قصة الليلة تبقى علوية الأصل والمنشأ صحيح
بس فرعها مصرى أصلى
وبتقول ازاى الجنسية مش بالميلاد
لكن زى ما عم نجيب محفوظ قال
.... المصرى هو من يحب مصــــر
ونرجع لأيام ما الجنرال بونابرته اتهف ف عقله
وقرر يغزو مصر قوم الشعيب قاومه
والدولة العثمانية حبت تعمل أى منظر كدا
فبعتت عسكر من نواحيها
ومن ضمن اللى وصل ع المراكب
وعمل منظر كان الاخ .. محمد على
اللى ما صدق جه مصر ولزق بغرا
مش هوه وبس دا كل اولاده واحفاد أحفاده كمان!
والراجل يا خويا اول ما اتلم على كرسى الولاية
قالك بس مصر دى تعتى أنا
ومحدش هياخدها منى أبضنننن
وقعد يحرجم عشان يستقل عن العثمانلية معرفش
اتلموا عليا أهل أوربا والعثمانين
وكسروله مناخيره الحلوة دى
وف النهاية أرتضى بان مصر تبقى ورث لعياله بعده
وخلاص بقى
يرضى بقليله
ومن رضى بقليله عاش وحكم
ومحمد على دا يعمّر بتاع 40 سنة
وزيادة ف الحكم
و80 سنة وزيادة ف الدنيا
وصحته متينة ابن الأيه
طبعا بياكل قشطة وزبدة وفراخ بلدى خالية من الهرمونات ..
قوم يقول لنفسه بعد الحروب
وقتل المماليك
وبناء البلد من تانى يقول لروحه أوديكى فين يا صحة
يخلف عيال ياما ف وقت الفراغ
والعيال دى المفروض حساب نظام متبع
يتوارثوا الحكم فيما بينهم
واللى يهمنا حاليا فيهم هوه
إبراهيم باشا
وابراهيم كان أكبر اولاد محمد على وأقربهم
بحكم المنصب كقائد لجيشه
بس كان أبغض اولاده لنفسه
وكنا حكينا حكايته زمان
هنا
المهم ابراهيم الطامح للحكم ملحقشى يتهنى بيه
ومسك بعده عباس حلمى الاول
سى براهيم بقى كان عنده زوجات ومستولدات
ولاّ يعنى ملوش نفس يتسلى زى بابا !
ابراهيم باشا كان عنده 6 زوجات ومستولدات
(جوارى وملك اليمين بس بالمعنى الشيك يعنى)
خلف من 4 منهم
وبعدين يظهر البنزين خلص ف آخر اتنين
:)
وسيبونا من خلفة خديجة و خوشيار و ألفت
وخلونا ف خلفة الست شيوه كار
اللى هتولد لأبراهيم ولد هنعرفه بعدين بـ
... الأمير أحمد رفعت باشا
والامير احمد رفعت دا يا عيال قصته عجيبة جدا
عشان لولاه فعلا كان التاريخ ف مصر اتغير
.. يمكن
.. لأ اكيد !
#ليه_هحكى_اهو
أحمد رفعت كان ولى العهد بعد الوالى سعيد باشا
ودا حسب القواعد بتاعت الحكم وقتها
والدنيا كانت ماشية زى الفل
وعادى
لغاية سنة 1858 وكان سعيد عامل حفلة وعشا
وعازم اخواته عنده يتعشوا ويرموا عضمهم وكدا
مين الاخوات بقى ؟
احمد رفعت
اسماعيل
عبد الحليم
قوم النصيب بقى متفهمشى
خلى اسماعيل يعتذر عن العشا دا
واللى يروح احمد وعبحليم
وهما راجعين ف القطار الملكى الخصوصى
ينقلب القطر ف كفر الزيات!
وانقذوا عبدالحليم بأعجوبة
اما احمد رفعت فمات غرقا
وليه كنتوا بتحطوا شريط القطر جنب النيل يا جماعة ؟!
اهو النصيب
المهم ولى العهد مات
والدور نقل على مين ؟!!
أيون .. الدور بقى ع الواد الحليوة
اللى مدينا جنب ألاطة دا اسماعيل باشا
اللى بعد موت اخوه سعيد
تولى العرش
والحقيقة انها مكتوبة لأسماعيل
عشان مصر مكتوبلها تشوف عهده
وما بعد عهده
والحكم هينحصر بتخطيطه الدؤوب ف سلساله هوه وبس
لحد ما تقوم الثورة وتشيل الكل كليلة
#الزمن
نسيب اسماعيل شوية وهنرجعله تانى
بس مع ابنه وحفيده بعدين
لكن دلوقتى خلينا ف احمد رفعت الغلبان دا
اللى مات ف عز شبابه هل لحق يتجوز ويخلف ؟
#أينعم
اتجوز وخلف وبقى عنده أبن
حمل اللقب
واسمه الامير احمد كمال
وأحمد كمال هيخلفلنا
شخصية الليلة اللى هنحكى عنها
وهى الامير يوسف كمال
ونركز بقى كدا عشان التوهان
كل واحد خلف اللى بعده ماشى ؟
محمد على
-->إبراهيم
---->أحمد رفعت
----->أحمد كمال
------>يوسف كمال
معايا ؟
والراجل دا انا بعشقه لعدة أسباب الصراحة
اولها انه مصرى كما ينبغى ان يكون
وثانيا لأنى شفت جزء من تاريخه بعينى
وثالثا عشان إسمه
:)
يوسف كمال المولود سنة 1882
زيه زى كل اطفال وشباب العيلة
اتعلم حلو وف احسن مدارس وسفروه أوربا
والحقيقة انه الجدع استفاد ايما استفادة
والسفر خلاه يعشق الخطر
وخلاه لما يرجع مصر يبتدى يبحث ويدور
ويسافر افريقيا والهند ويكتب عن رحلاته
مش بس كدا هيبتدى يجمع ف تحف
مراجع وخرايط .. الخ الخ
#وبعدين؟
الحقيقة انه مكنش بيجمعها فشخرة ولكن ..
هوه كان عنده حب للثقافة
و عنده كمان رغبة يعمل حاجة للبلد
وعشان كدا لما حبوا يعملوا الجامعة راحوله
بس قبل الجامعة كان فيه خطوة سبقتها
وهيا انشائه لمدرسة الفنون الجميلة ف درب الجماميز
عشان الولاد تتعلم الرسم والنحت
والمدرسة دى طلعت نوابغ من اول دفعاتها
وأشهرهم كان محمود مختار
صاحب تمثال نهضة مصر
وكنا حكينا حكايته
هنا
الأمير يوسف كمال تكفل بمصاريف الدفعات
اللى سافرت باريس تتعلم الفنون على أصولها
وبما انه كان من الأثريا جنب حبه للثقافة والفن
فدا شجع الآخرين
والآخرين دول كتير ميتعدوش
زى اللى فكروا ف انشاء الجامعة المصرية
كأول جامعة اهلية لمصر
قالوا هيعملوا كلية للفنون
ويوسف كمال يرأسها
وبعد ما وافق .. غير رأيه
وبعد شوية عرضوا عليه رئاسة الجامعة وبرضو رفض
واكتفى بالتبرع والتمويل وتفرغ لرحلاته
بصوا الراجل دا غريب جدا
وحياته الغاز شوية
بس بحاول أفكها معاكو زى مثلا ثروته المهولة
اللى كانت لا تعد
ولكن تحصى
:)
كان معروف عنه الغنى الفاحش
بس محدش عرف كام
غير لما طلعت حرب عمل بنك مصر
وقرر سنة 1920 يعمل قايمة بأغنى 10 شخصيات
ساعتها طلع ان الامير يوسف كمال
تالت أغنى واحد ف البلد
وقالك ان ثروته كانت كام يا مؤمن وقتها ؟
10 مليون جنيه حضرتك
#وغطونى_ومتصوتوش
أيوه .. يوسف كمال كان هوه التالت
بعد الاميرين
عمر طوسون
وأحمد سيف الدين
والمركز الرابع للحاج الشواربى باشا
اللى اتسمى على اسمه الشارع الشهير ف وسط البلد
والتلاتة دول طوسون وسيف والشواربى
كل واحد منهم حكاية لوحده
نبقى نحكيها بعديبييين
وخلينا ف الجدع الأمير الباشا
اللى من أغنى أغنيا مصر دا
اللى لقبوه الفلاحين بالبرنس حبا وكرامة
الامير يوسف كمال كان زى ما قولنا
غاوى رحلات وسفارى وقتل وحوش
وكل مرة يرجع من رحلة معاه حيوانات ويحنطها
زى الصورة ما بتقول انه ف بهو قصره بالمطرية
اخدينلى بالكوا .. البهو
الريسبشن
الصالة يعنى احنا لسه مدخلناش جيوه
وغوطنا شويتين
:)
غير الحيوانات والحركات دى كان غاوى تحف
وبيشترى من العالم برا ويرجعها مصر
ويهديها للمؤسسات المعنية
ودا مثال لحاجة كدا
الدورق دا من العصر الأيوبى
لقاه يوسف كمال معروض ف اوربا
راح شاريه
واهداه لمتحف الفن الأسلامى
فسنة 1925 الكلام دا
ودا مجرد مثال لحاجات كتير تانية تندرج تحت التحف
زى السيوف والدروع وغيرها ..
اما الكتب والمراجع فحدث ولا حرج
الراجل مش بس اهدى كتب
دا ألف بنفسه كتب ف الكشوف والجغرافيا
الراجل عمل اطلس بأسمه
"اطلس يوسف كمال"
إنطبع في هولندا من 500 نسخة بس
جمع فيه خرائط العالم التي اترسمت من اقدم العصور
لوقت ما كان عايش هوه
اللى قام بيها وشافها
لما سافر افريقيا واللى شافه هوه هناك
انا شفت الخرايط دى بعينى على فكرة :)
شفتها لما كنت بشتغل لفترة ما
ف الجمعية الجغرافية المصرية
دى حاجة كدا تعيط لما تشوفها من كتر جمالها وقيمتها
و المهدورة طبعا
يوسف كمال ألف كتاب كمان اسمه
"سياحتي في بلاد الهند الانجليزية وكشمير "
والهند معاه ليها قصة لطيفة قوى
لما سافر ف رحلة هناك ذات مرة
وهوه هناك والدته كانت ف قصرهم
اللى ف نجع حمادى
وكان من القصور التحفففففة
وما زال رغم الاهمال الآثريين بيفيضوا ف وصفه
المهم قاعدة ام الامير يوسف ف السلاملك
اللى ف الصورة دا
وبتطل ع النيل
ونامت وحلمت بشيخ مبروك كان ساكن نواحيهم
الشيخ دا كان اسمه ابن عمران
وآل حلمت انه جاى يقولها ابنك يوسف هاجمه أسد
ونجا بأمر الله
الست مخدتش وادت
لحد ما يوسف رجع م السفر بعدها
وحمدلله عالسلامة يا يوسف
الله يسلمك يا نينة
اسكت مش انا حلمت بشيخ قالى انه كان هياكلك أسد
يوسف بصلها وسكت مذهولاااا
وقالها فعلا انا هاجمنى أسد ف الرحلة
بس فجأة طلعلى راجل غريب معرفوش
وشدنى من قصاد الأسد
وانكتبلى عمر جديد !
#دا_برنس_اوف_باريزيا_دا_ولا_ايه؟
وبس يا سيدى
الام والابن قرروا يكرموا الشيخ عمران دا
وعملوله ضريح جوا محيط القصر
اللى عاوزة أقولكم انه من جوا متقسم
وتحفة معمارية بحق
ومش بس ف نجع حمادى ..
الامير يوسف كمال كان عنده قصور تانية
اشهرها قصر المطرية
واتفرجوا ع الروعة بقى
وفيه قصر تانى ف الزيتون
وزيه زى القصور الملكية بقى تبع الدولة
و حاليا يبقى مقر لمركز بحوث الصحراء
وقصر الأمير يوسف كمال ف أسكندرية
اللى بقى المتحف البحرى دا بتاعه برضو
ومن ضمن ممتلكاته
وحدث بقى عن اسهاماته ف العمل الاجتماعى
وازاى كان من التبرعين لأنشاء الهلال الاحمر المصرى والجمعية الخيرية الاسلامية
واهداءاته اللى بالهبل
الآف الكتب والمجموعات اهداها لدار الكتب
والجمعية الغرافية الملكية(وقتها)
واللى يعتبروا أقدم تانى
وتالت منشئات علمية ف مصر بعد المجمع العلمى
الامير يوسف كمال كان شخصية عجيبة وثرية
ويبدو ان ثرائه عمله حالة من الأستقلال والقوة
خلته يشوط ف أى حد ميهموش حتى لو مين .. !!
ودا اللى خلاه من ضمن اعضاء الاسرة المالكة
اللى طول الوقت مزعجين ومبيستكوش
الراجل ساند ثورة 19 لسببين
حبه للوطن
وكرهه اكيد لأحمد فؤاد الملك
وكلنا فاكرين فؤاد وصل للحكم ازاى
و فيما يقال انه كان المفروض
بعد تخلى الأمير كمال بن حسين كامل
ان العرش يروح للامير يوسف كمال !
#يقال
قوم الانجليز كانوا عاوزين حاكم رخم وغتت
ولا يفقه ف الوطنية وبتاع مصلحته
وميقرفهموش زى عباس حلمى التانى
قوم ملقوش حد أنسب من مين؟
فؤاد
راحوا دايسين على اتفاقات الباب العالى مع يوسف كمال
وادوها لفؤاد اللى قعد ع الكرسى
وعمل زى كل الحكام ف كل زمان ومكان
قاله يورثها عيالى من بعدى وبس
يوسف كمال منطقش وكبر دماغه
اذا كان الواد كمال ابن حسين كامل
رفص الكرسى بكل احتقار هوه اللى هيجرى عليه
يلا يغور و هوه هينقص حتة يعنى ؟!!
وابتدى يركز فعلا ف العمل العام
والسفريات والانجازات على كل مستوى ممكن
وعمل جمعية اسمها جمعية تحسين المواشى !
ولقيت مقالة بتتكلم عن قصره ف نجع حماى
بتحكى ازاى ان الجدود تناقلوا حكايات عن يوسف كمال
ولا ألف ليلة وليلة بقى
وعارف الباشا ابو كرباج
والنظام دا
بينما بشوية بحث وتمحيص
اكتشف صاحب المقالة
ان الراجل كدا غنى بزيادة بس مش اكتر
لكن ف الحقيقة هوه اهتم بحالة فلاحينه
وجودة الأرض والزراعة وكدا
ودا يفسر ببساطة ازاى ف سنة 36 مثلا
كان إيراده السنوى من أراضيه كلها
بيعدى الربع مليون جنيه ..!
الرقم دا ميجيش بسخرة وعنف وبهدلة للفلاح ابدا
والعجيب ان الامير يوسف كمال جه سنة 1932
وراح متنازل عن لقبه !
والمقالة دى بتعلن الخبر دون أى اشارة للسبب بالمرة ؟؟؟
والصراحة انا دعبست ف كل حتة ممكن اوصلها
على سبب تنازل الأمير عن لقبه
ملقتش
بس ممكن اخمن على فكرة
:))
كاتب المقال بيقولك منعرفش حصل ايه سنة 1932
لكن الحقيقة ان يكفى نقول ان فؤاد كان بيحكم ويتحكم
وكان واخد مصر ف حتة مقطوعة
وبيعمل فيها حاجات مش كويسة
ومن ضمن الحاجات دى
اللعب ف الدستور والبرلمان والحكومة .. الخ
قوم واحد طلعله زى الخازوق من اسرته
وقاله بكفاياك يا فؤش
مين دا يا فاتيما اللى بتحكى عنه .. قصدك يوسف كمال ؟
أقولكم لأأأهه
قصدى الجدع القمر الحليوة الطعامة اللى حكينا عنه
هنا
والقمر دا اسمه عباس حليم
وكان واخد لقب النبيل قوم لما طلع هزأ فؤاد علنا
فؤاد اتغاظ
وراح شايل منه اللقب بالدطاستور
ومرجعه أفندى !!
وعباس لما رجع أفندى ..
الشعب أطلف عليه لقب الشريف #شوف_الجمال؟
الكلام دا كان تقريبا سنة 1931
فيبدو فيما يبدو ان الامير يوسف كمال
مكنش عاوز حد يحكله على مناخيره
قالك كرامتى وبيدى لا بيد فؤاد !
والمصادر بتقول ان يوسف كمال تخلى عن اللقب
ف سابقة لم تحدث من قبل
وانه كان بيمضى ف الفنادق وغيرها بـ .. مزارع مصرى
الكبير كبير برضك
وبيقولوا كمان انه غير كل يفط ممتلكاته ف كل المديريات
وبدل ما كان مكتوب دائرة الامير يوسف كمال
بقت الدائرة اليوسفية
#احبه_بقى_ولاّ_محبوش_الراجل_دا
:)
اللطيف انه حتى بعد تنازله عن اللقب
فضلت الدنيا كلهاوالصحافة والشعب يندهه بالبرنس والامير
هنا
وانتوا عارفين لما فاروق مسك كان صنف تانى غير أبوه
والولد صلح العلاقات مع كل الخصوم
واغلبهم كان ف مقام عمو وخالو وهكذا
فاروق كان دلوعة العيلة المالكة ودلوعة الشعب كمان
وكبار الأسرة اتلموا حواليه ف الاول
عشان يساندوه ف المهمة الضخمة دى
دى صورته
وهوه بيصورفرح :)
عارفين فرح مين ؟
فوزية وابن شاه ايران
اهو قاعد جنبهم ع السفرة اهو :)
بيقولوا كمان ان الأمير يوسف كمال
كان محب للفن والغنا
وكان من عشاق عبوهاب
وكان بيرعاه
ويجيبه يغنيله ف قصره وكدا
وقصره يوسف كمال كان غنى صحيح
بش مش زكيبة فلوس
كان راعى للفن والثقافة والعلم والعمران والزراعة
.. والجغرافيا الخ الخ
وكان بودى نسكت على كدا
و مينفعش نختم قبل ما نقول الراجل الحلو دا جراله ايه
ومصر ف تاريخها كام حدث كدا
عاملين زى الخط
ماقبله حمادة
وما بعده حمادة تانى خالص !!
ومن الاحداث الجلل دى
ثورة يوليو بتاعت الظبابيط الاحرار
اللى هييجوا قافشين ع الأثريا والعيلة المالكة تحديدا
ويوسف كمال خصوصا بقى !!!
يعنى الراجل كان من الأغنياء طحن
ولكم ان تتخيلوا ثروته سنة 20 كانت 10 مليون
ودخله السنوى سنة 36 كان ربع مليون
اومال سنة 52 هيبقى معاه كام ؟!!
الامير يوسف كمال كان ف لبنان لما قامت الثورة
قوم ف نوفمبر صدر القرار
بمصادرة أملاك الأسرة العلوية
نفر نفرررررر
#شادية_ريا_و_سكينة_استايل
وركزوا معايا بقى
عشان الموقف دا بالقطعععع
اتكرر ف عشرات القصور ان مكنش كلها
القصر المعنى بالرواية هوه قصر نجع حمادى
التحفة اياه دا
ماشى؟
الأمير كان ف لبنان والقصر فاضى
قوم لجنة من بتوع الثورة بتاعت جرد الممتلكات
جت عشان تجرد
حلو ؟
و الواحد مننا خياله هيشطح بقى
و يفتكر مثلا ان شكرى سرحان
هيخش علينا القصر دلوقتى
ويستذوق كدا
ويبقى وشه ف الأرض م الكسوف لانه جاى يقلبنا وبتاع!!
أبضنننن
دا اللى جه حتة موظف لا يفقه شىء
ومبيفهمش ف التحف عمل قايمة حصرية بالممتلكات
وحط أتمان عبيطة
ملهاش محل من الإعراب متلقاااااااا
حد يقولى يا فاتيما مش قاصدين شيكلهم
وثورة بقى ولسه معندهمش خبرة
ونديهم فرصة ... !
اقولكم فرصة على روحهم
دول كانوا ولاد القديمة اشاسا حرامية
وقاصدين ينهبوا
الاخ الموظف قيم التحف ف القصر كله
ب 682 جنيه و52 قرشا
اما العفش فبكام حضرتك ؟
قيمة الأثاث كله 2100 جنيه
وحد يتكلم بقى
انا هسكت وانكتم !
المقالة فيها ارقام مستفزة تخليك تفهم علطول
ان التثمين دا كان بغرض توقيعها
ف حجر حد بعينه هياخدها
وخد عندك
عشان متحسرش لوحدى بقى
سرير خشب أثرى 13 جنيه
زهريتين خزف ارتفاعهم متر بـ 40 جنيه
زهريتين قيشاني 12جنيها
زهريتين نحاس 2 جنيه
و38 طبقا من الخزف 33 جنيه
دورقين بلور 600 مليم
كأس شمبانيا 200 مليم
13 كأس جيلاتي جنيهان و60 قرش
و3 أطباق خزف ثمنها 3 جنيه
وصينيتين نحاس منقوش ب جنيه و30 قرش
وزجاجتين للزيت بغطاء 200 مليم
و4 كئوس صغيرة 400 مليم
و 12كأسا 200 مليم
#عااااااااااااااا
بصوا المسألة كان ممكن تعدى
بس دا قصر الامير يوسف كمال
عارفين الدورق ابو 300 مليم دا يبقى شكله ايه ؟؟
دا ب300 مليم يا عاااااااالم !!!
يعنى دا بتوع الثورة لو كان هزوا طولهم
لحد صيدناوى ولا عمر افندى واشتروا من هناك
الحاجات هتبقى أغلى من كدا ؟!!
ثم انه
وهذا رؤى العين بقى ...
حاشية الضباط الأحرار وحواشيهم ورجالاتهم وضباطهم
خدوا م التحف دى وغرفوا
وانا بعينى شفت حد كدا وكان قصادى
قاعد بيبع ف التحف دى سنة 95
شوفوا انتوا بقى
بقاله كام سنة بيهلب ويبيع ويكسب .. الخ الخ
بس اللى جراله كان مسخرة
وابقوا مرة فكرونى احكيلكم حكايته
#الله_يرحمه_بقى
قصره عشان تعبت انا
قصور الامير يوسف كمال أتهلبت .. حرفياااااااااا
والراجل قال منيش راجع
وغوروا ف داهية بلى خدتوه
أصله كان عنده فلوس برا
:)
غير علاقاته بكل العالم بقى الراجل قعد ف أوربا يتجول
ويبعت فلوس لأفراد الاسرة المالكة
اللى حظهم الدكر خلاهم اتحبسوا ف مصر
ومعرفوش يخرجوا
وكانوا بيشحتوا عشاهم
:(
واتوزعت القصور ع الأتحاد الأشتراكى والوزرات
وطبعا انمحى اسم يوسف كمال من كل حتة
لحد ما الدنيا هديت بعد عقود
وكل حى رجع لأصله
وعاش يوسف كمال ف هدوء
لحد ما لبى نداء ربه سنة 1969 ف النمسا
ورجعوه يندفن ف مصر ف الامام الشافعى مع باقى العيلة
ف مدفن كان محضره مخصوص لنفسه
وصارف عليه
ورحل حفيد ابراهيم باشا
عن عمر التسعين تقريبا
بعد ما ساب سيرة عطرة تلحق اسمه اينما ذُكر
دى صورة مرسومة له
ف رحلة من رحلاته ف أفريقيا سعادتكم
وبالنوسبة للسلطانية
اللهم لا أعتراض
معلش مبيعرفوش يشربوا الشوربة الا كدا
ماشى
بس اللى اعرفه انه فيه علبة صدف او فضية يتحط فيها السيجار
انما ايه حامل علبة الثقاب دى ان شاء الله
مخدنهاش ف المدرسة دى خالص !!
اللى بنى قصر المطرية هوه انطونيو لاشياك
وهوه نفس المهندس اللى بنى قصر الطاهرة
بنك مصر
عمارات الخديوية
مبنى وزارة الخارجية القديم ف التحرير
وتجديد قصر عابدين بعد حرق جزء منه ..
وغيرهم من مبانى عظيمة
والاخوة بتوع الثورة كعادتهم خربوا كل الماضى
وخلوا المنظر زفت
وبقى الخديوى اسماعيل بيجرى ورا ألمظ ف الفيلم
و ورا الخدامة كمان !!
وتجاهلوا بالعمد مع سبق الأصرار
ان مصر كان فيها ناس حلوة ومحترمة ومثقفة بجد
مش منظر
ومكتبات قصور الامير يوسف كانت تشهد
والتاريخ يشهد انه كان ممكن يبقى زكيبة فلوس فعلا
لكن هوه قرر بكل الفلوس اللى عنده يبقى شخص ذو قيمة
وقيمته متبقاش ف محفظته
#عشان_مينفعش
محفظة ايه دى اللى هتلم 10 مليون جنيه جواها دى .. ؟؟
:)))
واعتقد والله أعلم وهذا تحليلى السخصى للحكاية
ان سبب ثراء يوسف كمال الفاحش دا
جنب انه كان بيعرف يشغل فلوسه كويس
وبيرعى حال أرضه وفلاحينه
اهو اعتقد والله أعلم انه ان السبب ف أبوه اصلا
لأنه لما ورث عن أحمد رفعت
(الأب الكبير) ملعبش بالفلوس دى
الخديوى اسماعيل هوه اللى بدد جزء كبير من ثروته
لكن اسرة احمد رفعت كانت بعيدة عن المهاترات دى
واحتفظوا بأراضيهم واملاكهم
وكبروها مع الوقت
والراجل اتخلى عن اللقب ف لحظة تجلى وكبرياء
وبكدا كان بيبعت رسالة لفؤاد
انى مش باصص لعرشك ولا حقى فيه
واتلهى
#وكان_محقا
عشان الكرسى دا كان فيه لعنة
وفاروق كان هيتجنن ويورثه لأبنه
ولما جه الولد كان العرش طار
ومحدش قعد على تلها غير مين ؟
#ايون_الضباط_الحلوين
والعيلة الملكة كان فيها ناس حلوة كتير
بس احنا مبندورش وراهم
زى يوسف كمال وعباس حليم
وغيرهم وغيرهم
وفيما يختص بالنفسنة على ثورة يوليو
مهى لو كان مسكها ناس محترمة مكنش دا بقى حالها
وحال مصر
فهل تتعظ ثورتنا احنا بقى
ونمسكها للى يستاهل!
وتخلى الأمير يوسف عن لقبه لكنه ظل البرنس
واتنادى بيه لبقية عمره
وادينا بنناديه بيه لحد دلوقتى اهو
#الامير_أمير_والغفير_غفير
#آه_والله
انا ببحبه من زماااان قوى
بس كفاية اسمه على اسم ابنى
وكمااااان مسمى دايرته الدايرة اليوسفية
.. حبيبى حبيبى حبيبى
:)
وتوتة توتة
خلصت حدوتة البرنس
===========================
Mohamed Refa't @Talatin_
والجنيه بتاع زمان كان ماشاء الله قد اللحاف
™الدبدوب ® @mazforever
القصر ده بتاعى ...فى منطقتى يبقى بتاعى :)))
NadiaKhairy @Cafe_Noire
رغم حكاياتك المؤلمة الموجعة ...
ابقى فكريني يا شهر لما بلدنا تفكر ينصلح حالها
ارشحك وزيرة الثقافة
الچنرال بيكاتشوالأول @General_Pikachu
حامل لعلبة الكبريت.. اللي هو يعني تناكة بقي
Mohamed Refa't @Talatin_
يا بلاش والله.. الخير زمان كان بالهبل
الچنرال بيكاتشوالأول @General_Pikachu
اعصابك يا عربي مش كده
حِنكِش @Haneen_hassan11
حسين يرد
™الدبدوب ® @mazforever
على ابن الجناينى كان معاهم؟؟؟
Suzan Khasawneh @suzanaaK
ازا انا مصرية :-)
Yasmine @Yasminemz
عباس حليم ده اصلا فارس احلامي :)
Hany Zaky @Hany_Zaky
البرنس يوسف كمال كان عنده كمان قصر
فى وسط جناينه فى قطور غربية
وأول واحد صدر عجينة الياسمين لمنتجى العطور فى فرنسا
Hany Zaky @Hany_Zaky
وقصر قطور احتلته وزارة الرى
Yasmine @Yasminemz
كأنه من رواية خيالية !! تحفة :)
