طنط تعيد نص المكالمة كام الف مرة
وبعدها بقيت لازقة ف التليفون
زى الدب دا ما لازق ف الشجرة كدهون
وخالة ماما تقولى يا بنتى مش هيتصل تانى خلاص
قولتله الشركة باعتلنا الشقة وعزلت
وانا اقولها يمكن ينسى
يمكن يجرب يتصل صدفة
يمكن أى حاجة
#عاااااااااا
ومتصلش طبعا ..
ماشى
معلش
انا مقدرة برضو ظروفه
وانه كان مجروح عاتيفيا
ومش حابب يكلم حد
ومش هخدها بشكل شخصى
وتوتة توتة خلصت الحدوتة
نقول الملاحظات
قبل الليميت ما يدوس على لسانى
وملحقشى اكملللللل
1) احب اوجه اول كلامى للست سميحة أيوب
واقولها بالنيابة عن كل ستات مصر
يعنى انا عارفة انك شخصية
وفنانة عظيمة
وموهبة كبيرة وكدا
وانا بحبك والله
بس السؤال بقى
هل فيه واحدة تتجوز محمود مرسى ف هذه الحياة
وتتطلق منه يا ست ؟!!
لأ بجد يعنى
هوه سعد الدين وهبة على عينى وراسى آه
بس محمود مرسى
دا راجل يتساب دا ... ؟!!
#يلا_النصيب
2) تجارب الانسان وأوجاعه الناتجة عنها
ممكن ترفعه
أو تحط من انسانيته
وعليه يختار
محمود مرسى عانى من معاملة سيئة
من مرات ابوه لما كان بيزوره
بينما جوز امه كان راجل كويس معاه
ومتفاهم واحتضنه
فهوه لما اتجوز ست ليها ابن من زواج سابق
اختار يكون انسان
وميكررش العذاب دا
ويعيشه لحد
وسمحية أيوب نفسها بتحكى عنه
انه كان بيعامل ابنها من محسن سرحان
احسن ما كان محسن سرحان نفسه بيعامل ابنه
يعنى منتهى الرقى والاخلاق حقا
3) هوه صحيح قولولى بجد
البحر بيعمل ايه ف الناس ؟!!
اسكندرية واللى بيجيلنا منها وسحرها وفنها وفنانينها #الف_سلام_و_تحية_بجد
4) محمود مرسى سافر اكتر من بلد
وانفتح على اكتر من ثقافة
ويمكن دا اللى خلاه متفرد
وراسى ف ادائه
و بتخيله وهوه بيرطن بالفرنساوى #آخرااااشى
5) الرجالة مواقف فعلا
واللى عمله محمود مرسى
وقت العدوان الثلاثى على مصر نسميه ايه
غير ان الكرامة والعزة اللى محدش بيشتريهم
وهذا يقودنى الى
البهوات اللى شغالين ف دول وقنوات ضد مصر
الموقف بيتكرر
وزمان الدول وقفت ضد عبدالناصر
وقالت انقلاب وبتاع
وكررت نفس نغمة الأيام دى ... مع الفارق
ان حركة الضباط كانت انقلاب عسكرى فعلا
وخالصة من الجيش
بينما دلوقتى الوضع يختلف
ومهياش ثورة خالصة فعلا
لكن مهياش برضو انقلاب
و المهم موقفك انتا فين
محمود مرسى كان مع الشعب
اللى ساعتها بارك حركة الضباط
وبعد شوية مبقاش فيه فرق شاسع
بين اللى بيهاجم نظامك عشان يوقعه
وبين اللى بيهاجم بلدك لتركيعها
عشان كدا
هوه انحاز لمصلحة البلد اولا ..
وبعدين جوه البلد الناس تقطع ف بعضها
براحتهم بقى :))
#مجرد_رأيى_الشخصى
6) محمود مرسى بمقاييس زمنه
مكنش الفتى الوسيم اياه مكنش رشدى اباظة القمر
ولا فريد شوقى الفتوة
ولا شكرى سرحان وكمال الشناوى الظريف الشيك الخ
لكن قدر بالموهبة يكون نفسه
ويفرض شكله ولونه وطعمه المميز ف الإداء
والشخصيات اللى ميعملهاش غيره
ثم انه ع الصعيد الشخصى كان شخص مهذب جدا
الجميع ذكر الملحوظة دى
عارفين الجملة اللى بيكتبوها دى
بتاعت .. شخص دمث الاخلاق
اهو محمود مرسى كان الصنف دا بإمتياز
وانا شخصيا شيفاه زى مهو اكثر الفنانين وسامة وسحر
وهوه كمان نموذج للرجولة
و بحب انا
الرجالة الدمثة الاخلاق الرقيقة الشيك الحنينة دى
و الرجالة القاسيين لأ
المفتريين لأ
البياعين لأ
#الف_مرة
7) معرفش لو كان محمود مرسى
قبل عرض يوسف شاهين كان ايه؟
بتخيله خطيب هنومة
متهيألى قناوى كان هينتحرمن اول الفيلم ارحمله !
آه فريد شوقى مقدور عليه
لكن محمود مرسى دا حد يقف قصاده ازاى .. ؟!!
هوه العمر بعزقة !!!
8) ويبقى مشهد محمود مرسى ونادية لطفى
ف نهايات فيلم السمان والخريف
هوه اقرب المشاهد لقلبى
وهوه بيقولها انتى كدا بتقفلى باب الرحمة ف وشى ..
وهيا ترد انك انتا اللى قفلته ...
وبعدين تسامحه
وترجعله هيا والبنت
اللى كانت علا رامى بالمناسبة
:)
9) هذا وعلى صعيد آخر
محدش يزعل الجوزاء ويستهتر يا جماعة
الكويسين منهم زى البرادعى كدا
لما بيتوجعوا بينكسروا كسرة وحشة
وينقمصوا ويقفلوا على روحهم قفلة زرقا
وياخدوا جنب
ومبيرجعوش الا بصعوبة اذا رجعوا
اما الويحشين منهم ..
زى مرتضى منصور كدا
لأ براحتكوا زعلوهم للصبح وربنا يوفقكم
:)))
10 ) فيه اعمال وروايات واشعار ومقالات وحكايات
تعلمك من غير ما تاخد بالك
ازاى تكون انسان
تحاول يعنى ع الأقل
اعمال محمود مرسى كانت من ضمن هذه الأشياء
..
وبس
وتوتة توتة
طولنا عليكم
تصبحوا على ألف خير ...
--------------------------------------
Ahmed Rageh @Ahmed_Rageh101
واحب اقول في اخر القصة الجميلة دي
ان فيلم شىء من الخوف هو اكتر فيلم حبيته ليه
مع اني من طبعي مبحبش الافلام النكد
نشوي البحراوي @Nashwa14
يبقي مشهد عتريس ووفؤاده من احب المشاهد
ونظرا لحبي الشديد للرجل تعاطفت بشده مع عتريس
ورفضت فكره موته
وانه كان لازم ياخد فرصه
:)
مـيرڤـت ☺ @MervatSa3ed
يا جمال سفرياته :))
متمردة @NourAhm8080
هما دول الرجال
™الدبدوب ® @mazforever
يادى النيلة ..دول مستقصدينه بقى !!!
