مساء الورد
النت بيخطرف عندى بقاله يومين
وحشتونى :)
كمان شوية حتوتتة
يعنى حدوتة صغنونة
عشان الناس اللى مش عاوزة تسهر
انا جييييييييت أبقو فكرونى بعد ما نخلص الحتوتتة
أروح انشر الغسيل عشان هنسى الالزهايمر
وانا اختكو الكبيرة
وربنا ما يوقعكو ف ضيقة وكدا
هه
نبتدى الحكاية اللى من زمن المماليك
وخلاص احنا حفظنا بقى
مماليك يعنى غدر ..
يعنى سلطة تأتى فجأة .. وتروح فجأة
يعنى قاع ثم قمة ثم قاع ..الخ
القصة تتمحور حوالين شخصيتين ...
سلطان و احد رجاله
وعلى غير العادة هتكون علاقتهما وثيقة لا تتزحزح
وعلى غير العادة واحد فيهم هيكون شخص مميز
نبدأ الاول بالسلطان المدعو بـ .. برسباى الدقماق
واللى وصل لعرش مصر فى الواحد من إبريل عام 1422 ميلادى
بعد قصة صعود مجنونة كزمن المماليك
آل بيحكولك يا سيدى ويا ستى
ان الغلبان برسباى دا كان ابن حداد متواضع ف بلاده
اللى محدش عرف هيا ايه وفين بالضبط
والأب مات فجأة
راحت الست ام برسباى متجوزة راجل تانى
عشان يصرف عليها قوم الندل ابن ال......... راح
واخد الولا برسباى
وبايعه ف سوق العبيد
#شتايم_للصبح_بقى
واتنقل برسباى من إيد لأيد
ومن سيد لسيد لحد ما وصل مصر
وشافه مماليك الأمير دقماق فأشتروهوله
وبقى برسباى الدقماقى نسبة لسيده اللى ملكه
الامير دقماق أهداه للسلطان برقوق
واتربى برسباى ف القلعة وابتدت رحلة صعوده من هذه اللحظة
وعاصر سلاطين كتير جت
وراحت
لحد السلطان ططر
المهممممم
برسباى عاصر المؤيد شيخ اللى غضب عليه ونفاه للشام
قوم الأمير ططر .. قبل ما يبقى سلطان
اتوسط لبرسباى عشان يرجع
وقربه منه لما اتسلطن
وططر دا مقعدش ف الحكم غير 94 يوم حسبما تقول المصادر
زى سلاطين مماليك كتير جم غدر ومشيوا غدر
المهم الراجل عييى
ووصى برسباى على ابنه
فبرسباى قاله ابنك ف عينى ى ى ى يا عم الحاج
ومتخافشى وبقى هوه الوصى الفعلى على ولى العهد
وع البلد كلها !!
ومات ططر من هنا .. ومسك ابنه ناصر الدين محمد من هنا
وهوه ابن 14 سنة
وكان الوصى عليه برسباى أفندى اللى صال وجال
على حس الموكوس ولى العهد
وبعدين مقدرشى بقى يمسك نفسه اكتر من كدا
وقالك انا صنت العهد بما يكفى اهو
وعدانى العيب
وراح قالش الولا ناصر من ع العرش بعد 3 شهور
وكام يوم
كتير .. هه
ويعنى متفهموش المماليك دول مالهم .. ؟!!
يعنى ابو الولا وصاك ع الولا
وهوه اللى اتوسطلك عشان ترجع مصر ..
مفيش أى حساسة ووفاء كدا خالص !!!
العرق المماليكى دساس بقى ... هنقول ايه !
المهم برسباى اتسلطن وقعد ع الكرسى 17 سنة بحالهم لم يتزحزح
وكان بيحضر الولاية لأبنه يوسف
ولما هنجيب سيرة يوسف
(اعز انا الناس اللى بتعرف تنقى الاسامى دى )
هيأتى ذكر بطل حدوتة الليلة
السيد الاستاذ المغفور له
جوهر اللالا
جوهر نشأته متفرقشى كتير عن قصة برسباى
اتخطف من اهله ف الحبشة واتباع ف سوق العبيد
ومن ايد لأيد وصل مكة
واشتراه الأمير عمر بن بهادر
ولما رجع مصر .. الامير عمر يعنى
راح اهداه لأخته
اخته دى كانت مين بقى ؟
كانت مرات الامير احمد بن جلبان الحاجب
معلش لازم نحكى التفاصيل
عشان الأخ احمد بن جلبان دا ومراته
هيربوا جوهر ويحسنوا تربيته
ودا هيبان قدام فالواحد لازم يتشكرلهم يعنى
ولازم يتشكرلهم كمان وكمان
عشان بعد شويةهيعتقوا جوهر لوجه الله
والولد ياخد اسمهم
ويبقى اسمه جوهر الجلبانى نسبة للأمير احمد بن جلبان
الاقدار ساقت جوهر ف طريق السلطنة بدرى بدرى ل
ما اتعرف على برسباى ف دهاليز القلعة
والبلاط السلطانى من ايام ما كان برسباى مجرد امير صغنن وكدا
برسباى قربه منه وكان بيثق فيه
ولما اتولى نيابة طرابلس اخد معاه جوهر
ولما برسباى غضب عليه المؤيد شيخ جوهر متخلاش عنه زى العادة يعنى
اكمن المماليك كانوا غدارين زى الكيميا
اول ما ينقبض على حد فيهم اتباعه ينفضوا من حواليه
ومات الملك عاش الملك
#اوغاد_حتى_الموت
المهم برسباى يعود .. ويغدر بأبن ططر
وياخد العرش منه
ولما يستقر يجيب جوهر
ويعهدله بتربية ابنه العزيز يوسف
ومن هنا أتى لقب "لالا"
الـ "لالا" يعنى مربى اولاد السلاطين والمماليك
ودى كانت مهنة مش أى حد يوصلها
ولازملها شروط اهمها الثقة والامانة
ودى صفات كانت نادرة ف صنفهم!
ومعرفش بقى لالا دى اتحرفت بعد كدا
وبقت دادا اللى احنا كنا بنقولها ع المربيات
ولا دى ملهاش دعوة بدى ولاّ ايه
#حد_يبحثلنا_ف_القصة_دى_والنبى
جوهر اللالا قعد ف خدمة برسباى طول مدة حكمه ال17
واتعين جنب وظيفته كمربى لأبناء السلاطين والملوك
مشرف على الدور السلطانية
ولنا.. هنا.. وقفة
الوظيفة دى كان فيها لعب كتير وعلى مستوى عالى
سرقة ونهب للركب
بسبب ما قد يأتى تحت ايد صاحبها من ثروات وكنوز
واللطش فيها كان سهل ومغرى
لكن جوهر وحسبما يذكر أغلب المؤرخين سواء المشكوك فيهم او الثقات
كان راجل عف .. ونضيف اللسان .. واليد
وعلى عكس امراء المماليك كان مؤتمن وثقة
والطريقة اللى انتهت بيها حياته هتؤكد على ذلك
وهنحكى ازاى
بس الاول نذكر ان جوهر كل ما ملكه
حطه ف جامع اتبنى جنب القلعة
والجامع كان صغير ف الحجم
على عكس المتوقع يعنى اكمن المماليك كانوا بيفتروا ف البنا
ما الفلوس ببلاش
وكدا لكن الراجل دا مفتراش ولا حاجة !
اختار حتة أرض صغننة جنب القلعة كدا
عشان تبقى تحت نظره
وبيقول الناس اللى بتفهم ف العمارة كويس
ان مهندس الجامع دا كان ابن جنية ويستاهل جايزة
لأن الجامع رغم صغر مساحته
الا ان المهندس اللى بناه مسبش سنتى واحد بلا استغلال
بنى مسجد وكتاب ومدرسة لتعليم الأيتام
وهوه صحيح يقبع ف احد الاماكن المختفية
بين جامعى السلطان حسن والرفاعى
الا انه مميز شكلا واستغلالا للمساحات وتاريخا كمان !
Lubna Moharram @masrawya_magda3 5h
@ro7albmama دادة لفظ تركي الأصل
معناه : الجدة ، المربية ، الوصيفة ، الخادمة
وهي عندهم " دَدَه " من غير ألف
المسجد دا ف مجال العمارة الأسلامية يعرف بالأبلق
يعنى اللى حوايطه لونين ...
جوهر اللالا بيعلم في مدرسته الأيتام
ويتعهدهم بالرعاية الكاملة لحد ما يبلغوا
وبعدين يحل محلهم اطفال ايتام جدد وهكذا
والظاهر ظروف نشأته خلت عنده رحمة بالغلابة والأيتام والفقرا
فكانت ايده فرطة معاهم
وكان محبوب على عكس الأمرا وقتها
ومقتصرش ف الخير على اهل مصر وبس
دا كمان خصص جزء من ريعه لفقراء مكة
وفقراء المسجد الأاقصى #شوف_الجمال!!
وعلى رحمته بالفقرا والغلابة
كان شديد مع موظفينه واللى تحت ادراته
م اللى مربى قرد عارف لعبه بقى
كان بيشترط ع اللى بيتولى ادارة أى وقف ان ميكونلوش شغلانة تانية
مفيش جمع بين وظفتين يعنى
لازم البيه يتفرغ عشان ميلهطش ف الفتة وفلوسه تكتر !!
والموظف من اياهم (مهما على شانه) لو غاب عن العمل أى مدة بلا سبب
يتخصم من مرتبه وينضاف للوقف
ودى كانت عجبة ايامها .. !!!
#بس_قدر_ينفذها
المهم عشان منطولشى
جوهر اللالا لأنه ان نموذج نادر وسط المماليك
فالسلطان مسك فيه بإيده وسنانه
وقعد 17 معزز مكرم سنة ف عهد برسباى
وكل نفس ذائقة الموت بقى
فبعد ما قعد برسباى يحضر العرش عشان ابنه يورثه من بعده
جاء ملك الموت
و اتكل برسباى ع الله
كان وقتها النوظام ان أقوى الامراء هوه اللى يبقى وصى على ولى العهد
ويوسف بن برسباى كان عمره 14 سنة
ولسه عوده طرى
فمين ييجى يبقى وصى عليه ؟؟
طبعا جوهر مكنش ينفع .. لأنه كان مربى ومعلم وموظف طيب وكدا
لا عنده مماليك ولا عتاد ولا سلاح ولا بتاع
فكان الطبيعى انه يتصدر المشهد شخص اخر
والشخص دا كان أتابك العسكر .. ال
أسطى الأونكل جقمق
اللى كان من مماليك برقوق
ومن بعده ططر لحد ما بقى اتابك ف عهد برسباى
ودا منصب ابهة خالص
بس يا سيدى ويوسف اتسلطن وخد لقب العزيز
وكان طبعاااااااااا كيس جوافة شكل ومنظر بلا أى ارداة ولا امر
وجوهر اللالا فضل جنبه
عملا بوصية الأب
وهما 3 شهور يا دوووب
واتابك العسكر سيفه كله وقعد يهرش
ولازم اخد السلطنة دى يعنى لازم اخدها
#طبق_الأصل_علقة_برسباى_لأبن_ططر
وطبعا عملها بشكل دستورى عشان تبقى مبلوعة
يعنى جاب امير اسمه قرقماش القبانى
وخلاه يلمله الامرا والخليفة العباسى ف القاهرة
وعملوا قعر مجلس
وانتهوا جميعا إلى اقتراح بتولية الأمير جقمق العرش
بدل العزيز يوسف
والموافق ع الأكتراااح يتفضل برفع يده
أغلبية
خلاص
اغلق باب المناقشة
وبس!
وراحوا بربطة المعلم .. طلعوا ع القلعة
عفقوا يوسف بن برسباى من رقبته وعزلوه
وبعتوه قلعة الجبل يقعد جنب الست ام يوسف لاجل غير مسمى وكدهون
وراح داخل جقمق على قاعة العرش
وقاعد مترستق
وسبحان الله من غدر يغُدر به بعد حين
واللى عمله الأب .. يتردله ف ابنه !!!
برسباى شال ابن السلطان ططر من ع العرش بعد 3 شهور
وقعد مكانه فتلف الأيام وييجى اللى يشيله ابنه من ع العرش بعد 3 شهور ... !!
#عدل_الزمن
اللطيف بقى ... ان جقمق دا حكم مدة طويلة
بتاع 12 سنة او أكتر
وساب الحكم لأبنه المنصور فخر الدين ابن ال19 سنة
فيخلعوه بعد 43 يوم بس !!!
يعنى كما تدين تدان فعلااااا ...
نرجع بقى لصاحب الجامع
جوهر اللالا الراجل الطيب حصله ايه يا ترى
بعد ما السلطان يوسف ابن برسباى ما راح ف الوبا .. ؟!!!
طبعا انتوا هارشين المماليك وجنانهم
اللى مش معايا يبقى ضدى
وأى رجال سلطان سابق يبقوا فلول علطول
ولازم يتعكشوا من رقبتهم
ويطلعوا المستخبى !
بس جوهر مكنش من النوعية دى خالص
لا كان شايل ومعبى ولا مخبى ف زلع ولا ف سراديب
ولا حاجة خالص دا هوه يا دوب الجامع و شكرا ... فأيه ؟!!!
اول ما جقمق قعد ع الكرسى
امر بتجريد مماليك العزيز يوسف من ممتلكاتهم
عشان الثروة تبقى ف عبه هوه
فصدر امر سلطانى بالقبض على جوهر اللالا
جوهر اصلا لما سمع بعزل يوسف بن برسباى
فهم انه ف خطر ومحدش هيستوعب الحقيقة
وهيختلط الحابل بالنابل وانتوا عارفين المماليك وهزارهم البايخ
خد بعضه وحضر ركوبته عشان يطفش ع الشام او مكة حتى
وملحقشى الراجل يا عينى
قبل ما يخرج من حدود القاهرة كان رجالة حقمق عاكشينه علطول
ومفيش داعى احكى بقى عن التحقيقات زمااان
مع رجالات العهد السابق بتبقى عاملة ازاى
(عقبال عندنا يارب مع بتوع مبارك والاخوان انشالله)
جنة وهنا ونعيم وكدا
مبدئيا صدرت الاوامر بالحوطة على كل موجودات جوهر اللالا
بيت وفلوس
والظاهر المبالغ مكفتش كرش جقمق الواسع
فراح مغرمه ب30 ألف دينار زيادة
جوهر اللالا وقف قصاد جقمق يحلفله انه معهوش المبلغ دا
وانتوا صادرتوا كل املاكى .. هجيب منين يا مولانا ؟
#تفتكروا_كان_ايه_الرد؟
مولانا الزفت السلطان قاله انتا كداب
وطلع الفلوس اللى انتا مخبيها ولمتها من 17 سنة قعدة ف بلاط برسباى
ومتعملش عليا شريف
يا عزيزى كلنا مماليك
طبعا جقمق مكنش مصدق ان ممكن حد يقعد كل المدة دى
من غير ما يتربح من وظيفته
ولما يبقى حد حرامى ووسخ بيشوف كل الناس حرامية زيه
والوساخة مغطياهم
كل توسلات وحلفانات جوهر بأنه معهوش أى فلوس غير اللى اتصادرت منه
لم تلقى اذنا من جقمق
اللى شارو لحراسه وقالهم خدوه ع السجن وفسحوه ... !!
وبس وخدوه ع السجن والراجل سلم أمره لله
وصل السجن وطبعا بعد عملوله التشريفة المملوكى اياها
فدخل زنزانته من هنا
وجاله دور صرع من هنا
وطبعا محدش سأل فيه وافتكروه بيتمارض
وهما كام يوم وربنا افتكره برحمته قبل ما يشوف ويل أكبر واشرس
انتوا عارفين سجون المماليك
وبشاعتها يعنى
:(
ويموت جوهر اللالا سنة 1453 بعد سيرة طيبة
وعمر قضاه ف الخير
وحبة ملاحظات على ما قسم
طبعا اول ملحوظة انتوا زهقتوا منها خلاص بس
كما تدين تدان
واللى بيعمله الشخص بيتردله ولو بعد حين
وهتروح فين يا قرد وانتا اللى يجيبك موزة !
والمماليك دول كانت شهوة السلطة بتعميهم لدرجة رهيبة
ونقدر نوصفهم كدا بأنهم سلسلة من الحكام الغدارين
يتخللهم بعض الطفرات .. الكويسة !
وحكاية التوريث دى
اللى على مدار عقود كانت بتحط الوريث ف خطر محدق يؤدى بقتله غالبا
ليه محدش كان بيتعظ .. ؟!!!
وبطل الحكاية النهاردة جوهر لالا دا
مهو كان مملوك اهو
بس الراجل اتحط ف اختيار
فأختار يبقى شخص محترم ونضيف رغم المغريات قصاده !!
الجامع اللى بناه دا أتصور ان كل طفل يتيم اتعلم فيه
واتربى وحفظ القرآن كاملا كان رحمة ونور وصدقة على روحه
اللى ازهقت ف لحظة غدر خسيسة
:(
ahmedsaeed @ahmed__saeed 4h
@ro7albmama محدش يقدر يجزم انه مكانش معاه فلوس فعلا ...
فيه حاجات كتير مطلعتش
امال الكنوز اللى الاهالى بينقبوا عليها دى ايه ؟
@ahmed__saeed متهيألى الراجل دا مكنش كدا يا احمد ..
سيرته بتقول كدا .. والله أعلم
ويعنى الراجل كان حسيس وعنده عزة نفس
فمجرد ما دخل السجن اتنقط وجاله صرع ونفسيته اتحطمت
لو كان واخد ع السرقة والهبش مكنش دا بقى حاله !!
وفيما يخص الجامع بتاعه اللى صغنونة كدا ومحندق
وانا اتمنى ف يوم ازوره بسبب صاحبه
ليه مهملينه الاهمال البشع دا
#ربنا_ياخدهم
حاجة كمان مكنتش اعرفها .. مع انى بحب شكل الجوامع دا جداااا
ان المسجد اللى بيبقى لونه بالعرض لون بيج ولون أحمر دا
اسمه .. أبلق
معلومة حلوة
واخيرا الحدوتة الليلة دى كانت من كذا مصدر
بس الأساسى من كتاب القاهرة جوامع وحكايات - حمدى ابو جليل
#تحفة_فعلا _لازم_تقروه
و الــ :-* دى مبعوتة مع مخصوص للمغرب
عشان حبيبتى خواطر " @nacnajiba " لأنها فكرتنى أقوم انشر الغسيل
#منحرمشى
:) تصبحوا على ألف خير
