جامع الفتـــح : 9 أسمــــاء × مسجــــد

مساء الخير

حدوتة الليلة دى عن مكان غريب .. حقا

بنعدى عليه كتير 

لكن محدش يتخيل انه عبر التاريخ كانله
اكتر من 7 أسماء مختلفة ... !

 

حكاية الليلة عن ... جامع الفتح

وجامع الفتح حديث نسبيا .. 
تم افتتاحه سنة 1990 صحيح 

لكن قبل كدا 

البقعة دى من الأرض 

كانلها حكايات وحكايااااات 

هنقولها حالااااا

لكن ننوه لعدة مصادر اعتمدت عليها بالأساس

 1)دراسات فى التطور العمرانى لمدينة القاهرة
 لفتحى حافظ الحديدى 

2)القاهرة جوامع وحكايات لحمدى ابو جليل

3) النجوم الزاهرة لإبن تغرى بردى ..

و اكيد .. عم المقريزى .. العمدة بتاعنا 

والصور من ع النت 
كتر خير اللى صور .. ونشر وأفادنا

والقصة مش هتبعد قوى ف التاريخ 

احنا هنرجع للفتح العربى لمصر 

اما سى عمرو بن العاص ييجى بجنوده معاه

فيدخل قرية اسمها ام دنين

والمؤرخين بيقولولنا ان ام دنين 
كان اسمها الرومي (تندونياس) 

ثم تغير الوضع بعد لك

وموسوعة مدينة القاهرة فى ألف عام 
بتقول نصا :

"عرفت بالقسم 
(قيل لأن قسمة الغنائم عند فتح مصر كانت بها) 
ثم عرفت بعد ذلك باسم المقسي

مكانها شمال حديقة الأزبكية
وأم دنين والمكس والمقسي والمقسم 
كلها أسماء مترادفة لقرية أم دنين "

يعنى كلها اسامى لمطرح واحد 

حلو

الحتة دى يا ولاد

واللى هتتحول بعد كدا لميدان رمسيس 
الى نعرفه حاليا بكل صخبه

كان النيل بيعدى جنبها

وكانت منطقة رائعة حسب وصف الناس بتوع زمان

كانت مليانة شجر ونخيل
 وهواها عليل وحاجة ابهة 

 

وروح يا زمان وتعالى يا زمان 

وتتوالى الدول والممالك 

لحد ما ييجى الفاطميين مصر 

#يا أهلااا

المعز لدين الله كان راجل سوسة 

هيبعت قائده جوهر الصقلى الاول 

وبعد ما يستتب الحال 

يأمره ببناء عاصمة لللفواطم 

جوهر هينفذ الأمر فوراااا

وبما انه راجل عسكرى ومعندوش أى خيال
 ولا نتفة لطافة هيختار للقاهرة موقع 
حسب رؤيته 

قوم لما ييجى المعز يدخل مصر 

يلومه ويعاتبه لما يلف شوية

ويقوله كما ذكر المقريزى :

" فاتك بناء  القاهرة على النيل عند المقس،
 فهلا كنت بنيتها على الجرف؟"

المعز كان عاوز نيل وخضرة

راجل حلويات والله

بينما جوهر التفت للحماية والتأمين فقط
وانا فاهم بعمل ايه والقرف بتاع العسكر دا 
انتوا هارشينه 

المهمممم

الفاطميين هيعرفوا قيمة المنطقة دى ويحبوها جداااا

مش بس االحتة دى 

كل مكان فيه خضرة ونيل 
الفاطميين عملوا فيه مناظر 
المنظرة حكينا عنها كتير

يعنى مقصورة كبيرة للحاكم يطل منها ع النيل
 والناس تحضر فيها احتفالات

منطقة المقس دى كمان 
هتبقى بسبب قربها من النيل مقر لاستقبال 
وتوديع الاسطول الفاطمى اثناء المعارك 

غير انها خدت بعد اقتصادى تحصيل ضرايب 
من اللى داخلين البلد من الميناء اللى هناك 

ويقال ان الاخ المسئول عن تحصيل المكوس
 او الضرئب كانله مقر هناك ثابت 
 عشان كدا سموها المقس 
وسموا الجابى دا .. المقسى

المهمممم

المعز هيتكل على الله 

ييجى بعد ابنه العزيز

العزيز بالله بقى 

روحى وحبيبى الراجل دا

كان عصره منتعش اقتصاديا 
مش جو ابو بوز ناشف والاضيشه بتوع
بتاكلوا 3 طقات ليه يا غجر .. !

القصد ... 
قوم كثرت الاحتفالات ف عهده ف الحتة دى

والحلو دايما ينخطف 

الراجل هيموت عشان يسيبلنا ابنه
 اللى هيطلع عين ام الشعب المصرى لسنواااات 

تقصدى مين يا شوشو 

الحاكم بأمرالله

الوزغة

الحاكم بأمر الله زى ما انتوا عارفين 
كان لاسع لسعان السنين ومش طايق نفسه

ومن جنوناته هدم الكنايس

وفيه اقاويل ان منطقة المقسى كان فيها كنيسة

ويقال ولا سند لهذا ان الحاكم هد الكنيسة دى 
وبنى مكانها جامع

لكن اقاويل اخرى بتحكى ان الحتة دى
 كان فيها جامع بسيط من ايام الفتح الاسلامى لمصر

وان الجامع دا تهدمت احد حيطانه
فالحاكم قرر يهده ويبنى جامع جديد 

وفعلا تم هذا

وبنى جامع المقسى ف عهده

وكان تانى واحد بعد جامع الانور
او اجمع الحكام اللى ف مدينة القاهرة الفاطمية 
اخر شارع المعز 

وبيقولوا ان الحاكم بأمر الله كان ف جولاته الليلية العجيبة اللى كان مشهور بيها 
كان بيعدى على جامع المقسى ف سكته 

لحد ما خرج ف يوم ... ومرجعشى 
#عقبال اللى ف بالى
قولوا آمييييين

روح يا زمان وتعالى يا زمان

والدولة الفاطمية هتذهب الى زوال 

لما صلاح الدين الأيوبى الوزير ف عهد العاضد 
اخر سلسال الفواطم يموت كمدا 
وصلوحة هيثبت نفسه على عرش مصر

وابو صلاح ابن الناظر 
اللى بيفكرنى بجمال عبناصر كدا .. 
هيدخل برجل تقيلة وايد اتقل 

وهيأمر وزيره بهاء الدين قراقوش بعدة اشياء 

منها الآتى

قاله يا قراقيش اعملنا سور حوالين القاهرة 
بعد ما اتسعت رقعتها 
ومبقتش مقتصرة على قاهرة الفواطم بس

واعملنا قلعة عند جامع المقسى 

فقاله حاضرررر

قراقوش بنى السور بأبواب جديدة
 عند المنطقة دى منهم "باب الحديد"
 اللى اتهد بعديييين

ودى صورة مقاربة له اتعملت برضو ف سوريا ♥

المهم انه "باب الحديد"

وباب تانى اسمه "باب البحر"  ف الحتة دى 
هيكونلهم تأثير 

عشان جامع المقسى 
اللى هيشتهر لفترة طويلة 
 بجامع باب البحر وجامع باب الحديد

ونركز بقى 

دلوقتى جامع المقسى اللى بناه الحاكم بامر الله 

ف عهد الأيوبيين
 هيبقاله اسم تانى .. جامع باب البحر

ماشى ؟

والحاج جامع السيرة الصلاحية 
بيحكى عنه وعن المنطقة عموما :

"وهذا المقسم على شاطىء النيل يزار، 

وهناك مسجد يتبرّك به الأبرار

 فلما أمر  السلطان صلاح الدين بإدارة السور 

على مصر والقاهرة، 

تولى ذلك بهاء الدين  قراقوش 

وجعل نهايته التي تلي القاهرة عند المقس

وبنى فيه برجا يشرف على  النيل، 

وبنى مسجده جامعا، 

واتصلت العمارة منه إلى البلد

وصار تقام فيه الجمع والجماعات"

حلو 

واذا كنت فى مدرج المؤرخين
 اللى بيسبحوا بحمد صلاح الدين هتقول 
الله
دا عمل قلعة وسور وحماية الخ 

لكن لو ف مدرج الفريق المنافس 

فهناك قول اخر

عشان الناس اللى قارشة ملحة الأيوبى
 قالوا ان المطرح مكنش محتاج قلعة ولاافلام 

كل ما فيها انه تعمد يخرب منظرة الفاطميين
 اللى هناك 

نوع م الكيد

وف محاولة حثيثة لمحو أى اثر للعصر الفاطمى 

ودللوا على كدا بأن الايوبيين تعمدوا 
اهمال جامع المقسى لحد ما حاله تدهور قوى
 ف السنوات اللاحقة

والحقيقة انه صلاح الدين تعمد اهمال 
حتى الأزهر 

عشان الهدف الاكبر 

وهوه وأد كل وجود شيعى ف مصر 

وشكرا

وروح يا زمان وتعالى يا زمان 

وانتهى عهد الأيوبيين 
وجاء المماليك 

الشيك 

الرومانتيك 

على راى عم الكل صلاح جاهين

واحنا عارفينهم بقى 

مشغولين يا كبدى بلم الفلوس 
وقتال بعضهم البعض
 حتى يفنى المملوك الفلانى
 على يد المملوك العلانى 

مساكين يا عينى
هيعملوا ايه ولا ايه .. ؟!!

سنة  1162م هيفيض النيل وبقوة
 لدرجة تهدم احد حيطان الجامع

ويقعد كدا على حاله البائس المتهدم

قد ايه يا شهرو ؟؟

لا بتاع 200 سنة بس 

😒

لحد ما ييجى جدع ابن حلال
 اسمه الوزير شمس الدين عبدالله المقسي 

ويقرر سنة  عام 1368م 
انه يجدد الجامع على نفقته الشخصية 

وخد عندك بقى

السخاوى ف الضوء اللامع قال عنه :

" أن الصاحب المذكور كان نصرانيا 
وكان يقال له قبل أن يسلم  شمس 
وكان يعرف بالمقسي نسبة للمقسم ظاهر القاهرة "

ومتعرفوش بقى ..🤔

هل اتسمى المقسى لارتباطه بالجامع 

ولا العكس

لأنهم بيقولوا انه كان جامع للمكوس
 وان دى وظيفته ولقبه

يعنى هل شمس اشتهر باسم الجامع 

ولا الجامع هوه اللى اشتهرباسم شمس 

بعد ما كان معروف بجامع باب البحر لزمن ؟

يا ترى مين فيهم الاول .. رشا ولا وائل ؟!

نهايته ..

المقريزى بيقول :

" وهدم  القلعة وجعل مكانها جنينة
واتهمه الناس بأنه وجد هنالك مالا كثيرا
وأنه عمر منه الجامع المذكور

فصار العامّة اليوم يقولون جامع المقسيّ
ويظنّ من  لا علم عنده أن هذا الجامع من إنشائه
وليس كذلك، بل إنما جدّده وبيضه

وقد انحسر ماء النيل عن تجاه هذا الجامع 
كما ذكر في خبر بولاق والمقس،
 وصار هذا الجامع اليوم 
على حافة الخليج الناصريّ ...

وأدركنا ما حوله في غاية  العمارة،
 وقد تلاشت المساكن التي هناك 
وبها إلى اليوم بقية يسيرة

ونظر هذا  الجامع اليوم بيد أولاد الوزير المقسيّ،
 فإنه جدّده وجعل عليه أوقافا  لمدرّس 
وخطيب وقومة ومؤذنين وغير ذلك "

طيب يعنى جدد الجامع 
وصرف عليه واولاده اهتموا بيه من بعده
موشكرين يا عمنا

ابو المقاريز كمان بيحكى 
ان القضاة قبل رمضان بأيام كانوا بيعدوا
 على جوامع القاهرة يشوفوا ايه اللى ناقص
 او محتاج اهتمام استعدادا لهذا الشهرالكريم

" فيبدءون بجامع المقس ثم بجوامع القاهرة ثم 
 الأضرحة والمشاهد ثم بالقرافة 
ثم جامع عمرو بن العاص
 وحصر ما تحتاجه المساجد من قناديل وعمارتها "
واضح ان الجامع كان ف الخطة
وله اهمية واحترام يعنى 

واحنا دلوقتى ف اواخر عهد المماليك 

ايام الغورى السودة 

لما الحال كان ضنك وهباب 

ومليان بعبث لا نهائى .. كأيامنا تلك

وجامع المقس أو المقسى او باب البحر الخ

هيتسمى باسم جديد خااااالص 

نسبة الى احد الشيوخ اللى تعلق بيهم المصريين بشدة 

اسمه يه يا شهرو ؟؟

الشيخ الصالح الزاهد محمد بن حسن 
بن احمد الطهوائى البرهمتوشى المصرى 
الشهير بـ.... إبن عنان الشافعى

والراجل دا كانله مكانة ومهابة وكرامات

بيقولوا انه كان بيستحى يتحمم عريان

وبيقولوا انه كان بيعتكف فوق اسطح الجوامع 
ف عز البرد

وبيقولوا انه اطعم 500 نفس بست اقداح دقيق

وبيقولوا ... انه عمر فوق ال100 سنة

ولزهده ف زمن مادى وضيع زى زمن المماليك 

ولمكانته ومهابته 

الناس حبته وكانت بتلجأله

والجامع اشتهر بجامع الشيخ عنان 
لزمن طويييل 

واندفن فيه الشيخ طبعا بعد موته 

ويحكى ان طومان باى لما تسلطن

وسليم الاول اقترب من مصر

راح داخل الجامع

وعند الضريح كشف جزء من الجثمان 

واخد قدم الشيخ عنان

ومرغ بها وجهه 

تبركا
لعل الغمة تزول ... !

#طيب

وطبعا حدث المقدر 

دخل العثمانلية مصر 
دخلة الضباع على فريسة جريحة 

ومسجد الشيخ عنان بقى ف عهدة اولاده 
ومريديه

واتسمى بأسمهم بعد شوية

بقى .... مسجد اولاد عنان

واحنا دلوقتى تحت الحكم العثمانى يا مصر 

حد متوقع منى أقول أى كلمة كويسة 
كأنهم اهتموا بالجامع مثلا 

او عملوا اى ترميم مثلا 
أو حصل أى حاجة عدلة ف عهدهم مثلا 

مثلا 

هاه .... مثلا ؟!

 
انا مستنية حد يقولها الصراحة ...!

لأ طشبعن !!

الجامع انحدر حاله واتخرب

للدرجة انه لما جاء الفرنسيس الى القاهرة 
كان سهل عليهم يهدوا الجامع بمدافعهم 

وبنوا مكانه قلعة
زى ما عملوا مع جامع الظاهر بيبرس كدا 

والجامع اللى اتعرف ف موسوعة وصف مصر 
باسم جامع العنانية

 هتختفى معالمه

وهيقام مطرحه طابية هيسموها "كامان" 
على اسم احد الضباط بتوعهم

ويخرج الفرنساوية 1801 م 
وتدخل مصر لعدة سنوات فى قلاقل
 لحد ما ييجى محمد على سنكفولة

وتزال اثار الفرنساوية من البلاد تقريبا

سنة 1844 هيأمر بتحويل المنطقة دى 
كلها لمتنزه عمومى وتزال كل الاثار القديمة 

وبعدها بكام سنة يتهد باب الحديد 
اللى بناه قراقوش

ويفضل الأسم ... سبحان من له الدوام !

يحكم الوالى عباس حلمى الأول

ويتعاقد مع شركة انجليزية
 لمد خط سكة حديد ف مصر

ويختاروا المنطقة دى عشان تكون مقر للمحطة .. !

ونسمع بقى عن محطة مصر 

 
و ميدان باب الحديد

 
 

والتطورات على مر الزمن 

تتوالى 

 لما مسكها سعيد
ثم الخديوى اسماعيل 
ثم توفيق ابنه 

وتولى الخديوى عباس حلمى التانى 

وأرض الجامع حديقة ومتنزه

والناس عمالة تبنى ف المنطقة 
وتعمرها وحاجة ابهة 

قوم ايه ؟

فجأة وبدون سبب معلوم 

يقيض الله لهذه البقعة راجل من رجال الدولة 

للأسف ملقتش صورته ابداااا ع النت 

اسمه ايه ؟

 حسن باشا حلمى الاندوسى

حسن باشا دا بقى 
كان يشغل منصب وكيل مجلس شورى القوانين

والظاهر فلوسه كانت كتير 

وحابب يعمل خير عظيم 

فقرر يبنى الجامع من تانى

وفعلا 

وفى 10 سبتمبر 1894 
يوضع حجر الاساس للمسجد الجديد 

بمال الأندوسى 

وتحت اشراف وزارة الاوقاف 

وعلى مساحة اكبر من المساحة القديمة
الضعف تقريبا 

ومما كتب عنه :

"هو جامع لطيف عامر بالشعائر يعلو بابه 
مئذنة جميلة مملوكية الطراز يحجب الجامع 
عن الشارع دكان على يمين الباب الخارجى
 يعلوه كتاب

وثبت بالنقش فى لوحة من الرخام 
فوق الباب الداخلى بدهليز الجامع 
ومكتوب فوق  الباب الخارجى الذى تحت المئذنة
 ما نصه

" أمر بإنشاء هذا المسجد المبارك 
خديو مصر عباس حلمى الثانى الأفخم 
ادام الله ايامه "

بس واتمشى افرنجى سيادته
 الخديوي عباس حلمي الثاني في 1897/4/23 
عشان يفتتح الجامع الكائن بشارع نوبار 
حسب تسمية الشارع انذااااااك

بس وبقى جامع اولاد عنان 
جزء من المنطقة 

يستقبل القادمين من المحروسة 
والخارجين منها ... وشغال بكفاءة 

يشهد الاحداث وتمر عليه الأيام والليالى 
لحد سنة 1969 

متفهموش ايه اللى حصل ؟

الظاهر الجامع 
كانت مساحته اصغر من الاستيعاب 
او حالته مش قد كدا 
محدش قالنا فيه ايه ... ؟

القصد 

صدر قرار بنقله 

وليس هدمه والحمدلله 

 
 

 ايوه 

مسجد اولاد عنان اتفكك حجر حجر 

وتم ترقيمهم

ونقلهم ليتم تجميعه مرة تانية 

ف مطرح مسجد كان خربان 

قولوا فين يا عيال ؟؟؟

مسجد السيدة عائشة 

اه والله 

هوه مسجد اولاد عنان سابقا 
مع تعديل طفيف ف مداخله

ونرجع لميدان رمسيس 

او باب الحديد 


 


او محطة مصر ...  كله شغاااال 

 

وسنة 1970 هيصدر قرار 
بانشاء مسجد جديد ف المنطقة دى 
بعد ما بقت ارض فضاء


 

ويتم اخلاء وهدم منزلين مطلين على الميدان 
وضم ارضهم لارض الجامع 
عشان يوصل لـ 2000 متر مساحة 

وتتولى المقاولين العرب المهمة 
بانشاء جامع الفتح

ويقرر المهندس حسين بكرى الاستشارى الكبير
فى تصميمه انه يعمل أطول مئذنة فى مصر
 وقتها بارتفاع ....  130 متر

وقالوا عشان تبقى مميزة 
وتتشاف من كل الاتجاهات وحركات كدا 

:)))

ويقال انهم قعدوا يبنوا فيه 20 سنة تقريبا 
لحد ما اكتمل

 


ويقال بتكلفة 100 مليون جنيه 

 

ومعرفش صحة هذا الكلام اطلاقا بس نقوله

وهيروح سخام البرك مبارك
 يوم  الجمعة 22 فبراير 1990
عشان يفتتح مؤسسة الفتح 
ومسجد أولاد عنان  
بميدان رمسيس فى الاحتفال بذكرى الإسراء والمعراج

 

والحقيقة انا مش محتاجة أقعد 
اقول عن جماليات المسجد 

والشغل اللى فيه 

مش دا الموضوع 

لكن ...

موقع الجامع رغم اهميته

ظلمه كتير

الواحد ف وسط الزحمة والربكة 

والفوضى حواليه


 

مبيلحقش يتأمله كفاية

وانا اوشكت أخلص 
بس قبل ما اقول الملاحظات 

حابة اتكلم عن جامع الفتح ... بالنسبالى ايه

قبل يناير 

 

كان مجرد هذا المبنى المهيب

اللى بيشدنى جماله

ولأنه بيت من بيوت الله

واثناء انتظارى لأحباب جايين من محافظات
 لزيارتى .. أقف اتأمله بأعجاب 

وفقط

بعد يناير الوضع اختلف 

والجامع بقى محطة ونقطة انطلاق 
لمسيرات رايحة لوزارة الدفاع 

المشاهد اللى كنت بشوفها 
اثناء انتظارنا لتجمع اكبر عدد ممكن ...
 ما زالت ف بالى 

 
ان شاء ربنا 

ييجى يوم واحكى عنها

بعد 30 ستة 

الجامع شاف احداث مختلفة

ومع اللى شافه 


 

سواء من الاخوان او العسكر

الا ان دى هتفضل اسوأ ذكريات
 عاشها المكان

لحد دلوقتى فى رأيى

ومكنش لازم ابدا تحصل

جامع الفتح اغلق بعدها 

بأمر العسكر لفترة ما 

 

ثم فتح من تانى 

اللهى وانتا جاهى يفتح دماغهم
 قادر يا كرييييم

ولكل مكان نصيب من اسمه
 الظاهر كدا فعلا

وانا خلصت 
وفاضل الملاحظات .... 

1) يقال ان جامع المقس (القديم بقى) 
كان قبلة للشيخ ابو العباس المرسى
 لما نزل القاهرة مرة

2) ايام السلطان برقوق 
كانله منافس اسمه الاميربركة

استخبى ف هذا الجامع 
وبرقوق عكشه هناك وقبض عليه 
واعدمه بعدها

3) جامع المقس

جامع المقسم

جامع المقسى

جامع باب البحر

جامع باب الحديد 

جامع الشيخ عنان 

جامع العنانية

جامع اولاد عنان

جامع الفتح

كله واحد

كلها اسامى لمسجد يتهد وتبنى تباعا 
على مر العصور ف هذه البقعة 

وايه يا خويا حتة (الأرض) العجيبة دى 
اللى كل ما الزمن يعاندها 
بإضطهاد أو فيضان او اهمال او احتلال
ترجع تانى دى .... ؟!!
وربنا يهيألها اللى يصرف عليها ؟! 
3 مرات يتهد او يخرب .. ويتبنى 
بـ 9 أسامى مختلفة ومتوازية 
يبدو ان مقسوملها تكون مكان للعبادة 

وكأنها بتنادى مصيرها
فيه اماكن كدا 
الزمن ميقدرش عليها 

4) مش بس الأرض بتنادى على مسجدها 

بتنادى ع الثورات كمان 
جامع اولاد عنان حضر ثورة القاهرة الأولى 
قبل ما يتهد ويحتله الفرنساوية 
وحضر كمان ثورة 19 
وما تلاها من احداث بسبب وجود قشلاق
 الاحتلال البريطانى هناك
ثم حضر ثورة يناير وانطلاق المظاهرات منها والمسيرات

الحتة دى بتاعت ثورات يا جماعة
 بس مش لاقية اللى يقدرها

5) مسجد الفتح مئذنته لحد وقت مش بعيد 
كانت أطول مئذنة فى مصر
ويقال العالم 
 واول واحدة .... يطلعله بأسانسير

اكيد دلوقتى اتعمل اعلى منها ف حتت كتير
مش مصر بس .. والعالم

6) المهندس اللى صمم 
واشرف على بناء مسجد الفتح 

هوه هواه اللى بنى مسجد النور بالعباسية 

المهندس حسين بكرى
عشان كدا تحسهم قرايب قوى 

7) مسجد الفتح يعد من المساجد المعلقة
 لأرتفاعه عن سطح الأرض 
كما تقول ادبيات العمارة الاسلامية 

8) فيه مسجد يتشارك مع مسجد الفتح
 ف الأسم 

ولكنه اقدم منه 
ومش بعيد عنه قوى 

داخل ضمن نطاق قصر عابدين حاليا

9) مسجد اولاد عنان 
اللى تحول الى مسجد السيدة عيشة 
هوه نفسه اللى مرسوم على ورقة الربع جنيه القديمة 
اللى كانت مصروفنا اليومى يوما ما
وكنا بنشوفه يوماتى 
:)



10) المسجد على مر الزمن 
شاف احداث كتير لقربه من محطة مصر




شاف الاحتفالات والاستقبالات والمناسبات 

شاف كل تغيرات الميدان
شاف الكبارى



 


شاف المباني اللى اتهد واللى اتبنى

شاف كل المواصلات اللى قعد منها 

واللى انمحى 
 

 
تماثيله اللى اتنصب منها لفترة

واللى بعد شوية اتنقل
انه الشاهد الى لا يستهان به 

11) فيه سبيل مواجه للمسجد 
اعتاد الناس خطأ تسميته بسبيل اولاد عنان 

بينما هوه ملوش علاقة بالجامع
 واولاد الشيخ عنان 

دا يبقى سبيل ام الامير محمد على الصغير 

بنته الست صدقة على روح ابنها اللى مات صغير
انشأ سنة  1867  م

واعتاد الناس الصاقه بالجامع 
منعملش زيهم بقى 
ومحدش يدخل عيشة ف ام الخير لو سمحتوا
وقد أعذر من أنذر 

 👌




😆
وخلاص كدا خلصنا 

تصبحوا على ألف خير 

--------------------------------