لغتنا العامية البزرميط خالص

 النهاردة حاجة خفيفة 
عشان الحكاية الجاية هتكون دسمة وتقيلة 
وبعدها غالبا شهرو هتاخد اجازة
 نبتدى

حكيوة الليلة دى 
هتتلخص ف جملة سيادة العميد #بتصرف 
 وهتبقى عن 
لغوتونااااا العااااامية يسرون لا عوسرررر



والشاهد ان البلد الغلبانة دى عدى عليها ف تاريخها
محتلين وغزاة ميتعدوش من كل صنف ولون ولغة 
وكلهم غاروا والحمدلله 
لكن فضل حاجة من ريحتهم

فضلت ف حياتنا وعلى لساننا كلمات .. منهم
ومن ثقافتهم عشان تفكرنا بيهم
وف نفس الوقت نعلم بيها عليهم ونفكرهم
اننا متمسخناش وحافظنا ع الهوية




واللهجة المصرية ف مجملها تبان عربية 
لكن الحقيقة ان كلامنا فيه كتير من القبطية والتركية
والفرنسية والانجليزية والإيطالية واليونانية ..الخ
وكله متلخبط على بعضه حاجة بزرميط 

والبزرميط كلمة تركى معنها خليط

وف جملة واحدة عندنا ممكن تلاقى الخليط دا فعلا

 ومتجانس ومفهوم وشغال وزلفل ومجراش حاجة 

:)

لكن التركى يغلب .. لأنهم كبسوا على نفسنا عقود
من اول حاكم من أصل تركى 
وكان احمد بن طولون
لحد ما مشى الملك فاروق 
وانتهى حكم الأسرة العلوية

ف النص هتلاقى مصر حكمها رجال 
برضو من اصول تركية او ما يجاورها
واتداروا ف الزخانيق لحد ما ظهروا بشكل واضح
ايام المماليك وما بعدهم 
وخد عندك بقى

بقسماط 
مثلا .. تركية ومعناها الخبز اليابس 
أو الناشف 
يعنى زى الحفر بتاع قناة المشير السيسى

وسلطان لما راح
 الكراكون 
مكنش عارف اكيد ان اصلها تركى 
متحرفة من لفظة قره قول
واللى بعد كدا لما سموه الكراكول 
ثم الكراكون يعنى قسم البوليس 
 واكيد ساعتها كان من غير تكييف طبعاااا

 واللى ف الصورة يبقى كراكون العطارين
ف اسكندرية 
شوف الحلاوة والجمال والشياكة 
وحاجة تشرح القلب وتخليك تتمنى ترتكب جريمة 
عشان بس تدخله
:) 

ولما كنت بشوف ليالى الحلمية 
اسمع اسم .. نازك السلحدار 
فكنت قول يعنى ايه المعنى ؟؟
 لحد ما قريت مرة ان نازك يعنى الحلوة اللطيفة !!

فاستغربت جدا ازاى اسامة انورعكاشة 
ينقى الأسم دا للشخصية دى 
 دى لطيفة ؟؟
دى نار مولعة ومش لطيفة ابضنننن 
دى نيزك السلحدار مش نازك !! 
لحد ما عترت ف معنى جديد 
وهو ان نازك مشتقة من النزاجة 
أو النزاكة يعنى الترف والأبهة 
 وكدا تمام وقشطة المعنى لايق فعلا 

Heba @HappyGeddan  
  بمناسبة نازك دي نازك الملائكة مع امي

Ahmed Rageh @Ahmed_Rageh101
وهم كانوا بيقولولها يا نزاكة في المسلسل فعلا



اما التواليت او الحمام او بيت الراحة .. 
فالتراكوة زمان كانوا مسمينه ... الأدبخانة 
تخيلوا ؟!

اما الست سوكيننة الشهيرة بسهير البابلى 
ف المسرحية المعروفة 
 فكانت لما بتقول انها هتلبس لواحد بس الشفتشى 
كنت بفتكرها
بتتكلم عن الهدوم والملابس الخليعة وما شابه 
اتارينى ظلمتها آحرام 
والشفتشى دا طلع اكسسورات الزمن البائد 
بتاع العثمانلية

 
والشفتشى المقصود بيها عمل الحلى من النحاس
 بعد تطعيمه بالخرز وغيره 
شغل دقيق كدا 
لكن ف النهاية يلفت النظر من جماله 
ويبقى حاجة شفتشى خالص !

 

اخيرا عرفت ليه شفيق يا راجل قال على شبرا 
راجل دوغرى ملوش دعوة بالنوس 
عشان بالتركى معناها : المستقيم المتحدث بعلانية

اما كرخانة فطلعت الحتة اللى كبسوا عليها 
فقيلت الجملة الخالدة 
انتوا ازاى تتهجموا ع الناس ف بيوتش الدعشارة .. ؟!

 

فشنك يعنى فشار وكداب ومتبجح ومفاخر 
ومتباه منفوخ كدا ومن جواه فاضى 
والطلقة الفشنك يعنى الخالية من البارود .. وفاضية !

 اما العُكَّام  فدول بقى كانوا جماعة أقوياء شداد 
وكان بيأجرهم بعض الحجاج الأغنيا 
عشان يحرسوهم طول السكة من أى مخاطر
ومن هنا جت كلمة يعكمه عكمة محترمة 

 
 

الدستور يعنى الإذن والسلطان زمان 
كان بيدى الامرا بتوعه دستور 
يعنى يسمحلهم بفعل شىء 
 ومن هنا جت الكلمة عندنا 
لما ندخل مكان ونستأذن اصحابه

 

خربشتة

 كلمة فارسية بمعنى الخيمة المهترئة 

والخربوش هوه ساكن الخيمة دى

 وكان غالبا من فقراء البدو

ومن هنا جت كلمة واد مخربش 
وجت كمان كلمة خربشة .. 
اللى ناتجة عن الخناقات مع العيال المخربشة 

 

دهليز
كانت بتستخدم للدلالة على خيمة السلطان 
اللى بتتنصبله في الحروب أو في الصيد والفسح 
وبعد فترة بقت تستعمل للممر 
اللى جوا البيت الطرقة يعنى

 

  
والله يمسيه بالخير ابو القذاذيف 
كان صاحب اعجب دهليز ف العالم #خيمة_السلطان 
وقعد يدهلزنا يدهلزنا لحد ما اتدهلز هوه 

الطبنجة كلمة فارسية
 بمعنى اللطمة أو اللكمة أو السلاح والمسدس 
ولما اتنقلت للتركية قرروا يستعملوها للمسدس بس 
يعنى انا لو اتخانقت مع حد 
وقولتله هديك بالطبنجة ف وشك 
وابقى قاصدة اديه بوكس مبقاش غلطانة 
ولا يبصلى باستغراب ويقول دى مجنونة دى ولا ايه ؟



ثورة الكرامة @AMINSAAD12
اوالطلقة الخالية من مقذوف (صوت)

الدمغة او الطمغا قبل ما توصلنا بشكلها الحالى 
كان معناها عند التراكوة 
 البراءة الصادرة من السلطان بالعفو عن مجرم 
او منح صك بتأمين شخص على حياته او ماله او عقار 
 والطمغا برضو بمعنى شعار السلطان أو الأمير
 اما دلوقتى فبقت شعار أبجنى أخلصلك ورقك ..!

 

Cindy @CindyJanabi 
 بالعراق بنقول طمغة

اهالينا لما كانوا يحبوا يوصفوا حد بمدى الفشل
 كانوا بيقولوا .. دى خيبة بالويبة 
الويبة دى مكيال بيوزنوا بيه 
 والظاهر كان مقياس كبير .. واضح !

 

وحسن وهوه بيقوله .. 
مهو برضو انتا غلطان يا كمال 
حد يتجوز بنت التفكجى باشا 
اللى متخانق مع افندينا ومزعله ..! 

اتارى التفكجى دى صنعة احدهم 
ومعناها : صانع البندقية 
أو اللى بيعرف يصحلها ويستخدمها

وسُكر يا بنت التفكجى باشا ... سُكر



Cindy @CindyJanabi
 في العراق بنقول عمره عمر تفكة 

 يعني معمر زي البندقية ولسه شغال ☺️

عمر الشريف ف فيلم المماليك
 كان بيشتغل ف ورشة وبيصنع اسلحة 
وكان شاطر فمعلمه وحماه قاله انتا بقيت اشطر منى

وانا زمان قبل ما اكبر ونظرى يضعف 
كنت زيك .. نشانجى ونشجانى برنجى 
النشان كلمة فارسية 
واتنقلت للأتراك واستعملوها 
 للدلالة ع العلامة التي بتتنصب للتدريب على الرماية 

وبعدين بقت اصغر شوية 

وبتتحط على صدر الفرسان والرماة الشطار 

لتكريمهم باعتبارهم نشانجية

ونشانجى برنجى .. يعنى هوه الأشطر والامهر 
 والأعلى بين اقرانه 
برنجى يعنى رقم واحد والألفة

ايام الأيوبيين والمماليك 
كان فيه ديوان اسمه الحشرية
كانت شغلته يعرف الأموات مين النهاردة 
 ويشوف الورثة 
 ولو كلهم بنات والزوجة فقط 
يروح اللى شغالين ف الحشرية .. يحشروا روحهم 
ف الورث ويحطوا ايدهم عليه 
 ويدوا للزوجة والبنات نصيبهم 
 وياخدوا الباقى لبيت المال .. !

كان المذهب الشافعى هوه اللى شغال وقتها 
مش مذهب ابو حنيفة اللى احنا عليه دلوقت
 ولهذا كانت دى العادة المتبعة اللى راحت لحالها
ومن يومها الكلمة دى بتستعمل
للدلالة على التدخل ف حياة الآخرين 
من غير وجه حق

دا قلع ملط .. ! 
كلمة ملط ف قواميس اللغة معناها الخالى 
او ينزع 
واملط .. يعنى اللى جسمه خالى من الشعر
 او ينزع منه 
اما الكلمة عند المماليك

فـ ملوطة وجمعها ملاليط 
يعنى رداء واسع الكمين وبيتلبس فوق الهدوم 
وكان احيانا م الحرير أوالكتان 
وكان زى منتشر ايام المماليك جدا وله اهمية

قوم لما حد يقلع ملط يبقى قلع اللى بيميزه 
زى ما تقول لشيخ يقلع الجبة والقفطان فيفقد هيبته
 والمصرى بعدين بقى يقولها للتعرى التام 
ومعرفش ليه!

البيض زمااان كان بيروح الحرب
 آه 
حصل

بيقولك زمان البيضة
وجمعها بيض يعنى الخوذة من الحديد 
اللى بيلبسها الجنود للوقاية
 وسموها كدا لأن شكلها شبه البيضة ! 

وبحاول اتخيل الناس بتاعت زمان
 لو ركبت آلة الزمن وجت الأيام دى 
وقالوا قدام حد مثلااااا
 آآآآخ انا نسيت البيضة بتاعتى ف البيت
وهرجع اجيبها ... !
او جاتنى اصابة عشان مكنتش لابس البيضة .. #يالهوى
 دا كان هيشبع تريقة من شباب الأيام دى الغجر 
ومش بعيد كان الولا يقطع شرايينه 
#اه_عارفاكم_انا

قصره .. اهى كانت من لوازم الحرب وخلاص 
بس السؤال بقى 
يا جماعة هيوه كل كلمات اللغة العربية كان داسها قطر 
وملقتوش غير الكلمة دى ؟!!
أصل ناس زمان كانوا ذوق وكلهم مفهومية يعنى !

الألداشات أو الألضاشات 
وبنقولها دلوقتى الأضيش كلمة تركية أصلها يولداش 
وعبارة عن نصين
 يول: ويعني الطريق 
داش: وهي أداة للمشاركة يعنى الشريك

واليولداش هو الرفيق في الطريق
 أو الصاحب اللى يتصاحب 
 وبتستعمل لشركاء الجماعة او الحزب الواحد 
وبقت تستخدم حاليا 
للدلالة ع العصبة او مجموعة الصيع التافهين
مبقتش بالمعنى المحترم يعنى 
وبقى يتقال عن أى حد شايف نفسه 
وعاوز ياخد حاجة غصب او افترى 
 دا جايب الاضيشه معاه 
وما اكثر ألاضيشك يا مصر


ثورة الكرامة @AMINSAAD12 
اعتقد انها مازالت تستخدم لكن بأسم الاديش
 وتطلق على الصحبة الفاسدة

  

فاكرين الراجل بتاع العبارة ف الشكارة 
 كان بيقول احلى كلام شكارة
 وجمعها شكائر كانت زمان بمعنى كيس الفلوس 
#اه_والله

وبعدين بقت تستعمل لأى كيس كبير 
ويتشال فيه رمل او اسمنت او جثة قتيل حتى !
 بس سيبك انتا
 العبارة كلها ف الشكارة اللى فيها الفلوس 
اومال ايه


Heba @HappyGeddan
 او ال ATM

جمباز اللى بنستعملها اصلها فارسى 
جنبازية جمع المفرد "جان باز" 
ودى نصين 
جان : يعنى الروح 
باز : معنى لاعب 
وكلها على بعضها يعنى اللاعب بروحه 
وكانت بتتقال ع اللى بيطلع يمشى ع الحبل من ارتفاع
ويبقى شايل روحه على كفه وبيلعب بيها 
 دا المقصود يعنى

 

بس يا ختشى 
ولقيته راجعلى بعد الفجر بيتطوح 
روحت قالعله الشبشب وقايلاله توك ما شرفـّت .. !!!

والتشريفة دى عبارة عن خلعة 
او بالبلدى "بدلة" ابهة وشياكة 
 كان بيهديها السلطان العثمانى للناس المرضى عنهم 
من حاشيته والضيوف 
او الناس من خارج القصر 
كله كان لازم يلبسوا التشريفة دى
وهما داخلين على السلطان 



 ومن يومها بقت تستخدم لأى حد جاى
 ف ظروف مش عادية

وداخل دخلة مش التقليدية يعنى 
بس احنا كمصريين .. شخرمنا الكلمة خالص الحقيقة 
وبقينا نستعملها بمعنى مدهول وكله تريقة 
 #عادتنا_ولا_هنشتريها
 :)

لما تتكلم عن حد عامل دوشة
 وبيقول كلام كتير نصه ع الأقل مش حقيقة 
فتقول دا بيهنكر الكلمة 
دى تركى أصلى وبتاعت بلادها

هنكار منقولة عن خينكار 
يعنى المطرب الفكاهى اللى هوه المونولجست يعنى
 واستخدمت الكلمة للدلالة على الشخص 
اللى بيفخم ف نفسه وشغله وهوه مش كدا ف الواقع


Tricksy @Tricksy4
ليلي مراد كانت بتغنيها أضحك هنكر كركر كركر

 و أفتكرتها غلطت في الأغنيه 

أول مره أعرف المعنى ..

 

تخت يعنى مقعد 
وتخت الملك وبيتقال كمان ساعات (سرير الملك) 
كان عبارة عن منبر رخام بيقعد عليه السلطان
 ف قاعة العرش وبيبقى ابهة ومطعم بالجواهر
واصلها فارسى 
ومنها جت كلمة تختروان 
وهيا نصين 
 تخت : مقعد او سرير 
روان : السائر المتحرك 
وكانت وسيلة ركوب شهيرة زمان

يكن  لفظة تركية معناها ... ابن الاخت 
 يعنى بدل ما تقول اقدملكم حمادة ابن اختى
 ابقى قولهم أقدملكم حمادة يكن وأخلص !

Rasha @neversaydiee
 و ابلة كامة تركي معناها اختي 
الاتراك استحالة ينادوا اخت او قريبة اكبر منهم 
و لو بسنتين باسمهم لازم فلانة ابلة

امر على جماعة بيحفروا بهمة ونشاط 
- بتعملوا ايه يااخواننا ؟ 
- بنعمل زبيبة لواحد صاحبنا 
- (انا ف سرى) .. الله .. ناس طيبين والله
 جايبين زبيب لواحد صاحبهم وبيعملوله فجأة وكدا .. ! 
  غلبانة انا وانتوا كمان 
 دول بعيد عنكم بيعملوله حفرة عشان يوقعوه فيها 
بالغدر وبالحيلة !

عارفين البتاعة 
اللى وقعوا فيها البتاع ف فيلم 300 .. ؟
 اهى الزبيبة زيها كدا
 بس بالتركى
 :)

والسؤال هنا يطرح نفسه وبشدة
 الزبيبة دى لها علاقة بالجلاشة المتعارف عليها حاليا
 ف الأيام الزرقا اللى احنا فيها 
( وطبعا فاهمينى ) ..... ولا ملهاش علاقة ؟!؟

Cindy @CindyJanabi
هذا بنسميه كشمش ، والاسود بنسميه زبيب

حاجة كمان ف اطار جو التخفى 
والمعانى العجيبة للأشياء .. 
البندق عندهم مكنش بندق عادى
 لاااا .. لا يا بابا ... لاااا

البندق كان بيتقال على كرات صغيرة كدا 
بتتعمل م الطين او الحجر
ومن  الرصاص فيما بعد .. 
ليه ؟ 
قالك كانوا بيصطادوا بيها الحمام 
ف اوقات التدريب والفضا

الاول كانوا بيحطوا البندق دا على طرف السهم 
ويرموا بالقوس 
وبعدين بقوا يستعملوا انابيب وينفخوا فيها 
زى ما كنا بنلعب زمان بقشر البرتقان كدا ! 
والبندق بقاله صناع اسمهم : البندقانيون
 وبقاله ناس مخصوصة تشيله ورا السلطان 
ف الخروجات والحروب اسمهم :البندقدارين

وفيه ناس خدت المهنة اسم من كتر شهرتهم 
زى الامير اللى اشترى المملوك بيبرس من سوق العبيد 
ورباه وكبره 
فبيبرس شال اسمه يعدها 
وبقى بيبرس البندقدارى
 

 
من ضمن المهن اللى كانت منتشرة زمان 
 أرباب الضوء واسمهم الضوية
يعنى الأشخاص المكلفون بأعمال الإضاءة 
والسؤال بقى يا ترى 
كانوا بيقولوا لأه زى عم عباس الضو 
ولا كان لهم شأن آخر ؟؟؟؟؟

الأتراك كان عندهم عادة عجيبة اسمها المكارشة
 يعنى اتنين يتقابلوا بعد غياب يخبطوا كرش بعض 
خبطة بسيطة كدا من باب المحبة! 
والعادة دى انقرضت طبعا بس المصريين محبوهاش
 وبالعكس 
استخدموا الكلمة للدلالة على العكس 
لأنهم لما بينضفوا اى حيوان اندبح 
طبيعى بيطلعوا كل اللى ف كرشه
ويخرجوا اللى جوا بطنه برا 
فبقوا يستعملوا الكلمة لطرد الغير مرغوب فيهم 
 قائلين 
كرشناه واكرش الجدع دا برا .. !

 
يازجى .. يعنى كاتب 
ياز : يعنى يكتب 
جى : يعنى الشخص 
يعنى انا دلوقتى قاعدة بزجيلكم 
 :)

 
كلمة جدع ف قواميس اللغة لها معانى زى 
جدع غريمه: قطع انفه او طرفا من اطرافه 
 جدع الرجل : حبسه 
جدع عياله : ضيق عليهم العيش
جدع الولد او الحيوان : يعنى اسأء غذائه 
و مفيش معنى حلو خالص 
 اومال انا جدع دى جاية منين ؟؟ 

جدع جاية من جدعنجى 
 يعنى بالتركية يعنى المقدام الشجاع
 جدع : شجاع 
وجرىء جى : الشخص 
واحنا بنستعملها بالمعنى التركى مش بالعربى 
والا تبقى شتيمة !!

الأونطة يعنى النصب والاحتيال
والكسب بطريق غير شريف 
والاونطجي هو النصاب 
وخلاص عرفنا ان جى 
هيا الشخص المنوط به الفعل 
أو الـ er ف الانجليزى
 

باشا أصله باش والباش هو الرأس 
وأعلى مكان ف الجسم
و استخدم كلقب رفيع المقام وقبل أى مهنة لتفخيم صاحبها .. باشمهندس .. باشمحضر .. باشكاتب .. باشتمورجى
واحيانا تنطق ف اخر الكلمة زى .. حكيمباشى  
بكباشى .. صوباشى




وضارب بوز يعنى مقدم الفم وارم حبتين من الزعل
 :) 
ومنها فعل بوّز واسم الفاعل مبوز 
وربنا بقى يكفيكم شر تبويزة الحريم 
#انا__بحب_اهدى_النفوس 
آه

واخيراا هسكت وقولولى ... بس 
 وف التركية معناها .. أسُكت 
 لأشقك ف الغالب 
مهو شاعقول واحد زى محمد على كان هُيلحق البس بتاعته 
غير .. بأشقك كأقل واجب يعنى
 :)


وخلاص خلصنا .. تصبحو على ألف خير


----------------------

وقت الغروب @alhamyah
 غريبة كثير من اللهجة المصرية موجودة بكثرة 
بنجد وسط جزيرة العرب
 كرشناه تعني بلهجة نجد طردناه 
حتى إسم القط ينطق "بس" كما الفراعنة