الحكاية النهاردة حكاية مكان ..
بس واسع شوية
وسع الزمن والناس والعِبر المستخلصة منه
والاهم .. الإسم
إسم المطرح نفسه
بس قبل ما نقول الإسم هنرجع فلاش باااااك
لزمن الخلفاء الراشدين
وتحديدا زمن الفاروق عمر بن الخطاب
لما اقترح عليه عمرو بن العاص فتح مصر
وساعتها الخليفة قلبها ف دماغه
ولقى ان وقتها
وبعت قائده عمرو بن العاص الملقب بداهية العرب
على راس جيش محترم عشان يدخل مصر
وفعلا حصل ذلك
وبعد ما تم المراد من رب العباد
عسكر عمرو بجيشه ف مكان ما
بناء على نصيحة عمر بن الخطاب
مكان يكون متحصن من الغدر وهجوم الخصوم
عشان يوصله العدو لازم يعدى نهر
فعدى عمرو الجيزة
وضرب بخيمته ف وسط أرض فضاء ..
قرب حصن بابليون وحواليها خيام جيشه
ورجع تانى على اسكندرية
وفيه حكاية بتقول ان الجنود لما رجعوا
عمرو امرهم بفك الخيام اللى عند حصن بابليون
فالجند لقوا يمامة بعشها وبيضها على راس الخيمة
فعمرو اتباشر بيها
وقالهم سيبوا الخيمة زى ما هيا
وابتدوا يبنوا الناس حواليها
ومساحة العمار تكتر وتزيد
لحد ما يسموا المطرح بالـ (الفسطاط) ..
يعنى الخيمة الكبيرة
وبعدها يبنى عمرو بن العاص الجامع بتاعه
اللى اشتهر بإسمه
عشان يبقى اول مسجد جامع ف مصر
والجامع له حكاية لوحدة نبقى نحكيها بعدين براحتنا
المهم ان المطرح دا بقى هوه مقر الحكم
وقرب الجامع بنى عمرو بن العاص لنفسه بيت
بقى يحكم منه ويدير شئون الدولة الناشئة
والفسطاط اتعمرت بالجند العرب ف الاول
ثم أنضملهم المصريين
وأصبحت الفسطاط أول عاصمة إسلامية لمصر
ف عصر الخلفاء الراشدين
اللى مقعدوش كتير
وبعد مقتل سيدنا على
اخد معاوية بن ابى سفيان الخلافة لبيته
وانتقلت مصر من تحت حكم الراشدين للبيت الاموى
وبقت امارة من إمارات الدولة الاموية
وعمرو بن العاص إنضم لمعاوية
فقعده ف كرسيه حاكم لمصر
كما هو
مصر وقت الامويين كانت مجرد اقطاعية بالمعنى الحرفى
مكان بيتحول منه الخراج (الضرايب يعنى )
مقابل الحماية والانضواء تحت لواء الدولة الجديدة
والدولة الاموية قعدت قرب الـ 90 سنة
ومصر بالتالى فضلت المدة دى تحت سلطانها ونفوذها
وعدى عليها ف السنين دى كلها
ييجى 26 والى فيهم وفيهم
وبقول فيهم وفيهم لأن منهم ولاة
كانوا قمة ف العدل والرحمة زى عبد العزيز بن مروان
ابو (عمر بن عبد العزيز)
الملقب بخامس الخلفاء الراشدين
عبد العزيز بن مروان كان فعلا من أحسن
وأعدل ولاة مصر في العصر الأموي
عمل قنطرة على الخليج المصرى
وجدد جامع عمرو
وبنى مقياس النيل ف الروضة
واهل حلوان المفروض يعزوه جدا
لأنه لما عيى بالجذام راح حلوان يستشفى
وحبها وعمرها بالمساجد والبيوت
وزرعها
وفضل فيها لحد ما مات سنة 86 هـ
وعلى العكس بقى زى ما كان فيه ناس حلوة
كان فيه ناس بشعة زى قرة بن شريك
اللى كان معروف بالظلم والقسوة والجبروت والإفترا
وكانوا بيشبهوه بالحجاج ف ظلمه
كانوا بيقولوا
الحجاج ف العراق وقرة بن شريك ف مصر
واحد الأئمة دعا عليه هوه وغيره من الطغاة
وقال يا ربن ارحمنا منهم
فمات قرة بن شريك والحجاج ف شهر واحد !
قصره عشان منطولشى عليكم
ف عهد الامويين مصر كانت مجرد ولاية
من الولايات عاصمتها الفسطاط
بتبعت الخراج كل سنة للخليفة ف دمشق
وبس كدا
وروح يا زمان وتعالى يا زمن
ودايما القوى فيه اللى أقوى منه
وكما أخذ معاوية الحكم بالسيف
وقمع انصار سيدنا على
وسوّد عليهم عيشتهم
اتردله هذا بعد فترة طويلة
لما جه الاخ أبو العباس السفاح تحديدا
ف سنة 749 م بمساعدة أنصاره العلويين
عشان يقضى ع الدولة الأموية
ويخليها أثر بعد عين
وقد كان
كنا حكينا قبل كدا القصة دى ف تدوينة عن الخلافة
المهم أبو العباس مخدش لقب السفاح كدا من فراغ
الراجل بصراحة بدّع ف الانتقام
وفضل ورا كل خصومه من الامويين الحكام
عايشين ولا حتى أموات ونبش قبورهم
وعلى الحظ الاغبر كان أخر الخلفاء
هوه مروان بن محمد
اللى حضر جيش لمواجهته وبتاع
ابن مروان كان جيشه 120 ألف
والعباسيين بقيادة عبدالله بن على كانوا 300 ألف
واتقابلوا ف العراق عند نهر الزاب
وفين يوجعك
وطبعا مفيش داعى اقول ان العباسيين انتصروا
نصر ساحق ماحق سابق لاحق
قوم الحاج بن مروان الخليفة المنهيزم
هرب على دمشق راحوا وراه
وحاصروه
راح هربان منهم على فين ؟
أيون
على مصر الغلبانة
دخل مروان بن محمد الخليفة الاموى مصر
هاربا من العباسيين
الوالى المتعين من قبل البيت الاموى
حاول يساعده
بس طبعا الموضوع كان كبير كبير كبير
وصلوا جنود العباسيين مصر
كان مروان بيحاول يهرب ع الصعيد
ف سكته لقى مقاومة من المصريين
وخصوصا أقباط الصعيد
فدخل معاهم ف صراع هما كمان
وقرفهم قوى
وما بين فكى المصريين اللى مش طايقينه ف الجنوب
للعباسيين المتربصينله وبيطاردوه فوق
اتمسك الحاج مروان ف بوصير - جيزة
وانتوا عارفين العباسيين بقى
ناس ذوق ذوق ذوق فوق ما تتصوروا
ردوا الجميل لمعاوية ويزيد ابنه
ومسكوا راس مروان قطعوها
ومثلوا بحتة الجدع يا نضرى
ولفوا بالراس مصر كلها
وبعد ما فسحوها وفرجوا عليها الخلق كلاتهم
بعتوا الراس المدبوحة
للعباس السفاح عشان يكمل عليها
بعد ما بقت فرجة البشرية
قصره كووووول دا حصل
وأصبحت مصر من بعده
تبع مين دلوقتى ؟؟
كالعادة خلف كل قيصر قيصر جديد
ومصر الآن أصبحت احدى اقطاعيات
الدولة الجديدة الناشئة دولة بنى العباس
ومن دولة لدولة يا مصرى لا تحزن ..
ليه بقول كدا ؟
عشان مصر تحت حكم العباسيين
شافت الويل كله
والأمويين اللى بعضهم اهتم بيها من باب الجدعنة والشياكة
دا محصلش خالص من الغازى الجديد
ومصر بالنسبة للعباسيين كانت مجرد بقرة بيحلبوها
عشان ياخدوا لبنها وفقط
لا فكروا ينهضوا بيها
ولا يخلوها احسن
وبالعكس كان فيه ثورات طول الوقت نتاج للظلم
ويكفى نبص على قايمة الولاة المتعينين
من الدولة العباسية لحكم مصر
هتلاقيهم بتاع حوالى 70 والى ف ييجى 110 سنة كدا
واللذيذ بقى ف فترات حكمهم
أجعص واحد فيهم حكم 7 سنين وبالعافية
أغلبهم حكم ما بين سنة واتنين بالكتير
وفيهم اللى اتقتل بعد شهرين
وفيهم اللى جه ف يوم وشالوه من قبل ما يحكم !
الخليفة القابع ف بغداد
كان دايما سوسة
ورقئم
ونبيه
كان حريص ميخليش فيه والى مستقر
وواخد راحته ليطمع ف الحكم ويستقل بمصر
وفعلا احد الحكام لما كان كويس مع المصريين
الخليفة العباسى شاله بسبب دا
اللى يعنينى بقى ف كل الحدوتة دى حاجة مهمة
هيا سبب حكايتنا الليلة
الا وهى انه لما دخل الجيش العباسى مصر
وطارد الخليفة الأموى وقتله
ماذا حدث
ابو العباس السفاح بعت اتنين من اهله وعشيرته
يقعدوا ف مصر ويمشوا امورها
هما
1- صالح بن على بن عبد الله بن العباس
2- أبو عون عبد الملك بن يزيد
اول ما الجوز دول دخلوا الفسطاط
راحوا قاعدين ف الجزء الشمالى الشرقى منها
ومعسكرين بجندهم فيها
الكلام دا سنة 752 م
كان ساعتها ولاة بنى أمية ف مصر
قاعدين ف الفسطاط بيحكموا منها
ومن بيت عمرو بن العاص اللى كان مقر للحكم
وكان جنبه شرطة الفسطاط
وكله تمام
العباسيين طبعا رفضوا يعملوا زى الأمويين
وبالعكس أصروا يدمروا أى أثر للخلافة السابقة
وقرروا يعملوا لروحهم مطرح جديد
خاص بيهم ...
ف البداية ونظرا لأنهم كانوا عمالين
يطاردوا ف الخليفة السابق وانصاره
ويقمعوا ف الثورات ضدهم مكنوش لاحقين يبنوا عاصمة
واكتفوا بمعسكرهم
بعد شوية المعسكر كبر
وبعد استقرار العباسيين ف مصر
العملية اختلفت
واتعين صالح بن على كأول حاكم عباسى لمصر
وقرر يبنى دار امارة يحكم منها
وف نفس المطرح اللى عسكر فيه عسكر الجيش العباسى
اتبنت دار للحكم
و اتسعت الرقعة حواليه
والناس بقت تروح وتيجى ع الحتة دى
وبقها اسمها "العسكر"
وهكذا ظهرت تانى عاصمة إسلامية لمصر
اللى إسمها "العسكر"
نسبةً لجند العباسيين اللى دخلوا مصر
للقضاء على النفوذ الأموى فيها نهائيااااا
احنا قولنا ابو العباس كان بيشك ف صوابع ايده
ومبيأمنش لقائد ليقلب عليه
راح شايل صالح بن على موديه الشام
وحاط أبو عون مكانه والى لمصر ..
ابو عون شجع على البنا ف الحتة دى
وتحولت العسكر لثكنات بالمعنى الدقيق
لأن اللى كان بيسكنها وقتها
كان عسكر الخليفة العباسى
وبس
وازدحمت المنطقة شوية بشوية بعد ما سكنها العسكر
واتجوزوا وخلفوا واستوطنوا
وابتدى المصريين يتقبلوا الامر الواقع النيلة
ويتعاملوا معاهم
واتزحم جامع عمرو
اللى جزء كبير منه اتهدم واتحرق هوه والفسطاط
ف احداث الغزو العباسى لمصر
فقرر الفضل بن العباسى
يبنى جامع جديد يساع الزحمة دى
واتبنى بالقرب من دار الامارة جامع
اتعرف بجامع العسكر
وعشان تتخيلوا العاصمة الجديدة دى بصوا كويس
موقعها ف الخريطة
اللى كان بيتولى حكم مصر اثناء الدولة العباسية
كان بيبقى لقبه امير مصر
وكل أمراء مصر سكنوا دار الأمارة ف العسكر
اللى مساحتها كانت حوالى 2 كيلومتر
وزى منتوا شايفين العاصمة الجديدة
كانت ملاصقة للفسطاط العاصمة القديمة
قوم الاتنين ساحوا على بعض
وبعد ييجى 70 سنة كدا
سمح الأمراء لعامة الشعب يسكنوها
بعد ما كانت لسنين طوييييلة مقصورة على الجند والعسكر
بس زى ما حصل مع مدينة القاهرة ..
بعديييين
المهم علية القوم طبعا لما لقوا المكان الجديد
بتاع السلطة وساكنيها
فراحوا يسكنوا هناك عشان يجاوروا السعيد فيسعدوا ...
وبنوا القصور والبيوت الكبيرة
وبقت العسكر من أبهى المدن
وخطفت الأضواء من الفسطاط اللى اُهملت
وبقت حواريها الضيقة والمكتظة بالغلابة
ف طى التهميش والتنطيش حتى الآن للأسف ...
وكعادة المصريين ف أى زمن يستنوا شوية كدا
يشوفوا اتجاه الريح و الجو ايه
وبعدين يدخلوا ع المنطقة يحطوا التاتش بتاعهم
لحد ما ياخدوها بوضع اليد
وتبقى بتاعتهم
بعد وا يغور اللى خدها غصب
:)
العسكر اتملت بالأسواق والحمامات
وكان ليها شرطة مخصوصة اسمها الشرطة العليا
عشان يفرقوها عن الشرطة السفلى ف الفسطاط
الولاة زى ما قولتلكم مكنوش بيلحقوا يقعدوا فيها
ويروحوا ممشينهم
فغالبا دا السبب الاكبر ف ان مفيش أثار تذكر
اتعملت زائد ان العباسيين اوغاد حقا
آه اتعاملوا مع مصر بوغدنة منقطعة النظير
كانت بالنسبالهم مصدر للفلوس والجباية مش اكتر
محدش حسّن من احوالها ولا سابلنا أثر عليه القيمة ..!
ومن ضمن الأمراء اللى مسكوها مثلا واحد اسمه
هرثمة بن أعين
وبيقولك الراجل يا خويا مسك من هنا
والخليفة قلق منه وباعته افريقية على راس حملة
ومرجعوش تانى
يعنى شاله من امارة مصر
بصنعة لطافة
زى ما عمل مبارك مع ابو غزالة كدا
:)
والراجل ملحقشى يا عينى يتهنى
بس ابنه حاتم اللى جه بعدين ف حركة تنقلات
لما تولى امارة مصر
راح مشمر درعاته وبنى لنفسه قصر ف المقطم
كان قصر بديع حسبما وصفته المصادر
والجدع سماه .. قبة الهواء
القصر دا على سفح المقطم
واللى اتبنى مكانه قلعة صلاح الدين حاليا
المهم .. الأمرا مكنوش بيلحقوا يثبتوا اقدامهم
ومنهم اللى انقتل لسوء سلوكه
وقلة ادبه على القبائل العربية الكبيرة
اللى جت مع الفتح العربى لمصر
واحد دول اسمه موسى بن مصعب
كان ظالم و مفترى وبيزود ف الضرايب
ويأذى الخلق كدا غتاتة
دا حتى العسكر بتوعه كرهوه وقرفوا منه .. !
فلما ثارت عليه قبيلتى قيس واليمانية
وراح يحاربهم ..
العسكر بتوعه تقاعسوا عن مساعدته
وسابوه لما انقتل على ايد خصومه
وعادى ولا الهوا
وكعادة كل الدول والخلافات اياها
المبنية على التوريث والظلم اياه
الدولة العباسية جت ف الآخر
وابتدت تضعف ويطمع فيها كل اللى له طموح وذكاء
والمؤرخين بيتفقوا ان الدولة العباسية
قامت ف بدايتها بمساعدة الفرس
لكن قوة وبأس العباس ومن جاء بعده
خلت نفوذهم قليل وكانوا بيقصقصولهم ريشهم اول بأول
لحد ما جه الاخ المعتصم
وعمل زى حركة مفصلية كدا غيرت الاتجاه خالص
لما استعان بالأتراك عشان الست والدته كانت منهم
فنفوذ الاتراك زاد بعد التاريخ دا
والتراكوة طول عمرهم شطار قوى ف الحروب
ويظهر مبيعرفوش غير القتال
والأستيلاء علىالعروش ولا ايه متفهموش
المهم الاتراك حطوا رجلهم من هنا
ومخرجووووش
واللى يهمنا ان واحد من دول هيأثر ف تاريخنا
لما الخليفة العباسى هيعين عنده الأخ طولون
ويموت طولون
فتتجوز مراته امير مصر وقتها ...
وبعدين يموت الامير فيتعين بداله واحد تانى
يتصادف ان ابن طولون (احمد) متجوز بنته
ويموت الحما
فيورث بن طولون العرش عنه ... كدا !!!
وكنا حكينا القصة دى كلها ف التدوينة
اقروها على رواقة
المهم ف القصة دى دلوقتى ان احمد بن طولون
لما هيلاقى الفرصة مواتية
والدولة العباسية ضعيفة ومخوخة
هينط على كرسى الحكم ويناطح الخليفة ويقرفه
ويقمع ثورات عليه من كل ناحية
ومن ناحية الخليفة سخصيا
لحد ما يقضى على كل الصداع دا
ويوصل لاتفاق مع بيت الخلافة
وتخلص له مصر تماما ولأولاده
لما ابن طولون دخل مصر بعساكره كان معاه جنود
من كل طايفة ومطرح
كان عددهم مش قليل الاف مؤلفة دخل بيهم العسكر
وقعد ف دار الامارة بتاعت السابقين
بعد شوية امام جامع عمرو اشتكاله
وقاله الجند بتوعك زاحمين المطرح يا حاج ..
والناس بتشتكى منهم شوفلك صرفة ف القصة دى !
العسكر كمان بأحيائها وبيوتها ضاقت بالوافدين الجدد دول
اللى قرروا يستوطنوا هما كمان
واشمعنى هما يعنى اللى ملهمش نفس
قام ابن طولون قرر شيئا
قرر يبنى جامع يستوعب الزيادة ف المصلين
على حتة اسمها جبل يشكر
والجامع موجود حتى الآن والحمدلله ...
وقرر كمان يبنى مساكن لجنوده كل مجموعة سوا ف قطعة الشوام ف قطيعة والمغاربة ف قطيعة .. الخ
ومن هنا ظهرت مدينة القطائع
اللى بمسجد بن طولون
وبقصر بناه بن طولون لنفسه ف ميدان الرميلة
(قصاد القلعة كدا)
وبالأمر الرسمى أصبحت القطائع دى
ثالث عاصمة أسلامية لمصر
وزى منتوا شايفين ف الخريطة برضو حدود القطائع
تبدأ من نهاية العسكر ..
زى ما العسكر حدودها بدأت من حيث انتهت الفسطاط ..
وزى ما هييجى جوهر الصقلى بعدين
ويبدأ ببناء القاهرة من حيث تنتهى حدود القطائع
عشان تكون القاهرة رابع العواصم الأسلامية
واخرها ...
اللى يهمنا ف القصة دى ان الحاج بن طولون
لما جه مكنش مفترى زى العباسيين
لا حرق حاجة ولا دمر حاجة
ولا قال مقعدش على عفش العروسة اللى قبلى والأفلام دى
الجدع ف الاول قعد ف بيت الامارة بالعسكر
وحكم منه لحد ما بنلوه قصره
وبعدين ساب العسكر زى ما هيا الناس تسكنها عادى ..
وكعادة المصريين الحتة الجديدة لها بريقها
القطائع شدتهم بعد شوية
وابتدت تنتشر فيها الاسواق والتجارة مع الوافدين الجدد #المصرى_المعروف_بجبروته
وحبة حبة بقينا حبايب احنا
والناس الحلوة دى بتوع طولون
وبقى زيتنا ف دقيقنا
والقطائع لزقت ف العسكر ف الفسطاط
وبقوا كلهم حاجة واحدة
وروح يا زمان وتعالى يا زمان
وتلك الأيام ندوالها بين الناس
والدولة الطولونية تضعف على ايد ورثة بن طولون
وينتهز العباسيين الفرصة لأسترداد اماراتهم
ويدخل سليمان الكاتب القائد الموفد من قبل العباسيين
مصر مستغلا ضعف حاكمها
وصراع العيلة ع العرش
ويهزمهم شر هزيمة ويحرق القطائع
ويدمرها تماما
والأثر الوحيد الذى ينجو منها ..
هوه جامع بن طولون
عشان ميصحش يحرقوا جامع
وحقا تبقى عيبة
وهما ناس بيعرفوا الأصول قوى قوى قوى الصرااااااحة
o.O
ونظرا لأن العباسيين عندهم النعرة اياها
بتاعت مقعدش على عفش طليقتك وكدا
فرجعوا لدار الامارة القديمة بتاعتهم ف "العسكر"
واللى كانت لسه موجودة
وقعد فيها سليمان الكاتب يحكم
ويقمع ف الثورات اللى قامت ضده
لحد ما سلمها لمن جاء بعده
عشان تفضل دار الأمارة والحكم سنيييييين لحد ما ...
ييجى الأخشيد ويقيم دولته
وبعدين ييجي الاخ جوهر الصقلى من المغرب
على رأس جيش جرار عشان يخش مصر
ويقضى على سيرة العسكر للأبد
لما يبنى القاهرة لتكون العاصمة
وكما انغلبت العسكر قصاد القطائع واحد صفر
هتنغلب برضو قصاد القاهرة بس عشرة صفر حضرتك
وهتنزل دورى الدرجة الألف
وتختفى معالمها تماماااا من الوجود
العسكر كمدينة
والاخوة الأثريين يصححولى لو غلطانة المعلومة دى
اندثرت من الخريطة فعليا
وهيا اصلا مكنش فيها أى معالم تذكر غير الجامع بتاعها
والجامع هوه كمان لم يصمد امام الاهمال
وكأن اللى جم بعد كدا قاصدين يهملوه
المهم انه اتهد لعوامل الزمن
والعباسيين كانوا مزعليين ناس كتير ليه كدا ؟!!
وتوتة توتة خلصت حكاية مدينة العسكر ..
تانى العواصم الإسلامية لمصر
ونقول الملاحظات بقى
1) على بلاطة كدا .. انا مبحبش الدولة العباسية عموما
ومبحبهاش ف مصر خصوصا
مشفناش منهم اى خير الصراحة
والعينة بينة اهى ...
2) الاخ قرة بن شريك اللى حكم مصر ايام الامويين
قيل انه كان يضاهى الحجاج ف ظلمه !
الا هيا مصر موكوسة كدا ليه دايما
اما بالحكام الظلمة او الحكام الهلاهوطة ؟؟
3) لما طاردوا مروان بن محمد اخر خليفة ..
جه عندنا ف ابوصير
ويقال ان البلد دى كان فيها الحبس
اللى اتسجن فيه سيدنا يوسف عليه السلام
تخيلوا ؟!!
4) لما طاردوا مروان برضو ..
داس ف سكته ع المسيحيين اللى قاوموه ف الصعيد
وحرقلهم كنايس وبيوت
والسؤال .. هوه الأقباط مالهم غلابة ف كل العصور كدا ؟
5) شوف اسلوب الاحتقار بتاع العباسيين بقى
آل شرطة الفسطاط تبقى السفلى
وشرطة العسكر تبقى العليا
يا لهوى ع الكُهن والمُحن بتاعهم .. كيادين قوى
6) واصلا حوار
وجملة "الشرطة السفلى" دا عاجبنى قوى
الوصف لايق بصراحة
وليه لاغوها ما كانوا يخلوها زى ما هيا
:))
#فاتيما_الشوريرة
7) الاخوة العباسيين لما دخلوا الفسطاط
بيقولك علقوا رؤوس الاف الثوار على جامع عمرو
وناس ذوق ذوق ذوق
وبتوع ربنا
بيعملوا لحرمة بيوت الله حساب فعلاااا
ادى الخلافة (الاسلامية) ولا بلاش .. !
8) كما تدين تدان الامويين
ويزيد بن معاويةعبث برأس الحسين رضى الله عنه
فربنا بعت لمن جاء بعده بعقود
اللى يعبث برأس خليفتهم ف نهاية الدولة
ويتجرس ف الشوارع والبلاد
#طب_م_كان_بلاش_م_الاول!!
9) ويعنى ليه الناس ويحشين مع بعضشيهم كدهون ؟
الدم بيجيب دم
والقمع بيجيب قمع
والانتقام بيجيب انتقام
فهلا يتعظ أحد من دروس التاريخ يا غجررر ؟
10) العباسيين مدوش مصر حاجة فعلا
واخدوا منها وبس
عشان كدا مصر نسيتهم
زبلتهم
ومسبتلهمش أى اثر عدل يخلدهم
حتى الجامع بتاعهم مقعدش
#حتى_الدول _قِرف_واعتاب
11) وابن طولون لما حكم رغم صراعه معاهم
مفكرش يهدم مدينتهم ولا المنشئات بتاعتهم
وبالعكس بنى وعمّر
عشان كدا الجامع بتاعه ربنا بارك فيه
ونجا من التدمير لما درات الأيام
اهو وكل واحد ونيته
#شهروزة_لما_بتتدروش
12) يختشى الامهات
ايه اللى بيدخل أمهم ف السياسة والحكم
انا عاوزة افهم؟؟
يعنى ام المعتصم التركية
جابتلنا المصايب دى لمجرد
ان الننوس حب يستعين بقرايب ماما
طب اهم كانوا النكبة عليه
و الام والابن مبيفكركوش بحد ؟؟!!
13) لكل انسان نصيب من اسمه
والاماكن كمان
والعسكر كانلها نصيب من اسمها العِكر ..
عشان كدا مقعدتشى
ودا عشان انتا نيتك زفت م الاول يا باشا
وياريت بقى الاخوة بتوع عيب اخص
لما تقولوا يسقط يسقط حكم العسكر
والعسكر دى لفظة مستفزة
وبتتقال ع الغزاة وفقط
لأ يا خويا منك له
اهى طلعت كانت بتتقال ع العباسيين اهى
وأظن دول كانوا مسلمين وعرب ..
مش تراكوة ولا فرنساوية ولا انجليز
فمتوجعوش دماغنا بقى
وتفلقونا .. !!
وعسكر بنى العباس جم البلد دى
عشان ينهبوا خيرها
ويوسعوا نطاق نفوذهم مش اكتر
فمصر لفظتهم بينما منحت الخلود
لكل واحد حط طوبة على أرضها
كل اللى جه بعد طولونى
ولا اخشيدى
ولا فاطمى
ولا مملوكى
ولا حتى عثمانى
ولحد محمد على
كل اللى عمّر مكان وبنى
ولو لمجد شخصى ..
اسمه فضل
وفيه ناس بتفسر الحكاية دى ان السبب
مكنش تعصب عباسى ولا اموى
لكن لأن الثقافة دى مكنش فيها اهتمام بالفن
بينما الاتراك كانوا مولعين بالبناء
ودا كلام فارغ وميخشش دماغى ببصلة
لأن الدولة الاموية كانلها نصيب مش قليل ف الشام
من المساجد والأثار
فأشمعنى يعنى الا
لأن مصر كنت ع الهامش وبس
لكن كل الحكاية ان مصر كانت زى غيرها
فعاملتهم زى غيرهم
اما اللى جم بعد كدا
واتعاملوا مع مصر على انها دولة تستحق
استحقوا تكريمها مهما عملوا
واخيرا وف سياق متصل لا ينفصل
عن حدوتة .. مدينة العسكر
تانى عواصم مصر الإسلامية
لازم أقول
#يسقط_يسقط_حكم_العسكر
ف كل زمان
وتوتة توتة طولنا عليكم معلش
ونرتوت المنشنات
وتصبحوا على ألف خير ...
---------------------------
Èñ þ姧åñt @Doc_Mego
محتاجين الامام ده يدعيلنا
