حكاية النهاردة مش تاريخ ولا سياسة ولا عن مصر ...
وتعالوا ننفض شوية للهم
ونحكى قصة من قصص الحب الكئيبة
آه انا مسمياها كدا
و أسألونى ليه ؟
عشان ف تاريخ الشعر والادب والفن وغيره ...
هنلاقى قصص حب كتيرة قوى
كانت رهيبة وعظيمة وفزيعة
وكل دا
وقلبت ف الآخر بغم وموت وخراب ديار
ف مدونة احكى يا شهرزاد
حكيت ييجى 14 حكاية منهم
والنهاردة الحدوتة الخمآشر
ان شاء الله
وكان يا ما كان ... ف بلاد العرب زمان
وتحديدا أرض اليمن
كان فيه قبيلة اللى جت منها الحزينة الجميلة
زرقاء اليمامة
وطبعا الكل عارفاها !
من منطقة اليمامة دى كانت فيه قبائل كتيرة عايشة
ومنهم قبيلتين ركزوا ف أساميهم كويس
عشان دول مربط الفرس ف قصة الليلة
قبيلة قشير
وقبيلة جرم
وكان يا ما كان شاعر غلبان وحبيّب وبتاع غزل والذى منه
واسمه يزيد بن الطثرية ..
والطثرية دى تبقى أمه .. أيوه ... امه هوه
#ريبرارررية_وكدا
الست ام يزيد بقى كانت مشهورة بعمايل الطثر
اللى هوه ان شاء الله الزبدة
فأشتهرت بالطثرية
والواد خد لقبها واشتهر بيه
معرفش الوالد سكت ليه ع الموضوع دا بس ماشى !؟
المهم عشان منطولشى ...
يزيد كان واد حليوة كدا ومسمسم ولطيف
ومتحدث ولبق
و شاعر من الطراز الاول
م الآخر فتى الشاشة الأول ف قبيلة قشير
قبيلة قشير دى اصلاااان كانت ناشفة كدا
ورجالتها رخمين
والواد يزيد كان مختلف عنهم نواعمى
وبتاع شعر وغزل فالرجالة بتوع القبيلة نفسنوا منه قوى
وطلعوا عليه سمعة انه لامؤاخذة
كما تذكر الاخت الفنانة مروى ف المراجع العلمية
انه والصراحة راحة
#مبيعرفش
ولكن ف الحكيكة الولد كان بيعرف ...
وكان كل شوية يطلع بقصة حب جديدة
مع واحدة من البنات الفاتنات سواء ف قبيلته
او القبائل المجاورة .. !
وكان مشهور بالإسراف والدلع
والهيام على وجهه ف البرية
شاعر بقى ومهروش وبيستنى شيطان الشعر والأفلام دى
ولا شغلة ولا مشغلة الا قليلااااا
وكان عنده اخ اسمه "ثور" واخد الحياة جد حبتين
وهوه اللى بيشتغل ويرعى الغنم والأبل
وبيشتغل لنفسه ولأخوه
ويزيد مرحرح
ومش بس كدا
دا كان بيفنجر على حساب اهوه كمان
ويحكى أن ف يوم من ذات الايام راح ثور بالأبل يرعى
عند حتة فيها زرع ومية
وجه يزيد يقعد معاه شوية
قوم اييييه ؟
جم شوية بنات موزز ينزلوا المية ويهرجوا و يلعبوا
والليل دخل عليهن وكانوا جعانين
راح يزيد بكل شهامة دابحلهم ناقة من بتوع ثور اخوه
اللى وقف يلطم!
وقاله نعمممم
وناقتى
ويخربيت اليوم اللى الحاجة ولدتك فيه وكدا ... الخ الخ
يزيد طبعا خد التهزيئة لحد آخرها
وسكت
وبعدين كتب أبيات يحنن قلب اخوه
نغير على ثور وثور يسرنا
وثور علينا فى الحياة صبور
وذلك دأبى ما حييت
وما مشى لثور على عفر التراب بعير !
شوف الصياعة ... بيجيبله م الاخر
وبيقوله دى طبيعتى ومش هغيرها يا اخى العزيز
وفين صبرك وحنيتك عليا
المهم يزيد ثبتهّ جامد ومن غير جّل
وفضل يزيد كدا متدلع ورايق
وبيخرج من المواقف النيلة مستخدما موهبته
وتأثيره على الناس حريم ورجالة
حتى الحكام كمان ... تخيلوا؟
ويحكى ان ....
يزيد كما يبدو مجرش ف البرارى
ومقضيها صياعة
وطبعا اخوه اللى كان بيصرف عليه
وف مرة اتخاصموا فيزيد استلف من واحد تانى
ومعرفش يسدد الدين
طبعا صاحب الفلوس مش هيستنى عليه
راح مشتكيه للحاكم
وكان وقتها ... عقبة بن شريك
والكلام دا ف العصر الاموى يا عيال
نسينا نقول ف الاول !!
المهم عقبة بن شريك حكم على يزيد بالسجن
الولا دخل الحبس من هنا وبقى عنده ارتكاريا
ومش قادر يستحمل
طبعا مياصة وواخد ع العز
المهم قعد يحرك ويفرك لحد ما شافله طريقة
وراح هربان م الحبس
وبدل ما يهرب لبعيييييد عمل العكس تماما
راح رايح لبيت الحاكم عقبة بن شريك شخصيا
وقبل ما يوصل بيت الحاكم كان واخد الناقة بتاعته
اللى كان راكنها قصاد القسم .. قصدى قصاد السجن
خدها ركبها وراح بيها لحد بيت عقبة
تخيلوا !!
ف لحظة وصوله لبيت الحاكم ...
كان عقبة خارج من البيت بص لقى يزيد قصاده
انزهل
وبص ف الناقة واتعرف عليها انها بتاعته
انزهل اكتر واكتر !!
راح يزيد واخده على مشمه علطول وقاله :
انى فار منك إليك
وراح راقعه بيتين شعر عشان يثبته بيهم
الراجل سمعهم ابتسم
وعفى عنه
وقاله براءة :)
يا عقب قد شذب اللحاء عن العصا
عنى وكنت مؤزرا محمودا
صل لى جناحى و أتخذنى عدةً
ترمى به المتعاشى الصنديدا
ومحدش يقولى اشرحى بقى!
يزيد ببساطة بيقولها انا معاك يا ريس
واعتبرنى من رجالتك وكدا
و خلاص انا اتربيت واتأدبت
وانتا القللللب الكبيرو والحركات دى
المهم خرج منه
زى ما هيخرج طول الوقت من كل مأزق بصنعة لطافة
مستخدما موهبته وطباعه الشقية المقبولة
بس يا خسارة الشطارة دى مش هتنفعه
ف قصة حبه للأسف
:(
يزيد حب كذا واحدة
شاعر وانتوا عارفين اللطشة بتاعت الشعرا
اللى بتيجى كل شوية دى
بس واحدة بس جت ف الآخر
وقشت كل من جئن قبلها
وتبقى مين بقى؟
تبقى الانسة وحشية ... احدى فاتنات قبيلة جرم
وصحيح كانت بنت على قدها ويزيد أعلى منها اجتماعيا
لكن مكنتش دى المشكلة خالص .. مالص .. بالص
المشكلة كانت اكبر من قصة الحب دى
وعشان تعرفوا لازم نحكى من البداية أصل المشكلة
وحصلت ازاى
وفلاش باااااك بقى لما كانت القبائل بتغير على بعضشيها
مش بيغيروا حبا لأ سعادتك
دول بيغيروا بلطجة ونهب وسبى الخ
المهممممم قبيلة قشير اللى منها يزيد
وقبيلة جرم اللى منها وحشية كان بينهم ضديات
قعدوا سنين متخانقين على تفاهات
ويبدو ان العرب كانت ناس فاضية
لأن دا تكرر ف داحس والغبراء
وحرب البسوس
ونماذج كتير بتقول ف النهاية وملخصها
ان الفضا ويحش
القصد .. قشير وجرم قعدوا متخانقين كتير
ومحدش بيكلم حد لحد ما القحط بهدل قبيلة جرم
وكان لازم يسيبوا مطرحهم
ويدورا على مية وعشب تجنبا للهلاك
وبصوا حواليهم ملقوش اقرب من قبيلة قشير
يستنجدوا بيهم
الحقونا هنموت
عرق الكرم والنخوة نقح عند قبيلة قشير ..
فقالولهم اتفضلوا آمنين
حلو؟
لأ مش حلو ... عشان بعد ما اهل جرم دخلوا
ونصبوا خيامهم ف أرض قبيلة قشير
ابتدت تحصل المشاكل بين الطرفين عن طريق شاب
اسمه .. مياد
ومياد دا بقى كان عامل زى يزيد كدا ...
شاعر شاب ف قبيلته وحليوة وشايف نفسه وفلوطة
قوم ف يوم صحى م النوم العصرية
وخرج من خيمته كالعادة ...
ومياد قايم رايق ومعمر الطاسة
وماشى بين الخيم وقعد يعاكس ف البنات الحلوة
عادى بالنسباله
انما طبعا الحريم بتوع قشير اتضايقوا
وبعتروا كرامته
وستنوا لما رجالتهم رجعوا واشتكولهم
وواحدة ست كبيرة لسانها فلت منها وقالتلهم :
والله ما ندرى ارعيتهم جرما المرعى ام أرعيتموهم نساءكم؟
#أى
أى أى يعنى
الست بتقولهم انتوا جبتوهم توجبوا معاهم
وتسيبوهم يرعوا ف المرعى
ولا يرعوا ف حريمكم يا تييييييييت ؟؟ #والرقابة_مسحت_الشتيمة_معلش
طبعا رجالة قشير الدم سخن ف عروقهم
وراحوا لكبار قبيلة جرم وولعوا الدنيا
وازاى مياد يعمل كدا
واحنا منقبلش
ولا يسلم الشرف ال معرفش ايه دهون من بتاع ايه دهوا
..الخ
كبرات قبيلة جرم عملوا ايه بقى ؟
ولا الهوا
بكل برود قالولهم :
إنكم لتحسون من نساءكم ببلاء ؟
يعنى بالبلدى مالكوا يا كماحة انتوا شايطين ليه ؟
هوه انتوا بتشكوا ف حريمكم لا سمح الله ولا حاجة ..؟
طب احنا عادى عندنا ف القبيلة الحكاية دى
ومفيش قلق وحريمنا مبتشتكيش ...
#رد_انتا_يا_حسين
مش عايزة حد يبقى موتضايق
ولا موتنرفز
ولا مخنوق عشان لحد دلوقتى محصلش حاجة
والتقل جاى ورا
فأعصابكم لو سمحتمممممم
طبعا رجالة قشير اتحرق دمهم اكتر
واحنا منقبلش كدا
وحريمنا مصدر ثقة
وانتوا اللى رجالة فيما معناه قُلل وكدهون
والحوار طول لحد ما وصلوا لحل .
ايه هوه الحل ؟
حبل أشنق بيه نفسى ... دا رقم واحد
رقم اتنين انهم قرروا يعملوا مسابقة بينهم
ونوع من المنافسة والكسبان حكمه يمشى!!
#آه_والله
ايه بقى المسابقة دى عشان دمكم يتحرق معايا ؟
آل ايه يا خويا كل قبيلة
ترشح رجلاااااا من خيييييرة رجالها
يروح يعاكس حريم القبيلة الأخرى !
والراجل الدكر اللى هيعرف يوقع اكبر عدد
من حريم القبيلة الآخرى ... يبقى قبيلته الاعلى
وحكمها يمشى
ومحدش يزعل تانى من طباع الآخر !!!
طبعا المشكلة عندى هنا مش ف المسابقة دى
ولا اللى اقترحها
الحقيقة انا مشكلتى الحقيقية انهم قبلوها ...!!
لأ وخدوا المواثيق والعهود كمان
اتفقوا على أن الراجل اللى هيشاغل حريمات الطرف الآخر
هياخد أمارة من الست دى
ولما يرجع الموكوس بالشيشاء ...
جوزها او اخوها (الست)
لازم يعترف بان الحاجة دى تبعه !!
آه والنيعمة زى ما بقولكوا كدا ...
ناس غريبة جدا فعلا
ويقولك مجتمع محافز والتكاليد وابصر ايه ... !!!
المهممممممممم
كل قبيلة اختارت موكوسها
طبعا قبيلة قشير اختارت يزيد
وقبيلة جرم اختارت مياد
وف اليوم الموعود انطلق الشوبابان ف المهمة الوطنية
ومصر محتاجلك يا رأفت
#آحببتشى_يامصر
الاخ مياد بتاع قبيلة جرم ..
دخل على بيوت قشيرمنفوخ زى الطاووس
وطبعا انتوا هارشين طبع القشيريات
زى ما بعتروا كرامته سابقا
كرروها لاحقا
وكل ما يحاول يعاكس ف واحدة ويتحبرش بيها
تحدفه بحجر او حتة حديد
او تدلق عليه مية
المهم زفوه لحد ما تعب
وراح يستريح جنب نبع مية ونام شوية
وصحى ع المغرب لقى جارية بتملى مية م النبع
راح خاطف البرقع بتاعها
وجرى بيه ع مجلس القبيلتين
وقال معايا دليل معايا دليل
وكان فاكر انه كدا فاز
ومخدش باله ان الجارية جريت وراه لحد ما لحقته
وراحت مصرخة وقالتله يا حرامى سرقتنى
وفضحته قصاد العالم
فمياد انكسف وتوراى خجلا
#وش_كسوف_قوى_ياخى
المهم قالوله اركن على جنب ...
لحد ما نشوف سى يزيد عمل ايه هوه روخر
وطبعا أفيش داعى أقولكم على يزيد
وعمايل يزيد
والهنا اللى شافه يزيد !
أصلا أصلا حريم قبيلة جرم ستات فُللى كدا
وبحبوحات ومعنهمش عُقد زى حريم قشير
ويزيد بقى ميتوصاش ف دلعه
وشقاوته
وتأثيره
وشعره
الخ الخ
الواد يا اخويا دخل ع الحريم من هنا
وكل واحدة يقابلها تدلعه
وتعزمه
وتديله حاجة من ريحتها
وتتواعد معاه على مقابلة بعديييييين
o.O
وهوه كل ما يقابل واحدة يقولها شعر
ويدلع فيها ويستخدم سحره
وبالمقارنة بقى البسيطة
مياد رجع لمجلس القرون دول ..
جعان ومضروب ومتبهدل وحرامى
يزيد بقى رجعلهم متغدى
ومتروق
ومتعطر
واخر حلاوة
ومش بس كدا دا اول ما دخل عليهم
راح دالق حصيلة اليوم ف حجرهم علطول ..
وكانت ايه حضراتكم ؟؟؟
مجموعة من الأساور والخواتم والامشاط والبراقع ...
و كل حاجة ف دول بتاعة واحدة من نساء قبيلة جرم
وطبعا وشوش الجرميين أسودت
سواد السنيييييين
ورجالة (مشوها رجالة) قبيلة جرم وقفوا ساكتين
ومحدش رضى يفتح بوقه
فكبير قشير قالهم وبعديييييين
احنا بينا عهد وميثاق ان كل واحد يقول الحق !!!
راح كل لامؤاخذة (راجل) مادد ايده
وخد اللى يخصه
اللى خد اسورة مراته
واللى خد خاتم اخته
واللى خد برقع واحدة من اهل بيته .. الخ
وكانت مسخررررة
ومن حفر حفرة لأخيه بقى
مش كنتوا يا بتوع جرم بيتتنكوا علينا
وتقولوا عاتى عاتى
اهو حريمنا اللى طلعوا اشراف
وانتوا حريمكم طلعوا هىء مىء شخاليل !
وبس بقى كنا قاعدين حلوين
وكويسين
وكافييين خيرنا شرنا
والناس مضايفنا
ايه اللى حصل
والشر دخل ما بيننا تانى والدنيا ولعت
منك لله يا مياد !
ووقعت القبيلتين ف بعض تانى بعد ما كانوا أتصالحوا
ودارت حروب بينهم
و يزيد دفع التمن للى عمله دا غاليااااا
و قولولى ليه يا فطمطم ؟
عشان ف اليوم اياه وهوه بيلف ع الحريم
زى بياع الاتوبيس ولاّ المترو
وبيلم الامشاط والفلايات
صادف من بين الستات الأنسة وحشية بذات نفسيتها
ووقع ف غرامها
هيا كمان طبعاااااااا وقعت ف غرامه
وكلنا بنحب يزيد
بس يزيد بيحب وحشيبة بس ..
وهام ف حبها لدرجة الوله
وزى باقى الشعرا بقى اتشوى ف الغرام
بعد المصيبة اللى حصلت بتوع جرم لموا حاجتهم
وسابوا ارض قشير
لحتة تانية
وبقت كل منطقة محرمة ع الآخر
ومعرفش يزيد يقابل وحشية
وكان هيتجنن عليها
وهيا كمان
آتـــانى هواهـــــــا قبل أن أعرف الهــوى
فصـــادف قلـــبى خالــــيا فتمكنـــا
#آه_يانى
وانتوا عارفين العرب ورخامة أمهم بقى
أهلها وخصوصا عمها
سمع شعر يزيد ف حب وحشية
راح حابسها ومنكد عليها عيشتها
والبت يا نضرى عيت وخست النص
ويزيد هيموت ويشوفها ويسوق عليها القريب والبعيد
والكل ينصحه يبعد عنها
عشان الضديات اللى بين القبيلتين
حاجة كدا زى روميو وجولييت
ويبعتلها يقولها :
أحبك أطراف النهار بشاشة .... وبالليل يدعونى الهوى فأجيب لئن أصبحت ريح المودة بيننا .. شمالا لقد ما كنت وهى جنوب
فترد وحشية عليه ببيت من أورع ما كتب ف الشعر
والوجد والشحتفة
وتقول ...
أحبك حب اليأس إن نفع الحيا.. وان لم يكن لى من هواك طبيب
#آه_يانى_يامه
ويبعت يزيد يسأل عنها فيعرف انها عيانة قوى
وعمها سمح بخروجها تتهوى شوية
مع الأبل والنوق والمعيبز وكدا
فيتفق مع خادم عندهم
ويروحلها متنكرااا
الخادم كان متعاطف مع قصة حبهم جدا
وشايف ان عم وحشية مبهدلها قوى
فجاب فروة سودة
ولبسها ليزيد
والشاعر الولهان مشى بيها وسط الغنم متخفيا !
لحد ما وصل لوحشية وشال الفروة
والبت كانت هتطب ساكتة ... من الموقف
بس كان قلبها هيقف من الفرحة اكتر لأنها شافته اخيرااااا
وكانت ليلة
لأ مكنتش ليلة واحدة
كانوا 3 ليالى حضراتكم من العشق والغزل والحب
باتهم سى يزيد ف بيت وحشية
وسط حريم البيت من تحت مناخير عمها .. !!
واللى عرف بعدين
بعد ما كانت وحشية هرّبت يزيد
وعمها طبعااااا طين عيشتها اكتر وحبسها
وسمع يزيد ان العم عرف
فقرر يتجنن ويروح يخطفها !
عم وحشية عرف بنية يزيد
راح عامل حفرة قصاد البيت وولع فيها نار
وحشية كانت بتخطط للهرب
وخرجت
ووقعت ف الحفرة دى بالغلط
والخدم أنقذوها بالعافية
وسمع يزيد بالمصيبة فقال:
يا سخنة العين للجرمى اذ جمعت
بينى وبين نوار وحشة الدار
جبرتهم عذبوا بالنار جارتهم
ومن يعذب غير الله بالنار
قصره ...
الموضوع كبر اكتر
وعم وحشية أصر إلحاحا ما يلمهم على بعض
ويزيد عقله اتلحس اكتر واكتر
وبقى يمشى يقول شعر ف وحشية وعذاب فراقها
وهيا ترفض العرسان
وهوه هيتجنن عليها
وقشير وجرم متخانقين
و بيحاربوا ف بعض
وف ليلة من ذوات الليالى قبيلة قشير اللى منها يزيد
اتعكت ف خناقة
حصلت عركة بين قبيلتين
ملهمش دعوة خااااااااالص بقشير
قبيلة حنيفة وبنى عقيل
بس لسوء الحظ بقى كان فيه راجل من قشير
مع احد الطرفين .. وانقتل
فطبعا كدا قشير لازم تهب للأنتقام
واخد تار الراجل اللى انقتل منهم
وراح يزيد بحكم انه احد شباب قبيلته المعروفين بالفروسية
وشارك ف الحكاية
وف وسط العركة خدله سهم ف عينه
وقع من ع الحصان رحوا مكملين عليه دبح
وتمثيل بجثته
وبعدين شالوها بعتوها لأهله
ومقولكمشى بقى .. !
طبعا حصلت مناحة ...
وكل القبيلة خرجت ترثيه وتقول شعر
و مات زينة شباب القبيلة
و ماتت قصة حبه لوحشية معاه ... مؤقتتتتتتتا
لحد ما وصلتنا من تانى
عن طريق الاخ أبو الفرج الأصفهانى
اللى حكى حكاية يزيد ووحشية ف كتاب الأغانى
ومنها حكينا حكاية الليلة
وقبل ما أقول تصبحوا على خير
لى ملحوظات
1)كل قصة حب قديمة كدا من الزمن دا
كان القاعدة فيها ان الشاعر اللى يشبب ببنت ميتجوزهاش
ويشبب يعنى يقول فيها شعر ويفضحها ...
طب ليه ؟
يعنى مهو لو انتا يا عم الحاج جوزتهاله
هيبطل يقول الكلام دا
وهيندممممم ف الغالب .. هع هع
ثم ان البت اتفضحشت خلاص ..
لم التعابين ولمهم ... ايه الناس دى ؟
ودا هيقودنا إلى رقم
2) هوه انتوا ما شاء الله يعنى ناس كومل قوى
وبتوع الاصول كلها
وعندكم تقاليد وأخلاق الخ الخ
لأ ... وش كبرياء قوى ؟
ازاى تقبلوا ان شاب يغازل حريمكم
ويخش ف منافسة مع واحد تانى
والحكاية تبقى على البحرى كدا ... نعممممم ؟!!
طب اياك حد بعد الحكاية دى يفتح بوقه
ويقولنا أصل احنا العرب طول عمرناااااا
اهل كرامة ونخوة والنظام دا ...
هبطحه والله
3) الحكاية دى حصلت ف العصر الاموى ..
يعنى كنا عدينا مرحلة الجاهلية بييجى ميت سنة وكدا
ومع ذلك الاخلاق متغيرتش ولا نيلة ... !
4) الأخ يزيد كان مشهور بلقب "الموّدق"
ودا معناه لغويا الواد السُهن اللى بيعرف يوقع البنات ..
آه والله
وَدَقَ إِلى الشيء دنا منه وأَمكنه
فهل يا ترى يا هل ترى ... كلمة متودك
اللى بنقولها الأيام دى عن حد شاطر ومتمكن من حاجة
ليها علاقة بكلمة "مودق" دى
#أممكن؟
واخيرا قبل ما اقول تصبحوا على ألف خير
اعذرونا ع التأخير
لأن تحضير الحدوتة بياخد وقت ..اولا
و حكيها لازمله تفاصيل واطالة .. ثانيا
#فمعلش
أشوفكم على خير
ابو ماهـــر... @3mmar_maher
@ro7albmama2 @mohammedtariq_
انت كل مرة بتجوع بتقلبها مسلسل بدوي
Sameh Shahien @samehshahien
ايه القبايل السيكى ميكى دى !!!!
