وقالك يا نشو إيه اللى نشوْشِكْ .. ؟!
قال
ملقتش اللى يلمنى ... !
حكاية النهاردة
من زمن المماليك الشيك الرومانتيك
وكالعادة فيها شخوص و احداث
وكأنها صورة بالكربون من ايام دلوقتى
ومن كام سنة يا دوب ...
والحدوتة تبدأ ف آخر عشر سنين
من حكم الناصر محمد بن قلاوون
السلطان المملوكى الخطير
اللى شالوه من ع العرش مرتين ورجع والتالتة كانت تابتة !!
الأسرة القلاوونية حكمت مصر حوالى قرن من الزمان
وولاية الناصر التالتة
كانت 32 سنة مليانة احداث كتير عظيمة وكويسة
بس الحلو ميكملش
:(
ف آخر 10 سنوات من حكمه
ولزقته ف الكرسى خلته يخطى الحكم ع الأشخاص
ويختار اختيارات خاطئة
بس بطل قصتنا النهاردة كان اختيار فااااادح
ف سنة 732 هـ قرر السلطان الناصر يجوز ابنه
وعاوز يشوفله حد يتولى شئونه لما ينفصل ف بيت لوحده
ويكون تحت امره
بيدور ف وسط خدمه
لقى ابن هلال الدولة اللى ماسكله دواوين الدولة
عنده مستخدم شاطر اسمه "النشو"
ندهه وقاله .. هاتلى الواد دا .. اشوفه واعاينه واختبره
ابن هلال الدولة نده النشو
وقاله باضتلك ف القفص يا نشنش
السلطان عاوزك .. ودى فرصة عمرك ...
وابقى افتكرلى الجميلة دى يا وغد .. !
راح النشو لمولاه السلطان
اللى لاقاه شاطر وحِركْ
وبوصف المقريزى طويل القامة مليح الوجه حلو التقاطيع
ايه دا مش عاوزه ف شغل بقى
#احم_احم
والنشو يبدى ملاحظات خاصة بالدولة والحكم والامرا
واسرارهم وفلوسهم
فالسلطان يقرر يستبقيه عنده
ويعينه ف نظارة الخاص عشان يلمله الفلوس .. !
النشو ما يصدق وجاتله الفرصة
يتبت فيها ويلبد زى القرادة
واول يوم ف الشغل يروح مجمع معلومات
عن موظف كبير ف الدولة وقتها
اسمه التاج اسحاق
التاج اسحاق دا كان عامل زى صفوت الشريف كدا
مشغل اتنين من اولاده ف وظائف عليا
وبيسمسر ويتربح من وظيفته
ويقلب عيشه زى باقى المماليك عادى
السلطان الناصر عمل حاجة غريبة قوى
بس مش غريبة ع المماليك عموما وغدرهم ببعض يعنى
بعت للتاج اسحاق وابنه الاكبر شرف الدين موسى
وف حضرة الامراء وطبار الدولة
خلع على شرف الدين موسى نظارة الجيش ...
يعنى رقاه وخلاه ف منصب ابهة خالص اهو والواد راح تانى يوم مكتبه يستلم
فإذا بقى بسيادة السلطان اللى كان لسه امبارح بيقول
يا مشير ويا رجال القوات المسلحة انتوا هايلين
وحلوين وممتارزين وبحبكوا ..
يروح قالب عليه
ويبعت النشو رجاله يحاصر بيت الأب والابنين
شرف الدين وعلم الدين .. ويصادروا فلوسهم
ويجيبوهم من رقبتهم يبعتوهم ع السجن ... !
علم الدين لما اتقبض عليه لقوا ف بيته 400 سروال لمراته!
فالنشو انتهز الفرصة
و قعد يهلل للسلطان ويقوله سيبهولى
وانا أعصرهولك يخر بكل ثروته !
راخر علم الدين دا جايب 400 سروال للمدام له ان شاء الله .. !!
قصره .. دخل التلاتة السجن
وانتوا عارفين سجون المماليك بقى ... خمس نجوم
التاج اسحاق استغاث بالرفيق القديم ابن هلال الدولة
وقاله ارحمنى
فابن هلال الدولة صعب عليه الراجل كان من الكبرات وابن عز ..
فتوسطله عند السلطان ..
قوم يطلع النشو ابن السوّ .. ويقوله ابضننننن
دا حرامى ..
دا مرتشى ..
دا بيسرقك ..
لو رحمته يا مولانا باقى الامرا هيقلدوه وهيبتك هتروح .. الخ الخ
لحد ما الناصر دماغه مالت ورفض العفو عنه
ابن هلال الدولة وشه اسوّد
وفهم ان نفوذ النشو استفحل
لدرجة مراجعته قصاد السلطان وكلامه هوه اللى مشى
فلمّ الدور وانسحب
وقال أسكت احسن
النشو لقى الناصر بيسمع كلامه وبيستحسن افعاله وبيصدقه
فإبتدى يوطد نفوذه
وقرر يستعين بأهله وعشيرته فجاب اخوه المخلص
واخوه رزق
و جوز اخته
وعينهم ف مناصب مختلة بموافقة الناصر
وابتدى يبنى امبراطورية عز النشو الدخيلة بقى على مهل مهله
ويتخلص من المنافسين
واحدة واحدة ...
بعت اخوه مخلص للصعيد
يعمل جرد على كل الكاشفين اللى هناك
ورجعله بأرقام .. فحطها النشو قصاد السلطان
واخد منه امر بالقبض عليهم كلهم .. !!
ومصادرة اموالهم ...
وتعيين غيرهم
وطبعا الجداد كانوا نقاوة مينييييين ... ؟
#اسم_الله_عليكم .. اختيارات النشو
ورجاله ومخلصيه واتباعه
بعد شوية يجمع النشو تجار القاهرة ومصر عتيقة
ويطرح عليهم أصناف من الخشب والقماش ب3 أضعاف تمنها
واياك حد يرفض يشتريها ... !!
وبدأ يكبر ف ثروته ولكن بحذر
عشان الناصر ميهرشش المسأله
وف نفس الوقت
والسلطان الناصر كان بين وقت والتانى بيطلع مراسيم كويسة
للتخفيف ع الناس والامراء
ويعفى عنهم عشان اللى مدفعش مينخربش بيته يعنى ... !!
قوم ف مرة صدر مرسوم سلطانى بذلك ..
فالنشو اتنكد نكد السنين ورفض تنفيذه
وقعد يوغر ف صدر الناصر لحد ما لغى الأمر
والأمرا كانوا هيتجننوا ..!
وطلع شوية منهم للسلطان يشتكوا النشو فالناصر هزاهم
وقالهم الراجل عاوز مصلحتى ومصلحة الوطن
ولو كان جاى منكم مكنتش سمعت أى شكوى وغوروا من وشى!
وبس نزلوا م القلعة قفاهم يقمر عيش
ومكبوسين الكبسة ام رز بلحمة دى بموت فيها ...
نكمل .. ؟
وبعد ما يعين النشو اخواته واتباعه
يبتدى يدور ع القوة
فيجيب بلطجى اسمه الشمس ابن الازرق
#شايفين_الاسم_لوحده_يخض_ازاى
ويبعته للتجار واصحاب المحلات
عشان يلمّ منها الفردة أوالأتاوة أو الحلوان أو كوباية الشاى
اختاروا الأسم اللى يعجبكم يعنى بإسم السلطان
وكله كان بيصب ف جيب النشو طبعااا
التجار معرفتش تشتكى لمين غير ابن هلال الدولة
اللى كان هااااره اسود لما النشو عرف ان الشعب بيلجأله
فقرر يتدور عليه ويطيره م المشهد ..
وعارفين الحكمة اللى بيكتبوها ف النتيجة
بتاعت اتق شر من أحسنت اليه ؟
اهو دا اللى حصل فعلاااا
النشو قعد يبخ ف ودن السلطان بأن ابن هلال مهمل
وبيتراخى ف لم الفلوس وبيحابى امراء بعينهم
وميهموش مصلحتك ولا مصلحة البلد
وجابله كام واقعة
وطبعا كانوا من نوعية الورق ورقنا
والدفاتر دفاترنا
قوم السلطان صدقه وأمر بحبس ابن هلال الدولة ف بيته
وامره كمان إستخلاص الفلوس منه
فطبعا النشو انتهز الفرصة
وجرجره ع السجن وانتوا عارفين الباقى
دخل ابن هلال الدولة السجن
ودى كانت آخر مرة حد سمع عنه حاجة
والراجل يا عينى مكنش عارف انه ربى ف بيته تعبان
اول ما لقى فرصة لدغه فموته
بعد القصة دى بقى السلطان الناصر بيعتمد اكتر على النشو
اللى كان بيورد اول بأول اموال طائلة لخزينة الدولة
بس طبعا بعد ما يستقطع لنفسه جزء !
وامعانا ف احكام قبضته ع البلد
عين واحد رزيل قوى وكما وصفه جمال الغيطانى .. غتيتا
واسمه "ايداكين الادكش "
وانا راضية ذمتكو ف الأسامى دى !
الأخ ايداكين بقى كان سخافة الدنيا والآخرة
ولا عنده دين ولا خشا ولا حيا
كان بيهاجم البيوت ولا امر نيابة ولا نيلة
عينى عينك كدا واللى عاجبه
ويصادر الفلوس
وف الليل يتنكر
ولما يسمع ناس سهرانة مفرفشة شوية
ويسمع صوت غنا وريحة خمرا وبتاع يهاجم البيت
وياخد كل ما فيه ومحدش يستجرى ينطق
واللى زاد وغطى انه مكنش ماسك ولاية القاهرة بس
دول مسكوه مصر كمان
ف سابقة لم تحدث من قبل ان والى واحد
يمسك مصر عتيقة والقاهرة .. !!
ف مرة راح قرية اسمها النخيلة ف وجه بحرى وقت المغربية كدا
وعلى حظ اهلها النيلة
بقى بيمسك أى حد ماشى ف الشارع يقلّبه وياخد اللى معاه ...
ومش بس كدا دا كان بيقلعه اللى لابسه ويمشيه بلبوص
يعنى تثبيت وتقليع
وكله ميرى وبأمر النظام
والظاهر انه #حمادة_صابر دا ف كل عصورك يا مصر
الناس ضجت من ايداكين الادكش دا
وحكاية القلع وصلت للسلطان اللى يا دووووب أمر بنفيه للشام
بعد ما عزله من منصبه
#لأ_أمير_يا_ناصر_وحّونين
النشو كان فظيع فعلا
كان عامل شبكة من الجواسيس
عشان يعرف بيها ثروات الأعيان والأمرا
والشبكة دى كانت من الستات الكبار ف السن .. تخيلوا ؟!
اكمن الستات دى غير مشكوك ف أمرهن
ويقدروا يدخلوا البيوتات كلها بلا أى ريبة وقلق
وعندهم من الخبرة والحنكة
انهم يقدروا اشياء غيرهم ميبعرفهاش!
وكل ما يلاقى حد بيقرب م السلطان
يبسك عليه فورا ويزيحه من سكته وبأشنع الطرق
من ضمن هولاء واحد اسمه قرموط
:)
#آه_والله
أمين الدين قرموط كان مستوفى (وظيفته يعنى)
والراجل كان بيجتمع بالناصر
يشاوره ف بعض الأمور الخاصة بالمالية وبتاع
مجراش حاجة يعنى .. ؟!!
لأ .. عند النشو تبقى جريمة كبرى تستحق الدبح
النشو قعد يوز السلطان ويألبه على قرموط متهما المذكور
انه حرامى ومرتشى ومتربح من وظيفته الخ الخ
وطبعا حضرله خية معتبرة
وحبكله قضية متخرش المية
فالناصر امر بالقبض عليه ومصادرة امواله كالعااااادة ..
قوم النشو يعمل اييييه .. ؟!!
انتوا عارفينه .. ابن أصول قوى
يبعت قرموط ع السجن
فيعصروه ويعذبوه
الراجل يصمد ويبين شجاعة
فيجلدوه
انه يقول أى
محصلش وكان جدع
الراجل اصله كان نضيف وايده طاهرة ..
فمهما كانوا بيعذبوه عشان يعترف على حاجات مخبيها ..
مكنش بيعترف .. هيألف لهم يعنى من دماغه .. ؟!!!
قصره .. النشو طبعا معجبوش الكلام
راح جايب ابن (قرموط) وراح معذبه قصاد الأب
اللى يا كبدى قلبه اتعصر
وكان هيتجنن مش عارف يعمل ايه
:(
اللى قدر يعمله خطف سكينه من قصاد جلادينه
وراح دابح بيها زوره
محاولا الأنتحار من هول الموقف
بس الكارثة انهم أنقذوه .. وعالجوه وكملوا تعذيب
:((
الامرا حاولوا ينبهوا السلطان اكتر من مرة
لبشاعات النشو وتوحشه
لكن الناصر كان بيصم اذانه عنهم
وبيصدق النشو وبس
وكأنه داخل ف دور عِندْ !
النشو بمرور الوقت ابتدى يطلع قرارت عجيبة
منها مثلا انه أمر كل الصاغة وبتوع العملة
ان كل الدهب يروح دار الضرب الاول ويخرج من هناك .. !
وعمل كدا كمان ف الفول
الزم سماسرة الغلال يوردوا للسلطان فقط
وبالتالى تحكم ف الدهب والفول
وبقى يبيع بالرقم اللى على مزاجه يعنى م الآخر احتكار
وطبعا كان بياخد له م الحب أكبر جانب
وعمل كدا ف كذا سلعة لدرجة انه احتكر فرو السناجب ..!!
وايه فرو السناجب دا كمان ان شاء الله .. !!!
وإدور ع المواشى والغنم وبقى ينصص ف تمنها
وأى حد يفتح بوقه ويعترض
عنده السجن
والتشريد
والمصادرة
و ديوان المظالم والنائب العام
كدا يعنى
ودخل ع الخشب والحديد
#آه_والنيعمة
احتكر الحديد لصالحه
وبعد كل السلع دى
انا شايفة ان احمد عز يقوله يا أونكل والله
وتبقى قليلة عليه !
كل دا والشعب بيئن من الظلم
وكما وصف المقريزى حال الناس وقتها
و بكل فصاحة
" لم يبق فى مصر إلا باك او صائح أو نائح"
#أمورسى
ويتعرض النشو لمحاولة اغتيال ف نهار رمضان
من فارس مجهول يعترض طريقه
ويغلط ف ضربة السيف
وبدل ما يطير رقبته
يصيبه ف كتفه بس
#يا_خوسااارة
واللى زاد وغطى انه ف احد الأيام
تقع حمامة ف ميدان الرميلة اللى قصاد القلعة
شايلة ف رجلها رسالة
بتفضح احدى مصايب النشو
#أحياة_ربنا_حصل
حمامة وكان ناقص الميكروفيلم !!
السلطان الناصر يقرى الرسالة يتغّم ويتنكد
وينده النشو اللى ينهنه ويسح دمعتين
ويقول مظلوم يا نصنص
ومتسمعش كلام العزال الغايرانين الويحشين
اللى عاوزين يوقعوا بيننا دول
فالناصر كالعاااادة يصدقه ويكبر دماغه
ويمرض الامير يلبغا رفيق الكفاح والصبا
ويروح الناصر يزوره
فيلبغا ينصحه بالتخلص من النشو
عشان النشو توحش يا ناصر
ومماليكك والناس هيقتلوك انتقاما منك
لأنك تركت هذا الشخص يعبث بمصالحهم وحياتهم
وراح معيطّ .. فالناصر كمان بكى من التأثر !!
وبس يا عم المخلصين بيقولوك
شيل الغجر والواغش اللى حواليك دول
لأنهم طبقة منتفعين
كان ايه لازمته الدكتوارة ف العند دى
وتهزأ نفسك بقى ؟!
هوه الشهادة لله
الراجل اتنازل عن الدكتوراة دى ف لحظة صدق
وقال الشعب حبيبى وشريانى
ومرخمش زى ناس :))
ودا حصل ف لحظة فارقة
لما المدهول النشو قرر يعمل ابتكار جديد
ف عالم النظم السياسية والاقتصادية موردش على حد
لا من قبل ولا بعد الصراحة
آل ايه يا خويا
النشو كان عاوز يلم الف الف دينارف خبطة واحدة
قوم يفكر انه يلم التقاوى من أرض كل أقلبم
ويحطها ف صوامع السلطان وخزاينه
وبعدين يبيعوها تااااانى للفلاحين
وطبعا هيبيعوها شوف انتا بقى بكام
ولعدد قد ايه
يعنى معنديش تعليق الصراحة
علقوا انتوا بقى !!
الناصر بعد ما عرف بالحكاية دى فهم انه خلاص كدا
النشو دا جاب آخره والشعب فعلا هيطلع عليه يقتله
لو متخلصش منه
بس يعملها ازاى الحكاية دى ؟
زائد ان الامرا بعتوله رسالة بالمفتشر كدا قالوله فيها
" والله ان النشو لضرك أكثر مما نفعك "
وكأنها رسالة تحذير انه لمّ التعابين يا ابو السلاطين
عشان كدا جابت خّل خلاص
بس بقى والناصر بعت لنائبه ف الشام ياخد رأيه
اعمل ايه
النايب مكدبش خبر ورسمله خطة
وف احدى الأيام سنة 740 هـ
تتنفذ اولى خطواتها ...
النشو كالعادة كان ف دار الخزانة
بيلم الفلوس الاكوام اكوام ف الفسحة
عدى عليه الامير بشتاك وقاله مولانا عاوزك
خرج النشو من مطرحه ...
راحوا قافشينه
وحطوه ف الحديد
وف وسط العسكر خدوه ع القلعة
وطلعوه لمواجهة الناصر اللى شافه فصعب عليه المنظر
وقال طب نعمله محاكمة عادلة عشان الفلوس ترجع !
الأمرا كانت هتطق من جنابها
يخربيت امك يا ناصر
الولا النشو دا ماسك عليك ذلة
ولاعاملك عمل ولاّ ايه .. يخيبك سلطان .. !!!
كل دا حصل ف القلعة
بس برا أسوارها كان الموضوع انعرف و انتشر
والشعب عرف بالقبض ع النشو
فتفتكروا عمل ايه لما سمع الخبر .. ؟!!!
كما قال المقريزى : أصبح الناس كالجراد المنتشر !
الله .. !!!
دا موضوع الجراد دا منتشر ف ايام الحكام العجاف
من زمان بقى
المهم ... الناس تسمع الخبر
فتفرح فرحة السنييييين
اخيرا ابن القديمة دا اتقبض عليه
وهنشوف فيه يوم
وراحوا ع القلعة وف ميدان الرميلة اتجمعوا
وزى ما تجمع العشاق ف حب مصر ف الميادين
اتلموا الناس ف ميدان الرميلة
ودخل عليهم الليل ممشيوش
وقادوا الشموع
كل دا
وسى ناصر ف القلعة فوق قلبه مش جايبه يعاقب النشو
وبيقول هاتولى ادلة وبراهيم والحركات دى
الامرا اتغاظت منه جدااااا
وطلعوا على بيت النشو
بس ف معديتهم على ميدان الرميلة
وقفوا وسط الناس .. وشجعوهم
وقالولهم متمشوش
خليكم معتصمين لحد ما نمشي النشو بمساعدتكم
#يالهيوى
الموقف كالآتى :
الجماهير الغفيرة ولعت النار والشموع
وقعدت ف الميدان
الناصر ف القلعة بيهرى ويفرك
النشو ف المحبس
والأمرا بيجيبوا أدلة الأتهام
ع الفور اتقسموا لمجموعات
واتقبض على جوز اخت النشو
واتقبض على اخوه "رزق"
اما الاخ التانى "المخلص"
فأنتحر ف بيته خوفا من المصير المظلم !
واتباعه كفنوه وحطوه ف تابوت واحدة ست
وخرجوا بيه وسط الناس
ودفنوه ف مقابر الأقباط
عشان محدش ينبش قبره ويمثل بجثته
#نظام_القذافى_وكده
وراح جزء كبير على بيت النشو
و حصروا ما فى هذا المنزل
اللى لاقوه يعنى
وكانت قايمة المصادرات كالآتى ...
وطولوا بالكوا عليا
خد عندك
15 ألف دينار دهب خالص
2500 حبة لؤلؤ
70 جوهرة نادرة
60 عقد لؤلؤ
كام حباية زمرد
170 خاتم دهب وفضة
كف مريم وصليب مرصعين بالجواهر
تحف واوانى وبلور وصينى لا تعد ولا تحصى
200 برميل ملوحة
80 برميل جبنة
400 جرة خمر
80 بدلة مستعملة و40 جديدة
عبايات وقفاطين جديدة
صنادق قماش جديد لم يستعمل بالعبيط
وحاجات كتيييير قوى
واضح انها كانت مصادارات من تجار وغيرهم
وبدل ما تروح خزانة الدولة
راحت خزانة النشو !
والمؤلم بقى
انهم لقوا 3 مماليك مخصيين
واحد عايش واتنين مقتولين
موجودين جنب الحاجة كانوا بيحرسوها ... !!
طبعا مفيش داعى أقول ان دا اللى لاقوه
وكان النشو حاطه ف بيته
ومش مدى خوانة
لكن اللى كان مخبيه بقى ممكن نتصور حجمه ايه !!!
وطبعا بعد ما رجع الأمرا للسلطان الناصر بالحاجات دى
مبقاش له عين يرفعها ف وش الامرا
ولا ف وش الناس
ولا يقول أى حاجة
وأصدر الامر بأعدام النشو
والغيطانى بيقول ..
ان النشو انقطع ذكره من الدنيا
ف الاربعاء 2 ربيع الآخر 740 هـ
بعد ما عذب الشعب المصرى 8 سنوات
كانوا مرار طافح طافح يعنى
وبيسأل السؤال اللى وقت ما كتب المقالة دى
ف المصرى اليوم سنة 2009
انه بعد انقضاء 7 قرون على اختفاء النشو
هل يمكن القول انه اختفى من حياتنا؟
والحقيقة ان اجابة السؤال دا وقتها كان
لأ
الاخ أحمد عز كان استنساخ حى للنشو بأغلب مفرداته
وتجبره وعظم نفوذه واستفحاله ...
ولكن
جت الثورة ... والناس ثارت ع الظلم
ومكنش كفاية النشو عز يمشى
دا الناس أصرت ان اللى جابه
واللى جاب اللى جابه يمشوا كلهم !!
يعنى عز غار ...
وجمال اللى بلانا بيه غار ...
ومبارك اللى خلف جمال غار ... !!!
وقولنا خلاص مصر هتتنفس
ومفيش خوف تانى
ومفيش ظلم تانى
ومفيش عز تانى
ومفيش مفيش مفيش
طلعنا ناس طيبين قوى يا خااااال
جالنا اللى أبشع من النشو
ومن عز
جالنا العوّ الكبير ...
عمهم كلهم بقى
زفت الطين ... غراب البين .. خيرت الشاطر
ودا مينفعش معاه قعدة ف الميدان والأفلام دى
الجو دا ميكلش مع المناظر دى
الثورة المؤدبة الذوق متفعشى
و #ميستاهلوشى
ومش عارفة انا البلد الغلبانة مصر دى مالها كدا حظها زفت
وبختها مايل
ودايما يقع ف قرعتها الأوغــــاد والسفلة والرعاع
وهما اللى يتحكموا فيها
وآه يــــــــــــــــانى
خلاص كدا توتة توتة
الحدوتة من كتاب : ملامح القاهرة فى ألف سنة لعمنا جمال الغيطانى
وتصبحوا على ألف خير
