مديحة كاملون : الغزالون يهبلن

حكاية النهاردة عن شخصية 
دخلت مرة ف خناقة  وانا ف اعدادى بسببها
مع صديقات من جنسيات عربية اخرى

 عشان اتحمقتلها وكأنها من باقى قرايبى 
لما شتموها 

لأنى كنت بحبها جدا 

وكانوا مستغربين لأنها كانت جريئة

ومستفزة احيانا لناس كتير بس مكنتش شيفاها كدا 

ونبدا القصة م الاول 

مع العلم بأنه ..

دى تقريبا اول مرة اتحير ف كم الصور اللى لقتها

لهذه الشخصية من كتر ما هما حلوين

مبقتش عارفة اسيب ايه واخلى ايه الصراحة 

وخدت اغلبهم من صفحة معجبينها ع الفيس

واغلب الصور من هناك فموشكرينلهم جدا يعنى

ونجرى بسرعة على اسكندرية الماريا

اللى مبيطلعش منه الا الحلو

تحديدا سنة 1948 لما الأستاذ كامل وحرمه

ربنا هيكرمهم ببنوتة زى القمر

وهتكون واحدة من 6 اخوات ف هذه الأسرة

والقطقوطة الصغننة اللى كان ترتيبها التانية بين اخواتها

هتكبر ف جو من الشقاوة والطعامة

 لحد ما توصل ابتدائى

وف ابتدائى واعدادى بمدرسة الشاطبى

هيكتشف الأب والام ان البنوتة شطورة ف الهوايات

والرياضة وهياخدوها ف فريق التمثيل 

وف اعدادى هتمثل دور (رابعة العدوية)

ف مسرح المدرسة وتاخد جايزة

 وحسب ما حكت بعدين ف لقاء تلفزيونى

ان الممثل حسن مصطفى سلمها الجايزة بنفسه

بعد ما خدت كاس الجمهورية لأحسن ممثلة مدرسية

وبعدها سافرت مع العيلة للقاهرة

عشان يعيشوا هناك 

وف ثانوى بدأت تلمع اكتر واكتر

لحد ما ف مرة سعد اردش ونور الدمرداش شافوها

ف عرض وعجبتهم وقالولها لازم تمثلى

وشاركت ف مسرح الجامعة بدور صغير بعد موافقة الاهل

وتعالى يا بنتى اقفى هنا ومثلى 
قولتلنا اسمك ايه ؟

بكل سعادة وحماس ردت اسمى

مديحة كامل صالح أحمد .. حضرتك 

ولفتت مديحة الأنظار فقالولها تعالى اشتركى

 ف عروض الأزياء انتى حلوة ورشيقة وييجى منك

راحت وامها بتلازمها ف كل خطوة

ومن عروض الأزياء شافها المخرج احمد ضياء الدين

وعرض عليها تمثل ف السينما طارت م الفرح

 لكن فوجئت بمعارضة الاهل ومفيش كلام من دا .. ؟!!

ليه يا جماعة ؟ 

عشان انتى صغيرة وبتتسلى ف الحاجات دى

 لحد ما تتجوزى لكن تبقى شغلانة وبتاع

لأ معندناش الحورات دى 

وانتى حلوة ونخاف عليكى .. الخ 

دوحة بعد الخناقات اتكبست كبسة السنين

و ضاعت منها الفرصة

وفجأة ظهر من وسط الكبسة والخناقات عمو عزيز

 قصدى .. عمو محمود

عمو محمود الريس كان صديق العيلة

وف عز الخناقات طلب مديحة للجواز

وكان بينهم فرق قد ايه يا شهروزة ساعتها ؟

 بيقولوا كان اكبر منها بـ 25 سنة يا ثاااامح

مديحة ف الأول استغربت العرض وكادت ترفض طبعا

لكن لما اتكلم معاها

وقالها انه هيسيبها تكمل ف مجال التمثيل وتحترفه

ووعدها جادا ف ذلك ... مفكرتش تانى 

ووافقت فورا واتجوزوا 

 وخلفت بنتها الوحيدة ... ميرهان

 ودخلت كلية الآداب جامعة عين شمس

وكملت فيها لحد ما أخدت الليسانس 

 وهيا بتسعى ناحية الفن والشهرة مبتونّش

اشتغلت موديل وكومبارس ف شوية حاجات

ومحدش انتبه لها لحد ما قابلها تانى

المخرج احمد ضياء الدين وعرض عليها دور

كان فيلم عجيب كدا اسمه "فتاة شاذة"

شوفوه ع اليوتيوب هتستغربوا جدا لأكتر من سبب

شويكار كان بطلة الفيلم الأساسية

والفيلم اتحمض ف معامل اعتماد خورشيد سنة 1964

والمثير ان قصته فيها شبه كبير

 من اللى حكته الست اعتماض عن صلاح نصر بعدين 

الفيلم حكى عن انحراف بنت لطريق اسود

واتورطت فيه مع شخصيات كبيرة ومسنودة

وفيه مشاهد محاكمة قريبة للى حصل بعدين .. !! 

القصد مديحة رغم انها كانت قمر قمر يعنى
ملفتتش الانظار قوى ف الفيلم

لأن دروها كان قصير

 لكن تأثير الفيلم اتسببلها ف ازمة عائلية

 قولولى ليه يا شهرو ؟؟؟؟

أقولكم عشان مديحة اشتغلت ف الفيلم دا

 مع رشدى اباظة واحمد رمزى

والأتنين كانت سمعتهم ف اصطياد النساء كاسحة

قوم ايييييه ؟؟

طلعت اشاعات انها على علاقة بأحمد رمزى .. منفعش

فرجعوا .. قالوا خلاص رشدى اباظة

 المهم أى حد وخلاص

طبعا الزوج العزيز سمع الأشاعات 

دمه فار وغلى

وطبعا مش هيعمل زى زكى رستم

وياخد علية على العزبة ويحبسها ويضربها زى الفرسة 

 مش هتقبل مديحة انها تتمنع من حبها الكبير
الفن

قصره .. العش الهادىء مبقاش هادىء

والزوجين اتفقوا ع الطلاق وخدت مديحة ميرهان

 عشان تعيش معاها والأب اختفى من المشهد

والوضع ايه دلوقتى ؟

الوضع دلوقتى ان مديحة بقت حرة

وتقدر تدوس بنزين ف طريق الفن وبلا قيود

 لكن ميرهان بنتها كانت مشكلة

هتراعيها ازاى ؟؟ 

كان القرار انها توديها عند خالتها

اخت مديحة ف اسكندرية 

عشان ميرهان تعيش ف استقرار

 وبدأت مديحة السكة 

والغريب بقى والعجيييييب

ان بعض المصادر بتقول 
ان مديحة كامل ف البدايات

مقدرتش تقنع المنتجين والمخرجين بيها

ومقدرتش تصمد قدام نجلاء فتحى وميرفت امين وغيرهن !

وبعدين شوية كمان

 مقدرتش تصمد قصاد شمس البارودى وناهد شريف

وناهد يسرى .. الخ 

ليه ان شاء الله ؟؟؟

آل عشان هن كن أجمل واكثر نجاحا وهيا مش كدا .. ؟!

الظاهر الناس زمان كانت عاوزة قطرة

او عملية تصحيح للنظر #بجد 

الملخص .. 
مديحة قعدت تعمل ادوار بسيطة واى كلام

ومحدش منتبه لها 
لحد ما جالها دور ف فيلم فريد شوقى

 30 يوم ف السجن 

المأخوذ عن المسرحية الشهيرة

ساعتها ابتدت تبان 
وتجيلها ادوار تانية بسيطة برضو

 زى هالو شلبى وأصعب جواز وغيرهم

بطولات مشتركة وحاجات جماعية 

وافلام عجيبة الشأن زى فيلم .. ابن افريقيا

اللى راحت مع نبيلة عبيد تمثله ف نيجيريا

وبيقولوا ان دا الفيلم اللى انتجته المخنبرات المصرية

عشان يغطوا على عملية تفجير الحفار بتاع اسرائيل

الفيلم لا قصة ولا اداء
 كان كاموفلاج مش اكتر

وف سنة 1970 خلص الفيلم الحمضان دا 

واتعرض وطبعا نجح نجاح منقطع الجماهير

وطبعا محدش انتبه ف وسط الجو دا لأن مديحة

عندها أى قدرات فنية 
مجرد وجه جميل وفقط

اما ع المستوى الشخصى

 فميرهان بنتها اللى حكت ان مديحة

كانت بتيجى تزورها عند خالتها .. فتسلم عليها

وكأنها ضيفة ومكنتش تعرف انها امها

 وكانت بتقولها اندهينى ...  يا دودو! 

ف اوائل السبعينات هتنتج ماجدة الخطيب

فيلم .. دلال المصرية عشان تعمل دور يقربها للناس

وهتجيب مديحة صديقتها ف دور صغير

فتدخل مديحة ف جو افلام حسن الامام

وتتنقل السينما الى لبنان وسوريا 
وتتنقل معاهم دوحة

وطبعا كانت اغلبها افلام فاسكونيا 
أى عبط ف هبل 

وبتستعمل مديحة كجسم جميل ووش حلو .. وشكرا 

كفاية الأسامى بس عشان نخمن مستوى الأفلام

  قطط شارع الحمراء .. عصابة النساء

القصد كانت افلام بتستخدمها كدمية

عروسة حلاوة ...  مش اكتر 

ف هذا التوقيت هيتقدملها المخرج .. شريف حمودة

اللى كان مساعد مخرج فيلم ابن افريقيا الحمضان

والظاهر الجوازة روخرا كانت حمضانة ولا ايه

اتطلقت مديحة منه بعد 3 شهور بسبب غيرته

وتضييقه عليها ..

سابته وكملت ف طريقها

وطلقت الرجالة كلهم الى حين 
وحسب وصفها ف لقاء ما انها متقدرش تخدم سيدين 

والفن هوه سيدها وبس 

بعد الطلاق التانى داست مديحة بنزين اكتر

وبدأت تشارك ف اعمال مميزة 
ولو بأدوار صغننة زى 

 اغنية ع الممر - السكرية - زمان يا حب - ابناء الصمت

بعيدا عن الارض - الكداب - أختى - 

زائر الفجر 

اللى  من انتاج ماجدة الخطيب برضو

واخيرا ... فيلمى المفضل والعزيز حب وكبرياء 

زائد افلام خفيفة وشقية زى" ف الصيف لازم نحب"

وعلى فكرة ماجدة الخطيب (الجدعة)

كانت المنتجة برضو

 :) 

ولحد دلوقتى مديحة

كانت البنوتة الجميلة المثيرة الشقية اللعبية

 والادوار تنحصر ف هذا

 واسمها ف التترات مش ف الأول





وف التلفزيون كام مسلسل 
زى العنكبوت مع عزت العلايلى وغيره 
وبرضو مش اللى هيا عاوزاه 

لحد سنة 1977 لما هيعرض عليها كمال الشيخ المخرج

سيناريو هيغير من وضعها

واسمها على خريطة السينما المصرية والعربية

والموضوع له قصة

ان الاخ صالح مرسى لما كتب العمل كانت الشخصية

جاسوسة واسمها هبة سليم 
وف مرحلة من مراحل استقطابها من الموساد

فيه مشهد لامؤاخذة لامؤاخذة بين اتنين حريم 

مشهد مش ولابد خالص 

يحتوى على ايحاءات بالشذوذ والعياذ بالله

قوم الفيلم لف على كل النجمات الكبيرات

ف هذا التوقيت ورفضوه

وازاى نعمل مشهد زى كدا

 سمعتنا وبتاع

قوم ايييه

مديحة قالت لكمال الشيخ انا اعمله ولا يهمنى 

وعملته فعلا ونجحت بأقتدار

والفيلم اللى عرفناه بعد كدا بــ... الصعود الى الهاوية 

والفيلم هيتعمل بلا خدش للحياء

وجرأة مديحة هتخليها تعمل دور يعلم مع الناس

وتبقى نجمة صف أول

وتبدأ مرحلة جديدة ف حياتها

ودوحة ف هذا التوقيت هتبقى نجمة

وهيتعرض عليها ادوار بجد ومكتوبة بذمة

وفترة التمانينات هتكون ف عزها وعز تألقها 

وهتعمل افلام النقاد 
وانا شخصيا كمتفرجة غاوية سينما

بعتبرها من اجمل الافلام

عيون لا تنام 
درب الهوى
 شوارع من نار 

 أشياء ضد القانون

بريق عينيك 
 بنات ابليس 
 الاحتياط واجب

مشوار عمر
 ملف فى الآداب

ولكن شيئا ما يبقى

وغيرهم 

وف المسرح عملت "يوم عاصف جدا"

وف التلفزيون مسلسل البشاير

القصد 
كانت فترة توهج حقيقة

 لحد اواخر التمانينات كدا 

لما ابتدى المناخ الفنى يتغير

والهجمة بتاعت شيوخ الوهابية تسيطر

وجت حكاية اعتزال الفنانين للفن عشان حرااااام

ساعتها مديحة كانت ضمن الناس دى

بس الحكاية بدأت من بدرى مش مرة واحدة

وعلى لسان بنتها اللى حكت ازاى

 انهم كانوا ف خناقات طول الوقت

 بسبب خجل الأبنة من افلام الام 

تحديدا ف فترة المراهقة 
لما ميرهان لمت هدومها وحاجتها

وجت تعيش مع مديحة ف بيتها

واتفاجئت بجو جديد عليها

وحضن امها كان ريحته دفا وسجاير وخمرا

والبنت بقت تسمع امها بتنشتم ف المدرسة 

والأصدقاء يقولوا كلام جارح على ادوارها ولبسها

كانت حياتها مقلوبة ومليانة شغل وسهر وشرب ولخبطة

 البنت اللى كانت متربية ف بيت خالتها

بمسحة تدين كبيرة رفضت المناظر دى 

ورفضت طريقة العيشة دى 

وطلبت منها كذا مرة انها تفوق وتبطل مشاهد عرى وبتاع

مديحة كامل ف البداية خدت الموضوع بتهريج

واستنكرت الفكرة تماما

لكن افتكرت انها ف اوائل السبعينات

عانت من مشاكل ف القلب والرئة

 ودخلت مستشفى مصطفى محمود وقعدت قرب السنة

عشان تتعالج ساعتها قالها 
لازم تغيرى طريقة حياتك الغلط دى 

انا فاكرة انى قريت ف كتاب من كتبه

عن نجمة سينمائية لامعة (مقلش اسمها طبعا )
وازاى فضفضتله وازاى حكتله

 انها عايشة ف عالم بائس 

والرجالة بتنهش ف لحمها بعيونهم

وازاى انها تعيسة لأقصى درجة

وكأن الشهرة دى ولا حاجة .. !

لكن رغم ذلك لما خرجت من المرض رجعت لحياتها

 البائسة دى عادى جدا وكملت 

ورغم انها عانت من كذا صدمة

منهم موت اخ من اخوتها وكان الأصغروكانت بتحبه

 لكن صدمتها التانية كانت ف قصة حب وفشلت

 اما الصدمة التالتة كانت بسبب ... عمر خورشيد

هما الأتنين كانوا اصدقاء وعملوا سوا فيلم العرافة

وكان فيه اشاعات عن قصة حب بينهم

لكن الحقيقة الراجل كان بيرجع لمراته 

مراته القديمة عشان كان متجوز عليها مها ابو عوف

بعد ما كان متجوز زمان ميرفت امين .. افلام كدا

القصد عشان منتوهش من بعض 

عمر كان موهوب وأمور وحبوب 
ومتربى وجدع وعامل ازعاج لناس كتير

يقال ان منهم الأخ صفوت خراء الشريف

ويقال انه دبرله مكيدة

وف يوم كان خورشيد رايح يسهر 

ومديحة كامل مستنياه مع اصدقاء ف مكان بالهرم 

قوم عربية اتحرشت بيه هوه ومراته اللى لسه مصالحها

 ومقدرش يسيطر ودخل بالعربية ف عامود

ومات بعدها بثوانى

والحادثة أثرت ف مديحة جدااااااا

كصديق واخ زى ما كانت بتحكى

وف التحقيقات قالت انه كان بيتلقى تهديدات بالقتل فعلا !

المختصر الواد القمراية راح ف شربة عين 

واختفى من حياتها فجأة كدا ...
 وانقهرت 

 وف هذه الأثناء دخل حياتها راجل

 كان محامى واسمه جلال الديب

ويارب ما يطلع قريب المخفى بوز الاخص
 فريد الديب

وجلال الديب الظاهر كان راجل محترم

ويكفى نقول انه كان محامى الفريق سعد الشاذلى

 ومسك قضيته

عشان يبقى غالبا راجل كويس

القصد .. جلال اتجوز مديحة ف اوائل التمانينات

وميرهان الأبنة بتقول انه كان راجل طيب

ورباها وكأنه ابوها تمام 

ويبدو انه كان السبب ف توازن مديحة انسانيا 

وبالتالى تألقها فنيا 

طيب حلو فين المشكلة بقى ؟

الحقيقة معرفشى لأن ذكر الأخ جلال اختفى من حياتها

بعد فترة وغالبا اتطلقوا

لأنى شفتلها حوار بعد حرب الخليج طوالى

 يعنى 91 بالكتير مجبتش سيرته

وقالت بنتى واهلى ومقالتش جوزى خالص

والراجل نفسه قريت نعيه ف الاهرام 

ومجاش سيرة مديحة كزوجة للمرحوم وكدا 

لكن المؤكد وعلى لسان بنتها

انها كانت عايشة حياتها بالطول والعرض والورب

ومنغمسة ف السهر والشرب والشغل وناسية أى حاجة

لحد ما اكتشفت ان عندها ورم ف صدرها 

وكانت فايزة احمد وناهد شريف 

ميتين من فترة مش بعيدة بسبب المرض دا 

فجالها هلع وسافرت اروبا تعمل العملية

وهيا مرعوبة لمتخرجش حية

ووعدت بنتها انها هتبطل شرب وخلافه

وتكون زى ما هيا عايزة .. بس ترجع تانى 

لكن للأسف بعد ما رجعت مصر

 شوية ورجعت ريما لعادتها القديمة

وتوترت العلاقات بينهم تانى

ورجعت مديحة تسهر وتسافر وتعيش عادى 

لحد ما حصلها موقف ف سفرية لهولندا أثر فيها 
وكسرها

 لما قابلت بالصدفة واحد من قرايبها

وجت تسلم عليه فرفض ... وبهدلها ايما بهدلة 

وقالها ان المشاهد المؤذية بتكسفهم منها 
والجو اللى عايشه دا

هيرتد على بنتها وخافى من عقاب ربنا فيها .. الخ

الست اتخرعت ورجعت مصر مكتئبة 

وهيا مهزوزة 

وحاولت ترضى بنتها وكانت بتفكر فعلا ف الاعتزال

 لكن تراجعت كانت خايفة على ارزاق ناس ف رقبتها

وصعبان عليها تسيب الفن والشهرة

رغم انها على حد قولها كان ممكن تشتغل ف الديكور

 او غيره 

مش هتغلب يعنى ... 

ف الفترة دى كانت موجة اعتزال الفنانات والفنانين

ف اشدها والدعاة فرحانين بكل اسم جديد ينضم للموكب

 وبالصدفة كان نجم مديحة فنيا بيتهاوى

واشتغلت ف كام فيلم كفاية اقول اساميهم

عشان تستوعبوا المأساة يعنى

 أصدقاء الشيطان

 الفلوس والوحوش

 المعلمة سماح 

العجوز والبلطجي

 السقوط 

شوادر

ولحد ما هنوصل لقمة الانحدار الفنى

 وفيلم "المزاج" اللى لو فكرت تتفرج عليه

لازم متكونش واكل قبلها عشان مترجعش

من كتر القرف والاسفاف

ساعتها النقاد قاموا عليها

وقالوا ازاى تعمل فيلم زى كدا وتدمر تاريخها الفنى الخ

والفيلم كان فيه فيفى عبده يا جماعة 

أظن كدا واضح مستواه 

المشكلة مكنتش ف هجوم النقاد ولا فشل الفيلم وقتها

رغم انه مليان مشاهد زبالة وتجارية

 المشكلة كانت ف ان مديحة مقدرتش تصمد

 قصاد ميرهان بنتها اللى انهارت

ومبقتش عارفة تعمل ايه وحصلت مواجهة بينهم

وشغلانة كبيرة وانتهت بأن فكرة الاعتزال بقت اقوى

ومديحة بقت منتظرة الوقت المناسب مش اكتر 

وكانت اخر حاجة 
والقشة التى قصمت ظهر البعير

 فيلم حمضان ... اسمه بوابة ابليس

مديحة وهيا بتمثله كانت جابت اخرها 

وقررت متكملوش وسابته قبل ما تخلص اخر مشاهدها

كانت ف نفس التوقيت بتحضر قعدات وبتسمع دعاة

وفجأة قررت تتحجب وتعتزل

وخدت القرار

وسنة 1992 كانت بتبلغ المحيطين انها بخ خلاص 

منتج الفيلم اتشال واتهبد

 ويا ست مديحة ارجعى مثلى الكام مشهد الفاضلين

وبعدين اعتزلى براحتك

 وهيا تقول لأ خلاص ورجعتله فلوسه كلها 
وجابوا دوبليرة تكمل مكانها

واعتزلت مديحة عالم الفن

ومبقاش حد يسمع عنها أخبار الا انها

راحت درس رجعت من درس

ورفضت اى حوارات لحد فترة طويلة رجعت بحوار

تقول فيه الآتى

ان الفن مش حرام وكلمة توبة دى مش ف محلها

ودا قرار شخصى بحت

والحقيقة الست كانت تقريبا من القلائل وقتها

 اللى معكوش ف الوسط وزملاء الزمن القديم 

عكس غيرها

ومستغلتش الموقف وعملت حامى حمى الفضيلة

 واختفت تماما

لحد ما طلعوا اشاعة انها اتجوزت داعية

وطلعت تنفى الخبر وبعدها محدش شاف طرفها

وعاشت ف هدوء تام

عملت عمرة وحج كذا مرة وانقطعت للعبادة

واتمنت ربنا يسامحها

واتمنت كمان تموت ف رمضان

وفعلا دا اللى هيحصل بعد 5 سنين من اعتزالها

يعنى ف سنة 1997

ف اوائل شهر يناير والموافق رابع يوم رمضان

الست صلت الفجر مع بنتها وجوز بنتها

واتسحرت ونامت 

وتانى يوم بيصحوها  ..... مصحيتش

ولاقت ربها اخيرا قبل ما تكمل الخمسين 

ولسه فاكرة لحد دلوقتى ازاى طلعوا حكاية

 انها ماتت على سجاة الصلاة

وادوا الخبر اسطورية كدا

 خلت احد اصدقاء ابويا متغاظ قوى 

ليه يا عمو ايه اللى مزعلك ؟

قالى بنت الإيه دى عملت بلاوى قد كدا

وف الآخر ماتت وهيا بتصلى وهتخش الجنة ؟!!!

 قعدت أضحك ع النفنسة !

يعنى الست تمنت على الله 

وكان الكريم وادهالها انتوا زعلانين ليه .. ؟!!

 ناس غريبة قوى الصراحة

والقصة خلاص خلصت 

وفاضل شوية حاجات اقولها

مديحة كانت بتلبس سلسلة فيها قلب ف رقبتها

لفترة طويلة ومبتقعلهاش

فلما سألوها قالت انها كانت هدية من حب قديم

ومقلتش مين طبعا 

بيقولوا ان مصطفى محمود كانله دور كبير

ف محاولة اعادة الاتزان ليها

سواء زمان لما دخلت عنده المستشفى او قرب الاعتزال 

مديحة كانت طموحة جدااا

وف سنة ما 1985 تحديدا عملت 8 افلام مرة واحدة .. ! 

ومكنتش تقريبا بتنام من شدة الاجهاد 

رغم متاعبها الصحية كانت مهووسة فن 

واضح انها جنب قوة شخصيتها

لكن مقابلتش غير رجال اوغاد

وشفتها ف حوارين ع اليوتيوب واحد 
قديم ف السبعينات

وواحد قبل اعتزالها علطول 

يعنى بينهم فرق 20 سنة واكتر 

وكانت بتقول انها مش جميلة .. جذابة ولطيفة بس

لكن مش حلوة !!!

نعممممممممم !!

قولى تانى كدا ... ؟

وانتوا منظركو ويحش يا رجالة مصر

لما الست دى متشوفش نفسها جميلة

 تبقى عيبة ف حقكم الصراحة 

وحيث اننا بنتكلم ع الجمال

 شوفولنا اسكندرية البنات بتاكل فيها ايه

عشان تطلع الحلاوة دى منها 

يمكن نحاول نحسن النسل شوية

وبالنوسبة لموضوع جوزها الاولانى
الاكبر منها ب25 سنة

 انا مش هتكلم عنها لأنها كانت عيلة

 17 سنة يا دوب  ومتعرفش تختار

لكن انا هتكلم عن اهلها اللى وافقوا 

وحياتها تم افسادها ف سن صغيرة 

ولما كبرت بقى الموضوع اعقد من انه يتحل 

وتعيش زى باقى الستات بشكل طبيعى 

فليه يا جماعة 
ليه ؟

وبالنوسبة بقى لموضوع الاعتزال

فبغض النظر عن الهجمة بتاعت الاعتزال

والأصرار على جذب النجمات للحكاية 

والفلوس اللى اندفعت والمجهود الرهيب 

انا ليا رأى متوضع ف القصة دى

المشكلة مكنتش ف الفن نفسه

بقدر ما كانت ف طريقة عيشة مديحة المتطرفة

هيا كانت بنت جيلها 

جيل النكسة اللى عاش الانكسار بكل صوره 

الشباب ف وقتها جرب القرف كله وشاف انهيار

وسقوط ف ناس وحاجات كتير 

هيا عاشت زمانها بكل عيوبه 
وبسبب وجودها ف مجال حيوى 

وتحت الضوء عانت اكتر 

ثم جمالها يا اخواننا 

جمالها جذب الاوغاد 
والزبالة حواليها كترت عن أى واحدة عادية

والجميلات دايما تعيسات 

دى قاعدة عامة وظن لا يخيب.... واضح يعنى 

القصد هيا كانت محتاجة حياة عادية متوازنة مش اكتر

كون حد استغل دا عشان يجرها لحتة تانية 

ويستغلها فدى قصة تانية

وبمناسبة الاستغلال بقى 
اغلب نجمات هذا الوقت اللى اعتزلوا

اما رجعوا تانى وقرفونا تمثيل حمضان

وقالوا الفن مش حرام بعد ما كان حراااام

واما رجعوا بس بتصريحات زى الست شمس البارودى كدا

عشان يشلونا مش اكتر 

محدش اختشى وخد الموضوع بجد الا قلائل

 منهم مديحة كامل ونسرين

والأتنين الحلوين ف الصورتين اعلاه 
اللى بحبهم دول

والغالبية خدها سبوبة او محطة استجمام لما بعد 

كان فيه طراطيش كلام ان شخصية نجوى فؤاد

ف مسلسل العائلة اللى كتبه وحيد حامد

هيا شخصية مديحة كامل 

ولكن بتصرف 

 المؤسف بقى والمهين ان سكوت الست دى

وموتها خلى شوية كلاب واوباش يطلعوا يتنطعوا

ويقولوا ان كان هبينهم مشروع جواز وبتاع 

زى مين يا شهرو ؟

زى سخام البرك الحرامى اللى ناهب الفلوس

 وقاعد ف لندن يطبل للسيسى ويعمل نوم العازب

اللى ادعى تقريبا كدا مديحة اعتزلت بفضله هوه !

واخيرا .. 

مديحة كامل بالنسبالى كمتفرجة وانسانة ... ايه ؟ 

ادوراها اللى مبنسهاش 

واثرت ف قلبى وروحى

دورها الروعة ف ... عيون لا تنام

تميزها ف دور بياعة الهوى 

ف شوارع من نار وف درب الهوى

واشياء ضد القانون

وازاى كل دور مختلف عن التانى

ودورها ف مشوار عمر

وجملة 
"الدنيا علمتنى مفرحش قوى عشان محزنش قوى "

دورها ف الاحتياط واجب

الفيلم دا له مكانة ف قلبى وذكريات بريئة

ودورها اللى كانت هتعمله هالة فؤاد

بناء على ترشيح الاب المخرج احمد فؤاد 

واحمد زكى رفض وهالة كانت على ذمته ساعتها

 فراح الفيلم لمديحة بسبب فرمان احمد زكى 

بريق عينيك

وحوار الطاعة والناشز وهسيبك كدا متعلقة

والقصص الذكورية الحلوة دى

اللى رجالة كتير بتقولها

:)

دورها ف فيلم دعوة للزواج مع الفخرانى 
وازاى اتجوزت ف النهاية بطريقة لا يتخيلها حد 
من واحدة فيمينست !

ملف ف الأداب 

وازاى الجهاز الامنى قادر ف لحظة يستف ورق 

ويخرب حياة ناس ابرياء 

وعاطف الطيب بقى يا اخوننا ... يا اخوننا 

دورها ف الصعود الى الهاوية 

واشهر عبارات السينما المصرية ف الطيارة 

وهيا دى مصر يا عبلة 

مسلسل البشاير

وسلوى الممثلة اللى مسارها الفنى ف انهيار

العمل دا عملته ف عز نجاحها وسبحان الله

مشافتش انها هتعيشه بعدين .. ! 

حتى افلامها الخفيفة

ف الصيف لازم نحب - تجيبها كدا تجيلها كدا

 اذكياء لكن اغبياء والاتحاد النسائى

كلها افلام ممتعة مسلية بتتفرج عليها 
وتضحك ف وقت زهق

حتة القمراية الملعلطة اللى سعيد صالح اتهوس بيها

ف هالو شلبى

وعصمت الدوينى ف يوم عاصف جدا

ودورها ف اصعب جواز

بحب الفيلم دا جداااا

ودورها المجرم ف حب وكبرياء

وجملة "اللى مربى كلب بياخده يفسحه " ف فيلم زائر الفجر

كانت شخصية اجتماعية ومجاملة 
محبوبة من المجال 

وبيقولوا مكنتش بتنفسن من الزميلات 

دى صورتها مع جوز بنتها ف الفرح 

دى ميرهان واولادها 

احفاد مديحة 

ولو عندكو وقت اسمعوا

حوارين ليها ف توقيتين مختلفين 
بينهم فوق العشرين سنة 

هنا و هنا 

وبالنوسبة لزميلات جيلها 

يعنى ميرفت امين ونجلاء فتحى وغيرها 

الحلاوة دى جابوها منين .. ريلى 
امهاتهن كانوا بياكلوا ايه اياميها ؟!!!

وكنت قريت زمااااان ف كتاب عن المكياج 

ان وش مديحة كامل من الوشوش المثالية 

يعنى مقاييسه نموذجية 

المسافة بين العين والخد كذا 

وبين المناخير والحواجب كذا 

قوم طلعت مديحة مقاييسها نموذجية 

مديحة كامل .. الاوصاف 
الشهيرة بمديحة كاملون .. الغزالون يهبلن

واخيرا 

وقبل ... تصبحوا على خير 

مش حازز ف نفسيتى الا حاجة واحدة بس

هوه لما الموزة دى تقول انها مش جميلة

فالمفروض احنا باقى النساء يعنى نعمل ايه  ف نفسينا؟

هاتولنا لطامة بالكهربا 

سلام 

------------------------------

Hema Abdella @hema_abdella 

 قالب و اتكسر ما اتجبش زيها تانى

♓️hameess @Hameess 

 بصراحة هى تتحب .. الأنثى كما يجب ان تكون 

mayada el_awady @MayadaEl_awady 

الدور كانت هتعملة العسل
 فذهب الي الشرباتات في بيتها

 Hk List ‏@hklist   
 أنا اللي حازز في نفسي
 إزاي نجمات السليكون نانسي و هيفا و ميريام فارس
 و مايا دياب يتقاللهم نسوان أصلا




 Nelli ‏@NGeorgos   
 فعلا انا قريت الرواية على لسان ابنتها
اللي كانت بتروج لحكاية التوبة
لكن بصراحة اي متابع كان هيفهم ان مديحة
كانت تمر بأزمة حادة
يعني بتكبر و بتخاف جمالها يذوي
 وكمان في وجوه جديدة...

Ahmed @Ahmed_Abrass 

محمد خان كان بيحبها
كان بيحبها و هي منفضه له و سحلاه وراها

5hHk List @hklist 

 أنا سمعت ـشرف السعد في حوار يقول أنه خطب مديحة
 ووافقت و لكن ما حصلش نصيب

Ahmed @Ahmed_Abrass 

 جلال الديب ده كان مقطع الدنيا 
الستات كانت بتترمي تحت رجله
 جلال الديب في الاساس ظابط جيش
اعتقل مع عبد الحكيم عامر وهرب من السجن الحربي
 و خلع بره البلد
و عاش في اوروبا و درس القانون و عمل بالمحاماه
و رجع مصر اشتغل فيها
الراجل ده انا قابلته كام مره كان شكله برنس اوي
 و شيك و كان كلاس في طريقته

 كانت الستات بتجنن عليه
بس ماكنتش اعرف انه اتجوز مديحه كامل

Ahmed Shokeir @Shokeir 

 مديحة كامل دي أسطورة فترة المراهقة 

اسلام صالحين @EslamSalheen 
هاله فؤاد وشاديه





 Ibrahim Mohamed ‏@Ebrahim_Muhamed   
 جلال الديب رجل محترم و كان ظابط جيش
محسوب على المشير عامر، نعرفه عائليا
و قابلته اكثر من مره فى مناسبات
 و مش قريب فريد الديب




 Nihal ‏@Nanoush0   
وأنا أعرف الشخص اللى كانت بتحبه وجابلها القلب
وبأكد عالمعلومة




 atif ‏@atifghanimah  
هي شايفة نفسها من جوا




 عبير ‏@Abeer_hassanein  
بناكل جلاس وندوب فى قلوب الناس




 و قاااال تودرى.... ‏@egy_a7mad  
الله يرحمها.  شفتها في اسكندرية قبل  حجابها مباشرة
 الله يرحمها كانت جميلة طبعاً





 Rasha Hamido ‏@Ooshhy  
مش من حق حد يحكم علي حد لو بيعمل ايه!
مالناش غير الدعاء بالهدايه والحساب عند رب العباد
وهو ارحم الراحمين يكفي التفكير في معناها





GiGi masrayamoot ‏@65_gigi  
 تقصدى أشرف السعد وال انا غلطانه




chiquitita ‏@Dandormahh 
مرحلة زفت اصلا وكانت اغلبها افلام مأندلة

 لا للإرهاب ‏@AmaniAshour  
مراته اللى كانت معاه وقت الحادثة اللى مات فيها
هى دينا اللبنانية وكانت أخصائية تجميل




Tricksy ‏@Tricksy4  
مسلسل البشاير غالبا كان جزء منها
 المسلسل أعتقد ليه طابع شخصي لطيف قريب
 لحياتها الحقيقية ..


Mosaolgy ‏@mosaelzaref
 يا بخته ابن المحظوظة اللي اداها السلسلة :D