كاميليا : قمر 14 الكوستيليتة اللوز

النهاردة حكاية عن كاميليا .. الغزالون يهبلون

  وشوية عصف ذهنى شهرزادى عن تفاصيل حياتها

 القصيرة ... المريرة ... المثيرة

الحكاية من كتاب

 يهود مصر : بارونات وبؤساء عرفة عبده على

وأستاذ عرفة كما كنا نناديه

 لما كنت شغالة معاه ف مكان واحد

  من ييجى حاجة وعشرين سنة كدا 

متخصص ف موضوع اليهود وتحديدا يهود مصر

ورغم علاقتى بيه السطحية وقتها

 الا انه شخصية مهذبة ومجتهدة 

ودا بيخلينى لما أقراله أركز معاه قوى

 لكن ..

 وعشر خطوط تحت لكن دى

عشان قاعدة رقم واحد ف أى بحث ودعبسة ف التاريخ

 انك مهما كنت تبجل كاتب معين او مؤرخ ما

 متمضيش شيك على بياض وتلغى تشغيل دماغك 

والعصف الذهنى يفضل حاضر

 وهذا ما حدث ف الـ 3 صفحات اللى كتبهم أستاذ عرفة 

عن كاميليا اللى صنفت كفنانة يهودية مع انها مش كدا

وهوه ذكر أصل الحكاية دى من طقطق لسلامو عليكم 

ومصدره الاساسى ف الموضوع دا بكل تفاصيله 

كان حسن إمام عمر اللى كان مقرب لها ف آخر فترة ف حياتها

 وكان معاها ف المطار قبل ما تركب الطيارة 

بتاعتها بشوية صغننة 

والراجل قال حاجات كتير رهيبة الحقيقة

 وبيقول ان كاميليا بريئة من كل الاتهامات 

والشائعات اللى صاحبتها طول فترة وجودها
 ف الوسط الفنى 

اللى ما زادش عن أربع سنين وكسور ! 

وان القصص المثيرة عن علاقتها بالملك والانجليز 

واليهود وحرب فلسطين والكل هذا الهراء .. محصلش 

وانما وخد دى بقى عشان جديدة

 ان مصطفى أمين هوه مصدر كل هذا

وقيل نصا : 

" وقد اختلق شائعة يهوديتها وروج لها الكاتب الصحفى

 "مصطفى امين عندما رفضت الذهاب إليه 

فى موعد حدده لها بالجارسونيرة الخاصة به 

والكارت الذى حدد عليه ذلك الموعد

 ما زال محتفظا به احد اصدقائها المقربين 

وهو صحفى وإعلامى معروف "

 والعصف الشهروزى هنا يشتغل
 ...

هوه أنا مبحبش مصطفى امين ف المجمل يعنى

 ولا اصدقه ف تلتربع ما يقول

 وصحيح هوه كان مقطع السمكة وديلها

وصحيح غلاوى ومتهدش الا لما كبر ف السن 

 وصحيح ألف حاجة 

لكن هيا اسمها كان موضح جدا انها يهودية 

 بعدين هينعرف انها مسيحية 

 لكن كان الوقت اتاخر 

فليه مطلعتش بنفسها تنفى يهوديتها

خصوصا انها اتبرعت للمجهود الحربى 

سنة  1948

والدولة كرمتها  !

ودا يقودنا إلى أصلها وفصلها 

نرجع للجدة ... اللى كانت إيطالية هاجرت لمصر

 لما كانت هيا أرض الاحلام 

واستقرت ف اسكندرية سنة 1881 م 

وبيقولوا انها اتجوزت وكيل بوستة العطارين وقتها 

لفترة قصيرة واختلفوا واتطلقت ثم 

"اقترنت بالفريق أحمد زكى باشا رئيس الديوان الخديوى " 

ولنا هنا وقفة

والعصف الشهرزوى يرجع تانى

الديوان الخديوى رئيسه كان أحمد باشا شفيق 

وقعد كدا فترة من الزمن طويلة 

فأكيد مش قصدها هوه طبعا 

ثم تحولت مصر إلى سلطنة ثم مملكة

 وبقى اسمه الديوان الملكى ...

 أحمد زكى مين اللى تقصده ؟!!!

ف الحقبة الزمنية اللى بنتكلم عليها دى 

مكنش فيه ف الديوان الخديوى
الا احمد زكى باشا واحد بس 

كان كاتم السر وله نشاط عظيم 

ومؤلفات ف اللغة واهتمام بالتراث وخلافه 

لقبوه بشيخ العروبة 

واذا كانت تقصد هذا الشخص 

فلنا هنا وقفة تانية ولا تالتة !

حسب كلام الكتاب والمصدر جدة كاميليا

 ايطالية مهاجرة الى الاسكندرية 

اللى اتجوزت من كاتم سر الديوان الملكى خديوى

 وكان راجل واسع النفوذ والثراء

 كانت مخلفة من جوازتها الأولى من وكيل البوستة

 بنت اسمها أولجا

 أولجا دى هتتربى ف كنف هذا الرجل الثرى الشهير 

ثم تملك بنسيون بشارع سعد زغلول

والست أولجا لويس أبانور
 هتتعرف على واحد

 ناس تقول انه كان مهندس ف شركة قنال السويس 

وناس بتقول انه كان تاجر أقطان ايطالى

 ودا المرجح 

القصد الست بقت حامل 

وبيقولوا الموكوس خسر فلوسه ف البورصة

 فركب المالح هربا من الديون ومن كل حاجة 

وترك المسكينة وحيدة لمصيرها المجهول

وبيقولوا

 "فلما وضعت نسبتها فى شهادة ميلادها

 إلى يهودى يقطن بنفس البنسيون"

 عصف شهروزى تانى ...

 ليه مكتبتهاش بإسم ابوها الحقيقى 

 وعلى حد علمى زمان شهادات الميلاد 

كان أى حد يروح يطلعها عادى مش لازم الاب

 ولا الاجانب كان لهم وضع مختلف ؟

 يمكن ؟؟

نهايته حضرت الجميلة إلى الحياة التعيسة

 وهيسموها بإسم نزيل البنسيون الشهم 

 وهتبقى 

"ليليان ليفى كوهين"

ومتقوليش يا ليفى

والام عمدت ليليان فى كنيسة القديس يوسف بسموحة 

عشان تبقى كاثوليك زى أمها وجدتها 

ودخلتها مدرسة الراهبات ف شارع السبع بنات 

 ثم ألحقتها فى مرحلة لاحقة بـ 

  english college  

ولنا هنا وقفة برضو 

فيه ناس بتقول ان كاميليا مواليد 13 ديسمبر 1929 

وناس تانية استصعبت الرقم دا 

وقالت لأ دى مواليد 1919 

والحقيقة انه حتى لو كانت فيه محاولات لأخفاء العمر 

زى ما كان بيحصل زمان  

فاللى انكتب على لوحة قبرها 

هوه الرقم اللى لازم ناخد بيه

 وهو ما يؤكد انها مواليد .. 1929

وكبرت ليليان واحلوت 

وخراط البنات القمرات خرطها 

واتنقلت ما بين اسكدنرية وقبرص وايطاليا 

وكان عندها هوس بالشغل ف السينما

دخولها لعالم السينما حصل سنة 

1946 لما قابلت الفنانة الهام حسين

الست الهام كانت اولى زوجات أنور وجدى بالمناسبة 

المهم الست وعدتها تقدمها ف اقرب فرصة 

لأى حد ممكن يدخلها المجال

ودا هيحصل ف نفس السنة لما ييجى أحمد سالم

 وفطين عبدالوهاب وكامل التلمسانى

 يقعدوا ف فندق وندسور ف انتظار العرض الأول لفيلم

 "الماضى المجهول"

وبيقولوا : 

" احمد سالم والذى لم يكد يرى كاميليا حتى بهره جمالها

 ويقرر أن يتحمل مسئولية تقديمها إلى جمهور السينما 

كما قرر أن يستبدل اسمها من ليليان إلى كاميليا "

 كان صياد للبنات الحلوة ف المجمل

وجابلها محمد توفيق يعلمها تتكلم عربى عِدل

  بدل العربى المكسر بتاعها أبو لكنة اجنبى خالص 

ويحسنلها مخارج الحروف شوية 

ودفع سالم فلوس ف تدريبات ع الاداء واللبس الخ 

محمد توفيق كاد يقع ف غرامها وانسحب بعد مدة قصيرة 

مش هوه لوحده 

كل حد تقريبا شافها انبهر 

صراحة البت كانت على رأى يوسف وهبى 

 زى الكوستيلتة اللوز

وجبنا ف سيرة القط هييجى ينط اهو 

يوسف وهبى شاف كاميليا 

وانتهز فرصة انشغال احمد سالم
ف امور شخصية ومالية 

وطلب منه ياخد الكوستليتة ف فيلم من افلامه

 ودفع الـ 3 الاف مصاريف تجهيز صاروخ السينما الصاعد

وعملت فيلم القناع الاحمرأول أفلامها 

 ثم انطلق قطار النجومية من المحطة 

المؤرخ السينمائى حسن امام عمر

واللى كان جار لكاميليا فى عمارة الإيموبيليا

 لما كانت ساكنة ف الدور التاسع شقة 929 

بيقول من واقع قربه ليها 

ان كل ما ذكر عن علاقاتها المتعددة بالرجال محض افتراء 

وبيقول حاجة عجيبة جدا كمان ف السياق دا

بيقول 

 "كاميليا فى واقع حياتها كانت تعيش مأساة

 إثر واقعة اغتصابها من خمسة جنود استراليين 

تناوبوا الاعتداء عليها فأصابوها بحالة نزيف مزمن 

فلم تعد قادرة على مضاجعة اى رجل

 ولكن السر لم يكن يعلم به

 إلا قلة تعد على اصابع اليد الواحدة 

.. واستلزم هذا النزيف المزمن إجراء عملية تغيير دم

 كل ستة شهور ورحلات علاج إلى لندن وأمريكا 

ولدى روشتات العلاج الخاصة بها

 وأسماء الأطباء المعالجين " 

وافتكرت فجأة مسلسل البحار مندى !

اما عن علاقتها بالملك فاروق :

 "والأغرب انها لم تلتق بالملك فاروق سوى ثمان دقائق " 

كان عيد ميلاد حسن امام عمر

 واقترحت كاميليا يقضوا السهرة ف مكان مفتوح 

وعلى ضهر مركب كان 

شكوكو حضر الأمسية دى وركبوا مركب

 من عند كوبرى بديعة

ف اثناء الفسحة كانت بتفرجهم على جواب جالها

 من ثرى هندى اتعرفت عليه ف اسكندرية

 وكان بيحبها بجنون وعرض عليها يتجوزوا

 ويسافروا سويسرا تتمم علاجها 

وفجأة ظهر مركب البوليس النهرى 

وطلع منه بوللى حلاق الملك ومهندس سهراته الخاصة 

وطلب ان كاميليا ترافقه لرؤية مولانا الملك الآن

وبيقولك بقى

 "وكان اللقاء الذى استمر لمدة ثمان دقائق فحسب

 عرف خلالها الملك حقيقة مأساتها 

وسرعان ما عادت إلى صديقيها" 

ودى رواية الصديق المخلص

 نيجى بقى للعاشق المخلص 

 الأوسطى الاونكل عزت ... دنجوان السينما المصرية

رشدى اباظة بقى 

بيقول حاجة تانية خاااااالص ف حوار لاحدى المجلات

  ان كاميليا كانت عشيقة الملك فعلا ورشدى خطفها منه 

والملك هدده كذا مرة واباظة كان عارف انه الغلطان

 لأنه اللى اخدها منها

 بس دا كان ردا على ترحيل فاروق لمغنية فرنسية 

كانت حب رشدى أباظة الاول

 افلام كدا مش وقتها نلاغى فيها بعدييين

المذهل بقى ان رشدى ذكر 

ان الملك كان ناوى يتجوز كاميليا فعلا 

وانها راحت غيرت ديانتها رسميا لهذا السبب 

لأنها كانت حامل ف الشهر السادس 

وفاروق تصور انها ممكن تجيبله ولد يكون ولى العهد

 لكنها سِقطت لما وقعت من فوق حصان 

والملك عزف عنها بعد الحكاية دى فاتعرفت برشدى

العصف الشهرزوى تانى
 ... 

الست كانت حامل ف الشهر السادس
 وهتركب حصان .. ؟ 

ازاى معلش ؟
!!

 ثم ان كاميليا ف خلال 4 سنين اشتغلتهم ف السينما 

عملت ييجى 20 فيلم 

وكلنا عارفين ان زمان التقنيات كانت اصعب من دلوقتى 

والمشهد والواحد فيه عذاب ووقت 

كانت لاقية وقت تهرش اصلا ؟

ولقت وقت تكون حامل
وف 6 شهور كمان من غير حد ما يكشف دا

ازاى ؟
!!! 

رشدى كان ف فترة مرضه الأخيرة

 وغالبا الحوار دا كان للفرقعة مش اكتر

بس هوه الأكيد
انها كانت محط انظارالأثرياء والمحبين

 حتى من البسطاء 

لدرجة ان فيه واحد اسمه صلاح الدين 

اختلس من شغله الآفات عشان ينتجلها فيلم

وعشان بس يكون معاها ويقربلها

 .. كان مهووس بيها

 واتقبض عليه قبل العرض الأول للفيلم !

وزى ما اسمها اقترن بالملك فاروق و حرب 1948 

والمخابرات الاسرائيلية ونقل المعلومات الهامة وخلافه

 اقترن كمان بالأثرياء زى السيد اللوزى 

صاحب مصانع الحرير الشهير وقتها 

واللى يقال انه كان بيفتح لها باب الدخول للوسط الراقى

 وتكوين العلاقات 

ثم اقترن اسمها برشدى أباظة ف النهايات

واللى بيقول ان كان بينهم مشروع زواج 

تم تأجيله لحين رجوعها من رحلة سويسرا

 اللى كانت رايحة فيها تتعالج

وكلنا عارفين اللى حصل بعدها

على مطار فاروق الأول راحت كاميليا 

مع حسن إمام عمر يوصلها 

وبيقولوا ملقوش حجز 

هوه الناس وقتها كانت بتحجز وهيا واقفة زى القطر

 ولا ايه ؟!!

نهايته

لقوا ف وشهم أنيس منصور الصحفى 

وكان معاه تذكرة ... شوية كلام والراجل استذوق 

وادى التذكرة لكاميليا 

وركبت الرحلة رقم 903 

على متن الطائرة التابعة لخطوط الـ

 T.W.A

 والأتية من الهند ثم ترانزيت ف مصر متجهة إلى سويسرا 

واحنا النهاردة الخميس 31 أغسطس 1950

والباقى معروف 

 انقطع الاتصال بالطيار

 ساعات من الصمت المطبق 

 ثم العثور على أشلاء الطيارة محترقة

 بالقرب من قرية اسمها "دست" بمحافظة البحيرة

 والركاب اللى فوق الخمسين نفر كلهم 

لم ينج أحد 

وفورا الدنيا اتقلبت

والطيارة كان على متنها شخصيات مهمة والله

 عالم رياضيات هندى كبير 

وعالم تانى أمريكى 

ومدير شركة بترول الكويت 

ومهراجا هندى عجزت الاقى صورته 

الصراحة كل دول توارى ذكرهم جنب سيرة كاميليا

 اللى ذكروها ف الخبر بـ كوكب السينما 

فيه ناس نشرت صورة جثة كاميليا 

بس مرضتش احطها

الحقيقة انهم نشروا الصورة بمنتهى القسوة  

وان ملامحها مكنتش واضحة قوى 

لكن كنت أقل الجثث تفحما 

لأن من الواضح انها حاولت تهرب من الطيارة

 ومعرفتش

 لكن عرفوها من فردة جزمتها اللى كان لونها اخضر

 لما شافوها ف المطار قبل ما تركب

 وميزوها بيقولوا دى اخر صورة ليها 

وملحوظة عبيطة 

واقفة بتتصور وصورة فاروق وراها !

وبيقولوا برضو ان صحفى من طرف
محمد حسنين هيكل كان ف المطار وقتها 

واخد منها حوار سريع

وكانت اخر كلماتها للمصورين

 خلاص يعنى هيا الدنيا هتطير 

 انتى اللى هتطيرى يا بنتى

العمر بقى 

 ونقلوا جثتها مع باقى الركاب المتفحمين 

وفى كنيسة قلب يسوع المقدس الايطالية

 اللى ف شارع عبدالخالق ثروت أقيمت صلاة القداس 

على جثمانها وسط حزن وذهول الجميع

طبعا طلعت شائعات وتهويلات 

والطيارة وقعت بفعل فاعل والهجص دا كله

 دا تقرير عن اسباب سقوط الطيارة 

اللى غاوى يقرى ف الروقان 

حادثة كأى حادث بعيب فنى فقط لا غير ف المحركات https://archive.org/stream/Cab-aar1950-08-31-twa-903/Cab-aar1950-08-31-twa-903_djvu.txt …

وبعدييييين هيتعمل فيلم عن قصة حياتها

 حافية على جسر الذهب يتناول سيرتها بالأسم

 وكتير من التفاصيل مع بعض البهارات 

والتغيير ف النهاية

واللى كان اسمها على الأفيشات 

حولتها الأقدار إلى قصة

كاميليا كانت ف طريقها

 لاقتحام السينما العالمية 

 وصورت فعلا فيلم

بيقولوا ماتت فيه برضو ... !

وانا خلصت الحدوتة ويتبقى الملاحظات

 عن قمر 14 السينما

(1)

 اللى اختلفوا ف عمرها
لأن شكلها يدى اكتر من 21 سنة فعلا

 فمكتوب هنا على بلاطة المدفن الرقم

 ومينفعش نكذبه على اى حال

والحقيقة هيا ملامحها لو مسحتوا المكياج الكتير

 وتسريحة الشعر المش عارفة ايه 

والفستان اللى ابصر ايه 

هتلاقوا ان ملامحها ملامح بنت ف العشرين 

بس حلوة بزيادة

(3) 

ناس كتير بتقول على هند رستم انها مارلين مونرو الشرق 

عشان طريقتها ف اللبس والأغراء وكدا 

الحقيقة انا مختلفة معاهم جدا

الحقيقة ان كاميليا هى الاقربلها

 ف بساطة الموهبة مع الجمال الصارخ 

وعدد السنين القليل والموت
بمأساة ف عز الشباب والشهرة 

الاتنين شبه بعض اكتر

هند حاجة تانية

(4) 

بمناسبة ذكر أحمد سالم وأسمهان وكاميليا معاهم

 ضمن الناس اللى ماتت ف سن صغيرة موت درامى 

لما تبص لحياتهم
هتلاقيهم عملوا حاجات كتير ف وقت قصير

 وكأنهم عارفين انهم مش قاعدين 

فبيكونوا نسمة لطيفة هبت وراحت 

وتفضل حكايتهم زى ما قال فؤاد حجاج

 سيرة عاشتلنا أكتر صاحبها ما عاش

(5)

وبمناسبة السيرة 

هذه الجميلة التعيسة اللى كان بنات وستات 

كتيييير يحسدوها على جمالها الصارخ

وشهرتها ولبسها وعلاقاتها الخ 

فى زمن قصير قوى شافت حاجات كتير

وأى كان الحقيقة فين 

يكفى أخر لحظات عاشتها والفزع والهلع 

اللى ربنا ما يوريه لحد
 ... 

بجد 

(6)

 بمناسبة رشدى اباظة اللى لما سألوه 

خفت من الملك فاروق 

فرد لأ بس انا خطفت منه حبيبته وتصرفه كان منطقى 

ودى خناقة ما بين شابين !

 الحقيقة لما ببص على صورة فاروق سنة 1951 

واقارنها بسنة ميلاده 1920 ازعل قوى

 دا منظر واحد ف الـ 31 من عمره !

وطالما جبنا سيرة رشدى

 اللى تقع ف غرامه كل تلك النساء الجميلات وغيرهن 

يستحق يغير منه الملك 

ويجيب ناس يغيروا كمان

(7)

 أنيس منصور كتب مقالة عن كاميليا بعنوان 

"ماتت كى احيا انا "

وكان بيلحق يسف على روحه قبل ما حد تانى يسف

 وبعيدا عن ان حقيقة ان لكل اجل كتاب ودا عمرها 

فياريته كان اتعظ من الحكاية دى 

وماعششى بقية حياته يرازى ف الناس الكويسة 

معلش ومبحبوش وبينى وبينه مشاكل

(7)

 واخيرا حلو قوى إسم ليليان .. فيه مزيكا

 ولطيف أكتر من كاميليا ألف مرة 

متفهمة انهم غيروه لأسباب فنية بحتة

 لكن هوه ف النهاية اسم جميل 

وهو واحد من الاسباب العديدة اللى بتخلينى احب 

الست دى

  @liliandaoud

خلاص خلصنا 

 ♥حكاية الكوستيليتة اللوز

وقمر 14 السينما المصرية
اللى لسه مجاش وغالبا مش هييجى ... ف جمالها  

---------------------------

اسلام صالحين‏ @EslamSalheen 

Replying to @ro7albmama

الغريب بأه ان لقب الكوستليتة اللوز كان من نصيب عبد المنعم ابراهيم

1 reply1 retweet2 likes

2:20

مونانيزا 👩‍🎨 🎨 @beram2011

مقطع من فيلم Cairo Road للممثلة كاميـليا و إيريك بورتمان وللمخرج ديفيد ماكدونالد 1950 الفيلم جريمة .. مقاطع وأفلام نادرة

3 replies15 retweets25 likes

-----------------------------------------