بهرام الأرمنى : سيف الأسلام Vs فحل الأمراء

حكاية النهاردة فاططيمى من الصنف المفتخر 

مليانة تناقضات وغرائب متحصلش 

غير ف بلد زى مصر وبس
الحدوتة عن شخص .. لكن قبل ما نقول حكايته

 نتكلم الاول عن شعبه ... وبلده .. وثقافته 

ف مكان مش بعيد عن مصر قوى 

حيث توجد أرمينيا الشكيكة

وأرمينيا سبب وجودها واحد اسمه هايك

 كان بطل أسطورى وقيل انه احد أحفاد سيدنا نوح 

حارب ملك بابل من اكتر من 2000 سنة قبل الميلاد 

وانتصر عليه
ومن سلالته جه آرام 

واللى أشتق من إسمه .. أرمينيا

ومكانها كما هو ف الخريطة بين قارتي أسيا وأوروبا

 وربنا ما يوريكم بقى
ليه ؟ 

عشان الموقع دا هيكون سبب وبال ع الحتة دى 

لمئات السنين وهيخليها مطمع لكل الأمبراطوريات 

ومصدر للنزاع والخناق والإحتلالات 

وخد عندك
احتلها الآشوريين واليونان والرومان والبيزنطيين

 وبعدين العرب ثم نازعهم المغول والفرس 

وأخيرا ختمت بجوز العتاقى الأتراك العثمانيين والروس !

بيقولوا ان الارمن هما اول بلد ف العالم 

اعترف بالمسيحية كدين رسمى لدولتهم 

قبل أى حد ف الدنيا يعنى !
والاتراك ادوا للأرمن حكم شبه ذاتى ف البدايات

لكن الأستقرار دا مدامش كتير

وحصل قلق ودوشة والمنطقة كانت مطمع للروس

 اللى عكننوا ع الاتراك

ف العصر الحديث ضغط الأرمن ع الباب العالى

 عشان ياخدوا حقوق اكتر 

فعبحميد التانى اللى كان السلطان 
طلع ترابنتين ابوهم

ويقال انه إتك عليهم

 بإيد ناشفة حبتين بين 1894 و1896 

فيما عرف بعد كدا بالمجازر الحميدية 

واخد لقب السلطان الأحمر

والسلطان الدموى .. نقوا اللى يعجبكم

القصد الأرمن هيتبهدلوا قوى 

وعبحميد هيتعمل على أمه ثورة 
وينخلع من الحكم 1908

 وقشطة الله ينور 

كدا هتروق وتحلى اهى !
الأرمن ف ظل النظام التركي الجديد 

هيحاولوا ينسقوا وياخدوا حقوقهم 

بدل ما هم مواطنين درجة تانية

 وميلحقوش يا كبدى 

لأنه هوووب هتقوم الحرب العالمية الأولى 1914




طبعننننن وكالعادة الأتراك والروس 

هيكونوا خصمين ف الحرب دى مش حلفاء ! 

قوم مين هينطحن وسطيهم كالعادة ؟

 شطااااار

 الأرمن الغلابة
والتراكوة هيبصوا للأرمن بعين الخيانة 

وانهم بيساعدوا الروس 

اكمن فعلا كان فيه أرمن اتطوعوا للحرب جنب الروس

 املا ف الأستقلال والتحرر وكدا

حقهم يعنى !
وف أبريل 1915 هيتعمل حملة للقبض 

على كل من يشتبه فيه ان يكون ثوريا

 او ضد الهيمنة التركية واعتقالات يامه يا هبة بالهبل 

وبلا تمييز

ثم ف مايو من نفس السنة بعد شهر يعنى 

صدر قانون تهجير للأرمن
 اللى عايشين ف الاناضول 

وطبعا القرار دا اتنفذ بواسطة السلطات التركية 

ولنا ... هنا ... وقفة
الا انا مبقوقة من الاتراك دول بقبقة السنين والله 

لأنهم كل ما اتكعبل ف وش امهم 
ف اى حكاية ف أى زمن ف أى حتة

ملاقيش غير الدم والقهر والغرور والخراء التام
العرق دا فيه عنف ووحشية وكم عنصرية 

ملهاش تفسير الصراحة 

ومع ان امبراطورياتهم اصلا اساسا 

قايمة ع السرقة والنهب والقتل من أصل المبتدا

فعلى ايه القنعرة بسلامتهم ... متفهموش !!

المهم 

السلطات التركية ف هذا التوقيت 

قررت تجلى الأرمن .. انما ايه 

اجلاء يحكى ويتحاكى عنه التاريخ لعقود 

وسيظل يحكى فيما يعرف بمذابح الارمن الشهيرة

مرضتش أحط صور كتير 
بس اللى هيدور ع الموضوع دا

هيلاقى بلاوى ومشاهد مؤسفة وعار ع البشرية 

وغالبية المؤرخين وثق الخساير البشرية
بما يزيد عن نص مليون أرمنى

 بين رجال ونساء واطفال ف الفترة بين 1915 - 1916 

وطبعا الجانب التركى نفى تمامااااا 

وما زال ينفى انها مذابح عشان ميدفعوش تعويضات

ويبقى لحد عليهم حقوق 

انتوا عارفين التراكوة مش هقولكم بقى 

 بلطجى وأفتخر

وتسألهم اومال اللى ماتوا دول ماتوا ازاى يا جماعة ؟ 

يقولك اصل الأرقام حصل فيها مبالغات 

واللى حصل مجرد تهجير 

ثم مجاعة 

وبعدين أمراض ناتجة عنها 

وشوية ف النص كدا قاومونا بالسلاح وعملوا ثوار 

لما جينا نطردهم فقومنا قتلناهم دفاعا عن روحنا 

ولا نسيبهم يموتونا واحنا بنموتهم يعنى .. !!
والولية جيت اخنقها راحت عضانى ف إيدى 

تقوليش عدوتها ؟؟؟

لأ ملهمشى حق خالص الصراحة 

 

المهم انه بعد انتهاء الحرب العالمية الاولى

 كان الأرمن ف شتات ف كل حتة 

بعد المصيبة السودة دى وانتشروا ف العالم 

هربا من البطش التركى
وبعدين عشان منطولشى قوللولى طولى يا شوشو 

الأرمن هيبقوا تحت مظلة الاتحاد السوفيتى 

وهيفضلوا يناضلوا لحد ما بعد سقوطه هينفصلوا 

والحمدلله
وتبقى جمهورية ارمينيا اللى شافت الويل 

والعذاب قرون طوال لحد ما نالت حريتها 

من كل الغجر الكبار دول

اللى يهمنا ف حكاية الليلة

 ان الارمن قبل المذابح بتاعتهم دى 

كانوا بيخرجوا من بلادهم طواعية للهجرة 

الى بلاد الله خلق الله ف كل حتة

من وسط الدول اللى جم واستوطنوا فيها 

كانت ام الدنيا .. مصر

 اللى ف كتب التاريخ المصرى عبر عصوره 

هتلاقى اسماء الارمن ف الصفحات ببنط عريض احيانا
من اول الفاطميين ولحد عهد محمد على وأسرته 

اللى ورثت العزبة بتاعت بابا وجدو 

لحد ما حصلت المذابح 1914 

 وعدد الارمن زاد ف مصر بشكل كبير
واتركزوا ف القاهرة والاسكندرية

 قبلة كل الاجانب ف العادة واشتغلوا ف التجارة والفن 

والمهن اللى بعيد عن السياسة الا فيما ندر 

اللهم الا .. نفر قليل منهم عبر التاريخ 

اما الباقيين فكفاية نذكر منهم 

نيللى وفيروز ولبلبة

 وصاروخان رسام الكاريكاتير المعروف

اما ف مجال السياسة فعبر العصور 

كان منهم نوبار باشا 

اول رئيس وزراء لمصر ف العصر الحديث 

والحاج بوغوص اول وزير خارجية
واكمنهم كانوا شطار ف تصريف الامول والتجارة 

وامور الصرافة استعان بيهم حكام مصر 

عشان يعرفوا يلعبوا التلات ورقات على أروبا 

ويسلكوا مصلحتهم منها

وفضلوا الرمن ف تزايد وسكينة وهدوء بال ف مصر

 لحد ثورة الضباط ما قامت 1952

وبعدها طلعت سلسلة القرارات بتاعت التأميم

واللى معاه فلوس يطلعها عشان هناخدها 

الأرمن إتأثروا بالقرار دا زيه زى اغلب الاجانب

وطفش منهم عدد مش قليل بعد الثورة 

وفضل عدد بسيط 

بيقولوا دلوقتى انهم ميعدوش العشرتلاف بكتيره

القصد .. الأرمن المصريين حاليا 

بقوا نسيج من المجتمع المصرى لا ينفصل عنه

 بيتكلموا وياكلوا ويتعلموا ويعيشوا بالمصرى 

وأرمينيا حنين ومحبة فقط

كل القصص دى بقى والمقدمات 

عشان نقول حاجة مهمة ان الحاج نوبار 

صحيح كان أول رئيس وزراء لمصر

 لكن مكنش أول وزير ارمنى لمصر ... كان فيه قبله ! 

فلاش بااااااك بقى للعصر الفاطمى 

عشان نقول الحدوتة بتاعت الشدة المستنصرية

لما النيل منسوبه انخفض بشكل مرعب 

وحصل قحط ومجاعة وبلاوى زرقة

والموت والخراب عشش والأكل شح

 لدرجة ان الناس كلت القطط والكلاب والدواب 

ولما كل حاجة خلصت ابتدوا ياكلوا بعضهم 

ف حالة من البشاعة لا توصف

كانت الناس بتصطاد البشر وخصوصا الاطفال والنساء 

لأنهم الاضعف وياكلوهم

 والوضع ساء لدرجة رهيبة حتى المستنصر الخليفة 

واكبر راس ف البلد بقى متسول

بقى شحات فعليا وخسر كل ثروته 

وبعت حريمه وعياله على بغداد 

اما هوه فكان بينبعتله عشاه من دار ست كريمة بتعمل الخير

 كل يوم تبعتله اكله #تخيلوا

قصره البلد خربت حرفيا والفصايل ف الجيش 

استغلت الوضع وقعدوا يحاربوا ف بعض

 شغل عصابات وميليشيات كدا

 لحد ما المستنصر قال يا لهووووووووى

وراح باعت لبدر الدين الجمالى والى عكا ف الشام 

وقاله تعالى الحقنى شوف اللى جراااااالى

 ومصر بتتحرق يا اوستاز خيرى 

بدر قاله عينى يا ابو سامية

بس بشروطى واعمل ما بدالى ومحدش يعدل عليا 

المستنصر بصمله بالعشرة 

والراجل ركب الحلزونة وجه 

وكنا حكينا قبل كدا ازاى لم البلد ف عبه وسيطر
وقتل كبار امراء فصايل الجيش المتناحرين دول

 وقتل كمان كل اللى اكلوا لحوم البشر 

وظبط الدنيا وعمل جو ومجال 

والمستنصر خلع عليه القاب بالهبل
وبدر الجمالى اخدته الجلالة 

وقال اللى يمد ايده على مصر وشعبها 

أخص طب دحنا منعش بعد كدا 

وحوار انا مش عاوز أى سلطة والقصص دى
وهما شوية صغنيين يا مؤمن 

والبلد كلها بقت ف كرشه والمستنصر بقى شرابة خرج 

وكيس جوافة وخيال مآتة 

وكل حاجة ف هذوها السياق
ودى كانت اللحظة الفارقة ف زمن الفاطميين ودولتهم

 لأن من وصول بدر الجمالى مصر 

بدأ عهد الوزراء اللى كانوا هما الكل ف الكل 

والحكام ولا حاجة

طبعا لا داعى لذكر انه بدر الدين لما مات

 أبنه الافضل مسك منصبه وعمل سبع رجالة 

والبلد كانت ف ايده والجيش طبعا من قبلها

 وبعدين ابن الافضل راخر كتيفان او كتيفات 

يعنى التوزير كان وراثة زى الخلافة تمام
وكلهم أرمن 
ولحد دلوقتى 

لسه مجبتش سيرة شخصية حكاية الليلة

 تصوروا ! 

محدش يحدف طوب

شخصية الليلة يبقى من نفس الجالية دى
سعادت حضرت جناب الوزير

  بهرام الارمنى 

والأخ كان من الأرمن اللى سكنوا تل باشر 

ف عينتاب حاليا اللى بقت ضمن حدود تركيا 

أبو البهاريم كان من أعيان تل باشر وله برستيجه وكدا 

قوم ف مرة متفهموش ايه اللى حصل 

ومسكوا عمدة بداله ولا ايه 

المهم بهرام اتقمص وراح ماشى
وجه على مصر ف زمن الحافظ لدين الله 

وحكينا حكايته زمان الجدع دا

 للى كان متابع شهرزاد ف البدايات

القصد بهرام أفندى دخل ف زوراق القصور 

والخدمة فيها لحد ما أتنطق 

وبقى مقرب من اولى الأمر وهوب مسكوه المحلة ..!

 ودى كانت حتة مش سهلة ابضنننن
والى المحلة والغربية عموما زمان 

كان لازم يكون قوى وشاطر ف التجارة 

لأنها كانت مركز مهم وفيها فلوس واعيان وخلق ياما

المهمممممم

بهرام قعد ف وظيفته دى وكافى خيره شره 

ومالى مركزه لحد ما الحافظ لدين الله 
اتخانق مع حسن ابنه 

(راجع الحدوتة) 

لما حسن كان عاوز ولاية العهد

الحافظ قاله الولاية من بعدى لأخوك الكبير 

ومفيش شوية والأبن البكرى مات ف حادث غامض

 قوم حسن رجع يطلب ولاية العهد 

فالأب قاله هديها لاخوك الأكبر منك

راح حسن شاكرله وسايب القصر 

ولامم الاوباش والرعاع وعملوا قلق للحاج الكبير 

واللى لم الموضوع وادى ولاية العهد لحسن فعلا 

عشان يخرسه

 قوم اييييه

بعد شوية حسن مش هيستنى الأب 

لما يموت موتة ربنا ويورث البلد 

قعد يقوله مسكنى الحكم يابا 

والحافظ طبعا رفض 

وبس حسن عمل زى قبل سابق وعك الدنيا

ووقف قصاد ابوه بالعسكر والأضيش المرتزقة 

اللى لمهم وراه .. 

المهم انه الحافظ بالحيلة استدرج حسن لقصره

 عشان يقبض عليه وينهى الصراع دا 

 

لكننننن

القدر هيفرض عليه وضع اكبر وأسوأ

 لما امراء وكبراء البلد هيتلموا ويطلبوا راس حسن 

ويخيروا الحافظ ما بين البقاء ف الحكم

 وبين موت ابنه
ولما الحافظ يحاول يتملص هيتلموا بالجند والأتباع 

فوق العشرتلاف نفر ويرابطوا ف بين القصرين

 القصر الشرقى والقصر الغربى
ويطالبوا موت حسن والا ...

 الحافظ هيختار ..

 طبعاااااااا هيختار الحكم والسلطة والبقاء ع الكرسى 

ويدبر لموت حسن بالسم تقليلا لعذابه

 ويحصل

ويقتل الاب أبنه ف لحظة مأساوية 

شكسبير لو كان حاضرها كان اعتزل الكتابة 

ف لحظة غم وكآبة

 المهم موت حسن مش هيبقى ببلاش كدا .. !

الحافظ كان فاكر انه يقدر يردع حسن 

عن اللى ناويه بهدوء قام باعت ف الخباثة لبهرام الأرمنى

 ف المحلة وقاله تعالالى القاهرة 

بجندك وساعدنى

بس متقولش انى انا اللى باعتك وكدا ..!

المهم بهرام مكدبش خبر وراح لامم العسكر بتوعه 

والأرمن حبايبه والعربان وشوية مصرواة

وانا جاااى وغلاااوتك جاااى 

والمقريزى يا ولاد هوه اللى بيقول 

انه بهرام خرج بجماعته 

ولما وصل القاهرة انتشر الناس اللى معاه 

وبدأت المعارك
وحصل نهب وسلب كتير 

وكان الموقف مشتعل ف القصر وقصاده

 قصره حسن مات والليلة خلصت 

بهرام لسه شغال يونيفرسال هوه وعساكره

 ف القتل والحرق والقضاء على اوباش حسن 

ابن الحافظ



وبس اتلموا عليه كبار الجيش واتفقوا معاه 

#شادخلى بالك 

وراحوا واخدينه مدخلينه على قصر الحافظ 

وقالوله احنا عاوزين الراجل دا يستوزر آحافيفظو.. 

أوك ؟
حد يقولى ليه عملوا كدا يا شهروزة ؟!! 

أقولكم بسيطة 

راجع كل الأسباب اللى خلت وجوه قديمة تتصدر المشهد

 كل مرة يدورا على حد يمسك منصب ف مصر 

وانتا تعرف ليه ... ؟

العالم اللى ماسكين البلد من مصارينها 

هما اللى اختاروا عشان ميتفرضش عليهم حد من براهم 

وعشان يفضلوا مستقرين ومصالحهم لا تمس وكدا 

#هارشينكو
المقريزى بيقول ان الخليفة خلع على بهرام الوزارة

 "مع كراهة الحافظ لذلك " 

مضروب على قلبه 

والسبب بس انه قبل 

عشان الفتنة دى تخلص زى ما اتقال وقتها
والنكتة بقى ان بهرام كان مسيحى طبعا

 نصرانى بلغة العصر الماضى 

قوم الحافظ اداله لقب
 "سيف الإسلام تاج الخلافة"

 طب ازاى سيف الأسلام

هيا الألقاب كلها كان فرمها قطر وخلصت 
ملقتليوش الا دا  ... !

طبعا فيه ناس مصالحهم متعارضة مع بهرام

 اتدخلوا وقالوا للحافظ ازاى تجيب وزير نصرانى

 وتمسكه أمور القضاء

 ويبقى نايب عنك ف الصلاة وغيرها !!

وازاى يدخل المسجد 

ويقرب م المنبر ف الاعياد معاك والمناسبات الكبرى

 وازاى يفصل ف امور الشيعة 
" فكيف يكون الكتابي ولي أمر المسلمين وقضاتهم؟ "

الحاشية كانت قارشة ملحة بهرام قوى 

راح الحافظ هارشهم 

وخارسهم وقالهم ميحضرش الصلاة 

ولا يشرف على قاضى القضاة 

اما حكاية ذكره ف الكتب الحاكمية بقى
فيتعامل زى ما كان بدر الدين الجمالى بيتعامل 

مهو كان سنى ومكنش شيعى زينا ! 

القصد بهرام كان راجل حويط وشاطر

 وبيدبر أموره فعلاااا والحافظ استكيف منه 

ابو المقاريز بيقول نصا 

" كان هو قد أحسن السيرة وساس الرعية

وأدى الطاعة للخليفة
وأنفق في الجند جملةً من الأموال

 ودبر الأمور
فاستقامت له الأحوال، وراسله الملوك، 

وزال ما كان في البلد من الفتن

كان يقعد يوم الجمعة عن الصلاة فلا يحضر

 فلم ينكر عليه سوى أنه نصراني "

الله يعنى هيا دى كانت مشكلته معاهم يعنى ؟ 

انه كان نصرانى 

لأ الحقيقة مكنتش دى المشكلة فعلا 

قد ما كانت مشكلة المشاكل انه الاخ بهرام 

عمل الآتى

بعت لأهله وعشيرته وناسه وقالهم تعالوااااااا 

انا بقيت وزير لبلد مليانة خير بالهبل 

تعالوا اشتغلوا وعيشوا وانبسطوا يا ولاد 

وفعلا هذا ما حدث

حضر من الارمن لمصر عدد كبير 

واستوطنوا القاهرة وتحديدا حى الحسينية 

وزى ما قال المقريزى

 " صار بها منهم عالم عظيم " 

أرمن ياما يا أيسامة
كام كدا يا مقريزو قول  .. ؟ 

قالك بتاع 30 ألف نفر يا ثاااامح 

وطبعا جم وقعدوا واللى يجاور الوزير يسعد 

ويمسك مناصب حلوة وفلوس وخير ويغمة

بس المسالة عدت الفلوس لما هو أبعد 

زى ما ذكر المؤرخين وانه الأرمن

"فعظم ضررهم بالمسلمين وكثرت استطالتهم

واشتد جورهم،وتظاهروا بدين النصرانية

وأكثروا من بناء الكنائس والديارات

 وصار كل رئيس منهم يبني له كنيسةً بجوار داره 

وتفاقم الأمر فخاف الناس منهم أن يغيروا الملة الإسلامية

ويغلبوا على البلاد فيردوها دار كفر " 

اقفل القوس 

وكدا الحكاية دخلت ف جو تانى خااااااالص 

مالص بالص

بهرام لما استوز بعت لأخوه .. الباساك
 ومسكه قوص

 الواد الظاهر قل أدبه وافترى ع الناس هناك 

والشكاوى زادت منه قوم ايه
الناس هناك قالت جااااااااى 

والأمرا ابتدت تخاف من نفوذ بهرام ف القاهرة 

واخوه ف الصعيد وكدا البلد سابت منهم ومينفعشى 

راحوا مميلين على مين؟

ايه هتقولوا الحافظ تزعلونى كدا !

دا منظر بتاع عدل والحركات دى برضك ؟!! 

لأ طبعا 

الامرا هيميلوا على واحد اسمه رضوان بن ولخشى 

او ابن رضوان بن الريحينى ف مصادر اخرى

الاخ رضوان بقى ابن الأثير ف الكامل فى التاريخ 

بيقول عنه انه كان ملقب بـ"فحل الامراء" 

ليه اللقب دا استغفر الله العظيم ع المسا .. ؟!

قالك عشان كان بينه وبين بهرام الارمنى ضدديات 

وكان متغاظ منه وشدوا مع بعضشيهم 

فبهرام بعته عسقلان يمسكها ويغور من وشه
رضوان يشيل ف روحه وينقهر ؟ 

ابضنننن 

هينتهز أول فرصة وجماعة من الارمن معديين عليه 

عشان يروحوا مصر يقعدوا وكدا 

راح مانعهم وقالهم ممنوع
بهرام اتغاظ طبعا بس عالج الموقف بحنكة 

وراح باعلته وقاله تعالى ومسكه الغربية 

وطبعا كان الهدف يبعده عنه وعن عشيرته بأى شكل

 انما ايه ؟
قليل البخت يلاقى رضوان ف الكرشة !

الامرا ف الجيش هيلاقوا الحافظ مطنش وعامل من بنها

ومش ناوى يلم بهرام من التوسع 

راحوا باعتين لرضوان
"يشكون إليه ما حل بالمسلمين ويستحثونه على المسير

وإنقاذهم مما نزل بهم"

 وبس قالوله تعالى يا فحل واحنا وراك قصدى معاك

 واتفقوا على سيم وخديعة
النويرى ف نهاية الأرب بيحكى الفوكيرة التفنن دى 

وبيقول
" كان الأمراء قد كاتبوه وقالوا: 

إذا وقع الوجه في الوجه ارفع المصاحف على الرماح 

فإننا ننحاز إليك" 

واللى هوه زى حوار كلمة السر ديليسبس وكدا

بس بقى والمقريزى بيحكى انه رضوان 

اول ما وصله المكتوب من الأمرا "تشمر لطلب الوزارة" 

وراح طالع المنبر وخطب ف الشيعب 

وقالهم هيا بنا نحارب
" وخطب خطبة بليغة حرض فيها الناس على الجهاد 

في سبيل الله والاجتماع لقتال بهرام 

وشيعته النصارى من الأرمن " 

يا لهوى دى فتنة طائفية وش !

وفيه ناس بتقول ان الحافظ كان عارف بالحركة دى

وموافق عليها وناس بتقول مكنش عارف واستفؤجى 

المهم انه رضوان على حس الخطبة دى 

جمع حواليه بتاع 30 ألف نفر

وقالهم ان الحافظ بنفسه اللى طالبه 

بالخروج إذ ايه لازم نعمل ايه ؟

" نزع الوزارة من يد بهرام إذ تبين أن ليس من أهل الملة" 

نعمممممم يا روح طنط !!

 ليس من أهل الملة اذ فجأتن كدا

 والحافظ مكنش عارف وهوه بيوزره المعلومة دى ؟!

 انتوا جايين تهرجوا صح ؟ 

القصد التهريج قلب جد وبهرام وصله الخبر

والأرمن ف القاهرة الرعب مسكهم .. راحوله يشتكوا 

قالهم احنا مش هنرفع سلاح على حد 

وهروح لمولانا الخليفة نسأله ما العمل 

راح فعلا للخليفة
وطبعا مفيش داعى أقول ان الحافظ 

كان أوغد من واحد ف أى فيلم عربى قديم او جديد 

غرر ببنت وعدها بالجواز وسابها حامل 

وراح قال لاهلها كمان

وبس بهرومة بقى ضهره  للحيطة 

هيعمل ايه ف الورطة دى

 ولا حاجة قرر يواجه المصير الازرق 

خرج لعشيرته والجالية الارمنية 

وقالهم نخرج ع الصعيد

 ليه ؟

قال نروح لأخويا الباساك ونقعد هناك

 وننزل ع النوبة اهو اهلها من ملتنا ومش هيأذونا !

وفعلا هيتحضر الناس 

ويلموا ف كل ما امكنهم وسط جو مشبع بحالة عداء




واصطفت المراكب والأرمن بيحملوا حاجتهم

 ف دخلة رضوان القاهرة 

والمواجهة بقت حتمية 

بهرام لازم يتصرف والا منظره يبقى ازفت 

مما هوه عليه
فلم العسكر وراح قصاد رضوان وعساكره 

وفاكرين ديليسبس ؟ 

رضوان واللى معاه رفعوا المصاحف 

راح عسكر من صفوف بهرام خارجين

 وانضموا للفريق التانى ف ثوانى !

بهرام شاف المنظر راح منسحب من سكات

 " فعاد بهرام إلى القاهرة وأخذ ما خف حمله

 وخرج من باب البرقية" 

والجدع خد اللى معاه وراحوا ع الصعيد ... حلو ؟

حلو طبعا 

لأنه لو كان قعد ساعة كمان كان صادف ف وشه 

المواطنين الشورفااااء بتوع أياميها 

اللى فورا راحوا على دار الوزارة 

ونهبوا اللى فضل فيها
مش بس كدا النويرى بيقول 

" ما ان انفصل عن القاهرة أتت العوام منازل الأرمن

 وكانوا قد نزلوا الحسينية وعمروها دوراً " 

ومش بس كدا دول بدعّوا
ونهبوا كنيسة الزهرى

والكنيسة دى كانت ف حتة السيدة زينب كدا زمان

المهم ان كل دا كان ف المبانى والماديات وكدا 

كنا نقول معلش ترويع الآمنين برضو مؤقت

 وبعدين ربنا يسلم والأمور تهدى 

واللى ييجى ف الريش بقشيش
واللى اتنهب يرجع الأحس منه الخ 

لكن لا لا يا بابا لااااا 

مش قولنا المصرى 

لازم يحط التاتش بتاعه ف الحواديت ؟ 

دا اللى حصل فعلا ف الصعيد

لما وصلت انباء لقوص ان بهرام انهزم يا رجالة 

قوم جماعة من هناك كانت بتكره الباساك (اخو بهرام) 

على افعاله الواطية 

راحت داخلة عليه بيته قاتلاه
- قتلوه بس يا شهر ؟

 لأ .... مثلوا بجثته 

- مثلوا بجثته بس يا شهر؟ 

لأ .... وعلقوا ف رجله كلب ميت 

- علقوا ف رجله كلب ميت بس يا شهر؟ 

لأ .... ورموه ف مزبلة ف الآخر

#يوغتى 

ناس حنينين قوى

ف وصول بهرام لقوص وعرف اللى حصل لاخوه 

وهااااارهم كان أزرق

 وراح لامم جماعة منهم وقتلهم

 ونهب البلد بلى فضلوا معاه 

ونيمهم من المغرب انتقاما وكدا
وخلاص كدا مش هيعرف يعيش ف البلد دى راح 

واخد جماعته وكانوا بتاع 2000 نفر 

ونزل على اسوان حاول يدخلها 

وقفله واليها زى الخازوق كدا وقاله برا ياااااض

كان راجل سكرة حكينا عنه زمان 

واسمه "كنز الدولة" 

الحاج كنز منع بهرام من دخول اسوان واحتلالها 

قوم عمنا هيعمل ايه ف الدومينو المتقفلة دى ؟؟
مبقاش قصاده غير الاحتماء بالاديرة البيض 

ف أخميم وسوهاج وقاله للى معاه كل واحد يدبر شئونه

 وعدد كبير فعلا سابوه وانتشروا ف القرى المحيطة

ودابوا وسط أهلها
" سأل لهم مواضع يسكنونها، فأفردت لهم جهات،

 منها سمالوط وإبوان وأقلوسنا والبرجين في صعيد مصر 

وضيعة أخرى بأعمال المحلة " 

وشوية  منهم يئسوا ورجعوا تل باشر

وبس قعد بهرام بعياله واهله ف الاديرة البيض 

اما ف القاهرة المشهد كان بيتغير 

وبرضو غصبن عن الخليفة الحافظ 

اللى رضوان راح وقفله بين القصرين

وعمل نفسه آل يعنى أل يعنى بيطلب الأذن ف الوزارة 

الحافظ طبعا هيوافق 

ويديله لقب "السيد الأجل الملك الأفضل" 

وهيمسكهاله 
ويقعدوا حلوين شطار
لحد ما الحافظ يتكتكله على رواقة 

ورضوان هيقعد ساكت كدا ؟ 

لأ طبعا 

هيبعت اخوه أبراهيم على الصعيد 

عشان يعكشوا بهرام من قفاه وينقتل وكدا
الحافظ هيقوله لأه .. عاوزه حى قصادى 

فعلا يروح اخو رضوان يجيب بهرام من الصعيد 

ويتفاجىء رضوان ان الحافط هيعامله معاملة كويسة 

ويقعده ف القصر

النويرى بيقول 

" أحضر الحافظ يهرام الأرمني من الصعيد، 

وأسكنه في القصور وأكرمه

 فعظم ذلك على الأفضل رضوان"

واتغاظ وعاتب مولاه على كدا !
الحافظ قاله انتا مش قاعد ف دار الوزارة 

آكل شارب نايم متدلع عاوز ايه يا ضيضو ف ليلتك دى ؟ 

رضوان اتقمص وبرطم بالكلام

 راح الحافظ مكيله وقلب عليه

وخلاص احنا عرفنا قلبة الحافظ ربنا ما يوريها لحد 

رضوان خرج من عنده 

والحافظ شغل اعوانه وقلب عليه العسكر ف الجيش 

وهوب الترابيزة اتقلبت يا معلم

وبيقولوا ان رضوان هرب ع الشام 
خوفا من بطش الخليفة

لكن رجع بعدها بفترة بعد ما لم ناس تساعده

 لكن اتعكش ف القاهرة 

واتقتل وقطعوا راسه
اتقطعت راسه هوه واخوه 

واترموا تحت رجلين الحافظ اللى اتأنثر قوى 

وقالهم ودوهم لمرات رضوان عشان الدفن 

واحنا ناس كويسين وميصحش وكدا

الكلام دا حصل سنة كام يا شهروزة ؟
 أقولكم

 بهرام مسك الوزارة 529 هـ 

واتخلع منها ومسك رضوان 531 هـ 

رضوان انقتل 534 هـ 

وشوف الزمن
بهرام هيسمع خبر موت غريمه

 اللى خلعه من الوزارة

 وقعد مطرحه وملحقش يتهنى بيها 

لكن مش هيفرح قوى عشان الحافظ 

كان حاطه تحت الاقامة الجبرية حرفيا 

وفضل ف القصر الحاكم لا يغادره لحد 535 هـ

" أنزله في القصر ولم يمكنه من التصرف

 وكان يشاوره في تدبير أمور الدولة 

فيعجبه رأيه وحزمه وعقله" 

دا الحافظ السوسة الداهية
اللى هوه لا احبك ولا اطيق بعادك 

 بس اللى قيل ان فعلا الحافظ 
كان بيحترم شطارة بهرام 

ومحتاجله وانه استعمله لحد آخر لحظة

ومجبش وزرا تانى لحد ما مات بعد 19 سنة ف الحكم 

الغريب انه لما مات الارمنى
الحافظ انقهر عليه

وبيقولوا انه كان هيدى الدواوين أجازة 3 أيام 

وبعدين فكروه ان بهرام خرج من الوزارة ! 

فتراجع بس عمله جنازة رسمية  

وهوه كان على رأسها 

"وأخرج نصف النهار في تابوت

 وعليه ثوب ديباج أحمر 

ومن حوله النصارى يبخرون باللبان والصبار وسن العود
وجميع الناس مشاة فلم يتأخر أحد من أعيان الوقت 

عن جنازته وخرج الخليفة على بغلة شهباء 

وعليه عمامة خضراء وثوب أخضر بغير طيلسان
فسار خلف التابوت، وسار والناس تبكي 

والأقساء يعلنون بقراءتهم،

 والخليفة سائر إلى دير الخندق من ظاهر القاهرة
فنزل الخليفة عن بغلته 

وجلس على شفير القبر وبكى بكاء شديدا " 

الله ...  ينيلك رااااجل 
طب ليه م الاول ؟!!

وبس توتة توتة 
خلصت حكاية الأخ بهرام الارمنى

 والملاحظات كتير اولها انه

 

1) بجد البلد دى مسخرة
والتاريخ بيعيد نفسه بشكل رهيب 

وكأن الناس ركبوا آلة الزمن

 ورجعوا يشوفوا كان بيتقال ايه زمان وبيكرروه 

ولكن بطريقة اخرى على سبيل كسر الملل 

رغم شطارة بهرام وحسن تدبيره المصريين 

مرضيوش يقبلوه 

وقالوا " فلم ينكر عليه سوى أنه نصراني" 

كام مرة حسيتوا الجملة دى وسمعتوها 

ف زمننا الحالى ؟
متهيألى كتييييير قوى

 2) بهرام اتشال عشان جاب اهله وعشيرته بس 
ولا عشان كان مسيحى ؟
بكل ثقة  أقدر اقولكم السبب التانى
لأنه الاخ رضوان مثلا استعان باخوه ابراهيم 
اول ما استوزر 
طب ايه بقى ؟
ما كل واحد بيجيب اخوه اهو 
ولا هوه حرام على بهرام حلال على رضوان 
ولا عشان دا مسلم يبقى براحته ؟!!



3) الموضوع دا نموذج صارخ لأستخدام الدين 
عشان توصل لكرسى ومنصب 
رضوان واللى ساعدوه مكنوش محموقين 
عشان الدين ونصرة الأسلام 
ولكنهم استخدموا تعصب الناس وعصبيتهم 
للوصول للسلطة مش اكتر 



3) الحافظ لدين الله بعد موته جه 2 كمان 
ثم العاضد اللى ف عهده انتهت الدولة الفاطمية
وحادثة بهرام دى تقولك بمنتهى البساطة 
ازاى الدولة دى انهارت وعشان ايه 
وازاى اهل الكفاءة كانوا الأضعف 
واهل الحظوة والمرضى عنهم كانوا الاقوى
وهما اللى جابوا عاليها واطيها 
... 


4) الألقاب ..ايه حوار الالقاب
فحل الأمراء وسيف الأسلام 
يختشى الفاطميين كانوا هتاشين قوى
طب السيف وانعزل واتحددت اقامته 
 والفحل وانعزل برضو واتقطعت راسه 
ازيكم بقى ؟!


5)  كنيسة الزهرى اللى المتعصبين نهبوها 
مش هتسلم ف عصر لاحق هوه عصر المماليك 
وايام الناصر من النهب 
ثم الحرق تماما 
والكنيسة اختفت من الوجود رغم شهرتها 
وانه حقا لأمر مؤسف 


6) السياسة مهلكة فعلا 
الحكام ومن فى حكمهم ف السلطة والقوة 
كانوا وما زالوا قلابين 
ونابهم أزرق لما يغضبوا على حد 
مصر طول عمرها مبتلاة بهذا الصنف 
حاجة عجيبة قوى 



7) ويختشى كمان ايه حوار بهرام 
وكل واحد ييجى يجبلنا اهله وعشيرته 
ومحدش بيتعلم برضو بعد كل هذا العمر 
ان هلاكه ف اللى بيفضلهم عن غيرهم من الشعب
وبيديهم كل الحظوة والنفوذ 
وبيكونوا نقطة ضعفه مش قوته 
وهما اللى بيجيبوا داغه 
بس نقول لمين ؟!


8) بهرام دا نموذج مجسد لشعبه 
اتهان عشان أرمنى ومسيحى الأتنين ف واحد 
ودى تقريبا حكاية الأرمن على مر التاريخ 
كل حد جاورهم أوعدى عليهم كان عاوز يحتلهم 
ويسرق ثرواتهم ويرفض يديهم حقوقهم 
وكل ما كان حد بيشوفهم عاوز يقتلهم 
ايه مالهم العالم الغلابة دى كانت متداسة كدا ؟!!



9) الناس اللى زعلانة من أردوغان وبهلوانيته
وسفالته وكل هذا الهراء  زعلانين من ايه 
هوه جاى من ثقافة وبلد تاريخه قايم
 ع التعصب والدموية واستغلال الآخر ونهبه
فمستغربين وساخته ليه 
انا اللى مستغربة استغرابكم ... ؟!!




10) بغض النظر عن حقارة الحافظ ووضاعته 
لكن مفيش مانع أشيد بصياعته 
وخروجه من كل المواقف المهببة 
اللى اتزنق فيها 
والأعجاب بطريقه لعبه بكل الشخصيات 
وكأنهم عرايس ماريونت
ويا حافظ يا مريسة غدر ومكر ومدرسة 

وأل قالك زمان أن الذوق مخرجش من مصر 

ذوق ايه دى الصياعة حضرتك اللى مخرجتش من مصر

والتاريخ اللى بيقول اهو مش إحنا !


وتصبحوا على ألف خير

--------------------------------------

 Mahmoud Abdou @m7moud_3abdou
بالظبط كلمة .. هو كويس بس مسيحى 
أو هو كويس مع إنه مسيحى



اكتئاب ما بعد الثورة @MahometusUsama
واضح إن كانت شعبيته كبيرة



 Mohammad Diab @som3amasrawy
بلد الاستاذة الفاضلة صافيناز <3

 Moussa @moussiav
الجنزوري ولا عصام الحضري

افتوكالايزو @hossamalakshr
وكمان فيروز التي اشتهرت باسم الطفلة المعجزة
، والفنانة ميمي جمال، والمطربة أنوشكا،
 والفنانة ايمان "ليز سركسيان"

17 Karim @_B900_
ده غير مدابح الأكراد اللامتناهية
مدبحة ديرسم وإبادة 70,000 كردي
  http://t.co/bdByTg757y

Mahmoud Abdou ‏@m7moud_3abdou 

 امال فاكر بهرام مابيروحش يصلى الجمعة ليه 

.. عنده ظروف ؟

Moussa ‏@moussiav 

 فلك سيدنا نوح رسي علي جبل اراراات في ارمينيا

 Heba ‏@HappyGeddan 

 مصر دايما خيرها لغيرها

 Eng Mahmoud ‏@eng_M_taha 

 برضة قريت فنفس الموضوع ان الاتراك

 قالوا ان الضحايا الارمن 300 الف .

والمحايدون والارمن بيقولوا مليون !!!

 Moussa ‏@moussiav 

 المناخير الأرمني علامه مميزة