حـــكــايــات مصـــريــة ... 14

 

 نبتدى الحكايات القصيرة
والمتعلقة بمصر واهلها .. كالعادة

 
الحكاية رقم (1)

عن راجل عظيم من رجالة البلد دى
جه من بلده السويس
بعد ما درس ف واحد من الكتاتيب هناك
وابوه لقاه ذكى ونبيه فنزل بيه القاهرة
 دخل ف القاهرة ابتدائى وثانوى 
وبعد كدا دخل المعلمين العليا القسم العلمى
وخرج منها بعد 4 سنين بعد ما بقى
أحمد أفندى زكى على سن ورمح



أحمد هيشتغل بمؤهله ف المدرسة السعيدية
وبعد شهر واحد على حظه بقى الحكومة هتلغى التعيينات
والجدع يبقى ف الشارع !
قالك أصل الحرب العالمية دخلت بقى وبنتقشف

الجدع خرج من السعيدية 
ولف من مدرسة هنا لمدرسة هناك
ومن مدرس هنا لمدرس هناك لحد ما اخير استقر
ف مدرسة ف باب اللوق اسمها وادى النيل

المدرسة دى يا عيال
صاحبها كان يبقى أبو يوسف وهبى الممثل
آه مهو كان ابن باشا وغنى
واحمد اشتغل فيها مدرس
ثم  بعد شوية لتميزه وشخصيته وتفرده 
بقى هوه الناظر ف سن صغيرة جدا ف الوقت دا
القصد قعد احمد شوية ف الوظيفة 
 وبعدين قرر يجرى ورا طموحه
 فاستقال ولم كل فلوسه وشد الرحال على بلاد اروبا
تحديدا جامعة نوتنجهام عشان يتخصص ف الكيميا
وفعلا لقاله مطرح ودرس شوية
 وبعدين منها راح على جامعة ليفربول
واخد منها الدكتوراه ف الكيمياء العضوية 1934
واتجوز انجليزية واشتغل باحث هناك
وشوية وراح النمسا ورجع واخد دكتوراه تانية ..!
فاضيين بقى احنا وعندنا فرااخ 

المرة دى كانت الدكتوراه ف العلوم البحتة
وكان بعد الشهادة دى تانى واحد ف الشرق الاوسط كله
ياخدها بعد مصطفى مشرفة 

وبعدين رجع مصر بقى عشان يطبق العلم اللى درسه 
واتعين استاذ مساعد ف كلية العلوم جامعة فؤاااااد الاول
جامعة القاهرة يعنى دلوقتشى
حلو
 انا ليه بحكى كل دا غلاسة يعنى
ابدا انا بس بقولكم ازاى كان الشخص دا مجتهد
ومن الرواد وبيطلقوا عليه لقب ابو الكيمياء المصرى
عشان حاجات كتير

زى ان له فضل واشترك بشكل كبير
 ف تأسيس المركز القومى للبحوث
وكان اول مدير مصرى لمصلحة الكيميا المصرية
وكان عضو ف مجمع اللغة العربية
وحاجات كتيييرعلمية قيمة
ورأس تحرير جريدة الهلال لفترة
وبعدين مسك مجلة العربى الكويتية
اللى اغلبنا اكيد يعرفها وعارف قيمتها كويس

دا غير انها ترجم روايتين
من اشهر الأعمال الادبية العالمية
غادة الكاميليا وجان دارك 
يعنى كان رب العلم والقلم كدا 



المهمممم الحدوتة بقى
 انه زمان واحمد بيترقى ف كليته
لحد ما بقى استاذ كبير وقد الدنيا
وبعدين منصب العميد فضى
ساعتها كانت العمادة بالانتخاب بالانتخااااااااب
هه سامعينى يلى ف بالى ...

قوم اييييه ؟ 
الأساتذة اتجمعوا وراحوا منتخبين احمد زكى طبعا 
واتبلغت النتيجة لأدارة الجامعة
فبعتوها لرئيس الوزرا وكان وقتها مصطفى النحاس

 

سى مصطفى بص ف الورقة
وبعدين قال للى حواليه مين احمد زكى دا .. ؟ 
وبعدين قال لأ شوفولنا حد وفدى !
آه والله زمبقؤلك كدا بالضبط
ساعتها كانت كل وزارة تيجى تجيب مماليكها معاها
حتى لو ف جهات علمية برضو ميضرش
اهو يبقوا تبعنا وينفعونا وقت الجد 


 المهم احمد اترفض
والأساتذة ف الكلية كبرت ف دماغهم قوى الحكاية
ووصلت للمنافسين ف جرايد المعارضة اللى ما صدقت
وقعدت تشرشرح للنحاس ف الجرايد
واتعمل جلسة ف البرلمان !

مصطفى النحاس @mostafa_na7as
ولا حد كلمني ولا جابلي سيرة

 
وبس اتمخطر الباشا وطلع المنصة
ووقف يعدل ف الجاكتة
ويا دوب كان رده ف تلت كلمات 
 "القانون يعطينا الحق"
وراح نازل #كهين
وطبعا القانون بيعطيهم هذا الحق 

واخبطوا راسكم ف الحيط يا معارضين

ويا دكاترة ويا احمد زكى

 

 

 

الموضوع وقتها كان يبان انه خلص

واحمد زكى استسلم للامر

لكن ف وسط الضلمة دى هيطلع شعاع نور
 اسمه 
طه حسين 
 اللى هيرفض اللى بيحصل دا
ويقرر يتدخل ويعمل اتصالاته مع الكل
 ويكسر الدنيا ويفضح الوفد وممارساته
وتدخله ف الشأن العلمى
النحاس كان عارف ان طه حسين مشاغب
فكلم مكرم عبيد وقاله اتصرف

مكرم عبيد ملحقش اصلا
لأنه لقى طه حسين داخل عليه مكتبه وبيسأله:
عملتوا ايه ف موضوع احمد زكى
فرد مكرم : احمد زكى مين ..!؟
 راح عميد الادب مطرقعاله بقى وقاله :
يا اخى ان كنتم لا تعرفون أقدار الناس وقيمتهم 
فهذا جهل لا يصح الأفتخار به .. ! 
أىىىىىىىى 
هزأه 
ويستاهل

والمهم عمل معاه السليمة 
وحرقله دمه بالجملة دى وخرج 
ومكرم عبيد فهم ان المسألة دى لازم تتحل
وراح عامل اتصالاته وجاب وظيفة لأحمد زكى 
الوظيفة كانت مدير مصلحة الكيمياء المصرية 
واهى تبقى ترضية عن منصب العمادة برضو ونخلص
طه حسين اتصل باحمد زكى وسأله

احمد وافق وقال مش مشكلة أى مكان اخدم بيه العلم .. !  طه خد الموافقة وراح لمكرم مكرم  قاله طب احنا فيه شغلانة تانية والوظيفة دى بلاش ..!

طه حسين كان هينط ف كرشه
وبعدين قال يسأل صاحب الشان اللى هوه سى احمد
اللى رفض وقاله اقعد ف بيتى اكرم
وبس خلصنا على كدا ... 


 كام يوم فاتوا
واحمد زكى تلقى مكالمة بتعيينه مدير لمصلحة الكيميا
بـ 1200 جنيه سنويا وكلام شكر ودلع وبتاع
فأستغرب جداااااااا
وبعدين بقى بعد كام سنة  فهم ايه الحكاية !
 الحكاية وببساطة ان كل وزارة ف مصر
ف هذا التوقيت كانت فيها مستشار انجليزى
هوه اللى بيوافق وبيمضى وبيشيل ويحط
اما الوزير فمجرد بصمجى بس
 لما اتبعت الطلب لأول مرة
بتعيين احمد مدير للمصلحة .. 
المستشار الأنجليزى ف وزارة المالية مكنش عارفه
وطبعا رفض تعيينه وانتهينا 
لكن بعدها عميد كلية العلوم اللى خلصت مدته
وانتخبوا احمد زكى بعده .. كان انجليزى
وراح يشرب الشاى مع صديقه الموشتشار
ف وزارة المالية وبيدردشوا سوا
 وف وسط الكلام جت السيرة
فالمستشار سأل العميد السابق
لو تحب تعين حد ف مصلحة الكيميا تعين مين ..؟
فرد العميد السابق بسرعة البرق : 
احمد زكى طبعاااااااا 
وقد كان ..




واتعين الدكتور احمد زكى بعد كل الخلطبيطة دى
واللى عرف قدره كان واحد انجليزى
اما اهل بلده فكانوا أوغاااااد الا قليلا 

والدروس المستفادة بقى م القصة دى 
 اللى منقولة من كتاب لمحمود عوض
اسمه شخصيات 

انه
احتلال ولا مفيش احتلال 

حياة سياسية واحزاب ولا مفيش 

المناصب بالأنتخاب ولا بالتعيين 

كل حاجة بتيجى ف مصر وتتقلب لمسخرة ومهانة
ويعنى كل المناصب والهلمة والمصالح ووجع القلب

والراجل مقامه فضل وعلمه فضل 

وسيرته النضيفة فضلت 

ودا الاهم 

 

 

 

 القصة رقم (2)

الحدوتة دى بقى فاطمية على مملوكى
داخلين ف بعضشيهم
بتحكى عن المعز لدين الله الفاطمى
اللى لما دخل القاهرة ف موكب عظيم كان معاه توابيت !
 والناس اتخضت شوية
وقالت دا مجنون ولا جاى يسحر ولا ايه نظامه
قوم الجدع بعد شوية قال ف خطبة انه جاى مصر

ومعاه رفات ابائه واجداده .. ليه آحاج ؟؟؟

قالك عشان انا نويت اقعد هنا ف مصر ومش راجع المغرب تانى وجايب عيلتشى الصاحين والميتين معايا !        قصره الحاج دفن الأموات بتوعه ف تربة ابهة

وسموها التربة المعزية
وف اوقات لاحقة بقى اسمها تربة الزعفران
قالك عشان كل الخلفاء الفاطميين
واهلهم كانوا بيندفنوا فيها وتتزين
وتترش بالعطر والزعفران وتتروق وكدا 

كانت ف ضهر القصر الكبير ف مدينة القاهرة المحروسة وبيقولوا انها كانت مزار للرحالة
لازم يعدوا عليها يتفرجوا ويكتبوا عنها من كتر جمالها
وكانلها عوايد ووقف بيتصرف عليها منه 
وافلام 
 

وروح يا زمان وتعالى يا زمان
وتحصل الشدة المستنصرية
اللى جبنا سيرتها خمآشر ألف مرة والبلد كلها تتنهب
ويدخل العسكر الاتراك ع التربة المعزية
 وبيقولك انهم اخذوا قناديل الاضاءة
وكانت من الذهب وسرقوالاوانى الدهبية والفضية
والحليات بتاعت الشواهد 
وكل دا قدروه وقتها بـ 50 الف دينار
وياريتها جت على كدا .. دا بعديييين بقى
لما هيزول ملك الفاطميين وييجى الأيوبيين
وبعدهم المماليك .. الشيك الرومانتيك
انتوا هارشينهم بقى !!



ف زمن السلطان برقوق هيعين واحد من مماليكه
أمير آخور يعنى ايه دى يا شهر ؟
يعنى بالبلدى كدا مدير الأسطبلات
والمسئول الاول عن حصنة السلطان
 منصب مش قليل يعنى وفيه فلوس كتير وابهة 
القصد مين أمير آخور برقوق ان شاء الله ؟
واحد بعيد عنكو كان اسمه جهاركس الخليلى
ايوه



ايوه هوه اللى جه ف بالكوا تمام
الاخ جهاركس بقى كان شخصية وضيعة الحقيقة
الى ابعد حد
بص كدا ف الأراضى كلها
قوم ملقاش مكان يعمل فيه خان الا ..  التربة المعزية
 قال موقعها حلو وف وسط الدوشة والأسواق
 المهم حط ايده عليها
وراح مخرج عظام الفاطميين المدفونة

ايه نقلها ؟؟
لا حضرتك دا اخدهم رماهم ف المزابل

اللى كانت اكوام جنب باب البرقية .. ! #تخيلوا

وبعدين بنى بقى الخان الشهير

وقعد يلم ف اليغمة ويحوش ويكوش ولا ف باله
لحد ما برقوق خرج ف حملة للشام
وخده معاه ضمن الأمراء
 وف معركة قرب دمشق انقتل بسلامته
وبيقولك ايه أن جهاركس
"ترك على الارض عاريا إلى ان انتفخ وتمزق"
ولحد ما ولاد الحلال جم شالوه ودفنوه ..!
والناس بقت تتهامس ما بينهم
وتقول انه الموتة دى سببها فعله اللى اتردله
لما نبش قبور الموتى

وبس الخان انتقلت ملكيته
 راحت للسلطان الغورى بعد زمن
اللى اخد المنطقة دى كلها وعمل مسجد وسوق ووكالة 
 وفضل خان الخليلى محتفظ باسم منشئه

 

وملاحظاتى ع القصة دى الحقيقة
ان المماليك دول يا اخى ولاد أصول
وذوق ذوق ذوق بيخرجوا رفات الاموات من القبور
ويرموهم ف الزبالة شوف الحنية !



ثانيا الناس اللى قالتلك شوف جهاركس مات ازاى
عشان عمل ايه
ليه انشالله 
لهوه المماليك اصلا
كانوا بيموتوا الا الموتات النيلة البشعة دى
احنا هنستهبل بقى !

 ثالثا بقى الفاطميين
كانوا حاطين اوانى فضة ودهب ف المدافن بتاعتهم ليه؟
فكرونى بمقبرة اللى مش عاوز يموت
ربنا ياخده #مبارك
عموما ..
 أحب ابشره هوه وغيره انه مش بالزواق
ولا الدهب ولا الغنى ولا الف حرس 
.. وقبله ناس عملت وكلفت ودلعت 
وكله راح حتى هما عضمهم مفضلش ف مطرحه 
 :( 
#دنيا


القصة رقم (3) 

 

عن الفاطميين برضو لما بنوا الجامع الازهر
وبقى علامه ف تاريخ مصر
وكان طول الوقت تحت اشراف الدولة اللى بتحكم 


لحد لما بعد وزال ملك الفاطميين
وجه صلاح الدين الايوبى عمل قلق
وكتم نفس الازهر لفترة طويلة
وبعدين برضو كانت ادارته تحت السيطرة 
ولما جم المماليك كانوا بيخلوا المشرف

على ادارة شئون الأزهر واحتياجاته وخلافه 

واحد من كبار رجالات الدولة

وطبعا بيكون أمير من وسطهم 

 لحد ما دخل العثمانيين مصر

وساعتها وللغريب انهم متدخلوش ف ادارة الازهر

وسابوه لشيوخه اللى كانوا بينتخبوا من بينهم واحد

يكون امامهم

وهيحصل دا فعلا تقريبا سنة 1679م
لما هينتخب الشيخ محمد الخراشى امام اكبر
وأول شيخ للجامع الازهر ف تاريخه
والراجل دا هوه حكايتنا
 بيقولوا انه من قرية ابو خراش من البحيرة
وكان راجل عظيم ومشهور بالورع والتقوى والصلاح
ومش بس كدا كان خدوم وبيقضى مصالح الناس
ولهذا ولمكانته 
والامرا اللى مكنوش بيرفضلوه طلب

ف اوقات الشدة كانت الناس بتستنجد بيه
وتنده عليها وتقول الحقنا يا خراش
 ومن هنا جت الكلمة دى اللى بنستعملها
ف المواقف النيلة والازمات

الخراشى كان محبوب فعلا بيقولوا عنه 
"ما ضبطناه ساعة هو فيها غافل 
عن مصالح دينه ودنياه " 
وقعد ف المشيخة لحد ما لقى ربه

وفضل المشايخ يتعاقبوا على الأزهر
لحد ما وصلنا للأيام السودة 
اللى احنا فيها بمشايخها العرر
ولاألف 
ياخراشى تنفع معاهم

 

 
القصة رقم (4)

 

 

 

 

ودى بقى روايح اسكندرية الماريا

بس الحكاية هتبدأ من الاندلس ف بلد اسمه مرسية

على اليمين اهى :)

 

 

هينولد فيها فتى لأب تاجر غنى وميسور الحال
هيعلم ابنه ويحفظه القرآن ويخليه يدرس علوم الدين
وبعدين يشتغل الولد مع الأب ف التجارة
لكن ...

قلبه يفضل متعلق بالعلم ويغوص ف بحر الصوفية
ويسافر مع اهله للحج
وف طريق الرجوع مركبهم كانت هتغرق
وترسى بيهم على شط تونس
وينزلوها
 وهناك الفتى هيقابل الشيح ابو الحسن الشاذلى
اللى كان من اعلام الصوفية ف هذا التوقيت
ويقعدوا سوا مع بعض شيخ ومريد
لحد اخر العمر ...

وبعدين هينزلوا اسكندرية .. 
 تقصدى مين يا شهر ؟ 
الشيخ ابو الحسن الشاذلى وتلميذه
اللى هوه .. ابو العباس المرسى
ونسبه الى مرسية بلده
 

احنا هنا بنقول عليه المرسى ابو العباس
واللى هيروح مع شيخه الجامع الغربى
اللى مكانه دلوقتى جامع العطارين الشهير
والشيخ يدى دروس والمرسى يتعلم منه ويخدمه

ويفضل كدا لحد ما ابو الحسن الشاذلى يلقى ربه

 

 

 

ويقعد المرسى ابو العباس يكمل المسيرة لحد النهاية 

ويدى الدروس ويعلم المريدين
ويفيض بنوره لحد ما يموت
ويندفن ف حتة ف اسكندرية
اللى هيا بعدين لما يروح الزمان وييجى
هيتبنى فيها مسجد باسمه
والمعروف بمسجد سيدى مرسى ابو العباس 
 ومش هيا دى الحدوتة على فكرة
الحدوتة الحقيقة ف اللى بنى المسجد .. !

 

 

 

الملك فؤاد ف عهده تمت انشاءات كتير

ومن ضمنها مسجد الرفاعى اللى مجاور للسلطان حسن

قصاد القلعة عارفينه طبعا 

لما قرر فؤاد يخلص الجامع دا
جاب فريق من ايطاليا فنانين ف العمارة والزخرفة وخلافه
عشان يعملوا الشغل المتين .. حلو ؟ 

من ضمن الفريق دا كان شاب صغنن كدا واعد
مهندس إيطالى اسمه ماريو رُوسِّى
الشاب شارك ف انهاء الجامع وانبهر ايما انبهار
وزى ما تقولوا كدا قلبه خده
ووقع ف غرام العمارة الاسلامية
وغرامه بالمساجد وصل لمداه 
وقعد يدرس ويتعلم ويتمحص ويتفحص
لحد ما جاله شغل جديد

ايه هوه ؟؟ قالوله مولانا كلفك تبنى مسجد ف اسكندرية
هيكون اسمه .. مسجد المرسى ابو العباس
وفعلا بدأ ماريو الشغل 

وبيقولوا انه بدأ البنا فيه 1933
وخلصه 1944 
وبيقولوا انه جاب عواميده من برا 
مستوردة يعنى ومعمولة جاهزة 
وبيقولوا كمان ان اول صلاة اقيمت فيه
 كانت 1947 واللى بعد انتهائها
ماريو روسى ..  اعلن اسلامه ف قلب المسجد

 

وخلاص ربنا فتح علينا وخلصنا بنا

ودخلنا ف الأسلام كمان 

ندوس بنزين بقى ونخش ع المسجد اللى بعده

ومش هتصدقوا يا عيال 

 

 

 

 
مسجد القائد ابراهيم

ويبدو انه كام مغرم بالمآذن الطويلة

اللى هتبقى سمة مميزة له بعد كدا

 

 

 
 

المسجد التالت .. 

مسجد محمد كريم قرب قصر راس التين

وبيقولوا مئذنته الطويلة كانت هتعاكس السفن

لأنه قرب الفنار 

فماريو هيعدل شكلها ويعمل مئذنة عجيبة ف وقتها شوية 

تفاديا للمشكلة دى 

خلصنا اسكندرية هننزل القاهرة بقى

 وهناك ودى معلومة اول مرة اعرفها

ان ماريو روسى هوه اللى هيبنى مسجد عمر مكرم 

اللى ف ميدان التحرير يا ولاد

 ... تخيلوا !

 

هيبنى مسجدين كمان

منهم الواحد اللى ف الزمالك ع النيل 

وبعدين يموت 

ويقال ان ذريته ما زالت ف مصر مخرجوش 

ولا مشيوش 

 وخلاص الحدوتة دى خلصت

وملاحظاتى انه 

ببساطة كدا 

ايه أم البلد الجميلة اللى احنا عايشين فيها

وممرمطينها معانا دى بجد ايه ... ؟!!

لأ صحيح

 يعنى الراجل جاى من الاندلس 

عشان  يعيش عندنا ويموت ويندفن ف أرضنا 

ويتبنيله جامع باسمه بعد ما مات بييجى 300 سنة واكتر

ويطلع اللى يبنيه واحد ايطالى 

والواحد الأيطالى دا يعلن اسلامه ف نفس الحتة دى
ويخرج يبنى ف مساجد تانية
يتصادف انها كانت ف الثورة اماكن 
تلم فيها البشر للخروج ف وش الظلم 
واترفعت فيها الأيادى بالدعا بالنصر
واصطفت للصلاة ع الشهدا !

لأ بجد .. ايه الحلاوة دى ؟

 

القصة رقم (5) 

الصورة من حديقة متحف بولاق

ودى بقى عن مسخرة م المساخر
لما كانت الآثار المصرية بتبعتر كرامتها
وكانت مهزأة للأسف
ومرة هنبقى نحكى حكايتها بالتفصيلى المملى
ازاى لموها وجمعوها ف مكان 
 الملخص  ان اول نفر احترم الاثار شوية
وقرر يلمها ف مطرح كان مارييت باشا
اللى له الفضل ف بنى متحف بولاق 
واللى هنحكى عنه برضو ف مرة كدا قريبا

المهم ان الحاج ماريت باشا  ربنا كرمه 
ولقى مومياء لفرعون من الاسرة السادسة 
واسمه ميرن رع 
او مرى إن را 
 الناس الفاهمة ف المصريات يساعدونا
قوم مارييت قرر يبعته مع مرسال من البدرشين لبولاق 
عشان يتحط ف المتحف 
حلو

 

انا عملت سيرش ولقت التمثال دا له 
وعالله يطلع صح بقى 
المهم خدوا يا ولاد الموميا اهى 
ورحوا اركبوا القطر م المحطشة 

الولاد ايه بقى ..؟ 
هيلفحوا الموميا دى على كتفهم 
ويمشوا بيها ع الطريق لحد المحطة ولا ايه ؟ 
لأ طشبعن جابوا حمار 
اذ انها كانت المواصلة الاولى وقتها
 

 وهوب يا بنى شيل الحاج مرن رع حطه فوق الحمار 
 هتقولولى حطوه ف صندوق وكدا يا شهر؟ 
هقولكم .. ابضنننننننن
دول بعيد عنكم حطوا الجثة بالعرض 
على ضهر الحمار قوم الفرعون يا نضرى 
بقى مدلدل من الناحتين كدا ومنظره يقطع القلب 
 لحد ما وصلنا محطة القطر والحمدلله
 

 خلاص كدا المسألة سهلة وخلصنا 
ابضنننننن 
دا  ناظر المحطة لما شافهم قالهم ايه البتاع دا 
دا مش مكتوب عندى ف كشف البضايع 
عشان ادفعكم عليه تذكرة تنفعله ؟
يا عم خلصنا وشوفلنا أى مخرج 

 م الشمال لليمين لفوق لتحت ف الآخر قالهم
 دا ميركبش قطر البضايع
 وتاخدوه جنبكم ف الدرجة الاولى ركاب
 :)))

المرافقين للفرعون البائس قالوله ماشى
واحنا اللى هندفع من جيبنا يعنى .. !
 المهم القطر مشى ووصلنا المحطة 
وخرجنا بيه من على ضهر الحمار لحد كوبرى بولاق
 وعاوزين بقى نعدى بيه الكوبرى 
عشان ندخله المتحف 
 والكبارى زمان نظامها كان ان 
أى بشر او حيوان او جماد كان بيدفع قصاد 
ما يعديها رسوم .. فأيه ؟؟

الناس بتوع المرور اللى واقفين بصوا ع الموميا 
وقالوا نفس الجملة اياها 
 داحنا معندناش ف الكشف موميا 
ولا نعرف رسوم للبتاعة دى ؟ 
وبعديييين بقى
 اعتبروه بنى آدم .. 
لأ اعتبروه حيوان ... 
لأ اعتبروه رجل كنبة بس نعدى يا عم 
وفين وفيييييين لما واحد قدح زناد فكره 
وبعدين قالهم .. خلاص عرفت
 الموميا دى فسيخة .. متحنطة اهى تبقى فسيخة 
ادفعولها رسوم زى باقى الحاجات اللى بتتاكل ... ! 
وخلصت الحدوتة على كدا

وملاحظاتى بقى ومعلومة ف السريع 
ان زمان قبل حوارات المتاحف والحفاظ ع الأثار
 والحاجات دى كانت المومياوات بتتباع عادى كدا 
ف الشارع

وشوف الفرعون دا كان اكبر راس ف مصر 
والكل يحسدوه على عيشته
 لكن محدش اظن حسده ابدا على موته 
واللى جراله بعد موته 


 
 
ثانيا .. 
معرفش الحاج مرن رع 
واذا لسه الجتة بتاعته حدانا ولا راحت ف الوبا 
بس أحب اقوله كلمة واحدة بما انه مصرى

ثالثا روح يا زمان وتعالى يا زمان 
ولسه برضو الأثار المصرية هيا هيا ... بتتبهدل 
و سعد زغلول دايما بيكسبها عشان
 

الحدوتة رقم (6)

 
ودى سريعا سريعا عن الجميل النبيل
الضاحك الباكى عاشق الحياة والجمال 
نجيب الريحانى
 بيقولوا ان كان عنده كام أخ اتنين 
اشتغلوا معاه ف الفن بيساعدوه اداريا
والتالت واللى كان أقرب اخواته له واسمه جورج
دا اختفى فجأة بلا سبب
 وبيقولوا ان الريحانى قعد يدور عليه ف كل حتة
وكان بيحبه جدا ولحد ما نجيب مات معرفلوش طريق
والشرطة بعدين كشفت عن الحكاية



ايه بقى؟

آل جورج الريحانى ساب المسيحية ودخل ف الأسلام ولأنه امه ست صعبة وكانله اخ غير نجيب .. لبش شوية وشرانى جورج خاف من ردة الفعل وطفش بعيد

فيه ناس قالت انه اتجوز وهرب مع اللى بيحبها
وناس قالت انه دخل الدير وانعزل
بس البوليس لما دعبس عرف انه أسلم
وهرب خوفا من المشاكل

المؤسف بقى ان الناس اجمعت على ان جورج
لو كان فعلا هرب خوفا من رد فعل الريحانى
فيبقى غلط الغلط الكبير
لأنه نجيب الريحانى قرى القرآن
 قراه مترجم للغة الفرنسية الاول
وبعدين قراه بالعربى وحفظ منه شوية
وبيقولوا انه ف مرة كان ف زيارة للمراغى شيخ الازهر
لسبب ما .. وسمع عنده حد
 كان صوته حلو قوى وشد انتباه وحواسه جدا
وبيقوله مين دا يا مولانا
قاله دا الشيخ محمد رفعت
وعرفهم على بعض وبقوا اصدقاء 
 ونجيب الريحانى كان بيروح ف اوقات
ما يقدر يفضى يعنى 
ويسمع تلاوة الشيخ محمد رفعت
والكلام دا فضل يحصل لحد آخرعمره

نجيب الريحانى مات بسبب جرعة دوا غلط
جابها من برا مخصوص 
واخدها ف المستشفى بعد ما جاله التيفود
وبعد موته السريع
محرر من احدى المجلات راح فورا على شقته
كانت الشقة ف عمارة الأيموبيليا 
ف ناصية شريف وقصر النيل بوسط البلد

المحرر كتب ف المقالة انهم لقوا ف أوضته الآتى

44 بدلة 20 بيجامة وجلبية و15 جزمة
 ومصحف وانجيل وصورة للقديسة سانت تريزا
ومذكرات تشرشل بالفرنسية
وكتاب حسن البيان في تفسير مفردات القرآن
 وألفية ابن مالك وبعض مسرحيات شكسبير

واخيرا لقوا كلبته اللى كان اسمها (ريتا)
والأنسة ريتا زعلت على نجيب زعل الدنيا
ورفضت تاكل لحد ما ماتت 
:(



وفيه مقالات بتنقل عن بديع خيرى
الصديق الصدوق للريحانى كلام كدا
ان الريحانى كان بيفكر يسلم فعلا
بس الوقت بقى والعمر
القصد أى كان يعنى 
 الريحانى كانله أخ مسلم
وهوه نفسه كان بيحفظ من القرآن وبيحب يسمعه
وقعد مدة لحد ما عرف ان بديع خيرى مسلم
وحاجة متسامحة وحلوة وبهججة كدا 
مبتحصلش كتير

 

واخيرا الصورة دى من عزا الريحانى
وفيها المزمزيلات كاميليا وكاريوكا بيعيطن 
 بس هوه الراجل كان بيقدر الجمال 
ومكتوباله 
نستلف م القصة اللى فوق واحدة .. آخرااااااشى

وتوتة توتة خلصنا


---------------------------------

Yasser Abdullah @Yasserigo  
مرة لقطت صوته في تسجيل للشيخ رفعت
 لو عترت فيه قريب هابعتهولك

مرحب يا سي عيد!! @nohabakla 
#يهده الروتين :/

 

مصطفى النحاس @mostafa_na7as
 فسيخة فاميلي سايز :D

passant el borollocy @Passinta
هههه اخرتها فرعون متحمل على حمار

 فروح وريحان @mohamedtamimi1 

 معظم من اتى الى مصرمن الشيوخ او المريدين

 مات بها وبنى له مسجدا باسمه

 

amr salem @amrosalim2001
ايه ده هو نجيب الريحاني مسيحي؟

هنا شعب أنتيكا @nohabrahim @amrosalim2001 @ro7albmama2  شفت الجمال... مافيش أهمية أننا نعرف المسلم من المسيحي

passant el borollocy @Passinta
طيب الواحد يشترى مومياء يعمل بيها ايه ؟

 

amr salem @amrosalim2001
@Passinta @ro7albmama2 
يكلمها في الليل حضرتك بدل ما بيكلم نفسه

passant el borollocy @Passinta

@amrosalim2001@ro7albmama2 

 و ماله اهو ونس برضه