حكاية الليلة دى
على اسمى
:)
فاططيمى يعنى من العصر الفاطمى ...
اللى انقسم نصين يا نضرى نص قوى
ونص .. نص لبة
والناس بتوع التاريخ بيقسموه كدا
بناء على ان الدولة الفاطمية ف عهودها الاولى
كان الخلفاء أقويا ومسيطرين
اما ف النص التانى فكان الوزرا هم الأقوى
عشان كدا اتسمت الفترة دى ..
بعصر الوزراء العظام
ولو انى مش شيفاها عظمة اكتر ما هيا افترا يعنى
ولوى دراع بحكم ما حدث
ونحكى بقى اللى حدث
الخليفة الفاطمى ف مصر من اول المعز لدين الله
و من بعده أبنه وحفيده الخ الخ
والدنيا كانت ماشية كويس
لحد ما جه الموكوس المستنصر بالله
والجدع أصلا قعد ع الكرسى وهوه عيل ابن 6 سنين
ولا يفقه شيئا ف أى شىء
واللى حكم كانوا رجالة أبوه
والوزرا المتعاقبين
وام المستنصر كمان اتدخلت
وست الحاجة نينة ام المستنصر كانت من السودان الشقيق
قوم عشان تقوى من نفوذ ابنها العيل الصغار
راحت مشترية من بنى جنسها عبيد كتير
وبالهبل
وطبعا عملوا طايفة واشتغلوا زى جنود مرتزقة كدا
ونافسوا طايفة الأتراك
وطايفة المغاربة
اللى جم مع المعز من المغرب زماااااان وعاديك بقى
التلت طوايف من الجند دول نزلوا خناق
ويا بعض طول الوقت صراعات على النفوذ والسيطرة
وكل خناقة بنهب وحرق وقتل
والبلد بقت مهلبية بسببهم
ام المستنصر بالله كانت متحيزة لأهلها
ورجالة الخليفة كان منهم المغاربة والاتراك
وكله خايف على نفوذه ووضعه
والدنيا كل شوية تقوم وتقعد
لحد بقى ما على حظ المستنصر النحس النيل شح
والظاهر كان ف زيارة لأثيوبيا قبلها ولاّ ايه متعرفوش !!!
المهم حصل قحط
والغلة نقصت والناس جاعت
والجند المغاربة والاتراك والسوادنيين مش يتلموا بقى ؟
لأ استغلوا الوضع اكتر
وبقى كل جماعة تحط ايدها على منطقة
وتستقوى
وتلم اللى تقدر عليه
الناس .. الشعب يعنى
ف الاول كلوا القطط والكلاب
وأى حيوان انشالله ميت
وبعدين .. بقوا ياكلوا بعض ...
آه والله حصل
ذكرت المصادر ذلك حرفياااا
الناس بقت تتربص لبعض ف الحوارى الضيقة
ويقعد الواحد منهم فوق سطح البيت
ويصطاد العيال الصغيرة بكُلاب
زى اللى بيحطوه ف السنارة كدا بس على اكبر
وبقم يصطادوا الستات كمان
اكمنهم ضعفا وميقدروش يقاموا
وكانوا يبعتوا للحكيم عشان يزور مريض ف بيته
يدخل الراجل من هنا يتلم عليه كام نفر ..
ويروحوا دابحينه و مسوينه وواكلينه .. !
وكنت حكيت الحكايات دى بتوسع هنا ف التدوينة
دى
وابقوا اقروها على مهلكم
المهم
عشان منطولشى ونكرر
المستنصر بعد ما تبهدل
والبلد بقت خرابة
والناس بتاكل لحم بعض ف الشوارع
قرر يستعين بواحد يلحقه ويلحق البلد
و مين هوه الواحد دا يا ترى ؟
يبقى الاخ "بدر الدين الجمالى" اللى كان والى
ف احدى امارات الشام
وصيته مسمع ف المنطقة
وقرر المستنصر يستنجد بيه وقال
#وابدراااااه
والحقنى
بدر الدين يوافق بشروط اولها يديله صلاحيات
وميعدلش عليه ف أى قرار
وانه يسيبه يجيب معاه جنده الخاص
وانه لازم هيتخلص من الجنود الموجودين ف مصر
المستنصر وافق على كل الشروط
ودخل بدر الدين القاهرة متخفيا
وعمل خطة متخرش المية
خلص بيها على الجند اللى كانوا عاملين قلق
ووجع دماغ وقرف دول
واتخلص كمان من الناس آكلة لحوم البشر
عشان مبقاش فيهم أمل يخفوا
ونسف حمامه القديم بقى ف كل البلد
مشى الرجالة اللى كانوا ماسكين شئون الدولة قبله
وجاب رجالته هوه
وابتدى يحصن القاهرة عمل اعادة تجديد لأبوابها المتهدمة
ويكفى ان ذمته النضيفة
خلت باب النصر والفتوح وزويلة قاعدين لحد النهاردة
بينما أغلب الأابواب التانية اندثرت وراح أثرها
والراجل اكراما له اتسمى حى "الجمالية" على اسمه
اكمنه بيّن كرامة
زائد انه سيطر ع الجيش طبعااااا
و بقاله السيطرة الكاملة على مصر
لدرجة ان المستنصر مبقالوش أى قيمة
اللهم خروجه ف المناسبات والاعياد ودمتم
حد يقولى ازاى كدا ؟!!!
أقولكم هوه اصلا كان بيسمع كلام امه وهيا اللى بتمشيه
ولما الدنيا خربت باع تحفه
وكان بيشحت عشاه
قوم لما ييجى اللى يرجعله تانى دا هيعترض!
الراجل ما صدق أصلا
والمستنصر بالله قبل الشدة المستنصرية دى وما بعدها
قعد ع العرش حوالى 60 سنة
يا قوة الله
ومتنسوش انه مسكها وهوه عيل بكافولة
المهم ... ان بدر الدين الجمالى كان الرجل الاول ف البلاد
وكان بيدرب ابنه الافضل
دراعه اليمين لأنه يقعد مكانه يوما ما
وفرض دا ع الخليفة !
المستنصر بالله راح يزور الجمالى ف المشتشفى
و الجمالى مسك ايده وقاله
ابنى يا حاج خده تحت باطك وكدا
المستنصر قاله
عيب والعشرة دول لأعينه وزيرى
طبعا المستنصر كان عارف ان الجيش كله
تحت ضرس الجمالى وبيدين بالفضل له
وبعد موته هيدين بالولاء للأفضل
ابن رئيسهم وسيدهم وزعيمهم الخ الخ
فجاب م الآخر وقال أفضل افضل ... يلا
وعينه وزيره المفوض
ودراعه اليمين والشمال وكل حتة
ومفيش كام شهر يا نضرى والمستنصر بالله ... مات
#إهىء_ف_داهية
دلوقتى الوضع اتكهرب فجأة
ليه بقى ؟
عشان المستنصر بالله كان عنده عيال كتير
منهم رجالة بشنبات
مات كام واحد ف الشدة المستنصرية وما بعدها
لكن
كانوا حوالى 8 اولاد
ومات أربعة وفضل أربعة
الاربعة ودلم بقى كانوا كالآتى وبالترتيب
نزار
عبدالله
أسماعيل
أحمد
و .... نزار كان الأكبر وأحمد الصغنن
ونزار كان داخل ع الخمسين كدا
بينما احمد ف اول العشرينات
والمستنصر اللى هوه الاب كان دايما يقول
ان نزار هييجى بعدى وهوه الخليفة القادم ..!
نزار كان شديد وقلبه جامد وحضر مع ابوه مصايب كتير
وحضر معاه كمان مجى بدر الدين الجمالى لأنقاذ البلاد
وكان بتضايق منه
ومن نفوذ ابنه الافضل
ويحكى انه مرة م المرات
الأفضل كان داخل من أحد أبواب القصر
وف حضرة نزار ... والأفضل منزلشى من ع الفرس
فنزار اتحمق قوى
وراح مزعقاله قائلاااا
"انزل يا ارمنى يا نجس !"
طبعنننن الأفضل منسيهاش أبدا الجملة دى
وفضل شايلها ف قلبه
بس معرفش يعمل حاجة لحد ما جت اللحظة المناسبة
واكتفى بالصبر
بس جنب الصبر عمل حاجتين كمان
دعم نفوذه ف الجيش أكتر وبقى زى ابوه تمام
وعمل حاجة كمان ... جوّز أخته لأبن الخليفة
أحمد الولد الاصغر
وف اليوم الموعود بقى المستنصر بالله مات
وبيصوتوا عليه
قوم الوزير الأفضل يروح يلم الحاشية
و الموظفين ورجال القصر
ويعلن ان الخليفة ورث احمد
وانه هيتسمى "أحمد يعنى" بالخليفة المستعلى بالله
وبسرعة بسرعة لبسه عباية الملك
وقعده على سرير الخلافة
ونده بقى لاخواته التلاتة ييجوا !
طبعا نزار واسماعيل وعبدالله جم على ملا وشهم
مش فاهمين اللى حصل
اول ما دخلوا قاعة العرش
ولقوا اخوهم قاعد ومستخلف
انزهلوا
واتنين منهم خرسوا
طبعا اللى خرسوا كانوا اسماعيل وعبدالله
اما بقى اللى مقدرش يسكت فكان نزار
اللى صرخ ف وش أخوه
وقعد يقول الخلافة دى تاعتى انا
وبابا كان سايبهالى وبتاع !!
الأفضل سابه يرزع كل اللى عنده
وبعدين رد عليه بهدوء وقاله :
مولانا الخليفة أخبرنا قبل موته ان أحمد
هوه اللى هيقعد مكانه واخواتك هيبايعوه!!!
وبص الأفضل لأسماعيل وعبدالله
اللى كانوا غالبا بيعملوها على روحهم ...
ومنطقش
نزار بصلهم وسألهم ... انتوا موافقين ؟
ردوا : أيوه
#الخوف_وحش
الافضل بصله بكل شماتة نظام ..
هاه شفت انك لوحدك تماما ؟!!
وراح سأله ... بالمفتشر
هتبايع لأخوك المستعلى بالله ولاّ .. ؟!!!
نزار فكر وحسبها ف دماغه ف ثانية
لو بايع يبقى خلاص راحت عليه ومش هيقدر يتراجع
ولو رفض مش هيخرج م القاعة حى
والحل انه يماطل
وفعلا عمل كدا
نزار بلغ الأفضل والمستعلى ان عنده ورقة بختم أبوه
مكتوب فيها انه اختاره خليفة من بعده
وسابهم عشان يجيب الورقة دى
من مكان ما خباها
وفوريرة
فوريرة كان مركب العجل ف رجليه
وبيهرب برا القصر وبرا القاهرة كلها
بينما هما خالت عليهم وافتكروه هيهرب بجلده
ومش هيسمعوا عنه تانى
واقيمت الاحتفالات
وابتدى المستعلى بالله يباشر مهام وظيفته بقى
اللى هيا يقعد ف قصره يهش الناموس عن وشه
وياكل وينبسط
ويسيب البلد وشئونها لأخو المودام الوزير الافضل
وهما شوية صغننين
وجاتلهم الاخبار اللى نغصت عليهم عيشتهم
واتضح ان الأخ نزار مش ساكت عن حقه
وسافر اسكندرية يلم الاعوان
وبيستعد لانه ييجى القاهرة يفشخهم
اسكندرية كان ماسكها واحد اسمه أفتكين
ولقبه ناصر الدولة
والراجل كان من رجالة المستنصر بالله
وولائه له
ومكنش بيحب الأفضل بالمرة فوقف مع نزار
وقعد يجمع لنزار ف أنصار ورجالة
منهم واحد اسمه ابن امصال وغيره ...
وقعدوا يرتبوا ف الامور لحد ما هوب
لقوا الأفضل على راس جيش وجايلهم !!
الاخ نزار اللى شايف نفسه أحق بالعرش
بعد ما راح على اسكنكرية واحتمى بيها وبأنصاره
وسمى نفسه المصطفى بالله .. !!
والى اسكندرية افتكين كان من رجالة ابوه ..
فساعده
وقاضى اسكندرية اصدر فتوى بضرورة مساعدة نزار
على استرداد الامامة
وابن مصال انضملهم من برقة
واتحصنت اسكندرية بمن فيها
استعدادا لأنقضاض الوزير الأفضل
اللى جاى على راس الجيش بتاعه شايل ومعبى
ومصر يجيب نزار من حواجبه ويقتله !!!
الصراحة .. والحق لازم يقال يعنى
اسكندرية دى طول عمرها أهلها جدعان
واللى يدوسلهم على طرف ... يروقوه بالقوى #والداخلية_وحازمون_يشهدون
الاسكندرانية وقفوا مع نزار وقفة رجالة بحق
واعتبروه حسب الفتوى هوه الخليفة الحقيقى بتاعهم
والمدينة صمدت قصاد الوزير الأفضل وجيشه
تفتكروا قد ايييه ؟
عشر شهور بحالهم يا عيال !!
عشر شهور اسكندرية صامدة رغم حصار الأفضل ليها
وضربها يوماتى
وبعد بهدلة طويلة أفتكين لقى الحكاية صعبة
وطلب الامان
طلب الامان لأهل اسكندريه .. ولنزار .. ولنفسه طبعاااا
وابن مصال كان هرب منهم وطفش لما لقى الموت قادم
والأفضل صراحة وبكل رجولة
وافق ع الطلب
وانفتحت أبواب المدينة بعد حصار طويل
ودخل الأفضل بجيشه وادى الامان لأهلها
ومحدش جراله أى ضرر
وقبض على نزار وأفتكين ومأذاش حد منهم
اما الوغد ابن مصال ..
فلما عرف ان الافضل دخل المدينة بلاقتال راح راجع
وطلب العفو والسماح
والأفضل أمنه على حياته برضو يلا بقى ما هى هيصة !
وبعت الأفضل الأسيرين نزار و أفتكين ع القاهرة
ورجع هوه مع جيشه اللى دخل بيه القاهرة منتصرا
ومزهوا بحاله
والمستعلى عمله تشريفة فاطمية معتبرة
وبيقولوا المستعلى وقف بنفسه على باب النصر
مستنى دخلة الأفضل بجيشه عشان يحتفى بيه
وبيقولوا انه قلعله العباية بتاعته والعمامة كمان !
وخلص المستعلى الموكب واتغدي وروق
وقعد يشرب النسكافيه ف قاعة العرش
و دخل عليه الوزير الأفضل بيرمى التماسى
ومعاه الأسيرين نزار وأفتكين
والمستعلى شافهم
وركبه ميت عفريت ..
والكهربا مسكت ف جسمه
وقعد يزعق لنزار ويشخط لحد ما الأفضل نده الحراس
وقالهم : خدوا نزار من وشه الساعة دى ... !!
طبعا كان من العبثى انه يطلبله السماح
كما وعد ف اسكندرية
ولما لقى المستعلى اتجنن كدا ساق فيها وما صدق
لما الخليفة سأله بغيظ اعمل فيه ايه ؟
فرد الافضل : اعمل ما بدالك يا مولانا !!
والمستعلى كان الحقيقة مستنيها
وعمل عملة غريبة عجيبة مسمعتش انا شخصيا عنها
الا بعدين ف زمن العثمانلية
المستعلى أمر حراسه يحطوا نزار وضهره لحيطة
وبعدين يبنوا عليه حيطة تانية
ويسيبوه
بس كدا !
يعنى بالبلدى دفنوه ورا الحيطة
وسابوه يموت بالبطىء
وتخيلوا بقى انه كان بيعدى طول الوقت ع الحيطة دى
اللى مدفون وراها أخوه الاكبر وعااااااادى خالص
ولا كأن فيه حاجة !!!
#اخوات_الندامة_والله
قصره نزار مكنش لوحده
أفتكين حاكم اسكندرية ساعده ..
فأتحكم عليه بالضرب بالعصيان حتى الموت !
اما باقى الانصار فمصيرهم مبعدشى قوى عن غيرهم ..
يقال ان المستعلى امر بقطع رؤوسهم
وبنى فوقها مسجد سماه .. مسجد النصر #شوف_الشياكة_والأخلاق؟!
والتاريخ بيقول ان وقتها
كل ما يخص نزار وسيرته انمحت من الوجود
طول فترة المستعلى ع الأقل
والخليفة حكم بعدها 7 سنين
وساب الحكم لأبنه من بعده
لكن الزمن بيعلمنا حكمة بتقول
كما تدين تدان
وعلى الباغى تدور الدوائر
ودا اللى حصل للظالمان ..
بس كل واحد وعدالة السماء كما استحق ووجب عليه
نبدأ بالأفضل الوزير اللى كانت مصر كلها ف كف ايده
يعمل فيها وف الخليفة ما يشاء
وقعد بنفوذه وسلطته دى
لحد ما المستعلى مات بعد 7 سنين حكم
بعد المستعلى .. الخلافة اتنقلت لأبنه أبوعلى منصور
اللى كان عنده بالضبط 5 سنين لما مات أبوه
وراح الافضل ياخده م الحريم عشان يقعده ع الكرسى
وأبوعلى كان بالكافولة فعلاااا
وفضل الافضل يحكم بأسمه ييجى عشر سنين بحالهم
لحد ما الولا شم نفسه ودخل ف سن الشباب والفتونة
وقرر يغدر بوزيره
وف يوم ما من بعد عاشر سنة حكم لأبن المستعلى
دخل الافضل عليه قصره راح الآمر قاتله
ومخدش عزا
والقصة هتلاقوها هنا
http://t.co/DnVEk9TCCE
وسبحان الله ... بعد ما قتل رجالة يتهزلهم بلاد
يقتله حتة عيل صغنن
وإيه ؟
هوه اللى جابه ع الكرسى
وجاب أبوه كماااان .. !!
#دا_الاول
التانى بقى المستعلى نفسه
الأخ اللى قتل أخوه الكبير بعد صراع رهيب
عشان يملك الخلافة جراله ايه ؟
صحيح مات بعدها ب7 سنين
وملحقش يتهنى
بس الدم والتار هيتردله لأن نزار صحيح انقتل
بس فضل ناس من اتباعه هربت
وقررت تدور على حقه
واتكونت جماعة لكدا اسمها .... النزارية
والنزارية دول كانوا عاملين زى الحرس الحديدى
كانوا فرقة اغتيالات هدفها الخلاص من كل من خان
واخد حق نزار ف الأمامة والخلافة
وفعلا نفذوا !
المستعلى بالله لما مات
ساب الخلافة لأبنه العيل الصغير ابن 5 سنين
الولد كبر وقعد على عرش الدولة الفاطمية ف مصر
30 سنة بحالهم
لكن
ف لحظة ما ... من عمر الزمن
النزارية كانوا حضروا نفسهم واتربصوله
وهوه رايح يزور مراته البدوية ف قصرها بالمنيل
اللى كانت وقتها حتة متطرفة
وطلعوا عليه بالسكاكين
وعلى ما الحرس لحقوه كان بيموت
ونقلوه على القصر الكبير ف بين القصرين
والسر الإلهى طلع هناك
ومات بأيد أنصار عمه المغدور
وبكدا تنتهى حكاية المستعلى واخوه نزار
ولى عدة ملاحظات
كالعااااااااااااااااااادة
1)مبدئيا كدا
قُطع الحكم ع اللى بيحكم ع اللى عااااوز يحكم ام البلد دى
دى مش العالم هتقطع بعض يا ابو حميد ..
لأ ... دا الاخوات قطعت بعض فعلااااااا
2) تربية قصور ايه بقى واخلاق ملوك فين دى
اللى تخلى اخ يسرق ويزور ويعذب ويقتل اخوه
بالمنظر دا !
3) نصيحة لأى حاكم عاوز بلده تخرب يركز ع التوريث
يعنى يقرر يورث عياله
وهيا هتجيب ضرفها ان شاء الله
دى وصفة متجربة ونافعة جدااا
4) القرايب يخربيت ام القرايب
ام المستنصر جابت قرايبها م السوادن بهدلوا الدنيا
والأفضل جّوز أخته للمستعلى وعملوا روبطية
وشفطوا البلد ف كرشهم !
5)الأستقواء بالخارج .. عارفين الجملة اللطيفة دى
اللى بنسمعها دايما صح فعلا
وبتجيب الخراب
ومحدش هيساعدك لوجه الله ولا نيلة لازم يستفيد منك !
المستنصر بالله صحيح استعان ببدر الدين الجمالى
والراجل عمل شغل حلو .. بس مش ببلاش
وخلى الجيش والبلد كلها عزبة لأبنه من بعده ..
توريث برضو!
6) آه .... احترس من الأوغاد
ساعات يعملوا انهم معاك وبعدين وقت الجد يفلسعوا ..
زى ما عمل ابن مصال مع نزار
ومتقوليش الوفد وبتاع
#وقت_الجد_كلهم_اندال
7)قالك لما الأفضل حاصر اسكندرية عشر شهور
وقفوا القتال شهر رمضان عشان ميصحش وكدا
ياختشى عليكم لأ ... بتعرفوا ف الاصول
وبتوع ربنا صحيح !!!
8)الفاطميين دايما يفكرونى بالمماليك ..
حاجة لوز كدا وعنب بناتى
عندهم مواهب ف الدسائس والأغتيالات والغدر والبشاعة
لا يعلى عليها الصراحة !
بس المؤلم ان المملوك كان اخره بيغدر بأستاذه اللى مربيه
و ف حكم ابوه او معلمه .. الخ الخ
انما الفاطميين كانوا بيغدروا بناس من دمهم !!!
9) وبالمناسبة بقى .. ايه الموتة الفُللى بتاعت نزار دى ؟!!!
يعنى للدرجة دى المستعلى كان متغاظ منه
وحب يموته بالبطى ويخلي مدفنه ف القصر كمان !
للدرجة دى التشفى ف الموت .. والدناءة !
طب اهو ربنا
بعد اكتر من 30 سنة رداهالك ف ابنك يا حاج
وقتله ناس متعرفوش ولا تعرفك شخصيا
لكن الدم مبيستكش !
وهذا هيقودنا الى
10) ان الروح المقتولة ظلما
لا تهدأ حتى يؤخذ حقها
ويمكن دا السبب اننا ف عذاب ف الثورة دى
لأن حق اللى ماتوا لسه حى
11) النزراية دول طلع منهم فرع اشتهر بجماعة "الحشاشين"
ودول حكاية لوحدهم ملخصها ان زعيمهم
حسن الصباح كان راجل بيعمل دماااااغ عالية
وبيخلى اتباعه يحششوا ويحلموا بالجنة وحاجات كدا
قوم لما انقتل الىمر ابن المستعلى بالله
على ايد احدى اتباع النزراية
انصار الآمر انقمصوا وقالوا أشمعنى احنا ؟!!!
وعملوا طايفة اسمها .. المستعلية
عشان يبقوا ضد النزارية واهلى وزمالك بقى !
12) المستعلى مقعدش كتير ع الكرسى
زى منتوا عرفتوا وبالتالى ملحقش يعمل أى منظر ف البلد
لا مسجد باسمه ولا اصلاحات عليها القمية
اللهم الا عملة فضلت وعليها اسمه
13) لو الحكام بتوعنا مصّرين يورثوا البلد
ومفيش أى فايدة يعنى
فأبقوا ربوا عيالكو دول طيب ...
و كفاية هنستحمل خلفتكم وقرفكم
متجيبلنوش المرض والعلل بذريتكم كمان !!
واخيرا قريت الجملة دى وحبيتها جدا
"الحكايات ارواح الاماكن "
وفعلا دى حقيقة ..
كل حيطة قديمة او مطرح بشوفه بحاول اتخيل حصل فيه ايه
وبحس ساعات ان الحجر بيتكلم !
وصحيح القصر اللى اندفن فيه نزار بين حيطانه دا
اتهد من زمااااااااان على ايد الايوبيين
لكن ... كل أثر قديم شاف حكايات
وشخوص و احداث تستحق الإحترام
والعيب فينا اننا مبنعرفشى
ولازم نعرف
بس ربنا يدينا العمر عشان نكفى ونوفى
حكاياتك يا مصر ....
واشوفكم على خير
