الحكايات النهاردة
صغننة .. متفرقة .. موجزة
وكالعادة بعدها
الملاحظات والدروس المستفااااادة
حدوتة(1)
عن حفيد محمد على ابن طوسون
اللى كان أقرب الأبناء لمحمد على
وكان بيعده لأنه يمسك مكانه بعد موته
بس السر الالهى طلع
ومات طوسون الاول
وساب طوسون ولد اسمه عباس حلمى
واللى هيمسك بعد موت ابراهيم باشا ومحمد على
وهيعرف بعد كدا
بـ.. الوالى عباس حلمى الاول
وكان بيكره نفسه مش اهله بس
وفترة حكمه كانت من أسوأ الفترات
على الأسرة العلوية بينهم وبين بعضيهم
والواد طفش كل عيلته على اوربا والأستانة
عشان خافوا ليقتلهم نفر نفر
كان عنده بارنوايا
وقافل على نفسه قفلة سودة
والسبب ف كدا .. جده العزيز
الواد عباس لما ابوه مات كان ف الحجاز
رجعت جثة الاب مع الجيش العائد منتصر
وفضل الحفيد هناك
الظاهر اهل امه كانوا من هناك ولا ايه متعرفوش !
المهم محمد على قاله يتربى هناك
وبعتله حرس خاص وعبيد حواليه
و قيده ف الحركة والخروج
وبعدين فجأة قرر يرجعه مصر
وفعلا رجع عباس
ونفذ الأمر
وداخل ابو العبابيس على جدو محمد على
القاعة بتاعته ف القلعة وراح مسلم عليه
وبعدين قعد
وحط رجل على رجل
وبكل الآطة ولا كأن فيه حاجة .. !
محمد على شاف المنظر الدم غلى ف عروقه
وسأله بعصبية
انتا مين اللى أداك حق الجلوس أمامى بهذا الشكل ؟!!
عباس مش يسكت ولاّ ينكسف ولا يضطرب
ولا يعمل أى منظر
ابضضضضضن
راح رادد عليه ببساطة قائلا
- أنا باشا ابن باشا ابن باشا .. فمن أنت ؟
محمد على كان هيخرج المطواة اللى ف حزامه دى
ويغزه ويريحه ..
بس تريييييث وسأله
- ماذا تقصد بمن أنا ؟
فرد عباس
- انتا باشا فقط لكن من ابوك وجدك .. ؟
#يا لا _اتلم_يخربيت_كدا
طبعا محمد على مسك نفسه ع البجاحة دى
بس يومها قرر قرار اريدكم ان تعاوننى عليه
ونده لمساعدينه ينفذوه فوراااا
قالهم الولا دا تاخدوه معسكر الخانكة
تعلموه الفروسية
وتعملوه تركى
وتعلموه فرنساوى
و تعلموه تاريخ وطبوغرافية حربية
وعاوزه يتربى
ويتعلم الادب !!
وفعلا خدوا الواد من قصاده
وراح ع المعسكر
واتحجز هناك مدة
وجم يعلموه ركوب الحصان والنط فوق حواجز
وقع كذا مرة
منهم مرة كانت هتتقطم رقبته
محمد على صعب عليه
و قالهم طب خرجوه
ويروح يتعلم الامور الإدارية
الشهادة لله الواد كان رخم وثقيل وعنيد
والتقارير اللى كانت بتترفع لمحمد على
كلها كانت رايحة ف سكة ان بروطة
ومش عاوز يتعلم ولا يتعب ومدلل الخ
راح محمد على زهق
و جابه
هزأه و بعتر كرامته
ولما اشتد الصراع بين محمد على وابراهيم باشا
خاف على عباس من غدر ابراهيم بيه
بصفته ولى عهد
فرجعه الحجاز تانى
وقعد عباس حلمى ف الحجاز
وسط العبيد والحراس بتوعه يعيث فسادا
لحد ما جه النصيب
وبقى والى مصر وقعده على كرسيها
هذا البليد حكم
وخلصنا كدا
الدروس المستفادة من القصة دى
غير ان عيلة محمد على فيها لوثة متوارثة بين الأجيال
بس هوه السؤال
ازاى الواد يكلم جده كدا
ومش بس كدا .. ؟
دا الجد هنا مش أى جد
دا محمد على يا بنى
محمد على اللى يتهزله عروش ودول وحكام
تيجى انتا يا فسللللل
تقوله مين ابوك وجدك وانا احسن منك ؟!!!
#يازين_ما_خلفتى_يا_زينب
ثم انه ايه الطريقة
اللى بيربوا بيها العيال ف القصور الملكية دى
لا انسانية بالمرة
واهو قعدته مع الحراس والعبيد جابت داغه ف الأخر
وانقتل على ايدهم
واخيرا جو وحوار من أنت دا فكرنى
بــ سعاد حسنى
وخلى بالك من زوزو ... هييييح
الله يرحم الجميع
القصة (2)
عن تقاليد وعادات الزواج ف مصر ف أيام المماليك
بيقولك آل إيه يا خويا
بعد العريس ما يتزف
والعروسة وتقام الأفراح والليالى الملاح
وبعد الزفة واللمة والعزومة والهيصة
فيدخل العريس عشان يتعرف ع العروسة
اللى كتب كتابه عليها .. من غير ما يشوفها طبعاااا
يبدأ الآتى ...
لأ ايه دا
انتوا فاكرينى هحكى التفاصشيل الدقيقة اياها
عييييب اخص عليكوا
لأ مكنتش هقول كدا دنا بقول بعد الزفة وخلافه
بيدخل العريس على اوضة العروسة
وبتكون الخاطبة والام واقفين ف كورنر كدا
ويقرب العريس من الموكوسة
وبتكون حاطة على وشها شال
طرحة يعنى بس تقيلة
ومن غير ما ينطق ولا يقول حاجة بيمد ايده
لا مش هيرفع الشال
ولأ مش هيلطشها قلم
دا هيحط ايده ف جيبه يطلع مبلغ وقدره
بتاع ايه دا يا طمطومة ؟
دا حضرتكم مبلغ اسمه ..
حق كشف الوش
بيدفعه العريس للعروسة
فتقوم المزمزايل تشيل الشال عن وشها
عشان الباشا يعاين البوضاعة
وغالبا بتطلع سليمة
ولما بيطمن انها تمام
ومفيش عيوب ف المنتج
وزى امه واخواته والخاطبة ما وصفوله
بيروح مدى الخاطبة مبلغ
والام تزغرط
وتتم الزيجة كالمعتاد ...
قوم تانى يوم بقى بعد الصباحية
العريس يعمل الهروبة
ايه الهروبة دى ؟
دى بعيد عنكم مسرحية عبيطة كدا
كان بيعملها عرسان زمان ف ليلة صباحيتهم
بيقولك الزوج من دول يقوم من جنب عروسته يتسحب
ويهرب ويختفى طول اليوم
واصحابه آل أيه يروحوا يدوروا عليه
لحد ما يلاقوه ويرجعوه بيته تانى ... !!!!!!!!!!!!
وخلاص كدا خلصنا
والدروس المستفادة غير الدلع المرىء
والفضا اللى كان فيه العرسان زمان بصراحة
وغير انى عاوزة استفسرعن العادة الهباب دى
جاتلنا منين
بس الحكاية دى فكرتنى
بفيلم ليلة الدخلة بتاع نايلون وبلابيعو
لما رفعوا الطرح من على وش عرايسهم
وطلعوا مش هما
انا بس عاوزة أسأل ماذا لو مثلا
فرضنا مثلا
العريس مثلا
منبسطش ليلة دخلته مثلا
وتانى يوم مثلا
ف الهروبة مثلا
قرر مثلا
انه مثلا
قرر يسافر ع الشام ولاّ السودان ولا السلوم مثلا
فالسؤال بقى كان يبقى منظر العروسة واهلها ايه
ف الأحوال اللى زى دى ... مثلا ؟
#عادات_نيلة
والدرس المستفاد من القصة دى
انه موضوع الهروبة اذا طالب برجوعه الاخوة الرجال
فحنا كحريم لازم نحطله مادة موازية ف الدستور
ان تكون عقوبته الاعدام
أقل حاجة يعنى
قصة (3)
زمان كان فيه وظيفة المحتسب اللى بيراقب الأسواق
ويمنع الغش ورفع الاسعار وبيحمى المستهلك
.. الخ
وكانت احدى صلاحيات المحتسب
المعاقبة
يعنى ف أى وقت يلاقى أى غلط
يوقع عقوبة ف التو واللحظة
على مرتكبها من التجار
واصحاب الحرف ف الأسواق
اغلب من مارسوا المهنة دى كانوا غلاظ القلوب وناشفين
وايام محمد على كان فيه محتسب مفترى اسمه
مصطفى كاشف
كان يتفاتله بلاد ومدن وقرى ليه؟
الحاج مصطفى مكنش عنده يامه ارحمينى
وكان عنده عقوبات لكل واحد حسب صنعته
يعنى مثلا بتاع الكنافة لو غش ف السمن
يقعده ع الصينية وهيا سخنة!
ومرة بتاع قلل نادى على قلله بأنها من قنا
وطلعت من سمنود
راح مصطفى حاكم عليه تتكسر على نافوخه كل الحمولة
اللى ع العربية لحد آخر قُلة
ويحمدوا ربنا بقى انهم مش جزارين
عشان مصطفى كاشف لقى مرة جزار
بيوزن اللحمة ناقصة أوقيتين
راح مقطع اوقيتين من لحم ضهر الجزار نفسه !!!
وجزار تانى علقله خطاف ف مناخيره
وحط ف الخطاف حتة لحمة
ومشاه يتجرس على ضهر حمار بالمقلوب
وطبعا الجزارين لموا نفسهم
بعد المنظر دا
أقل العقوبات عند صفصف بقى كانت قرض الأذن
يعنى حضرتك اللى يرتكب مخالفة
ويغش ف البيع يقطعوا حتة من شحمة ودنه
ويحكى ان ...
احد بياعين البطيخ الظرفاء على حظه الازرق
ماشى بعربيته
لقى مصطفى كاشف ف وشه راح سأله
بكام بتبيع البطيجة ؟
فالبياع قاله ادى ودنى أقرضها
المحتسب استعجب شوية
وبعدين سأله تانى .. بكام بتبيعها
البياع قاله اقرضها
ومسكله ودنه
مصطفى كاشف اتغاظ قوى وقاله
فهمنى ايه حكايتك .. ؟
فالبياع قاله اصله لو قولتلك البطيخة بخمسة فضة
هتقول اقرضوا ودنه
ولو قولت انها ب10 فضة
هتقول اقرضوا ودنه
فأهى اقرضها وخلصنى .. !!!
مصطفى الكاشف قعد يضحكككك
وبعدين عفى عنه لخفة دمه
:)
الدروس المستفادة بقى
نحمد الله اننا مش
ف زمن المماليك .. الشيك .. الرومانتيك
#الف_مرة
ثانيا ليه محتاجين حكام ظلمة
عشان نمشى عِدِل .. ؟!!
يعنى العقوبات البشعة دى
لو بتتطبق على غشاش وحرامى وكلفتى
ماذا لو بالصدفة اتطبقت على واحد مظلوم
او حد وّز عليه .. ؟
ساعتها المنظر يبقى ايه؟
القصة (4)
يذكر التاريح ان الخديوى اسماعيل
أصدر قانون لألغاء الرق وتجارة العبيد 1877
قبل التاريخ دا كانت القصور الملكية
وقصور وبيوت الطبقات المتيسرة فيها جوارى وعبيد
و فيه اسواق مخصوص لبيعهم وشراهم
وتختلف المعاملة بعد الشرا
بعض البيوتات كانت بتستعمل البشر للخدمة والمتعة
والبعض الاخر كانوا بيعاملوهم بأنسانية
ويبعتوهم يتعلموا ويجوزوهم
ويبقوا كأنهم جزء من الأسرة
وأبو السباع ف حركة كرم وجدعنة
قرر انهاء التجارة دى
والزم اولاده بالزواج من واحدة وفقط
ودا توفيق ولى العهد مع مراته
وفيه ناس خبيثة بتقول ان الحركة دى
جت بضغط من بنات العيلة اكمن أغلبهن
اتجوزوا من اولاد اسماعيل
فحبوا محدش يزاحمهن على قلوب المواكيس اجوازتهم!
بس الحقيقة أى كان السبب الحركة كانت حلوة وشيك
وخلصنا كدا
والدروس المستفادة
الحكام ليه عندهم شيزوفرنيا
واللى يدعوا لشىء مش يبدأ بنفسه ؟
يعنى انتا يا حاج سماعين بتقول لا جوارى ولا محظيات
وانتا اتجوزت 3 حريمات
وكان ملك يمينك 11 جارية ومستولدة .. ؟!!
#نعممممممممم
قصره الراجل كتر خيره
وكام من روح تعيسة كان سبب ف سعادتها
دى احدى الشهادات اللى كانت بتمنح
لمن يتم اعتقاهم من العبودية
وبما اننا بنحكى عن العبيد
القصة (5)
والبنات تودى وشها الناحية التانية
عشان هنقول كلام ميصحش
بس لازم يتقال .. معلش
عن الاغا وكيف يصبح أغا
والمسألة بتتم كالآتى يتجاب الولد وهوه صغير
بيشتروه من سوق العبيد
و بعد فحص شديد لسنانه
وساعات يغطسوهم ف برميل مية
ولو المية نقصت يبقوا أصحاء وحاجات عجيبة كدا !
تبدأ عملية تحوي
الحكاية على عهدة كلوت بك اللى بيقول
انهم كانوا بياخدوا الولد من دول
ويقطعوا اعضاء الذكورة بموس حاد
وبعدين يصبوا ع الجرح زيت مغلى فورا
وبعدها يتحط انبوبة ف الفتحة المتبقية من القناة البولية
ويترش مسحوق الحنا الحمرا فوق الجرح
خلاص؟
لسه
ياخدوا الولد المسكين المتالم الألم فوق الرهيب
ويدفنوه لحد بطنه ف الأرض لمدة يوم بحاله
وبعد خروجه يدهنوله الجرح
بمرهم من الطمى والزيت
وبعد تمام التئام (الجرح) بيكون الولد فقد شهوته
ورغبته الجنسية تماما
فيبعتوه يخدم ف الحريم عادى
وينكشفوا عليه النساء
و بعض الاغوات كانوا بيدخلوا الحمامات
مع سيداتهم عادى ومحدش بيخاف منهم او يقلق
والأغا كان سعره أعلى من أى صنف تانى
ف سوق العبيد .. تخيلوا !
فضلنا كدا لحد الله يكرمه اسماعيل بقى
ما لغى الرق خالص
واللى كان بالمناسبة عنده اغا اسمه خليل
كان من أقرب خدمه اليه
وكان ساكن ف حى عابدين
وحكينا عنه زمان
فيه ولاد وقفت حياتهم لكدا
وبقوا مجرد خدم يقفوا على ابواب الحريم
لكن فيه عبيد مخصيين تانين كان حظهم أوفر
زى كافور الاخشيدى اللى حكم مصر
ومن أشهر الناس برضو ف العالم دا
الاخ قراقوش وزير صلاح الدين الأيوبى
اللى كان مشيب المصريين لحد ماطلعوا بسببه
على أى ظالم مقولة .. دا حكم قراقوش
والدروس المستفادة بقى
إلى كل واحد باع ولد
او شارك ف العملية الوحشية دى
أو استفاد من وجود الأغا بعد ذلك
انا كفاتيما احب أقولكم
#عبوكوكم_كلكم
معرفش اقول ايه تانى ينقال
بس استعباد الانسان لأخيه الانسان حاجة بشعة
وانا بحب الخديوى اسماعيل قوى
لانه برغم كل اخطائه
حسناته كانت كتير
القصة (6)
عن وزارة الدفاع ام سبع ترواح دى
وهل تعلم يا عزيزى
انها اول ما بدأت ف عهد محمد على
تحديدا سنة 1835
كان اسمها ديوان الجهادية
قوم جه اسماعيل وقرر ف اطار تغييره
لشكل كل حاجة ف مصر
سنة 1878
ويقرر انه يضملها الاسطول
ويخليها
نظارة الجهادية والبحرية
من بعده ييجى الخديوى توفيق
وانا زى بابا بالضبطططط ف الشدة شديد
وف القوة قوى
وغير الأسم
سنة 1883
وخلاها
نظارة الحربية والبحرية
قوم ف عهد السلطان حسين كامل
وف سنة 1914
يخليها من نظارة إلى وزارة
فتبقى
وزارة الحربية والبحرية
ويمسك فاروق الحكم بعد موت ابوه 1936
ويقرر انه ف سنة 1939
يخليها
وزارة الدفاع الوطنى
ليه متفهموش .. !
بس نفس السخصية اللى هيا فاروق برضو
ييجى سنة 1948 وبعد ما يقرر يدخل حرب فلسطين
ويرجعها تانى
فتبقى
وزارة الحربية والبحرية ..!!
وتفضل كدا لحد ما تخلص حرب اكتوبر
وف سنة 1978 تتسمى
وزارة الدفاع
وتحتفظ بالإسم دا ثابت حتى الآن ومتغيرشى
وكدا خلصنا
نقول الأتى ...
هما ليه كانوا متحيرين قوى كدا ف تسمية الوزارة دى ؟
بس اعتقد كل تسمية ليها علاقة
بمرحلتها من اسم الجهادية للحربية للدفاع
الخ
كل شوية اسم ومعنى
ومحدش سأل الشيعب الغلبان دا
انتا تحب تسميها ايه ؟
#انا_هسميه_حاتم
وبقول بلاش تسألوه لأنه ف خضم حالة الهوس
والمحلسة الرهيبة المريعة للسيسى
مش بعيد يسموا الوزارة بإسمه .. !!
#آه_والله
وف سياق مش منفصل
ما دمنا اتكلمنا عن البحرية
فهل تعلم عزيزى القارىء
ان الحاج سعيد ابن محمد على قبل ما يبقى حاكم مصر
واثناء حياة ابوه كان ماسك البحرية
ووصل لمنصب القائد العام للأسطول بذات سخصيته
سعيد دا بقى ى ى كان بيعانى من دوار البحر .. !!
#اه_والنيعمة
القصة (7)
والعهدة على كتب التاريخ ف منطقة السيدة زينب
يقع شارع الحوض المرصود اللى كان يوما ما
مستشفاه يتفحص الاخوات العاملات
ف مهنة الدعارة
ولما دعبسنا على ايه الحوض المرصود دا
طلع انه عبارة عن تابوت كما يصفه المقريزى
من حجر صوان أسود كان محطوط ف الحتة دى
ومحدش عارف جه منين وازاى
يقال انه جزء من ملحقات قصر ف الحتة دى
كان موجود واتهد
وكان الحوض على باب المسجد الملحق بالقصر
واتهدت كل الحاجات دى
وفضل والناس تناقلت قصته
احد المستشرقين حكى انه سمع من ناس
ف المنطقة دى
انه كان معلوم انها تبع الجان
وان الجن ف العشر ايام الاولى من شهر محرم
كانوا بيقيموا فيها سوقهم
والسوق كان بيفضل لحد نص الليل
ومش أى حد بيعتر فيه
الناس الموصوفلها خير بس
وتناقلت الخرافات ان اللى كان يشترى أى حاجة
م السوق دا بتتحول لدهب
يعنى تشترى فاكهة او خضار او عيش ..
على ما تروح بيتك يكون اتحول دهب ..!
والجن كانوا شبه البشر متفرقهموش عنهم
ويختفوا باقى السنة
ويفضل الحوض
الحوض المرصود اللى وصفه المقريزى بأنه
" حجر صوان اسود مملوء ماء لا ينقص
ولا يتغير "
لفت نظر الفرنساوية اللى جم مع الحملة الفرنساية جداااا
وطبعا شدهم الكلام اللى بيتقال عنه فراحوا
واخدينه معاهم
وحاليا هوه موجود ف متحف ف لندن
حد يقولى الفرنساوية خدوه
طب راح لندن ليه؟
اقولكم ان الفرنسيس دخلوا ف اتفاق مع الانجليز
قسموا بمقتضاه الغنايم بينهم
والجنب الانجليزى كان من نصيبه الحوض دا
وكان حجر رشيد كمان من نصيبهم
ضمن اشياء اخرى لحد ما احتلوا مصر
ونقوا على مزاجهم بقى
:)
وخلصنا كدا الحكاية
والدروس المستفادة ...
ولاد الحرامية الذين أتوا من كل حدب وصوب
عشان يسرقونا ومسابوش حاجة الا وخدوها
حتى لو خرافة
وبعدين ييجوا دلوقتى يكلمونا عن الحضارة والمبادىء!
وامتى محدش هيسرقنا
وامتى هنقدر قيمة اللى راح
وامتى هنقدر قيمة اللى موجود #متحف_ملوى
وامتى هنرجع حاجاتنا دى .. ؟
#سؤال
وخلاص كدا خلصنا ..
وتصبحوا على ألف خير ... مقدماااا
