هوى التى هوت

مساء الخير .. كمان شوية حدوتة

واسمعوا الغنوة دى بالمرة 

هنحكى النهاردة عن الاختيارات

خصوصا وقت الشدة

وازاى البنى آدم لما يتعرض لمحنة يشوف الصح 

ويروحله

ولو فيها تمن كبير

ورغم المعاناة يصبر عشان ف النهاية يلاقى 

نجاة

وان ملقاش طوق يتعلق بيه ويخرج من وسط الغرقة

يبقى ع الأقل راح بشرف 

راح وهوه بيحاول لأخر لحظة ...

المرة دى هنحكى عن اتنين ستات

من طبقة اجتماعية تقريبا واحدة

مروا بمحنة طحنتهم وطحنت الكل معاهم

واحدة خرجت من الطوفان حية 

والتانية مخرجتش

قبل ما نبدأ القصة من اكتر من مصدر

 لحظة تاريخ لمحمد المنسى قنديل

وتاريخ الحركة الوطنية للرافعى

وبونابرت فى مصر لـ ج كريستوفر هيرولد 

و كتب تانية غيرهم

والأحداث هتبدأ قبل أيام من دخول الحملة الفرنسية

الى مدينة القاهرة تحديدااااا

لكن بس هنرجع فلاش باك بتاع 20 سنة لورا 

ايام على بك الكبير

والراجل زى ما كلنا عارفين اتنكب يا نضرى ف صبيانه

 وكان حلمه يستقل بمصر عن العثمانلية

قوم التراكوة عشان يوقفوه عند حده

اشتروا اقرب رجاله محمد ابو الدهب

وابو الدهب لمع كرسى الحكم ف عينه

قام قالب على سيده على بك الكبير

وبمساعدة فريق الاوغاد الاخرين الجزار وابراهيم بك 

ومراد بك

ولنا هنا .. وقففففففة

عشان الأخ مراد بك دا كان اوسخ الجميع

يعنى كان حقيرا وحقيرا جدا

طب ليه يا شهرو ؟؟

عشان لما ابو الدهب دعاهم لأجتماع الندالة

وقروا الفاتحة انهم يثبتوا ع الغدر

قوم مراد بك بعد تقسيم النفوذ والغنايم المنتظرة رفع ايده

وقال مش هتحرك خطوة الا لو اخدت وعد

ان بعد موت على بك الكبير تجوزونى أرملته ..!

اشمعنى يعنى .. ؟

 قالك كدا انا حر

 ابو الدهب مخدش وادى كتير

واعتبر الطلب دا حاجة عبيطة وطبعا وافق

ونجح فريق الوغدنة ف التخلص من على بك الكبير

ودخل مراد بك على بيت ارملة على بك الكبير

 واخده بكل ما فيه من ثروة وجوارى

والاهم اخد الزوجة اللى كان اسمها نفيسة البيضا

والست نفيسة دى كانت حدوتة كبيرة

كانت جارية شركسية اشتراها على بك الكبير

وبعد شوية خدت مكانها ف قلبه فأتجوزها 

وبقت الكل ف الكل

والظاهر كانت زى ما بيقولوا عنها

ذكية وشاطرة ف التجارة وعندها لباقة

وبتعرف عربى وتركى ولغات اخرى

وكانت موضع ثقة على بك الكبير وبعد ما مسك مصر

بقت حسب أدبيات العصر الحالى

هى السيدة الاولى وبحق

ولقب البيضا ناس قالت لأن بشرتها كانت بيضا بشكل ملفت

 وناس قالت لأ .. عشان اياديها البيضاء ف الخير

قصره الست نفيسة البيضا الشهيرة

ايضا بنفيسة المرادية نسبة الى مراد بك اتنيلت اتهببت

اتجوزت المخفى عشان مكنلهاش حل تانى

وأصل المعاندة كان ممناش فايدة ف هذا الزمن الأغبر

وبعد جوازها من مراد بك كملت مسيرتها ف البيزنس

والنشاط الاجتماعى ورعاية الفقرا

وعملت سبيل شهير باسمها ف شارع المعز

وطبعا كان السبيل ملحق بكتاب لتعليم العيال

وبسبب نشاطها التجارى كانلها علاقات مع قناصل

وسفراء الجاليات الأوربية

وبين الناس كانت حمامة سلام لما مراد يتك عليهم ويظلم

 وما اكتر ظلمه

القصد وم الآخر الست كانت محبوبة على كل الاصعدة

رسميا وشعبيا

 وفضلت متهنية وساكنة ف قصر ابهة بالازبكية

ف درب عبدالحق 

ونسيبها ثوانى

ومش هنبعد كتير هنروح قريب منها برضو 

حى الموسكى

عشان ندخل بيت تانى بتاع ست تانية اسمها هوى

وفعلا حقا ... لكل بنى آدم من اسمه نصيب

الست هوى بقى يا حضرات

كانت زوجة للكابتن اسماعيل الكاشف ..

الشهير باسماعيل الشامى

الكاشف دا كان وظيفة حاجة كدا زى مأمور ضرايب

بس على وسع

الكاشف دا كان بيمسك مديرية او قطاع او مكان واسع

مش زى دلوقتى

 قوم ايه

اسماعيل الكاشف وزوجته الست هوى كانوا ساكنين

ف بيت كبير بالموسكى

والتاريخ للأسف مبيقولش هوى كان اصلها ايه

بس ف الغالب كانت برضو جارية

وسى سماعين اتكرم واتعطف واتلطف واتجوزها

 وزيها زى نفيسة البيضا مختارتش حياتها 

يمكن كانت زيها ف النشأة والظروف

والجوازة من واحد عليوى وغنى وله نفوذ

وصاحب قلب قاسى شأن كل المماليك والبكوات

 لكن فرقت عن نفيسة كتير

مكنلهاش ثروتها ولا حظها من حب الناس

 ولا حريتها ف التحرك

ولا قدرتها الرهيبة على ترويض وحش كاسر زى

مراد بك 

أصل الراجل مراد يعنى كان حاجة زفت الصراحة

وبعد ما شارك ابو الدهب ف التخلص من على بك الكبير

ابو الدهب نفسه مات بعد 3 سنين

ودخلت مصر ف صراع بين اصدقاء الامس اعداء اليوم

وجو زى الحرب الباردة كدا

انتهت بأن السلطان العثمانى كان بيبعت والى شرابة خرج كدا

 يقعد منظر ف القلعة

بينما مراد بك وغريمه ابراهيم بك 
بيلعبوا كراسى موسيقية

ف حكم البلد

وكل نفر فيهم واخد حتة من مصر

وبيتصرف فيها كما يشاء

وفضلنا على هذا الوضع لحد ما نابليون بونابرت ف ليلة

اتخبط ف عقله

وقرر يغزو مصر 1798

ورغم تحذيرات انجلترا المنافس الاستعمارى
 التقليدى لفرنسا

لأكبر راس ف الثغر

 الا ان محمد كريم حاكم اسكندرية

 مهتمش بالكلام 

الا لما فاق على سفن الفرنسيس ف الأفق

ودخل الفرنساوية اسكندرية

ولقوا مقاومة شرسة ومتحركتش قواتهم منها

الا لما ركعوها وكملوا الزحف الى القاهرة

مستولين على كل حتة جاية ف سكتهم 

وصلت الاخبار الى القاهرة

مش بس للوالى وللأمراء وللكبرات

للشعب قبل منهم

ونابليون جايلكم خبوا عيالكم

وسريعا .. البكوات لموا حالهم ومحتالهم

وقرروا يدافعوا عن نفوذهم ووجودهم

وعن البقرة اللى بتحلبلهم لبن بالشكولاتة

وكل بك منهم لم مماليكه وعسكره

واخبار اسكندرية وغيرها كانت بتوصل 

فأهل القاهرة يترعبوا اكتر

واللى زاد وغطى ابراهيم بك اللى رجع من الرحمانية

ذليلا ومكسورا ومهزوم الوجداااان

ومالك يا حاج مش هزمتوا الفرنسيس وطردوتهم وكدا

قالك فرنسيس ميييين

انا شفت صفوف زرقا داخلين علياااااا

 والمدافع مبطلتش ضرب 

قتلونا واتهزمنا .... اتهزمنا

المصريين بصوا للمنظر وقالوا وبعدييين

هيقتلونا ونسكتلهم ؟؟

ابضننننن

فكروا وبسرعة عملوا المتاريس من امبابة لحد بولاق

على قد دماغهم يعنى عملوا أى منظر

 لكن الرهان كله كان على الأمرا والبكوت

اومال احنا اتحملنا قرفهم سنيييين عشان ايه 

مهو شايلينهم ليوم زى دا ؟؟؟!!

البهوات بقى .. كان تفكيرهم زيهم

فورا لموا كل اللى يملكوه من الغالى والنفيس

والخفيف والتقيل واخلوا منازلهم وهربوا 

وقالوا رايحين نحارب

عم الجبرتى هو الراوى الأشهر

 والاوثق للفترة دى من تاريخنا

وهوه اللى بيقول ازاى الامراء هربوا

 وسابوا حريمهم ف البيوت مع الخدم والجوارى

ف الموسكى محدش عارف هوى عملت ايه

 لما اسماعيل الكاشف خرج بزيه الحربى وقفل الباب وراه

لكن الموثق ان نفيسة البيضا 

قررت تصمد قصاد الطوفان الجاى

اصلا الناس اتعلقت بيها

الغلابة تحديدا وكمان نساء المماليك اللى ازواجهن

طفشوا ع الحرب او هربوا خالص من مصر

الست وقفت وقفة رجالة 

ف امبابة كانت المراكب والغليونات شايلة المدافع

اللى يملكها مراد وابراهيم بك

وانضملهم الانكشارية والجراكسة والقاسمية والعزب

والارناؤوط وغيرهم

عدت المراكب من البر الشرقى للبر الغربى

 وحصلت المواجهة

المماليك تساقطوا امام الغازى الجاى بأسلحة وتكتيكات

اكبر من انهم يستوعبوها 

فانهزموا شر الهزيمة 

اسماعيل جوز هوى ومراد بك جوز نفيسة

كانوا من الناس اللى اتصدمت ف المواجهات

وهربوا املا ف اعادة تصحيح الوضع على الارض

اما القاهرة فكانت بتترنح حرفيا

الشيوخ باتوا ف المساجد يدعوا ويقروا قرآن

والمجاذيب لفوا الشوارع ويقولوا اشهر مناجاة ف تاريخنا

يا خفى الالطاف نجنا مما نخاف

وزى ما بيقول محمد المنسى قنديل فى عذوبة

"كانت القاهرة قد عاشت ليلة غريبة ليلة بلا مماليك

 ولا جراكسة 

ذهب الحكام القدامى قبل حلول الظلام 

ولن ياتى الحكام الجدد قبل الصباح

وعاشت القاهرة اقصر فترة استقلال فى تاريخها "

وكانت ليلة ليلاء

هاجم العوام بيوت الكبراء والنار ولعت فجأة ف بولاق

 اختفى الامراء والوجهاء ونقيب الأشراف 

ورجال الشرطة م الشوارع 

وانفلت الامن تمامااااا

وعصفور النار بتاع اسامة انور عكاشة اياه

طار ف سماء بولاق

والناس جريت عشان تطفى الحرايق وتلحق اللى فاضل

والنهب اشتد 

واقتحم الزعار والجعيدية وسفلة الناس

بيوت الأمراء ونهبوها

من ضمن الأماكن كان بيت ابراهيم بك

وبيت مراد بك 

ونفيسة موقفتش قصاد اليغمة 

وهربت مع جواريها واستخبت لحد ما الفوضى تنتهى

اغلب نساء المماليك عملوا كدا خوفا من بطش العامة

اللى هيخلطوا الحابل بالنابل

ومش هيدوهم فرصة ينطقوا

والهروب كان سيد الموقف لحد ما جه الصبح

ع الصبحية كان بونابرتا بجيش الشرق

بيدخل المدينة منتصرا

ورجالته بيحطوا شارة الجمهورية الفرنسية على الأبواب

وبس نابليون قال مصر دى تعتى أنااااا

وبدأ ف تستيف الاونطة جوا الشنطة للمصريين

ويا دوب ايام قليلة ويا حلو بانت لبتك 

وكل شىء انكشفن وبان

ازاى يا شهر ؟؟

ابدا الجماعة الحقيقة شأنهم شان كل العسكر

مبيلحقوش يقولوا كلمة حلوة الا

 ويدوا بأيد طارشة بعدها بثوانى 

الطبع أصله غلاب 

والراجل يختشى دخل علينا

دخلة اللى بيفضوا اعتصام كدا بالضبط

 آل قالهم انا مع الأسلام وبحبكوا

وجاى احميكوا من بطش المماليك بيكو وبتاع 

وبعديييين

هوب عمل ديوان من المشايخ

عشان يمرر عن طريقه فرماناته اللى هتقطم الوسط

ويستخدم المشايخ عشان يسجد بيهم الناس

ويطلب ما بداله 

 وشكرا 

واول طلب كان الآتى

عمك بونابرتا بيميل عليك يا ديوان

وبيقولك الحوجة وحشة وطالب منكم 500 ألف ريال

على سبيل السلفة يتلموا من ارباب الحرف والصناعات

طبعا التجار لطموا وقالوا هزها شوية

نابليون ايه مثلا لسه هيفاصل وكدا

ابضننننن

راح مصادر الجمال والخيل والحمير

 وكسر دكاكين سوق السلاح ف سكته 

ونهب ما فيها وحّمله على ضهور الدواب المنهوبة

 وبعدين قبض على الخدم والبنايين وعذبهم

عشان يعترفوا على الاماكن اللى خبى فيها الكبرات 

ثرواتهم

وطلعوا يا ولاد اللى اسيادكم مخبيينه تحت البلاطة

وطبعا نفيسة البيضا مش هتستنى لما خدمها يتعذبوا

الست اظهرت نفسها 

زى ما بيقول الجبرتى .. نصا

- وانتى مرات مراد بك

- ايوه انا 

- فين فلوسه

- اخدها معاه

- فين فلوسك انتى

- عاوزين كام وتسيبونا ف حالنا

بس ومسكوا الآلة الحاسبة وقعدوا يتكتكوا

وبعدين قالولها بعد خصم الضرايب والمستنقعات

عليكى حوالى 600 ألف فرنك

ومش عشاننا والله

دول عشان الجمهورية الفرنسية و #تحيا_فرنسا

الشاهد من كتابات معاصرى الحملة الفرنسية وقتها

ان الست نفيسة البيضا دفعت عشان تفدى نفسها

وتفدى كمان نساء المماليك اتباع مراد بك 

والجبرتى بيقول

" ان الست نفيسة زوجة مراد بك ظهرت

وصالحت عن نفسها واتباعها من نساء الامراء والكشاف

بمبلغ قدره مائة وعشرون ألف ريال فرنساوى

وأخذت فى تحصيل ذلك من نفسها وغيرها

ووجهوا عليها الطلب (أى طالبوها)

وكذلك بقية النساء بالوسائط المتداخلين فى ذلك

فصاروا يعملون عليهن ... 

.. يعملون عليهن ايه ياعم جبرتى ؟؟؟

قالك "يعملون عليهن أرهاصات وتخويفات"

حلوين الفرنساوية متحضرين واخلاق فعلا

طب ف وسط كلام الجبرتى فهمنا ان نفيسة دفعت عنها

وعن غيرها من ستات اتباع مراد بك

واللى بيقولوا ان اسماعيل الكاشف كان منهم

طب هل نفهم ان هوى افتدت روحها ... ؟

الحقيقة ان اللى اتقال عنها كان شىء تانى

بيقولوا ان الست هوى .. وقعت ف هوى

 واحد من عسكر الفرنسيس

وخرجت معاه وهجرت بيتها وحياتها الماضية

الاخ كان اسمه نيكولا

ونيكولا الظاهر كان حاجة مش قليلة ف جيش الشرق

والظاهر برضو كان وسيم ودحلاب

وعرف ازاى يميل دماغها وياخدها من كل حاجة

مكنتش الوحيدة على فكرة

 الجبرتى حكى انه بنات وستات وجوارى وعاهرات

اتعاملوا مع الغازى الفرنسى وبالبلدى كدا

قلعوا برقع الحيا ورموه ف الارض

"تبرج النساء وخروج غالبيتهن عن الحشمة 
والحياء حدث

 لما حضر الفرنسيس الى مصر

ومع البعض منهم نساؤهم كانوا يمشون في الشوارع

مع نسائهم حاسرات الوجوه لابسات الفستنات
والمناديل الملونة ويسدلن على مناكبهن 
الطرح الكشميري

والمزركشات المصبوغة ويركبن الخيول والحمير

ويسوقونها سوقا عنيفا مع الضحك والقهقهة
ومداعبة المكارية معهم وحرافيش العامة،
فمالت اليهم نفوس اهل الاهواء

من النساء الاسافل والفواحش"

الحكاية مجتش ف البداية 

لأن كان فيه خوف وهلع ورعب ثم ترقب هيحصل فينا ايه

ستات المماليك تحديدا كان خوفهم مضاعف 

من الغزاة ومن العوام

الغزاة وفهمنا هيستهدفوهم عشان ثروات الأزواج

وعشان الحصول ع المتعة واذلال الحاكم القديم 

لكن العوام كانوا الرعب الأكبر منهم

والخوف من شخص اتظلم سابقا 

وهينتقم دلوقتى ف شخصهم 

طالما رجالتهم مش موجودين بقى 

نفيسة البيضا كانت محاطة بحب الناس من طبقتها

عالم المماليك والسلطة

وكانت كمان محاطة بمحبة العوام

وفضلت تسند كل محتاج بيدق على بابها

وفضلت ف بيتها وحاولت تعمل علاقات دبلوماسية

مع الفرنساوية عشان تأمن شرهم

 اما هوى فاخدها نيكولا من بيتها القديم ف الموسكى

وراح بيها فين ؟

قيل انه وداها الأزبكية وسكنها ف قصر من القصور

اللى هجرها اصحابها وعاشت معاه ايام ف العسل

وخرجت معاه وعاشت عيشته

وانغمست ف مجتمعه اللى كان بيحاول

ينخرط ف حياة المصريين

وفضلت وخداها النداهة لحد ما مشى بونابرتا

وجه كليبر

معرفش ازاى تجاهلت موضوع جوزها دا

بس يبدو انها تصورت ان اسماعيل الكاشف مش راجع

وانباء هزايم المماليك المتوالية كانت بتطمنها 

انه اكيد مات .. جايز ... يمكن !

لكن وجود كليبر عمل فرق .. وللأسوأ طبعا

الجدع الشهادة تتقال كان مش طايقنا
 وبيكرهنا كره ملوش حد

كان عاوز يرجع فرنسا 

وعلى حظ امه النحس بقى وصلت اخبار

ان مولانا السلطان الهباب اللى قاعد ف تركيا

ناوى يبعت جيش عرمرم والجيش دا ف طريقه للشام 

وجاى مصر

والانجليز اللى قاعدين زى البرص ف السقف كدا

مستنين الفرصة يقعوا فوق راس الفرنساوية

استغلوا الموقف وحاصروا الشواطىء المصرية

ورخموا ع الفرنسيس

اهل القاهرة ومصر لما عرفوا الأخبار الجديدة

 تحمسوا ..

اصلا ف الصعيد كان المصريين مبهدلين عسكر الفرنساوية ومورينهم الويل 

فالكل انشكح من خبر جيش السلطان

وسط الجو المشحون بالخوف والكراهية المتبادلة

كان الفرنساوية تحط الفولة على مناخيرهم تطق

ودفعات من العدائية انتشرت ف الجو

الشعب اصلا متخزوق منهم وشايل ومعبى !

فجأة طلعت اشاعة ان الاتراك والفرنساوية هيتصالحوا

وعزز الاشاعة ظهور فرسان اتراك من غير سلاح

ماشيين ف شوارع القاهرة كدا عادى 

وفى امان الله

نفيسة البيضا استقبلت الخبر بفرحة

وبيقولوا كان بينها وبين مراد بك مراسلات

ومراسيل ومساعدات عشان يعرف يكمل الحرب

قصدى الخسارة 

#مخسوف طول عمره ومدهول

بينما هوى .. اترعبت وخافت وجالها لوثة

اسماعيل الكاشف لو حى هيرجع ويوصلها

واللى زود خوفها اكتر ان نيكولا كان مسافر 

رايح فين يا منيل ؟؟

مقلش رايح فين بس بعدين هوى هتعرف

وكمان نفيسة البيضا هتعرف والشعب المصرى كله 

ايه اللى حصل

الشاهد ان تحت ستار الليل وصل رسل

من عند الوزير الاعظم بيقولوا ان السلطان عاوز فلوس

 يجهز بيها الجيش اللى جاى يهزم الفرنساوية 

ويطردهم بلا رجعة

وادفعوا يا مصريين 

قوم الناس الغلابة هيخيل عليها وتدفع المبلغ المطلوب

بنفس راضية رغم الضنك اللى هما فيه

ويقولوا

 "سنة مباركة وذهاب الكفرة " 

الجبرتى اللى بيقول

ومراد بك بعت يطلب مؤن وكساوى وطرابيش

 له ولمماليكه ولجيشه عشان يحارب بقى وكدا

#جاتك_وكسة 

والانجليز طلبوا امدادات من انجلترا 

وشكلها هتولع

بس والناس استعدت للواقعة واللى هيحصل

 واذ فجأة الانجليز يرخرخوا والمماليك كالعادة يستهبلوا والفرنساوية يستغلوا الفرصة دى 

وينزلوا بتقلهم

وهوب نزلوا على شوية العساكر اللى جايين

بقيادة الوزير الاعظم ودبحوا فيهم

الوزير الاعظم هرب وقال يا فكيك

والمماليك اتعمل معاهم الدنيئة كالعااااااادة

وبسرعة وصلت الاخبار للقاهرة ان الكل انهزم

ولا اتراك ولا مماليك واحنا لوحدنا خالص

وايه بقى نسكت ؟ 

لأ طبعا

فجأة يطلع من بين الجموع واد اسمرانى

هيصرخ بعلو صوته ويهتف  

"مصر هتفضل غالية عليا "

وأصل مكنوش لسه ابتذلوها زى دلوقت

الفرنساوية كانوا بيطاردوا الاتراك عند بلبيس

وجنود الحامية كانوا ف القاهرة

فالناس نزلت الشوارع

ومعاها النباتيت والعصيان والحجارة 

واتلمت وهجم عدد منهم على عساكر الحامية

ومن باب النصرعدوا ودخلوا ف الحارات

وبقوا يكسروا كل الحواجز ويقتلوا أى فرنسى ف سكتهم

وبيقولوا انهم ف وسط الدوشة لقوا مدفع قديم ف المطرية

فزقوه ف موكب من المطرية لحد الازبكية 

تخيلوا منظر عشرات من الرجال والنساء والاطفال

بيزقوا فيه كل المسافة دى ... !

التجار طلعوا الموازين بتاعتهم

والرجالة قطعت قمصانها والعطارين ادوهم البارود ببلاش

ومن كل الحاجات دى اتعملت اول قذيفة بارود 

واتحدفت !

اتحدفت على مين يا شهر ؟

اتحدفت على بيت سارى عسكر الفرنسيس سخصيا

الحاج كليبر ربنا ياخده 

وفتش الناس ف بيوت الامرا ولقوا بقايا بارود وقذايف

وحاجات مطمورة ومدفونة من زمان

طلعوها 

واتعمل مصنع للبارود ف الخرنفش بالقاهرة الفاطمية

وبقى فيه مدفع تانى صناعة مصرية اصلية

خرج بيه الرجالة من الخرنفش وسط الزغاريط

 والصيحات

ومن كل ما وصلت لأيدين المصريين من اشياء

 اتعمل متاريس على كل حارة

عشان يمنعوا أى دخيل مش منهم

ويضربوا من وراها بالحجارة #هاحييييح

كان ناقصهم بس المنايفستو بتاع مصطفى ابراهيم 

عشان تكمل 

:)

بس المؤسف ان وسط كل هذا كان فيه واغش

عمالين يهتفوا 
"نصر الله السلطان واهلك فرط الرمان "

طب فرط الرمان وكان مفترى ومفهومة دى 

السلطان يتهبب يتنصر ليه عمل ايه بسلامته .. ؟!!

القصد ..

 بيقولوا ان نفيسة البيضا شاركت ف الثورة دى

وكل اللى قدرت تعمله قدمته

انما هوى فبيقولوا ان العوام دخلوا عليها بيت الازبكية

وضربوها وبهدلوها وسرقوا كل ما ف البيت من محتويات

 وطبعا اتوصوا بالشتيمة والتلقيح عليها

بانها كانت ارخص من العاهرة

و وسط كل هذا الجحيم المستعر كليبر هيسكت ؟

يسكت ازاى دا مخنوق مننا اصلاااا

الراجل مسبش ف جهده جهد واصدر الاوامر 

بنصب المدافع ف القلعة وعلى جبل المقطم

وامر بتصويبها باتجاه الازهر والقاهرة

وطبعا مدافع فرنسا 

ولا مدافع المماليك المدفونة

والصناعة  مصرية سريعة خاطفة .. ؟!

الفرنساوى يكسب

 للأسف 

 قنابل الفرنسيس مبطلتش ضرب 

خدت ف وشها المآذن والقباب

كما ذكر الجبرتى نصاً

 "هبط القنبر الحارق على كل الربوع القديمة "

وبدأت حرب الشوارع ف كل مكان بين المصرى

والغازى المحتل وولعت الحرايق

ومحدش كان فاضى يطفيها 

بدأت الحريقة من خط الفوالة وكملت للرويعى

 وحارة النصارى

وشيوخ المساجد طلعوا ف اسطح المساجد والبيوت

 يدعوا الناس للقتال 

كانت ايام عصيبة

فاتت عشر ايام والفرنساوية محاصرين القاهرة

وبيضربوا بالمدافع بلا توقف

والحرايق شغالة محدش لاحق يطفيها

بيقولوا بولاق كانت كرة نار

واختفت منها احياء كاملة من الوجود

كان كبيرها اسمه الشيخ المحروقى 

(شوف الأسم سبحان الله) 

الراجل حاول يلحق أى حاجة وفشل

 الكل فشل

والجوع ملا الارصفة

والجثث مكنتش لاقية اللى يدفنها

والخراب عم ف كل مكان

واسلحة الفرنساوية تقش

وف وسط كل هذه الاهوال 

هوى كانت بتهرب

 وتختفى

روحتى فين يا نيلة ؟

 محدش يعرف احنا ف ايه ولا ف ايه

اهى غارت مطرح ما غارت

والمهم دلوقتى .. كيف انتهت هذه الثورة العارمة ؟؟

انتهت النهاية الزفت بتاعت كل مرة ثورة طبعا

دا سؤال ؟؟

المصريين انهكوا والفرنسيس توحشوا بحملة اعتقالات

ومرمطة وقضاء على اللى لسه فيه نفس يثور

وفرض كليبر غرامة كبيرة عشان يكسر ضهر الناس اكتر

اتقبض على الشيخ السادات

واتكسرت المتاريس واستبيحت الحارات من تانى

 ونفيسة بتضمد ف جراح المصابين 

وهوى لسه مختفية

رجع نيكولا منتصرا .. بيدور على هوى ملقهاش

 وعرف بلى جرالها

هيسكت

عيب فين الشرف والاخلاق والرجولة .. !!

الجدع قلب الدنيا عليها

الجبرتى بيقول ان نيكولا كانله شأن ف الجيش الفرنسى

وانه جمع المكارية عشان يشوف مين ركبت معاه

 توصل لواحد فيهم 

قاله انا وصلتها لحد الموسكى وبس

كان معاها جاريتها وشوية حاجات

ومحدش يعرف راحت فين

نيكولا قلب الموسكى عليها بيت بيت 

والجبرتى بيحكى ان كان فيه من اتباعه مصرى

 اسمه عبدالله

الاخ عبدالله بقى تفتق ذهنه عن انه يلبس لبس الحريم

 ويدخل الحرملك عشان يعرف يدور على هوى براحته

وكان بيسرق حاجات 

ويعمل افعال مشينة ..!

وف النهاية بيقولوا ان هوى ظهرت ورجعت لنيكولا

اللى النوبة دى هياخدها ويطلعوا القلعة

يقعدوا هناك
 ف مأمن عن العوام الويحشين الشريرين دول

ف الوقت اللى فيه مراد بك ف الصعيد زهقان

وبيفكر هيفضل لحد امتى بيحارب ف الفرنساوية

والأيد اللى متقدرش تقطعها بوسها 

والصلح خير يا مرمر

والتفاهم احسن من القعدة البطالة دى 

اللى من غير نهب وفلوس وسلطة وزى قلتها 

وراحت المراسيل وجت بين مراد بك وكليبر

واتفقا مبدئيا على ان مراد يحكم ف الصعيد

تحت شارة الجمهورية الفرنسية 

وتبيع ؟ 

ابيع يا باشا .. أبيع

وزاد الفرنساوية ف الظلم والغرامات 
عشان يربوا الشعب

ويخلوه ميفكرش يثور تانى

ف وسط الكآبة والوجع 

يظهر سليمان الحلبى زينة الشباب

 ف المشهد

ويدخل على كليبر يغزه ويريحه

ويريحنا من وش امه العكر و

القاهرة تولع من تانى ويتقبض ع الجدع

ويتحاكم ف 3 ايام !!

ويتقطع ايده ويتعدم ع الخازوق

ويتعمل لكليبر موكب جنائزى

يمشى فيه وفد من الاعيان والكبرات

والناس تنقهر وتموت كمدا ومتقدرش تنطق

ييجى الأخ مينو يستلم مكان كليبر

ويعلقوا الزينة بمناسبة عيد الصليب

ويضربوا صواريخ ف الازبكية

ويهيصوا ويرقصوا ولا كأن فيه حاجة

فالناس تنقهر اكتر

وبيقولوا النيل زاد اكتر عن المعتاد

والبيوت المطلة على الخليج المصرى كتير منها وقع

 يعنى موت وخراب ديار وقهر 

ويدخل رمضان ومحدش يحس بيه

والعيد يدخل وكأنه لابس طاقية اخفا

والناس ف هم ونكدا

وكان ناقصنا اخر حاجة بقى ..... الطاعون

 واللى لحسن الحظ لما فتك بكتيرين 

اختار من وسطهم مين ؟

ايوووووووه

المخفى المقندل العرة البائس المخسوف راس الكرنبة

المدعوق السفلة طفلة الحشرة .... مراد بك

ووصل الخبر لنفيسة البيضا

 طبعا محدش حكى عن رد فعلها

بس انا لو مكانها أفرقع 10 صناديق ازايز شاربنيا

واوزع لحمة وساندوتشات هامبورجر وشكولاتة تويكس

على روحه

الهى ما يرجع

والحقيقة الست استوعبت موته

 زى ما استوعبت موت اللى قبله وكان أغلى 

وكملت المسيرة ف نفس الاتجاه

 النجاة بروحها وبالمماليك ومساعدة الناس المحتاجينلها

قدر الممكن

 ومحاولة الرجوع لما كان ... لو ممكن

الانجليز فضلوا ف غلاستهم وبيحاصروا الشواطىء

لمنع المدد

والسلطان قال هيبعت جيش تانى

 الفرنساوية كانوا منهكين وخد الجديدة بقى

 قالك ايه

جنب محاولات بعض الجنود الفرنساوية للأنتحار

ونجاح بعضهم ف الهروب من الحياة المزعجة دى

 كان فيه مقاومة شعبية بتنفذ اغتيالات لضباط فرنسيين

زائد قرف العربان والزعار وشيوخ المنصر ليهم

القصد

الفرنساوية جابوا اخرهم

وبدأت مفاوضات على الرحيل مع الانجليز

وقعدوا يقسموا ف التورتة 

وخرجوا المساجين كنوع من الترضية

ومن ضمنهم الشيخ السادات

وبيقولوا ان قلعة الضاهر 

اللى كانت احدى القلاع اللى متمركز فيها الفرنساوية

كان عليها علم الجمهورية

على ما جه الفجر والناس قامت تصلى بتبص فوق

لقت علم العثمانلية مرفرف والعلم الفرنسى اختفى .. !

وكما قال المنسى قنديل

 " استعد الفرنساوية للرحيل
بعد 3 سنوات و21 يوم مريرة

واستعد العثمانلية للدخول

بعد 3 قرون مظلمة ... لا امل "

بس يا سيدى

وقعد عسكر الشرق يلموا ف كل اللى يقدروا عليه

عشان ياخدوه معاهم فرنسا

قوم ايييييه ؟

 بينما سرت الفرحة ف بيت نفيسة البيضا بهذا الخبر

والكل قعد يرقص ويغنى ويهلل 

وضرب نارلحد الصباح الباكر يا معلم 

 قصاد بيتها وف الشوارع 

عشان الغمة هتنزاح اخيراااا

كانت الأحزان هتقهر هوى

 اللى عرفت ان نيكولا راجع بلده 

ومش ناوى ياخدها معاه !

بيقولوا ان هوى راحت ورا الكتيبة اللى فيها نيكولا

وسافرت لحد رشيد

وبيقولوا انه اترجته ياخدها معاه

وبيقولوا انه رفض 

وبيقولوا اداها فلوس ومشى

وبيقولوا كمان انها خافت ترجع القاهرة

عشان جوزها لو رجع

 ياااااااااه توك ما افتكرتى يا قطة ان انتى متجوزة

 وليكى راجل وكدا .. كويس والله
فيكى الخير

محدش قال هيا عاشت ازاى بعد رحيل نيكولا

 لا عندها شغل ولا تملك الا اقل القليل

 ومعاها جاريتها اللى كانت ملك اسماعيل الكاشف 

ومحدش قال كمان 

ازاى اسماعيل الكاشف بعد البلاوى دى

 كان لسه عايش

ومحدش قال ازاى رجع ومحدش قال اهم حاجة 

وهو ازاى عرف يلاقى هوى بعد كل هذا ؟!!!!

بس بيقولوا انه عرف يبلفها ويضحك عليها

وياخدها بالهداوة واقنعها انه سامحها

ومش زعلان ومقدر الخ

وبيقولوا كمان انه اخدها على بيتهم ف الموسكى

وبعد خروج الفرنساوية بأيام

قرر الناس معاقبة كل البنات اللى مشيوا مع عسكر نابليون

وقرروا يقيموا عليهم الحد

من ضمنهم كانت زينب بنت الشيخ البكرى

نقيب الأشراف ف عهد الاحتلال 

حكيناها  زماااان القصة دى

وقولنا ازاى كانت احدى محظيات نابليون ف مصر

وانها عاشت معاه وابوها عارف وموافق

لكن بعد رحيل الحملة

 لقى جماعة دخلت بيته وواجهوه بالجريمة

عمل عيشة وام الخير وقال مكنتش اعرف

وانا متبرى منها !!!!

#ونعم_الرجولة_والابوة

اخدوها من قصاده

واعترفت انها غلطت فكسروا رقبتها

وبقى التعبير بيستخدم من يومها

لما تسمعوا تعبير " يا مقصوفة الرقبة "

تعرفوا ان الجملة دى اول من وصفت بيها

هيا المسكينة زينب بنت الـ 14 سنة

اللى استغلها ابوها للوصول للمنصب 

وبعدين طلع احقر من الحقارة ذاتها 

نرجع مرجوعنا

و ف هوجة قصف رقبة المتعاملات مع المحتل

 جت سيرة هوى

 اسماعيل الكاشف كرامته نقحت عليه

وبرستيجه وجعه وكدا 

راح القلعة فوراااا

كان حسين باشا قبطان اللى جاى من تركيا

بأسطول السلطان وموكل بأستباب الأمن

  اسماعيل الكاشف استاّذنه يقتل هوى لكن بنفسه وبأيده

حسين سمحله .. وقال ماشى 

رجع الكاشف ع الموسكى دخل على هوى

اللى كانت فاكرة انها رجعت لحياتها القديمة

والغلطة هتنمحى

وقامت عشان تستقبله 

مسكها وبمنتهى البرود 

لف ايده على رقبتها 

وخنقها

وخنق كمان جاريته اللى هربت

وعاشت معاها طول مغامرتها

بيقولوا جاريته كانت حامل

منعرفش بقى حصل ازاى وامتى 

بس الست انقتلت هيا كمان وشكرا

واستعد العثمانلية من جديد للقبض على السلطة

وحلب البقرة

والافترا الممنهج

وبعد شوية جه والى اسمه خورشيد باشا 

كان زى الباقيين .. غبى وطماع وكيس جوافة

نفيسة البيضا كانت قالت خلاص الفرنساوية مشيوا

وارتحنا وابتدت تحاول تساعد المماليك الباقيين يتعايشوا

وترجع بعض من المجد القديم 

انما على مييييين 

انسى يا ست 

كان زمان بقى وراح 

واللى زاد وغطى ان خورشيد راح طالعلها 

بتهمة حاجة زى قلب نظام الحكم كدا

وبعتلها رئيس الشرطة ياخدها

وقفت الست قصاد خورشيد وقعد يستجوبها 

وانتى عندك جارية مسكناها ومعاها رسالة

وبتتعاملى مع اعدائى وعاملة منشورات ضدى الخ

 نفيسة قالتله لو جاريتى ابقى انا المسئولة مش هيا

وفين المنشورات دى

الجبرتى بيقول ان خورشيد طلع ورقة من جيبه

ولما نفيسة جت تاخدها راح مدخلها تانى بسرعة
 #شغل عيال

نفوسة لقته عمل كدا
وبيقولهم نيللى نيللى راحت قايلهموله شيريهان شيريهان

وقالتله

 " طول ما عشت بمصر وقدرى معلوم عند الاكابر

واخلافهم والسلطان ورجال الدولة وحريمهم يعرفوننى

اكثر من معرفتى بك ولقد مرت بنا دولة الفرنسيس

فما رأيت منهم الا التكريم وكذلك محمد خسرو باشا

كان يعرفنى ويعرف قدرى ولم نر منه الا المعروف 

واما انت فلم يوافق فعلك فعل اهل دولتك ولا غيرهم ..."

وبس يا معلم

الراجل اتهزأ راح باعتها بيت السحيمى تحت التحفظ 

اصله استجرى يقولها وهوه انا عملت ايه ؟

قالتله بعتلى رئيس الشرطة يقبض عليا وكأنى مجرمة ؟

قالها انا بعته توقيرا ليكى وحفط لمقامك .. ! 

#اكليشيهات

قصره الست ردت بما يليق بيها فراح حابسها

ف بيت السحيمى

والجبرتى بيقول انها حاولت تهرب منه

والعوام اتجمعوا وهللوا عشان تخرجلهم

وف النهاية المشايخ اتدخلوا وطلعوها

وفضلت الست محل احترام الجميع

ومحدش بييجى جنبها عشان شعبيتها الجارفة دى

لحد ما ف يوم اغبر نزل علينا غراب نوحى 

اسمه محمدعلى

ومحمد على زى منتوا هارشين وصل للحكم

 ف ظروف نيلة ومغموسة بالمكر والخديعة

قوم ايه

الراجل بعد ما قعد واترستأ 

اتدور على كل اللى وصلوه للكرسى وخلص منه 

وأى حد كانله نفوذ شعبى زى عمر مكرم وغيره

كان بيقضى عليه

واللى معاه فلوس كان بيصادر فلوسه بالقتل او بغيره

 الست نفيسة بقى حصلها ايه ؟

ولا حاجة  جرى عليها اللى جرى على غيرها

محمد على صادر فلوسها وكل ما تملك

فيما عدا البيت اللى كانت ساكنة فيه

الست عاشت ف عوز وفقر

وبقت بدل ما تدى بتاخد الصدقات من اهل الخير

واللى شالولها جمايلها 

وفضلت عايشة ف هذا الضنك 
وحضرت مدبحة المماليك

اللى خلصت على اخر ذكر للمماليك والزمن 

اللى كانت بتتمنى رجوعه  

وعاشت وهيا طاعنة ف السن ومحطمة تقريبا

لحد سنة 1816 لما ربنا تولاها برحمته

واخدها بقى عشان متعشش ايام سودة اكتر من كدا

وتشوف خلقة محمد على صدفة 

 ولا تسمع سيرته كتير الا هى سيرة تغّم الحقيقة

وطبعا سى محمد بعد موتها 

اخد البيت اللى كانت ساكنة فيه

واداه لأحد موظفينه المقربين 

ونفيسة ماتت وسابتلنا سبيل لسه شايل اسمها

وبيحكى حكايتها 

سيرتها الحلوة 

وقولوا اتدفنت ... فين يا عيال ؟؟؟

بيقولوا انها اتدفنت ف الامام الشافعى

ف تربة على بك الكبير .. جوزها الأولانى

بينما مراد بك اتدفن ف سوهاج مطرح ما مات بالطاعون

 الله يحرقه ف جهنم انشالله 

وتوتة توتة .. انا خلصت حدوتة 
هوى التى هوت 

طولنا عليكم معلش 

بس فاضل كام ملحوظة وامشى

1)

 بادىء ذى بدء 
انا ممتنة اشد الامتناااان للطاعون

انه اخد مراد بك الراجل الداهية الواطى دا

لأنه ميستاهلش يموت ف معركة ضد المحتل

ويتعمل  بطل بعد كل هذه الخيانة

2)

انا كمان ممتنة للأخ سليمان الحلبى اللى قد يبدو

انه قتل كليبر لسبب خاص بيه

وهوه الظلم اللى وقع على اهله ف الشام

 لكن كتر خيره برضو ألف مرة

جت منه ومجتش من واحد من اهل البلد 

3)

للى بيسأل نفيسة البيضا 

واللى اشتهرت بنفيسة المرادية

وأم المماليك

 ايوه هيا اللى عملت دورها ليلى علوى

ف مسلسل نابليون والمحروسة .. صح

4)

غصب عنى لما قريت عن هوى

 مقدرتش ابعد عن ذهنى نفيسة البيضا

رغم ان كل واحدة شخصيتها اكيد مختلفة

ف النشأة والطبع 

بس ف النهاية برضو

فيه حد ادنى للضعف يا جماعة

وفيه حد ادنى للسقوط

وحد ادنى لأى حاجة

هوى بصت تحت رجلها وبس

هربت من واقع اليم لوهم اكثر ألما فخسرت كل شىء

وواضح انها محاولتش تقرب ولا تندمج ف المجتمع

زى نفيسة اللى نزلت للناس رغم موقعها ف طبقة عالية

لكن الحكمة التى يثبتها الزمن

ان دايما المتحصن بالناس وقلبه معاهم مهما خسر 

..... كسبان

ولو بعد حين 

5) احنا حلوين والله

بس لما بيبعد كل المغرضين

زى العثمانلية اللى بينهبوا باسم الدين

وزى الفرنساوية والانجليز اللى برضو بينهبوا

باسم المدنية والحضارة

وللأسف قعدنا نقاوم ونحارب

ونقرف ف الفرنسيس لحد ما مشيوا

عشان نسلمها تانى للتراكوة

ولما ثرنا ع التراكوة اديناها لمحمد على
 الاسخم وأضل  !

والظاهر البلد دى منكوبة ومعمولها عمل

كل ما نيجى نكحلها تتعمى اكتر 

 ثرنا مش نافع ... مثرناش مش نافع

وف الآخر بيمسكها اللى ميستاهلوشى 

حاجة حِزن الحِزن 

وتسكت شهرزاد عن الكلام المباح 

تصبحوا على ألف خير

---------------------------------

tarek momen ‏@tarekmomen 

 الراجل مش عليه ملامة.. مشي علي الفتوي بتاعة برهامي

 تويتر افضل جدا ‏@elkarmoooty 

كان عندي معتقد ان محمد علي عبقري وبني مصر الحديثه

 طلع فاسكونيا 

بس ده ميمنعش انه عمل حاجات صح كتير

 Mahmoud Abdou ‏@m7moud_3abdou 

 لسة كنت هاقول إن أهو فيه رجالة باعت نفسها 

للفرنساوييناتاري الراجل ماكدبش خبر و لبس حرمة

الحمد لله رجالتنا بخير  :D

 Mahmoud Abdou ‏@m7moud_3abdou 

 ده لو كانوا بيقولوا تاحيا مااسرر

ماكانوش مشيوا لحد دلوقتى  :D

 تويتر افضل جدا ‏@elkarmoooty  

هي نفيسه ديه الي قامت بدورها ليلي علوي؟؟

 سعدية سليم ‏@sa3deaselim  

 الحلبي قتل كليبر لسبب شخصي

tarek momen ‏@tarekmomen   

 يا سلام بقي لو نردها له 

و يطلع واد مصري يطخ بشار الاسد

Mahmoud Taha ‏@eng_M_taha   

ممكن لينك لقصة زينب بنت الشيخ البكرى ؟!!

وفين غادة رشيد اللى تزوجت مينو " سارى عسكر رقم 3 "

ولا الرواية مش حقيقية ؟!!

إحـــكى يا شهـــرزاد‏@ro7albmama2

@eng_M_taha لأ غادة رشيد حقيقة يا محمد

وهبقى احكيها ف مرة ان شاء الله 

دى بتاعت زينب البكرى