القط بسبوس والنصباية

ندخل بقى ع الحدوتة بس احب أحذركممممممم الأول

 انها حدوتة عيالى ...

بتاعت قبل النوم بجد ..

وامبارح جيت احكيها اللى سمعها منى نام ف نص السكة :)

آل انا زمااااااااان ف طفولتى المشردة ف اوائل القرن الخمآشر

 كانت ماما بتاخدنا معرض الكتاب كل سنة ..

 وكان ف المكان اللى فيه الاوبرا دلوقتى ..

الحقيقة اهلى كانوا ناس منظمة وشيك

 وعلمونى اللى عملته مع يوسف بعد كدا ...

 يوم الخروجة يتحط ميزانية محددة 

 يجيب ف حدودها .. وبس

يعنى فيه مبلغ محدد ..

وكل واحد حر يجيب بيه 10 كتب خمسة

واحد يجيب لعبة .. ميجبش حاجة خالص .. هوه حر ...

المهم فى سنة من ذوات السنين

 روحنا كالعادة ودخلنا الجناح اللبنانى 

وعينى كانت بتزوغ على كل حاجة هناك ..

 كتبهم كانت مغرية وملونة وشيك .. وكدهون

المهم اخترنا الكتب انا واخويا ..

ولفت انتباهى قصة اسمها فيه اسم اخويا الكبير ..

 والأسم التانى لقطة ..

 وانا بموووت ف القطط .. فأشتريتها

كان اسمها ... هانى وبسبوس ...

وكان يوم أزرق ف بنفسجى ف برتقانى ف موف 

عشان بعد ما روحت البيت وقريتها ...

 عملتلى أزمة نفسية فظيعة 

وخلتنى عاوزة أرجعها واخد تمنها تانى :)

واذ ان دا كان بيلح عليا فرحت قولت لبابا

وعارفين المشهد بتاع فيلم محاكمة على بابا ..

 بتاع يحيى الفخرانى لما ابنه رفض يدرس شعر لشاعر منافق

اهو دا اتكرر بالمللى ..

 لما قولت لبابا نرجعها تانى ..

 فراح مزعقلى ..

 وانا غضبت بقى وقررت اعامل القصة بكل اهانة

 ورفضت احطها ف مكتبتى

كان عندى مكتبة متعلقة فوق سريرى ..

 ورفضت احطها فيها ..

 وروح يا زمان وتعالى يا زمان

ولقيتها صدفة ف وسط كتب قديمة

 لما كبرت وقعدت اقراها ليوسف ابنى 

والجميل ان يوسف كان رأيه من رأيى ...

 فأنشكحت ايما انشكاح بقى :))

احكيهالكم بقى عشان تعرفوا المعاناة الأنسانية

 والظروف المأساوية اللى نشأت فيها

وترعرت بعد ما قريت الكصة دى ...... 

ف احدى البلاد اللى مطلعلهاش سمس

ومنعرفش اسمها واحسن مش مهم ومش لازم بالمرة..

كان فيه ولد اسمه هانى وعنده قط اسمه بسبوس 

والأتنين بقى كانوا جوز مقاطيع ...

لا شغلة ولا مشغلة .. 

وعايشين ف الغابة .. 

وهانى مكنش عنده بيت يتخمد فيه

ومعلش لو لهجتى كان فيها تحامل

 بعضضضضضض الشىء على أبطال القصة ..

 بس أصلى بستحضر الليلة الهباب

 اللى اشتريت فيها القصة وبابا بعتر كرامتى وكدهون ..

قصره ..

سى بسبوس قعد يقدح زناد فكره ..

 يعملوا ايه يعملوا ايه ؟ ..

 وبعدين قال لهانى .. اشتريلى جزمة

ومش عايزة أى استغراب ولا أندهاش ولا ازبهلال

 .. خدوا على كدا لبقية الحدوتة ... 

هه

هانى زى الشاطر قعد يدور ف جيوبه

ولم الشلنات والبرايز

وخد بسابيسو من ديله وراح اشتراله جزمة حمرا

بعد ما خرجوا م المحل ..

بسبوس لقى غجر بيبعوا اكياس قماش شكلها حلو ..

فقال لهانى اشتريلى كيس قماش منهم يا هانى ...

ابو الهُن زى الشطورة كدا دور ف جيوبه تانى

ولم اللى فاضل

واشترى لبسبوس الكيس ..

والقط بقى ماشى فرحان بنفسه قوى

وبعدين قال لهانى ..

 انا هسيبك دلوقتى واروح ادور على اكل ناكله ...

وبعد ف وسط الغابة

وطبعا هانى مسألش ..

ومتاخدوش ف بالكو قولنا .. 

هنفضل ف الموال الأسود الحزين دا لحد آخر القصة

ومن ورا الشجر لمح أرانيب بتلعب ..

 فحط الكيس وجواه جزر ..

واحد م الأرانيب جرى عليه ودخل هوه الكيس

راح بسبوس منقض عليه ...

 وحبسه جوه الكيس علطول

وبالنويابة عن نفسى

وبالآصالة عن كل أرانيب الدنيا أطالب بقطع ديل القط دا ..

عقابا له على الخضة السودة اللى حصلتلى  

خد بسبوس الأرنب المسكين

 وراح على قصر الملك ...

 ولنا ... هنا ... وقفة

الملوك بتوع الحواديت ..

جرت العادة يعنى انهم يبقوا صنفين ملهمش تالت ..

اما ملوك طيبة وجدعة وذكية ...

أوملوك شرية وقاسية ومنحرفة .. 

يعنى كدا او كدا

الملك بتاع الحدوتة دى بقى ...

هوه الطرف التالت ...

والصنف اللى مجبتوش ولادة الحقيقة ..

 ف أى مكان ولا بلد ولا قصة ولا نيلة ...

أحم احم ...

حد يقولى استهدى بالله يا فطمطم ...

وهدى نفسك واخزى الشيطان يا بت ...

متخليش ضغطك يعلى من اول الحدوتة كدا ... !!

لأ محدش يقول ... انا خلاص قولتلى 

يروح بسبوس عند الملك ويخبط ع الباب ..

 عاوز ايه يا بنى .. عاوز ادخل للملك ..

راحوا مدخلينه ... عادى كدا

دخل بسلامته على الملك ..

اللى سأله انتا مين وعاوز ايه ..

بسبوس قال انا بشتغل عند الامير هانى

 وهوه باعتلك الهدية دى وطلعله الارنوب من الكيس

وللمرة التااااااااااانية ... أشجب وأدين وبشدة

 ... المعاملة اللا أرنوبية اللى اتعامل بيها الارنب الغلبان دا ...

الملك انشكح قووووى ..

 وفرح جدا .. 

وشكر بسبوس وبعت الشكر للأمير هانى .. على هديته

ومعرفش ليه الانشكاح والفرحة

 وقدامه السفرة اشكال والوان .. 

ولا هيا الطفاسة والأكل ببلاش وخلاص !!!

المهممممممم

.. خرج بسبوس من عند الملك وهوه مصمم يعيد الكرة 

بس النوبة دى كانت مع حمامتين غلابة

كانوا واقفين بيتشمسوا ...

وبنفس طريقة الصيد بتاعت الأرنب .. تم صيدهم

وهوب يا جدع الحمامتين جوا الكيس

 وجرررررى على قصر الملك اللى اخدهم من بسبوس

وهوه مبسوط عشان بيحب ياكل الحمام قوى

ولا تعليق بقى ..

عشان هقول كلام مش كويس ع الملك ومعدته

والشعب اللى مستحمله والمملكة ... 

واللى فيها

ايه دا ...

 دنا لسه ف نصها وبتحدفوا بيض وتماتم كدا ...

 اومال لو كملت للآخر بقى ؟؟!!!

احنا وقفنا فييييين ... ؟؟

آه ... عند الحمام اللى راح ف شربة مية ف معدة الملك الطفِس ...

فى هذه الأثناء دى كلها ...

 سى هانى مكنش عارف ايه اللى بيحصل

وقاعد هايم ف الغابة 

وعلى شط بحيرة مادد رجله ف مياه البتيخ 

لقى بسبوس جاى عليه وبيقوله اعمل نفسك ميت

.. اعمل نفسك ميت

 #علاء_ولى_الدين_ستايل

هانى ربنا فتح عليه وحّب يستفسر

 فيه ايه يا بسبوس ...

القط قاله مش وقته ارمى نفسك ف البحيرة وبعدين افهمك ..

طيب مفيش داعى أقول ..

ان هانى زى العبيط راح سامع الكلام

ورامى نفسه ف المية وعمل طشششششششششش

ف جية موكب الملك من بعديييييد بالعربية الملكية بتاعته

 وطبعا بسبوس الصايع كان شايفها ...

وأول ما قربت راح هاجم ع العربية وقعد يصرخ ..

 الامير هانى بيغرق ..

الحقونى ..

ساعدنى يا مولاى ...

الحركات دى

الملك ال (طيب) راح موقف الموكب 

وأمر حراسه ينقذوا الامير هانى قائلا :

 دا الراجل

موّجب معايا بالأرانب والحمام

 ولازم نعملوا معاه الأنسانية

الحراس سمعوا الاوامر ونزلوا جابوا زفت الطين م البحيرة

 طلعوه ونشفوه ..

 ولبسّوه لبس جديد

وخلوا منظره منظر امير بجد

ولنا هنا وقفة ... تانية 

عشان لما سالت بابا ف الحكاية دى زماااان

 وانا بشتكيله م القصة ومتضررة ..

 فأجاب اجابة وافية الحقيقة لما قالى .. 

غورى من وشى

والسؤال هو ...

يعنى الملك ومضحوك عليه واهبل ... ماشى ...

كمان الحراس بتوعه والحاشية حمير ؟!!!

يعنى قلعوه الهدوم المبلولة ولبسوه لبس جديد ..

القديم دا مش باين انه مش لبس امير

 ولا انا اللى بدقق على حاجات فارغة .. ؟!!!

ثم ان اللى هيحصل بعد كدا .. 

يفرس اكتر ... ليييييييييييييييييييه ؟؟؟

بعد ما هانى سلم ع الملك وشكره على انقاذه

وقعدوا يتكلموا ويرغوا ..

بسبوس سبقهم على جسر كان فيه عمال بيصلحوا فيه 

وطلب منهم طلب ...

طلب منهم لما الملك يعدى عليهم ...

 يقولوا انهم شغالين عند الامير هانى

وطبعاااااا ... لما عدى الملك ..

 سألهم

... متفهموش ليه 

فجاوبوا انهم عمال الامير هانى ..

 برضو متفهموش ليه .. 

واللهم لا اعتراض على حكمك

و تانى مش هسأل الملك دا عبيط ولا شكله كدا ...

بس هسأل ... الحاشية كمان مضروبين على دماغهم ؟؟

يعنى ازاى يسيبوا الملك يندب على بوزه كدا

 وينضحك عليه ...

 فين بتوع امن المملكة طوارئ .. 

وبتوع المخابرات الملكية .. وكدهون

وفين الله يرحمه سراج منير

 اللى كان عامل دور بدران ف أمير الانتقام

وكنت اشوفه ف الكادر اتخض اتخرع على انور وجدى

واقعد ادعى ف سرى ..

 يا رب ما يكشفه ..

 يارب ما حسن الهلالى ينفضح ..

يا رب  تنصر حسنوله ومينكشفش .. واقعد ادعى طول الفيلم !!

الملك دا معندوش سراج منير ليه ... ؟!!!

ولا هما مش بيتشطروا غير ع الغلابة

 والرجالة القمرات اللى زى الُفل اللى زى أنور وجدى ... عااااااااااااااا

 اللى غايظنى ان النصباية 

وسعت عن كدا ..

والملك خد هانى معاه قصره عشان يغديه

ويستريح من حدوتة الغرق دى ... فبسبوس كمل الخطة .. عمل ايه ؟

راح على قصر المارد الجبار بتاع الغابة ..

خدولى بالكوا .. هه ..

هقولها تانى ... المااااااااارد الجباااااااااااااار

والمارد دا كل الغابة

والمملكة بتخاف منه ومن شره ومن سحره ...

فأبو البسابيس راحله لحد عنده بقلب بارد

وراح مخبط ع الباب ... ترررررررن .. فتحله

المارد زى منتو شايفين صورته كدا ..

الظاهر عليه قضايا

 وحالته النفسية مش اللى هيا

 ولا حالق دقنه ولا كاوى قميضه .. ومتضايق م الدنيا شوية ..

المهم اول ما شاف بسبوس ..

 زاغ ف عينيه ياكله ..

 فقاله نعم ؟

.. القط رد انه جاى يسأله ف موضوع مهم وهيمشى ..

 المارد قاله ادخل .. بسبوس دخل !

واول ما دخل لقى السفرة عليها اشكال والوان من الاكل

.. فعيونه لمعت ..

وبص للمارد وقاله ..

 انا سمعت انك ساحر عظيم وبتعرف تتحول .. صحيح ؟

المارد ضحك .. وقاله ايوه تحب اتحولك أسد ؟

 .. القط اتحداه وقاله متقدرش !!!

 .. راح قالب اسد علطوووول

بسبوس قعد يلاعبه .. تعرف تتحول لفيل

.. تتحول نمر ..

تتحول لكلب .. تتحول طيب لفار ؟؟؟

طبعاااااا كان بودى اقولكم ان المارد

 .. مبلعش الطعم واتحول لفار ...

ولكنننننننننن العبط له ناسه فعلا

واتحول لفار ... وهم يا جمل ...

 بلعه بسبوس ف فيمتو ثانية 

وراح فورا على قصر الملك

 وقال لهانى اعزم الملك وبنته على العشا عندنا ف قصرك

 .. طبعا هانى بصله بذهول ..

 قصر مين يا حاج دحنا على باب الله وبننام تحت الكوبرى .. ؟!!؟

 قاله اعزمهم بس يا جدع وملكش دعوة ..

هانى عزمهم ..

وزى ما تقولوا الملك وبنته ما صدقوا ...

 وقبلوا العزومة وراحوا مع هانى 

وقدامهم بسبوس على فيييييييين .. ؟!!!

شطااااااااااااار ... 

على قصر المارد الغلبان المتاكل ف بطن بسبوس المفترررررى

ودخل الملك والأميرة القصر ...

وهما منبهرين ..

واتعشوا العشوة التمام ...

والطقطوقة الشهيرة بتقول ...

بعد العشا ... بعد العشا ... يحلى الهزار والفرفشة ...

وهانى يقرب م الاميرة 

ولأ مش هيتحرش بيها خليكم مؤدبين .. !

دا بس هيقولها اتجوزينى ..

وهتلاحظوا ف خلفية المشهد ...

الحاج الملك مبسوط بالمنظر جدا .. وبدون تعليق بقى عشان الرقابة

والأميرة توافق ..

 وتقام الأفراح والليالى الملاح ..

 وهانى وبسبوس يدخلوا قصر الملك ..

ويحكم هانى من بعده

وتوتة توتة تخلص الزفت الحدوتة ...

وتلتماية خمس وسبعين ملحوظة بقى ....

ومليانين شتايم واعتراضااااات للسنة الجاية ...

1- هوه المملكة دى مفيهاش حد عنده دماغ وبتفكر ..

. و يعنى ازاى حتة عيل اهبل 

والقط بتاعه يأكلوهم البالوظة كدا ويضحكوا عليهم ؟؟؟

2- ايه نظامه القط دا ...

 اللى حصل منه دا مش نصب علنى وضحك ع الدقون

ولا انا مكنتش طفلة بريئة ... 

وكان بيتهيألى وبظلمه يعنى وبقول عليه وحش ؟؟؟

3- ثم اللى كتب القصة دى ازاى يشجع العيال ع الإستسهال

 والكدب بالطريقة السمجة دى .. ؟!!!

4- المارد الغلبان دا كنت متعاطشفة معاه صحيح

 بس هوه يستاهل عشان طفاسته..

ما السفرة كانت مليانة اكل كتير واتناشر كيلو بسبوسة 

خلاص جت على حتة القطة اللى قد كدهوه !

5- الملك راخر ماله كدا ... همه على بطنه

وبيقبل هدايا من أى حد معدى ف الشارع كدا ..

 لا خايف على حياته ولا حاجة .. 

ايه المناظر والملوك العرر دى .. ؟!!

6- وفين جهاز امنه بقى ..

 وازاى ميدوروش وبيحفروا ورا هانى دا

ويعرفوا ايه نظامه وتبع مين .. 

ويعلقوه ف القسم لحد ما يبانله صاحب ؟!

7- بسبوس دا ايه وضعه ف الحياة ...

 يعنى ممشى هانى كدا .. شمال شمال يمين يمين ..

وممكن نتخيل حال المملكة لما مسكوها بعد موت الملك ... 

يالهوووى

8- نفسى يكون للقصة جزء تانى من نسج خيالى ..

 لما الاميرة تكتشف بعد الجواز ان هانى جاى م الجمالية

وكيف تعايشت معه وهيا بنت القصور :)

9- و اشالله الملك و هانى بسبوس 

و كل نفر من ابطال القصة .. يجيله جلطة ...

 كأقل واجب ع القرف اللى انا شوفته بسببهم

 كل ما كنت بتكعبل ف القصة دى ..... او افتكرها

10- احنا كنا عيال دماغها كويسة والله ...

غيرش بس الزمن كان ديكتاتور ..

 انما عيالنا الحمدلله طلعوا احرار وزمنهم حر 

 والقصة دى علمتنى دا ببساطة

لما جيت احكيها ليوسف ..

مقولتش ملاحظاتى ... قريتها بالنص من الكتاب ... 

وف النهاية سألته ايه رأيك ؟؟

سكت ثانية وبصلى وقالى : على فكرة 

القط دا مش كويس يا ماما

وحسيت بالفخر لأسباب كتيييير قوى ...

اولهم انه جبر بخاطرى وحسسنى انى كنت بفهم والله :))

و خدته بالحضن وكنت هعيط :)

صعبت عليا نفسويتى قوى قوى ... 

واخيرا قبل ما نطوى صفحة الحدوتة دى

 اود أن أقول ..

بالرغم من كل تحفظاتى على بسبوس المجرم دا

الا ان دا ميمنعنيش اقوم دلوقتى اعكنن على ميزو القط بتاعى ...

 اللى لا شفت منه لا هدوم جديدة

ولا قصور ولا ملوك ولا امرا ولا أى منظر 

O.o

وخلاويص كدا بكرة نحكى ف التاريخ شوية ...