حروب محمد على والوهابية والسجادة والتفاحة ... 2

 



العوااااف 
كنا وقفنا ف الجزء الأول
 عند أداء طوسون المنيل ف شبه الجزيرة

مما استدعى وجود الحاج محمد سنكفولة سخصيا

عشان يعدل المايلة ويلحق الحملة

طوسون ربض ف أربع مناطق واستنى المدد من بابا

ف الوقت اللى كان بابا بيجهز فيه العسكر

ويتدربوا ع القتال ف منطقة القبة والعتاد بيجهز

و سنة 1813 يكون الباشا بيركب السفن

هوه و60 شخص من اتباعه 

ومعاه الفين نفر من سلاح المشاة

بينما بتاع ألف نفر تانيين رايحين برا مع 8 الاف جمل

 


ويوصل جدة ... ثم مكة 

ويؤدى بسلامته فريضة الحج

عشان ربنا يباركله ف القتل والدبح

 اللى هيحصل بعد كدا ... 

معروفة

وخلاص حجينا وانبسطنا 

نشوف بقى الهباب اللى هببه طوسون بخيابته

وصغر سنه وقلة معرفته بالناس

اول حاجة عملها الباشا انه بعت للشريف غالب

وعشان يشوف ميته ايه 

ففهم انه تعبان كبير ولا يؤمن جانبه 

راح قابض عليه وباعته مصر عشان نفسحوكى يا شابة 

وعين مكانه اخوه يحيى 

اللى اعلن انه هيكون من "المخلصين"

 


وقرر هوه وطوسون يزحفوا على "تربة"

عشان ياخدوها بما انها كانت العقبة والهزيمة الساحقة 

لمناخير الجيش المصرى وكدهون

وبرضو منجحش محمد على ف اخدها 
اهلها اتستقتلوا
تحت زعامة ست اسمها غالية ... !
#شهروزة_مزبهلة
عشان والمؤسف انه بعد تقريبا قرنين من هذا التاريخ
جدود الناس دى اللى سمحت لست تقودهم ف حرب 
بينما حفيدات الست دى
 بتتعذب دلوقتى عشان تاخد حق قيادة سيارتها .. !!

المهم 
سيبنا من تربة المزعجة دى
والباشا بعت حامية تحتل قنفذة 

وقعدوا فيها شوية وحصلت مناوشات مع اهلها 

وخرجت الحامية قبل ما يفتكوا بيهم ويقتلوهم كلهم ... ! 

الشهادة لله ... 

الناس دافعت كما ينبغى عن أرضها 

مش مسألة عقيدة ودعوة جديدة والهراء دا 

القصة انهم اعتبروا محمد على احتلال 
وبالتالى قاوموه

وحقها يا شهرو ولا مش حقها ؟!

حقها ونص طبعا

ومنظرك بقى وحش يا باشا

بس الراجل دماغه جزمة ومش هيسكت

دا سنكفولة على سن ورمحين ... مش رمح واحد!

وهيبعت محمد على لكتخداه 
ونايبه فى مصر .. لاظوغلى

يطلب مدد

والجبرتى بيحكى ازاى الحالة كانت سيئة

 لدرجة فتح باب التطوع !

 اصلا المصريين كانوا بيهربوا من الجهادية بأى شكل

ويقطعولهم ودن ولا صباع ولا يهربوا خالص من قراهم 

ايه التطوع دا اللى هيروحوا فيه بنفسهم ؟

الجبرتى بيفسرها اهو :

"وفي ليلة الاثنين سادسه حضر مميش أغا

من ناحية الحجاز مرسلا من عند الباشا

باستعجال حسن باشا للحضورالى الحجاز

وكان قبل ذلك بأيام أرسل يطلب سبعة آلاف عسكري

 وسبعة آلاف كيس فشرع كتخدا بك في استكتاب اشخاص

من اخلاط العالم ما بين مغاربة وصعايدة وفلاحي القرى

فكان كل من ضاق به الحال في معاشه

 يذهب ويعرض نفسه  فيكتبونه،

وان كان وجيها جعله الكتخدا أميرا على مائة أو مائتين"

يعنى الناس يا نضرى من ضيق المعايش والفقر

بقوا يرموا روحهم ف التهلكة ويتطوعوا 

عشان مش لاقيين اللقمة

يا سلام

امير محمد على دا 

أمير والله

#يوغتى

قصره ..

بينما الحاج سنكفولة ف انتظار المدد 

فإذا بالقدر يساعده ويزعقله نبى ..

 وسعود بن عبعزيز أمير الوهابيين يموت فجأة ..#ابن_محظوظة_يا_واد

ويتخلص محمد على من منافس قوى 

ويجيله ابن سعود .. عبدالله 

اللى مش هيبقى زى بابا ف شطارته 
ومهارته وحنكته الخ

وانتهازا بقى لفرصة الانتقال السلمى للسلطة دا 

يفتح محمد على الطريق للحج .. لأول مرة من زمن

ويتوافد الناس تباعا 

بما فيهم الست امينة مراته

ولنا .. هنا ... وقفة 

عشان الست امينة زوجة محمد على الاولى

وام اكبر اولاده .. كانت ست مش عادية

سيدة أولى بمعنى الكلمة مش همبكة الزمن الحالى

ومرة هنحكى عنها بتفا تفا تفاصيلها 

عشان هيا مثيرة للأعجاب حقا

بيقولوا ايه بقى .. 

امونة هتخرج ف موكب مهيب من القلعة 

متجهة الى السويس 

معاها ولادها اسماعيل كامل وابراهيم وازاواج بناتها

حلو؟ 

لا مش حلو 

عشان بعد ما ركبت السفينة مع ناسها 

حصلت مشكلة بين الحجيج وحاكم السويس

 اللى فرض عليهم رسوم عالية مستغلا الموقف وبتاع 

قوم ايه ؟

امينة سمعت دوشة ومالكم يا ولاد فيه ايه ؟

الحجاج اشتكولها 

فقررت انها هتلغى سفرها اذا الحجاج جميعا 
كلهم مركبوش وهما راضيين 

مش كدا بس !

دى قررت بنفسها تحط الرسوم المناسبة

وتفرضها ع الحاكم الجشع ... عشان يكونوا مبسوطين !

واتحركت السفينة على هذا الأساس

كانت ست محترمة والله

وايش لمها على الواغش بس ... !

#النصيب

القصد ...

محمد على داس ف الخطة محاولا احتلال مناطق جديدة 

وعبدالله بن سعود يقاوم متحصنا بالاتباع والاموال

وكر وفر وحصارات وشغلانة كبيرة

وقرر سنكفولة العودة للقاهرة عشان يباشر مهام الحكم 

ويرجع طوسون عشان مش راضى عن ادائه 

ويبعتلهم الذى لا يرحم بقى 

مين آشهرو ؟؟؟

هيبعتلهم ... اعوذ بالله من الشيطان الرجيم 

واستغفر الله العظيم 

ربنا يعافينا 

ويسترها علينا 

.... ابراهيم باشا

وهنا هنسمع عن رواية التفاحة والسجادة

اللى البعض بيحكيها ومنعرفش صدقها قوى 

لكن نحكيها برضو 

ميضرش

 


وبيقولوا محمد على جمع قواده وابنه هيمة 

وفرشوا سجادة ع الأرض وحطوا وسطها تفاحة

وقالهم اللى هيجيب التفاحة 
من غير ما يلمس برجله السجادة

هيرأس جيشى !

طبعا كلهم حاولوا ومحدش نجح 

لحد ما جه ابراهيم باشا وراح لافف السجادة وطاويها

لحد ما وصل للتفاحة واخدها 

ورجع السجادة مفرودة تانى 

:)) 

 


ودى الفكرة 

انه اللى عاوز يغزو المنطقة دى ويكسبها

لازم يطويها بالحيلة وواحدة واحدة كدا

 زى ما حصل ف التفاحة !

وسنكفولة ميمشيش الا بشوية انتصارات كدا

وبعد معارك بسل 

واحتلال  تربه ورنيه وبيشه وقنفذة والرس 

يطلب عبدالله بن سعود هدنة 

يتوافق عليها من الطرف الآخر

فيرجع محمد على مصر

ويرجع كمان طوسون ابنه ويدخلوا منتصرين

واحنا دلوقتى سنة 1816 يا ولاد 

وابراهيم باشا ركب البحر على راس حملة

متوجها لشبه الجزيرة وعمره وقتها كان 27 سنة 

وف مقارنة بسيطة مع اخوه كدا

طوسون كان عمره 17 لما راح هناك 

قليل الخبرة والتجربة ومتحصن فقط بدفعة معنوية

من ابوه اللى بيحبه جدا 

اما ابراهيم فمن صغره دراع ابوه القاسية الغاشمة 

ومحمد على لما كان بيثور عليه الشعب المصرى

 ف اماكن متفرقة من البلاد 

كان بيبعتلهم ابراهيم عشان يبططهم ويكسرروحهم 

كان دموى وبشع الحقيقة

يا شين ما خلفتى يا زينب ... !

ولولا كراهية محمد على الخفية له ..

مكنوش طايقين بعض عموما وخصوصا 

كان بعته من البداية 

بس هوه كان عاوز طوسون يبقاله الشرف دا والانتصار

وطسطس مكنش قد المسئولية والدموية 

الملخص .. 

ابراهيم كان قائد بالفطرة ... شاطر وصايع

وببصة وجيزة على اخفاق اخوه 

قرر يتلافى الأخطاء دى 

استعان بضابط فرنسى اسمه فيسيير

يعمله خطط وتكتيكات متقدمة عن العك المعتاد  

وحاجة كمان مهمة

انه اكتشف جزء كبير من الجيش 

هلك بسبب الأوبئة والعطش الخ 

فقرر انه ياخد معاه دكاترة اجانب

عشان يلحقوا المشكلة دى اول باول

أضف الى ذلك شعبيته بين الجنود ..

اللى بقاله وسطهم اكتر من 10 سنين 

وله هيبته ومكانته بينهم بسبب شخصيته القتالية

الملخص .. هيمة كان الرجل المناسب

ف المكان المناسب

وحقق اول ما راح شوية انتصارات كدا على ما قُسم

خلت عبدالله بن سعود يرتبك ويعيد الحسابات 

ف هذه الأثناء وصل خبر وحش من مصر 

خير يا ولاد ؟!

لا مفيش ... طوسون مات يا أبو طوسون !

ومعلشى بقى ثانية واحدة ...

 لنا .. هنااااااااااا .. وقفةةةةةة 

عشان انا طول الوقت كان ينضحك عليا 

وقالولنا طوسون مات بالطاعون
 بعد رجوعه من الحجاز 

#الكدابين_الأشرار

وانا اشهنف بقى واعييييييط

واقول يا عينى الواد مات ف عز شبابه وملحقش يتهنى 

اتاريه يا خويا مات ف معسكر للجيش ف دمنهور 

مات ف تدريب ياشوشو

ياريييييت !

دا الواد يا خويا ابوه بعته دمنهور

مع شوية امراء من اللى عاملين شغب دول

فحب يبعدهم عن القاهرة

وعشان ميخافوش من مصير مدبحة القلعة 

بعت معاهم طوسون ضمانة وأمان 

وهوه معسكر شكلا كدا لكن لا قتال ولا تدريبات ولا نيلة 

طوسون حس بملل 

راح باعت لفرقة ومغنيين ورقصات وحاجات فرفشة كدا

تطرى القعدة بدل الزهق

وظات ليلة بيتشاقى مع احدى الجوارى المحترفات 

والقعدة ف الصحرا بقى والحرمان بعيد عنكو

الظاهر الليلة طوّلت حبتين تلاتة أربعة 

ومات ع الصبحية

#الشقاوة_ويحشة

وبيقولوا ان الحاشية خافت تبلغ الخبر لمحمد على 

واخدوا جثمان الفقيد وحطوهوله على باب الحريم 

الراجل صاحى الصبح يزعق كعادته

ويطلب القهوة والجرايد عشان يقراهم ف الحمام ...

بيبص قدامه لقى الجثة

وبيقولو .... الباشا انقهر جدا جدا 

لكن ابراهيم لما وصله الخبر ف شبه الجزيرة

ولا الهوا

ويمكن كمان فرح

ان السكة للعرش بقت خالية بغياب الأبن الأثير

واحنا دلوقتى سنة 1816

وهيمة هيدخل ف الجد عشان ينهى الحرب الطويلة دى

 اللى مبتدية من 1811 يا اخوننا

و#ميصحش_كدا

وهنسمع ف السطور القادمة الآتى عن ...

حصار الرس ودفاع اهلها المستميت عنها

كر وفر بين الجيش المصرى والوهابيين 

وخسارات فادحة لأبراهيم باشا مقارنة بخصمه 

مفاوضات لكسر الحصار

وهدنة بين الطرفين 

 


ثم أصرار وعناد من ابراهيم

والتقدم الى عنيزة واحتلالها

ومخاوف عبدالله بن سعود اللى هيتراجع الى الشقراء

ويقوم بتحصين الدرعية معقل الوهابية

خوفا من سقوطها ف يد الاعداااااء

وتنفيذ جديد لنصايح الباشا الكبير 

بإن اللى متعرفش تغلبه .. اشتريه

وابراهيم باشا يشترى القبائل بالدهب والكساوى

ويحسن اليهم عشان ميبقوش ضده

لو مش عاوزين ينضموله 

يكفى يبقوا ع الحياد 

وللدهب مفعول السحر..

يتقدم ابراهيم الى الشقراء

وبعد حصار عشر ايام وضرب بالمدافع .. يحتلها 

ويدى اهلها الأمان

سنة 1818 الكلام دا

الجبرتى بيحكى:

"وانه استولى على بلدة تسمى  الشقراء،

 وان عبد الله بن سعود كان بها 

فخرج هاربا الى الدرعية ليلا"

وقربنا اهو ع النصر الأخير

ودلوقتى عبدالله بن سعود هرب ع الدرعية يحصنها 

سقوطها معناه سقوط الدعوة

وابراهيم بيزحف تجاهها

عشان يطوى السجادة

وياخد التفاحة



 

الرافعى بيقول عن ابراهيم انه خرج :

" قاصدا الدرعية عاصمة الوهابيين،

فخط تجاهها يوم  16 ابريل في جيش مؤلف

 من خمسة آلاف وخمسمائة من المشاة

والفرسان مجهزين  باثنى عشر مدفعا "

لكن ... اهل الدرعية مش بس جند بن سعود

دافعوا عن المدينة دفاع رهييييب 

واضطر ابراهيم يحاصرها 

ويتحلى بالحكمة

وشهرين وانا أحايل فيك ...

واثناء الحصار ينفجر مستودع الذخيرة

ويفقد الجيش نص المخزون غير الاصابات البشرية 

والروح المعنوية تنخفض

ابراهيم يلم الليلة ويبعت يطلب المدد 

الجبرتى بيقول :

 "وفي منتصفه
 (رمضان سنة 1233 – يوليو سنة 1818)

وصل نجاب واخبر بانه  ابراهيم باشا

ركب الى جهة من نواحي الدرعية لامر يبتغيه

وترك عرضيه (جيشه) فاغتنم الوهابية غيابه

وكبسوا على العرضي

 على حين غفلة وقتلوا من العساكر عدة وافرة

واحرقوا الجبخانة (الذخيرة) فعند ذلك قوى الاهتمام  

وارتحل جملة من العساكر في دفعات ثلاث برا وبحرا 

  يتلو بعضهم بعضا في شعبان  ورمضان"

ملحوظة عابرة..

الرافعى 

بيقول حصلت حريقة كدا لوحدها 

اما الجبرتى 

فبيقول الوهابيين عملوها 

اما شهروزة 

فبتحب الحوارات دى قوى

وبتطلع منها بالكثير .. ع المدى الطويل 

:)

قصره

وصل المدد من الشقراء وبريدة وعنيزة

 ومكة والمدينة وينبع

عشان تغطى النقص  الحاصل ف الأسلحة والذخيرة

وهيمة صبره نفد

والدرعية هتتاخد هتتاخد

وجاكى ناويها الليلة يعنى ناويها

واللى زحزح ابراهيم مكنش طول الحصار 

والحريقة وبس

القصة ان جاتله رسالة من والده انه هيبعته مدد

من 3 الاف جندى على راسهم خليل باشا 

ابراهيم اتغاظ قوى 

بقى انا اتمرمط كل دا

وييجى خليل دا يحضر الشو الاخرانى

وياخد الانتصار ع الجاهز !

لأ طبعا

وقرر التحرك 

وابتدى الضرب بالمدافع من كل النواحى والاتجاهات 

وبكل شراسة اوتيت لابراهيم 

لدرجة خلت بن سعود لما لقى نفسه مهزوم لا محالة 

طلب التسليم اخيرا

وبعد حصار 6 شهور 

فى سبتمبر 1818

سقطت الدرعية 

عشان تنكتب ف سجل اولى انتصارات ابراهيم باشا 

ومحمد على

ووصل الخبر للباشا ف مصر 

وطبعا مش محتاجة اقولكم 

احتفالات يامة يانا يا هبة 
أسهب فى ذكرها الجبرتى وغيره 
سنكفولة حب يعمل جو ومجال 
عشان ينفخ ف نفسه كمنتصر
ويسمّع اللى لسه مسمعشى... 

اما الاخ عبدالله بن سعود بقى 

كان عاوز يتملص من الاتفاق مع ابراهيم باشا

 اللى كانت بنوده تسليم الدرعية وكل حاجة

مقابل

حقن دماء اهالى الدرعية 

وانه يسافر مصر ثم الأستانة

فكان عارف ان سفره تركيا معناه موته 

حاول يفلفص 

وطبعا بلا جدوى 

وسفروه للقاهرة فعلا

والجبرتى بيحكى ان محمد على اكرم وفادته 

وعامله كويس وقعده معزز مكرم ف قصره بشبرا

لحين ارساله لتركيا

"وصل عبد الله بن مسعود الوهابي

ودخل من باب النصروصحبته عبد الله بكتاش 

قبطان السويس وهو راكب على هجين وبجانبه المذكور

 وأمامه طائفة من الدلاة

فضربوا عند دخوله مدافع كثيرة من القلعة

وبولاق وخلافهما وانقضى أمر الشنك وخلافه

من ساحل النيل وبولاق ورفعوا الزينة 

وركب الباشا إلى قصر شبرا"

وبعدين ..

"وفيه وصل عبد الله الوهابي 
فذهبوا إلى بيت إسماعيل باشا

 بن الباشا فأقام يومه وذهبوا به في صبحها 

عند الباشا بشبرا

 فلما دخل عليه

قام له وقابله بالبشاشة وأجلسه بجانبه وحادثه !!

 وقال له : ما هذه المطاولة ؟!

 فقال  : الحرب سجال !!

 قال : وكيف رأيت إبراهيم باشا ؟! 

قال:ما قصر وبذل همته

ونحن كذلك حتى كان ما كان قدره المولى!

 فقال: أنا إن شاء الله تعالى أترجى فيك 

عند مولانا السلطان!

 فقال: المقدر يكون !"

وطبعننننننن المقدر كان .. انه سافر تركيا 

جرسوه ف موكب هزيمة معتبر

ثم جزوا رأسه

وحطوها جنب كتفه

وعلقوه لأيام عشان الشعب يتفرج وينبسط يا زينب

اما ابراهيم بقى 

فقبل ما يغادر الدرعية كان ناقض عهده لأميرها 

لأنه دخلها ودمرها 

وساب لجنوده الحبل ع الغارب 

والجبرتى بيفضحه قائلا

" وفيه وصل جماعة من عسكر المغاربة والعرب

الذين كانوا ببلاد الحجاز وصحبتهم  أسرى من الوهابية

 نساء وبنات وغلمانًا نزلوا عند الهمايل 

وطفقوا يبيعونهم  على من يشتريهم 

مع أنهم مسلمون أحرار ؟!"

معلش 

على رأى المثل 

" وياغراب بتسرق ليه قال أصل الأذية طبع "

عسكر يا جماعة وكدا مستنيين ايه ؟

بس ودخل ابراهيم باشا الى القاهرة منتصرا

ومحمد على من مسجد الغورى بيتفرج على موكبه

متهللاَ ... متفشخرا .. متأملا .. آملا  فى المزيد

وطبعا المؤرخين بيكتبوا نتايج الحملات والحروب وكدا 

اهم ما ف الحكاية دى 

ان محمد على نجح ف اولى حروبه الخارجية 

وان كانت مدتها طالت شويتين

بقى فرخة بكشك عند السلطان العثمانى

وبقى يبعته ف أى شغب خارج الحدود

ويديله الولاية ع المناطق دى

 



ولهذا وفى توقيت ما سنكفولة بقى لقبه الآتى 

" محمد على والي مصر والسودان والشام

والحجاز والمورة وطاشوز وكريت"

نجاحات محمد على وجيشه وقائد جيشه ابراهيم 

دفعته بعدييين لتحدى الأمبراطورية العثمانية 

ومحاولة الأستقلال عنها 

وكدا ان ينجح فعلا لولا تكالب دول عظمى عليه 

خوفا من امتداد هيمنته 

المد الوهابى انحسر فعلا ف هذه الفترة 

لكن رجع تانى زى الحية 

شانه شان أى فكر متعصب .. لعين 

ف بيئة خصبة لنموه 

وانا خلصت خلاص 

فاضل بقى الملاحظاااااااااات

 (1)
وقبل أى حاجة انتى مع مين يا شهرو ؟؟

يعنى مين عاجبك ف القصة دى
 من الاطراف المتنازعة وشايفة ان معاه الحق ؟!

الصراحة 

ولا واحد ف التلاتة !

العثمانلية خراء 

والوهابيين خراء 

ومحمد على خراء 

ومحدش غير اهل الأرض .. انظلم ف الحكاية دى

 ودفع التمن بمزاجه اوقات وغصب عنه اوقات تانية 

(2)
 الحرب دى مكنتش لحماية المقدسات

وانما لاسترجاع الهيبة والفلوس اللى ورا الهيبة 

اللى خطفها الوهابيون بليل 

كاتكوا هيبة كلكم ف بعض

(3)
 الناس اللطيفة اللى بتقول ان بن عبدالوهاب

 كانت دعوته حلوة وجميلة وزالفل 

بس العيب ع التطبيق والتعصب اللى شابها بعدين 

نعم يا عومررررر ؟!!

ابن الوارمة دا عاش بعد ما سعود الأول احتضن دعوته

 نص قرن تقريبااااا

شافها بتنتشر بالترهيب وحد السيف 

وسكت وكان مبسوط ومنشكح ... فنعم بقى ؟!!

أى دعوة الى الله والحق متنفعش تفرض غصب وبالسلاح 

والا كان الرسول (ص) اولى بذلك 

من كل اللى جم بعده 

واللى غزوا البلاد بحجة الدين وعينهم كانت ع المغانم

عاوز سلطة ومال قول .. بس متتمحكش ف الدين والنبى !

(4)
 قبل ما نلوم ع المتعصبين ومن يتبعهم 

طب يا خويا ما العثمانلية اديلهم بتاع 300 سنة 

 ف الحتة دى سبتوها ليه لحد ما الفكر الوسخ دا انتشر

 واستفحل ؟!!!

غلطة مين دى ؟؟؟

اذا كان الوهابيين غلطانين قيراط

فالدولة العثمانية غلطانة 24 قيراط

بأهمالها لأحوال العباد والبلاد اللى احتلتها

وخلتها مليانة فقر ..خصوصا فقر الفكر

(5)
 وعلى ذكر الباب العالى 

الواطيين دول مدفعوش مليم احمر ف الحملات

اللى بعتها محمد على 

كله من حر مالنا 

وعيالنا

كل دا بفلوسنا احنا وبس

(6)
 محمد على والسلطان محمود التانى

اللى كانوا حلفاء اليوم هيبقوا اعداء الغد 

وهيشارك ف حملة تطريم سنان الباشا 

بعدين

(7)
 شهروزة مقدرة سبب اخفاء كتب التاريخ

 لسبب موت طوسون الحقيقى 

الصراحة 

انا مكسوفاله

(8)
 محمد على كان بيحب طوسون

وبيعده لأن يخلفه بدل الواد ابراهيم السماوى الويحش

وسبحان الله 

يروح الغالى ويقعدله الموكوس
 ويبقى قبضته القوية

ويفضلوا كارهين بعض كدا عمر طوييييل 

والأبن يستنى موت الأب 

والاب يخاف من غدر الابن 

لحد ما مات ابراهيم ف حياة ابوه ... #دنيا

(9)
 دم اهل شبه الجزيرة اريق ف الحملات دى

ودم الجيش المصرى بما فيه من اتراك كثر 
ومغاربة 
وقليل من المصريين 

لكن الأرض رجعت لصحابها 

كما ينبغى

الأصول كدا .. الأرض لصحابها

انما لو هتقولى حقوق تاريخية 
ودى بتاعتنا وطلبنا معرفش ايه 

لأ خلاص بقى 

الحجاز دى كانت تبع مصر بقى ..#اشمعنى

طب ما مصر والحجاز نفسهم كانوا تبع الدولة العثمانية
ف مرحلة ما ... قوم تركيا ينفع تطالب مثلا بمصر ؟!!

#بطلوا_هبل

 #تيران_صنافير_مصرية  #تيران_صنافير_مصريه

(10)
 واخيرا

العيب مش ع النظام السعودى ولا مهاويسه

العيب على نظامنا 
العميل الواطى المتسول واكل ناسه 
اللى باع الأرض

#تيران_صنافير_مصرية  #تيران_صنافير_مصريه

هوه اللى خلانا مطية لكل هولاء الأوغاد .. 

#معلش

وآل بعد دا كله ابنك انتاااا 

يضحك عليا انااا

ويبيعلى البتاعة دهيا 

ويقولى تيران وصنافير سعودية ؟!!

 #تيران_صنافير_مصرية  #تيران_صنافير_مصريه

واللى يسألكم 

قولوله 

قبل الدولة السعودية ما يبقالها كيان

ابن والى من عندنا 

 مش الوالى نفسه حتى

راح طوى السجادة 

واكل التفاحة 

يا حيلتها

وتوتة توتة ... خلصت الحدوتة 

تصبحوا على ألف خير



---------------------------------