ست المُلك وكيــدهن عظــيم

نبتدى الحكاية بمثل عامى
ابتكرته القريحة المصرية الشعبية مش من فراغ
وانما نتاج حكمة وتجربة ومعايشة لمئات السنين
حتى قالوا الآتى .. 
كيد النسا محدش قده لو مال على حيط هدّه
#شاخدنلى بالكوا
موقعش ولا خبط عليه 
دا مال بس .. ريّح كدا ع الحيط .. وقعه !
وحكاية الليلة توصياتها ونتائجها هتكمن ف جملة واحدة
على شكل نسيحة من اختكو الغلبانة شهرزاد
الا وهى
متزعلونااااااااش ألا احنا زعلنا ويحيش



عشان يعنى الست لما .. لما .. لما حد يزعلها
اما تبقى ست قوية ومفترية فتنتقم م الراجل بإيدها
واما تكون ست طيبة غلبانة تقوم تدعى عليه
فربنا ينتقملها
يعنى ف الحالتين هوه ف الضياع
ولذا تجنبوا غضبنا وخليكوا حلوين وطيبين ولطاف
ومتزعلوناااااااااش ألا زعلنا ويحيش... !



وسخصية الليلة فاطمية من الطراز الـ VIP جداااا
نون نسوة لكن مش أى نون وغلاوتكم
دى نون جامدة وقوية ومن بيت الحكم
وعاصرت أربع خلفاء بأربع عصور متتالية
وصمدت وشاركت وعملت اللى ما يعُمل ف العادة ..
والست دى رغم عدم حبى ليها
لكن بحب أسمها قوى فيه شمخة ومهابة وشياكة وأبهة
انها حضراتكم ..  سيدة الملك .. الشهيرة بين المصريين
بـــ ... ست المُلك




وست الملك لما جدها المعز لدين الله الفاطمى
قرر يفتح مصر 
بعت قائده جوهر الصقلى لأتمام المهمة
فدخل مصر وبنى القاهرة 969 م مكنتش لسه اتولدت هيا
لكن بعد ما جوهر ما تمم مهمة البناء وعمل القصر
واستتب الامر
هيبعت للمعز فييجى يدخل القاهرة منتصرا
على راس موكب مهيب ورهيب وعجيب
لدرجة انه المصريين هيلمحوا ف وسط الموكب
توابيت فخيمة ويستغربوا ويسالوا .. ؟
فيعرفوا ان المعز لدين الله جاب رفات ابوه واجداده معاه
عشان يدفنهم جنبه ف مصر
ليه يا حاج عزاعيزوا .. ؟
قالك عشان خلاص انا جاى هنا أستقر
ومش خارج منها البلد دى انا واولادى واحفادى من بعدى
وقد كان وصدق الراجل ف كلامه فعلا !!



المهم ان الموكب اثناء سيره لمحوا وسط الحريم
بت صغننة مكملتش سنة عمالة تهيص وتلعب
فسألوا مين دى يا عيال
قالولهم دى حفيدة البيه الباشا الخليفة
- اسمها ايه ؟
- سيدة الملك
- مين ابوها ؟
- العزيز بالله
- كدا طب شكرا
- العفو أى خدمة 



بس يا سيدى ودخل المعز قاهرته ظافرا
محاطا بعائلته احياء وميتيين
 ودخل ف صراعات خارجية وداخلية
 لأرساء قواعد الحكم ومات بعد 3 سنين
عشان يورثه من بعده أبنه العزيز بالله  عام 975 م
وبصوا بقى انا العزيز بالله دا حبيبى
والوحيد من وسط الفاطميين اللى بعزه ف الله كدا
من عمايله الحلوة اللى كانت أكتر م الوحشة
فأستحق محبتى




الجدع صراحة كان شخصية جميلة ومتسامحة
وكريم لأبعد حد
وتابع سياسة ابوه ف التقرب للشعب المصرى
بشتى الطرق لحد ما الدنيا مشيت كويسة
ويقال انه
مكنش عنده غير ست الملك .. لحد ما مسك الحكم
وبعدين جاتله جارية رومية فلقة قمر
والظاهر كانت اخلاقها حلوة وطيبة
والست عجبته فأتجوزها ..
ثم ف ليلة فُللى على العريس والعروسة
وسودة ع المعازيم اللى هما احنا الشعب الميصرى
الست شالت وبعد 9 شهور خلفت ولد
أصبح هوه الوريث وولى العهد





والست حرم الخليفة وكانت تحمل لقب .. العزيزية
سألت جوزها هنسميه ايه يا عزعوزى
قام الراجل قالها نسميه .. المنصور
و #يازين_ما_خلفتى_يازينب
ليه كدا يا شهرزاد ؟
هنقول مستعجلين على ايه ؟
وخلينا دلوقتى ف ست الملك
أين كانت بقى ف هذوها الاثناء ؟ 
إبان حكم أبوها العزيز يعنى ؟؟؟

ست الملك كانت حبيبة ابوها حرفيا
وكان بيسمعلها وبيشورها وكان لها دلال عليه كبير
لدرجة انه مرة سامح وزيره عيسى بن نسطورس
محبة وكرامة لعيونها بعد ما كان عزله من منصبه 
كانت ليها مهابة واحترام ووضع عند ابوها
لهذا رجال الدولة كانوا بيعملولها ألف حساب
ويتمحلسولها
بس هيا كمان كانت ست مش سهلة
واستغلت وضعها لأبعد حد كما سنرى بعديييين 

وبيقولوا ان ابوها بنالها القصر الغربى مخصوص
عشان تعيش فيه ويبقالها حاشية وهوليلة 
زائد الأراضى والبساتين والجواهر الخ
يعنى كانت مال ونفوذ وسطوة وغلاوة عند أبوها
وفضلت كدا ف مكانتها العالية لحد ما العزيز بالله مرص
وجاءت سكرة الموت وقعدت جنبه ف النزع الاخير
وساعتها وصاها على اخوها .. المنصور
وقالها تكون جنبه وتنصحه
وتساعده ما أستطاعت لهذا سبيلا
واوعدينى يا ست اخوكى امانة
ستوتة قالت حاضر ومنصور ف عينى يا بابا
والحق يقال .. بالتخمين يعنى
أكيد ست الملك لما قالتلها كانت تقصدها فعلا
لأن المنصور وقتها كان عنده 11 سنة يا دوب
وعيل صغار جدا
والمشكلة مكنتش ف المنصور 
كانت ف اللى حواليه
بطانة العزيز بالله
اللى يرجع اليه حوار منصب "الوزير" دا
وقبل منه مكنش فيه كدا !!







بموت العزيز بالله كان فيه 3 أسماء مسيطرة على الساحة
بن نسطورس الوزير
بن عمار زعيم البربر ف الجيش
برجوان معلم الوريث .. المنصور






الصراع بين التلاتة على دفة الحكم كان رهيب
بس نسطورس سيطر بصلاحياته كوزير
اما بن عمار فعمل شغب #عسكر_بقى_وكدا
اما برجوان بقى اللى عمل ناصح وحويط
قرر يركز كل جهوده ف التحكم بالمنصور ولى العهد
باحكام السيطرة عليه لأبعد حد
وبيقولوا المنصور كان ابن 11 سنة لما ابوه مات
وكان ف دار ف بلبيس
اللى مات فيها العزيز بالله .. اثناء عسكرته مع جيشه



قوم لما وصل الخبر لبرجوان راح جرررررى
على المنصور لقاه بيلعب فوق الشجرة
راح مزعقاله وقاله انزل يااااااض
أبوك مات وانتا بقيت الخليفة
وخده ع القصر الشرقى ف القاهرة
وتمت مراسم اللامؤاخذة أستغفر الله العظيم .. التنصيب
وبس كدا مع السلامة يا انص
أنّص اللى هوه المنصور هوه اللى مع السلامة يروح
.. ليه ؟
عشان كان وقتها النظام
ان محدش يستلم مقاليد الحكم الا بسن الخمآشر
قبل كدا هوه تحت الوصاية
والوصاية كانت لميييين يا حلوييييين ؟
أيون
برجوان .. المعلم اللى ورى المنصور أيام فحلوقى
وكان بيمهزأه ف الراحة والجاية
ويقول عليه "وزغة"

يعنى ايه وزغة يا طمطومة ؟
يعنى اسم الله على مقامكو كدا .. البرص الصغنن
ليه كدا يا برجو الواد عملك ايه ؟!!!! 
قالك اصله كان ناعم كدا ودحلاب
ويسحب يسحب بين الخدم والحاشية
وفجأة يلقوه وسطهم
وفوق دماغهم زى البرص .. !
#طب_تشبيه_فشيخ_والله :))






المهم .. برجوان حبس الوزغة وعكنن عليه عيشته
وعامله معاملة زفت عشان يسيطر ع المنطشقة
وتفرغ لمحاربة باقى الخصوم ومهادنتهم
وست الملك فين ف خضم ذلك ... ؟
ستوتة كانت ذكية ومراقبة الموقف كويس
وعارفة مين القوى ومين الاقوى
ومين نبتدى بيه ونعاديه ومين نخليه للآخر
ولهذا خوفا على حياة المنصور ...  سكتت
وحطته تحت عينها ورعايتها لحد ما وصل الفتى
لسن الـ 15 وحان موعد استلام مهام الحكم
وطبعا اتعمل حفلة وهوليلة
انتوا عارفين الفاطميين يموتوا ف الهيصة



وبعد الحفلة قعدت مع اخوها ونصحته بالآتى
قالتله بن عمار هوه الأقوى لأنه مسيطر ع الجيش
وبيسمعوا كلامه وخطره أكبر نخلص منه فورا
انما برجوان على قد ايدنا وممكن نسيطر عليه
المنصور قالها انتى شايفة ايه ؟
قالتله نعزل عمار م الجيش ونديله قلادة ونروحله بيته !



المنصور اللى بعد حفل اللامؤاخذة التنصيب
بقى اسمه "الحاكم بامر الله " هيسمع كلامها فعلا
ويأمر بعزل بن عمار 
اللى هيعمل شوية شغب وبعدين يكن ويهدى ويلم الليلة
ف التوقيت دا برجوان هيرتفع نجمه
وهيبقى الكل ف الكل ويستبد
وميخدش باله ان الحاكم بأمر الله خلاص بقى راجل
وهيوقفله ويبتدى يناكفه ويبين الوش الويحيش
ويهدد بعزله من تحت لتحت .. لو استمر الأمر
وبرجوان مش هيهتم قوى غير بأنه هيروح يتحالف
مع بن عمار المعزول م الجيش
وبس يا معلم دنتوا عاملين روبطيةبقى ... 
وكدا ست الملك هتتدخل تانى  
وتقول للحاكم لأه ...
 كدا برجوان مش نافع ولازم نخلص منه
قبل ما يخلص علينا وقتله بقى ضرورة
وجمد قلبك ولا يهمك العرش العرش الحب الحب ..



الحاكم بأمر الله هيعز النصيحة دى زى عينيه
الا هوه كان مستنيها من بدرى الصراحة
ويقرر ينفذها فعلا ويبعت لبرجوان يستدعيه
برسالة شفوية محتواها الآتى 
"ان الوزغة قد صار تنينا "
و يا مستوقد مفيهوش راجل
وتعالالى برا قصدى جوا القصر
عاوزاك ف موضوووع مهم 

برجو يوصله الامر فهييجى على ملا وشه مفزوع
اكمنه المرة دى جاى بعد ما تقل حمله
اختلاسات بمئات الآلأف من فلوس الدولة
وضياع وبستاين وتحف وحوار من أين لك هذا
ولسه داخل ع الحاكم ونازل م ع الحصان وبيوطى
راح حراس الحاكم خرجوا عليه
وهوبا قتلوه
وهوبا ماااااات
وجالك يوم تتشال فيه هوبا يا هوبا .. !



المصريين لما سمعوا بالخبر أتخضوا
وازاى الكلام دا يحصل
اكمن برجوان كان متصدرلهم ف الوش
فخافوا  على البلد لتنهاااار والأستيكرار وكدا
واتلموا وراحوا ف الوسعاية اللى بين القصرين
القصر الغربى والقصر الشرقى
وعملوا قلق وشغب
وتقتلوا برجوان ليه مورهوش رجالة ولاّ اييييه ؟!!!
ولازم نعرف ايه اللى حصل ..
الحاكم اتبرجل واتخض
وتتدخل ست الملك للمرة التالتة وتقوله جمد قلبك
وخش قولهم كذا وكذا وكذا
وهما هيصدقوك
وفعلا .. هيسمع كلام ستوتة ويدخل شرفة القصر
ويسّح الدمعتين الهتون ويقول للجموع الهادرة
انا غصب عنى برجوان كان عامل عندى واختلس وظلم
وشفت انى اقتله .. فقتلته لمصلحة البلاد والوطشن
وناموسة واتفعصت وكلب وراح ومجراش حاجة بقى
متكبروش المواضشييييع يا شعب !
وسكت
الناس معرفتش تعمل ايه .. مكنش فيه خطة طبعا
ولا لديهم أدنى فكرة هيعملوا أيه بعد الوقفة دى
راحوا ساكتين هما روخرين
واخدوا بعضشيهم من سكات واتفرقوا ... !!!





وحد يقولى جرى ايه يا فاتيما
تكونيش زعلانة على برجوان ... ؟
اقولكم اتلاقاااا
 بس كل الحكاية ان سكوت أى شيعب ف المواقف دى
غالبا بييجى على نافوخه بعدين
عشان الحاكم بامر الله بعد ما فلت من هذه العملة الزرقا
هينشكح بقى وهوه وست الملك هيتصوروا ان خلاص كدا
مبقاش فيه خطر عليهم من أى حد
وبدل الحاكم ما يحمد ربنا ويلم التعابين
ويدوس بنزين ف اتجاه الخير ويعمل زى ابوه
هيسوق فيها وهيتنيل يتحول
يبقى زى وحوش الاساطير كدا واكتر 
ويبقى تنين فعلا
وبعد ما كان المؤرخين بيقول ع الأب ...
"ان حلم العزيز بالله لم يسمع بمثله قط من ملك "
بقى احد المؤرخين بيقول ع الأبن .. الحاكم بامر الله
" وكان شيطاناً مريداً ، جباراً عنيداً ، كثير التلوّن
سفاكاً للدماء ، خبيث النحلة ، عظيم المكر ، جواداً ممدحاً
 له شأن عجيب ونبأ غريب .... كان فرعون زمانه "
دا الدهبى اللى بيقول ف وصف الخليفة الفاطمى ..
اللى مصر انوكست بيه



وطبعا دلوقتى حاكاكيمو بقى الكل ف الكل
ورجليه شالته
هيبدأ بقى يورينا البدع أشكال وألوان وأصناف
ومفيش داعى أحكيلكم عن جنوناته وغرايبه وعجايبه
بالتفصيلى المملى عشان اغلبكوا عارفها أكيد
منع اكل الملوخية والترمس والجرجير والقرنبيط
والقراميط ومنع الخمرة وحرق أشجار العنب
ومنع المغانى ولعب الشطرنج
و حوار ان الحريم متخرجش م البيوت
وآل محدش يصطاد سمك بقشره انما اللى من غير قشر آه #وش_بيهرش_ف_راسه
واضطهاده للأقباط وقصص كتييير كدا
مليانة تهريج وشغل ميعملوش اعظم مخرجى افلام 
السينما الهندية ولا يقدم عليه بتهور أقدم نزلاء العباسية




دا غير بقى قصة إدعاء الألوهية
و انه مستحضر فيه روح سيدنا على
وان روح سيدنا على كان فيها روح سيدنا آدم
والحاكم صدق الحوار دا 
لدرجة انه كان بياخد قرارت عجيبة ومرعبة
ويشوف هتتنفذ ولاّ لأ
عشان يعرف الرعية والحاشية شايفاه الامام فعلا
ولا عاصيين وخارجين عن التشيع وكدا
وشوية ويلبس صوف ويخشوشن
ويقول محدش يوطيلى ويسجدلى
وشوية يصدر امر بأن لو اسمه اتقال ف أى مجلس عام
الكل يقوم يوطى ويقبل الارض !
ومنع الحريم من المشى ف الشوارع
ومنع الجزمجية يعملولهم جزم عشان ميعرفوش يمشوا .. !
وعملهم مغارف بأيد طويلة
وخلى عماله يعدوا بالاكل ع البيوت
عشان كل ست تغرف من شباكها الاكل ..
يعنى حتى متخرجش تقف على عتبة الدار
#ام_أمين_امك_بقى
وبس الدايات كان مسمحولهم بالخروج عشان يولدوا الحريم
بس ياخدوا امر كتابى بهذا الاول
#هيافة_هيافة_يعنى



المهم الجدع مفيش هبل سابه  وجنونة معملهاش
وفيه بعض الناس بتقول انتوا ظالمينه جدا يا ويحشين
وان بعض مؤرخى السنة افتروا عليه
عشان يخلوا الشيعة شكلهم وحش
والحقيقة الكلام دا مش داخل دماغى
عشان العزيز اخد حقه من التقدير ومحدش شوهه
واللى جم بعد الحاكم كمان كله اتوصف عيوبه وحسناته
واللى عاوز يشوه ما كان شوه الكل بقى
اشمعنى الحاكم يعنى اللى هيبالغوا ف سيرته
ومحروقين منه قوى كدا للدرجة دى الا اذا كان صح !




ثم كلهم قابضين وموتورين ومتغاظين
مش معقولة يعنى .. !
والأخ جمال الغيطانى روخر
من أنصار ان الحاكم راجل كويس
بس المؤرخين فهموه غلط
وطبعا بعد مواقفه الاخيرة من العسكر
واحكامه العظيمة عليهم احب اقوله .. عند امك

المهمممم
هنعتبر ان كل دى افتراءات ع الراجل الكويس الحلو
اللى حب يسيطر ع الشعب البايظ دا ويربيه
ويعرفه مصلحتشه .. ماشى
 بس معلش يعنى معلش يعنى
الواقعة دى قالها الجميع
من أهيف مؤرخ لحد المقريزى ومحدش كدبها ..
الا وهى ان الحاكم كان مغرم بالنزول للطرقات
ومراقبة كل حاجة بنفسه وعامل فتك وحويط وكدا وبتااااع
وكان بيعاقب اللى يشوفه مخالف لأى أمر من أوامره فورا
وعمل للناس هسس ورعب
لدرجة انه كان البشر بيلاقوا فلوس ف الأرض
فيخافوا يوطوا ياخدوها !!!
وف مرة ف بدايات عهده
 لما حصل نقصان لمنسوب النيل
 وشحت الغلة ف الاسواق .. التجار بعضهم استغل الموقف
وبقى يخبى البضاعة عشان يبيعها بسعر أعلى
وحصلت بدايات مجاعة واضطراب
فالحاكم لسه هيستنى بقى
راح نازلهم السوق وبصوت جهورى راح قايل :
انا رايح أصلى ف الحتة الفلانية
ومسافة ما أرجع لو لقيت السوق فاضى ..
هيكون يومكم اسود من قرن الخروب يا غجرررر
وطبعا على ما راح ورجع كان التجار خرجوا بضايعهم
وفرشوها ف الطرقات 
والناس اشترت واكلت .. وشكرا




حد يقولى طب يا شهرزاد ما الراجل حلو اهو
وبيقيم العدل وزى الفلة شمعة منورة عاوزة ايه ؟
أقولكم لأ معلش
معنديش مشكلة ف تهديد ومعاقبة المخطىء
بس عندى مشكلة ان الحاكم كانله طريقة ف العقاب
غير القتل والحبس الخ
وكانت ألعن م القتل الحقيقة
وهيا العبد مسعود
تسمعوا عنه .. ؟ ولا نحكى ؟

نحكى بس عشان تعرفوا الايام السودة اللى مصر شافتها
الاخ مسعود دا كان عبد للحاكم
عود كدا وفرع وهجمة وشكله يخض الجن 
قوم الحاكم يقرر ف يوم فجأة يعمل جولة تفقدية للسوق
وينزل يتمشى ووراه مسعود
حلو ؟
لا مش حلو أبضننننن
عشان اللى كان الحاكم بيشوفه بيغش ف حاجة
او متهيأله كدا يعنى
مكنش بيقول لمسعود اقبض عليه
او امسكه اضربه ولا بتاع اتلاقاااااا
دا كان بيقول لمسعود .. يعمل معاه الجلاشة والكنافة
والقطايف وصوابع زينب ف نهر الطريق
وعلى مرأى ومسمع من كل الواقفين وش كدا
وعينى عينك !!
واللى هيقولى يا فطمطم يستحق .. بيغش وكدا
فيستاهل اللى يجراله
هقوله طب ربنا يوقعك ف اللى يعمل فيك كدا انتا كمان
بس انا ساعتها مش هيجينى قلب أقول عليك ... تستاهل
مش هقول لأن العقاب لازم يكون من جنس العمل
وأظن مفيش ف الدين ولا الدنيا عقاب كدا اصلا
ولا فيه جريمة تستحق عقاب كدا ... 
دا الحيوانات مبتعملهاش حتى ... ولاّ ايه ؟؟




القصد .. وبالمختصر
 الحاكم بأمر الله كان راجل سُكرة البعد عنه غنيمة
ولكن ماذا عسى يفعل المحيطين بيه
والمضطرين للتواجد معاه ...
وهنا هنرجع لسيرة .. ست الملك من تانى
عشان هيا ف الاول كانت سمن على عسل وطحينة
مع الحاكم لما كان لسه صغنن ومراهق
لكن بعد شوية الواد شنبه خط وصوته تخن
وافترى وعمل سبع رجالة !
وبقت كل ما تدخله قاعة الحكم عشان تنصحه
يسمعها كلام مش اللى هوه
ويقولها خليكى زى عماتى
والتزمى قصرك ومغزلك
يعنى ايه ؟؟
لأ مفيش الولا بيقولها بالأدب اقعدى ف حالك
وسلى نفسك بمفارش كروشيه ولا بلوفرات صوف
وقضى اوقات فراغك بعيد عنى وعن السياسة والحكم
#يوغتى




طب تفتكروا ست الملك بقى تسكت ؟
لأ طبعا الست ف سن والدته تقريبا
وهيا اللى مربياه الا صحيح طلع مش متربى يعنى
 بس الموقف بقى زفت وهوه عمال يتوحش
زائد انه بقى مختل لدرجة سفك الدماء عمال على بطال
ف أوائل حكمه كان بيقتل من وزرائه وحاشيته أعداد
وبلا أسباب مقنعة لدرجة انه بقى تقليد عادى
وبقى اللى يموت من رجالات الدولة موتة ربنا ف سريره
او لمرض .. يبقى ربنا بيحبه وراضى عنه
الحاكم كان بيقتل هواية وتسلية
والدم بقى غية لدرجة انه ف مرة دبح احد الخدام
لأنه كان شبه ابنه "على"
وهوه كان عاوز يقتل ابنه تشبها بقصة سيدنا اسماعي
 ويشوف الناس هتتقبل وتقدسه ولا لأ!
المأساة مش بس انه فكر يقتل ابنه وتراجع ..
فدبح الخادم مرجان
المشكلة الاكبر ان مرجان كان اخلص خدام ست الملك
وهيا اعتبرت المسألة دى رسالة موجهة لها .. !
وطلبت مقابلة اخوها
 فراحلها قصرها ودخلوا ف نقاش عصيب
- انتا قتلت خادمى
- مش احسن ما أقتل ابنى
- انتا جرالك ايه
- ولا حاجة خدمك فوق راسى يا ستوتة
- كلام وبس انتا عمال تخرب ف بيوت وتقتل ناس
- انتى اللى علمتينى مش فاكرة برجوان وغيره ..؟
- دا كان لمصلحتك
- واللى بعمله دلوقتى لمصلحتى برضو
- انتا بتمنع الحريم من الخروج ف الشوارع ليه
- وانتى مالك؟
-  جم شوية منهن واشتكوا على باب القصر
- خلاص بسيطة ..  نعدمهم !



وفعلا وهوه خارج أمر بقتلهم ..
وأمر بتضييق الخناق عليها اكتر
وكترت مظاهر ادعاء الالوهية
 وانتوا عارفين الشعب المصرى بقى ميسكتشى
وهيبدأ يقف للحاكم المهروش 
المصريين قرفوا من حوار الالوهية والتقديس
والحوارات دى
واذا كانوا قبلوا بحكم وخلافة شيعية فدا لا يمنع
من انه قلوبهم سنية الهوى مهما حدث
الحاكم كان سايب الاضيشه ف الشوارع والجوامع
والطرقات يعملوا جو الاعلام الوسخ بتاع دلوقتى
ويهللوا ويطبلوا
ومولانا مارينجوس طويل العمر يزهزه عصره الخ 
فالناس جابت اخرها وف مرة ف صلاة الجمع
الحاكم طالع المنبر يهلفط كعادته بخطابات
من نوعية خطابات الشرعية والتنصيب الخ 
وبص لقى ورقة مطوية
بيفتحها لقى مكتوب فيها الآتى :
بالظلم والجور رضينا ..... ليس بالكفر والحماقة
ان كنت أعطيت علم غيب ... فقل لنا كاتب البطاقة
:))




طبعا سخرية المصرى ملهاش حل
بس شوية بشوية السخرية هتقلب لعنف
لما الحاكم يزيد ف غيه وبشاعاته
وتحصل ثورة ف الفسطاط حكينا عنها قبل كدا زمااان
قصره البلد هتبقى بتولع
والحاكم ولا ف دماغه
وست الملك هتتجنن م اللى بيحصل
وهتبعت للحاكم لمرة أخيرة تقوله
يهديك يرضيك الله يخليك !
فالحاكم بقى هيجيب اخر ما ف ترنش الوضاعة بتاعه
ويقولها ف وشها انتى بتكرهنى وعاوزة تقتلينى
وانتى بتجيبى رجالة ف قصرك وبيقولوا انك حامل ..!!
وانا هبعتلك دايات يكشفوا عليكى عشان اعرف الحقيقة
الا تكونى فاكرة نفسك هتمرمغى شرف العيلة ف التراب
يا كلبة وانا مثلا هسيبك .. !
#كانت_وقتها_داخلة_ع_الخمسين_بالمناسبة



بس وكانت المقابلة دى القشة التى قصمت ظهر البعير
حرفيا
عشان بعد الحاكم ما هيخرج من عندها
فورا هتبعت لأحد الرجال واسمه ابن دواس
تقوله احضر حالاااا
ابن دواس مكنش راس الجيش
وكان حد مش معروف قوى .. وبيمشى جوا الحيطة
خوفا من بطش الحاكم اللى كان
لما يلاقى حد اسمه لمع شوية .. يقتله !
ست الملك بعتت لأبن دواس واتقابلوا
والراجل فهم فورا المطلوب منه
واللى حددته اخت الخليفة ف جمل واضحة
تلخص الوضع وما قد يحدث من نتايج عنه
قالتله عاوزاك تلحقنى وتخدمنى ونخلص على الحاكم
لأنه
" تظاهره بادعائه الإلهية وهتك ناموس الشريعة
وناموس آبائه وقد زاد جنونه 
وأنا خائفة أن يثور المسلمون عليه فيقتلوه ويقتلوننا معه
وتنقضي هذه الدولة أقبح انقضاء "
م الآخر الست خافت على ملك الفاطميين
وشقى عمرهم !
خوفها مكنش من جنون وتصرفات الحاكم بس
على فكرة دى مقدور عليها
لكن اللى رعبها فعلا ان الحاكم قرر يغير ف نظام الحكم
حسب مذهبهم الاسماعيلى
واللى  كان بيقول ان الحكم من الاب للأبن
فالحاكم قرر فجأة ف لحظة جنان ميورثش ابنه
ويدى العهد لأبن عمه عبدالرحيم وعمل كدا وكتب ورقة
ومحدش جرؤ يعترض عليه طبعنننن 



ست الملك خافت من الحوار دا
وقررت تشوفله حل يبدأ بالتخلص من الأخ المجنون اولا
وقد كان
اترسمت الخطة انهم يصطادوا الحاكم اثناء خروجه
ف جولة من جولاته الليلية تحديدا
عشان الليل ستار زى منتو هارشين
وبما ان ست الملك لها اعوانها واحبابها
فعرفت معاد خروج الجدع ورتبت الترتيبات
وخرج الحاكم ف هذه الليلة رغم تحذيرات امه له
بعدم الخروج عشان قلبها واكلها .. متعرفش ليه
#قلب_الام_بقى



ويخرج حاكومة ف الفجرية يركب حمارته القمر
كان مسميها كدا .. القمر!
المهم ركبها وخرج ف طريقه للمقطم
ومعاه حراس أى كلام
ومطمن بقى انه محدش يجرؤ يأذيه
وف احدى المطارح يطلع عليه نفرين
يقتلوا الحارس اللى معاه وينزلوه من ع الحمارة
ودب دب دب لحد ما يفتحوا بطنه
ويخرجوا مصارينه ويقلعوه هدومه
وياخدوه ف شوال على ابن دواس ..
اللى هياخد الشوال بمحتواه والعبدين القاتلين
ويطلعوا على ست الملك اللى هتتمم ع البوضاعة
وتتأكد انها هيا
ولنا ... هنا ... وقفة



عشان فيه ناس بتقول ان ست الملك
امرت بالحفر ف مجلسها ودفنوا ف الحفرة جثة الحاكم
وفيه ناس تانية بتقول لأ .. هيا امرت بدفنها ف المقطم
بس بعد ما شافت الجثة والهدوم واطمنت وكدا ..
وأى كان اللى حصل فهيا قتلته
ومتفرقش عملت ايه بعدها يعنى ... مش هندقق
المهم سلمنى نضيف اسلمك نضيف
وبس بقى .. راحت مدية فلوس وهدايا لأبن دواس والعبدين
وقالت كل واحد يروح يا ولاد
وخدوا هدومه ارموها ف مكان مهجور
وبراءة الاطفال هتشتغل ع الآخر واستعباط حتى الموت 



تانى يوم أم الحاكم اتوغوشت الواد مرجعشى
ودا كان قايل مسافة الليلة وارجع يا نينة !
وأمرت الحراس يدوروا عليه
فست الملك عملت من بنها
وبعدين الشعب اتوغوش
والجيش قلق .. والحاشية اترعبت .. والدنيا اتقلبت
الحاكم راح فييين ؟
فست الملك امرت رجالتها ينشروا اشاعات
انه معتكف
وانهم شافوه ف الحتة الفلانية
والحتة العلانية
وقعدوا ع الحال دا أسبوع لحد ما توصل البعض
لهدوم الحاكم الغرقانة دم وساعتها أعلن موته رسمى !




وطبعا مفيش جثة فأنتشرت اشاعات انه حى
ودا رحيل هيتبعه بعث يوما ما وحاجات خرفنة كدا
المهمممم ف هذا التوقيت بقى فيه مشكلة اكبر
دلوقتى ست الملك خلصت من اخوها صحيح
بس هتعمل ايه ف ولى عهده .. ابن العم عبرحييييم ؟
اللى كان ف دمشق بيحكمها
ومروق الانانى .. يا نانى ؟؟؟



ست الملك قالت كدا مينفعشى طب وبعدين ؟
ومش معقول هتقوله سيبها يا عبرحيم
قوم عبرحيم هيسيبها ببساطة كدا يعنى !
قوم اييييييييييه ؟
هتبعتله جواب ف الأستخوبث تقوله احضر بشكل سريع
ومتخفيا لدواع امنية حتى تستلم عرشك
عبرحيم الهلاهوطة مداش خوانة
ونفذ الخطة حرفيااااااا
ولا مواكب بقى ولا دوشة ودخل مصر متخفيا
وعند الفرما هيستقبلوه رجالة ست الملك بالتيرحاااااااب
ويعكشوه ويجيبوه ف الحديد
وعلى ما يجيبوا متسلسل بقى هتكون ست الملك
عملت العزا والمصريين راحوا يشربوا القهوة
والنسكافيه والينسون على روح المرحوم 
وقبل تالت يوم عزا ما يخلص
هتكون ست الملك موزعة الفلوس والدهب
والمناصب على الحاشية واخدة البيعة والولاء منهم
لأبن الحاكم الأستاذ .... على




وعلى كان مراهق .. تقريبا ف سن الـ 16
 وركب فرسه وخرج ف موكب
واحد قواد الجيش يقول
" يا عبيد الدولة مولاتنا ست الملك تقول لكم 
هذا مولاكم أمير المؤمنين ... "
فركع الجموع وسلموا عليه والف مبروك يا على
وانتا بعد بابا البركة فيك
ومات الملك عاش الملك ويجعلها اخر الأحزان
وحد دلوقتى هيسالنى فارغا فاه
ويقولى طب مفيش أى حد أعترض ف الليلة السودة دى ؟
أقولكم ازاى
دول بيقولوا إن فيه غلام تركى مجهول اسمه
وقف وزعق قائلا
"لن أبايع حتى أعرف ماذا حدث لمولانا الحاكم ..!"
فالناس سكتته وأخرسته وسابهم ومشى غاضبا
وكمل الفرح التنصيبى لحد اخره
وبيقولوا بيقولوا بيقولوااا
انهم لقوا جثة الغلام التركى دا بعد يومين
عايمة على شط النيل
ايه جراله وحصله ايه ... 
الله أعلمممممممممممممممممممممممم





وبس كدا قضينا على المعارضة
ونصّبنا الواد على وبقى اسمه .. الظاهر لإعزاز دين الله
فاضل مين نخلص منه ؟
 دنا اللى بسئل روحى متقمصتن الست ست الملك
ولى العهد عبدالرحيم ابن العم .. طبعا
 اللى مقبوض عليه وجابوه بالسلاسل قصاد الظاهر
عشان يبايعه ويعترف بيه كخليفة
وطبعا الراجل بايع .. هيعمل ايه بقى حكم المضطر !


وفيه روايتين حول مصير الأخ عبرحيم
عشان طبعا بعد المبايعة مينفعش ينقتل علطول كدا
دا ابن عمنا وابننا برضو الشعب ياكل وشنا
قوم اييييه
فيه ناس بتقول انه اتسجن واتبهدل ف السجن
لحد ما قرر ينتحر وغز نفسه بسكينة ..!
وناس تانية تقولك ان ست الملك هيا اللى عملتها خوفا 
خوفا من ايه ؟؟
بيقولوا انها كانت ابتدت تركبها الامراض
وخافت على العرش ليطلع عبرحيم من سجنه
ف أى لحظة غدر ويسترجعه تانى
فامرت بقتله
واراء كتير ترجح ذلك
وأنا كمان أرجح .. ليه يا فطومة ترجحى ؟
اقولكم عشان يعنى هيا قتلت اخوها
هتيجى لأبن عمها وتقتصر ؟؟
ثم ان اللى حصل بعد كدا .. يأكد الشكوك دى 



وكدا ست الملك بعد تنصيب الظاهر
والخلاص من عبرحيم والمعارضين اطمنت
والشعب هدى وسكت فاضل بقى الكوم الكبي
 وشريكها ف الجريمة ابن دواس
هيا طبعا ست مش عبيطة وعارفة كويس
ان ابن دواس دا تعبان وهيا مقعداه ف قصر الخلافة
وبيسمن ويتختخ وكلها شوية وهيشبع
ويبتدى يطالب بما هوه اكثر من حقه ..
قامت بعتاله ومغرقاه هدايا
عشان يسقط ف بلاص العسل لحد قاعه
وقالتله بكرة تجيلى قصر الخليفة عشان الظاهر دا زى ابنك
وانتا لازم تكون دراعه اليمين



والحاكم الله يرحمه كان عنده حرس خاص بيه
مكون من 100 عسكرى شداد مرعبين
كانوا زى حرس الثورة الإيرانى كدا
اللى هوه قتل قتل مفيش شتيمة
ف اليوم المتفق عليه ابن دواس وصل القصر
فخرجتله ست الملك وقالتله الـ 100 عسكرى
بتوعك وتحت تصرفك من اليوم
طبعا الشاب انشكح وانبسط قوى وسابها
وراح يستعرض حرسه الجديد فريق الأسد المرعب
وست الملك دخلت قصرها
وبعتت نسيم احد رجال حاشيتها اللى وقف ورا بن داوس
وقال الأتى
"يا عبيد مولاتنا تقول لكم هذا قاتل مولانا الحاكم فاقتلوه"
طبعا لكم ان تتخيلوا المنظر
نسيم واقف والـ 100 حارس واقفين
و.. ابن دواس ف النص !



طبعا اتفرم ف النص
وفريق الأسد المرعب داسوا على ابن الدواس .. سحقوه
ومات الجدع بحركة معلمة متجيش الا م الحريم
اللى دماغهم متكلفة والنيعمة
وطبعا انقتل العبدين اللى كانوا معاه
واللى هم اخلص رجاله وقتلوا الحاكم
وخرجوا مصارينه برا فاكرينهم
وبكدا تكون ست الملك تخلصت من كل الاخطار المحيطة



وطبعا الظاهر الخليفة الجديد مكنتش ايامه الاولى سهلة
وعانى من أخطار وثورات خارجية وداخلية
وحصلت مشاكل وفتن ومجاعة ف السكة كدا .. بالمرة
لكن ف خلال اول 4 سنين
واللى عاشتهم ست الملك ف عهده
كانت مبتبخلش عليه بالنصح والأرشااااااد
وطبعا انتوا ممكن دلوقتى تقدروا غلاوة نصايح الست دى
:)

وبس هتعيش ست الملك .. ست الكل ف الكل
لحد ما تكتر عليها الامراض
وتموت ف قصرها ف سريرها قريرة العين
مرتاحة البال والضمير مستكين .. يازدحمد




والظاهر يكمل مسيرة العيلة الزرقا دى
ويورث الخلافة لإبنه المستنصر بالله
اللى هيقعد ف الحكم 60 سنة يا ثاااامح
وف عهد تحصل الشدة المستنصرية
والناس تجوع تاكل الكلاب والقطط
وبعدين تاكل بعضشيها ف الشوارع
وينضطر المستنصر يجيب بدر الدين الجمالى
من الشام واللى هيبقى أمير الجيوش وامير مصر كلها
ويجيب المستنصر على جنب
ويبدأ عصر الوزراء .. والخلفاء ييجوا الناحية دى
وتضعف الدولة وهكذا يتوالى الأحفاد
حتى تنتهى الدولة الفاطمية ف مصر
على ايد صلاح الدين القليوبى ... وشكراااا



وتوتة توتة .. خلصت حكاية ست الملك
ومفيش ملاحظات كتير الا انه
اولا 
ف وسط كل هذه الأهوال
محدش قالنا مصير حمارة الحاكم كان ايه ..
القمر الغلبانة البائسة حصلها ايه ... ؟
:)



ثانيا
مفيش داعى أفرط ف اعجاااابى بالحاكم
وروعته وجماله واقولكم تخيلوا وبتاع
ابسلوتلى احنا هنشوف الايام دى لايف شيكلنا كريبااا #ربنا_يلطف



ثالثا
ست الملك دى قادرة وفاجرة وغايظة الكل
لدرجة ان بعض الشيعة بينكروا وجودها اصلا
وبيقولوا ان بعض مؤرخى السنة هما اللى اخترعوها !
وان الشخصية دى كانت عاهرة ف احد المواخير
والناس كراهية ف الحاكم سموها اخت الملك
وقعدوا يتريقوا بينما هيا مش حقيقة ولا حاجة
والحاكم قمرررر ومغلطشى اخر جمال وأدب .. !



وفيه ناس من فرط رفضها مؤامرة قتله دى
قالوا ان الحاكم آل عملها عامدا متعمدا
عشان يرسخ اسطورة رجوعه يوما ما
#زى_حوار_اللى _مصدقين_ان_السيسى_انقتل_وكدا



وفيه روايات فعلا لشخص ظهر ف صعيد مصر
بعد كام سنة وكان بيصرخ انه قتل الحاكم
وطلع سكينة وقعد يقول قتلته كدا
قتلته كدا
وبقى يطعن نفسه لحد ما مات !
قصره ومن الآخر
 ست الملك كانت مفترية ومعدية السلك ف الاجرام
ولو تسألها هتقولك كله عشان الوطن
انما لأ ف الحقيقة كله كان عشان الحكم والنفوذ يا ست
دحنا دافينه سوا .. عيييييب 


رابعا .. 
للمرة المليار ف حكايات مصر نقول
لعن الله التوريث وشغل ملكى بتاعى ولعيالى واحفادى
اللى بيوصل ناس للغدر ببعضها 
و لو كانوا اخوات .. !



خامسا .. بيقولوا ان ست الملك متجوزتش
وطبعا مين هيقرب من ست زى دى من ايام ابوها
وهيا بتأمر وبتنهى وبتسوى الهوايل
وبعد ما جه اخوها وطلع جنانه
طب مين يجرؤ يتجوز اخت الحاكم بأمر الله 
ثم يتهمها ف شرفها وهيا قربت ع الخمسين .. !
يعنى قصره وم الآخر الولا وقفّ سوقها 
وبعدين عكنن عليها عيشتها كمان يسوء سمعتها
لأ يستحق اللى جراله
وتعددت الاسباب والقتل واحد 



واخيرااااا عودا على بدء نقولها تانى
الحكمة الازلية المستخبية اللولبية الشهرازدية
بتقول :
متزعلوناااااااااااااااااااش عشان احنا زعلنا ويحيش


وتصبحوا على ألف خير

-----------------------------------

اكتئاب ما بعد الثورة @MahometusUsama 
الفرما مكانها بورسعيد مش العريش يا شهرزاد


passant el borollocy @Passinta 
يا شعبى الحبيب انا ابن مجنونه هحححححح


amr salem @amrosalim2001 
وانتو نور عنيا وكده واي اعتداء عليكو 
اعتداء عليا بذات نفسي



Ahmed Rageh @Ahmed_Rageh101 
 حادثة صيد



amr salem @amrosalim2001 
 ولا حاجة يعني بيتمشي عالنيل رجله اتزحلقت وقع
اييييه هانجيب كل حاجة ع ست الحته
دي حتي طيبه وبنت أصول بتقتل وتدفن ..بلاش افترا



mayada el_awady @MayadaEl_awady 
فعلا في اعتقاد قوي انه هيرجع
ده حتي الدروز لسه مستنينه يخلص العالم من الناس
الوحشييييين :)



amr salem @amrosalim2001 
فيه مقوله تانيه عن المقريزي
وبيقول فيها ان الاخوان هما اللي اتلمو عليه وقتلوه
عشان هو كان منفسن منهم حبيتين


Captain Haddock @hassan19211 
 ده شغل القذافى!


hayat @hayatankh 
الست فعلا بتسلم نضيييييييييييييف


mayada el_awady @MayadaEl_awady 
 دي مش جلاشه اطلاقا ده كنافه بالقشطه
:)
ان كيدهن عظيم فعلا الست لما بتقرر تاذي
الشيطان في هذوهي الاثناء هو اللي بيحاول يهديها
:)


hayat @hayatankh 
 قالوا شافوها راجعه لوحدها منغيره



mayada el_awady @MayadaEl_awady 
الغيطاني بيقول انها رجعت والناس لقوها مضروبه
في رجلها علشان كده عرفوا باختفائة بدري
لانه كان من عادته يعتكف في مكان في حلوان


Ahmed Rageh @Ahmed_Rageh101 
ليه بينكروها دول المفروض يفتخروا بيها :))



Ahmed Rageh @Ahmed_Rageh101 
مرسي راجع والزمالك قادم


مِـيرْڤَـتْ @frikeko 
 بنزعل و نجيب ناس تزعل :D


gamalsidki @gamalsidki 
وبدر الجمالى حيعمل الجمالية اللى حتجيب لنا السيسى :)



amr salem @amrosalim2001 
 احنا ما بنتهددش يا فاتيما اه ولا يغرنك حلم الحليم وكده



 mayada el_awady ‏@MayadaEl_awady
 ايون طبعا ماهي دي النوايه الاولي للاكياس البلاستيك
بس دي كانت بتعبي في شوله