نبتدى بس الاول الحدوتة الليلة دى
جايز ناس كتير تعرفها
بس هقولها عشان انسانة غالية جدااااا عليا سألتنى ..
فكان لازم أحكى عشان خاطر عيونها
والحكاية النهاردة حكاية مكان ...
مفيش أشهر منه
قصر البارون
ومصر الجديدة اللى اتبنت على حس صاحب القصر ...
بس لازم قبل ما نحكى عن القصر ...
وعن مصر الجديدة
نحكى الاول عن مصر الجديدة
اللى اتولت على إيد الخديوى اسماعيل
وبقت باريس الشرق ..
واحلى
مصر ف عهد اسماعيل
حصلها طفرة عمرانية وحضارية هايلة
خلتها بقت قبلة لكل الطامحين ف مستقبل كبير
خصوصا مالى واقتصادى
وشافوها أرض الفرص والاحلام !!
واغلب الحكايات اللى بحكيها هنا
عن اجانب وعرب جم مصر وعملوا مشاريع و تاريخ
هتلاقيهم جم ف فترة اسماعيل وما بعدها
من كتر م البلد ما كانت مغناطيس
والمغناطيس الجاذب دا بالنسبة لصاحب القصر
اشتدت قوته بعد افتتاح قناة السويس ...
بسنوات طوال لما بقت السويس والقاهرة بينهم مصالح كتيرة
بعد افتتاح القناة بقى الطريق للسويس عليه الطلب
وفيه سفر وترحال وبضايع
وصحراء العباسية مبقتش خرابة زى الاول
ومن هنا جه صاحبنا البارون
والبارون إدوارد امبان كان مهندس
وبيزنس مان على أصوله
كان ماسك خط ترام باريس
و الظاهر عمل شغل حلو فخد لقب البارون مكافأة
وبعدها عينه زاغت نواحينا
واتجهت لـ مصر
سمع عن ان الحكومة المصرية
عاوزة تعمل خط ترام المطرية فقدم عرض
والمنافسين قلشوه
فقرر ينزل القاهرة عشان يكسب التحدى ...
بس بشكل تانى
البارون كان مشهور بالسفر والترحال
زار الهند وبلاد كتير لكن كانت اول مرة يزور مصر
ويبدو فيما يبدو انه انبهر بيها
اول ما رجله نزلت أرضها
ويبدو ان السبوبة اللى كان جاى عشان يعملها
هتتحول بعد شوية لغرام ووله ف حب البلد دى
لدرجة انه يقرر يندفن فيها
وسمعنى سلام مشربتش من نيلها
والراجل اول ما حط رجله ف المحروسة ...
لقى ترام المطرية طار من ايده نوهائى
فراح عامل جولة ف القاهرة وضواحيها
وقرر ينزل بتقله ف حتة تانية
العباسية من بعد موت عباس حلمى الأول اللى انشئها
وهيا اتهجرت
لكن الانتعاش اللى عمله اسماعيل
خلاها ترجع تانى يبقالها وضعها
ورمى البارون بياضه
بعقلية البيزنس ...
دورله على شريك مصرى او شبه مصرى
يساعده يدخل ف زوارق الحكومة زى باقى المنافسين
عشان المرة دى متطرش منه الصفقة
وقد كان
فاكرين نوبار باشا اول رئيس وزرا لمصر ..؟
أهو الراجل مات وساب ابنه بوغوص
اللى مسك سكة حديد مصر ف عهد عباس حلمى التانى
و نوبار كان غاوى سلطة ومناصب وحركات
انما بوغوص أو نوبار الابن
اللى ف الصورة فوق دا ...
لأ
الولا بقى كان زى عيلاء مبارك كدا
عينه وعبادته الفلوس
صديق مشترك للجوز ..
لم البارون امبان على بوغوص نوبار
وقرروا يعملوا شركة لأعمار رمال العباسية
وقدموا عرض للحكومة بانشاء ترام بكذا خط
وكدا
العرض كان بحق انتفاع لمدة 70 سنة بحااااالهم
واشترى البارون و بوغوص اكتر من 5 الاف فدان
ف الصحرا بجنيه واحد الفدان
ودا كان سنة 1905
المشروع كان ف البداية يبدو مبشرا
والحكومة قالت دا راجل مجنون جاى يبنى ف الصحرا
وعادى احنا الكسبانين
بس بعد شوية حصل حاجة غريبة
ولعت الدنيا
الأخ بوغوص بعد ما مضوا العقد مع الحكومة
راح مفلسع
وخرج برا الشركة بعد ما عملوا أسهم للشركة
والناس اكتتبت فيها اجانب ومصريين وهلما !!
وفجأة الرأى العام خصوصا المساهمين الغلابة
فجروا الموقف
وقالوا احنا شاركنا عشان ابن نوبار اللى نعرف ابوه
كان موجود
انما مين امبان دا .. ؟!
زائد ان الاسهم غطت تمنها ييجى 90 مرة
والبارون عمل حاجة كدا منيش فهماها قوى
بس فيما معناه انه فرم المساهمين الصغار
لصالح المساهمين الكبار
وفجأة المصريين لقوا الاجانب
هما اللى ليهم حقوق واسهم اكبر .. وشغلانة كدا
وطبعا اشتكوا
قوم الحكومة انتبهت ان الراجل دا هيلم عليهم الدنيا !!
راحوا عاملين زى حكومتنا الغراااء كدا
لما عملت مع الاخ الوليد بن طلااال
لما عملت معاه توفيق أوضاع
او بالادق تلفيق أوضاع
عشان يخرسوا الناس
الحكومة المصرية انذاك عملت ايه ؟
ندهت سى امبان
وقالتله نعيد الشروط من تانى
أصل الحربية مش موافقة ع المشروع آل
عشان دى حدود القاهرة الشرقية
وطبق الأصل م اللى حصل مع الوليد وغيره
وزى دلوقتى ف حوار قناة السويس
اتفقوا ان الحكومة تستفيد وهوه يستفيد
وبعد 70 سنة يبقى يحلها الحلال
ويكون مات الحمار .. !
وعشان المنظر
الزموا البارون امبان يبنى كام خط ترام
و كل ما حولهم من مدينة سكنية متكاملة
يعنى يبنى البيوت والمستشفيات والمدارس
ويرصف الطرق وعواميد الكهربا
وميت ألف حاجة كدا تنعمل
لدرجة انهم حطوا ف العقد شرط
انه يعمل عربية ملوكى مخصوص للخديوى يركبها
تكون مميزة عن أى عربية ف الترام دا ... !!
وكتبوا تفاصيل كتير متعلقة بعربية الستات
والاطفال ميدفعوش ومعرفش الكراسى شكلها ايه
وكل حاجة كل حاجة
والراجل وافق
وقال حاضر
بس مش ببلاش!!
لأن العقد القديم كان منصوص فيه
انه هيشترى حوالى 5952 فدان بجنيه الفدان ...
اما الأتفاق الجديد فكان نفس المساحة
ومساحة قدها بالضبط ......... يعنى الضعف !
وبنفس المبلغ .. الفدان بجنيه
بس الجتة الجديدة دى كان هوه حر فيها بقى ...
يعمل ما بداله ويبيعها براحته
والحكومة ملهاش دعوة بيه !!
#شوف_إزاى
طبعا الراجل مضى
وهوه كسبان كسبان ... كسبنة السنين يعنى
وبوغوص نوبار اللى كان مجرد منظر وبارفان
أخد حسنته واتكل على الله
والحكومة وتراضت
وابتدى البارون امبان بقى ف مشروعه الاكبر
وهوه بناء مدينة متكاملة عشان تكون هيليوبليس الجديدة
مطرح مدينة اون القديمة من أيام الفراعنة !
وبمساعدة صديقه إرنست جسبار
اتعملت رسومات المدينة الجديدة
اللى اساسها كان جناين اكتر وإنشاءات أقل
وف سنة 1907
بدأ الشغل على قدم وساق
فكرة البارون كانت مجنونة اصلا
لأن المطرح كان بعيد عن قلب البلد و مين هيروح هناك ؟؟
بس الحقيقة انه كان راجل شاطر
و فكرته جذبت الكثيرين
خصوصا الاجانب ..
اللى كانوا عاوزين مكان على طراز بيفكرهم ببلادهم
وفيه خصوصية وحماية شوية ومستوى خدمى معين
حاجة كدا زى مدينتى والرحاب
والمدن الحالية ما بتحقق هدف لسكانها
#أظن_ذلك
المهم ... البارون البلجيكى الأصل بنى مصر الجديدة
على طراز اوروبى فريد
جمع بين اكتر من شكل
وعلى عكس المتوقع ...
ابتدى الناس تشترى ف الحى الجديد دا
اللى كان آخر الدنيا آخر الدنيا فعلا
والبارون جنب اللى دفعه بدأ يكسب مكاسب خرافية ... !
ويقال انه انشكح قوى وحب مصر قوى
فقرر بأرباحه دى يبنى لنفسه قصر
على طراز ألف ليلة وليلة كدا
ومن هنا ... نبدأ حكاية قصر البارون
:)
الراجل طبعا كانت الأرض كلها بتاعته
قوم اختار حتة
وقرر يبنى لنفسه فيها قصر على الطراز الهندى
اشمعنى ؟
بيتقال انه مرة ف زيارة من زيارته للهند
تعب قوى وكان على وشك يموت
والهنادوة عالجوه بطرقهم الشعبية
فلما خف قرر يكرمهم
وجاتله الفرصة دى لما بقى عنده مدينة كاملة تحت امره
و شاف تصميم للقصر دا
من مهندس ف باريس راح باعتله وتعاقد معاه
يبنى قصر وكنيسة وغيرهم
المهندس المعماري الفرنسي دا
كان اسمه ألكسندر مارسيل
ويقال انه قعد يبنى ف التحفة المعمارية دى 5 سنين
لحد ما خلصت
و البارون امبان كان بيتباهى بيها
وقرر يعمل حفلة
وعزم السلطان حسين كامل ..
بذات شخصيته عشان يحضر الحفلة
وحسين جه من هنا وركبه ألف عفريت من هنا
قولولى ليه يا فطمطم ؟
أصله راجل متربى ومتعود ع القصور
وكان عادى يشوف قصر مبهرج شوية وبتاع
بس لما طلع البرج بتاع القصر
وشاف مصركلها قصاده ..
اتهبل
واللى زاد وغطى انه لقى البارون بيقوله
وبنتهى البساطة القصر يا مولانا قاعدته على "رومان بلى "
وممكن دلوقتى أخليه يلف بينا
واحنا ف مكاننا !!
- ليه يا حيلتها ؟
- كدا عشان انا راجل غريب
ومهروش وغاوى اعمل حاجات معملهاش حد غيرى
:)))
(دا حوار تخيلى ف دماغى أنا )
لأ بجد .. البارون تباهى بتحفته وعنده حق طبعا
بس معرفش بقى ان السلطان حسين كامل راجل دنى
وهيقوله بيعلى القصر دا !!
أيوه دا اللى حصل السلطان طلب يشترى القصر ...
والبارون ركب دماغه
ورفض طبعا
ومعلش يا مولانا وابنيلك واحد مخصوص
وخمس دقايق
وكان هيحدفه من فوق السطوح قائلا :
هوه انا كنت ببنيله عشان اديهولك يا روح نينة .. ؟!!
(دا حوار داخلى برضو )
قصره
يهديك يرضيك
البارون بدأ فعلا يبنى للسلطان قصر ف مواجهة قصره
وعمله ف وقت قياسى
بس طبعا مش بنفس الروعة
ولا الجمال
والتفرد
ولا حاجة
والسلطان حسين خده ممتعض
واداه لمراته السلطانة ملك تقعد فيه
وحايا هوه مدرسة ...
والمهم مخدش حسين القصر
وفضل اللى ف القلب ف القلب لحد السلطان ما مات سنة 1917
القصر مستوحى من طراز
يجمع بين التراث الهندي والتراث الياباني
و شكل معابد الخمير والهندوس
ودا سر غرابته وتفرده بين القصور اللى اتبنت وقتها
وبعدها والله ..
وحجمه من جوا مكنش كبير
ولا عدد الاوض فيه كمان
وأصلا عدد سكانه كانوا قليلين جدااا
البارون واخته ويقال بنته .... بس
بس شهد القصر حفلات ياما وصفوة المجتمع وقتها
اجانب ومصريين
والبارون اللى جه مصر بيزنس مان
هيقرر بعد قعاده شوية انها تكون مستقره الاخير
ويسيب وصية انه يندفن فيها
ولو مات براها
وعلى مسافة مش بعيدة .. يبنى كنيسة البازيليك
ويوصى انه يندفن فيها
ويقال انه عمل سرداب بين قصره وبين الكنيسة .. !!
معرفش الكلام دا صح ولاّ لأ ..
بس بجملة الغرابة مهو كان راجل دمااااغ ليه لأ؟
واللى بناها هوه هواه مهندس القصر مارسيل
وعاش البارون امبان ف قصره العجيب
و جاله كانسر فسافر اوربا يتعالج ..
ومات فنقلوه مصر حسب وصيته عشان يندفن فيها
ودفنوه فعلا ف كنيسته ...
الكلام دا كان تحديدا سنة 1928
وجم ولاده الاتنين جان ولويس عشان يقسموا التركة
فكان القصر من نصيب "جان"
والظاهر ان الاخ جان مكنش زى بابا بقى
ولا كان حابب مصر ولا غاوى يقعد
فيها زائد ان تركة الوالد كانت ف اوربا برضو
ومش مصر بس
فهجر القصر
ومهتمش بالفعاد فيه واكتفى بزيارات متقطعة بين حين وآخر
هوه واولاده
وفضلنا كدا ....
لحد ثورة يوليو ما قامت
وانتوا عارفين ماذا فعل الضبابيط الاحرار
بالأثرياء بعد الثورة ...
مفيش داعى أقول
انهم قصوا ريش أى نفر ف جيبه فلوس لقوه ف وشهم
خدوا العقارات اللى ورثها أولاد البارون عن أبوهم
وبنك ناصر حط ايده عليهم
اما القصر فجان لحق نفسه
وباعه لواحد سورى
الجدع فهم ان النظام الجديد مش هيرحم حد غنى
وان القصور منظورة ومستهدفة
فقالك ابيعه واكسب أى حاجة
قبل ما ياخدوه هوه راخر !
ومتفهموش الاخ السورى اللى اشتراه دا .. ايه نوظامه
لأنه برضو هجر القصر
وسابه كدا زى البيت الوقف :)
ومعملش فيه أى تجديد ولا سكنه ولا أستغله
ولا كان عاوز يبيعه متفهموش ليه
الظاهر فعلا القصر دا معموله عمل !!!
زائد السمعة النيلة اللى طلعت عليه
من ان فيه اشباح وأرواح وحاجات كدا
والكلام اللى قاله الجيران
وسكان هذه المنطقة من انهم كانوا بيسمعوا أصوات مزيكا ف الفجر
وحريقة تولع وتنطفى وانوار تنور وتطفى
وما شابه ...
و السبب ف جو الرعب دا
حسبما يكتب ف أكتر من مصدر ان اخت البارون امبان ..
ماتت موتة مش اللى هيا ف القصر دا
يقال انها وقعت بالغلط من بلكونة من بلكونات القصر
وانها حاولت تستنجد بأخوها اللى ملحقهاش ..
وماتت :(
وبيقولوا كمان ان البارون حزن عليها جدااااا
وكان بيعتبر نفسه مسئول عن موتها
واتقال كلام ان روحها مخرجتش من القصر !
وفيه اشاعة تانية ان البارون كان عنده بنت اسمها ماريام
وماتت برضو ف القصر لما لقوا جثتها
ف بير الأسانسير الداخلى للقصر
بس دا مشكوك فيه ..
اغلب المصادر اللى قريتها محدش جاب سيرة
ان كان عنده بنت ...
اغلبهم قال ولدين وله احفاد
محدش جاب سيرة ماريام دى الا مقالة واحدة يتيمة !
بس المصادر اجمعت ان الراجل كان عنده صرع
بيجيله ف شكل نوبات
وكتير الخدم كانوا بيلاقوه واقع ف بلكونة القصر
او الروف
وطلعت اشاعات ان البارون
كان بيشوف روح اخته بتمشى ف القصر
وبيكلمها وتكلمه والحاجات دى
فالقصر بقاله سمعة مش اللى هيا
ويظهر السمعة دى اتنقلت للأبن
اللى باعه للأخ السورى اللى فضل مسقعه كدا
ولا بييجى جنبه لحد
ما جت سخامة سيئة مصر الأولى
وف غمرة حططان الايد
على كل حاجة ليها قيمة ف البلد دى
قالتلك انا طول عمرى متربية ف مصر الجديشدة
والقصر دا جزء من تاريخى وذكرياتشى
ولازم نحافز عليه
وزقت وزير الأسكان بتاعها وقتها ابراهيم زفت سليمان
اللى عمل صفقة مع ورثة الأخ السورى
وقرروا ياخدوا القصر
طبعا الطبيعى ان القصر دا يبقى تبع الأثار
لكن الست سوزى قررت تضمه لوزارة الثقافة
عشان تروح وتيجى عليه
ويقال انها كانت عاوزة تضمه لقصور الرياسة
بس بما انه كان قرب على ميت سنة
فهيدخل ضمن الأثار
فقالولها بلاش هتبقى مفقوسة
فقالت خلاص .. أثار لأ
خلوه تبع فاروق أهو حبيبنا وتبعنا
وكأنه بتاعنا يعنى
ومبعدشى كتير ...
أخراشى عزبة ابوهم
:)
هوه الشهادة لله القصر كان كم مهمل مهمل يعنى
اخدوه هما لعلعط وبقى بيبرق ...
بس واضح انه كان لغرض ف نفس يعقوب
بس بعد شوية تم اهمال القصر من تانى ..
يظهر فهموا انه كدا كدا هيروح للأثار ولاّ ايه .. !!
والقصر رجع تانى يتبهدل
واللى يدخله يدخله يخرب
زى ما هوعاوز
من تحت مناخير الغفير والحارس وأى حد ...
وتسمع وتقرى حكايات عجيبة عن ناس بتدخله
وتختفى ومتخرجش
وعن اوضة ف الدور الأرضى سكناها روح اخت البارون
وحادثة عبدة الشيطان المشهورة
لما انقبض ع الشباب ف بدروم القصر وكانت هيصة وقتها
وأفلام كتير كدا
والقصر رغم جماله وروعته حتى وهوه مهجور
ومهمل كدا
الا انه لسمعته المخيفة مكنش محل اهتمام حد وبالعكس ...
اتصور فيه ف السبعينات فيلم لشادية وحسين فهمى
دوس هنا
واتصور فيه اغنية ولا اتنين ف التمانينات
وبس غير كدا طناش تاااااام
على عكس قصر السكاكينى مثلا ... !
وانا صغيرة كنت لما بعدى عليه بستغرب جداااا
ومتهيألى الكل كان بيشاركنى الأحساس
ان المكان دا مظلوم جدا
وكأنه ملعون
وازاى صاحب القصر دا اللى كان السبب ف بنى مكان
زى مصر الجديدة
يبقى الجزاء ان قصره يتعامل المعاملة دى ... ؟!!
وازاى تمثال زى دا ...
ينعمل فيه كدا ...
ازاى و هيا ليه الناس عندها عقدة م التماثيل كدا ؟!!
والقصر اللى كان بيتحط على كروت البوستال
وينبعت برا
ينعمل ف تمثايله
وكل حتة فيه كدا ؟!!
واخيرا قبل ما اختم ...
حدوتة قصر البارون عندى كام ملاحظة ...
اللى يبقى عنده قصر زى كدا
ويسيبه ينهار بالمنظر دا
أقول عليه ايه ... ؟!!!
ودا البارون امبان اللى مهواش مصرى ولا نيلة ...
لما قعد معانا شوية حب البلد دى
ووقع ف غرامها ...
رغم ان كان عنده ألف مطرح تانى يسكنه .. ؟!!
الراجل كان عنده ممتلكات ف اوروبا
ومع ذلك بنى مصر الجديدة
ويقال ان له قصور ف المحافظات ..
زى قصر ثقافة المحلة !
كان بيحب الخيل وبيخش بخيوله مسابقات دولية
والمضمار اللى كان بيطلع ف افلامنا زمان
زى فيلم نهر الحب بتاع فاتن حمامة وعمر الشريف ..
وغيرها
هوه اللى بانيه
:)
يعنى هوه الراجل فعلا بدأها بيزنس وشغل ومصلحة
لكن بعد شوية مصر سكنت روحه
فليه اللى اتولد ف الأرض دى مش كدا ؟
:(
البارون امبان عمل زى الاخ جروبى لما جه مصر
كان غاوى تحف ولم ف أثار وحاجات قديمة
وبرضو الحاجات دى خرجت برا مصر
ف توقيت ما
واتباعت ف مزاد علنى
مع ان اغلبها ينطبق عليه وصف الأثر التاريخى
واعمار حاجات فيها عدت الكام ألف سنة .. !
بس العيب مش عليه ولا على اولاده واحفاده .بصراحة
العيب علينا احنا ...
اللى حكامنا و اولى الأمر منا اللى فرطوا ف تراثنا كدا
آه ..
حوار السرداب اللى بيت القصر والكنيسة دا ايه نظامه
... حد يقولنا يعنى ؟
وكمان ايه نظام القصر اللى بيلف كله على قاعدة تحتها رومان بلى دى
.. بجد ؟
وفيه مقولات ان دى مبالغات وان البرج بس هوه اللى بيلف
امتى هنتاكد من كل الحاجات دى ..
لقد هرمنااااا
ومن انا وعيلة كنت أعدى قصاد القصر بالعربية
واقول يا ترى هينفع ييجى يوم وادخله .. ؟
30 سنة عدت
والسؤال ما زال بيتكرر
والبارون صحيح عمل على قلبه قد كدا من مصر
ف الاول
بس احنا استفدنا منه أضعاف أضعاف اللى خده مننا
آه والله آه والله آه والله
#دى_قاعدة
بالتاريخ والحكايات تقول
وتشهد
مصر تغلبها ف دور جايز ...
لكن الحساب يجمع
وهيا اللى بتكسبك ف الآخر مهما كنت شاطر
#سلو_بلدنا_كدا
وملحوظة أخيرة بقى
وواقفة ف زورى
السلطان حسين كامل دا الظاهر عينه كانت وحشة
بص للبارون بصة مش تمام ف قصره
خلته زى منتو شايفين ...
وخلاص حقك علينا يا عم سامح بقى
عشان القصر يعمر ...
واحنا أسفين يا حسين
وتوتة توتة ...
خلصت حكاية قصر البارون
وتصبحوا على ألف خير
------------------------------
@AhmedSniver
انا عاوز اقول حاجة بمناسبة قصر البارون انا كل يوم بدخل القصر العظيم ده بجد تحفة
:)
ملحوظة
بحقد عليك حقد السنيييييين
