كل سنة وانتوا طيبيبن
يا احلى سميعة حكايات
حواديت صغيرة
ودروس مستفادة عن مصر
اللى مغلبانا
حكايات النهاردة من كتب ..
اما مذكرات لأصحابها
واما كتب رحالة بيحكوا عن اللى شافوه ف مصر
وعجايبها
مممممم نبتدى بـ
وليام لين المستشرق الانجليزى
الراجل دا زار مصر 3 مرات ف عهد محمد على
على فترات متباعدة اولها 1825
وبعدين من 1833- 1835
وآخر مرة كانت من 1842 - 1849
و عمل كتاب عن اخلاق المصريين وعاداتهم
وفى احدى فصوله اتكلم عن الخرافات والخزعبلات
اللى كانت مالية دماغ البشر وقتها
وقال الآتى ...
قال يا خويا ايه
الظاهر بيبرس الله يرحمه
ويبشبش الطوبة اللى تحت خوذته
لما حكم مصر اكتشف اكتشاف مريع
الا وهو ان المصريين لما بينقتل فيهم حد
بعد ما يتحكم عليه بالأعدام
كانت جثته بتترمى ف الأرض كدا
وتدوس عليها الرجلين وتندفن من غير ما تتغسل!
فالراجل انزهل وقالك ايه الشعب اللى مش نضيف دا ؟
وراح بانى مغسل عند القلعة ف ميدان الرميلة
عشان الحكاية دى تتم فيها
الميدان دا وقتها كان حتة متطرفة
ومكنش بيروحه ناس كتير
قام بنى فيه المغسل عشان الجثث اللى ملهاش صاحب
تعامل باحترام
قوم المصريين يعملوا ايه؟
المصرى لازم طبعا يحطوا التاتش بتاعه
الستات اللى مكنتش بتخلف .. كانت بتروح للمغسل دا
مخصوص عشان تحبل وتجيب عيال
وتمارس الطقوس الآتية
1- تخرس خالص
أيوه اول شرط انها لما تروح ولحد ما تمشى متنطقش
وبعدين
2- تدى للراجل هناك 10 دينار
3- توطى تحت ترابيزة الشغل وتعدى من تحتها 7 مرات #اه_والنبى
وبعدين
4- تطلع فوق الترابيزة وتعدى رايح جاى عليها
7 مرات برضك
واخيرا
5 - تاخد من مية الغسل اللى كلها دم × دم
وتغسل بيها وشها وتروح
o.O
وكل دا زى ما قولنا هيتم وهى صامتة
ومبتنطقش بكلمة عشان البركة تحل .. وبس كدا
خلصت القصة
الدروس المستفادة
اولا
جتها نيلة بجد اللى عاوزة خلف
ثانيا
يعنى تخش ف حتة ريحتها تقرف
وتدوس ف مكان الجثث وتغسل وشها بالدم
ويقولك الناس زمان كانت بتموت صغيرة يا نضرى .. ؟
#نعمممممم ؟!!
ثالثا
انتهاك مكان كدا وعشرة دينار وندوس ف العك
و آخر بهدلة مفيش احصائية بقى
تقولنا الحكاية دى نفعت
وخلفوا
عشان انا لو منهم هقطع الخلف نهائى حقيقتن الصراحة !!
القصة رقم 2)
من ايام محمد على برضو
بس ف نهايتها كدا
لما كان ابراهيم ابنه هوه اللى ممشى الامور
وبيحاول يسيطر
والرواية من مذكرات نوبار باشا
ونوبار اللى كان سكرتير ابراهيم باشا الخصوصى وقتها
بيحكى الواقعة وهوه كان شاهد عليها وحاضرها
فمش هنكدبه يعنى ..
نوبار بيحكى عن ضريبة فرضها محمد على ف زمانه
وكانت مكروهة جدا من الكل اسمها "الفردة"
ودى بأختصار ان كل نفر حى يدفع فلوس عن نفسه
انه عايش :)
محمد على كان عاوز يلم أى فلوس من أى حد وخلاص
فكان بيفرضها ويطالب بيها الناس اللى تبعه ف الأقاليم
والشعب كان بيصرخ من الظلم
وانه معهوش فلوس
قوم ف مرة المنصورة إتأخرت ف دفع المعلوم
راح محمد على باعت ابراهيم باشا ابنه
يشوف الشعب الوغد دا مدفعش ليييييه .. ؟!
روح يا هيمة ...
راح هيمة منفذ الامر فورا
ودخل ابراهيم باشا ومعاه نوبار سكريتره
وقاعد جنبهم المعلم غالى وزير المالية وقتها
وعملوا قعر مجلس مع المشايخ بتوع المنصورة
ودار الحوار
المشايخ قالوله الفردة دى قاطمة ضهر الناس
واحنا هنجيب منين؟
وابراهيم يستهبل ويقولهم دى مش غلطة والدى
والفردة دى فكرة المزغود دا
وراح مشاور
مشارو على مين ؟
ع الغلبان اللى اسمه غالى ..
وراح مكمل وقايل ان محمد على مش السبب
واللى امر بتحصيلها بقسوة وعنف هوه الخائن دا
مش ابويا !!!!
وهوب وراح مطلع ابراهيم مسدسه
وراح طاخخ المعلم غالى الراجل مات ف ثوانى
والمشايخ كانوا هيعملوها على روحهم !!!
وراحوا واخدين ديل جلاليبهم المبلولة ف سنانهم
وجررررى من وشه الساعة دى
وحد يقولى يا فطمطم الفردة كدا اتلغت
أقولكم نعممم
على ماما
لأ طبعا
الفردة فضلت زى ما هيا واتلمت
وفضلت تتلم لحد ما جه عباس حلمى ولغاها
انما ابراهيم باشا حب يكسب وقت
ويطلع ابوه
والسلطة ملايكة
واللى راح فيها هوه الغلبان البائس المعلم غالى
اللى كان رايح الزيارة
ولا بيه ولا عليه
يا كبدى
وخلصنا كدا
والدروس بقى
درس رقم واحد وألف
محمد على دا فيه عرق جنان
وامتد من ابن لحفيد .. #آه_والنيعمة
ثانيا
لما بتقتلوا موظفينكم الكبار كدا زى الفراخ
و الكلاب الضالة اومال كنتوا بتعملوا ايه
ف المواطن الغلبان اللى ملوش ضهر ولا مال يا كفرة ؟؟!
ثالثا
الفردة فضلت حتى بعد ما انقتل غالى
وحادثة القتل دى كانت مجرد تهدئة للأوضاع
واللى عاوزينه تم برضو
أمن الدولة ف مصر شغال وملعلع من زمان بتفانينه اهو !!
القصة رقم 3)
ودى من مذكرات أحمد شفيق
ومش الموكوس بتاع البومبونى لأ
دا احمد شفيق باشا اللى كان له شنة ورنة
الراجل كانت تربية قصر الخديوى توفيق
واشتغل مع عباس حلمى التانى لما قعد ع العرش
واتنقل من وزارة
وكان ف الديوان الخديوى
و كان هيبة وهلما كدا
والراجل عمر ف الدنيا فلما رجع مصر ف التلاتنينات
بعد ما قعد جنب الخديوى عباس ف المنفى
قرر يكتب مذكراته عن 50 سنة عاشها
مذكراته لطيفة جدااا
وانصحكم بقرايتها وفيها جزء كبير عن المجتمع المصر
ى ف فترة توفيق وعباس حلمى
وشكل الناس والدنيا
وبيحكى ف احدى الفصول عن
ان شبرا كانت فسحة هايلة للناس من كافة الطبقات
وكان فيها جناين بالهبل
وبيحكى عن قهوة هناك اسمها قهوة "سى خليل"
وبيقول ان كانت لأصحاب المزاج
وفيها تلاقى مزاجك وعادى محدش يكلمك
لدرجة ان انشد فيها المنشدون
كل شىء فى مصر يوجد .... الا قهوة سى خليل
الكيوف فيها نضيفة .... والحشيش مالوش مثيل!
وبيحكى شفيق باشا ازاى كان الشباب المصرى
ف هذه الأيام بيروق نفسه ويسهر
يعنى نظام احنا نجيب بنات بتاع الايام دى
يعتبر عيبة وقتها
قولولى ليه؟
عشان وقتها الشباب البايظ كانوا بيبتكروا طريقة للتهييس
على مستوى عالى الحقيقة
وهيا انه يتم اقتيادهم متغمى عيونهم
ويركبوا كارتة توصلهم لمكان
واول ما يوصلوا يشيلوا الغماية
يلاقوا ستات ف انتظارهم
ويعيش الكل حياته ويخرجوا الفجرية بنفس طريقة مجييهم
متغميين عشان ميعرفوش كانوا ف قصر مين !
والحكاية دى انتشرت وشفيق عرفها من اخوه محمود
اللى كان حليوة وصوته حلو وشقى ومجرم
فكان بيسهر سهرات من هذا النوع
قوم ف مرة سمعوا اشاعات كدا
والاشاعات كانت عن شباب ف الجيش
كانوا بيتاخدوا بليل ف احدى الفلل بالعباسية
ساكنها واحدة ست عظيمة الشأن
ويدخلوه من سرداب تحت الأرض للقصر
وبعد ما يقضوا الليالى دى مكنوش بيرجعوا
وتنقطع سيرتهم
قوم الشوباب الصايع خافوا على نفسهم من ذات المصير
وشفيق باشا منع اخوه م السهرات دى!
وتوتة توتة خلصت القصة على كدا
لا عرفوا مين الست ولا كانت الحكاية بجد
ولا ايه الموضوع
والدروس المستفادة
من ام القصة
اولا
محدش يروح العباسية
ثانيا
الشباب البايظ دلوقتى اصول يعيط على خيبته
زمان كنتوا بتتخطفوا من نساء عظيمات الشأن
وآه صحيح مبترجعوش
بس برضك ..
الشباب البايظ مقامات
ثالثا
العباسة كانت حتة متطرفة وبيسكنها الباشاوات والكبار
وشفيق طبعا محبش يعك
فقالك سيدة عظيمة الشأن
وقالك سيد بيه قشطة ليطلع قريبكو ولاّ حااااجة
والجدع خاف للست تعرف وتطين عيشته
يا خراشى ع الجبونية .. !
رابعا
معلش بقى
اشمعنى الهانم دى كانت بتخشطف زوبات الجيش بس
هاه هاه
تكونش الست دى اخوان .. شيكلها كدا ؟!!
#هع
دى القصة رقم كام ؟
الرابعة
صح ؟
طيب دى بقى من مذكرات نجيب الريحانى
الضاحك الباكى كتبها بخط ايده زى ما كتب نعيه بالضبط
نجيب كان مجنون تمثيل بس ف بداية حياته
اشتغل ف بنك واتعرف فيه بالصدفة على عزيز عيد
ودخل لعالم الفن عن طريقه
وساب نجيب شغلانة البنك ..
واشتغل مع عزيز عيد ف مسرحه
وبعدين رجع البنك تانى
واترفد تانى ..
ومثل ف فرقة سليم عطالله وسابها
قصره الراجل اتمرمط
وبعدين لما لقى الفن بهدله لدرجة الجوع
قرر يدور ولقى فعلا شغلانة ف شركة السكربنجع حمادى
فركب القطر وسافر على هناك
المهم راح نجيب الريحانى
واستلم الشغل ولخفة دمه رؤسائه حبوه
واستقبلوه ف بيوتهم وكدا ..
وزملائه كمان اكمنه عازب كانوا بيعزموه ع الغدا
وف مرة عزمه حضرة الباشكاتب (ت) على الغدا
وكان راجل كبير ف السن
نجيب لبى الدعوة طبعا #للأسف
ليه للأسف؟
اقولكم عشان هوه لما راح استقبله الباشكاتب العجوز
وكانت جنب منه مراته
وكانت شابة تنفع تبقى بنت الباشكاتب
مش مراته
#دا_نجيب_اللى_بيقول
وبس بقى مقدرش يمسك نفسه
وقعد يغازلها من تحت لتحت
وهيا مش تحترم نفسها وتحترم الراجل الطيب
اللى أنيها دا
لأ بادلت نجيب السهوكة والغرام
وراحت الايام وعدت الأيام
ونجيب بقاله 7 شهور ف الشغلانة دى
وخلاص بقى مش قادر يمسك نفسه
وخصوصا لما عرف ان الباشكاتب عنده مهمة
خارج نجع حمادى!
راح متصل بالسنيورة ومتفق معاها
والاتفاق كان كالآتى
ف الظلام الدامس هييجى
تكون هيا سايبة باب البيت مفتوح
ويدخل البيت من غير الشغالة ما تحس !
الرد كان .. قشطة
وسافر الباشكاتب ف آمان الله
وراح نجيب ف المعاد المتفق عليه
وماشى بيتدارى عشان محدش يلمحه
وهيقضى ليلة عنب ويهيص
ووصل لحد باب البيت من برا
وخلاص كدا
وبيمد ايده يزق الباب
وايه رأيكم بيفتح السمكة ... ملقاش الخاتم ؟!!!
آه الجدع جه يفتح الباب لاقاه مقفول
اتاااارى الشغالة قبل ما تنام قررت تشيك ع الباب
وراحت قفلاه
نجيب اتشال واتهبد
والليلة هتبوظ
فيعمل ايه ؟؟
بسيطة راح على حد تعبيره (مستشير الشيطان)
قام شيطانه قاله نط م المنور يا حاج !
راح ناطط نجيب
وعمل صوت
الخدامة صحيت
وافتكرته حرامى راحت مصوتة!
وبس الجيران صحيت والغفر مسكوه
والمأمور حضر وكانت هيصة
وطبعا اتقبض على نجيب
ولما رجع الباشكاتب تانى يوم لموا الموضوع
عشان سمعة الست وجوز الست
واكتفوا بطرده م البلد
والدروس المستفادة
اولا
الخدامة دى ليها الجنة عشان عندها ضمير
وشافت شغلها زى الفل
والله يا ريت كل الشعب زيها
:))
ثانيا
نجيب الريحانى كان مسخرة وصايع
ومقطع شادر سمك بحاله
واللى عاجبنى انه حكى القصة
وهوه مش هاممه منظره وبرستيجه وكدا
بأعتبار انه كان وقتها شاب صغير
ثالثا
لكن شاب صغير شاب كبير ايه المسخرة دى
وايه الوغدنة دى
وايه الندالة دى
وايه الاقتحامات الامريكانى للبيوت دى
واضح انها كانت حلوة فعلا
ورابعا
كل ما اقرى ف مذكراته
افهم ازاى كان عنده احساس كدا
لأنه فعلا شاف بلااااوى ومّر بمواقف نيلة
:)
واخيرا الخامسة
اخر حدوتة بقى
عن احتفالات مصر الدينية
واسمها الدوسة
ودى كانت بتحصل اول ما يقرب مولد النبى
والناس تبتدى تنصب خيام قرب سيدنا الحسين
كانت الخيام مختلفة ومتنوعة فيها
خيمة الخديوى اللى كان لازم وضرورى يحضر الاحتفال
وخيمة شيخ الطرق
وخيام الأتباع
و المريدين وكل اللى له شوق
كان بيحضر اليوم دا طوائف الدراويش السعدية والرفاعية
وناس كتير غاوية تتفرج
او تتبرك باليوم
وكانوا بالآلاف
ويتلموا يتفرجوا على شيخ السعديين
اللى كان بيركب حصانه ويمشى بيه مش ع الأرض .. لأ
كانوا المتطوعين من البشر والدروايش يرقدوا ع الأرض
ويعملوا زى صف طويل
وكأنهم طريق مرصوف
ويقف العساكر ع الصفين عشان يمنعوا دخول أى حد
والاجانب والأمرا وكبار الشخصيات تقف تتفرج ع الشيخ
وهوه بيمشى ع الراقدين
كان الناس بتكبّر وتقول لا اله الا الله
بينما اتنين يمسكوا اعلام خضرا وراهم الشيخ بحصانه
والكل يمشوا على اجساد الناس
اللى راقدة ف غيبوبة تجلى
وبعد ما تخلص المشية
ويوصل الشيخ لأخر نفر نايم
يكون العرض انتهى
ويقوم الراقدين ما بين منتشى
واللى بيضحك
واللى متصاب ومتكسرله ضلع .. كدا
#عادى_خالص
وكان اللى يتعور او يبدى ألما الناس تتهمه
انه معندوش قدر كافى من الأيمان
وانه مش مسلم لله
اما الناجى من اى كسر فكانوا بيفتكروه صالح
وربنا بيحبه وكدا
ومحدش يعرف الدوسة دى كأحتفال سببها ايه
ولا بدأت امتى ومين اللى ابتكرها
بس المؤكد انها انتهت ف عهد الخديوى توفيق سنة 1880
عشان اعتبرها تخريف
واستنى بس لما نقيب الأشراف مات
عشان كان بيحرم منع الاحتفالات الدينية
وانتهز الفرصة ومنع المناسبة العجيبة دى
وقال كفاية بتحتفلوا بمولد النبى !
وتوتة توتة خلصت آخر حدوتة
والدروس المستفادة
اولا
صحيح انا مبطقش توفيق وسيرته
لكن ف دى الواحد يشهدله انه راجل بيفهم
ثانيا
هيا الناس اللى مستعدة تنام ع الأرض
وتتعرض للموت تحت سنابك الخيل دى
تفرق كتير عن الاخوة اللى ف رابعة
اللى فارشين الأرض عشان مرسى والمرشد ؟
ثالثا
المصريين دول ما بيصدقوا يا جدع !
يعنى عندهم مولد النبى احتفال
وبرضو لازم يزودوا عليه حاجة
وكأننا من كتر الحزن ما بنصدق ييجى فرح عشان نضاعفه!
وخلاص كدا خلصنا
وحشتونى اصلا
و تصبحوا على ألف خير
--------------------------------
AugHany Zaky @Hany_Zaky
طبق الأصل عصر النهضة، أقصد الأوروبى طبعا
AugAhmed Rageh @Ahmed_Rageh101
هى دى الليبرالية
Augʎqɐɹɥƃɐɯ-lɐ ɯɐɥʇʎɐɥ @H_Almaghraby
اليمنيين قالوا كلمة حكمة زمان
نار الانجليز ولا جنة ابراهيم باشا :)
AugMohamed hassan @M7amd_Hassn
اصلا ده مين الراجل اللي هيجيله قلب يقربلها اساسا :)
