أم العـواجـــز : مـسجـــــد الســــيـدة زيـنــــب

من ييجى حوالى 11 سنة كدا
شوية من المعارضة المصرية
هتقف على باب السيدة

عشان تكنس على وزير الداخلية انذاك
 حبيب العادلى
وتقول كفاية كفاية .. احنا وصلنا للنهاية


 
كانت ف يناير الحكاية دى
وقتها الكل اتريقأ 
وقالوا من قلة الحيلة بيعملوا زى الغلابة
الخ 
ومحدش كان عارف
ان 
بعد 6 سنوات من هذا المشهد
ناس كتييييير هتعمل زيهم واكتر
ومش بس حبيب العادلى اللى هيغور
دا هوه
واللى مشغلينه كمان
وبركاتك يا طاهرة ...



الليلة دى حكاية مسجد أم العواجز ..
 الطاهرة .. 
رئيسة الديوان ... 
حفيدة الكريم وابنة الكرام 
واخت الكرام سيدا شباب الجنة
ستنا وتاج راسنا .... السيدة زينب




المصدر الأساسى للحكاية
كتاب :
دراسات فى التطور العمرانى لمدينة القاهرة
فتحى حافظ الحديدى

هذا الباحث كتبه عظيمة حقا
ولا تفوتنكم يا ولاد



وقبل المكان ...
سيرة صاحب المكان
وكلنا نعرفها جيدا
ستنا زينب
حفيدة رسول الله (ص) اللى ولدت سنة 6 هـ
والنبى بنفسه سماها على اسم خالتها
 

ومعنى الأسم
كما قيل ف بعض المعاجم
 الزَّيْنَبُ هو شجرٌ حَسَنُ المنظرِ طيّبُ الرائحةِ 
 وبه سميت المرأَة
ولا أطيب من سيرتها
هذه المرأة القوية الكريمة
اللى فقدت جدها سيدنا النبى (ص) 
وتبعه فقدها لامها الزهراء
ثم عاشت محنة الأب .. سيدنا على
لآخرها ومقتله



 
وبعده كانت السند لأخويها
شيعت سيدنا الحسن اولا
ثم عاشت محنة سيدناالحسين 
... بما فيها من كرب وبلاء
وانتوا عارفين ما حدث بعدها
 


بعد مقتل الامام الحسين
اخدوها هى واخر من تبقى من نسل الحسين 
ابنه المريض
والنساء والجرحى الخ
الى يزيد بن معاوية الخصم .. لينظر ف امرهم
وكان ف دمشق بسلامته لما دخلوا عليه بها
يقال انها سمعته ما يكفى 
وبعترت كرامته
لم يجرؤ على ان يؤذيها
وقيل انه خيرها بالرحيل الى ما تشاء من ارض



 
وهنا بقى تتضارب الأقوال
ناس تقول رحلت للمدينة
ناس تقول رحلت للمدينة ثم مصر
ناس تقول راحت مصر طوالى
وناس تقول اجبرت على القعاد بالشام
وطبعا كل طرف له من الاسانيد والأستشهادات والتأليفات
ولنا
هنا
... وقففففففة



عشان لو انتا من فريق المتأسلفين 
وحبايب الوهابيين
هتوافقهم ف انه ستنا زينب عادت للمدينة
ودفنت هناك
لكن قبرها طمس
لأن النساء زمان كان هناك تعتيم على قبورهن
وربما هتضيف
انه الشيعة هم السبب ف هذه البدعة
تفخيم الأضرحة وساكنيها وكدا 
لأسبابهم الخاصة 
وتتمثل فى محاولتهم الحثيثة لنشر مذهبهم 
بجو اللطميات والصعبنيات دى الخ

 

اما لو كنت من الفريق التانى
اللى بيمجد ف كل ما له صلة بسيدنا على
فقد يعجبك ان ستنا زينب 
خرجت م المدينة لمصر او دمشق
وانها مدفونة بأحداهما



وفيه فريق ثالث بقى آثر السلامة
وقالك انها لا مدفونة هنا ولا هنا ولا هنا 
ولا حدش يعلم اين مكانها
وشكرا




وخلاص اتخانقتوا وكل واحد هبش ف التانى
طيب ....
كل قرد يلزم شجرته
ويأتى حديث الباحثين
واهل مصر
اللى اولى بيهم يستقتلوا عليها




المؤرخين التقال ف تاريخ مصر لم يذكر احدهم حكاية مجى السيدة زينب الى مصر
بن عبد الحكم والمقريزى وتغرى بردى 
والسخاوى والزيات والسيوطى الخ



ودا حدث جلل
لو كان حصل من المحال الا يذكر ف كتبهم
دى ناس ثقة
ومش بتهرج يعنى
دا اولااا



ثانيا 
وكما يذكر المؤلف
ان الحتة اللى فيها ضريح السيدة زينب دى
ايام الامويين كانت حتة من النيل
واسمها بركة قارون
بعد مدة لما النيل غير مجراه قليلا
الحتة دى بقت تفيض بالمية كل سنة ... فكيف يبنى الناس مقابر ف حتة تغمرها المياه كدا ؟؟





ثم انه كان معروف عن المصريين
انهم بيبنوا مقابرهم ف حتة جافة 
وبعيدة عن العمران 
والحتةدى كانت ساكنة
وفيها كنايس كتر
ودى سبب اضافى ...
العرب لما دخلوا مصر فضلوا يبنوا لنفسهم 
اماكن جديدة ويبعدوا عن مناطق الأقباط وكنايسهم
وبالتالى هتندفن ازاى السيدة زينب ف الحتةدى ؟




ثم انه اقدم مصدر اتكلم عن ضريح السيدة زينب 
وقال انه ف مصر 
كان مخطوط محدش شافه 
اتسمع عنه فقط 
وكان صاحبه ... مؤرخ فاطمى
وطبيعى يبقى بيجامل الفاطميين
ويفتكس حاجة زى كدا لتمجيدهم
خصوصا انه
اول مصدر آخر مكتوب وحد شافه بالعين 
عن ضريح ستنا زينب ف مصر كان بعد وفاتها بـ 9 قرون
عبدالوهاب الشعرانى اللى قال
وبالتالى
لازم نشك وجداااا
لانه مش معقول يا اخونا
قرون عديدة الرحالة راحة جاية تزورنا 
وتزور قبور الاوليا ...ومؤرخين تكتب
ومحدش جاب سيرة الحدث الجلل دا ...
 معقول ؟!!

واخيرا بقى
يعنى الحتة دى قبل المسجد 
كانت متسمية قنطرة السباع
على اسم قناطر بناها الظاهر بيبرس
فمعقول تقعد قرون بهذا الاسم
 ومش باسم السيدة؟
 دا ستنا مريم والمسيح عليهما السلام 
لما جم مصر
 عملنا افراح وهوليلة
وتتبعنا خطاهم ف كل مشوارهم 
وسمينا حتى الشجرة باسمهم ...
فايه بقى ؟




 
وختمها بشياكة على مبارك ف الخطط التوفيقية 
قائلا  :
"ثم إني لم أر في كتب التواريخ 
أن السيدة زينب بنت علي رضي الله عنهما 
جاءت إلى مصر في الحياة أو بعد الممات" 

طب م الآخر يعنى ستنا زينب مش
 اللى ف الضريح ولا هيا
لأ مش هيا طبعا 

 
يوه !
اومال مين اللى مدفونة ف الضريح
واتبنالها المسجد
ومولد
وهيصة
وكل هذا ... ؟!!

 

المقريزى اللى هيقول :
"وفي خارج باب النصرفي أوائل المقابر 
قبر السيدة زينب بنت أحمد بن جعفر 
بن محمد بن الحنفية 
وتسميه العامة مشهد السيدة زينب"
ولم يذكر مطلقا انها السيدة زينب
 التى نعلمها ونجلها ونتدله ف حبها .. !
طيب
اول ذكر للقصة دى كان اواخر 
ايام المماليك الجراكسة #ربنا ياخدهم تانى
منواحد اسمه "على الخواص"
بيعمل سلال ومقاطف من الخوص
 وكان بيدعى انه بيشوف رؤى وكدا
والمرحلة دى ما قبل الغزو العثمانى علطول
ثم كملت لما بعده
سى على يا على يا عترة يا فُللى نام وصحى
قال انا شفت رؤيا 
بتقول ان القبر دا بتاع ستنا زينب
وشاور على المكان المذكور
قال الشعراني:
"أخبرني علي الخواص أن السيدة زينب المدفونة بقناطر السباع ابنة الإمام علي رضي الله عنه
وأنها في هذا المكان بلا شك"
طيب




كانت ايام زرقاء 
دولة المماليك تتهاوى 
والعثمانلية على الابواب
الظلم فاض
والتمسك بالأوهام على اخره 
والتعلق بأى قشة
القصة بدأت تكبر و تتصدق ...



وبدأ المداحين والادباتية (كما يذكر المؤلف) 
ينتشروا ف القهاوى والمجالس
و يحكوا ازاى ان ستنا زينب جت لمصر
بعد ما ضاقت عليها بلادها
وازاى يزيد خاف لتؤلب عليه
 انصار سيدنا الحسبن
فخيرها بالرحيل
واختارت مصر
وازاى المصريين استقبلوها على مشارف بلبيس
 بكل مودة
ومعهم والى مصر وقتها
الوالى مسلمة بن مخلد انزلها فى داره 
واحسن ضيافتها
وبيقولوا انها قعدت ف الدار دى عابدة متبتلة 
تستقبل الضعفاء وتنصر المظلومين
 وتقيم مجالس علم
وانها أسرت قلوب المصريين بحبها 
وقعدت 7 وف قول اخر 9 شهور
 ثم توفاها الله
ودفنت ف نفس البيت
واللى بنى من حوله المسجد بعد ذلك
#يقال
هيا دى الأسطورة التى تدوالت 




وانتا مع أى فريق
براحتك
اللى يعنينى دلوقتى
ان هناك قبر ف الحتة دى 
لسيدة صالحة اسمها زينب
كان زيه زى القبور المعتادة بهذا الزمن
والأكيد وبما لا يقطع مجال للشك
ان الست دى دفنت بعد العصر الفاطمى
لانه النيل كان بيعدى م الحتةدى
مش هيدفنوها ف المية !
ثم ...
روح يا زمان وتعالى يا زمان
وسى على الخواص حلم الحلم اياه
وشاور ع القبر دا وقال ستنا زينب مدفونة هناك
سنة   1538 م  الكلام دا



بعد عشر سنين من تداول الرؤيا
جه الوالى الموفد من العثمانلية
على باشا سنة 1548 
وانشأ ضريح حول قبر السيدة زينب ...



سنة 1555  م جه الوالى محمد باشا 
وزود ف عمارة الضريح
جى جديد بقى وعاوز يزايد ع اللى قبله
 وياخد محبة وشعبية وكدا



 
وروح يا زمان وتعالى يا زمان
وهييجى الأخ عبدالرحمن كتخدا 
المعروف بحبه للعمائر والخير الكتير
 كان راجل سخى جدا
بنى زاوية للضريح 1761 م

 

 

ف خلال 30 سنة كانت الزاوية دى 
مش كفاية وتم التخطيط لبناء مسجد كبير
هدوا الزاوية سنة كام يا شهرو ؟؟
1798 م
حضرتك




دى سنة ما الفرنساوية هجموا علينا
وطبعا خطة البنا توقفت 
لحين ما عدت الايام السوداااااء دى
ولهذا

 
فى كتاب وصف مصر
 لم يذكر هذا المسجد لانه كان مش موجود
جابوا بس سيرة الضريح والمكان قائلين 
اسمه بـ (ستى زينب) كما نطقه العامة وقتها 
قصادهم

وروح يا زمان وتعالى يا زمان
والفرنسيس غاروا
وشوية اضطرابات
ثورة
وجه محمد على سنكفولة للحكم 
بكل دهاء وغشم واقتدار
بعد ما خلص من كل الخصوم والمنافسين 
والمعارضين والشعب نفسه
وفي اطار تنظيمه للقاهرة
قسمها لـ 8 اقسام
كل قسم سماه .. تُمن
ضريح ستنا زينب هيبقى فى حدود تُمن درب الجماميز لانه كان الأسم الأشهر
والمكان
قنطرة السباع برضو
سنكفولة امر ببناء المسجد حسب الخطة
لكن

متعرفوش بقى
طمع ف الفلوس
ولا الحروب اكلتها
ولا الجامع بتاعه ف القلعة لهف الميزانية
المهم
جامع السيدة المذكور اتبنى 1820 
ومصمدشى للزمن كتير

سنكفولة مات
وحكم حفيده.. عباس حلمى الاول
الراجل امر بالبدء ف اقامة المسجد فعلا
كتر خيرك آحاج
سنة  1854 م يضع الوالى عباس حلمى
 حجر الاساس لمطرح يكون اوسع عن الاول
وهوب
ينقتل بعدها
العمل يتوقف
يوه ...
ايه يا ولاد الموضوع ؟!

يمسك الوالى سعيد باشا الحكم
الراجل يتمم البناء
الحمدلله
ويفتتح الجامع 1858 م

ولحد دلوقتى المسجد كانله مدخل واحد فقط
على شارع السد
والظاهر انه كان مش بيوفى 
احتياجات المترددين عليه
لانه ...

 
ف عهد توفيق  1881 م
هيأمر مهنس نمساوى اسمه يوليوس فرانز
 بعمل تصميم جديد للمسجد

الباشمهندس فرانز هيصمم المسجد 
بالشكل اللى احنا شايفينه حاليا 

ويعمل فيه توسعات من الجهة البحرية

انتهى البناء 1886 م

سنة 1889هيكون مسجد السيدة زينب
 اول مسجد توصل اليه انابيب الميه النقية
 بدل من الميضأة
اللى هيا الميضة يعنى
#بيقولوا

ويبقى عباس حلمى التانى 
هوه خديو مصر

سنة 1898 يأمر الخديوى 
بردم الخليج المصرى
ومعالم المنطقة تتبدل شوية 
مع التغييرات الجديدة طبعا

 
جامع السيدة هينوله من الحب جانب 
يتوسع ميدان قناطر السباع
المسجد يطل ع الميدان
 بعد ما كان محجوب عن الميدان ببيوت قديمة

وفى حركة شياكة مواكبة للحدث 
يتغير الاسم 
ويبقى 
ميدان السيدة زينب
(ميدان قناطر السباع سابقاً )
أصيل يا أبو سامية

والفضا ويحش ...
 سنة 1940 وزارة الاوقاف هتفكك المسجد 
وتعيد بنائه بنفس عمارته السابقة
 مع توسيعه
ويفتتح 1942 ... !
طيب يا ولاد  
الظاهر فلوس الاوقاف كانت كتير
ومش عارفين تصرفوها ف ايه ... ؟

سنة1969وزارة الاوقاف 
هتضم مسجد مصطفى اغا الزعفرانى
 اللى ف جنوب المسجد له
للتوسعة
ضباط احرار بقى 
ولازم يتميزوا هما كمان بحاجات
والناس كتر خيرهم هينقلوا الميضة ودورات المياه لخارج المسجد ف حتة منفصلة
يعنى شغل كويس
وهوب
يموت عبناصر

وييجى الرئيس المؤمن الحلو الجدع 
ابو عيون جريئة
و لأ مفيش فلوس ونصرف
بس اللى عاوز يدينا ماشى
احنا شحاتين ونفتخر
و #خبوسة
 على رأى @Her_Randomness

وعلى نفس الفكر الاقتصادى البلحاوى
اللى ناقل منهجه من فيلم ... المتسول
والفلوس خلصت بعد ما سرقناها
جم البهرة من الهند 
وتبرعوا للمسجد بضريح من الفضة
وراح سيادته ف 25 يناير 1978
عشان يحضر احتفال خصيصا لهوها المناسبة
الشحاتة من الآخر ... يعنى

وتتوالى بقى ف التسعينات
 التجديدات على المسجد

ومحاولات دائمة لتوسعته

وافساح المنطقة للمولد السنوى المقام دوما
بشهر رجب ويحضره الآف 
من شيوخ الطرق الصوفية والمريدين 
والناس العادية المحبة 
وحتى اللى ملهاش ف المولد غير الفرجة
والفسحة والشرا ... الخ

وكما يقول المؤلف

ان حلم على الخواص من قرون اذا به يتحقق

ويصبح قبر 
تحول لما يشبه قبر الجندى المجهول كدا

...
ف غموضه
وكبر مقامه عند الناس
 

وانا خلاص خلصت تقريبا
ويتبقى الملاحظااااات

1)
اتكعبلت اثناء تجهيز الحكاية 
ف خبر حديث جدا
بيقول
انهم قرروا ضم مسجد السيدة زينب للأثار 
نظرا لقيمته واضرحته  ... 
اللى هوه نعم ؟!!!

 
قالك عشان أصل فيه شيخين صوفيين 
اسمهم العتريس والعيدروس 
اتدفنوا بقرب ضريح السيدة زينب
والاثار قررت تهتم بيهم وتحافظ عليهم وكدا
ايه يا جماعة ؟

المسجد عمره اكتر من 100 سنة تاريخا 
ان لم يكن حجارة ...
 تو ما افتكرتوا انه اثارميتهدش 
ولا ينفع حد يهوب ناحيته
عقلياتهم راكبة سلحفة دول ولا ايه ؟؟
#مسم

2) الاخوة بتوع مفيش ضريح ف مسجد 
ودى بدعة 
ولأ غلط وحرام 
و يع 
وكدا
انتوا مالكوا
اللى داخل يصلى حابب آل البيت 
واى حاجة من ريحتهم 
هوه حر .... ايش يخصكم انتوا ؟!!!

 

وآه  مش هننكر ان فيه ناس بتزودها
مقولتش لأ
 

 

بس الناس دى قبل ما تزودها
اسأل نفسك
اعتمادهم على الغيبيات والخيالات 
وعدم اخذهم اولا بالاسباب 
والواقع قبل كل شىء 
ايه سببه
ومين اللى وصلهم الى هذا الحال 
ومين اللى سايب الجهل والخرافات تنتشر
وتتوغل وترسخ لحد ما تبقى اقوى من الحقيقة ... 
مين اللى له المصلحة والمستفيد 
واللى بيقتات على هولاء ... 
ومين اللى له سلطة التغيير ومبيغيرشى .. ؟!!

وفيما يتعلق بالمولد 
وما يحدث فيه من جرايم او خلاعة الخ
كل العالم فيه احتفاء بقديسين وخلافه
لكن درجات الامان والتحضر 
مرتبط بمن يوفره وبمن بيده يمنع الأذى
ودا مسئولية مين برضو  ... ؟

3) الناس اللى ع الجهة المقابلة بقى
المبالغة والافراط ف تقديس آل البيت 
والتهليل لناس عن ناس ...
 ايه يا اخوننا الأوفر دا 
مش كدا يعنى .... ؟!!!




احنا المصريين بقى
بنحب ال البيت كلهم بلا تفرقة
وبنحب الصحابة برضو بلا تفرقة
لا مع السلفيين ولا الشيعة
احنا الوسط بين دول ... ودول
عشان كدا مصر صوفية الهوى 
حتى لو شاب التوب بعض النواقص 
زى بعض خرافات وكدا ... 





4) السيدة زينب كانلها القاب كتير متعدش
بس ف مصر
نعرفها بـ الطاهرة 
كما لقبها سيدنا الحسن 
رئيسة الديوان .. 
عشان مجلس العلم المزعوم

ام العواجز ...
لأنها كانت نصيرة للضعفاء والعاجزين
ودا من احب القابها لقلبى ...
بحس انه لايق علينا قوى 
 

أم هاشم
لانها عقيلة بنى هاشم
ودا الاسم اللى استوحى منه "صاحب القنديل"
 الأديب يحيى حقى روايته الشهيرة 
اللى تحولت لفيلم




5) الشيعة بيفخموا ف لقب ستنا زينب 
ويقولوا زينب الكبرى
ومش فاهمة ليه
المفروض انها زينب الصغرى
وبنت سيدنا النبى هيا التى تلقب بالكبرى 
#منطق
بس هما لازم يكبروا كل حاجة تبعهم وخلاص !
ولازم يحطولهم مزارات ف كل بلد 
عشان يتحججوا بيها وقت اللزوم وخلاص ..!
#زى ما عملوا ف سوريا

6) المولد بتاع كل سنة ف رجب 
دا بيقام ف ذكرى وفاتها
وليس ميلادها
ازاى ؟؟؟
معرفش 
بس الناس دى لها نظامها ومواعيدها واسبابها
ملناش دعوة يا موهيى

7) وحد يسألنى بما انى شخصية مهمة 
وذات حيثية 
انتى ايه رأيك آشهرو ؟
اللى ف الضريح دا مين ... ؟؟

أرد واقول طبعا مش ستنا زينب
لكن الأكيد انها
او انه .. حد صالح وطيب
 تمنى على الله شيئا
وربنا اكرمه
عشان كل هولاء البشر يعدوا عليه 
يوماتى يزوروه ويقروله الفاتحة... !

وفيه مساجد كدا تدخلها قلبك يرفرف
ومساجد اخرى تدخلها تحس فيها بالغربة
 وانها مقبضة للروح 
 لانها من من فلوس متاخدة غصب او من حرام

ومسجد السيدة زينب من النوع الاول
لو تفهمون ما أعنى

8) القريحة الشعبية لا تأتى من فراغ
لما كنس عتبة السيدة 
عند المصريين يبقى محاولة للتخلص من الظالم
يبقى نحترم العالم دى
بيقولوا احلى كلام والله
😂

 
ونعيد التجربة
اذ ربنا تنجح كما سبق
بس يتبقى السؤال الفلسفى العويص
هل بت ما ينفع ؟
مع الخلقة اللى موجودة حاليا دى 
ولا كل اعتاب مساجدك يا مصر 
ولا كل مقشاتك هتكفى ؟!!

وكما قال مرسى الزناتى ... نقول 
الهى وانتا جاهى 
يقعدله ف صحته وعافيته 
بلحة بن أم بلحة 
قادر يا كريييييم 

 
وكما يقول البسطاء والمكروبين 
لما يكونوا عندها 
او حتى لما يعدوا جنبها 
وتلاتين خدها من على طرف لسانى ... 

Mohamed Refa't @Talatin_

شئ لله يا طاهرة

....




تصبحوا على ألف خير

-------------------------------------

لام ‏@MadamLaam
@hklist @ro7albmama 

معظم حكام مصر كانت خلقهم سمجة كدة
 انت مش شايف بلحة؟



ايّوب ‏@ahmed_awnii  
الصوفيه عندهم مقوله بتقول بأن الأرض بالنسبة لجسد الأولياء كالماء بالنسبة للسمك
وفي اضرحه اتبنت مافيهاش رفات علي اثر رؤيه
 او حلم والموضوع مش متوقف 
علي السيده زينب
 كتير من الاولياء ليهم اكثررمن  ضريح

التيتش ‏@HefnyMustafa 
أولياء الله الصالحين لهم تاريخ كبير مع الحكام 
بيستخدموهم حتى وهما أموات



اللهم لك الحمدوالشكر ‏@redrose1973 
ومسجد السيدة نفيسة من النوع الاول ايضا