جــامــع الظــاهـــر بـيـبـيــرس

النهاردة حدوتة عن مكان
بس لازم الاول نحكى عن صاحب المكان

كان ياما كان يا سادة يا كرام
ف حتة ف اواسط اسيا تحديدا ف صحراء القبجاق
اتولد كتكوت صغنن برىء
ميعرفش اللى مخبيه الايام

القبيلة اللى اتسمى المكان بأسم سكانها
 قبيلة القبجاق يعنى
 كانت حاجة ابهة واهلها ناس كويسين
قوم الولد اتربى وانبسط ومرح ف الخلاء

ف جية حرامية وقطاع طرق .. راحوا خاطفينه
وبايعينه ف سوق العبيد
 وقعد يا كبدى يتنقل من تاجر لتاجر ومن بلد لبلد
لحد ما وصل الشام

ف مدينة حماة شافه المنصور الايوبى
احد فروع البيت الايوبى
والظاهر الفتى كان بضاعة جيدة جدا
فعرضوه ع الكبارات بتوع المدينة اولا
 قوم ايه؟

المنصور الايوبى عاين البوضاعة وعجبه الفتى
 قال خلاص هشتريه
ست الحاجة نينة ام المنصور كانت حاضرة الحكاية
فقالتله ماشى .. اشتريه
 لكننننننن

" لا يكن بينك وبينه معاملة فإن شرا فى عينيه لائحاً "
 نينة اللى بتقول
 قوم المنصور سمع الكلام ومشترهوش خااااالص
 واحد تانى اللى اشتراه

مين يا شوشو اللى اشترى ابو شر لائح ف عينه دا ؟؟



 أمير الامير علاء الدين ايديكن البندقدار
 وبندقدار دى شغلانة فللى قوى استنوا لما أحكيلكم

البندقدار دا عقبال عندكو كدا
الراجل اللى كان بيقف بكيس البندق
 ورا السلطان ف المعارك
بندق ايه هوه دا وقت تسالى
ولا هما كانوا بيحاربوا ف رمضان دول ولا ايه يا شوشو؟
 لأ البندق دا ذخيرة

البندق كان كور من الطين او الحجارة او الحديد
بيستعملوها زى النبلة ولها سلاح مخصوص
 البندقدار كان بيقف بالكيس ورا السلطان 
يعنى شيكلها كانت شغلانة مهمة وخلِصنا

القصد سى علاء الدين اشترى الفتى المخطوف
وقرر يضمه لمماليكه عشان يستفيد بيه
 واسمك ايه يا بنى ؟
الولد بعد عناد وطلعان روح رد وقال ان اسمه
 بيبرس

بس ولأن زمان كان المملوك من اياهم
بينسب الى استاذه ومالكه ..
اتعرف بيبرس بأسم بيبرس البندقدارى
اللى اتى من الأسر ليكون أعظم رجل ف مصر

وبصوا بقى احنا دلوقتى
 دخلنا ف منطشقة رشدى أباظة شخصيا
 يعنى براحة علينا كدا واللى عاوزه بيبرس يعمله
انا بقول من اولها أهو 

الشاب الحقيقة أظهر كرامة عند سيده
 وكما عادة المماليك لما صغارهم يكبروا انهم يعتقوهم
وياخدوا منصب واقطاعيات الخ 
بيبرس عدى كل هذا بفروسيته

وبعدين اخد حريته كما كان العرف يسمح
وانضم لخدمة سيده وسيد البلد وقتها
 الملك الصالح نجم الدين أيوب
و بيبرس كان من الفرسان اللى عليهم العين

وبيقولوا انه لما الصليبين جم بحملتهم الشهيرة
 انضم للمقاتلين ف احسن المواقع
وحارب مع الجيش ف معركة المنصورة وفارسكور
وبّين كرامة

ساعتها الملك الصالح مات
 ومراته شجر الدر خبت خبر موته
عشان المعنويات والصراعات وكدهون
 وبعدين بعتت لأبنه تورانشاه ييجى يستلم عرش بابا بقى

وتورانشاه بدل ما يلم التعابين ويبقى كويس
ورانا الوش الخشب وناكف ف مرات ابوه
 لحد ما طفشت ع الشام اما الامراء فحطهم ف دماغه
 وقعد يقرفهم

الواد كان شايف ان الامراء واخدين وضعهم
 ماديا ومعنويا وانه كدا مينفعش
والظاهر كان عنده هسس
فكان بيسهر بليل يولع شموع ويضربها بالسيف
 ليه؟

كان بيقول الشموع دى المماليك البحرية
 فلان وفلان وفلان ويقطع بالسيف الشمع
ويقول هعمل فيهم كدا !
طبعا الخبر وصل للامرا وعينك ما تشوف الا النور

واجتمعوا بليل هما كمان وقالوا ايه يا ولاد ؟؟
هنسيب الواد دا يموتنا نفر نفر
 واحنا اللى محاربين وطادرين الصليبين
 ومحافظين ع العرش ..الخ 

من جهتها السوسة شجر الدر مفوتتش الفرصة
وراحت داخلة ف العملية النضيفة دى روخرا
 وقرروا جميعا اغتيال اسم النبى حارسه
 تورانشاه الاهبل
 قوم اييييه ؟

وتورنش كان ف فارسكور وقتها وصاحى الصبح
وهاتولى الفطار عشان الحق أنكد على حد
و لسه بيمد ايده دخل عليه حبيبنا ... بيبرس أفندى

ولسه هنقول صباح الخير يا مولاى وزفت
معندناش وقت
 بيبرس خرج سيفه وراح قاطع لتورانشاه صوابعه !!!
 #يا حرااااااام

توران قام بسرعة وحاول يهرب
 والمقريزى بيحكى انهم طادروه
وعملوا فيه كل البدع ومات
 " جريحا حريقا غريقا" 
قصره
 بيبرس كانله ضربة البداية ف الاغتيال 

والحكاية دى كانت نقطة تحول يا ولاد
 ليه ؟
عشان دى كانت سابقة ف البيت الأيوبى
ان أى مملوك يقتل ابن استاذه
 الملك الصالح يعنى استاذهم كلهم !!

وبيبرس ايده هتاخد على كدا بعدين
 المهم شجر الدر بقت السلطانة زى ما كلنا عارفين
واتجوزت أيبك عشان كان ضعيف وسهل قياده 

وروح يا زمان وتعالى يا زمان
وأقطاى عميد المماليك
واللى كان معتبر نفسه احق بالسلطنة عن أيبك
 لولا شجر الدر ورخامتها 
 الجدع زاد ف الغتاتة

قوم عماد حمدى يتفق مع احمد مظهر
انهم يقتلوا محمود المليجى
وأيوه هيا كدا
 التاريخ بيؤكد ان مقتل اقطاى كان مؤامرة
 شارك فيها قطز بنفسه وبمباركة ايبك

انقتل اقطاى وكانت لحظة تانية فارقة
 بيبرس مش هيستنى لما تطير رقبته هوه روخر
 راح طفشان ع الشام مع شوية امرا تانيين 

وقعد ف الشام يتنقل بين دمشق والكرك
لحد ما خطر التتار اقترب
وحاول ينصح والى دمشق بالقتال
ولما فشل رجع مصر يحذر سلطانها اللى كان وقتها
 قطز

الشهادة لله بيبرس كان شايل ومعبى من قطز
لأنه قتل اقطاى لكن الظروف التاريخية
كانت تحتم تنحية الخلافات
 لأن فيه خطر اكبر اسمه التتار

وانا وابن عمى نتلم شوية لحد ما نخلص ع الغريب
وبعدين نرجع نطبق ف رقبة بعضشينا
 وهذا ما حدث من الطرفين

 قطز رحب ببيبرس واداله اقطاع قليوب كمان

بس ووقفوا كتف بكتف ف الأستعداد للمعركة الحاسمة
 لكن فضل اللى ف القلب ف القلب مكتوم ومتدارى
لحد ما وصلنا لـ .. عين جالوت

بس وانتصرت مصر
واندحر التتر لحدود الشام
وهل بت ما بيبرس يقتل قطز بقى ؟
لأ
 قال لروحه

وانضم الأتنين مع باقى الامراء
 وطادروا فلول التتار ف الشام وانتوا عارفين الحدوتة بقى
 قطز وعد بيبرس بحلب
 جه بيبو يطالب بيها قطوزة قاله استنى

بيبو قاله لأ مش هستنى
قطز معجبوش اللهجة وقعوا ف بعض
والموقف اتكهرب
وبس بيبرس سمع جملة مفيش حلب 

والامرا من جهتهم ولعوا ف النار لحد ما عليت
 وخلاص الفكرة شعشعت ف نافوخ بيبرس
وقرر انه يقتل السلطان وعملها فعلا
 واغتيل قطز 658 هـ

وبما انه اللى قتل السلطان فهو صاحب الغنيمة
وهوه اللى هيبقى السلطان طبعا
والامرا بايعوه فوراااا
وانتقلت الاخبار للقاهرة والمقريزى بيحكى

"كانت القاهرة قد زينت بقدوم الملك المظفر قظز
والناس فى فرح ومسرات بقتل التتر
فلما طلع النهار نادى المنادى ف الناس
ترحموا على الملك المظفر "

الموقف الغريب الدرامى 
 مكنش ف موت السلطان المنتصر وفقط
المشكلة كانت
"وادعوا لسلطانكم الملك القاهر ركن الدي بيبرس
 ثم فى اخر النهار للملك الظاهر
فغم الناس وخافوا من عودة المماليك البحرية
 وسوء مملكتهم وجورهم"
 الناس اتخضت وخافت وقالت يادى النيلة
شكلنا داخلين على أيام سودة !!!

الحقيقة ان بيبرس هيخلف ظنهم ...
صحيح خبر قتله للسلطان المظفر قطز بطلهم المحبوب
 منفعش يختفى ومحدش يعرفه بعدين
لكن قصة صعود بيبرس للعرش كانت خاطفة

فيه رواية مثلا عن الامير بدر الدين بكتوت الاتابكى
اللى قال :
" كنت انا والملك المظفر قطز
والملك الظاهر بيبرس رحمهما الله تعالى

فى حال الصبا كثيرا ما نكون مجتمعين قف ركوبنا
وغير ذلك فأتفق ان رأينا منجما فى بعض الطريق
 بالديار المصرية فقال الملك المظفر قطز :
 ابصر نجمى

فضرب بالرمل وحسب وقال : انت تملك هذه الديار
 وتكسر التتار 
فشرعنا نهزأ به
ثم قال له الملك الظاهر بيبرس : أبصر نجمى

فقال وانت ايضا تملك الديار المصرية وغيرها
تزايد استهزاؤنا به 
ثم قال لى لابد ان تبصر فقلت : ابصر نجمى

فحسب وقال انت تخلص لك امرة مائه فارس
يعطيك هذا واشار الى الملك الظاهر
 فأتفق ان وقع الامر كما قال ولم يخرم منه شئ
وهذا من عجب الاتفاق "

القصد انه يعنى بيبرس كان طموح جدا
ومش قابل يكون تحت امرة حد
وكان معتبر مصر من حقه اكتر من قطز
وكان مؤيد بنبؤة واكلة دماغه 
وقلبه كان ميت لأقصى حد

ووصل بيبرس اللى غير لقبه من "القاهر"
اللى كان مزيكته ع الودن مخيفة كدا وخلاه " الظاهر"
ودخل القاهرة سلطانااااا

ابو البابريس بقى كان عارف مصر زى كف ايده
 وعلى رأى امى عارف النملة مخبية عيالها فين !
 بحكم السنين اللى قعدها ف مصر
 مراهق وشاب ورجل وكدا

اول ما وصل طلع قلعة الجبل وقعد هناك
ابتدى يرتب احوال البلاد
 وعشان يقرب من المصريين لغى ضرايب
 كان عاملها قطز لجمع مال لمحاربة التتار

بيقولوا  ان قطز كان واخد تلت ايراد الزكاة
وتلت قيمة التركات التى مات اصحابها من غير المماليك 
بيبرس لغى كل هذا 
فالمصريين فرحوا بيه قوىىى

بس بقى وقعد يحكم مصر
 لمدة 17 سنة وشهرين واناشر يوم يا ثااااامح
 ثم ورثها لأبنه الأكبر السعيد بركة خان
وكنا حكينا عنه مرة يا ولاد

والحقيقة ان بيبرس سيرته متتقلش ف حكاية
 لكن هيكونله حكايات
لكن قصة النهاردة عن واحد من منشأته الباهرة
 اللى سابها عشان تخلد عصر بحاله

وأقصد بذلك 
جامع الظاهر بيبرس

حتة الأرض اللى اتبنى عليها الجامع
كانت قبل ما تتسمى بميدان الضاهر على اسم الجامع
 كان اسمها ... ميدان قراقوش

فيه ناس بتقول ان مساحة الجامع 3 فدادين
وناس بتقول 3 فدادين ونص
 أى كان يعنى
الجامع دا أكبر تانى واحد بعد مسجد بن طولون

يوه ومجبتيش يعنى سيرة جامع عمرو يا شهروزة ؟؟
 أقولكم لأن جامع عمرو الحالى
 اتغير كذا مرة ف تجديده ومبقاش زى ما كان

اما جامع بن طولون والظاهر فمحدش لعب فيهم ..
اللهم الا ما لحق بالظاهر من خراب

 القصد الجامع طول 108 متر × 105 متر عرض

بدأ الظاهر بيبرس ف بنائه عام 665 هـ
 وانتهى منه بعد سنتين تقريبا
ودا رقم قياسى بالنسبة لحجمه يا عيال !! 

وكعادة المساجد وقتها كان الصحن مكشوف
واستعمل فى عمارته اخشاب ورخام قلعة يافا
التى فتحها بيبرس ف خروجاته للشام 

واجهات الجامع مبنية بالحجر
اما الداخل فمبنى من الآجر
وشكل المسجد غريب اشبه بالقلعة
لأن كان فيه ابراج من الأربع أركان 
واختفت دلوقتى طبعا بفعل الزمن والاهمال 

والجامع اللى واخد شكل القلعة
 أبراج ف الأربع زوايا
 كمان كان له 3 أبواب بارزة
ودى كانت حاجة متفردة وقتها 

وفوق المحراب كان فيه قبة كبيرة .. اندثرت دلوقتى
ومبقاش غير قاعدتها يا دوب
 ودى برضو كانت حاجة متميزة وقتها 

المؤرخين بيقولوا ان القبة كانت تقريبا
 شبه قبة الامام الشافعى
يعنى ممكن نتخيل شكلها نوعا ما

وبيقولوا ان المئذنة كانت فوق مدخل الجامع
وبرضو راحت ف الوبا
أصل المطرح دا يا كبدى بخته مال قدام
وهنقول اهو

الأبواب التلاتة فيها زخارف وأشكال
وطبعا فيه حاجات انطمست واتشوهت
 وفيه حاجات لسه شاهدة على الزمن الجميل 

والجامع من جوه كمان كان مليان زخارف ورخام
 وحاجات ابهة .. مسجد السلطان بذات نفسه
وكان بيصلى فيه الجمع والاعياد وكدا 
متخيلين شكله كان ايه 

قوم لما راح زمن المماليك وجم العثمانلية الاوغاد
 الحال اتدحدر بالجامع
وكانت الحجة ان مساحته كبيرة
ومنقدرش نعمله صيانة الخ 
حرامية ولاد كلب

الاول وقفوا اداء الشعائر فيه ..
وبعدين قالوا نقفله
وبعدين راحوا محولينه لمخزن للمهات الحربية
زى الخيام والسروج الخ 

روح يا زمان وتعالى يا زمان
ودخل الفرنساوية مصر وف اطار خطة مسح للقاهرة
 قرروا يقلبوا جامع الظاهر لقلعة وثكنات للجند
وسموها قلعة Shulkowski

مين المزغود دا يا شهرو ؟

دا بعيد عنكو ضابط بولندى مرتزقة
جه مع الفرنسيس يحارب
 فانقتل ف احدى هبات المصريين ضد المحتل 

فأطلقوا اسم النبى حارسه على القلعة (الجامع)
تخليدا لذكراه والمخسوف مات عنده 29 سنة
 اخص علينا ازاى ييجى عشان يقتلنا 
قوم احنا اللى نموته ... ويحشين صحيح !!!

المؤسف ان الجبرتى وهوه بيجيب سيرة جامع الظاهر
 قال معلومة تحزّن واسمع الآتـى
" جعلوا جامع الظاهر بيبرس خارج الحسينية قلعة
ومنارته برجا ووضعوا على أسواره مدافع
واسكنوا به جماعة من العسكر
وبنوا في داخله 
عدة مساكن تسكنها العسكر المقيمة به 
وكان هذا الجامع معطل الشعائر من مدة طويلة
وباع نظاره منه أنقاضا وعمدا كثيرة"
يعنى الجامع كان منهوب من قبل
 هما ما ييجوا حتى 
:(

القصد غار الفرنساوية
 وصعد محمد على سنكفولة الى سدة الحكم
 الا يارب كنت سدتها عليه وحشرته ومات وقتها
 وخلصّنا

حد من اخر توتير كدا يزعق ويقولى أكن محمد على
 ما جدد الجامع بقى وكدهون
 لأ طبعا دا غالبا قالهم

بقى الشخصية المهببة دى
هتصرف فلوس على حاجة 
مترجعلهاش الطاقين عشرة ؟؟
 وظاهر بيبرس مين اللى يهتم بيه ويخلده ؟!!

محمد على خصص جامع الظاهر للتكارنة يقعدوا فيه
مين التكارنة دول يا شهرو
دول يا ولاد جايين من افريقيا جنوب السوادن بشوية
قوم ايييه ؟
جم لمصر باعداد كبيرة يدرسوا ف الازهر
من قديم الزمان وبقى الواحد منهم يتسمى "تكرورى"
 نسبة للقبيلة دى واندفن منهم شيخ عندنا ف حتة ما

قوم اتسمت كلها على اسمه ... بولاق التكرور
 اللى بقت حاليا بولاق الدكرور
نسبة للشيخ الدكرورى او بالأصح التكرورى

القصد .. قعد التكارنة ف جامع الظاهر بيبرس
 شوية لحد سنكفولة ما مشاهم عشان حد شار عليه
يحول المطرح لمصنع صابون فزحلقهم  !!!
 #اه_والنيعمة

وامعانا ف المهانة بيقولوا ان الشيخ الشرقاوى
(غير اللى مات ايام الفرنساوية) سنة 1812
 نقل شوية اعمدة للازهر صحيح ؟؟ 

ليه يا حاج ؟؟
 قالك هاتوهم عندنا ف رواق الشرقواة عشان عاوزينهم !

وواضح ان الجامع كان ملطشة
لأن فيه اقاويل ان بعض عواميده اتخدت
عشان تتحط ف قصر النيل
 السرايا اللى بناها محمد على لبنته 
ربنا يجحمهم الاتنين

قصره
 الجامع اتمرمط قوى وقولنا خلاص كدا
كفاااااية حرااااااااام
 قوم دخلوا علينا الانجليز 1882 يا ثاااامح 

الانجليز لقوه شبه خرابة
 يا دوب الاربع حيطان والأعمدة مسروقة
ومئذنة الجامع هدمها الفرنساوية
والمكان متهدم راحوا عاملينه مخبز 
كتر خيرهم

لأ طبعا 
ربنا ياخدهم

عشان بعد شوية هيحولوه لمدبح
يدبحوا فيه الماشية الخاصة بالجيش
 وبقى ينعرف بـ "مدبح الانجليز"

وقعدوا يدبحوا فيه الدبايح لحد سنة 1915
وينتهكوا جدرانه وأرضه لحد سنة 1908
 لما جت لجنة حفظ الآثار العربية
وقررت تشمله بعين العطف وتلحقه

يقال انهم رمموا المحراب وما حوله
وخلوا جزء من المسجد مصلى
اما الباقى فحولته مصلحة التنظيم لحديقة عامة 

والحقيقة ان الجامع دا بخته قطران
والآثريين مسمينه المسجد سيىء الحظ
لأنه من زمان وهوه منضطهد كدا
ومش حجمه السبب أكيد يعنى !!

لأن فيه مساجد اخرى برضو واكبر منه
ومع ذلك تم الاهتمام بيها
 اشمعنى دا اللى مزعلهم قوى كدا ؟؟

 الحقيقة فيه تفسيرات عدة

لكن كلها بتصب ف اتجاه .. الموقع
 موقع الجامع ف حتة شعبية صرف ايام الاحتلالات
 كانت زى الأزهر والتحرير 
فرصة لأكبر تجمع من الناس
ودا كان مرفوض

زائد ان عيال المنطقة دى .. رجالة على أبوه يعنى
 ولاد المناطق الشعبية اللى هيرموا نفسهم قصاد الموت 
وبعدين يشوفوا فيه ايه .. ! ا
الجامع رمزهم

زائد ان لما جه اسماعيل وعمل تجديدات
 جامع الظاهر كان خارج نطاق اهتمامه
 حتة بيئة بقى وبعيد عن القاهرة الخديوية
 يدفع فيها فلوس ليه ؟؟؟

واحتمال عشان سيرته الشعبية 
عملت هسس للبعض من الحكام 
ومحبوش يهتموا بأى حاجة من ريحته 
أصل بعيد عنكو .. كان منفسنين وكلهم علل

القصد الجامع الحزين اللى عكس صاحبه تمامااااا
على حد علمى وكما قيل لى من اهل المنطقة
 كانوا بيصلوا فيه لوقت مش بعيد 
لكنه كان ف حال سىء

لحد ما صعبنا على كازاخستان
اللى بيبرس يبقى من مواطنيها بالمنشأ
ومن ابطالها طبعا ويتباهوا بيه وقررت دعم الجامع 

سنة 2007 قدمت كازاخستان منحة
فوق الخمسة مليون دولار لأعادة ترميم الجامع
 وبدا العمل فعلا وتوقف سنة 2010 معرفش ليه؟؟

وقامت الثورة فأتلكك البهوات ووقفوا العمل
 ومحدش عارف اول الحكاية من اخرها
كل اللى قريته اخبار وتوهان وفقط

والجامع باقى ف مطرحه .. يعانى من الاهمال
ولو بيبرس طلعلكم من قبره وشاف المنظر
هيولع فيكم يا غجر !!

الظاهر بيبرس حكم مصر حوالى 17 سنة
عمل فيهم اصلاحات ف كل مكان
وخفف الضرايب عن كاهل الناس
وحارب التتار والصليبين

وبغض النظر عن كيفية وصوله لكرسى العرش
 الا انه كان داهية وصايع حرب وسياسة ف نفس الوقت
وع الأقل قتل مملوك زى حالاته 
وموصلش للحكم بدم المصريين زى بعضهم

والمصريين حبوه وعملوه بطل لسيرة شعبية
 صحيح أغلب وقائعها معاكسة للواقع
لكن من حبهم فيه كرموه بسيرة بقيت لليوم
وهذا لم يتكرر كثيرا ف الوجدان الشعبى  

ف السيرة الظاهرية .. كان البطل المغوار
وادوله حتة من قصة سيدنا يوسف
 على حتة من حكاية قطز على افلام دا
عشان يمجدوه

وخلوا له صديق مصرى (شيحة )
عشان يحميه وقت اللزوم وكان له مهارات
 سموها "ملاعيب شيحة"
 اللى لسه بنستخدمها للنهاردة ف كلامنا يا ولاد

وبالمناسبة بيبرس معناها "الفهد"
رشدى أباظة با جماعة قولنا
#الله

واخيرا خلصنا
ويتبقى الملاحظات

 1) الست الحاجة ام المنصور الايوبى زعلانة
ان بيبرس وهوه بينباع كان فى عينيه شرا لائحا

بقى الواد ينخطف من حضن اهله
ويتشرد ف البلاد من حتة لحتة ومن تاجر لتاجر
 والله اعلم كام حد انتهكه ف السكة
عشان يقف قصادكم تقلبوا فيه !!

وتقلعوه وتشوفوا سنانه وتغطسوه ف ميه
وتعاملوه زى البقرة ف سوق المواشى
 وف الآخر مش عايزة يبقى ف عينيه شرا لائحا !!!!

وهذا يقودنا الى

 2) الطريقة اللى كان بيصنع بيها العسكر
اللى بعد كدا هيبقوا حكام كانت عجيبة جدااا
وكأنك قاصد تمرض شخص نفسيا ثم تمسكه السلطة 
وبعدين لما يطلعوا عنينا نستغرب ... ؟!

3) حوار التنبؤات والقصص
 حوالين مين هيملك الديار ..الخ
دا اتارى ساعة الاوميجا والسادات كانوا من زمان بقى
واحنا مش عارفين يا ولااااد ..؟!!

4) جامع الظاهر مش المطرح الوحيد
 اللى شاف الخراب والاهمال ف العصر العثمانى
هوه زمن كان ابن متسخة من اوله لأخره
و يكفى انه سليم الاول مثلا

لما غار من مصر بعد احتلالها
 اخد معاه صناع الحرف والفنون
وبيقولوا أبطل من مصر فوق الخمسين صنعة وفن
يعنى تخريب مصر كان متعمدا وبحدة !!

5) مش هلوم على الفرنساوية ولا الانجليز
دول محتلين وطبيعى ومنطقى ميقدروش حرمة المكان
 لكن العثمانلية .. ايه ؟
 محمد على راخر .. ايه عذره ؟؟

6) لجنة حفظ الآثار العربية كان على رأسها اجانب
ومع ذلك عملوا اللى معملوش المصريين
 ف الحكومات المتعاقبة لحد النهاردة
 لحد النهاردة يا غجر !!

7) الأخوة ف كازاخستان عداهم العيب وقزح ستان
 فلوس ودفعوا بس محدش قالهم ليه
ان عندنا نظام فاسد وحرامى ووضيع من مبارك لمن بعده
 الخ  ؟؟؟

وشوف الناس بتدور ف تاريخها وابطالها
عشان تخلد منشأتهم ف أراضى برا أراضيهم !!!
بينما احنا نبهدل الذكرى وصاحبها أيما بهدلة
وهوه ف أرضنا وعندنا 
ولا عزاء لأى شىء






وعموما الظاهر اللى اهملوا اعظم بناء له 
اتكرم شعبيا 
لما اطلق اسمه مش بس ع الميدان 
اللى فيه المسجد وانما الحى كله 
بقى متسمى على اسمه !!

8) بيبرس مات ف سوريا واندفن هناك 
بناء على وصيته 
يا ترى لو روحه بتحلق وشاف الحاصل دلوقتى
كان هيعمل ايه ؟؟
اظن ان هذا الجبار كان هيبكى دماً 
:(

واخيرا خلصنا حكاية الظاهر بيبرس
هذا الفتى الذى أتى من المجهول
عشان ف لحظة يكون أعظم رجل ف مصر
 ويستحق الخلود فعلا

واللى مات يا دوب كان لسه معدى الخمسين
واللى قالوا عن همته :

             يوما بمصر ويوما بالحجاز

                    وبالشام يوما ويوما فى قرى حلب 

 وتصبحوا على ألف خير 

-------------------------------

 فيلسوف ع الرصيف ‏@hany_noser  

 بيبرس أنقذ المصريين من الهزيمة بعد مقتل قائد الجيش
"فخر الدين" فوضع خطة الدفاع عن المنصورة،
وهو صاحب خطة إفناءهم تماما في فارسكور

 Nahla Moustafa. ‏@loulounana   

 ايبك هو اقطاى بس بقناع
موسيقى تصويريه وصوت قلم على وش شجره الدر

 Hany Zaky ‏@Hany_Zaky  

ما جابش سيرة الساعة الأوميجا

 قضاء وقدر ‏@sakhr10  

 بيقولو ان الموزة دى شجر الدر 

 ahmedsalah750® ‏@ahmedsalah750 

يهدها تحية كاريوكا#

 سعدية سليم ‏@sa3deaselim   

ولما العز ابن عبد السلام مات وجه الخبر لبيبرس قال :
 اليوم استقر مٌلكي كانوا بيخافوا من العزا بن عبد السلام
زي دلوقتي بالظبط

 سعدية سليم ‏@sa3deaselim   

وحياة أمه.. جامع يتحول لمصنع صابون 

مصر كلها ماكنش فيها أماكن فاضيه
ان شالله ينصهر في جهنم

 سعدية سليم ‏@sa3deaselim   

دول كانوا بينتقموا من بيبرس بقى مش من الجامع

 سعدية سليم ‏@sa3deaselim   

 بخته من بخت البلد اللي مبني فيها

 سعدية سليم ‏@sa3deaselim   

بيئة الله يرحم جده تاجر الدخان

رشدي أباظة هاااااااااااااح

 moataz ‏@mizofunny   

احسن قصص في التاريخ العربي  بتطلع من فترة المماليك
لان كلها مستحيلات اتحققت
زي ان واحد بيتباع في الاسواق يبقي سلطان

 Hany Zaky ‏@Hany_Zaky  

 الكزخ أساتذة فساد والحال من بعضه

 سعدية سليم ‏@sa3deaselim   

 و اندفن في سوريا

 Dina ‏@DinaRabee3  1 

 عابد فهد كان عمله برضو
 بس كان قصير شوية الحقيقة D:

 انا الحرة ‏@I_LuLu_I   

عابد فهد عمل عنه مسلسل رائع
وجسد فيه شخصية بيبرس

 β• àl-зиаzί ‏@Knko0on   

 تكروني وليس تكروري 
 الحين موجودين عندنا بالسعوديه 
والغالبيه منهم بمكة او جدة