نشرة أخبار زمان ... 2

شهروزة كالعادة هتذيع الخبر
كما هو مكتوب ف جرايد ومجلات زمان
 وبعدين هتقول تعليق ثم سؤال المشاهدين 
اختر مما يلى

الاخبار الجاية من سنة 1892

تحديدا ف شهر سبتمبر ... نبدأها بخبر خبيث

نشر ف احدى الصحف انذاك 

وبيقول

" ان راتب رئيس جمهورية سويسرة

 لا يتجاوز اربعة عشر ألف فرنك سنوياً

وهو راتب أقل من راتب أحد القضاة فى مصر "

انتهى 

وتعليقى على هذا الخبر ان اللى كاتبه شخص موتور

 وحقودى ومنفسن وغلاوى

وميعرفش القضاة عندنا ف مصر بيتعبوا قد ايه

والسؤال هو 

هوه اربعأشر ألف فرنك دول يطلعوا كام بالمصرى

 يا كابتن متحت ؟

 - كتير 

- كتير قوى 

- كتير قوى متعدش

"اصدر الجناب الخديوى أمرا قاضيا بالعفو

عن الذين اشتركوا بالحوادث العرابية

ما عدا الذين سبق عليهم الحكم بالنفى مؤبداً"

وياخويا جاى على نفسك كدا ليه ؟

ما كنت تسيبهم قاعدين جوا عشر سنين كمان ولا يهمك

 اهو يتأدبوا ويحرموا يعملوا (حوادث) تانى ! 

والسؤال هو

يا ترى ثورة يناير 2011 هيتقال عليها بعد عشر سنين

زى الثورة العرابية كدا .. انها برضو كانت :

- حادث 

- حادثة 

- هوه كان حصل حاجة ف يناير أصلا؟

" وردت علينا نشرة من جناب الاديب سليم افندى أرقش

يعلن عن انه قد فتح مكتبا للأشغال والتحرير

والترجمة من والى اللغات العربية والفرنساوية

والانكليزية والأيتاليانية

والمكتب المشار اليه فى ساحة الأوبرة الخديوية 

بملك المرحوم سليم بيطار من جهة شارع عابدين

 ونظرا لما نعهده بالأفندى المشار اليه من التضلع باللغات

المتقدم ذكرها نرجو ان يثق فيه الجمهور

ويقبلوا على الانتفاع بمعارفه "

انتهى الخبر

وبغض النظر عن ان الميدان كان اسمه (ساحة)

وانها (الاوبرة) واللغة (الأيتاليانية)

لكن التضلع دى اللى حسستنى بهيبة كدا

ومعرفش ليه افتكرت المرحوم سليمان نجيب

وهوه بيقول لأستاذ حمام

يعنى انتا ضليع ف قواعد اللغة العربية ؟ 

والسؤال هو

 الواحد لو عدى كل الكلام المجعلص دا وفوته

يفوت انه أديب واسمه أرقش ازاى

اسم مش عاطفى خالص ؟!!

- عادى بتحصل 

- فوتى فوتى 

- اوبرة وايتاليانية وجت على اسم جده يعنى 

عدد الكواكب بتاريخ 9 فبراير 1982

" ميرفت امين ستقوم بدور مشيرة الكاشف

 مذيعة التلفزيون فى فيلم قانون ساكسونيا

يخرج الفيلم سمير سيف "

الفيلم اتعمل فعلا واتعرض سنة 1983

 لكن بأسم .. الغول

 واللى عملت دور مشيرة الكاشف .. نيلى

مش ميرفت امين

وكان من اجمل ادوار عادل امام

ومن احلى ما كتب وحيد حامد

والسؤال هو 

ليه غيروا اسمه 

يكونوش ف الرقابة افتكروا ساكسونيا دى :

 - كلمة أبيحة

- تلقيحة على حد

- اهو غلاسة كدا على رأى #البطل

وسؤال كمان وهو

تفتكروا كام غول طلع بعد فهمى الكاشف

ف السنوات اللى تلت عرض الفيلم ؟ 

- عشرات 

- ميات 

- معاك ورقة وقلم وفاضى ميت سنة ؟

4 سبتمبر 1938

" سلمت وزارة الحربية اخيرا

طائفة من الاسلحة الجديدة للجيش المصرى

 وقد قام بعض ظباط الجيش وجنوده امس بتجربتها

 فى مطار الماظة فأسفرت التجربة عن نجاح
ومن هذه الاسلحة مدفع مضاد للدبابات وزن طلقته رطلان

مما يذكر ان هذا المدفع لا يوجد له مثيل
 لدى الجيش الانجليزى فى مصر
ولهذا يشترك بعض ضباط الجيش الانجليزى فى تجربته
 مع الضباط المصريين"
 انتهى

لا تعليق غير انه روح التسامح كانت غالبة قوى
 عند وزارة الحربية والملك زمان
لدرجة انهم بيجربوا السلاح مع اخيهم المحتل

واكيد اطلاع غيرك على تسليحك 
وامدادك بيه وتدريبك عليه مش هيكونله علاقة اطلاقااااا
 بهزيمتك بعدين ف أى حرب زى حرب فلسطين مثلا ؟


 والسؤال هو

طبعا انتى متقصديش تجيبى سيرة المعونة العسكرية
 للجيش وتبعيته لمن يمده بالسلاح خاااالص يا شهروزة 
صح ؟
 - صح 
- ايوه 
- طبعا

22 سبتمبر 1941
 " أرسل حضرة صاحب الجلالة الملك
وحضرة صاحبة الجلالة الملكة والملكة نازلى
وصاحبات السمو الملكى الأميرات برقيات تهنئة رقيقة

الى صاحب الجلالة الامبراطور محمد رضا بهلوى والامبراطورة فوزية بمناسبة اعتلائهما عرش ايران 

وهذا ولا يزال الكبراء والعظماء من مصريين واجانب
 يفدون على قصر عابدين العامر ويقيدون اسماءهم
 فى سجلات التشريفات مقدمين اخلص التهانى
 لصاحبى الجلالة الأمبراطور محمد رضا بهلوى
 والامبراطورة فوزية لأعتلائهما عرش ايران "
 انتهى الخبر 

والتعليق بقى .. اتنيلوا

البت بعد كان رايحة وردة مفتحة
هترجعنا بعد شوية معيطة ومكسورة وهتتطلق

ويتاخد منها بنتها متشوفهاش الا لما تكبر
وحاجة قرف القرف يعنى

والولا رضا ابو جلابية مهربدة هيتجوز بعده اتنين
 وعادى خالص

وصحيح هيا هتتعافى وتتجوز تانى وتعيش حياتها
وتتصور صورة من اجمل ما تكون
 كأميرة .. حزينة .. وقمر قمر

لكن شوية كدا وتقوم ثورة يوليو وتتبهدل تانى
 مع باقى الأسرة العلوية
ويا ختشى بلا وكسة
 خدنا ايه من الملكيات والامبراطوريات
غير حلاقة الدقن ؟!!

والسؤال هو
 جوازة البت باظت عشان :
- النق والقروالعين الويحشة 
- فوزية مبتعرفش تطبخ
- رضا كانت عينه زايغة
- أم رضا السبب وامك تخينة قوى قوى يا ممتاز

30 اكتوبر 1938
" حاليا بسينما الكوزموجراف بالاسكندرية توجو مزراحى
يقدم الممثل الفكاهى المصرى المشهور على الكسار

فى رواية عثمان وعلى بالاشتراك مع نخبة مشهورة
من احسن ممثلات السينما فى مصر
ابتداء من الاثنين 7 الجارى"
 انتهى

ومفيش تعليق الا انه صياغة الأخبار زمان عجيبة قوى
 لما هوه على الكسار مشهور
ليه بتسبقوا اسمه بكلمة .. مشهور ؟!!
 #ليه؟

والسؤال هو
 مكتوب 
"بالاشتراك مع نخبة مشهورة
من احسن ممثلات السينما فى مصر"
ومقلوش ممثلين عشان كانوا :
- مسافرين
- مقموصين
- تمثيل الرجل عورة

11 ابريل 1982
" اصدر الرئيس حسنى مبارك قرارا بترقية الفريق اول
محمد عبدالحليم غزالة وزير الدفاع الى رتبة المشير " 

مفيش تعليق ... #وصلة ضحك بس

 يليها السؤال وهو

بيقولوا اللى ربنا مش كاتبله الخير
 وقاسم يفضحه يوما ما يسيبه يترقى لـحد ما يبقى :
- مشير
- مشير
- مشير
- جميع ما سبق

21 اغسطس 1941
" استقبل معالى امين عثمان باشا وزير المالية فى مكتبه
 وفدا كبيرا من اسرة المرحوم احمد عرابى باشا 

بمناسبة موضوع اعادة املاك موروثهم اليهم
وقد امضوا وقتا غير قصير ثم انصرفوا شاكرين له
 اهتمامه وعطفه عليهم " 
انتهى الخبر 

والتعليق بقى ...

60 سنة تقريبا عشان الورثة تتحصل على املاكها
مش دى المشكلة
 المؤسف هو صياغة الخبر
وجو عطفه واهتمامه والهراء دا 
أسفت لك يا زمن 


لكننن الملفت للنظر بقى ان الحاج اللى راحوله دا
هيتم اغتياله بعدين متهم بالعمالة
بينما سوف تبرأ ساحة عرابى اللى رايحين يتسولوا حقه
وهيتردله حقه
وسبحان الحى الذى لا يموت

وصحيح عرابى رجع مصر وعاش كسير القلب
 ومتقدرش ف حياته ولا اولاده واحفاده 



والسؤال هو 

باين ان الحاضر قد يظلم اللى عايشين جدا
انما التاريخ بينصفهم 
وعرابى أكبر مثال يا شهرو .. صح ؟
 - حقيقى 
- فعلا 
- مفيش جدال ابداااا

28 مارس 1932
" فى الساعة السادسة من صباح امس
 وصلت الى ميناء بورسعيد الباخرة اليابانية "سوامارون"
 تشارلز شابلن

ومعه شقيقه سيدنى وسكريتره اليابانى المستر كونو
الذى يعمل فى خدمته منذ 17 عاما
وقد نزل ثلاثتهم الى بورسعيد 

وسافروا منها توا فى سيارة خاصة الى القاهرة
فوصلوا عند الظهر وبعد ان تناولوا طعام الغذاء
فى فندق شبرد

وزاروا المتحف المصرى واهرام الجيزة
وغيرها من مشاهد القاهرة

فى المساء استقلوا سيارة الى السويس للحاق بباخرتهم
 التى كانت فى تلك الاثناء قد اجتازت قنال السويس 

لمتابعة سفرهم الى اليابان لزيارتها
ومن ثم يعودون الى امريكا"
انتهى الخبر

ومعنديش تعليق ولا سؤال
بس حضوره مع سكريتره اليابانى والزيارة السريعة دى
 فكرتنى بقصة 200 يوم حول العالم
ليس الا
 :) 

30 اكتوبر 1941
بعنوان .. الشباب يبدأ هجومه :
" تكونت من حسين صدقى وتحية كاريوكا وحسين فوزى
 شركة لانتاج الافلام المصرية

بأسم شركة افلام الشباب ومركزها 45 ش سليمان باشا
 وقد بدأت بالامس تصوير اول افلامها
الذى سيعرض هذا الموسم"
 انتهى الخبر

وجدير بالذكر ان اول فيلم انتجته الشركة
واتعرض بعدها بسنة فعلا كان .. " أحب الغلط "

وجدير بالذكر برضو ان حسين فوزى المنتج والمخرج
كان ساعتها متجوز تحية كاريوكا
 وبعدين اتطلقوا واتجوز نعيمة عاكف #حبيبتشى 

وبعد بصة سريعة على الصور
 الواحد لازم يسأل.. الممثلين والممثلات زمان
 كان بياكلوا ايه عشان يطلعوا حلوين طعمين متشيكين
متلمعين مترتبين كدا ؟

اغسطس 1981
" اخطأ العروسان ديانا وتشارلز اثناء القائهما قسم الزواج
 فى كاتدرائية القديس بولي بلندن

فقد اخطأت دينا فى ترتيب اسم زوجها تشارلز فيليب
حيث نطقت الأسم الثانى قبل الاول ثم ابتسمت معتذرة 

اما الأمير فقد اخطأ فى نطق القسم عندما قال :
وسوف أسبب لها أذى ،
بدلا من ان يقول والا أسبب لها أذى "
انتهى الخبر

والتعليق اللى كتماه ف قلبى
لأ مكنتيش تعتذرى يا بنتى ولا نيلة
عشان ابن الوارمة دا هيطلع عينك وينكد عليكى عيشتك
ويوريكى العذاب الوان لحد ما تموتى تعيسة
 #الوغد 

والسؤال هو
قالك بيقولوا مكنش قاصد جملة هسيببلها أذى دى ؟
 - نعمممم يا جورج
- وحياة اليزابيث
- قاصد ونص وتلتبرع

9 مايو 1932 
الاسكندرية
"تحتفل الجالية اليونانية فى منتصف الساعة الخامسة
بعد ظهر يوم الاحد القادم بوضع حجر الاساس 

فى بناء المستشفى اليونانى الجديد
الذى ينشئه المسيو كوتسيكا صاحب مصنع السبيرتو
 فى القطر وقد وزع جناب القنصل اليونانى

وقد وزع جناب القنصل االيونان رقاع الدعوة على
كثيرين لحضور الحفلة "
وانتهى الخبر

 وحصل ان المستشفى اتبنى فعلا 

بس اللى ميعرفوش الحاج كوتسيكا ان مستشفاه الجميل
بعد الثورة هيتاخد 
ويغيروا اسمه .. لمستشفى جمال عبناصر

وجدير بالذكر ان الحاج كوتسيكا هو اول من بنى مصنع
 لانتاج السبرتو ف مصر ف الحتة
اللى اتسمت باسمه بعديييين وفيها محطة مترو كوتسيكا

والراجل الشهادة لله
لما بنى المستشفى مقلش سموها باسمى ولا زفت
اتسمت على اسم الجالية كلها امتنانا يعنى
بس ف هوجة طرد الأجانب بعد التاميم 
غيروا اسمها وزعلانة ليه يا شهر مهى فلوسنا
والراجل اثرى من دمنا والكلام دا ..
انا معنديش اعتراض نسترد حقنا
بس لما تغيروا اسمها متحطوش اسم عبناصر !

ولو عاوزين تفخموه كنتوا بنتوله مستشفى مخصوص
ومتخدوش الجهد العام بتاع غيركم
وتلطعوا عليه تكت بأسمكم 
وتعملوا الحركات النص لبة دى

8 مايو 1939
" علمنا ان احد حضرات اصحاب السمو
من امراء البيت المالك الكريم قد تقدم الى السدة الملكية 

ملتمسا ان ينفضل جلالته بقبول خطبته
 لحضرة السمو الملكى الاميرة فايزة 

والخاطب الكريم هو حضرة صاحب المجد النبيل
عز الدين حسين ابن الامير محمد على حسن

ابن المرحوم الأميرحسن باشا
ابن المغفور له الخديوى اسماعيل "
انتهى الخبر

التعليق بقى .. انه يؤسفنى اقولك يا ابنى 
ان فايزة مش ليك 
وانك يا نبيل عز الدين بعد السياح ف الجرايد
هيترفض طلبك

 و زوزة هتتجوز واحد تانى 

من الاسرة المالكة برضو
الوجيه ... محمد على رؤوف

ويقال انه كان اكبر منها بكتير
 وانها اتجوزته عناد ف فاروق
اللى رفض جوازها من احد ظباط الحرس الملكى
وبعد الثورة حبها جمال سالم وخرجوها برا مصر
سافرت امريكا لأمها ولفتحية اختها
واتمرمطت واتجوزت بعدها مليونير امريكى 
واتطلقت وقصص كدا 

المهم انا عاوزة افهم بقى
هوه كل ما كان بييجى عريس لأى اميرة 
ف اخوات فاروق
كان بيتنشر الخبر .. ؟!!!!!

والسؤال الذى يطرح نفسه
هل كان عدد العرسان 
اللى اتقدموا للاربع موزز السنين دول :
- ف اللمون
- ف الزتون
- ف بيض السمك

واخر خبر ...

2 يونيه 1941 دشنا
" ذكرت منذ يومين ان احد الصيادين ببندر دشنا
اصطاد تمساحا كبيرا من النيل 

وانه استعان ببعض زملائه الصيادين على انتشاله حيا
من الماء وارساله الى مركز البوليس

وطلب من ادارة التفتيش بقنا العمل على نقل التمساح فورا
 الى حديقة الحيوان بالجيزة "
 انتهى الخبر 

وانا احب اوجه كلامى للتمساح واقوله
احمد ربنا انك مكنتش عايش على ايامينا
والا كان مصيرك مصير نمر حلايب 
اللى مهنش عليهم يصطادوه حى 
وقتلوه ووقفوا يتصوروا جنبه ويتفشخروا كمان ! 

والسؤال هو 
هوه لما تمساح فى زماننا الحالى يتمسك
ويعرف انهم هيودوه قسم بوليس هل بت ما :
- هيجيله جلطة
- هيقطع شرايينه
- هيقول انا سحلية
- كل ما سبق

وخلاص خلصنا 

كل سنة وكل الأمهات بألف خير

وكل العيال بألف خير
وأفوتكو بعافية


----------------------------


 اكتئاب ما بعد الثورة ‏@MahometusUsama  
الرجل لسه ماسك يا شهر هيعفوا عنهم إمتى بس!



 Ahmed Ibrahim ‏@Elmariachi82  
 هوجة يناير و مش بعيد يطلع العيال  الصغيرة دلوقتى
 تشتم ثوار يناير زى ما شتموا عرابى و البارودى
 بعد ما رجعوا من سيريلانكا




 اكتئاب ما بعد الثورة ‏@MahometusUsama  
بحب عباس زى جده كده حاسه كويس
 بس اﻷنجليز طبقوا على نفسه


 فروح وريحان ‏@mohamedtamimi1   

هيتقال : حركة شعبية تطالب باصلاحات سياسية
واجتماعية استغلتها العناصر الارهابية
 للوصول الى الحكم


@mohamedtamimi1  
 وطب وهو رئيس سويسرا بيعمل حاجة ؟ :) :)))




 Cindy ‏@CindyJanabi  
 السؤال هل الاعلانات دي كانت موجه للجمهور البسيط؟
ولا للنخبة؟؟ لو للاتنين تخيلوا تقدير اللغة العربية
 لو بس للنخبة يبقى



 ahmedsalah750® ‏@ahmedsalah750 
 كل دول العالم بتعمل مناورات مشتركة مع أمريكا
من باب انهم يتعلموا وأمريكا تدرسهم كويس


 أم 4 وأربعين ‏@daliaref3at   
 نفسي اعرف كانوا بيتكلمو ابه مع بعض؟ 
لغة ايه، فرنسي؟


 sally soliman ‏@sasosall 
@daliaref3at @ro7albmama2 فرنساوي




 أم 4 وأربعين ‏@daliaref3at   
 اشرف الحيزبون


 اجزاخانجي ‏@MA7_Moud 
 صوره روعه ..حاجه ملوكي زي ما بيقولوا بصحيح 



 أم 4 وأربعين ‏@daliaref3at  
عاوزة اقولك شفت الجوازة دى ع الهوا,كانت زى الحلم


 memento mori ‏@MDamarani   
وقد فعل



 الكبيرة قوي ‏@__Marwa____   

 احمدي ربنا احنا المنيا كلها كانت سوزان مبارك
لدرجة اننا كنا بنعلم المستشفيات 
بحسب المكان :))



 الفهد ‏@le0_0pard   
 يارب ... الصحة والستر ... وواحدة م الاربعة دول :D


@frikeko  
ولا بطة مرسي اللي مسكوها ع انها طائر تجسس
وبعدين انتهى ع سفرة احدهم وهو محشي فريك :D


 Heba ‏@HappyGeddan  
 و صدق .. هما الاثنين سببوا اذي لبعض



 Waleed Gomaa ‏@gomaawaleed   
 في القسم قادرين يعملوها و يخلوه يعترف على نفسه انه برص



s.Cookies :) ‏@7aga7ersha