قصة النهاردة عن احد حكام مصر
صحيح بس على قد ما أثار احتقارى
على قد ابنه ما عجبنى ... جداااا
ونبدأ من الجد اولااااااا
والجد قبل ما يبقى جد .. كان أب
وهوه الخديوى اسماعيل اللى لما مسك مصر
كان يلقب بالوالى ... بس
ولما قرر يعمل لنفسه امبراطورية
كان عاوز يخليها وراثة ف عياله وبس ...
ومحدش يقاسمه من باقى اسرة محمد على
وعمل كل جهده للوصول للصفقة دى
عزم السلطان عبعزيز ف مصر
وسمى شارع بحاله بأسمه
وسافر الأستانة وبدر المال يمين وشمال
هوه وست الحاجة نينة ام اسماعيل لحد ما خد الخديوية
ومصر بقت عزبته الخاصة
بعد موته يتوارثها اولاده واحفاده ... الخ الخ
وكان النظام المعمول به عند موت الاب ..
أن يرث أكبر ابنائه
.jpg)
الخديوى سماعين ربنا يديله الصحة
زى ما انتوا شايفين ف الصورة دى كان عنده أورطة عيال
واللهم حسد حسد يعنى
أكبر اولاد اسماعيل كان ... توفيق
و بعده بسنة واحدة أتولد أخوه الأصغر ... حسين كامل
وبكدا يبقى الاحق بالعرش الولد الاكبر
حسب النظام والأصول
ولاد اسماعيل كانوا بيشاركوه الحكم بأشكال مختلفة
وطباعهم كمان كانت مختلفة
منهم العصبى زى حسن ..
والمتدلع زى توفيق ..
والحمول الصبورالمهاود
زى حسين
"الأمير حسن كامل"
ان حسن طلع م المولد بلا حمص
وان حسين كامل كان حمار الشغل
وان توفيق هوه اللى لهط كل حاجة ف عبه ... !!
وقد كان ... لما قرر الباب العالى بضغوط اوربية
انه يعزل الخديوى اسماعيل
كان الأختيار ان توفيق يمسك مكانه
وبعد توفيق ... حسب القواعد برضو
قعد ع العرش ابنه ... عباس حلمى التانى
وعباس حكم حوالى 16 سنة
وف ليل .. خطط الانجليز لخلعه من العرش بصناعة خباثة
وقبل ما نقول حصل كدا ازاى
نرجع ورا شوية عشان نتعرف على اللى جه بعده
حسين كامل
حسين كامل هوه الأبن التانى للخديوى اسماعيل
واتولد ف نوفمبر 1853
ف سن ال8 سنين بعته ابوه مع باقى اخواته
واطفال العيلة لمدرسة خصوصى اتعملت ف قصر المنيل
وقتها .. لتعليم ولاد العيلة
وبعدها انتقل من مدرسة للتانية يتعلم فيها قدر الممكن
من اللغات والعلوم .. الخ الخ
واختتم دراسته بمدرسة القلعة عشان يتعلم فنون الحرب
وبعته الخديوى اسماعيل فرنسا
ف ضيافة نابليون التالت امبراطور فرنسا
وصديق بابا بقى
اللى علمه فنون القتال بالفرنساوى :)
ورجع حسين من فرنسا مع ملوك وامراء أوربا
لحضور حفل افتتاح قناة السويس
وكان شغال ترجمان خصوصى لباباه والضيوف
رجع فرنسا تانى عشان يكمل دراسته
والحرب قامت بين انجلترا وفرنسا
فرجع لمصر سنة 1870
عشان يشارك ف مشروع ابوه الكبير القاهرة الخديوية
ومش بس القاهرة
مصر كلها اللى شهدت نهضة ف اكتر من مكان
ويبدو ان حسين كان مجتهد جدا
و حمار شغل زى ما قولنا
فأبوه كلفه بمهام كتير
يعنى مثلا
الاول .. اتعين مفتش عموم وجهى قبلى وبحرى
بعدين .. جنب التفتيش بقى ناظر للمعارف والأوقاف
بعدين تفتيش ومعارف وأوقاف وأشغال عمومية .. !
كل دا كان سنة 1872
بعدها بسنة يعنى 1873
ساب المعارف والأوقاف
واكتفى بالأشغال العمومية
بعدين مسك نظارة الحربية .. !!!
سنة 1875 بقى ابوه مسكه جنب الحربية نظارة البحرية
وف 1876 مسكه نظارة المالية وسحب منه البحرية والأشغال وف 1877 اداه الحربية والمالية !!!
وسؤال بسيط طرأ ف ذهنى
يعنى ... هوه حسين كامل دا ملوش أهل يسألوا عنه .. ؟!!!
دول لو شارينه ميعملوش كدا ف الولا ... !
المهم
يبدو ان الحاج أبو السباع كان بيثق فيه قوى
ويبدو كمان انه كان عاوز حد يحشر مناخيره
ويبقى راس براس مع اسماعيل المفتش اللى كان داهية
المهم .. حسين كامل أنجز
وهوه ماسك الأشغال العمومية
وعمل خد سكة حديد القاهرة حلوان
وكمان اهتم بالأرض والفلاحين لحد ما بقاله شعبية كبيرة
ومن كتر محبة الشعب البسيط له سموه :
ابو الفلاح
كتف بكتف مع ابو قردان "صديق الفلاح "
كدا :)
ف عهد الأب حسين كامل مسك مجلس شورى القوانين
وكان شخصية مش هينة
وأبوه لما حب يخلص من اسماعيل المفتش
اوكله بالمهمة دى هوه
واخوه حسن
وكنا حكينا القصة دى قبل كدا
وازاى ان اسماعيل المفتش اختفى بعد اليوم دا
ومبنلوش أثر ولا لقوا جتته
المهم .. تروح الأيام وتيجى الأيام
ويلم اسماعيل العيال حواليه
ويقولهم اخوكم توفيق هوه اللى عليه الدور من بعدى
واوعدنى يا حسين تنفذ وصيتى
فسى حسين يقوله حاضر يا بابا .. اللى تشوفه
وربنا يديك طولة العمر
وانشالله يومك قبل يومى
والأفلام دى
قوم ييجى ف يوم الناس ف أوربا والدول المتقدمة
تغضب ع الخديوى اسماعين
وتقوله اكسو برا وكفاية عليك كدا
وهنولى من بعدك توفيق
وحضرّ الشنط بقى
اسماعيل يتلقى الصدمة
ويلملم ف حاجاته وقبل ما يسافر على ايطاليا
يبعت حسين يسند اخوه ف المهمة التقيلة
وهى حكم مصر ف الظروف دى
حسين كامل يقرر الرحيل مع والده على ايطاليا
ومنها إلى الآستانة
بس قبل السفر يحضر حفلة تنصيب توفيق ف القلعة
ويبارك العهد الجديد وكدا
ويرافق حسين كامل ابوه ف رحلة المنفى
ويرجع مصر قبل وفاة اسماعيل بسنة واحدة ... بس
وتوفيق يمسك 1879 والأنجليز يدخلوا مصر
بعد 1882 بعد ثورة وتبقى مصر محتلة
ويموت توفيق
فحسب النظام يحكم من بعده
ابنه عباس حلمى التانى
عباس بقى مكنش زى ابوه مكبرش دماغه
وقال انا واخدها محتلة وخلينى جنب الحيطة واكل عيش
لأ كان جاى ع الحكم سخن ومتحفز
والحق يتقال
الجدع غتت ع الانجليز كتير
وبسبب صغر سنه كان عنده حماسة
وتصادف ف وقتها ظهرت قامات أدبية وسياسية كبيرة
قربته من مصريته اكتر من التبعية للأنجليز
فالشعب حبه
وكان بيناطح ف كل ما يمت لسياسات الاحتلال الأنجليزى
وبيقرب منه الزعامات الشعبية
وفضلنا كدا فترة طويلة لحد ما الزمن اتغير
ومتفهموش ازاى
والواد يا ختشى بعد ما كان حبيب الشعب وكدا
بقى خلقه ضيق
ومخنوق وقرفان وطقهان متضايق طول الوقت
مهم 16 سنة مناكفة بقى
وفجأة بقت بتقوم مظاهرات ضده وتشتمه من ناحية
والانجليز يزنقوا عليه من ناحية
الولا خد ف وشه وهج على اوروبا يغير جوا جبتين
على حظه النكد ... الحرب العالمية الأولى قامت
وانجلترا ما صدقت وقررت اخراج مصر
من تحت ضرس الأتراك ويخلوها تحت الحماية الانجليزية
اصلا اصلا الوجود التركى ف مصر كان مجرد شكل
وبرو عتب
لكن انجلترا كانت المهيمنة على كل كبيرة وصغيرة
وبتحدد الإختيارات زى ماما امريكا حاليا
والخديوى كان مجرد عروسة ماريونت
بيحركوها شمال ويمين أو قرد بيلاعبوه
زى ما الامريكان ما بيحركوا مرسى كدا
لحد ما تيجى لحظة القنص المناسبة
لحظة القنص دى جت فعلا
وبعتت انجلترا المراسيل لعباس حلمى التانى تبلغه
ان رجوعه مصر مستحيل
وانست يا حاج
وطبعا عباس مستلسمش بسهولة
وحاول يستخدم علاقاته
ولما لقى بعد جهد جهيد ان مفيش أى فايدة
قرر التنازل عن العرش اضطرارا ف شكل طواعية !!
ف هذه الاثناء كان الصراع داير ع الجبهتين
مصر وأوربا
أوربا والضغط على الخديوى للأستسلام للعزل
والنفى وف مصر للبحث عن بديل ... مناسب !
الانجليز ف هذا التوقيت الحرج
كان بيدوروا ف العيلة المالكة على كيس جوافة
طبعا المنطقى ان الامير محمد عبدالمنعم ولى العهد
هوه اللى ياخد العرش
بس الانجليز رخموا
وقالوا مش عاوزين حد
من سلسال عباس حلمى الرزل تانى
هاتولنا راجل ... يبقى خيخة و شخشيخة
وشُرابة خرج قوم اتشاور على مين ؟
الحاج حسين كامل ... ابن الخديوى اسماعيل
واخو الخديوى توفيق
وعم الخديوى عباس حلمى التانى .... شوف الزمن !!!
الانجليز كانوا عارفين ان له مطامع
وانه شايف نفسه من زمان أحق بالعرش
وكان من نوعية
عرشى و وضعى ومكانتى .. وحمدلله على سلامتى
المصادر اللى مع الملكية وبتمجد فيها
مطلعاه بطل حب ينقذ العرش
من الوقوع ف قبضة الانجليز بالكامل
بس المصادر الاجنبية أظهرت جشعه وطمعه بوضوح !
@MhmdAbdelRahman لأ حسين كامل ابو سلطانية :)
لكن الحقيقة ان الشروط
اللى سعادته املاها ع المفاوض من الطرف العنجليزى
تبثت بما لا يدع مجال للشك
انه كان انتهازى وبأمتيااااز
#وميعملهمش_علينا_بقى
التفاوض تم ف قصره ف هيليوبوليس
اللى بعد كدا بقى مدرسة
الانجليز فهموه
ان مصر هتتحول من وضعها الحالى كولاية عثمانية مستقلة واللى كانت من شوية خديوية
وهتبقى .. سلطنة و كدا
فحسين وافق بشرط ان السلطنة دى يتوارثها ابنائه وفقط
دون باقى العيلة .. !!
#وغد_وغد_يعنى
وبعدين اصطدم بالخطوة التانية
وهيا رد فعل الأسرة العلوية اللى كلها متجوزة من بعضشيها
وقيل ان الحريم بتوعه رفضوا الفكرة تماما
وعارضوه
ابن حسين كامل كان متجوز من بنت توفيق
ولاد العم يعنى متجوزين من بعض
قوم حركة السطو على العرش دى بأيدى انجليزية
عملت قسمة كبيرة ف العيلة
وحسين كامل تفاديا للأزمة الكبرى دى أشاع بين الجميع
ان الأنجليز عاوزين يغيروا العلم
ويحطوا صليب
وانه لو رفض هيجيبوا حد من برا مصر يحكمها !!
واستغل زيارة اغاخان
زعيم الطايفة الأسماعيلية وقتها لمصر
لتهدئة الأجواء ف مصر
وقال ان الانجليز هيمسكوه العرش
وانه هيوافق انقاذااا لمصر
وهوب ف يوم وليلة ...
ف عام 1914 أصبح حسين كامل سلطانا لمصر
وهوب ف يوم وليلة اصبح عباس حلمى التانى أثر بعد عين !
ومصر بقت سلطنة
ولبسوا حسين كامل السلطانية زى مورسى كدا
فتفتكروا الشعب هيسكت ؟
وقفنا عند سى حسين حسنسن لما لبس السلطانية
وبقى اول سلطان لمصر بعد ما كانت خديوية
وكانت ولاية ...
الراجل كان كبير مش صغير ف السن يعنى
يعنى هوه مواليد 1853
ومقعدش ع الكرسى الا سنة 1914
يعنى الحلوة دى جت بخلع الضرس وبالعافية
وعلى سهوة ... وكدا
وزى مرسى ما بيسعى لأرضاء الأمريكان اللى جايبينه
الحاج حسين كامل برضط اجتهد كل جهده
انه ميزعلش الانجليز اللى قعدوه ع الكرسى
.jpg)
وكان فاكر بقى انه اول ما يمسك
الشعب هيستقبله كويس وبترحاب
اكمنهم كانوا قلبين على عباس حلمى التانى
وشاتمينه ومبعترين كرامته مظاهرات وكدا
لقى الحكاية جت بالعكس
والشعب اللى كان قلب على عباس
بقى بيهتفله ف الشوارع ومتعاطف معاه
اكمنه مشى بمعرفة المحتل الإنجليزى ومش بس كدا
دى مصر بتحويلها إلى سلطنة
أصبحت الحماية البريطانية بشكل رسمى
وبلا مقاومة من السلطان حسين
فهااااره اسود بقى ولازم يقرفوه
الراجل يا خويا اول ما اتسلطن راح كلية الحقوق
عشان يحضر حفلة تكريم وبتاع
لقى ييجى نص الدفعة مرحتش
ومنظره بقة زبالة
دا غير مظاهرات ف الشوارع
والناس كانت بتهتف كل ما يحصل موقف ما
الله حى عباس جى
وكأنهم بيقولوله
انتا ملكش لازمة
وعباس هيرجع تانى
واللى زاد وغطى انه اتعرض لمحاولتين اغتيال
الأولى 1915 من خردواتى ف عابدين
والتانية ف اسكندرية بعد المحاولة الاولى بشوية
يعنى مرتين !
مرتين يا سونة يا خاين ... مرتين ف 3 سنين بس
ف زمنك دا يعتبر رقم محترم
وقياسى يعنى !
المهم الراجل كان ماشى جوا الحيطة
وكل ما حد يزعله ولاّ يحك على مناخيره ينقبض عليه
والقضاء النزيه بتاع اياميها يرزعه حكم وخلاص على كدا !
والانجليز كانوا بيحركوه بالحبال فعلا
وهوه مبيقدرش يفلفص
ولما اشتد عليه المرض ف اخر سنة حكم
بعتلوه دكتور امراض عقلية يكشف عليه !!!
قوم حسين كامل طرده ... شر طردة
وبس كدا معملش حاجة تانى
هيزعل اسياده يعنى !!!
والحالة المرضية زادت عليه
واتكل على الله سنة 1917 بعد فترة حكم قصيرة جدا
يمكن تعتبر هى الأولى
والاخيرة ف الأسرة العلوية
حسين كامل اتجوز مرتين
من "عين الحياة" ومن "ملك"
وخلف ولدين و اربع بنات من زوجاته
واحد الاولاد مات صغير
ومفضلش غير ولد واحد كان ولى عهده
وولى العهد دا بقى يبقى الأمير كمال الدين حسين
اللى حسب الإتفاق الحسينى البريطانى
المفروض يمسك بعد الأب
قوم ملا ندهوا كمال الدين
وقالوله تعالى أقعد ع الكرسى يا بنى
رد بكل ثقة وإباء ...
وقالوهم أحبوش
يا بنى يهديك يرضيك ... أصر على رفض العرش
وتنازل عنه لعمه اللى جه وقرفنا ونكد ع البلد كلها
سى أحمد فؤاد زفت
والملك فؤاد كان مشهور بالصياعة
والشعب كان مسميه الملك القارح
من كتر ما كانت سمعته زفت وقطران يعنى ...
الله يرحمه بقى
واللى لما جه برضو
جه بمباركة انجليزية .. عشان كانوا عارفينه كويس
وعارفين انتهازيته ووطينته الأصيلة
وعمل معاهم صفقة جديدة خالص
غير حسين كامل بقى
فؤاد قالهم انا ملبسش سلاطين
وتضحكوا عليا احنا نخليها مملكة وانا الملك
واولادى يورثوا من بعدى !! #ياختششششششششششششششششى_ع_االحكام_وسنينهم!
المهم الانجليز سايروه بما انه هينفذ خططهم
ويخلى مصر مستكينة هادية بتسمع الكلام
تحت القبضة البريطانية
وبمعارضة لامؤاخذة من غير نقطة
قوم الملك فؤاد ورى مصر الويل وسواد الليل
وتجيله بالقانون
يروح مطلعلك مرسوم ملكى
تقوله دستور يروح موقفه
تقوله برلمان يحله .. كدا يعنى
ساعده ف ذلك معارضة مستأنسة
زى سعد زغلول ورفاقه
اللى ف وسط الثورة يقولك نلعب سياسة
عشان البلد تستقر و الشعب يعيش
#ومش_بيفكروك_بحد؟!
المهمممممممم نرجع مرجوعنا لعيلة حسين كامل
اللى مات بعد حكم 3 سنين يا نضرى
وملحقش يعك ف تاريخنا كفاية
قوم ابنه يرفض العرش بكل قوة واصرار!
وناس تقولك اصل شخصيته كانت ضعيفة
وناس تقولك كان بيحب بت فرنساوية ومخلف منها
ومحبش يتقيد بقواعد ونظام
وناس تقول معرفش ايه
بس فيه تفسير أخر
وأظنه الاقرب للتصديق والحقيقة ان كمال الدين
شاف ابوه بيتلعب بيه الكورة
والأنجليز مخرطينه للوز
ولما تعب شوية جابوله دكاترة نفساويين !
بعض الصحف الإجنبية كتبت عنه :
سلطان مصر عصبى المزاج سريع الانفعال
مصاب بالأرق لا ينام الليل سوى ساعة او بضع ساعة .. #بيلقحوا_كلام_انه_مهروش
زائد ان الولد لقى ابوه
بيتعرض لمحاولتين اغتيال كادتا ان تنجحا
والانجليز راكبين البلد
وايه بقى يعنى
دا يغور الحكم من وش الانجليز العكر !!
زائد انه يقال انه كان بيتبع احدى المذاهب الصوفية
يعنى مكنش ف دماغه
ولا بيجرى ورا حكم وسلطة
والجدع دا اتجوز ومخلفش ...
وبعد وفاته 1932
مراته اتبرعت بقصرهم اللى ف ميدان التحرير حاليا
واللى كان مبنى لوزارة الخارجية لحد وقت مش بعيد قوى
حسين كامل كان متجوز من "ملك"
اللى بعد صعوده إلى العرش بقت السلطانة "ملك"
وكانت شخصية محبوبة وكريمة
وربنا مد ف عمرها
لما حسين كامل مات أحمد فؤاد كرمها
وعاملها احسن معاملة وكان بيزورها مع فاروق والبنات
وكان فاروق بيحبها جدا وبيقدرها
.jpg)
السلطانة ملك خلفت لحسين كامل تلات بنات
بديعة وقدرية وسميحة
ولنا .. عند .. الاخيرة .. وقفة
الاميرة سميحة كامل
حاولت الاقيلها صورة وفشلت للأسف
انا ليا معاها حكاية من بعيد
لما ف وقت ما كنت بقعد يوميا ف قصرها لمدة 3 سنين
قصر الاميرة سميحة كامل على شط نيل الزمالك
واللى حاليا يبقى مكتبة القاهرة الكبرى
وتابع لوزارة الثقافة
الست دى عانت كتير
ومن قبل الثورة حتى بسبب قربها من الملكة فريدة
وصداقتهم اللى كانت قوية وعميقة
فريدة ف أواخر الاربعينات
كانت خلاص حطت صوابعها ف الشق
من الملك فاروق وعمايله
ومكنتش بتلاقى حد يحتضنها اكتر من صديقتها الغالية سميحة
وكتير كانت بتروحلها قصرها ف الزمالك
عشان تقضى معاها الوقت وتفضفض
وسميحة كانت بتحب الفن والتحف
وشجعت فريدة ع الرسم
وفاروق كان بيتغاظ جدا
كان معتبر سميحة بتقومها عليه
ولما قررت فريدة تطلب الطلاق
فاروق اتهمها انها على علاقة بوحيد يسرى جوز سميحة
امعانا ف اذلالها
وسميحة مسكتتش
وقررت تقوم بكل الجهد ف مفاوضات الطلاق
وحشرت فيها السفير البريطانى
عشان تشهده على كل خطوة فاروق ناوى يوعد بيها
ويخلف بعدين زى ما عارفينه
فاروق الحقيقة مكنش ناسيلها الحكاية دى ابدااااا
بس ملحقش يقرفها بما يكفى
عشان انشغل بجوازه من ناريمان
وحريق القاهرة
وميلاد ولى العهد !!
وبعدين الثورة قامت
وكل حى بقى يخليه ف حاله
ويا عالم هينجو من الطوفان دا ولاّ لأ ؟!!!
الحقيقة ان الأميرة سميحة كامل تعبت جدا
زى كتير من أعضاء الاسرة المالكة
واتبهدلت قوى وفلوسها خلصت
واتصادر كل شىء وراح ف كرش الظبابيط الاحرار
والست جوزها مات
واللى كان بيوصلها من قرايبها ف اوربا مبقاش بيوصل
واتدحدر بيها الحال لحد ما حارس قصرها حكى
قبل ما يسيب المكان لوزارة الثقافة
ان الست ف شيخوختها كانت بتفك باركيه الأرضيات
والخشب المتجلد ف السقف والحيطان
عشان تبيعه وتاكل بيه .. !!!
ومفيش للأسف معلومات عن باقى البنات والاخوات
بس اكيد اتبهدلوا كدا
ومكنوش هيسيبوا اختهم بالمنظر دا يعنى
وبمناسبة الأميرة سميحة كامل بقى ... اللى قصرها اتأمم
وفلوسها وارضها وكدا
المجوهرات بتاعتها كمان اتصادرت
واتشالت مع غيرها من مجوهرات العيلة
قوم ف يوم من ذات الايام
وزارة الثقافة العفيفة الشريفة
قررت تعمل متحف للمجوهرات
ف اسكندرية
وراحت الست سوزان هانم تفتتحه عادى
قوم معدية قصاد فترينة
فيها عقد شيك عليه حرف "S " ففضولها كلها
وسألت عنه قالولها دا بتاع الاميرة سميحة حضشرتك وكدا
ويظهر نفسوياتها قفلت عليها
واغرورقت عينيها بالدموع
فصعبت ع اللى كانوا واقفين
فقرر الوزير ف نوبة كرم انه يهاديها بالعقد
ويلا ميغلاش عليها
والنبى قبل الهدية بقى ووالله ما انا كاسفكوا
وتروح واخدة العقد
وروح يا زمان وتعالى يا زمان
والثورة تقوم
ويتقدم بلاغ بالواقعة دى رسمى
السلطان حسين كامل لما تدور على اسمه
تلاقى حكايات عجيبة
بس مبدئيا كدا رغم فترة حكمه القصيرة جدا
الا ان العملات ف زمنه كانت ملفتة جدا
معرفش يمكن لأنها تحولت إلى سلطنة
وكانت فترة نادرة وكدا
ولاّ لأن فعلا كان تصميمها مميز .. ولاّ ايه ؟
ahmedsaeed @ahmed__saeed
@ro7albmama دى فضه :)
ويحكى ان .. ولو ان الحكاية غريبة لكن وماله ... نحكيها
ان السلطان حسين كامل كان صديقا
للبارون امبان
وطبعا عارفينه ؟
الراجل دا اللى بنى أجمل قصر غنى
عن أى تعريف قصر البارون
ويحكى الراوية والعهدة عليه
ان الحاج بارون لما اتم بناء القصر قرر يعمل حفل بهيج
وعزم السلطان حسين يحضر الليلة دى
وجه حسين كامل وقص الشريط
وطبعا عجبه جدا فخامة القصر وجماله
وطلع البرج بيبص لقى البلد على مدد الشوف
وبس قعد يرفص ف الأرض ويعيييط
ويقول للبارون هشترى منك القصر دا
وتبيعه بكام
والبارون يرفض طبعااااا
ووعده انه هيبنيله قصر فخيم
قصاد قصر البارون علطول
عشان يبقوا يبصوا على بعض
ويشاروا لبعضيشهم م البلكونة
وفعلا يبنى البارون امبان قصر للسلطان
وطبعا مش بنفس الفخامة يعنى بس عمله ف وقت قياسى
ومع ذلك حسين كامل اتقمص
ومعجبوش طبعا
وفضلت عينه فيه
واتارى القصر منحوس من ساعتها بقى
#العين_وحشة
o.O
واخيرا عشان الليميت اللعين دا لما سالونى مرة
وانا ف قصر سميحة كامل
هل تتمنى تكونى صاحبة القصر دا وكدا
قولتلهم لأ لو الظروف اجبرتنى
مكونش اميرة
اكون وصيفة او شغالة
نظرا لما آلت اليه حالة صاحبة القصر
وبهدلة الأيام فأفضل اكون وصيفة
تطلع بعامود الاكل لحبيبها او جوزها ف البرج دا
ولما تقوم ثورات او انقلابات عسكرية
أو حد يغضب عليا ميجرليش حاجة اكتر من انى اترفد
بس أعيش حياتى برضو زى باقى البشر !
السلطان حسين عندى يعنى
اسم اشهر شوارع اسماعيلية واجمل ذكريات الطفولة الصبا
وبخصوص العقد بتاع الأميرة سميحة اللى لطشته سوزان
ولسه مرجعشى
انى بدورى أسأل زى كاميليا
واقول فين العقد ؟؟
ودا الخديوى عباس حلمى التانى ف المنفى
والسلسال كله خرج منها ... ف الآخر
ويؤتى الملك من يشاء
وينزعه عمن يشاء فعلا
ودا جواب من دايرة الست سميحة أيام العز
ودى صورة حسين كامل
ف كوتشينة عن مصر ومعالمها
وتصبحوا على ألف خير :)
