حكاية الست جوارى

حكاية النهاردة نقلا عن 

حكواتى مدونة قبل الطوفان  ياسر ثابت

اللى حاكيها بعذوبة مخلية شهرازد عاوزة تقولها

وفلاش باك لورا مئات السنين والأعوام

 لما البنى آدم ف لحظة شديدة الوضاعة والانانية

 قرر يستعبد أخيه الانسان 

وعرف الرق وأقر العبودية كنظام حياة

وحط اسباب كتير للتصرف اللاخلاقى دا

بداية من منطق القوة واننا الأعلى والأرقى وكدا

ولحد احنا بنربيهم ونعلمهم ونجوزهم

 ونعيشهم حياة كريمة مش هيلاقوها برا ... !

مش هنروح بعيد قوى .. لكن كلنا عارفين

 ان الاسلام لما جه سوى بين البشر

 وحارب العبودية اللى كانت مترسخة ف مجتمع بدائى

 قايم على عوار كتير

وحارب الظاهرة السبة ف جبين البشرية دى حبة حبة

وبالتدريج لحد ما انتهت  ف المجتمع المسلم

لكن بعد تلاعب وشيطنة من البشر

 خلت أبليس يرقع بالصوت ويقول

والنبى انا غلبان بائس خدونى جنبكم اتعلم !

هنا ف مصر بعد دخول الاسلام ومجى العرب

 الصورة مختلفتش كتير عن شبه الجزيرة وغيرها

ف هذها التوقيت يعنى

و الجوارى والعبيد كانلهم وجود وقوانين واعراف

 وكمان احكام زى حكم العبد الآبق وحاجات كدا 

مش هنرغى كتير عن الفترة دى

 لكن يعنينا لما دخلت مصر ف العصر الحديث

ولما جه سى محمد على سنكفولة الشهير بمحمد على

واللى استعبد الشعب المصرى كله الصراحة

محمد على عمل صايع وقال انه ناوى يطلع قانون

بمنع التجارة دى اول ما الظروف تسمح 

والبلد تستقر وبتاع ...

 لكن طبعا أسمع كلامك أصدقك

الحاج معملش حاجة وبالعكس

 شغل الشعب كله عنده خدامين وعبيد

وبالسخرة حفروله الترع وبنوله المنشئات ... 

سنة 1855 هيصدر سعيد باشا 

 أمر عالي يدى فيه الحرية

 لكل العبيد الموجودين في مصر والراغبين

 - باختيارهم -  ترك خدمة سادتهم ..

 حلو ؟

لأ طبعا مش حيلو

عشان الامر دا كان غير ملزم

 واصلا متعملش آليات لتنفيذه وفرضه على السادة

زائد ان أى عبد مكنش قوى لأنه ياخد القرار دا 

ويملك جرأة تنفيذه من غير خوف م العقاب الشديد

دا بقة كله غير انه ف عهد سعيد نفوذ الاجانب

 كان ابتدى يتعاظم وبقم يتحشروا ف كل حاجة

ومصر والسودان معاها كانوا سوق رايجة لتجارة البشر

 والاجانب خصوصا السفلة والاوباش منهم

اعتبروها فرصة هايلة للثراء من ولا حاجة

 والحكاية كانت منتشرة وعادى خالص

على عينك يا تاجر

الموضوع دخل حيز الجد شوية بعد كدا

 لما أصدر السلطان العثمانى فرمان

 يسرى على كل الولايات التابعة له 1857م

 بمنع هذه التجارة من بابها ...

وقعد اسماعيل على الأريكة

 وبقى والى مصر

وكانله تطلعات يبقى زى اروبا ويرضيهم

 ويشارك ف الليلة دى فبدأ بأصدار اوامره 1863

لما بعت لحكمدار السوادن يطالبه بمنع التجارة دى

 والقبض على أى حد بيمارسها بما ان السودان

 كانت المنبع اللى بييجى منه اغلب العبيد نساء ورجال

اسماعيل طلع ترابنتينه وقتها من كام ناحية

 اولها طبقة الأغنياء وملاك الرقيق نفسهم في مصر

 اللى انقطعت سبوبتهم 

وكدا هيخسروا رأس مالهم واستثمارهم

وعمالة تقريبا ببلاش بتشتغل بأكلتها ونومتها 

وبيستغلوا أتم استغلال ممكن .. !

ولقى قلق برضو من رجال الدين المتخلفين

 لأنهم كما قيل وقتها نصا

«ينظرون إلى محاولات إبطال الرق باعتبارها تحدياً

 وتعدياً على الشريعة الإسلامية والعرف السائد»

والمثير بقى والملفت اكتر انه هوه (اسماعيل نفسه)

 كان محاط بكم رهيب من الجوارى والعبيد

ف قصوره واملاكه وكل مصر والسودان

دا غير اللى شغلهم حضرته بالسخرة

 ف مشروعات الدولة زى حفر القناة وغيرها 

قصره عام 1865 احتل الجيش المصري فاشودة

 ف السوادن عشان ينفذ قرار سماعين

 وعشان يسد الطريق على تجار الرقيق

وعمل الجيش هناك نقطة حربية دائمة لمنع التجارة

وسنة 1877 وقعت مصر على معاهدة

 حظر الاتجار في الرقيق

 مع فترة سماح للى عنده من الجوارى والعبيد

انه يمشيهم بالتدريج 

وواحدة واحدة ... متفتريش على رأى الست امينة 

ف مصر كانت المهلة تقريبا ً 7 سنين

 اما ف السودان فكانت المهلة بتوصل لـ 12 سنة حد أقصى

وحلو قوى الكلام لحد دلوقتى

 بس كله كان حبر على ورق

 وميساويش نكلة ف أرض الواقع 

أحمد شفيق باشا اللى عاش من 1860- 1940

ف بلاط الخديوى توفيق وعباس حلمى من بعده

 وعاصر فترات تاريخية ياما

بيقوووول ف جزء من مذكراته الممتعة

 وبيحكى عن الجوارى اللى شافهم وعاصرهم

وازاى ان التجارة دى كانت شغالة عادى

 وبيتباع فيها الناس ببشرتهم البيضا والسمرا

على حد سواء

وكان الرقيق دول جزء من الاسرة لا يتجزأ عنها

 وكانلهم أسواق للبيع وقت مش بعيد 

وكان فيه بيوت بيعيش فيها الجوارى والعبيد

مع (يسرجية ويسرجيات)

دى شغلتهم على وجه الخصوص 

رعايتهم كسلعة ... لحين بيعهم البيعة اللى هيا 

وكان بينكشف ع الرقيق ويعروهم زى ما ف الصور كدا

ويشوفوا سنانهم وعلامات ف اجسادهم

 وكانوا بيغطسوهم ف طشت .. !

 ليه كدا ؟

قالك عشان لو خرجوا من الطشت وكانت ميته نقصت

 يبقوا سلام وكويسين

 اما لو خرجوا والمية فضلت ف منسوبها

يبقوا عيانين وفيهم مرض قوم ميشترهموشى .... !

احمد شفيق بيقول كمان ان عادى جدااا

 ان الجوارى يتم التسرى بهن والانبساط

من رجال البيت تحت سمع وبصر الزوجات

واكتر جوارى كانوا بيقوموا بالمهمة دى

 البيضاوات اكتر م السمراوت 

وكانوا بيتدلعوا عنهن ومبيتعبوش ف شغل البيت 

عشان يفضلوا حلوين رايقين جاهزين لنداء سيدهم وكدا 

وقال كمان ان ابوه يعنى ابا الحاج شفيق سخصيا

اقتنى اسرة باكملها مكونة من رجل وامرأة

 وولد وبنت صغيرين كانوا عيلة بحالها 

وعشان شفيق محبش يفرقهم عن بعض 

 فخدهم شروة واحدة

وبيحكى كمان عن ان المصريين ف المجمل

 كانوا بيعاملوا الرقيق معاملة كويسة وحيلوة وزالفل

 وكأن مفيش احسن من كدا 

واللى هوه يحمدوا ربنا يعنى 

مجبش سيرة عن طريقة أسرهم ولا خطفهم من بلادهم

ولا طريقة وصولهم ولا عن بيعهم

 ولا عن اهدار كرامتهم ولا عن عجزهم

 وامتهان خصوصياتهم وشرفهم 

ولا عن أى حاجة ف أى حاجة 

... ابضننننن !

القصد لما اسماعيل اتشملل وقال مفيش تجارة تانى ف البشر

 ادى مهلة زى ما قولنا للناس

ومحدش اهتم طبعا ولا سأل ف امه خوشيار هانم 

ولا عبره مطلقا

الراجل هرش التيتة وقرر يعوض الناس دى

عن فقدانها لـ (ممتلكاتها)

 وامر كبداية بتخصيص مبلغ من خزينة مديرية الغربية

 لـهذا الغرض 

 وكتب ف السجلات انها مخصصة لغرض

 " السودان الذين يطلبون الحرية "

وعممه على باقى المديريات

عشان اللى عاوز يتشجع ع الخطوة دى يعملها

 وياخد زى تعويض ..!

 قصره هيعدى الوقت

 والتجارة دى شغالة الله ينور 

يتخلع اسماعيل ويمسك مكانه توفيق ابنه

 وانا زى بابا بالضبط ف الشدة شديد وف القوة قوى

هيمنع برضو الأتجار ف البشر شكلا

 لكن موضوعا الموضوع مستمر

وعلى وش امه النحس هيدخل الانجليز مصر 1882

 عشان يقرفونا بقى بدل القرف قرفين

ويحرقوا دمنا دوبل

مرة باحتلالهم ومرة كمان بإدعاء المثالية الجوفاء

اللى تفقع المرارة 

تيفة زى منتو هارشين زى ما يكون يا حبة عينى

 ويا نضرى استفؤجى بالاحتلال

 وملحقش يعمل أى منظر

قوم عمل من بنها وفضل منبطح لحد موته 

بعد منه جه ابنه .. عباس حلمى التانى

 اللى كان قازح كدا وغير ابوه خالص

وكان بيقرف ف الانجليز والانجليز يقرفوه

وحب يكونله دور مختلف عن ابوه وجده 

في بروكسل عام 1890 اتعملت المعاهدة التانية

لمنع تجارة الرقيق .. عشان يفكروا الناس بالسقطة السودة

 ويبطلوا يعملوها قوم مصر وقعت 

ف الوقت دا عباس حلمى كان بيشاغب سلطات الاحتلال والانجليز بيبعتوله ناس رزلة تقرفه هما كمان

زى اللورد كرومر وكتشنر وغيرهم 

و بموجب المعاهدة بتاعت بروكسل

 تم انشاء مصلحة لشئون الرقيق

وعينوا على قمتها راجل ثقيل ظابط جيش

 واسمه .. شيفر

 وشوف المسخرة بقى هما محتلين بلادنا

وف نفس الوقت يعملولنا مؤسسات تربينا وتعلمنا الأدب !

المختصر انه سجلات مصلحة الرقيق دى

 هتبين انه ف الفترة من 1877 لحد 1905

حصل 25 ألفاً من الرقيق على حريتهم في مصر

 وطبعا دا كان ربع العدد مثلا

والمؤسف انه اللى اتحرروا من الستات اتجوزوا وماشى

حلو كويس لكن الرجالة هما اللى بعد ما اتحرروا

 اتجندوا ف الجيش .. يعنى اتاخدوا عبيد برضو

بس من سكة تانية  !

لكن ف سنة م السنين هتحصل واقعة

 هيكونلها الاثر العظيم ف التجارة دى وكل اطرافها

واللى حصل الآتى ..

ف اول أغسطس عام 1894 ف عزبة نصار

 جنب الاهرامات هتوصل قافلة مكونة من رجال ونساء

 مالهم دول يا شهروزة ؟ 

دول بعيد عنكم كانوا 5 نخاسين

 و6 جوارى من ذوات البشرة السمراء

وجايين عشان يتلاقلهم مشترين ف القاهرة

 العامرة بالاثرياء المشخشخين جيوبهم

قايمة الأسماء كالتالى

اسم النخاس واسم بضاعته

حمدان .......................... مريم

علي مبروك .................. سعيدة

 محمد شغلوب ...... حليمة وفاطمة

 محمد درحان .............. مراسيلة

عبد الله سعيد .................. زنوبة 

ال5 نخاسين راحوا لواحد معرفة اسمه عبدالرحمن نصار

 عشان يساعدهم ف تخزين البنات ف السوكتيم

 لحين تصريف البوضاعة بنجاح 

بعيد عن عيون الأمن والفضوليين

واحد م النخاسين ..على مبروك

كان يعرف ميكانيكى عنده ورشة لتصليح العربيات

 كان يهودى اسمه ابراهيم منير

 مبروك طلب مساعدته ووعده بالحلاوة

منير طبعا مكدبش خبر

 هيطلعله سبوبة كويسة م العملية دى

فراح لصديق له اسمه يوسف اليسرجى

 ف حى المناصرة وبحكم شغلانته 

طبعا دايس ف بيوتات الاعيان

يوسف راح لجناينى يعرفه

 كان شغال ف قصر على باشا شريف

وقاله عندنا جوارى تشتروهم ؟

 الجناينى راح للباشا بلغه 

الباشا قاله ماشى نشوفهم الاول ..!

وستووووووووووب بقى

 عشان لنا ... هنا ... وقفاااااة

 مع الحاج على شريف دا 

عشان هوه حكاية غريبة جدا 

ماشى ؟

قالك ظماااان قوى لما جه محمأ على من قولة

عشان يبقى يوم اسود علينا وعلى عيشتنا

 الراجل بعد شوية بعت لولاده طوسون وبراهيم ييجوا

عشان يلغوا معاه ف فتة مصر

فهل بت ما هيلغلوا لوحدهم يعنى 

 يادى الندامة ودى تيجى

 العيال جم وف ديلهم ابن اختهم .. محمأ برضو

 بس محمد شريف حضرتك

 اللى هيدوس ف اليغمة دى مع قرايبه 

سى محمد هيتعلم الأفترا زى باقى العيلة

ويسمع الكلام ويبقى حلو 

فمحمد على هيبعته يحكم سوريا ف فترة ما

ويلم طبعا فيها لم ميتعدش ويرجع القاهرة

 ومعاه جنب الثروة كم من الخيول العربية الاصيلة

اتولد على شريف

 ابن محمد شريف سنة 1820

وكبر الواد و اتعلق بالخيول وحبها جدا

وبقى خبير فيها

 وسافر يكمل دراسته في الكلية العسكرية الملكية بباريس

ورجع على ومات الأب اللى سابله كمية فلوس

 وعقارات واراضى وخيل .. متتعدش

وعلى بصفته من الأسرة العلية 

اتنطق ف المناصب سريعاااااا

وبقى رئيسً للمحكمة التجارية المختصة

 بالفصل في المنازعات التي بيتحصل بين المصريين

 والأجانب

وف عهد عباس حلمى الاول 

اللى كان بيحب الخيول وغاويها هوه روخر

على كان تقريبا كدا سمساره الخاص

 ف شراء وبيع الخيول الخ

 كان عنده اسطبل شهير 

ف منطقة الهدارة ناحية شارع عبدالعزيز

وكانله صيت وسمعة ف حكاية الخيل دى ..

ودا اللى خلاه بعد مقتل الوالى عباس حلمى الأول

يجرى يشترى كله الحصنة من ابنه الهامى

ويتاجر فيها

وبيقولوا انه كان مهروش حبتين تلاتة 

ولعه بس مكنش بالخيل كان بيحب الستات كمان

واتجوز اربعة منهم مطربة سمعتها كانت مش ولابد

 غير الجوارى حضرتشك 

وكان مشهوربأشراك الخيل ف السباقات

 وطبعا كان بيخسر ويكسب حسب الظروف والمقامرة

 غير ان الطاعون مرة حصد رأس ماله من الحصنة كلها

 واتحجر عليه من عيلته مرتين 

لسوء تصرفه ف امواله 

وكل دا وهوه كان رئيس محكمة

تخيلوا بقى !!!

 ثم ف عهد توفيق مسكوه رئاسة مجلس شورى القوانين

ودا كان مجلس صنيعة الاحتلال 

زى ما قولنا الانجليز جم يحتلونا

عشان يعلمونا الحرية والديموقراطية وكدا #ضحكة_رقيعة

قوم اييييه ملقوش غير الراجل الهزوء دا

 يمسكوله المجيلس

الراجل طبعا مسك وشبط وقال ابيع يا باشا .. ابيع

وبس قعدنا كدا لحد ما جه عباس حلمى التانى

 والواد كان ثورجى وابتدى حماسه يعدى المؤسسات

واللى هوه هياخدوها جد ونظام ابوس

واشمعنى الاوستاز يوسف شعبان بيبوس

 وما دام الخديوى بيهاجم ما نعمل فيها معارضة بجد

 احنا كمان ...

 طيب !!

وإذ فجأتن صحيوا م النوم 

وابتدوا يهاجموا سياسات الانجليز ف الدولة

وان مرتباتهم كبيرة قوى

ومالهاش لزوم

وبعدين حودوا على المؤسسات اللى بيشغلها الانجليز
 زى مصلحة الغاء الرقيق وطالبوا بتفكيكها
لأنها شغالة ع الفاضى وبتستنزف ميزانية الدولة !
 #العب

بس بقى دبور وزن على خراب عشه .. !
 عشان الليلة دى هتقلب بغم وهباب على نافوخهم
عشان يبطلوا يعملوا فيها سبع رجالة تانى 


 نسيبهم ونرجع الهرم

احنا سيبنا الجوارى الستة والنخاسين الخمسة
 وصاحبهم من عزبة نصار قاعدين
مرشد تبع البوليس اسمه محمد بطران اشتبه ف الحكاية
 وكبس عليهم

- ايه دا هاركم اسووود
 - معلش يا بيه
- انجروا قصادى ع القسم
 - بلاش وشايك عندنا
 - خلوه بالياسمين طيب 
- ياسمين وريحان كمان 
- اتفقنا يا بيه

واخد بطران شوية مصاغ قصاد سكوته وشكرا
 ف الوقت اللى النخاسين قالوا يعجلوا بانهاء الصفقة
 قبل ما ريحة البنات تفوح اكتر 
وميخلصوش ابتزاز من ناس تانية !

سريعا هتم الصفقة وتخرج البنات ف قلب الليل
 عشان الستر وعيون الغرباء
 يروحوا قصر على باشا شريف يعاين البوضاعة
ويختار حليمة وسعيدة ومراسيلة

ثم يركز شوية سعادتو فيلاقى سعيدة صحتها تعبانة
 ومتعجبوش فيبدلها بفاطمة ..
 يعنى بدل الأسود ف ابيض
 ناخد المشمشى اللى ديلها مش معوج .. حاجة كدا

الصفقة دى خلصت على كام يا معنمى ؟؟
 قالك الباشا دفع 60 جنيه ف القطط .. قصدى الجوارى
 كل واحدة بـ 20 جنيه
 يا بلااااااااااش
 زمن الرخص الجميل

وادى للسماسرة 7 جنيه نظير مجهوداتهم المخلصة
وبس بعنا تلاتة وفاضل تلاتة
 نعمل ايه مينفعش هنرجع بيهم العزبة
اترجوا الباشا يفضلوا للصبح عنده

الراجل اللى كان رئيس محكمة وبتاع قوانين
 وعارف انها مخالفة للقانون .. وافق
وقالهم لحد الصبح وتعالوا خدوهم بسرعة
عداك العيب يا ابو سامية

تانى يوم كان النخاسين ف بيت دكتور
 اسمه .. عبدالحميد الشافعى كان متعلم برا
ومتجوز من دكتورة من بلاد اروبا
 وبتعالج اميرات القصر الخديوى والكبرات

الست الضاكتورة وجوزها عاينوا البوضاعة
 واختروا واحدة وبعدين الدكتورة اخدت البنتين الفاضلين
 وراحت على بيت حسين باشا واصف
 مدير مديرية أسيوط

مرات واصف باشا اختارت بنت
 والتالتة والاخيرة راحت لصاحب نصيبها
 محمد باشا الشواربى سليل الشواربية
 واللى كان عضو مجلس النواب وعين أعيان قليوب

وبس البضاعة اتوزعت
 وكله دفع التمن وانبسط واتراضى
 وتصبحوا على خير ..
 خلاص كدا هتعدى ؟
 لأ
 طبعنننننننننننننننننننن

الواد محمد بطران المرشد اياه اللى قبض تمن سكوته
على الواقعة دى .. ظهرت عليه النعمة
 زمايله شكوا فيه والظاهر كان محبوب آآآآوى
 راحوا مبلغين عنه
اتحول للتحقيق وراح معتيرف بكل حاجة
 وهوب اتبلغ مين ؟؟

 الحاج شيفر رئيس مصلحة الغاء الرقيق
اللى جاتله بيضة مقشرة
 ووقعت ف حجره .. بالمستريح 

وبس يا معلم قضايا اتجار بالرقيق والمتهم فيها مين ؟؟
 ناس كبرات واسامى عليوى
 والمهم ان اكبرهم يبقى رئيس مجلس شورى القوانين
 وعضوين في المجلس
وهوه نفسه المجلس اللى هاريهم هجوم
 وعاوز مصلحتهم تتفكك
دنتا ليلتك طين يا مورسى 
وتعالى لحمو آحبيبى

شيفر لقاها فرصة يهزأ بيها الكل
 بدءا من باشوات المجلس ونهاية بالخديوى نفسه
 اللى كان عامل فيها حاكم بجد 
ومش عاوز يوطى زى ابوه

بسرعة صدر الامر لضابط مصلحة الرقيق بنقطة الأهرام
 واللى راح يقبض ع النخاسين الخمسة
 واحد منهم هرب فمسك اربعة
 وخدهم ع النقطة
 ونايتى نايتى يا ولاد 

الولاد اتضايفوا واخدوا واجبهم
 وقعدوهم ف تكييف القسم
 وخدمة خمس نجوم على أعلى مستوى
وطبعا اعترفوا تفصيليااااا بكل حاجة
 ومحدش لمسهم يا ثامح اوعى حد يفتكر حاجة !!

بس وتم المحضر ف ساعته وتاريخه
 بأسماء البايع والمشترى
وبسرعة وصلت اشارة لقسم السيدة زينب
 حيث يقطن المذكورعبحميد الشافعى الدكتور وزوجته

وجه عبحميد ومسافة ما شرب القهوة ف المكتب
 بتاع حظابط كان معترف بكل اللى حصل
بمنتهى السلاسة وعادى خالص
 ولا كأن فيه حاجة غريبة مالكم يا جماعة !

الاعتراف دا على فكرة بعدين .. اتاخد ضده
 اتقال انه مزقوق  اصلا ف الواقعة دى
 عشان يوقع الباشوات ف المحظور
وانه جاى متسلط علينا يا سعااااد

ودللوا على ذلك انه عاش ف اروبا
 والمفروض يكون اخر واحد يشارك ف الجريمة دى
 بحكم العادات والتقاليد الآلفرنكة يعنى وكدا
 القصد الراجل خر ّ

والمحضر اتكيف وبقى تمام
 طلعلى بقى يا بنى امر باستدعاء
 كل من التلات باشوات المذكورين عشان نحقق معاهم
 ف الواقعة المنسوبة اليهم 

الشواربي باشا
لما راحوا يعكشوه لقوه مش موجود
 وقالولهم انه ف قصره بقليوب
فأنبعتت إشارة عاجلة لضبطه وإحضاره للقاهرة 
مهزأ متمرمط 
اما حسين واصف باشا والدكتور الشافعي
 فاتخدوا ف قسم عابدين عشان يبيتوا فيه
 على ذمة التحقيق في القضية




 الزغلولة الكبيرة بقى على شريف كان فين ؟؟

الحاج طبعا كانله ناس حبايبه اول ما بلغهم الخبر
 انه هينقبض عليه
 جرى بسرعة يلحق روحه ويعمل اتصالاته
 وطلع على وزارة الداخلية عدل

ف خروجه من القصر لقى بتوع القسم ف وشه
واتفضل معانا يا باشا 
#بصوت_أى_ممثل_ف_افلام_الأبيض واسود
يسكتلهم ؟؟
لأ طبعا .. الباشا راح مزعق وقايلهم 
 حصانتى البرلمانية يا غجر !
 ورفض يروح معاهم القسم
 #الحصانة دى من زمان  مستفحلة

المهم طلع الباشا على ناظر الداخلية
اللى كان عنده علم ومتبلغ بالاوامر
 سكرتير مكتبه بلغ على ان التحقيق عند شيفر
وهما ملهمش دعوة بالموضوع !!

خرج على وهوه فاهم ان ضهره للحيطة
 ومعهوش حد
 راح على مكتب شيفر مباشرة اللى لطعه شوية ف الاول
 وبعدين دخله
 ووجهله التهمة ف وشه رسمى فهمى نظمى

على شريف طلب الاتصال بنوبار باشا رئيس النظار وقتها
 عشان يطلب تدخله لوقف المهزلة دى 
 شيفر تقريبا اداله واحدة اسكندرانى وقاله مكنش يتعز
وانتا مقبوض عليك مقبوض عليك 
وهنقفل الاوضة من جوا بالترباس يا عباس 

وبس كدا هيخرج م المكتب ع التخشيبة ولاّ ايه
 وهنا خرج الكرت الأخير اللى رماه على شريف
 ف وش شيفر ووشنا احنا كمان
 ايه هوه يا شوشو ؟؟

ولا حاجة الباشا اللى مفروض انه
 رئيس مجلس النواب (المصرىىىى)
 قال انا معايا جنسية طليانى
 وهاتولى قنصلى دلوقتى حالاا

حكاية التجنس بجنسية اجنبية دا كان منتشر وقتها
 عشان يحصل بيه صاحبه على حصانة تنفعه
 ف لحظات سودة زى دى .. ما اشبه الليلة بالبارحة
 لكن بقى

المؤسف انه كان متاح للناس اللى ف مناصب عليا
وكأنه طريقة للهروب من العقاب
 وأكن الحصانة البرلمانية
 وحصانة كونه م الأسرة العلوية مكنش كفاية !

بس وجرى جرى ابن على شريف كان ف مكتب فيشر
 ومعاه موفد قنصل ايطاليا ف القاهرة
 وبيقول ان الباشا من رعاياهم
 ولازم تفرجوا عنه حالاااااا وقد كان

وكدا على شريف خرج بضمان جنسيته الايطالية
 والشواربى ف قليوب هاربا
  واصف باشا والدكتور الشافعي اخلى سبيلهم
 لأن احد الباشوات اللى راح ضمنهم

الحادثة دى كان ف عز الصيف
 كان وقتها عباس حلمى التانى بيصيف ف اروبا
 واللورد كرومر برا البلد
 ونوبار هوه اللى كان ممشى الدنيا وقاعد ف اسكندرية 

لما بلغته الواقعة .. طبعا عمل عيشة وأم الخير
 وقال طب نستنى مولانا لما يرجع من اروبا
 الا لو عملنا أى حاجة يمكن نزعله
 او نزعل المندوب الصامى

وحاول يعمل نفسه مش موجود .. لكن على مييييين
 فيشر كان قاعدله وبالضغط والترهيب
 اجبره على احالة الموضوع كله لمحاكمة عسكرية .. !

السردار كتشنر باشا
 امر بتشكيل المجلس العسكري العالي
 خلى رئاسته لضابط أرمني اسمه زهراب باشا
 وبعضوية ضباط انجليز ومصريين

وهوب بسرعة بسرعة الخبر انتشر
 واتحدد معاد سريع للمحاكمة
 النخبة والناس ف العموم اتخضت ومعجبهاش المنظر
واستنوا تدخل الخديوى اللى كان مسافر

الراجل بعتلهم م المصيف يقولهم استنوا شوية يا ولاد
 محدش طبعا سمع كلامه


وابتدت المحاكمة اللى حشدلها الانجليز 
كل البروباجندا اللازمة

وفاكرين قصة مارجريت وجوزها سليل عيلة فهمى .. ؟
 طبق الأصل نفس الطريقة
 والوساخة ولى عنق الحقائق
 واستخدامها لمصلحتهم
 وهما حلوين والباقى يع

"لندن تايمز" و"ذي مانشستر جارديان"
 والصحف الإيطالية والفرنسية
كله بعت مندوبين يغطوا القضية
 وبس اتفضحنا وسط العالم كله
وحصل انقسام بين الأراء والتوجهات

النخبة والصحف كمان انقسمت
 ما بين معارض للاحتلال وطغيانه
 وما بين مؤيد للخطوة دى أى كان اللى عملها !

ف المحكمة اللى استمرت 10 ايام فقط
كان واضح ان الأنقسام موجود وبشدة
 ما بين فريق بيدافع عن الباشوات
 وفريق مع الانجليز اللى آل بيدفع عن الحرية 
والتخلص من العبودية 

فريق المدافعين قعد يهبب بكلام
 عن ان الجوارى والرقيق دول بيعيشوا احلى عيشة
 ويتعلموا وياكلوا ويتم حمايتهم وبيتجوزوا 

وانها مش عبودية ولا حاجة والناس قاعدة بكيفها
والناس عمرها كانت مبسووووطة 
قوم عشان الموضوع يمشى كانونى
 الحاج زهراب قرر يسمع بنفسه من الجوارى
 موضوع القضية عن الواقعة
 وبالعافية واحدة ردت عليه بعد جهد جهيد 
من كتر الخجل والخوف اللى كن فيه وهول الموقف

اقوالهن كانت كالآتى 
سعيدة لما سالوها قالت 
 "سيدي اللي في سيوة ما
، وأهل بيته باعوني لسيدي على مبروك (النخاس)
 وجينا من سيوة لمصر"
 زنوبةفكل ما القاضى يقولها ارفعى راسك 
تحنيها تانى لحد ما زهق ... !

اما مريم لما سالها عن المكان اللى حجزوهم فيه قالت
 :"جنب الحجرين الكبار والحجر الصغير"
 الأهرامات يعنى!

مريم اتباعت للشواربى باشا
. ولما زهراب سالها تعرفيه ردت أعرفه
 ولما سالها اذا كان الشواربى بلحية ولا لأ
 اكتشف انها متعرفش معنى كلمة لحية !

القصد البنات كانوا اغلب م الغلب
وفجأة بقوا حديث العالم المتحضر
 وكله باصص لباشوات مصر ورجالها
على انهم الهمج الرعاع اللى بيفترسوا الأناث 
والحقيقة انهم مبعدوش قوى عن الحقيقة 
لكن نسيوا يتكلموا عن الأمبراطورية العظمى 
اللى بتفترس الدول .. بالمرة طالما بنتكلم عن الوحشية 
والظلم وكدا !!

ف قفص الاتهام وقف الكل
حسين باشا واصف والشواربي باشا والدكتور الشافعي
 والنخاسين الأربعة والمرشد المرتشى والسمسار اليهودي 
ناقصين واحد ..

على باشا شريف .. اللى جاتلة أزمة قلبية
 لما عرف بمعاد المحاكمة
 وطبعا مكنش يقدر ييجى
 لكن بعد ايام من التغطية الصحفية
 ايطاليا اتقمصت

وبعتت لقنصلها ف مصر تعزله لأنه ورطها ف القضية
 بينما الباشا مدفعش الاشتراكات بتاعت كل سنة من مدة
 ومبقاش من رعاياها ولا نيلة ! #باعوك آريتشر

المثير للدهشة بقى ان الجريمة  ف الواقعة دى
 انصبت ع النخاسين
 لأن هما اللى تاجروا ف البشر
 اما اللى اشترى فلا أثم عليه غير الفضيحة بس

الحرب الاعلامية اشتدت بين  المؤيدين والمعارضين
وكل اللى له خصومة مع حد او بلد
 استغل الموقف لحسابه وهاجم الطرف الآخر
 قصره 
احنا اتفضحنا والقضية بقت مسخرة بفيونكة

وما بين دفاع المتهمين والمشترين
وما بين هجوم النيابة والأعلام
 ومن وراهم فيشر وكرومر من وراء ستا
ر والاحتلال الانجليزى ف العموم
 خلصت الهيصة

بعد عشر ايام يا ثاااامح مرمطة وتسييح
 وتفتيش ف بيوت الكبارات على جوارى اخرى
 وافلام كداااا
 المهم انها اخيرا خلصت 
على ايه بقى ؟

حكمت المحكمة حضوريا ع النخاسين بالسجن
بعقوبات وصلت لـ 5 سنين لبعضهم
 اما البراءة فكانت لـ حسين باشا واصف
 ومحمد باشا الشواربي لأنهم اشتروا ولم يتاجروا

العجيب بقى ان الدكتور عبد الحميد الشافعي
 اتحكم عليه بخمس شهور
 والناس استعجبت لأنه الوحيد اللى اعترف بكل حاجة
 وما انكرش زى الباقيين !!!

واشترى زيهم و متاجرش ولا حاجة .. !

المهم .. الباشا بقى .. على يا على يا بتاع الخيل
 ماذا جراله يا ترى ؟!!!

ولا حاجة حضرتشك
 ببيقولوا الحكومة طالبتهيكتب 
 اعتراف بخط ايده لجناب الخديوى
 يطلب منه العفو والسماح 
..................

طُلِبَ منه إرسال اعتراف مُذل بخط يده بالخطأ
 الذي ارتكبه يقول فيه إنه تصرف بقدرٍ من الإهمال
 وقد ندم وتأسف على ما بدر منه طالباً العفو والسماح

حد يسألنى ..
أكيد بقى مكتبوش يا شهرو
طبعا بعد كل المرمطة تشى ؟
 أقولكم لأ اخص عليكو انا معوداكم على كدا ؟
 دى اشكال تتعلم الكرامة دى ؟!! 
كتبه طبعا

وعباس قبله وأصدر عفو عنه
 وقاله معلش يا ابو نسمة جت فيك
وكانوا عاوزين يقرفونى انا #معلش
والعفو صدر من هنا والدنيا قلبت

والجرايد مسكت على شريف بعترت كرامة امه
بعد ما كانوا واقفين جنبه
 وازاى يعتذر
وازاى يرضخ
وازاى معرفش ايه 
 قصره الراجل اتهزأ تهزيىء السنين
ومبقاش قصاده الا انه يقدم استقالته
 من مجلس شورى القوانين
#لهو_انتا_كنتش_لسه_قدمتها_يامنيل ؟!!




 واعتزل الحياة العامة
 ومبقاش يظهر الا قليلا واشتد عليه المرض
 ورقد ف السرير لحد ما مات بعد المحاكمة بسنتين

ومجلس شورى القوانين نفسه بعد فضيحة السمكة 
ف طاسة القلية دى حرّم يسترجل
ولزق بوقه بسلوتيب من النوع الفاخر
 ومستجراش يدوس لمصلحة الغاء الرقيق على طرف
 لا من قريب ولا من بعيد
ومش بيقبضوا حضور جلسات 
وبيتغدوا وياخدوا واجبهم شاى وقهوة طول النهار 
عاوزين ايه بقى تانى ... ناس عجيبة والنبى !

البنات بقى بعد القضية دى اخدوا حريتهن
 ومصلحة إلغاء الرقيق ادتهم مستندات بكدا
 وقعدتهم فترة في دار الجواري المعتقا
ت اللى اتعملت  للغرض دا

وخرجوا بعدها للحياة والزواج والعمل
 لكن صلاح عيسى ف كتاب حكايات من دفتر الوطن
 بيقول ان كلهن الا مريم أذكى الفتيات
 الوحيدة اللى عملت العكس

مريم بعد خروجها من المحكمة
 قطعت شهادة العتق الخاصة بيها
ورجعت على دار سيدها الشواربى باشا
وقعدت هناك بأرادتها 

والحقيقة ان دا كان المنطقى وقتها لأى بنت
 ملهاش أهل او زوج أو ضهر
واتعودت ان الامان والعيشة المقبولة
 مش هتلاقيبها غير ف بيوت الكبرات وبس
اما الشارع فبهدلة ما بعدها بهدلة ... 

وشهروزة خلصت
وفاضل بس الملاحظات

 1) العبودية مؤسفة مش لأنها بتحجز البنى آدم
كجسد ومادياً بس دى كمان بتحجز روحه
 واحساسه بحقه ف الحرية ورا قضبان لا مرئية وشفافة
 زى كدا ..

العصفور اللى طول عمره محبوس ف قفص
 ولو خرجته ميقدرش يطير ويخاف يطير
 مريم عملت كدا ظنا منها ان دا الصح
خافت م الحرية 
وقررت تدخل سجنها تانى تاكل وتشرب وكفاية
 وما اكثر المريمات
 ف كل عصر ومكان

2) حيلو قوى لما نتلوى عنق الحقيقة
 ونتمسح بالدين والعادات والاصول
 عشان نبرر لروحنا ان استعبادنا لشخص حماية له وكدا

3) حيلو كمان لما نتعامل معاهم زى البهيمة ننقلهم
 ونبيع ونشترى فيهم ونتصرف ف اجسادهم
ونقول احنا بنرحمهم م البهدلة ! 

4) حيلو اكتر واكتر لما تيجى دولة تحتل دولة
 وبعدين تكلمها عن الحرية والمبادىء والاخلاق
 بينما هيا عاهرة واقفة تتحدث عن الشرف .. !

5) حيلو كمان لما يبقى رئيس مجلس "القوانين"
 يبقى اول نفر يخالف القوانين ويستغل الحصانة
 وكمان يجرى ع الجنسية الاجنبية عشان يتحامى فيها ..!

6) حيلوة قوى روخرا المحاكمة اللى بسرعة بسرعة
 اتقلبت ف عشر تيام اكمن المذكورين فيها مكنوش ع الكيف
 بينما غيرهم فلت من جرايم ابشع واتدلع
 واتهنن كمان !

7) الأخ نوبار دا دايما  يطلعلى  ف الحواديت 
 اكمنه ابن الوارمة قعد ف الحكومة المصرية
ردح من الزمن مش هين ابداااا 
 بس احب انكد عليه موتته واقوله
 ان الجنزورى هيضرب رقمك القياسى قريب 

8) المجلس اللى على شريف كان رئيسه فقط
 لمجرد انه كان قريب للعيلة المالكة
 ولا أى مهارة اخرى
 يقال انه صنيعة الأحتلال عملوه منظر وديكور

اتعمل كدا حلوانى ولا له قيمة
ولما بعض اعضائه حاولوا يحللوا لقمتهم
 ويشتغلوا بخمسة مليم
خدوا فوق دماغهم علطوووول واتربوا
 ولهذا

الناس اللى واخدة مجلس الشيعب الجاى
على صدرها كدا وفاكرينه بجد
 يسعدنى اقولكم كان غيركم اشطر
 وان اللى هتقولوله نيللى نيللى
 هيتردلكم شيريهان شيريهان
الطينة م العجينة وكلهم ديكور
 وهيقع فوق الكل وبجد مش تهريج  زى الاعلان 





9) البنى آدم سنة 1894 كان سعره عشين جنيه 
لا تعليق عشان المرارة بس

10) العالم ما زال فيه عبودية بس بقناع تانى 
 الدعارة  
وفيه شكل تانى كمان للعبودية 
 عمالة الاطفال وتشغيلهم 
وكمان اللى يتجوز اربعة بحجة الشرع 
لكن الحكاية انه عاوز ينبسط ويتذرع بالحلال
بينما هو بيظلم الستات دول وبيظلم نفسه 
واولاده منهم 
ولسه لحد دلوقتى  فيه قرى وبلاد بعينها ف مصر
البدرشين على سبيل المثال .. بتبيع بناتها 
بس بورقة عند مأذون
 وفيه نخاس 
وفيه اطفال كتييير بتشتغل سخرة 
واهاليهم بتقبض
 او المعلمين بتوعهم والبلطجية اللى 
 بتسرحهم ف الشوارع وتاخد عرقهم 
وكله بينتهك جسديا وانسانيا وماليا 
والسبة  ف الجبين البشرى لم تزل
 بعد كل هذا الزمن

واخر ملحوظة ..
11) فترة ما قبل  صدور شهادة العتق ولحد بعدها
 محدش ممكن يتخيل كانت مرعبة قد ايه
على أى بشر .. مهما حاول

لأنها كانت تجارة منظمة ومربحة
 وفيها تنفيس عن امراض مجتمعية  كتير
 وانتا وحظك يا تنولد حر او تنولد عبد 

شىء بجد مهين ومقزز ومرعبببب

ورغم ان العالم مبقاش فيه عبودية بالمعنى التقليدى
 لكنه ما زال يستعبد بعضه بعضا كدول
 او انظمة .. او بشر حتى مع بعض




 وهتفضل الحرية شمس

لو مكنش هنطولها
يبقى من حقنا نتدفى بنورها
 ونشوف بيها الدنيا ونعيشها بعيد عن الظلمة وقهرتها

وتوتة توتة ...
 تصبحوا على الف خير
وحرية 

------------------------------------

Yasser ʿAbd Allāh @Yasserigo 

 عشان لو العجلة مخرومة هتنفس لما تغطس

Heba @HappyGeddan 

 هي نظرية غريبه شويه الله يرحمك يا ارشيميدس

hayat @hayatankh 

 طول عمر رجال الدين عندنا ادب واخلاق
 منذ العصور السحقيه

ahmedsalah750® @ahmedsalah750 

 صاحب شارع شواربي؟

تمام .. العيلة كانلها قصر ف الحتة دى والأرض طبعا
 كانت بتاعتهم والشارع اتسمى على اسمهم




Heba @HappyGeddan 

 هوا الوطيان في اجهزة الدولة ابتدا امتى بالظبط؟

اكتئاب ما بعد الثورة @MahometusUsama 

 أزمة قلبية قبل المحاكمة D:
 التاريخ بيستخدم الكربون

Moussa @moussiav 

 اضرب المربوط يخاف السايب

Mohammad Diab @som3amasrawy 

 ده سندونتش الشاورمة السورة النضيف ب ٣٠ جنيه !!!