الكوسة ع الباب

ممكن أحكى حاجة صغننة 

سمعتها ف الراديو من مدة ..

 ممكن ؟

اه من يابلد 

فيكي حاجه مجنناني ...

نزرع القمح في سنين

ويطلع القرع في ثوانى ... !!

ويحكى ان .. 

القاهرة العامرة لما اتبنت

واتحاوطت بالاسوار

كان الفلاحين وبياعين الخضاربييجولها من كل حتة

عشان يسترزقوا ويبيعوا محاصليهم





قوم يقفوا عند الأبواب 

وينتظروا الأذن بالدخول

ودفع المعلوم ورسوم المرور 

والتفتيش والأفلام دى ...

ويبدو ان المصرى من يومه وش طوابير وتكدير ..!





المهم ان المزارعين وبياعين الخضار

 كانوا بيقفوا طوابير بالساعات عشان يدخلوا 

إلا بتـــوع الكوســــة ...

عشان كانت بتفسد بسرعة من الشمس وتدبل

... فييجى حارس البوابة من على مطرحه

ويروح مزعق ....

 كووووووووسة

فتتلم عربيات الكوسة ورا بعضها

وتتخطى الطابور كله ....

 ويدخلوا اول نـــاس

:)




ومن هنا جت حكاية إرتباط خضار الكوسة ...

 بالمحسوبية 

وتخطى القواعد

يقال ان الكوسة خضار امريكانى

وكولومبس نقلها لكل العالم 

بس احنا ف مصر تحديدا الكوسة بتاعتنا دى 

أصلها طاليانى

من نابولى

والكوساية أسم الله على مقامكو ممكن تنعرف

من زهرتها لو كانت مزمزايل او أفندى ...

 سبحان الله .. 






وكلمة كوسة لما نحاول نعرف أصلها عربيا

... هنلاقيها ف المعجم بمعانى كتييير

بس فيه منها اللى يطابق الوصف جدا 

يعنى مثلا 

لما نقول فلان كَوَّسَ فلان ..

كَوَّسَهُ : يعنى كَبَّه على  رأْسه

 أو قلَبَهُ وجعل أَعلاه أسفله 





ولما نقول انها لأرض كَوْساء:

يعنى الأرض دى كثيرة النبت ملتفّة متراكمة

وشوف يا مؤمن 

.. شوف يا مؤمن ... لما تبقى الكوسة أصلاااااا

من فصيلة " القرعيات"






لأ و اللى بيزرعوها كل شوية يمخولونا بقى ...

 مرة تبقى فاتحة ..

ومرة تغمق ّ .. 

ومرة تصّفر .. 

وييجى الأتراك يعلمونا نقورها

ونحشيها ويقولوها ضُلمة

واحنا نغير الأسم ونخليه محشى ... على كيفنا يعنى ...

ويا روحى عليها بالبشاميل ...

حطوها قصادى ... واعدلونى ع القبلة 

بس كله كووووووووم ... 

وانها تنعمل مخلل دا كوم تانى

 خاااااااالص الحقيقة .... يع يع يع يعنى





وطبعا مش هقعد اشرح ف فوايدها

كلنا كرهنا الكوسة

 واحنا عيال بسبب كلام اهالينا عنها ...

والزن دا بتاع الفيتامينات والحاجات والمحتاجات ...






بس المعلومة دى بقى 

... جديييييييدة

آل بيقولك يا سيدى ان الكوسة مفيدة للأعصاب 

وبتحسن الحالة الذهنية

عشان كدا بيدوها لكبارالسن 

والمرضى فى المصحات والمصابين بأمراض نفسية .. !!!

طب ييجوا مصر 

ويعملوا الدراسة دى تانى

واحنا هننسفلهم النظرية من أساسها ...

طب دا الكوسة عندنا جننت الناس أصلاااا

وحكاية ان الكوسة بتقوى المناعة

 فأنا أشهدلها ...

احنا جتتنا نحسّت فعلا من كُتر الكوسنة ف البلد 






وبمناسبة الكوسة وعمايلها انتوا

 انتوا مش غُرب يعنى ومش هنكسف منكو ... طول

طول عمرى كنت بكرهها أكلاً

وعمايل لحد ما ربنا خد بيدى ...





كنت بكرهها اكلا عشان مكنتش بحب الاكل عموما 

والخضار خصوصا

 ... بس كرهت أطبخها عشان سبب تانى خااااالص

 ولذا أحب بقى بهذه الموناسبة السعيدة

 ان اوجه الشكر

للصين العزيزة عشان المقوار اللى عملته

وبيتباع ف المترو واللى بيجيب العرسان دا 

إذ ان المقوار التقليدى التى درج على اس


تعماله بنات جيلى كان بيطلع ترابنتينى

وبيبوظلى نص الكوسات واشبع تريقة من ماما 

والسؤال الشكسبيرى الخالد

 اللى شغل ذهنى ايام وليالى..

هل ترى هناك علاقة بين الكوسة وكلمة كويس ؟