حدوتة النهاردة عن قصر .. و ساكن .. و حاكم .. وشعب وكمان عن هتاف ... اتقال من اكتر من 200 سنة ولسه بيتكرر إيـش تاخــــد يــا برديســــى ... من تفـليـسى #الشعب_المصرى_يقول ومعرفش نبتدى ازاى بس هبتدى من اسم الشخص ... واللى كان اسمه عثمان بك البرديسى .. وكان واحد من مماليك الأخ مراد بك وما أدراكم من .. مراد بك ! مراد بك دا كان واحد من 2 بيحكموا مصر قبل دخول الحملة الفرنسية وجند نابليون وكان واحد م المماليك الجراكسة اللى ماصين دم البلد ودم ولادها
وأستحلفكم بالله .. أن تنظروا إلى هذا الحمل الودييييييع وتقولولى كدا لو كنت بفترى عليه ف اللى هقوله بعد شوية ولاّ لأ @i3bdelra7man حمل؟!!!!!! قصدك بغل "حمل" اسفارا الراجل دا لما عرف بمجيى الفرنسيس قام متمطع وراكب فرسه وقابلهم عند شبراخيت وأترن علقة معتبرة وكملوا من بعده لحد ما وصلوا القاهرة ودخلوها لا كان عنده جيش عِدل ولا كان عنده نخوة .. وبعد شوية مقاومة عبيطة تعب و جاب م الآخر و زى ما بيقول المثل لو بيت ابوك اتهد الحق خدلك قالب الجدع قالك البلد دى مش بلدى ولا تفرق معايا ولو الريح ف صالح الفرنساوية.. الحق نفسى وابقى حبيبهم .. وبالفعل يهادن كليبر ويعقد معاه اتفاق وبعض المؤخين بيقولوا ان لولا المهادنة دى مكنش كليبر نجح فى القضاء على ثورة القاهرة التانية بهذه الشراسة والخسة وحتى بعد ما الحملة تسيب مصر مهزومة مدحورة يبعت للإنجليز يربّط معاهم و أهو يطلع بأى مصلحة وخلاص .. والأنجليز يقلقوا ف الاول منه وبعدين يتفقوا معاه ... ولولا ستر ربنا وكرمه .. وموت الراجل دا بالطاعون 1801 ... الله أعلم بقى .. كان هيهبب ايه تانى ف مصر عشان يخربها ... !! @ahmed__saeed ملحوظه .... مراد بك عمرة ما انتصر فى حرب دخلها ابدا حياته كلها من اولها لاخرها سلسله متواصله من الهزائم بس تفتكروا مراد الرهيب دا .. هيموت كدا من غير ما يسيبلنا ذكرى وحاجة من ريحته ينكد بيها علينا ... ؟!! لا طبعاااا .. لازم يقرفنا .. والقرف كان من واحد من مماليكه .. واسمه عثمان بك البرديسى ... واتسمى كدا لأنه كان ماسك كشوفية برديس
وبرديس تبقى قرية تابعة لمركز البلينا محافظة سوهاج .. اللى باللون الرمادى وزماااان البلينا دى كان ليها شنة ورنة خصوصا ايام الفراعنة ومنها خرج مينا موحد القطرين .. قوم يميل بيها الزمن ويبقى البك عثمان محافظها وانتوا عارفين المماليك بقى .. أخلاق الدنيا وأدبها .. وذوقها .. وعدلها .. وعفتها .. وكل حاجة حلوة الحقيقة والعيبة متطلعش منهم ابداااااااا البرديسى كان فاكر اللى تحت أيده أبعدية أبوه وعايث فيها فسادا وبيغرف من الخير .. لحد ما جه الفرنساوية ومشيوا .. والعرش كان شبه خالى مش خالى قوى بس الصراع كان داير بين المماليك وبين العثمانين فلول دول وشراذم دول .. ومحمد على ف النص مستنى اللحظة المناسبة للإنقضاض ع الحكم البرديسى ف البداية تصور ان الساحة خليت له ومكنش منافسيه كتير .. بس بعد شوية ادرك قوة محمد على وحب يهادنه ويكون معاه ويدخل ف زوارقه أضمن اتقتل الوالى على باشا الجزايرلى اللى عينوه العثمانلية وحصلت اضطرابات وسافر محمد بك الألفى يطلب ود الإنجليز عشان يقعدوه على عرش مصر وسافر المخفى ورجع نافش ريشه ... وقرر محمد على يستخدم الحيلة عشان يقضى عليه ويضرب المماليك ببعضشيهم لصالحه هوه ويبعت محمد على الداهية لعثمان بك البرديسى ويعقد معاه صلح ويحلفوا ع الخاين والظالم وإبن الحرام اللى هيخون الإتفاقية دى ويغدر بصاحبه وبينما ينشكح عثمان م الحكاية دى ويقول خلاص كدا ناسبنا الحكوم وهتبشبش يا أبو البراديس .. ي كون محمد على بيعمل زى زكى رستم ف نهر الحب
لما طاهر باشا ساب .. الحبل لآمال حد ما أتلف حوالين رقبتها عشان يشتقها بيه ... وهذا ما حدث بالفعل بعد شوية يستخدم محمد على كل نفوذ عثمان البرديسى وعلاقاته ف كل مكان عشان يطارد محمد الألفى ويجيبه على بوزه ويتخلص منه ويهرب محمد الألفى من قبضتهم قدر امكانه ويستنى مدد الإنجليز .. ويموت قبل مجيي حملة فريزر مصر بأربع شهور وميلحقش يتهنى بحلفائه ويفتكر البرديسى انه كدا خلاص أظهر كل الولاء لسيده الجديد محمد على لكن ميعرفش يا عينى اللى مستخبيله من هذا الرجل أحدى مصايب الزمن محمد على خطط للتخلص من اعدائه واحدة واحدة .. تدريجى تدريجى لحد ما جاب مشهد الفينالة ف مذبحة القلعة بس البرديسى كان ف البدايات و حظه بقى انا بقول حظه فعلا وأقصدها لأن محمد على تخلص منه بطريقة مهذبة وشيك متجيش حاجة خاااالص لو كان قعد واستنى لحفلة القلعة اللى طيرت ليلتها ألف راس ف حتة أرض كدا ف الملتقى بين السيدة زينب وجاردن سيتى وف قلب شارع قصر العينى حاليا جه زمان الناصر محمد بن قلاوون وعمرها لحد ما بقت سكن الامرا ومن بعده المماليك تتطاحن وتهمل المنطقة وعلى ما يدخل الفرنساوية مصر تكون المنطقة دى بقت عبارة عن خرابات ومستنقعات ومصدر للحشرات السامة وتتسمى "تل العقارب" واللى لما يقتل سليمان الحلبى كليبر ياخدوه هناك ويحطوه ع الخازوق ويسيبوه ف المزبلة فى محاولة فوق الخسيسة لتحقير شأنه وتفضل المنطقة دى مكان للغوغاء والرعاع والحيوانات الضالة والحشرات الخ الخ .. لحد ما يمشوا الفرنساوية ويبتدى المكان يتغير ويسكن البرديسى فيه
محمد على يخده بالراحة خاااالص ويقربه منه وبعد ما تتم الأتفاقات بينهم ويتخلصوا من الألفى ... ينصحه انه يبنى أبراج على اركان قصره للحماية ويوعده انه هيبعتله جند من عنده عشان يقوموا بالحراسة ف الإبراج دى ومحدش عارف بكرة فيه ايه .. وانا احب أحمى الناس بتوعى .. وعثمان صدقه وبالفعل زى العبيط كدهون ... يبنى الأبراج ومحمد على يبعتله حراس شداد كل نفر فيهم زى الحيطة عشان يقفوا دوريات .. والهدف المعلن للحراسة اما الهدف المخفى فكان التحفظ على البرديسى ووضعه تحت السيطرة وقت الجد .. اذا ظهر منه أى بادرة غدر .. ومحمد على كان عاجن المماليك وخابزهم بقى وبس عنها وقعد البرديسى ف قصره .. يباشر مهام عمله .. ولبدله محمد على ف غيط الدرة مستنى اللحظة المناسبة للتخلص منه وروح يا زماااان وتعالى يا زماااان .. والنيل فى سنة 1804 يعمل حركة مش اللى هيه ومنسوبه ينقص عن كل سنة
قوم الزرعة متبقاش زى كل سنة والغلة تنقص والغلال تشح ف الأسواق وسعرها يزيد .. وطبعا انتوا عارفين المماليك الناس الأصلة الكومّل يسكتوا ... ؟!! لأ طبعا المصريين تتخنق من كتر القرف ... وضيق الأحوال ومنبقاش خلصنا م الفرنساوية والإنجليز واتنهبنا لحد ما قولنا يا بس .. واصلا مش ناقصكوا أصلها !! والبلد تغلى تحت السطح قوم ييجى الرايق الدماغ وحش الشاشة اللى قاعد ف الركن البعيد الهااادى سى محمد باشا على ويروح ضارب أسفين معتبرررر يبعت لريس العسكر الأرناؤؤط ويشربه شاى بالياسمين ويسأله عن احوالهم وازااااى متقبضوش مرتباتهم لحد دلوقتى دى مهزلة يا جرع انتوا ساكتين ليه ؟!!
قوم يخرج الراجل من عنده شايط وزعابيب أمشير ف وشه ويروح لامم عساكره وعلى قصر البرديسى يطالبوا بالمرتبات المتأخرة وإلا .... البرديسى يقع ف حيص بيص وكعادة كل المماليك الحونين علينا ... أخذ يفكر ويفكر .. ويفكر ويفكر .. وف النهاية قرر يعمل ضريبة جديدة يلم بيها فلوس ! وقفنا عند الضريبة الجديدة اللى نوى سى عثمان بك بطرس البرديسى غالى يطبقها ع المصريين الويحشين الكسوليين اللى عندهم على قلبهم شىء وشويات قعد يفكر ف الاول .. طب الأرض ومفيش زرعة السنة دى ولا فيه أى جديد .. طب ما نعمل ضريبة ع البيوت .. وكل واحد ساكن يدفع فلوس ... انه ساكن !!! طبق الأصل .. اللى عمله بوز القرد .. غالى ف الضريبة العقارية اياها .. !! وبسرعة عشان العساكر عاوزة أجرها ومش عاوز يزعلهم .. يبعت مهندسين الاحياء بعسكر يحميهم وبنايين .. ويبعتهم ع الأحياء وإذ فجأتن يبقى المصريين قاعدين ف دكاكينهم وف بيوتهم يلاقوا الناس جاية تقيس المساحات وتعد البيوت وتحط رقم لكل سكن هيندفعله كام ...
والناس ابتدت تستوعب وتضج م المنظر وصوتها يعلى .. ونظام منكو لله .. ونجيبلكوا منين .. وخدوا الهدمة اللى علينا .. وحسبى الله والموروث الشيعبى دا كله وجرى شوية م الناس على شيوخ الازهر ... اللى أفتى بعضهم بشهادة حق ان دى أتاوة وفردة وحرااااام .. ومحدش يدفع يا جماعة
ويتحرك الكتبة والمهندسين نواحى باب الشعرية ويبقى هاااار أبوهم كحلى بقى ويستاهلوا اللى جرالهم !! عشان مش بس الرجالة والعيال اللى هيطلعوا عليهم دا الحريم كمان هتطلع تجّرسهم وتعملهم زفة معتبرة .. ولنا .. هنا ... وقفة
الا كل بلد فيها ستات .. الا ستات مصر شكل تانى .. وكل حى و له حريمه .. الا احيائنا الشعبية بقى .. وحريمها !! الحريم ف الشوارع خرجوا من البيوت بالدفوف .. والمغارف عشان يخبطوا بيها على غطيان الحلل .. طلعوا ورا المهندسين والكتبة ولونوا ايديهم بالنيلة .. ودى صبغة زرقا ومعرفش ليه ... بس يمكن لأرهاب الخصم ولاّ حاجة .. حاجة نظام التراس حريمى ولا إيه متعرفوش !! المهم الحريم والرجالة والعيال كله اجتمع على هتاف واحد ومفيش غيره .... إيش تاخد يا برديسى من تفليسى ... اللهى يخربيتك يا شيخ واللهى تنوكس ويقفل المصريين الدكاكين .. وفجأة ينتشر العسكر فى الشوارع فالناس تخاف وتتوجس فالعسكر يطمنوهم ويقولوا احنا مشكلتنا مش معاكم احنا عاوزين فلوسنا ومثورناش ع البرديسى عشان ياخد منكم ... احنا عاوزين فلوسنا منه هوه ... فالناس تطمن وتكمل ثورة قوم ف وسط دا كله بقى البرديسى توصله الاخبار ... فدمه يتحرق ولسه كان عيشرب شيشة ويوزن دماغه .. فيبلغوه الاخبار و يعكننوه .. يا عينى فيعمل زى الله يمسيه بالخير ويبشبش المخدة اللى تحت راسه ويقول : انشالله ينحرقوا هيدفعوا يعنى هيدفعوا .. ايه المياصة دى ويا انا يا انتا يا شعب كان مطمن وحاطط ف بطنه شادر بطيخ .. وفاكر ان محمد على ف ضهره ... وهوه ان فعلا كان ف ضهره ... بس ماسك سكينة وبيستعد لطعنه محمد على بكل صياعة وادب وهز إكتاف يطلع للعامة ويعلن انضمامه ليهم #راجع _ثورة يناير_باب_طنطاوى _فصل_العسكر ويقولهم ازاى يحصل كدا ؟! فيطالبه الناس بالتدخل ... يا سيادة المشييييير كفاية كدا ... يوه .. قصدى يا سى محمد أتصرف وإعمل حاجة ف برديسك دا !! عنها وخد الكلمة من بوقهم وهما اللى قالوها بلسانهم .. يا محمد يا على إتدخل واحمينا م الراجل دا وظلمه .. بسسسسس كدا وموشكرين يا شعب وبعت عساكره .. من برا تقتحم قصر البرديسى عشان تجيبه من رقبته قوم يساعدهم مين ؟ الحراس الشداد اللى واقفين ع الأبراج فوووق هناك دول فاكرينهم؟ #واللعنة_ع_الأبراج ف البداية ... البرديسى كان ف أمان الله لسه مبلغوش أخبار انقلاب محمد على عليه . ويبقى يا نضرى قاعد يسب وبيلعن ف أبوخاش المصريين الرعاع ويقول لازم أطبق الضريبة دى تلات سنين وهيدفعوا يعنى هيدفعوا ودماغه التركى تصورله البشاعات اللى هيعملها فيهم ويقرر يسيب قصره عشان يغير جّو ويروق مزاجه اللى عكره الغوغاء دووول ... ويقرر يخرج يروح لبيت ف مصر القديمة .. وقبل ما يمشى يبعت لرجالته الجهات القبلية والبحرية يجوله ضرورى محمد على يوصله الاخبار ويبعت لعسكر الأرناؤؤط ويحطوا خطة لحصار البرديسى عشان ميخرجش من بيته حى والا انقلب عليهم وعملهم مشاكل كبيرة ف البلد ! ثورة العوام بدأت يوم 8 مارس وبعدها بيومين ف 10 مارس كان جند الأرناؤؤط ملموين ف الأزبكية وبيحضروا نفسهم للهجوم على قصر البرديسى واقتحامه والناس تتخض وتقفل دكاكينها وتقعد ف البيوت عشان المنظر لا يبشر الا ببركة دم .. وربنا يستر وع الناحية التانية يسلح البرديسى خدمه وعسكره الخاص ويدفع فلوس لبلطجية من العوام ... وتاااانى #انظر_ثورة_يناير_باب_الحزب_الوطنى_فصل البلطجية وكان لسوء حظه ف اليوم دا واحد من امرا المماليك اسمه عثمان بك يوسف وقاعد عند البرديسى ف قصره بيحكوا الحكايات والبرديسى بيشتكيله غدر الزمن وفجأة وهما قاعدين فى آمان الله .. البرديسى سمع صوت غريب قام ناحية واجهة القصر يشوف فيه ايه ويقول لعثمان بك يوسف خليك انتا قاعد انا راجعلك ويبص من ورا ستارة الشباك يلاقى العسكر واقفين بترسانة سلاح وناوينله ع الشر .. وجنوده اللى ع الأبراج بيفتحولهم البوابة !!! بس راح واخد بعضه وديله ف سنانه ولم روحه وقال يا فكييييييك ... وساب مين قاعد مستنيه ف السالون وبيشرب الكهوة ولسه بياكل ف حتة الكاتوه مخلصهاشى .... ؟!! أيووون .. اسمالله عليكم ... الغلبان البائس .. عثمان باشا يوسف اللى أذ فجأتن يلاقى رصاصة جاية على وشه .. ويتفاداها بأعجووووبة #نظام_فيلم_ماتريكس_وكدا ويرفع راسه يلاقى عسكر رافعين ف وشه السيوف والبنادق ويقبضوا عليه هوه وخدم البرديسى ومماليكه وخدوهم وزى ما بيعمل عسكر دلوقتى عمل عسكر زمان كل بهدلة ممكنة شافها من الطريق من قصر البرديسى لحد المطرح اللى خدوه فيه وغالبا كان س 28 بتاع زمانه وقلعوه هوه واللى معاه هدومهم وهات يا ضرب والراجل خلص ف إيديهم .. من غير ذنب غير انه كان ف قصر البرديسى الندل اللى سابه وهرب ع الصعيد وفضل هربان هناك لحد ما مات 1806 وبقول يحمد ربنا لأنه لو كان استنى كان هيموت برضو ف مذبحة القلعة بعدين فتعددت الأسباب والموت على يد محمد على واحد !
أصل الراجل دا كان نابه ازرق ومحدش فلت منه ويظهر ان كان عنده عقدة من الطفولة من حكاية الأصحاب والأصدقاء والأتباع دى حد يبحثلنا ف الحكاية دى يا جماعة ... !! وبعد موت البرديسى .. القصر بتاعه يتنقل بين ملكيات عديدة وينتهى بيه المآل لأنه يبقى مسافرخانة يعنى فندق لأستقبال اللى عاوز يبات ف القاهرة
وييجى الخديوى اسماعيل يحّول القصر لمدرسة ويسميها مدرسة "المبتديان" واللى تعنى بالتركية " الأبتدائية " ويتسمى الشارع على اسمها شارع المبتديان
وبعدين تتنقل المدرسة ويتحول القصر من ملكية مدرسة المبتديان ... لمدرسة تانية هيا مدرسة السنية الثانوية بنات .... عشان تفضل بنات السنية ... محتفظات بهذا القصر من وقتها لحد النهاردة
وحدث ولا حرج بقى عن مدرسة السنية دى وبناتها ودورها ف ثورة 19 .. الخ الخ الخ ويروح البرديسى ف غياهب جب التاريخ وميرجعش .. الا لما ف كل مرة ينداس ع المصرى قوووى ويبقى على آخره .. تلاقيه يطلع نفس الهتاف بتاع جده من 200 سنة ف لحظة ويقول إيش تاخد يا برديسى من تفليسى !!! وتوتة توتة ... خلصت الحدوتة .. تصبحوا على خير
حدوتة النهاردة مش جديدة واغلبكم عارفها وحافظ تفاصيلها بس النهاردة هشوفها من زواية تانية .. انسانية .. يمكن اكتر منها سياسية .. والحكاية تبدأ من هناااااااااااااك من عند الراجل دا اللى بيشتغل ف صناعة أوشكت ع الأنقراض الا فيما رحم ربى
يعنى حذاء من الخشب كان بيلبسوه الناس زمان كتير بداية من الغلابة لرخص تمنه ..
ولحد الصفوة والأغنياء بس بعد ما يدلعوه ويطعموه بالفضة والحرير
ويعلوه عشان يفرق عن العامة
وتظهر موديلات للجزم اشكال وألوان عبر العصور وينحسر دور القبقاب ويفضل ف المساجد بس عشان الناس تلبسه وقت الوضوء .. وفقط ويرجعلنا ف أشكال تانية ف الوقت الحالى ويبقى موضة ويدلعوه ويقولوا سابوه وابصر ايه كدا .. المهم انه قبقاب برضو !! والقبقاب هيلعب دور رئيسى ف حدوتة النهاردة .. من حيث إستخدامه .. اذ انه مش هيبقى مجرد حاجة تتلبس ف الرجل واحنا داخلين الحمام .. لاااااااااااا لاااااااااا يا بابا لاااااااااا .. دا هيستعمل كسلاح بتار وناجع ... هينهى حياة اتنين من أقوى الشخصيات ف حياة مصر ف مرحلة فاصلة بين دولتين
القبقاب دا ... هيكونله الكلمة الأولى والأخيرة فى مصير اتنين ... خرجت بيهم مصر من الدولة الأيوبية .. وبدات بيهم دولة المماليك ... دولة المماليك اللى هتكبس على نفس مصر من سنة 1251 .. ولحد 1517 لما يتشنق الغلبان طومان باى على باب زويلة ومصر تبقى عثمانية
واكيد خمنتوا ان الحدوتة عن شجر الدر الشهيرة بشجرة الدر .. وجوزها إيبك أفندى ... بتاع التردد .. التردد يا عزيزى أيبك مرض الجنس البشرى وتحية كاريوكا وهيا بتدى جوزها كلمتين ف جنبه .. ستات مفترية مفترية يعنى والفيلم فيه تفاصيل مش حقيقية لو قارناها بكتب التاريخ ورواية المعاصرين وقتها .. وهنحكيها الليلة دى ف قصة الدماء والغيرة والقباقيب القاتلة فاصل لدقائق طيب .. عشان الناس اللى بتعمل كوباية شاى .. واللى عاوز يروح الحمام .. الخ الخ الخ :) طشيب نكمل القبقاب اصطلاحيا معناه الحذاء المصنوع من الخشب .. بس لغويا من اشتقاته القبيب .. يعنى الصوت .. ويمكن اتسمى قبقاب لكدا !! اكمن اللى لابسه بيعمل فضيحة وهوه ماشى تسمع جيران الجيران بقى وتصحيهم من أحلاها نومة وحد يقولى ليه خشب وليه عالى ومزعج يا فطمطم ؟؟
اقوله خشبه دا عازل للمية .. وعالى عشان يبعد القدم عن أى نجاسة واللى من جيلى بقى او اتعسه زمانه ودخل حمام بلدى يعرف هذه المأساة جيداااااا ويعرف ان القبقاب هوه احسن وسيلة للخروج من محيط الحمام البلدى سليما معافى لأنه هيرحمك من أى تواصل مع الأرضية واللى عليها ... واللى بيتغدى او بيشرب شاى ميقولش يعععع وايه القرف دا والحركات دى .. خلاص بقى ظروف بلدنا ولازم نستحملها مش كلنا مواليد الزمالك ومصر الجديدة يعنى .. ! والقبقاب بطل حكايتنا تم استعماله ف حمام اعلى راس ف مصر وقتها ... بس قبل ما نوصل لدا .. نرجع فلاش باااااك ونروح لحد المنصورة واللى فيها وتحديدا سنة 1249 لما الأخ لويس التاسع استجرى وفكر ييجى مصر ويحتلها واتعكش ف المنصورة واتحبس رهينة ف دار ابن لقمان كان اللى قاعد على عرش مصر وقتها .. نجم الدين أيوب .. آخر عنقود الدولة الإيوبية والملقب بالملك الصالح وكان غاوى يشترى مماليك ويدربهم ع القتال لمهارتهم وشطارتهم ف فنون القتال وبمشاركة اهالى المنصورة نجحوا ف صد الغزو اللويسى التاسعى وأبلوا بلاءا حسنا وزى الفل يا منصورة وفى هذه الأثناء وف عز المعارك الدايرة ع الجبهة المنصورية ... يمرص الملك الصالح ويطلع السر الإلهى .. فتقرر مراته انها تخفى أمر موته عن الشعب
والست مراته .. الجماعة .. الحكومة يعنى .. كانت زى منتوا عارفين تبقى الست الفاضلة الكومل شجر الدر الشهيرة عندنا بشجرة الدر واللى كانت جارية جذورها كعادة الجوارى غير مؤكدة ولا معلومة بس يقال أرمنية او جركسية .. المهم كانت ست حلوة وذكية وشاطرة وأوربة كانت مجرد جارية واشتروها .. وبس ياختشى دخلت ع الراجل من هنا وكلت دماغه من هنا وبقت محظيته ومالكة قلبه واتجوزها وخلف منها ولد سموه .. خليل سموه .. مش سمموه ... هه .. والولد دا للأسف او لحسن حظه الله اعلم .. هيموت بعد أبوه بسنة واحدة يعنى سنة 1250 وينتهى ذكره م الدنيا المهم .. شجر الدر ام شخصية قوية و بأس قررت ف لحظة عصيبة من تاريخ البلاد انها متقولش ان الملك الصالح مات .. خوفا من أى انقلاب تروح هيا ضحيته والمماليك ف المنصورة .. راحت باعته للى بتثق فيهم منهم وشاورتهم وقرروا يبعتوا للاخ توران شاه ابن الملك الصالح واللى يعتبر ولى العهد والوريث
كان قاعد ف حصن اسمه حيفا ع الحدود التركية كدا .. قالوله ارجع ابوك مات وسابلك عرش مصر تعالى ومعاك اعلام الوارثة واستلم التركة يا سى توران ويسيب توران شاه الحصن الجميل اللى ف الصورة دا ويرجع طيراااان على مصر ياخد مطرح ابوه والناس المتربية ولاد الأصول ف الاحوال دى المفروض لما يرجعوا ويلاقوا الناس التانية محافظلهم على حاجاتهم المفروض يعملوا ايييييه ؟؟ المفروض يقولوا شكرا وميرسى وكتر خيركم ... وكدهون .. لكن توران شاه بعيد عنكم كان طايش وأهوج وأرعن ودماغه لاسعة قوم ايه ... !
بدل ما يجيب اتنين كيلو تفاح و علبة شكولاتة من جروبى ولا قويدر ويخش على شجر الدر ويقولها مصاء الخير يا نينة ويبوس ايدها ويقولها موشكرينلك راح قالب ع الوش التانى وابتدى يرخم عليها ويضيق عليها الخناق عشان يقلص من نفوذها لحد الست ما طفشت من وشه العكر ... على بيت المقدس توران شاه رجع من حصن كيفا على المنصورة وشارك ف اتمام النصر .. وانتهى المقام بيه ف القلعة عشان يحكم ..
بس مماليك ابوه مكنوش طايقينه وهوه راخر كان متدلع وقليل الأدب وصايع فاكر البلد عزبة ابوه والمماليك بقوا خدامينه بالتبعية وزى ما تقولوا كدا سيف الإسلام القذافى بتاع زمنه كان بتوعد منهم المماليك البحرية تحديدا اللى هما مماليك ابوه .. ويسكر ويمسك سيفه يقسم الشموع شمعة شمعه وكل شمعة يسميها باسم مملوك .. ويقول هموته المماليك اتلموا وقالوا لازم نخلص منه المهروش دا ونحلقله قبل ما يحلقلنا .. وقروا الفاتحة ع الخاين بمباركة شجرة الدر الهربانة ف القدس عنها بقى والواد توران شاه يصحى الصبحية يقول فطرونى .. علشان الحق أتغدى .. فيتلم عليه كام مملوك من المماليك البحرية ويقطعوله صوابعه !!!
الواقعة دى حصلت ف فارسكور يا عيال ... طبعا توران هرب من قصادهم وجاب الحكمة يخيطلوه جرحه .. وهرب على برج مخصوص للعسكر ف فارسكور واتحصن فيه .. يسكتوشى ؟!! لأ .. يجروا ع البرج ويروحوا مولعين النار فيه .. الجدع يوشك يتشوى .. فيطلع على أعلى نقطة ف البرج وينكشف للمماليك فيرموه بالسهام .. يعمل ايه ؟ قالك مبدهاش بقى .. وراح رامى روحه وواقع قصاد مدخل البرج .. واتحامل على نفسه وجرى ناحية المدخل بتاع البرج وهوه بيصرخ .. مش عاوز المُلك خلااااااص مكنش معاه راية بيضا بس صرخ بأعلى صوته انه مستسلم وخلاص انهزم وسيبونى ف حالى .. بس ولا الهوا السهام كانت نازلة ترف عليه من المماليك الشيك الرومانتيك على رأى عم صلاح جاهين ...
والراجل اتعلق ف فرس أقطاى وطلب حمايته .. فإستندل اقطاى ... واتخلى عنه انتوا عارفين طول عمر محمود المليجى شرانى وشيرس
رجع بالفرس خطوتين وساب باقى المماليك يخلصوا عليه وجثته قعدت جنب البحر ايام لحد ما دفنوها .. وراح توران شاه ف الباى باى .. والوضع يتغير تماما دلوقتى الموقف كالاتى .. الملك الصالح مات وابنه توران شاه الوريث مات واخوه خليل ابن شجرة الدر عيل مكملش 10 سنين ومفيش حد كدا طب وبعدييين ! المماليك اللى اشتراهم الملك الصالح عشان يبقوا عساكره وايده القوية .. مكنوش مهما بلغ طموحهم يستجروا يفكروا ف اعتلاء العرش الإيوبى !!! ومكنوش لسه يعرفوا ان هتيجى الست القوية اللى اسمها شجر الدر دى عشان بإيدها تحط خاتمة للدولة الايوبية ويبتدى بيها حكم المماليك لمصر .. الست شجر تبادر وتلم مماليك جوزها وتتفق معاهم يسادنوها وتنصب نفسها سلطانة على حكم البلاد .. وتعيش الدور لحد الآخر هيا اصلا كانت سر الملك الصالح وبيشورها فى حاجات كتير وكانت بتسير شئون الدولة اثناء الحرب وهوه عيان وبعد موته وانت شاطرة و واعية حاولت تحافظ على استقرار البلاد واستغلت حالة الفرحة بالنصر على الأعداء ف المنصورة وسكت عملات بإسمها واهتمت بالغلابة والفقرا وادت لروحها شوية القاب منها لقب "ام خليل المستعصمية" نسبا للخليفة العباسى المستعصم اللى حاولت تحصل على رضاه عشان يسيبها تحكم انما على مين !! الراجل طبعا معجبوش المنظر وراح باعتلهم الجملة الشهيرة بتاعت لو ان الرجال عدمت عندكم قولولنا نبعتلكوا رجالة من حزب النور والاخوان و كدهون
والمستعصم دا يحمد ربنا انه مش موجود ف زماننا والا كانت كل المنظمات النسائية وحريمات مصر راحوا لباب قصره باليفط وغطيان الحلل بقى :))) المهم .. شجر الدر أسقط ف يدها والحكم بيتسرسب من بين ايديها ومش هترجع تتلطم تانى ومصيرها يبقى ف مهب الريح .. راحت باصة حواليها وقالت يلا ... هوه مش الخليفة عاوز راجل يقعد ع العرش ... اجيبله راجل يقعدله ع الكرسى .. واحكم انا معاه ونخلص .. بس تتجوزى مين يا شوشو تتجوزى مين ؟؟!! تتجوز أيبك مقدم العسكر بتاعها طبعا .. وبس بقى اعملوا متفاجئين ومكنتوش عارفين واتخضيتوا وكدا !!! وعنها تقام الأفراح والليالى الملاح ويتجوز أيبك سته شجر .. بعد ما تتشرط عليه يطلق مراته ام على والقصة دلوقتى هتاخد منعيطف تانى خااااالص قال بيقولك ف المثل .. مركب الضراير سارات ومركب السلايف بارت .. ومش حقيقى خلاص الكلام دا .. مركب الضراير ف مصر غرقت ف المالح ومقبتشى حضرتكو والست شجر الدر صحيح كانت وذكية و واعية .. بس الحلو ميكملشى ... ف النهاية برضو .. هيا ست وبتغير على رجلها
يعنى راخر برضو أيبك دا اتمسكن لحد ما أتمكن .. يعنى انتا يا عماد يا حمدى عارف ان شوشو بتغير من أى ست تشاركها جوزها .. مش تتلم طيب وتحترم نفسك ؟!!!
لأ الراجل يا ختشى اول ما طلع القلعة فرد قلوعه ورجع الست ام على لعصمته تانى واتحدى شجر ومش يسكت بقى وكفاية كدا ...؟!! لاااااااا دا يطرطش الكلام ويوصل لودانها ان حضرته ناوى يناسب صاحب الموصل بدر الدين لؤلؤ ويتجوز بنته ..!!!
كدا يا أيبك يا خاين يا ناكر الجميل تقهر شجر الدر كدا والست تتمقت لحد ما تبقى بالمنظر دا لأ بجد أخص عليك اخص !!! وتحصل المواجهة بينهم .. وبدل ما يخش عليها موطى ومعاه بوكيه ورد ويقولها حقك عليا يا جميل .. لأ يكمل فاصل الندالة لحد آخره ويقولها لمى هدومك وهتنزلى م القلعة عشان العروسة الجديدة عتقعد مكانك !!! لأ بجد .. دنتا هااااارك اسووود وتستاهل اللى يجرالك بقى ... #وغد_وغد شجر قعدت ف ساعة مغربية واستهدت بالله وقعدت تفكر ... اعمل ايه ف الراجل دا .. أعمل ايه ؟؟ واخيرا هداها تفكيرها كأى زوجة أصيلة لأنها .. تدبحه وتقطعه وتحطه ف أكــــــــياس .. ودا أقل واجب ينعمل معاه الصراحة بس نظرا لأن الطريقة دى مكنتش منتشرة اياميها ونظرا لأنه كان اقوى من انها تقتله علنا بسكينة تدبها ف قلبه القاسى دا .. فقررت تبتكر طريقة تانية ف البداية دورت على مساعدين لإتمام المؤامرة وكانوا من خدمها ومماليكها .. وبعتت لسى إيبك تسترضيه وتقوله انها موافقة على كل شروطه بس يرضى عنها ومعرفش الحقيقة ازاى صدقها وآمن ليها ... هل كان غروره اللى عاميه ولا فعلا .. ساعة القدر يعمى البصر زى ما بيقولوا ف المثل ؟!! المهم سى أيبك راحلها .. وكلمتين حلوين .. اتصالحوا .. ويدخل الحمام لآخر مرة ف حياااااااته .. ونزل المغطس (البانيو حاليا ) وفجأة الدنيا غيّمت
ولقى فوق دماغه كام مملوك كتفوه وانهالوا عليه بالقبقايب اللى كانت أقرب سلاح .. ويبدو انهم مكنوش عاوزين يدبحوه ويطرطشوا دم ف الحمام ولاّ ايه ! وأيبك يستغيث بشجر .. اللى وقفت تتفرج عليه وهوه بينضرب .. وكادت ان ترق له وقالت لمملوك فيهم كفاية .. فالمملوك شخط فيها لو سيبناه .... هيقتلنا كلنا !! وسابوه جثة هامدة .. وخرجوا وشجر الدر بسرعة تدور على حد من مماليكه المقربين ليها عشان يمسك بداله .. وتربط معاه قبل اعلان موت أيبك .. متلاقيش
كلهم يخافوا ويترعبوا ليتهموا بالخيانة .. فتعلن شجر الدر تانى يوم موت أيبك موتة ربنا .. وطبعا المماليك المعزية بتوع أيبك ميصدقوش الهجص دا !! فيهاجموا القلعة عشان يفتكوا بشجر الدر ... فيمنعوهم مماليك الملك الصالح جوز شجر الدر الأولانى .. فاكرينه ؟! .. وتهرب شوشو على البرج الاحمر
والبرج الاحمر دا اللى هوه حاليا اسمه برج المقطم وبنعدى عليه دايما وخليكم فاكرينه كويس .. عشان ف البرج الاحمر دا الست شجر الدر هتتحصن وتدرك انها خلاص كدا انكشفت وميتة لا محالة .. فتلم جواريها وتعمل حركة غريبة قوى من حركات الستات ! تسمع ان ابن ايبك المنصور واللى مكنش اهبل ولا حاجة واللى كمان كان عمره 15 سنة هيولوه الحكم .. والست ام على مرات ايبك الاولانى وضرتها .. عمالة تحث المماليك المعزية على قتل شجر والقصاص ..
وشوف الستات والهيافة بقى آل تجيب الشكجمية بتاعتها وتطلع كل مجوهراتها وتحطها ف هون وتخلى الجوارى تدقها لحد ما تبقى تراب وتروح راميهم من شباك البرج .. آل أيه يا خويا عشان ام على متلاقيهموش وتروح لابسهم هيا .. شوف ازاااااى !!!! وتويتة مستقطعة بس ضرورية .. انا صحيح م الحريم بس كلمة حق تقال .. الست تفضل ست ملكة جارية .. هيا هيا .. انثى بتغير غيرة تعميها عن أى منطق ومتقوليش حكمت ومحكمتشى .. و دى كانت عاقلة و حكيمة ومتزنة .. لأ معلش .. الغيرة مُرة وقاتلة ولو كلفتهن حياة احبائهن وحياتهن هن شخصيااااا المهم .. ابن إيبك والمماليك بتوع والده يحكموا .. وأم على تنهش قلبها نار الأنتقام .. وف ليلة سودة تأمر جواريها يدخلوا ع البرج الاحمر والحراس يستعبطوا ويكونوا قابضين طبعاااا .. وتدخل الجوارى على شجر الدر ويقفلوا عليهم الباب من جوا بالترباس يا ثااااااامح ويتلموا حوالين شوشو وزى محمد صبحى ف وجهة نظر كدا .. جزمات يا .. دول بقى .. قباقيب يا ... ونزلوا بيها عليها ضرب ضرب .. و مفيش شتيمة وفى هذه الأثناء التحقيق يتم مع الخونة اللى قتلوا أيبك وافتح المحضر واكتب الآتى اساميهم : محسن الجوجري وناصر الدين حلاوة وصدر الباز والعزيزي ويعدم أول تلاتة ويهرب الرابع ع الشام ... اما شجر الدر ... فبعد ما تسقط جثة هامدة وهدومها تتقطع وينكشف جسمها و تشيلها الجوارى هيلا بيلا
ويرموها من شرفة البرج الاحمر فتقع على تل الزبالة اللى تحت البرج .. ويسرق باقى هدومها الحرامية و تفضل جثتها ايام متعفنة لحد ما يسمحوا بدفنها
وتندفن شجر الدر فى ف مقبرة عملتها بنفسها و ترقد جنب إبنها خليل ... وتنتهى سيرتها م الدنيا وسبحان المعز المذل .. ! دى كانت موتة اللى كانوا بيدعولها : واحفظ اللهم الجهة الصالحية ملكة المسلمين عصمة الدنيا والدين أم خليل المستعصمية صاحبة السلطان الملك الصالح وكانت سلطانة على مصر لشهور قبل ما يحكم أيبك ... وليها شنة ورنة وسطوة ونفوذ ... , تنقتل بنفس السلاح اللى قتلت بيها جوزها فى لحظة غدر وتآمر
لكن يحسب لها مثلا .. ان فى عصرها بدأ تسيير المحمل لكسوة الكعبة الشريفة بشكل سنوى وفضلت العادة دى ف مصر لحد حكم عبدالناصر وهيذكرلها ف التاريخ انها كانت اللحظة الفاصلة بين العصرين الأيوبي والمملوكى وهيا اللى جابتلنا المصايب دى وحدفتها علينا الله يرحمها بقى ويتحسبلها كمان انها بتعرفنا ان مصر دى فيها حاجة غير كل بلاد الدنيا .. وازاى كانت مطمع ومغرية لدرجة خروج البشر عن التقاليد والسعى لحكمها ورغم انها ست .. وقبلها كانت حتشبسوت ست .. لكن دا ممنعش أى واحدة فيهن انها تطمع ف حكم هذا البلد اللى مش عادى ... وبيعاقب حكامه ويتحسبلها كماااااااااان انها ست مبتكرة ... يعنى الموت بالقباقيب دا فكرة فُللى قوى .. ولازم نرجع القباقيب البيوت تانى ومتبقاش حكر ع المساجد وبس :)) لأ استنوا اهم حاجة ف القصة دى ... الحريم تيجى على جنب خلاص سلخنا شجر وقولنا اللى فيه القسمة .. الرجالة بقى يتدلعوا شوية يعنى حضراتكم توران شاه .. دا منظر حكام تحكم دى ؟!!! والاخ أيبك ... دا كووووووووووووم لوحده يرضيكم يبهدل معاه بنات الناس كدهون ؟!!!!
ولاّ الست ام على طيب الله ثراها اللى احتفت بموت ضرتها واخترعتلنا آكلة ام على .. اللى كل ما باكلها احس انى قاعدة ف عزا !! كلهم بقى سبحان الله يجروا ورا الكرسى وف النهاية يحكم ابن ايبك فييجوا التتار فيحكم قطز ويحاربهم ويهزمهم ... وينقتل وياخدها واحد تالت خاااالص .. هوه بيبرس ! و تصبحوا على ألف خير ..
